今朝，新聞話股市高開，11個月嚟新高。心諗，呢11個月發生咩事，經濟發生咩事，個股市，平行時空到咁！得閒望吓財經app，樣樣都話ATH(all time high)。

Tesla $880。Bitcoin - $40000, 今日跌咗$7000。

點解？一街cheap money。

//那一剎，我發覺自己又做了自己的teller。

可有想過，現在的銀行，還為你提供什麼基本服務嗎？有了提款機、網上銀行，基本銀行服務都自助了，分行也少了。

銀行如今的存在，是服務你，還是主力提供產品給你消費／投資，其實在消費你？由提供service，到不停向你促銷product。

抗疫在家，看了更多網上影片，YouTube有DW Documentary頻道，紀錄片精如我的另一個寶藏。
Deutsche Welle（德國之聲）電視台，由德國政府撥預算資助的公共國際廣播機構，有點像BBC及我們的香港電台，DW的節目，時代、資訊及趣味性都強，最近看了《How the rich get richer – money in the world economy》，值得在新年之始醒覺反思。

“Cheap Money”，聽過嗎？現在一街都係。

“Cheap Money policy”，說穿就是「一街都係錢政策」。一街都係的，就唔值錢，一街都係的，是賤錢，廉價的錢。

賤錢何來？中央銀行。ECB (European Central Bank)、現在美國更是，銀紙拚命印，又量化寬鬆，被批評有如龐氏騙局的經濟政策。結果是..........//

愈上層愈富、中產消失、令下一代長期吃力地掙扎於經濟泡沫，喘不過氣來。

//救市、印銀紙；救疫，又印銀紙。為了不讓經濟衰退，由政府開始，逼全世界玩「 」，而非用生產力兌換財富的紙上富貴，即是離地。一味印銀紙，救了衰退，殺死了經濟周期，不讓市場有自我修正的機會。錢，已跟經濟脫軌。

片中的經濟學家Professor Max Otte說: “This flood of money has caused a dangerous redistribution. Those who have, get more. But with low interest rates, any money in savings accounts just melts away......//

製造了全球最大的賭場......成為另類的輪盤、百家樂，希望人們不儲蓄，去下注。你不賭，錢又乾貶值。

//任何泡沫，結局一定是爆破，用止痛藥治病自欺欺人。專家認為銀行是罪魁，必須重新監管.....//

爆破的準備，大家必須有，問題是你博到幾時才收手。

(多謝問我係咪冇寫明周文化的忠實讀者們，你們真好，有心，多謝！告咗兩個月假，一來家中有事，二來想執好個處女舞台劇，點知，唔使做啦......

明周Book B有感情，不會輕易不寫，我回來了！)

#CheapMoney
#DWDocumentary
#DeutscheWelle #德國之聲
#一街賤錢 #用銀紙賺銀紙
#Bitcoin話會變50萬 #Tesla四年升上7千
#等爆 #或永遠泡下去
#明周文化
#畢明 #FinerLife

［團年吹水話題］千術奇談：移民英國騙局，令我諗起馬多夫

Somehow or other I’ll be famous, and if not famous, I’ll be notorious. — Oscar Wilde

畀啲耐性，呢篇保證好睇，同埋唔係好長。

古語有云，當匪，我們要當最大的。即使一街都老千，馬多夫都真係經典。龐氏騙局一街都係，總唔見個個都名留青史有人拍戲。

馬多夫嘅騙局在2008年尾，即係金融海嘯雷曼爆煲後浮面。經濟學人當年聲稱佢係「世紀老千」，留意人地用字一向克制，唔係香港啲媒體（or even worse，網媒）咁乜都世紀乜乜 百年一遇。經濟學人話，完全係為當年（2008）一眾大鑊嘢劃上完美嘅句號，實在諗唔到有乜更適合去埋尾。

或曰，雷曼爆煲冰島爆煲AIG All Investment Gone，馬多夫又有乜咁特別？因為，佢只係一個人！一個人之力玩到眾大行以及眾有錢人一鑊甘，其實好難。當年匯豐業績，正如其他銀行一樣，有因為雷曼嘅write off，有因為冰島債嘅write off，仲有因為馬多夫嘅write off- 一條友個名可以咁樣上業績powerpoint，含笑九泉啦。

咁關香港「移民英國」騙局乜事？

馬多夫呃嘅唔係普通人，佢唔係咖啡兄弟式每人呃一萬幾千，佢呃嘅全部係好有錢嘅人，或者好大嘅大行。露營車一文，講過門檻低嘅嘢易出事。門檻低嘅東西如果好過門檻高，窮人追上有錢人啦—但你有冇見過有咁嘅事？
有錢人除咗投啱胎（畢菲特講嘅 Ovarian Lottery 卵巢彩票）外，總有過人之處。可能好仆街，可能好孤寒—但總之有錢人精甩邊又見過大把茂利，你想昆佢啲錢，冇咁易（咩網上情緣扮暖男美軍石油鉅子例外，所以呢個係好工作）。用類似進化論嘅思維睇，易畀人昆嘅，就中途輸咗錢啦（好似英國移民騙局啲苦主咁），邊上到去做富豪。

