話說上年嚟咗維記兩個月左右，我就得罪咗一個人。

佢係一個Cabin Leader，即係茄子航空所稱嘅Flight Purser（乘務長）。第一次見到佢嗰陣，佢係一個黑黑實實、粗眉大眼嘅肥仔。唔知係咪由細到大，我都生得比較細粒同潺弱嘅關係，我見到佢嗰時，就覺得我係多啦A夢／叮噹入面嘅大雄，而佢就係胖虎（下稱呢位同事做胖虎），所以我一早已經對佢有所防範。

咁上到機做嘢，都冇乜嘢嘅。但到咗派餐，就出事喇……

去到最尾嗰幾行，我哋已經派到冇哂choice，呢個時候，有個操廣東話嘅男人，好堅持一定要食飯，但好可惜，我哋已經冇哂飯。胖虎同佢講：「對唔住呀！我哋已經冇哂飯，不過仲有另外兩個選擇，你會唔會考慮？」點知呢個男人發哂茅：「Do you treat me as a dog? I eat what you give me?」呢個時候，作為小薯嘅係，緊係企埋一邊隔岸觀火。胖虎仍然好有禮貌：「I am sorry. I have snacks and noodles. I can give you all I have.」個男人依然充滿火氣：「Don’t treat me as a dog! I just want rice!」佢嗌到直程成個機艙都聽到！附近嘅人都望哂過嚟……講真我飛咗三年，都未見過有人堅持要食飯堅持到呢個程度……但所有飯都真係派哂，冇就係冇，胖虎都唯有咁同佢講，只能夠盡力比到我哋有嘅嘢畀佢……

雖然胖虎咁樣講咗，但男人依然都唔領情，到我哋返咗galley，佢依然喺出面大呼小叫，話我哋「treat him like a dog」，睇嚟呢位先生係好典型嘅動物愛好者。呢個時候，我唔知戚起邊條筋，同胖虎講：「不如我哋睇下Business Class有冇飯剩，拎畀佢食啦……」其實我作為一個文化大使，係唔應該咁多事，同埋始終呢度係人哋地頭，我唔知咁樣啱唔啱人哋規距……胖虎就話：「Business Class都有Business class嘅乘客，同埋我哋唔應該為咗一個乘客嘈而遷就佢，始終冇哂choice唔係我哋嘅問題，我哋已經盡咗力用我哋有嘅resources去幫佢……」雖然佢咁講係好有道理，但我唔知點解好死唔死、又自把自為、唔會胖虎所講，去咗Business Class問有冇飯剩，仲拎埋畀個男人食。因為我覺得，個男人係咁嘈生哂都唔係辦法，總唔能夠唔理佢！個男人一開頭仲耍哂手、擰哂頭、十分有尊嚴地表示唔食，之後氹兩氹終於肯食飯，最後平息咗怒氣。

胖虎知道我咁做緊係興過火屎，就同我講：「呢個就係你哋啲Asians做嘢嘅方式！縱到啲客咁！佢哋搭得飛機！唔係皇帝！大家應該係互相尊重！」冇諗過我咁樣一個舉動，就突顯咗中西文化差異。中國人始終習慣息事寧人，又鬼死咁驚人哋投訴，當正啲客係大帝咁……每次我諗返起呢件事，真係覺得自己好鬼死大膽……我竟然喺人哋公司，唔理一個cabin leader嘅建議，去執行自己覺得啱嘅嗰套……

咁班機就咁就完咗。 畢竟維記香港線飛嚟飛去都係嗰啲同事，冇幾耐之後，我再次同胖虎飛。佢第一句劈頭埋嚟，就話：「哇又係你呀？每次同你飛都冇好嘢發生㗎喎……」佢講得好啱，之後再同佢飛，硬係會有啲關於客嘅嘢再發生，而且係獲獲新鮮獲獲甘……

到喺維記大年半年，我已經同佢飛過好多次……再同佢飛，佢就話：「睇下今班機又有啲咩發生先……」然後我就串返佢：「都唔知係我黑住你定你黑住我呀……」後尾，我哋變咗有講有笑……有次喺galley得返我哋兩個，所以有機會傾計了解下大家。之所以佢黑黑實實，原來佢係來自一個喺紐西蘭附近叫Samoa嘅小島，澳洲同紐西蘭人叫佢哋做Islanders，佢仲叫我第日一定要去呢個島，話嗰度水清沙幼，以前有好多中國移民，仲話自己有中國人血統咁話！仲有，睇唔出呢個胖虎大大隻隻，唱起歌上嚟鬼死咁好聽，佢喺galley有時做做下嘢會哼返兩句，啲同事都會拍哂手掌，我成日問佢：「澳洲有冇The Voice㗎？你去參加我實支持你……」

到今日班機，我同佢講：「我尋晚瞓得唔好，你可唔可以畀個first break我？」（澳洲呢班機有兩個breaks，同事可選擇其中一個）。點知佢話：「緊係得啦！你講過嘅嘢我幾時有試過唔畀你？」

放工之後，我跟咗班同事去佢哋酒店，諗住之後同佢哋一齊去玩。我同佢行喺港島嘅電車路軌邊，我突然見到有個ATM，我話要去撳錢，佢話：「我都要呀！」撇完錢之後，我同佢講：「我真係冇諗過會同你會做到朋友，一開始仲覺得你好兇……」佢話：「你而家好愛我係咪？」然後我又反咗一百個白眼……然後我哋最後講byebye，擁抱時我仲乘機搣佢個大肚腩……

正所謂，不打不相識，估唔到一開始我最驚嘅胖虎，其實係一個心地好好嘅肥仔。諗返起成件事，我覺得自己好衰，一嚟我自己先入為主咗，覺得肥仔一定會蝦我。我諗，喺職場上，唔係一定係烚熟狗頭嘅先係好，有時反而呢啲人先係笑騎騎、放毒蛇。有時有啲人可能講嘢好直，或者先係最真。有時好多誤會，只係因為大家冇機會去了解大家。

同埋，我覺得去得人哋公司，應該係要觀察同學習人哋做嘢嘅一套。其實，自從冇choice事件之後，我都冇再咁自把自為。反省返，始終我嘅身份係一個文化大使、係一個交流生，應該好似個海綿咁，去吸人啲好嘢。好多人話做cabin crew可以增廣見聞，我諗就係從唔種族、背景、經驗嘅人身上汲取唔同嘅做嘢方式，去擴闊自己嘅眼界，從而變得更open-minded。

希望經過呢個交流，我嘅思想唔係再係咁狹窄！

同埋，我好愛你㗎！胖虎！

大雄上

「自願被你欺負
世界對我太可惡
我愛你卻極頑固」－《大雄》
https://www.youtube.com/watch?v=V5eHdFE6yPM

My Vlogging Camera is Sony 5TL

Knit top from Monki (4 years ago)
Basic white tank from Muji
Trousers from local shop in Kowloon City
Grey flats from Marcha ( LCX@Harbour City,Hong Kong)

I bought the Chanel and Dior perfume style phone cases from IG shop:
http://www.instagram.com/beans_collection

Find me on:
FB: http://www.facebook.com/eliyty
IG: http://instagram.com/elizabethyeung