【龔成問答信箱】（Q22301-Q22320）

Q22301：

Hello 龔 Sir, 幾個月前開始接觸你，另外，我先生買咗幾本你嘅書，我睇咗你其中一本書，其實我二十多年對投資都有少少心得，只係較少接觸新經濟股….

Anyway, 依排個市跌，股票跌了 10%，咁多年股市上上落落我都無乜所謂….

其實我想講返重點，因為做全職媽咪，我十幾年無返工，但我睇了你嘅書後，決定跳出 comfort zone, 揾咗一份我很愛的 part-time, 返咗幾個月，

我真係覺得好有意義又表現幾好….但係，我今日竟然唔知醒，今日公司叫咗第二個人頂上一日，我真係喊足成日….衝動下買了 #700 發洩…

今日的故事講完，想同你分享，希望下星期我繼續有工返

龔成老師︰

如果你有上過我股票班，就會明白，我地的同學好小心投資的。課堂會派一份6頁紙的「企業評估表」，我會逼佢地填好6頁紙，先可以進行投資，所以佢地的投資都好穩健。

人生路上，我地難免會遇到一些令人氣餒的意外。最重要，係我地有無方法，令自己收拾好心情，重新上路。

發洩，其實係無問題，因為係一個情緒抒發，可以幫自己調整好心情。

每個人抒發的方法都不同，有人會做運動、有人會去唱K狂叫、有人會去沙灘對住個海沉思...。只要唔好傷害到自己和其他人，咁就無問題。

當你情緒，開始可以慢慢回復平靜，我地就要客觀分析，點去解決當前問題。(記住情緒未控制好，唔好做重大決定。)

其實遲到，我相信好多打工仔都試過，除非你本身係遲到常客，或者本身比人印象係唔盡責。否則一次半次，你誠心道歉，相信問題不大。

由於你缺席，公司要找人頂一日，都係正常，因為人地都要運作。

希望你可以明白，人生總會遇上不如意的事，重點係你面對的態度，而唔係件事本身。

其實，我好欣賞你走出comfort zone的勇氣。特別你係一個無做野1X年的全職媽媽，就更加難得，你要加油!!!

另外，你好衝動咁買左架騰訊（0700），現價算合理區中部。雖然近期中央政策，對相關大型企業，有不利影響。

但騰訊（0700）係有質素和規模的公司，相信會慢慢適應如何在這些新法規下營運，因此長線投資價值依然存在。

不過，你預佢中短期一定會較波動，但長線持有的話，就無問題。

------------------------------------------------

Q22302：

1) 龔sir你好，最近我學習了SOTP估值方法，我用此方法評估了最近金山軟件的估值，你可以給我一點意見嗎？

金山內在價值：
網遊+辦公軟件=70億人民幣
金山雲= 108億人民幣
淨現金= 140億人民幣
獵豹移動= 10人民幣
但參考aastock 496.93憶市值
我計漏咗啲咩？

網遊和辦公軟件以33%增長，金山雲以一倍增長。獵豹移動大約股價$2美金，大概18億人民幣，現金就參考披露易最近的2020年全年業績

如果計算之後就變成價值$28.46一股，這樣就高了30%

2) 另外，信達生物最近研發出pemigatinib藥物針對治療癌症,並已經在台灣日本美國批准使用,並對信達生物業績增長一倍以上,如果股價跟隨大市回落至$60，即是到250天線附近。有見及此，值得買入嗎？

不好意思一次過問你這麼多問題

有機會出現MACD背馳嗎？恕我班門弄斧

1801信達生物(六個月圖)

龔成老師︰

1) 雖然有參考價值，但你都要明白背後原理，由於唔知你具體每一部分怎樣計算，有可能你這個估值方法，只簡單將企業子公司市值加起(持股部份)，再計入集團本身資產和負債，去做出一個市值作估算。

現時財經網站提供的市值，純粹係現價，再乘以發行股數。

而你這個方法，係要對不同分部，因應其特性和發展階段，用相應估值方法，去作出評估，所以唔一樣係正常。

其實，市值計算本身係好主觀，特別係一些估值方法，如果你唔係非常有經驗，只要數字有些微偏差，個結果可以差好遠。不同估值方法，會適合不同性質企業，唔可以亂用。

而且附屬公司、聯/合營公司計算比較複雜，如果直接閱讀財經網數據，係會有偏差。

所以係估值前，我地要按實際情況，對數字作出相應調整。這部份較難，我都係在自己的進階班，才會教授同學。

因此，我唔建議你單用市值，作為分析基礎。你可以用佢參考，但最重要都係了解企業本質，佢做什麼業務、行業發展狀況、財務數據、競爭情況等，去做核心會較穏當。

金山軟件（3888）主要從事遊戲研發及提供網絡遊戲、手機遊戲及休閒遊戲服務；提供雲存儲及雲計算服務；設計、研發及銷售推廣辦公軟件產品及服務。

業務有質素，長遠發展力不差，不過擔心股價較為大上大落，現價合理區，唔建議大注投資。這股前景正面的。

2) 你要記住，我地投資股票，就等同投資一間企業。你最重要係知道佢本質、行業等基本因素。

過去股價未必能反映其未來情況，因此唔好再睇圖的趨勢，這是好錯的投資方法！巴菲特已經講到明，技術分析沒有作用的。我地只會分析企業的質素，以及企業的價值。

我20年前，都會用移動平均線、RSI、圖表等分析方法，但當我輸完又輸時，我決定放棄這些技術分析，從此我就不斷贏錢。

信達生物（1801）係一家中國生物製藥公司，開發了集研究、發現、開發、製造及商業化於一體的生物醫藥平台。

睇翻佢資料，佢亦係腫瘤、眼科、自身免疫和代謝疾病領域建立了一個包括單克隆抗體和其他生物藥物的產品管線。

你所講的，是一個利好因素。

但由於仍處於燒銀紙的狀態，所以有危有機，潛力度是有的，但估值好難，現時市值都唔細，只能完全「估」佢將來的價值，不確定性好大。

只可以話，這刻投資值博率中等，你投資係可以，但唔建議大注。

------------------------------------------------

Q22303：

Hello 龔成你好，想請教下你關於現況應該點樣投資

我地二個人(30歲頭), 每月固定收入66000(已扣MPF)，係外地有個物業價值600萬左右係按揭每月交17000左右

現在手頭上有大約150萬現金，30萬股票，20萬黃金 (結婚收到的)

現在需要搬屋, 正係度煩惱緊買定租好 (如果租大約13000-15000左右)，銀行就話我地可以最盡係香港置業借到6百萬 (有說明外地物業同按揭情況)

不過我地就怕太risky/未係合宜嘅時間(定係等多1-2年再升人工先), 不過又好似好浪費現金,定係可以做一點其他投資? (唔係買物業)

希望你可以指點下我地. 不過如果你Post出黎我驚比人估到係我地, 好多朋友都有follow 你

萬分感謝!

龔成老師︰

香港物業，我唔知中短期會點走，但長線我預期都會維持上升。如果你2人係計劃，長線都會留係香港生活，我建議你要為自住屋，做定準備。

現時樓市雖然唔算平，但若果有配合到你長線生活所需，價格合理，足以你們長線"供得起"的物業，其實已經可以出手。

若果你都係想穏陣D，等人工高D先再算。現時資金，可以先投資在優質股，去進行增值。

你們可以選擇一些「平穩增值股」+「潛力股」作投資目標。若每月有一定儲蓄，建議進行月供股票，去提升增值能力。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那150萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

而黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，你可以投資黃金，但不用佔財富比例太多(<3%)，而且持有的應該為實金。