但馬多夫叻在乜？叻在佢唔係好貪。叻在佢識捉心理。有錢人見騙子多過你，好可能自己都係呃呃騙騙出身。你話保證每年五成回報，咩一年升幾倍嗰啲，只能呃啲最笨柒嘅人—可能量夠多，但雞碎咁，唔知執幾耐。況且咁多人受騙，總有一個報警。倒不如我呃筆大嘅，幾條友，搏佢啞子食黃蓮—反正窮人兩萬身家輸兩千會報警，富豪兩百億冇廿億-都係咁生活啫。

馬多夫叻在，佢知道你都知道「too good to be true」。每年五成回報你實知有問題（OK，你唔知，但有錢人知，所以你唔係有錢人）。但佢只係保證一年10%或12%回報—聽落唔係天方夜譚，雖然都畀「大市」高，但叻人話做得到，你會信。（換著香港啲奇才個個話10-12%咁少，我都得啦（係？））。有錢人更加覺得「佢係呃人就呃大啲啦」—拿，就係捉到呢種盲點

另外，佢啲投資者一樣有睇我寫文（講笑啦），知道門檻太低易出事。所以馬多夫特登飢餓營銷，好有耐性，食相好好睇，同佢本人一樣（謙謙君子嚟的）。唔係你想參加就得架，入到係身份象徵。「拿我真係唔係為錢」。甚至一路畀啲甜頭你，有派息。

等於啲咩半價買iPhone騙局，騙子真係真金白銀自己買部電話半價畀你，蝕的—為咗釣大魚，你下次買一百部佢就走頭。另一個故事係，流浪漢搵人借錢，答應下星期就還double，有人（唔一定係媒）借一百蚊畀佢，佢下星期果然搵兩百—然後成村人爭住借錢畀佢，佢就走佬啦

咁同香港呢單騙案有乜關係？我講咗咁多，呼之欲出啦

第一，條友一樣「唔貪」。佢每年仲要派息畀你。但如果派十厘你都心諗有問題啦，邊有有咁大隻蛤乸隨街跳呀。佢就只係派一兩厘，等你覺得有啲嘢返嚟，但又唔係騙局。「係呃都講多啲啦」

第二，佢收嘅手淫費一樣好克制。都係執你四十萬港紙顧問費，中中停停，唔算太過份。「係呃都呃我多啲」。太少你覺得有詐，太多你唔制—但項莊舞劍，志在甜品啦。本都食埋你先係戲肉嘛。

第三，我作嘅，false sense of security。呢樣嘢先係最危險。馬會點解要幫你做免費分析話你知六合彩之前開乜？點解要免費派「三料王」（冇咗好耐啦？）？葡京點解咁好死畀你睇到百家樂之前咁多舖開乜？全部因為等你以為有路捉，有「虛假的安全感」 。馬經，大行報告，好大程度都係咁嘅嘢

今次嘅「虛假的安全感」，嚟自英國。首先香港人有呢啲戀英情結，先天已經贏一仗，又有啲仔女在嗰邊讀書，嗰邊有朋友之類。叫你投資索馬里定塞拉利昂你睬佢有味啦下話？另外，份約在香港簽，但jurisdiction 在英國。以下係我創作，但簽嗰啲心諗，刁，香港法治已死三權合一畀中共入侵啦，梗係信英國，法治之地。下話。英女皇幫你追兩百萬呀可，慢慢等。

________________________________________
講到尾，我嘅睇法相當偏激，亦唔止一次講。香港呢，就香硬架啦。冇能力冇得講，但有能力嘅應該去移民。有仔女在果邊讀書唔好返嚟，有機會嘅爭取外駐。有錢嘅去加拿大澳洲英國新加坡，冇錢嘅台灣，再冇錢嘅，嫁洋腸娶台妹都係選擇。(唔開心、討厭香港、有錢，點解唔走？ bit.ly/2RGJi7S)

但就係話，「記得幫襯信得過嘅移民顧問」，有啲錢唔好慳。其實正式投資移民英國門檻高好多。記唔記得教訓呀？低門檻嘅乜鬼創業移民，自然易有人出古惑。否則仲有人買貴嘢？有錢人一樣想慳，不過唔易因小失大
但又即係，每個賤男畀人踢爆之前都係暖男，每個騙局未出事前都好好的。都唔好咁口響，當年我搞移民台灣，都其實冇諗過會唔會有人昆咗我舊錢。See? False sense of security。「台灣人唔會咁仆街掛」

不過有樣嘢我冇驚過，就係錢從來冇去到移民顧問公司手。對，佢梗要收我顧問費，好似兩期過，好似都幾皮嘢（三五七萬港紙？唔記得啦）。但我想嘅係，投資移民台灣嗰600萬台幣，即係150萬港紙，由頭到尾都冇去到移民顧問公司手。亦都唔應該去。Touch wood 講句，就算佢真係唔係呃人，但一個唔該忽然財困執笠，你咪仆街？

由頭到尾，移民公司只係幫我開銀行戶口。其實一早搞咗（肯定銀行職員都有回佣之類啦，明的）。我就放150萬港紙落去台北富邦銀行（唔怕講）。咁即係富邦昆你嗰150萬然後執笠嘅，就你唔好彩，到時去佔領忠孝東路啦

但如果係咩「合伙做生意嘅」，就祝你好運。唔敢話一定係騙局，好多都唔係。但點解要冒多一重風險？再重覆一句，門檻低嘅嘢領嘢機會當然高啲，否則仲有人要門檻高嘅嘢？夾錢做生意係世界上第二危險嘅事（第一係夾錢買六合彩），咁你鍾意過老闆癮，就記住過癮係消費，有代價的。