當然，如果這些黃金若有紀念價值，你係可以自行衡量是否保留，不必跟足<3%的標準。

------------------------------------------------

Q22304：

Hello 龔成老師，上次聽左你意見開始抽部分資金去月供2318，現在組合配置更佳。另外有幾隻股票想問下你意見。

1. 3309
2. 1368
想了解你對呢2隻股票睇法

3. 1830
由2.x 見你講必瘦站但一直無入貨，見而加升到差不多10蚊
想問下合理區同便宜區位置係邊呢

謝謝你！

龔成老師︰

希瑪眼科（3309）有質素的，佢主要於香港及中國內地提供眼科服務，及銷售視力輔助產品及醫藥產品。

另外，睇翻佢，都尋找加大在中國擴展業務，係2019年透過收購眼科醫院於昆明及上海拓展服務網絡及在惠州設立一間新眼科醫院。

除了一線城市，佢亦係昆明及惠州等二線城市拓展服務網絡。

這股在業務上，的確有吸引力的，相信生意將會不斷擴大。不過過現時估值都唔平，現時估值略貴，基本上已反映了企業的增長力。長線投資不是不可，但就唔建議太大注。

特步國際（1368）不差的，生意與盈利都有增長，本身都算有品牌，不過盈利就較為波動，部分年份盈利出現下跌。但長遠仍是正面。

個別年份有生意上升但盈利下跌，反映成本增加，同時未能轉嫁消費者，又或者佢要用減價策略才能吸客，反映賺錢能力未必好強，質素有，但不能定義為最高之列。

整體都有長線投資價值，現價偏貴。等佢最少回2,3成，才好開始小注。

完美醫療（1830）長遠有發展，本身有一定的質素。而價唔平，$6/7算係合理區頂部。若你到平宜區，需要出現好大幅回調，才可以。

------------------------------------------------

Q22305：

講完投資，保險個part都想請教下老師

以3X歲女士有家庭，1個3歲小朋友為例，其實要投保（危疾）既保額大概係幾多先叫合理？（另有買醫療）

每個經紀講既都唔同，都唔知幾多先叫足夠

龔成老師︰

危疾，佢賠償係已一個指定金額計算，同醫療保不同。這筆賠償，無指定用途。

因此，危疾除了可用作抵銷部份醫療開支外(超出醫療保保障部份)，最重要係填補你因長期不能工作，所失去的收入。

由於危疾係一些大病，一般治療至休養，可能講緊係2-3年。所以，你可以用你2年年薪，作為基礎標準。

再按你現時和預期將來家庭開支狀況、保單條款等，再進行調整，咁就可以。

------------------------------------------------

Q22306：

龔sir你好，我現在持有 主要是收息股。正為退休作準備，還有少量其它股 等合適時機沽出換馬

現在有點舉棋不定，因為以下4隻收息股都是我比較喜歡的 但只能4選2:

1098 路勁
3383 雅居樂集團
604 深圳控股
1883 中信國際

有勞龔sir幫幫眼 打擾了 謝謝！

龔成老師︰

中信國際電訊（1883）業務穩定，整體質素算是不差，作為收息股係可以。

深圳控股(0604)和雅居樂集團(3383)都適合做收息股，但佢地負債較高，風險會高少少。

而路勁(1098)都有質素，但派息較受盈利所影響，作為收息股，就未必咁合適。

這些股票，現價都在理想，已經可以分注入貨，並長線持有。

------------------------------------------------

Q22307：

想请问Geely Auto 您又怎么看呢？

Xiaomi 现在的价钱算贵吗？


龔成老師︰

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區頂，至略貴。你預佢股價會波動，有貨可長線。如果現價入貨，小注都可以。

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價略貴，回多1,2成，才開始小注會較好。

------------------------------------------------

Q22308：

龔成你好呀, 我一直有睇你既page同專欄, 好讚成你所講, 股票係應該要睇長遠, 加上近期短炒蝕過錢, 更加同意你的觀點。

因為都踏入中年, 加上疫情期間工作大受影響, 所以都好希望可以盡快學識投資,

近期自己心目中都mark定左兩隻, 希望可以請教一下你的意見 (唔知可唔可以咁樣PM你問, 如果唔得都唔緊要的。)

唔知可否請教以下幾隻股, 可長揸嗎?

- 中遠海控 (見佢升咁多一直冇買, 但前景幾好咁)
- 國泰航空 (一直在7蚊左右持有左好耐, 希望等到疫情完後)
- 醫思健康 (有新世界入股, 加上是醫美行業, 自己比較熟悉, 覺得前景不俗, 但之前又係升左好多, 一直未敢入)

多謝指教

龔成老師︰

我想你先明白一些投資概念，我地做財富增值，就係尋找優質企業，用一個合理，甚至平宜的價錢，去買入，並長線持有。讓其自然增值，以達至財富增值目的。

成件事，重點係「優質」之餘，買入價格都要係「合理」。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

這股係有投資價值，但現價略貴，未係投資時機，要等佢回2、3成會合理翻d，我地才可以考慮。

而國泰（0293），坦白講質素只是一般。

其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算佢重組，得到新資金，只是比佢「捱過這一關」，並不是賺錢能力方面有改善。

若你持貨較多，建議等疫情過去，經濟好轉時，佢反彈就減持部份，去平衡風險。如果只係小注，你照長線持有都可以。

香港醫思醫療集團（2138）主要以ＤＲ　ＲＥＢＯＲＮ品牌提供醫學美容服務。企業都有質素的。

（１）醫療服務：包括整形外科手術、微整形療程及由集團醫生操作的能量儀器療程及一般診症服務，以及牙科（ＯＮＥ　ＤＥＮＴＡＬ及ＯＮＥ　ＤＥＮＴＡＬ　ＰＬＵＳ品牌）、中醫及眼科服務。

（２）準醫療服務：包括由已接受培訓的治療師操作的能量儀器療程，該等治療師已完成集團醫生主導的內部
強制性培訓。

（３）傳統美容服務：包括面部護理、按摩以及其他無創療程。

（４）護膚及美容產品：主要為集團的自家品牌寶特曼娜及瑞研雅。

業務發展不差，長遠有增長力，不過業務中短期會有少少波動。現價合理區頂至略貴。如果你資金較為充裕，現階段先入一小注，係可以。

否則等佢回多1成才入貨，值博率會較高。

------------------------------------------------

Q22309：

你好, 龔成老師。最近開始睇左你d 文章, 想試下投資股票, 本人沒有投資經驗, 最多只買過ibond, 我對小米, 騰訊, 港鐵, 領展等都有興趣, 但最近個價位好似唔係好夠平, 唔知入唔入市好,

除左上述股票外, 有沒有些係最近較平同值得入手的? 還是等待時機入手上述股票好呢?

本人33歲, 有價值港元$55萬的英鎊, 港元$20萬在銀行高息戶口(2.5 厘息), 如果投資股票的話, 我應該動用英鎊還是高息戶口中嘅港元呢?

動用英鎊的話, 現在係好價位嗎?(其實我一直都想等好價位時把英鎊轉返港元再放入高息戶口) 謝謝!

龔成老師︰

任何貨幣都可以無限發行，因此長遠只會貶值，唔係有一個財富增值的好方法。若你的英鎊無實際用途，建議你將英鎊換回港紙去投資。

如果你擔心匯價問題，你可以分注咁，慢慢換翻做港元就可以。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」作組合，去創造一個增值平台。除了用你現有資金，我都建議你用每月空出來的儲蓄，去做月供股票，去加大你財富增值速度。

現在你每月先用5成儲蓄做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

大市現處於合理水平，那75萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

現價計，平穏增長股都在合理區，可開始分注入市。

而潛力股，暫只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22310：

龔sir, 好感恩幾年前有緣睇到你專頁，一向有買股票，都是輸多贏少，直至睇你分享先開始改變投資概念，1177,1211,285,到1810我都獲利不少，已賣出部份，

再加部份儲蓄，買到一個小單位收租，雖然不算很好的物業，但是真的好開心，剛看到你分享別人的喜悅，我也要向你説多謝，感恩你無私分享

龔成老師︰

唔洗客氣，我都係希望透過這個平台，去分享一些正確投資觀念。

希望可以幫到投資者(特別係一些初階投資者)，知道一些較重要概念，從而令佢地更大機會，找住正確方向。

雖然，你現時已有一定成績。但緊記要保持學習，長線投資才會做得好。

而且，你所講的股票，都係有質素。如果你係較保守投資者，而獲利又較多，可以"升一倍，沽一半"。

但緊記大部份貨，應該保持持有。因為長線持有優質股，增值效果才會係最好。加油!

------------------------------------------------

Q22311：

你好呀, 我脫你有介紹ETF #2800 隻股, 我想問咩價位入好呀? 我本身流動資金唔多, 又還緊債, 但我又希望可以增加資金, 想睇下買邊一隻好?

本身知道ETF 股都係收息多, 好似比較啱我咁

龔成老師︰

首先，盈富(2800)是包括58間質素不錯上市公司股票的組合，這些股票有升有跌，但長期計，都有不錯的回報。

買入盈富主要有兩個回報(分別是股價升幅，加上股息回報)，股息不多，大約只有3%，而股價升幅，其實有升有跌，每年都會波動，但長期平均計，都有5%-10%，當然，這是不一定的。

現價計，算係合理區，已經可以分注入貨。佢係平穏增長股，有一定增長力，但股息唔算多。

若你目標係收息，可以選擇X恒生高股息率（3110），是一個投資收息股的基金，追蹤恆生高股息率指數之表現。

可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。

這是不差的收息組合，但增長力不強。

至於投資邊個，你就睇翻你自己投資目標。一般情況，如果你係年青至中年，我會建議你投資盈富(2800)，因為你應先做好財富增值部份。

若你年紀較大，接近退休之年，穏定現金流去支援生活，才是你投資重點，故X恒生高股息率（3110）會較合適。

你可以因應自己人生階段，去進行配置。

另外，你要審視翻自己現有貸款，若息口較高，我優先清還貸款，以免影響長線回報。

------------------------------------------------

Q22312：

想請教1302 6988 及 9666。

龔成老師︰

先健科技（1302）為心血管及周邊血管疾病及紊亂所用先進微創介入醫療器械的研發、製造及營銷商，主要提供先天性心臟缺損封堵器（包括ＨｅａｒｔＲ、Ｃｅｒａ及ＣｅｒａＦｌｅｘ等三代系列）。

雖然近年生意都有增長，都有潛力，但始終規模細，不確定性較高，業務可能有潛力，但現時的市盈率處高水平，值博率較一般。

現價偏貴，要有好大幅回調，才好開始小注入貨。而且此股盈利都好波動，只宜小注投資。

樂享互動（6988）是中國的效果類自媒體營銷服務提供商，利用商業智能技術為行業客戶及自媒體發佈者提供服務。

睇翻近年的財務數據，佢增長力是有的，但上市前的數據參考價值較低。

相信佢長遠，業務都有增長力的，公司話佢自己能盈利高增長。但就唔平，小注持有可以。

金科智慧（9666）有質素。

佢係中國西南第一的綜合智慧物業服務商，如果按佢綜合實力計，集團自2016年至2020年連續五年被中指研究院評為中國物業服務百強企業十強之一，自2015年至2020年，連續六年西南地區排名第一。

收益主要來源於四條業務線：物業管理服務；非業主增值服務；社區增值服務；及智慧科技服務。

包括各類住宅及非住宅物業，包括但不限於中高端住宅、商業樓宇、產業園、政府公建、高校醫院等其他物業。

生意與盈利都增長理想，暫時睇佢都有投資價值，但負債高會係一個扣分地方。此股投資係可以，只要唔好太大注，咁就無問題。相信長遠有發展的。

------------------------------------------------

Q22313：

老師你好，本人和太太各36歲，上年剛剛買樓尚有430萬貸款供29年，月入大概10萬，每月有4萬流動資金作投資，再加現金90萬，

想在3年後儲夠3百萬買多一層樓收租，本人唔識投資，想問下有咩投資組合可以加快達成目標，謝謝

龔成老師︰

我假設投資上進取少少，令你可以做到有回報有12%（連股息再投資）。你每月投資$40000 + 90萬現金，3年後大約會增值至300萬。

但你要明白，3年只算得上係一個中短期時間。最終實際回報，可能會較為波動，風險會較高。

從資產配置角度，你現時已經有一個物業，如果你咁短時間，又在增持有一個新物業。

除左成個組合會好偏重物業之餘，太短期內買2個物業，都會受較高價格波動性風險。(一般2個物業，買入時間最好相隔一個週期，大約8年左右。)

我建議你按部就班，透過月供和買入優質股，去為自已資產作增值。到你累積到一定金額，足夠你買入第二個物業之餘，都可以留下若干優質股增值才出手，會較理想。

財富增值方面，以你36歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

若你投資知識不高，可先較集中在平穩增長類股，至於潛力股，只宜小小注。到你提高投資知識後，才慢慢增加翻潛力股比例。

大市現處於合理水平，那90萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q22314：

1) 我又如何得知此公司的每股盈利有冇加上物業重估呢？

2) 我想計比亞迪電子的合理股值，唔知我計得啱唔啱？

比亞迪電子現價$46.35

市盈率 水牛網沒有提供2021年市盈率所以我用9年
2020年 7.483 2016年 7.871
2012年 9.333 2013年 10.04
2018年 10.24 2014年 12.02
2017年 12.50 2019年 14.13
2015年 16.46

市盈率合理區域是 9.333 ～ 12.5

每股盈利 資料來自Aastocks
2016年 0.6112 2017年 1.3787
2018年 1.1044 2019年 0.7935
2020年 2.8725

5年平均值係1.35206，估計公司盈利還會持續增長，所以保守估計每年增長10%

1.35206 x 1.1 = 1.487266

股值合理區域是13.88 ～ 18.59

不知有沒有計錯，因為現價才$46.35相差太大。

3) 我最近留意緊國藥控股（1099）和中智藥業（3737）。我用阿sir你初階班比的企業評級表頭兩頁查過這兩間公司，機本上兩間公司都過關雖然唔係全部100分。

我睇兩間公司的官網都寫得自己點樣勁，但兩間公司的市盈率都低過10倍。流動資產-流動負債係正數。

初步睇價錢也在合理區之下。

想知道為何這兩間公司的市盈率會咁低？值唔值得投資？

謝謝！

龔成老師︰

1) 你可以睇年報中的損益表，就會知道佢有無物業重估成份。

2) 你現時這個計法，概念上係無錯。但做好初步估值之後，我地要再考量，到底這個估值，係唔係足以反映企業現時價值。

比亞迪電子(0285)近年賺錢能力有所提升，我地用過去5年平均數字，就可以能出現過於保守的情況。

因此，我地會以佢最新一年每股盈利作為指標，即係用HKD2.8725。

由於集團始終係代工企業(雖然有一定技術)，市盈率唔會太進取，我地會用佢過去10年中間4年數字，大約為10-12倍。

之後，再加多10%緩衝區。合理價大約為︰HKD26-38。

3) 其實就算係相同行業，只要業務性質、潛力、風險等不同，個市盈率都可以差好遠。

國藥控股（1099） 質素都可以，但增長力已經不算好強。

睇翻佢資料，佢係中國最大及具實力的醫藥分銷和零售企業，集團在中國主要城市以直接經營和特許經營方式管理零售連鎖藥店網絡，向終端消費者銷售藥品及大健康產品。

此股有質素，但賺錢能力唔算高，而增長力唔算太強，是平穏增長型。佢有個比較大問題就係負債比較高，而度會扣左D分，整體而言此股有質素，可投資，現價合理的。

由於佢已經係平穏增長型企業，增值潛力不及中生(1177)這類潛力股高，故市場給予市盈率，都會較低。

而中智藥業（3737）則相反，由於企業規模和品牌不大。雖然佢近年盈利增長係唔錯，但市場會較擔心，佢這個優勢，能否長線維持。

因此，會給予中智藥業一個較保守的市盈率，以反映當中的潛在風險和不確定性。

此股現價合理，但由於存在一定確定性，故只宜小注。

------------------------------------------------

Q22315：

我個人睇法認為。新世界，長期一定會好番，因為佢再俾人爆大鑊就可以執笠，但問題係驚短期甚至中期都有機會發現更多問題，始終起樓唔係一時三刻，

而今次事件反映QC部門同埋管理層有啲得過且過，其他項目都有一定機會有類似問題，只係未俾人爆或者佢地禁住咗，令中期不確定性同埋風險增加

另外留意到美國嘅經濟數據，FRB話經濟雖然開始復甦，但基層勞工市場仍然麻麻地，而高通漲相信係暫時性，仍未係時候改變貨幣政策。

咁樣會唔會令成個市場失衡，為市場復甦帶黎壓力？

龔成老師︰

中短期，新世界(0017)股價難免會弱。

但我地睇翻佢過去咁多年，其實都無出現過重大問題。所以，我會偏向覺得，個營運和監工上風險，未到話十分高的狀況。

長線投資價值，依然存在，但你預佢短期會較波動。

疫情雖然未算清零，但大部份已發展國家，已經開始穏定。相信經濟會慢慢向好，但這個唔會係一時三刻就出現，可能要幾年時間。

而中短期，依然會有好多不確定因素。例如不少發展中國家疫情未受控，對不少消費市場，或者不少企業的產業鏈，都造成不同程度的影響。

但相信這都是中短期，我都分析最好都係集中翻，係企業本質。外圍經濟因素，各國貨幣政策，係有參考價值，但佔比重不應太多，重點都係放係企業本身較好。

------------------------------------------------

Q22316：

Sir,水桶2 有咩好選擇啊？日清和雅生活算嗎？還有甚麼好選擇的？我今年34歲每月可儲2萬，現在儲一萬現金和一萬每月買d 股票的

暫時如下：

1. 科指 ETF 3032 15000股 $8.37
2. 小米 1810 1000股 $27.48
3. 阿里 9988 300股 $235
4. 京東 9618 100股 $309.5
5. 平安好醫生 1833 100股 $87.8

6. 日清 1475 3000股 $6.87
7. 京東物流 2618 100股 $40.36
8. 雅生活 3319 250股 $36.7
9. 福壽園 1448 2000股 $7.5
10. 鐵塔 788 10000股 $1.545

現金：35萬

龔成老師︰

日清(1475)和雅生活(3319)都係唔錯的水桶2股票，你現有持股，都係適合你。

以你34歲，可以投資「平穏增長股」和「潛力股」。你每月5成儲蓄，即是用$10000做月供。其餘先儲起，用一邊月供一邊儲蓄的策略。

選股上，你可以投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有35萬資金可以再投入多10-15萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22317：

首次置業 按揭多好定係少好？

依家開始有個好習慣就係先儲蓄投資 再消費，一個月儲＄5000 另外$5000攞嚟投資 係3-4年之後有＄100萬 有冇問題？

龔成老師︰

其實多與少，跟你首置無關，我地主要係睇佢現行息率。現時貸款息率低，我地應該盡借，令我地可以空多更多資金，作其他投資增值。

你現時養成這個先儲蓄和投資，之後才消費，係一個非常好的習慣，你保持。

以你2X歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

假設投資回報有10%（連股息再投資），你每月投資$10000，4年後大約會增值至55萬。若你要達至100萬，就需要將金額升至$14000和供5年，才可以做到。

------------------------------------------------

Q22318：

師父1212 利福下至合理價低部5.95 ， 值得加注？

近曰消費股如六福，周生生， 莎莎都上番不少，何解1212返而向下？

啟德項目應該有利佢發展對嗎？

另外完美醫療已升至over $8 , 稍貴， 應否放一半？

3069 ETF 你有什麼意見？

龔成老師︰

我地投資，唔好太在意中短期走勢。我地要睇翻個重點，就企業自己本身狀況。

利福國際（1212）主要從事經營生活時尚百貨店及其他零售業務，以及物業發展及物業投資業務。佢透過崇光在香港專門經營百貨店。

中短期一定弱，但長遠仍會正面，不過回勇就要時間。同埋要留意，佢負債較高，因此唔建議投資太大注，現價合理區中下部至底部。

啟德項目，對佢長線發展係有利。但股價唔會一時三刻反映出來，要需要時間。

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

如果本身有貨，就長線持有。若你持貨較多，現價沽少少獲利，都係可以。

華夏恒生生科（3069）主要係追蹤恒生香港上市生物科技指數之表現。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線持有會較好。

------------------------------------------------

Q22319：

龔老師你好，我今日34歲，未婚，冇乜經濟壓力，現時未有結婚及生育打算，月入二萬，月儲大約七千，現時擁有資產大約二十萬，其中八萬現金，十二萬股票。

經過你前三個月的教導，我購入多左水桶二的股票，現在股票組合比例大致平衡，現時持有的股票如下：

水桶1
1177 中生製藥 2000x$7.27 11.7%
3718 北控城市 8000x$0.99 6.4%
3067 安碩恒生 100x$16.06 1.3%
1448 福壽園 2000x$7.46 12.1%
3319 雅生活 250x$32.85 6.6%
2057 中通快遞 50x$230.4 9.3%

水桶2
823 領展 100x$74.55 6.0%
2800盈富 1000x$28.38 22.9%
2388 中銀香港 500x$25.1 10.1%

水桶3
778 置富 2000x$8.34 13.5%

快速增值：平穩發展：收息資產=47:39:13

1）請問現時股票組合比例平衡嗎？我打算長期持有無問題嗎？

2）現在我目標先儲現金，等儲到現金佔50%，才加水桶一股票合適嗎？

3）請問3718北控城市資源質素無問題嗎？現價（$0.96）是合理價還是平？我$1.92同$1.28都入左一手，現價可以再分注入嗎？值博率大嗎？等可以再等下？

還有等$15買3067，或等$80買平安好醫生，或等$23買小米，哪個值博率大些？謝謝指導！

龔成老師︰

1) 現時配置係可以，你長線持有，係無問題。但留意中通快遞(2057)始終唔係上市太耐，要再過一些時間，才可以見真章，所以暫時唔好再加注。

2) 現時大市在合理區，現金應佔3-5成左右。目的係等大跌市出現時，我地可以有資金入市買平貨。

而目標唔係集中係水桶1，因為水桶1雖然增長潛力大，但風險都高。建議你視乎當時平貴，再去慢慢平均分配在水桶1和2，咁會較穏當。

3) 北控城市資源（3718）有質素的。

佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。之前股價貴，現價落翻D，大約合理區中下部。現價加小小注，都可以。

至於平安好醫生（1833），無貨現價小注都可以，但由於佢不確定性都高，要控制注碼。

而安碩恒生(3067)和小米(1810)都有質素，但前者係一籃子科技股，較有分散風險能力。

3067現價中合理區上部，而小米就要回多1,2成，就算合理區頂，才可開始分注入市。以現價計，安碩恒生(3067)值博率會係3隻當中較高。

------------------------------------------------

Q22320：

龔成老師，我44，現在有以下股票，共35萬，另有15萬現金，月入2萬+佣金。

170萬按揭，供25年，每月供樓$7700，因為依家巳44歲，好希望可以10年內供完，請問我應該點做可以達到這個目標?

煤氣 18手
港鐵 3手，正在月供1000
中國鐵塔 5手

領展 1手，正在月供1000
盈富 2手，正在月供1000
阿里巴巴，上月開始月供1000

我有諗過每年年尾將花紅約2萬還按揭去減年期，希望可以加快完成供款，做法正確嗎？

龔成老師︰

以你44歲年紀，你持股和月供組合，都係合適的。你現時可以用這些增長股，去累積財富。

由於現時按息不高，我較建議資金先用作增值，而唔係去還款。這樣做，成個財富增值效率，才會較高。

現時大市只在合理區，每月儲蓄唔好盡用。最好留有部份，連同現時的15萬現金，一齊等大跌市出現時，可以用來掃貨。

我假設投資回報有10%（連股息再投資），你每月投資$4000 + 50萬資產(股票和現金)，10年後大約會增值至200萬。

到時你可以因應情況，再決定先還款(若到時息率好高，係可以先還)，還是保持增值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21261-Q21280）

Q21261：

龔Sir, 請問銀娛現價PB 4倍，金沙PB 10以上，Why PB so different ?

龔成老師：

記住，當我地計算企業價值時，要同時考慮企業的業務價值及資產價值，這是配合的。由於企業是永續經營，不打算這刻清算，因此投資者一般會著重業務價值多過資產價值。

有兩點你要注意，第一，市賬率是衡量企業資產價值的方法，但你要了解翻佢的資產價值是否有具體呈現在資產負債表，簡單來說，就是報表上的價值，是否能具體向映該資產的真正價值，這樣去衡量賬面值的代表性。

第二，市場估值時，可能是否考慮業務價值多過資產價值，甚至有些企業，市場不理會資產價值，因此，你要了解翻這企業過往賬面值的情況，市場如何定義價格與賬面值之間的關係，從而推算該賬面值是否有參考價值。

------------------------------------------------

Q21262：

老師，我係你學生，我現在想問下

1. 如何判斷那隻股是增長型?

2 增長型及龍頭 PE 就可調高至25-30?

3. 目前在分柝一些光伏板塊嘅公司 eg 福萊特玻璃
及隆基

我覺呢兩家也是增長型 可以給 30- 40 PE 嗎？

龔成老師：

1）要睇佢身處的行業，現時的業務情況，發展，以及過往財務數據，例如過往生意的增長力如何，預期將來的銷售怎樣。

2）的確可以調高，但未必有一個好實在的數，因為估值對每一個行業來講，其實都不同的。

3）隆基泰和智慧能源（1281）質素較普通，投資價值未算高，盈利變數大。所以，在估值上，都不會比太高。

至於福萊特玻璃（6865）有質素。你可以比高少少市盈率佢，但就未必值得去到40倍市盈率。

佢主要在中國生產及銷售光伏玻璃，此外，亦生產及銷售浮法玻璃、家居玻璃及工程玻璃，並向中國大陸、日本、新加坡、韓國、台灣、德國及美國等地客戶，銷售產品。

睇翻佢的資料，佢的光伏玻璃產品主要用於生產晶體硅光伏電池，以及用作薄膜光伏電池的蓋板，而佢的生產設施位於浙江省嘉興市。

無論生意與盈利都增長理想，財務數據正面，這股值得長線投資。唯一擔心的就是估值問題，始終現價唔算平，近期股價有時在合理區頂，有時略貴。如果投資，可以小注慢慢分注，不建議這刻大注。

------------------------------------------------

Q21263：

Hello 成哥 如果而家2238廣汽集團同吉利汽車等嘅車股比較 算唔算係比較值博嘅一隻？

我見佢都有電動車業務 但係股價跌到好殘

如果而家要揀一隻值博又有發展電動車嘅傳統汽車股 會唔會有比2238同埋175更好嘅選擇？

因為覺得經濟好返傳統汽車行業都會逐漸回暖

龔成老師：

廣汽集團（2238）本身都有質素的。

佢係中國汽車製造商之一，主要業務包括製造及銷售乘用車、商用車、發動機及汽車零部件，亦從事一系列汽車相關服務及其他業務。

佢透過共同控制實體廣汽豐田及廣汽本田生產多個系列的乘用車。

業務發展不過不失，但增長力就不算強。

長遠仍有發展，但不是高增長型。現價合理。

吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區中上部至頂位，股價波動，有貨可長線。如果現價入貨，小注都得。

如果講長遠發展，吉利會較好。

------------------------------------------------

Q21264：

你好，老師，仲有問題想請教你！

好耐之前家人幫我以67.5入過1200股匯豐，一直以收息為主，其後跌市，有再入1200股，現在成本價56.1，應該持有定賣出一部份擺入其他股？

之前亦有月供$2000中銀香港，現已停供，現持有845股，成本價是28.614應繼續月供定持有？

如果我有5000蚊用作投資，我應該如何分配資金？以平穩增長股為主？定係可以考慮一些潛力股？感謝

龔成老師：

匯控（0005）賺錢能力與增長力比過往年代弱左，但又未去到完全無質素。銀行業的賺錢能力比過往減左，因此不能視為增長股，但當經濟好轉，始終都會有錢賺，因此都有投資價值。

相信長遠是收息股，但股價增長就有限。

這股都有投資價值的，但就未必值得佔組合比例太多，同時明白佢是收息股，增長力有限。。

如果你投資目標是收息，可持有。如果你希望有較高的增長，就應該在匯豐股價上多少少時，轉其他。

另外，你持有中銀（2388），這會令你的組合太過集中在銀行業。

其實，我地最重要是建立一個組合，要平衡，要優質，同一行業不要多過30%，同一隻股票不要多過15%，你長遠要平衡翻。

至於每月$5000，就要睇你的年齡及風險度，最簡單就是投資優質，平穩增長股。

你可以考慮盈富（2800）。

另外再加：銀娛（0027）、恆基（0012）、港鐵（0066）、中銀香港（2388）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21265：

我想問，你成日叫長線，但假如我一直持股唔放咪冇賺囉？？

龔成老師：

你有「賺錢」的思維，反映你與98%的散戶想法一樣。

你追求實在的現金，認為要賣出賺到現金，才是賺錢，但我地最重要是講求「財富最大化」。

當一隻股票上升，例如你買入價$10，現價$15，賣出可以賺$5。

但當你套現$15後，你怎樣將這個「$15」再次增值，令你的財富增長，比留在原有股，得到更大的回報？

如果原在的股票是優質股，即是我地持有優質企業，當你一直持有這股，企業長期價值向上，就會帶動我地的財富有最大增長。

簡單來說，我地是從「財富長遠最大化」的角度去想。

可能你會問，一直不賣，那麼永遠無法取出財富。

我地累積財富，會用「先增值，後現金流」作策略，前者著重增值，之後就會改變策略，將已增值了的資產，轉為現金流類別，而我地就是不斷享受資產產生的現金流。

------------------------------------------------

Q21266：

龔成老師：感謝你既回覆，另外想問多少少，小朋友有無話幾多歲學投資好啲？

同埋用咩方法去慢慢教佢理財知識好啲？因為你成日都講理財知識越早學越好

龔成老師：

我相信7-10歲，都可以有基本的理財概念，例如錢從何來（起碼要佢知道，錢是由父母努力工作得來），另外就是量入為出，以及儲蓄的概念。

在適當年齡你可以比零用錢，這是一個理財的訓練，同時慢慢由每日比，轉為一星期，甚至一個月，等佢自己分配。

你可以玩「大富翁」之類的遊戲，都是一個學習過程。我記得《富爸爸》這書的作者，有出過「現金流」遊戲，有兒童版的，你可上網找找。

------------------------------------------------

Q21267：

您好，龔成老師，我係19年5月股票班同學，最近睇完您本書 五年買樓四部曲，想同太太買一層細價樓，請教一下您既意見。

而家我本身有一層自住樓，同太太加埋現金一百五十萬，想係灣仔買樓，因為老師既書都有講過星街、堅彌地街都較好

而且近商業區，人口密度低，有名校網，區內供應預小，我預算550萬至600萬左右，老師您認為買灣仔舊樓收住租搏收購好定係買30年左右既相對新樓有流動性好？

而家我自住樓係我自己名下自己供，睇完老師既書，開頭集中睇堅尼地城、黃竹坑、大圍、九龍城，但堅尼地城好似嘉輝花園咁租金回報相對低2里都做唔到

黃竹坑買唔起，大圍冇咩樓盤都係金獅花園無咩選擇，一係就補地價居屋，感覺上唔係私樓升值潛力又差小小

灣仔區黎緊有會展站，學您教的方法，去左城規會度睇，告士打道以南莊士敦道以北全部係商業用地，地積比去到15倍，咁樣我推輪呢度既地價會唔同，所以想係灣仔區置業。

猶豫緊600萬內預算，買舊樓搏收購好，還是買30年內200尺以上既樓保持流動性好？謝謝老師！

龔成老師：

由於你本身有自住樓，因此現時的作用是投資，最好是建立一個平衡組合，即是你買完樓後，最好仍有一定的現金，以及其他資產剩。

至於灣仔區，有質素的，你可考慮。

我會建議你買30年左右既相對新樓有流動性較好。舊樓博收購，始終成功率不高，因為全港超過50年的舊樓有5000幢以上，要成功被收購並不易，而這段時間往往要支付維修費等，因此值博率並不高。

至於其他地區，你可以留意一些細少少，樓齡不太新的樓，睇下有無一些目標範圍。

其實，灣仔不差的，都可以留意，只是我書無特別講，但整體唔差，你可以細心發掘。

------------------------------------------------

Q21268：

老師，如果我在嘉里派特別息之後賣嘉里轉港燈是否可行？港燈現在會不會特別貴？

謝謝老師指點

定是由得他，放嘉里在度？
嘉里建設（636）

龔成老師：

兩隻股的性質有點不同，唔好貪特別股息，因為佢派息後會除淨，股價會自然調整的，所以不一定有著數。

嘉里增長力都有，但港燈（2638）就只是收息，所以，要睇翻你的投資目標。

嘉里物流（0636）這股不差的，順豐入股後長遠發展更正面。

佢本身由嘉里建設（0683）分拆上市，係亞洲的物流服務供應商，主要從事綜合物流及國際貨運業務，亞洲、澳洲、歐洲及南北美洲的35個國家及地區設有逾400個業務點。

業務以第三方物流服務供應商身份為世界各地的製造商、零售商及其他客戶提供綜合物流服務，包括主要在亞洲提供廣泛的物流服務，如倉儲及增值服務、陸運及配送、退貨管理及各種配套服務。

另外，亦有從事國際貨運：提供的國際貨運服務絕大部份位於亞洲區內以及亞歐大陸之間，涉及空運、海運及跨境陸運服務。

------------------------------------------------

Q21269：

阿Sir，請問吓你以下一條問題，希望你可以回答給我明燈。 方間有許多股評人及平台都教人或講有人因着股市波動而買期權。

所以想問阿sir, 你認為期權可以投資嗎？
唔該阿sir.

是不是不接觸為妙！

龔成老師：

我自己會有少少保留，因為我20年前，都有玩不同的衍生工具，但最都是虧損，之後集中正股長線投資，就贏錢。

當然，一定有人投資期權贏錢的，但我過往做銀行及證券行多年，觀察散戶的投資成績，玩衍生工具的，大多是輸錢。

------------------------------------------------

Q21270：

龔老師你好，我想請教一下，我有2隻股票，分別是3868/$6.18買入及6606/$76.3買入，想問下這2隻股票前景如何，要止蝕嗎？謝謝

龔成老師：

信義能源（3868）有質素，佢主要於中國經營太陽能發電場業務，並向國家電網的當地附屬公司銷售電力。而佢派息高的，因為管理層話會用高派息政策。

投資價值都有，但不能投資太多，因為佢業務都有風險的，要注意股價波動，如分注長線都可以投資。現價已略貴。

這股前景不差，你持有就得，但預佢股價較波動。

諾輝健康（6606）業務有發展，但之前貴。

佢係中國結直腸癌篩查市場的先行者，旨在推進技術創新，並加快癌症篩查技術於中國的採用。

根據報告，其專有的非侵入性多靶點FIT-DNA測試－常衛清為中國首個且唯一獲國家藥監局批准的分子癌症篩查測試。

佢的兩大家居結直腸癌篩查測試產品，常衛清及噗噗管協同面向不同風險程度的目標人群。

「常衛清」有一定的護城河，可避免施行一些具有侵入性的手術，就能得到一些結果，長遠有一定的發展。潛力度存在。

佢已於全球包括中國境外的17個國家或地區，建立包含71個專利及專利申請的組合。通過直接銷售渠道包括醫院、體檢中心、保險公司、藥房及網上渠道向終端用戶提供產品，亦在較少情況下通過分銷商提供產品。

發展潛力都有，但始終業務未算完整，未有盈利，因此風險都存在，這類股小注投資好了。

------------------------------------------------

Q21271：

想請問而家中國銀行(3988)

而家仲抵唔抵買，現時$2.96。月供緊2手，諗住賺下股息，現時價位會否太高?

龔成老師︰

中行（3988）由於內地經濟無過往年代咁強，股價無過往咁好，由中美貿易戰開始，中國的經濟動力已有所減少，加上最近的疫情，都是影響經濟的因素。不過，初步已好轉，但不是高增長型。

現價合理區中間，唔話係好高，依然係有投資價值。用此股收息係合適，但就唔好對股價有太大期望。

另外，我地最重要是建立一個長期的「財富組合」，要優質，要平衡。同一行業不能太多，同一股不能太多。

所以，若你係以收息作為目標。你可以投資多幾隻不同類型的收息股，令你組合更豐富，和平衡性更高。

以下都係一些有質素的收息股，供你參考一下。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)。

------------------------------------------------

Q21272：

老師你好！留意了你的教學很久了，但第一次鼓起勇氣寫信給你，希望真向你請教投資的心得和方法。

本人28歲，已婚，我月入3萬，老公大約工資2-3萬，供樓大約1萬5千蚊，減洗費後大約能每月儲蓄2萬5左右，並準備迎接小孩出生。

現有儲蓄約70萬，並擁有以下股票：

11 - 200股，$162 (在2019年已買入)
1211 - 500股 ，$270(當時高位入但沒走貨亦未分注)
9988 - 100股，$253

請問老師我應如何做好我的資產管理和投資策略？

龔成老師︰

我地投資策略其實好簡單，主要係因應你現時人生階段和投資取態，去建立一個平衡的財富組合。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你28歲，應以增值為先，建議你用「平穏增長股」 + 「潛力股」的組合。

由於「潛力股」係需要一定經驗，如果你經驗較淺，可以先小注，大約3成左右。若你係有一定經驗，你可以投資到約5成比重。

現有持股方面，無大問題。雖然比亞迪(1211)係買貴左，但由於佢優質，你連同阿里巴巴(9988)、恆生(0011)一齊長線持有就得。

而你快將迎接新生命，相信會有不少小朋友方面的開支。所以，你係開始投資計劃前，最好先儲起約半年開支和小朋友出世前後的相關洗費，以後備不時之需，咁會較為穏當。

現在你每月先用$13,000做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

大市現處於合理水平，股票和現金最好各佔一半。你可以睇下70萬資金，扣除半年開支和小朋友支出後的比例。若現金佔依然高於一半，你可以再以"分注"形式，入多少少貨。

餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q21273：

老師你好，我$15.7買入968, 請問應該長渣還是搵機會放?

另外老師認為939和9888值得長線持有嗎?

如果有100萬存款, 股票比例30萬ok嗎？謝謝回應

龔成老師︰

信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。

你買價係略貴，但又唔係追貴好多。而且畢竟佢係有質素，你長線持有就可以。但你要預這股股價上落較大，故不宜佔比重太高。

若此股現時已佔你比重較多，你最好沽少少，去平衡翻個風險。

建行（0939）本身質素不差，有一定的規模，在全球都有網絡，本身不會無質素的。

不過，這股增長力不算強，只是一隻收息股，你唔好對股價有太大期望。

前景不過不失，中短期會因中國經濟有影響，銀行業的賺錢能力不及從前，加上壞賬因素，都會令佢中短期弱。不過，初步已好轉，但你預此股不是高增長型。

至於百度（9888），佢係有質素，有獨特性，長遠發展不差。

佢係全球最大的中文搜索引擎「百度」的營運商，係內地用家搜尋資訊主要對口，用戶規模突破10億，百度App日活潑用戶超過2億，多個指標都處中國第一。

業務上，佢擁有好強大互聯網基礎的領先AI公司。自2010年起一直投資AI以提升搜索及變現能力，並使用核心AI技術引擎「百度大腦」開發新AI業務。

我睇翻一些報告：

1. 佢擁有中國最多的AI專利數量以及AI專利申請數量。

2. 按累計拉取請求計，百度的深度學習框架飛槳居中國深度學習框架榜首，全球排名第二，僅次於Facebook Pytorch。

3. 按開發者數目計，百度開放式AI平台擁有超過數百萬名開發者，係中國最大的開放式AI平台。

4.按開發者數目計，係百度雲基礎設施上運行的Baidu OSChina是中國最大的開源活動開發平台，全球排名第三。

百度核心業務（唔包括愛奇藝）由AI驅動，為其貢獻超過70%的總收入，主要提供基於搜索、信息流及其他在線營銷服務，以及來自AI新領域的產品及服務。

並廣泛使用AI技術開發創新營銷服務（例如動態廣告），為各搜索用戶推薦最適合的營銷客戶產品。

現時佢坐擁不少資訊和客戶群，就可以利用佢地去發展很多不同業務，可以話係一個好大的優勢。佢收入不差，長遠有發展，但由於本身有相當規模，因此，未必是高速增長型。

百度在規模和質素上，一定係有。但近期科網股波動，風險高左，同時到上市一刻不確定性高左。

此股都係有質素，你現貨可長線持有。

現時大市只係合理水平，現金和股票最好各佔一半。如果你有$100萬存款，你可以多用20萬，以分注形式，去投資一些優質股。而餘下50萬資金，我地就等大跌市出現，才加大力度掃貨。

但緊記，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。重點係要平衡，唔好集中晒係2,3隻股票身上。

------------------------------------------------

Q21274：

老師你好，我打算購買元朗尚悅嶺370尺單位作投資用途，因家人先前買入，但移民了，想轉俾我，等我供。

我依家係同老公租緊屋住，因為元朗不方便返工，所以不打算用作自住。

但擔心元朗地區升值潛力低，如資金用作其他用途可能更好。想你俾下意見，唔該曬

龔成老師︰

元朗區始終跟市區有一段距離，所以長線升值能力會較弱。

特別係跟港鐵站較遠地段，會更受影響。睇翻你元朗尚悅嶺這個樓盤，唔係話無投資價值。但會相對較一般，增長潛力唔會太強。

你可以先比較翻租金回報率，到底吸唔吸引，再作決定。

如果租金回報率唔算係特別吸引，而你本身資金又唔係好多。我建議你先集中用優質股去增值，咁會較好。

------------------------------------------------

Q21275：

龔生你好！一路有留意你講3067同1810

想問吓如果想長期每月入貨，呢兩隻股票邊隻潛力會大啲

龔成老師︰

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，你可以用佢作為月供選擇。

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。

所以有長線持有價值。由於基金有30隻股票，比起單一股票，風險能減低。

此股可以月供，或自行分注小注慢慢收貨（例如每月買一次、或2個月買一次），然後就長線持有。

潛力度和質素，2隻都係有。但安碩恒生科技（3067）係一籃子的科技企業，相對小米(1810)會更能分散投資風險。

但長線我地係要建立一個平衡性架組合，唔可以成個組合，只係得1,2隻股票。

而且，這2隻股票雖然係有質素，但佢地波動性都偏高。因此，若你係較年長，或者係較保守的投資者，這2隻股票就不宜持有太多。

------------------------------------------------

Q21276：

龔成老師，多謝之前的回覆，長話短說，我人已在外地，最終留下一小住宅單位在港，本打算能在外地置業才賣的，但勢估不到香港狀況動蕩至此，租客剛剛完約搬出，由於我一心留在外地發展，加上對香港信心不大，我正考慮應否把樓賣掉（樓價跟買入差不多），所以想請教：

1） 對自己此決定有懷疑，此時賣出是不是明智決定？
2） 另外，萬一真的賣出了，又不想現金儲放在銀行，以致可以於3-5年後可在外地置業，有可建議？外地的投資理論差不多吧？

非常感激，能傾談此topic的朋友不多，你的建議對我很有幫助！

3）我有推介朋友參加你的投資班，會否考慮推出網上版？

龔成老師：

1）不如我講少少香港樓市分析，你自己衡量現時決定是否正確。香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

2）賣樓後，如果你已對外國樓有認識，加上租金回報率不差，其實已可投資外國樓。

另外，你可以投資一些流動性較強的項目，例如外國的ETF（如美股VOO、QQQ），而香港ETF，如2800、3110、3067都得。

另外，可以考慮投資收息股，因為股價變動相對較少，對你的情況都幾適合，你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

3）我最近同天窗出版社，合作開辦左一個網上課程，題目是關於「資產配置」的，即是講述各種資產與投資工具的特性、投資價值、在財富組合中的角色，至於股票內容就唔算多。你有興趣可睇睇：

http://bit.ly/3pP252j

課程按「人生階段」、「財富累積」、「資產特徵」設計，更有給年輕人、已婚人士、退休人士的精明理財建議。

完成課程後，你會學到：

✓財富系統概念，不再被炒差價的框框束縛；
✓股票、基金、債券、的士牌等資產的運用和買賣技巧；
✓懂得分辨資產質素和平貴，在最合適的時機買賣；
✓如何以最低的價錢，買到最具升值潛力的物業
✓致富3部曲，如何從當下這刻開始啟動！

至於股票班，由於內容太重要，只有實體班，唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

------------------------------------------------

Q21277：

成老師你好呀，我現年22歲，月入21k，我學習價值投資開始了大約9月開始月供11k股票直至現時，月供包括(均價)：

2800($26.9)
0066($41.9)
0002($73.1)
0027($60.1)
2013($13.5)
0981($21.2)
9988($237.4)

另外曾一手買入9988($227.8)一手，0981($20.2)一手，0823($58.4)，一手。

我想問一問我的投資組合風險會唔會唔太適合我這個年齡？

這個月供組合會唔會太保守是否需要作出轉換？
是否需要加大月供額？

我亦有儲現金作一手低位買入，如果需要買會唔會有一些建議？

我亦想好好把握黃金10年做好投資將現金轉換成資產。
應謝回覆

龔成老師：

現時月供的股票，都有質素的，基本上可以持續，長期進行。但要留意，微盟集團（2013）、中芯國際（0981）的風險較高，因此月供金額不建議太大。

其他就無問題。

至於現時持有的3股，可長線持有。

基本上，現時的月供組合，可長期進行，如果日後有較多資金，可以投入更多在月供，你可以考慮加入恆生科指（3067），$2000月供。

因為你22歲，可以承受一定的風險，所以應調高組合的潛力度。

另外，當然要同時留現金，你可以等一些潛力股下跌時出手，如小米（1810）、中生（1177）、舜宇光學（2382）。

加油！要好好把握黃金10年！

------------------------------------------------

Q21278：

龔成老師您好，我是您的忠實讀者，住澳門，香港人，今天已40年歲。首先想多謝龔老師的無私建議及幫助，知道老師每天收到大量來信，需要每天花上數小時解答，希望老師繼續努力，並祝身體安康。

自上年疫情開始，有幸在網路認識老師及您的著作，基本上有關老師所寫的股票書籍都已經閱畢， 亦由上年年中在香港某銀行開始月供股票如下：

2800 盈富基金
0823 領展
1038 長建
0669 創科實業
0066 港鐵
1211 比亞迪
9988 阿里爸爸

現在每月月供約16000。盈富佔供款比例稍多，其他都平均供款，現在談成績真的太早，但帳面上已經賺回買書錢有餘，高見有20%，現在回落至8%左右

但我很清楚長期持有不需要理會股價波幅，只想告訴老師所寫的是可行的，亦明白價值投資，持續購買並長期持有優質股的威力。期待龔老師的新作，定必拜讀，努力增強財商。

另想請教老師以下我的邏輯有沒有問題：

本人在澳門手持一自住物業，可轉按減輕利息同時套現約140萬，每月新供款額佔月薪約23%（原按揭供款佔約21%）。

打算利用這筆錢同時努力儲錢作進一步資產配置，希望10年後能財務自由，但供款年期又變回25年（原按揭尚有15年），總利息加行政費約需要110萬。

我想問利用現在低息環境套現，以現在的現金購買優質資產並長期持有，用未來貶值的現金償還。因為是長期，縱然新按揭還息還本比例又重設，但此計似乎可行。我的想法有錯嗎？

明白必須購買優質資產，先增值後現金流，並定期檢視資產情況，多多學習才能實現。月供是因為我尚未能掌握估值，希望日後老師能來澳開班，定必報讀。

謝謝老師的時間及幫助。感激萬分。

龔成老師：

現時你月供的，可以保持，長期進行就得，這些都是有質素的股票，同時處於一個平衡狀態，而適合你的年齡的，當然，你同時都要留一定的現金在手。

對，我地一定要長線的，不要著重短期價格因素，集中長期的財富累積。

至於轉按方面，由於可減輕利息，因此值得做。而之後只是佔月薪23%，這數目不高，因此可以做。

至於套現了$140萬，其實原理是增加了負債，這點你要明白。如果增加負債後，仍是佔你總資產的比例數不高，就無問題，同時你要明白風險度會高左。

至於現時低息環境，你的方向是正確，因為利用低息資金，投資得到較高回報，能有效創富，不過，你都要同時留意風險度，因為現時的投資市場，並不是特別平，因此在時機上，只是中等。

最好當然在「有明顯投資機會，利用借貸投資，就能創造最大效果」。

因此，你的大方向正確，因時機只是中等，所以就算套現後，都只建議部分投資，餘下等機會。

------------------------------------------------

Q21279：

龔sir你好! 我係你舊生, 遲啲都會上你的進階班。上咗你嘅課堂之後, 都有做月供股票 和 買入優質股, 現賬面都有15%的回報, 個別股票更升80%, 感謝你!

我剛買了綠置居(我名下) 並於2022年收樓, 我月入40K, 一個人做按揭, 每月大概供$9000。

由於現在大約有$70萬現金和$70萬股票, 所以想為太太置業 並預算購買約500萬的物業。她薪金大約45k, 並預計只有她做按揭。

Plan A: 買市區舊樓, 近地鐵站, 約250呎, 35-40年樓齡

Plan B: 買荃灣舊樓, 行10鐘到地鐵站, 約330呎, 35-40年樓齡

Plan C: 暫不買樓, 繼續月供股票 和 儲錢。伺機再為太太買樓。希望龔Sir賜教, 感謝回覆

龔成老師：

現時你的供款水平不算高，因此，就算太太置業，都可以考慮的，但你地要明白，這動作會令你地的財富較集中在物業，同時負債增加左。不是不可進行，但就要明白這風險。

Plan C，在這刻是較好的，因為當你地這刻買樓後，其實要用了不少的現金及股票。不過，如果你地大方向好想買樓，Plan B其實可以考慮，只是在這刻進行，還是過1、2年，等你地有更多資金才進行。

荃灣這地區都不差的，是市區與新界西的重要通道，配套發展成熟，如果日後發展大嶼山，這地區都能受惠。

因此，Plan B在大方向可以進行，只是在時機上，睇下你地有幾想這刻進行，還是等多1、2年進行。

------------------------------------------------

Q21280：

Hi 龔成，我係做股票經紀買賣的、想請教下你意見麻煩晒

我之前係做髮型師，而家立心想轉型去做投資股票工作，之前係光大證券。由於學歷不高，所以我不停努力去進修英文，同去HKU讀左Finance。

跟住考保險和證監牌，我自已本身都好鐘意投資。

睇股票市場，好似上一年，幫客人投資，自已每個月都會有一份收入。但當時況不佳，就算我唔理會輸錢個部份，分分鐘會變成零收入。

龔成老師︰

做股票經紀這工作，收入的確有一定波動性。其實就同好多銷售行業一樣，當市道唔好，無人買野，自然佣金會減少，令收入出現下跌問題，這是無可避避免的。

但我地決定一份工作是否合適，除了睇自已興趣和意願。更重要的，是用長期角度分析，你到底想5年後、10年後，你想收入如何？身價如何？生活如何?工作如何？

當你有左長期的設定，你這一刻就要想。現時這個工作，是否可以達至你的目的。而這個問題答案，只有你自已才會最清楚。

見你過往，都為這份工作，付出不少努力。

你可以睇翻如果證券工作真係適合你，你就要找方法解決你當下所擔心的問題。例如經濟環境差時，要找其他兼職，去平衡個收入。或者做些小生意，令自已多個現金來源等。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21221-Q21240）

Q21221：

老師，我聽咗你的選優質股和為何不賣出優質股覺好有道理。多謝你咁好的片，以下請假你幾個問題：

1）優質股會否因時因市而異？宜家個個都話唔好選新經濟股，但如騰信，巴巴，京東，小米（都持有）百度
，b站（目標股等待中）等我始終認為係優質股（我錯咗高追快手所以唔買，美團雖佢好但太貴）

2）最好的組合應集中買賣幾多隻優質股？定都要唔同行業優質股去平衡？

3）快手有排都未到家鄉令我反省覺以後應集中少隻優質股（80%想全買700），我是否錯？

4）我諗住係選優質中的優質，咁騰信應該係優中之優，你的優中之優係邊幾隻？

5）我之前670入過700賺唔多放咗跟住等到630再入，假期最後一日654我無放

見你答FB答話唔好放如果630買，但好多都話個市仲有機會跌，我矛盾中：覺你話唔好放啱，但又諗當日670入賺10唔放我入唔到630，我諗住短期若有機會去到660-680就放，定你都係建議我唔放嗎？

6）我205入咗比亞迪，太多信息話仲會跌（26000），我應放定唔理照長期持有？

感覺有時睇太多財經跟住個個都話會跌（之前話好多次跌真的跌），我唔理先會失手放買快手（分幾注買都係貴）

所以好矛盾（我個人都覺會再跌尤其疫情反覆，身邊見到好多行業都好差）

7）我52入咗中移動我會長揸
若跌穿50應再加注定幾多錢再加？

8）我唔會奢望3百萬變一千萬，我只要本金有一半的回報已好感恩，但感覺真的唔易，不過會努力，你要我地自己選優質股係好啱，因授人而漁，我設388@410-430入唔到因佢一跌標升，你現在建議388的買入價是多少？

9）你對來緊一個月的股市點睇？會跌至27000定會升至29000以上？

我見你叫人忍手，是否你都唔睇好後市嗎（第二季）？

龔成老師︰

1） 我地最主要都係睇企業本身質素，去確定是否一隻優質股。之後，再利用平貴，去定一個買賣策略。

現時有不少新經濟股，出現輕微過熱架情況。但唔係代表佢地無質素，唔值得買﹕只係用現時價值買入，個風險會太高，再等佢回調會較好。

我地只會係合理至平宜水平入貨，或者利用月供去儲貨。就算再好的股票，都唔好係貴價時高追，咁係好危險。

2） 一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你預大約8-10隻左右，會較理想。

3） 就算質素再好，都不要過份集中，因為咁個風險反而大左。因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

4） 金沙（1928）、港鐵（0066）、比亞迪（1211）、中生（1177）、福壽園（1448）、小米（1810）等，都係一些有質素架股票。

但除了質素，我地都要考慮佢現價，到底有無值博率。好似比亞迪（1211）好有潛力和質素，但現價太貴，我地都唔會去入貨。

5） 你依然停留左係"賺差價"架思維，我地投資增值，係透過長線增有一些優質企業，去等佢自然咁升值，而唔係炒炒賣賣。

所以，只要係優質，你長線持有就可以。你見我比亞迪（1211）買左咁多年，中間升升跌，我都無賣過，現在才可以享受數倍升值的效果。

同埋，你唔好諗住自已估到個市點走。如果佢唔係好似你預期咁賣完，之後跌翻比你入，反而大升，你就會進退失據。

6） 你比亞迪（1211）個買入價係貴左，但由於佢好優質，你長線持有就可以，但現價唔好再加注。

記住，睇財經新聞，我地睇下個客觀資訊，唔係意見。

7） 中移動（0941）都有質素，但佢主要係收下息，如果你未近退休之年，唔建議持有太多。

至於再跌是否加注，就睇翻你本身預算投資此股的資金，是否已經用盡。如已用盡，就算再平也不要加注，否則只會增加風險。

如尚有資金，可每跌10-15%就加1注。

8） 其實只要你學習一套正確財富增值方法，再比些耐性，要令資產倍升，唔係話咁難做到。

港交所（0388）現價略貴，你預回多1,2成才算較合理。

9） 中短期股市走勢，我唔知道。我只係從大市水平和個別股票平貴，去定投資策略。

現時不少新經濟股，都有過熱情況，暫時不宜投資住。至於舊經濟股，普遍價格都合理，依然有投資價值。

------------------------------------------------

Q21222：

sir,可唔可以比D意見, thanks a lot!
（學員附上了6919的分析練習，但不便登出）

Sir,我有3隻蟹貨,都keep左3年,覺得唔係幾睇到未來既增長力,覺得食之無味棄力可惜

371 4.44@12000
698 0.84@40,000
315 6.44@14500
788 1.73@18,000

我覺得依幾隻質素都唔差,但睇唔到個增長力,每次出完業績就想等派息,派完息就想等業績希望有轉機,,明明其他資金買增長股回報都唔錯

但下唔到決心沽貨,從來未試過蝕錢沽貨,我係咪應該咁做,可唔可以比D意見我,THANKS!

龔成老師︰

你分析人瑞人才（6919）的練習，睇得出你花了一定的時間去進行研究，同時都有心機做的，基本資料方面無問題，至於評分方面，你的答案大致正確，你給了15分，我相信這個數與這企業優質度接近，相信你大致掌握了該評估表的指標方向。

至於你在SWOT分析，你可以寫更多（雖然評估表該格位不是很大，但你可以自行寫更多），你只簡單寫定位清、效率高，其實可以延伸這更多，佢怎樣效率高，這因素如果幫到這企業將來發展。

至於評估表第5頁，你表示負面因素是行業競爭加劇，其實可以再延伸寫更多，如果這情況發展，是否會對佢賺錢能力有所影響，你表示佢最終因經營本低而勝出，這是否佢最終能站得住腳但賺錢能力會減，到時如果真的行業競受加大，佢盈利會否減少，這企業怎樣保持現時的賺錢能力？

至於企業估值方面，你計算出的企業價值都大致正確。

人瑞人才(6919)主要為企業提供綜合人力資源服務，其服務包括發布招聘廣告、前端招聘、入職及上崗、後端人事管理等。

根據灼識諮詢報告，中國人力資源服務市場由2014年約人民幣1,912億元增長至2018年約人民幣4,086億元，複合年增長率為20.9%。

預期到2023年達到約人民幣10,142億元，複合年增長率為19.9%。故行業發展，預期係正面。

集團中國具有強大的服務網絡，覆蓋超過150個城市的客戶，開設超過20間辦公室。

按2020年末計，集團是內地龍頭靈活用工服務提供商，以工人數和收入計，市佔分別為2.3%和3.1%。

初步睇，此股都有投資價值。但人力需求很受經濟環境影響，加上集團現時賺錢能力，唔算得上十分強。

而且行業上，也算不上係藍海市場，因為行業都發展了一段時間，只是市佔較為分散，故增長力你預係中上，唔會係爆發性增長。

現價算係合理區頂部，此股係可以投資，但不宜太大注。

其實整份評估表，你都做得不錯，運用得很好。你要大量這樣分析企業，實力才會大幅提高，我自己多年來，都是不斷分析企業、分析企業，去提高實力，同時以「分析好多，投資好少數企業」去提高投資準繩度。

至於你這些持股，是否沽出換碼，你要從投資回報角度去考慮。如果換至其他優質股，長線有明顯較理想的增長，我地就應該行動。

北控水務集團（0371）和數碼通電訊(0315)都有質素，但你預佢主要係收息，唔會有太明顯增長力。

通達集團（0698），算是不過不失。但就唔值得持有太多，始終質素唔算好高。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股長遠仍算有發展力，可長線。不過，潛力度比過往略減。

你可以睇翻自己年紀、持股比重和風險承受力，去決定是否減持。

------------------------------------------------

Q21223：

龔sir.您好我今年40歲，以前有跟家人投資新股（白表）如下：

招行 1,000
領展 2,000
工商 2,000

中行 2,000
中鐵建 500
中鐵 2,000

因為自己唔識炒，輸多贏少，最後儲蓄都係做定期多，不過近期連一厘都無，跑輸比通漲。

現在收入二萬多，供養兩位已退休家人，住私樓（唔洗供）。

手持五百萬現金，應該點開始建立資產組合？

龔成老師︰

我地投資股票，係希望買入一些優質企業，透過佢自然增長，達至財富增值目的，絕對唔係"短炒"。

而定期這類方法，在財富增值上，効果都唔高，不建議你用。

只要選股和買入策略正確，並長線持有，就會有唔錯架財富增值效果。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你40歲，建議你用「平穏增長股」 + 「潛力股」的組合，當中以「平穏增長股」為主。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、領展（0823）、希慎（0014）、太古地產（1972）

或潛力股︰中生（1177）、福壽園（1448）、小米（1810）、安碩恒生科技（3067）、港交所（0388）、阿里（9988）、騰訊（0700）、ＧＸ中國電車基金（2845）。

現時大市只是合理區，你現有500萬資金，可先扣起等同半年開支的應急錢。

餘下部份，可以先投入一半，用"分注"形式，慢慢買貨。另一半就等大市出現一定程度的下跌，才大力度掃貨，然後長線投資。

不過，你投資經驗與知識不足，加上過往投資虧損較多，我會建議你先集中「平穩增長股」，而「潛力股」，只能小注，等你有較多知識後先加大投資潛力股。

同時，買入時要慢慢分注，或用月供作策略。

暫時只建議你動用$50萬-$100萬，到你有一定知識、經驗後，先慢慢去到約$250萬作投資。

------------------------------------------------

Q21224：

你好, 本人38歲, 已婚有一個3歲小朋友
手頭現金約100萬, 而家同老公屋企人一齊住

想盡快買樓…..但兩公婆月搵4萬蚊, 問過銀行按揭只借到400萬, 要再儲多D首期先有望
上車, 現每月可儲萬五蚊

1. 點先可以滾儲到多d資金

2. 投資新手, 之前都係抽下新股咁

3. 岩岩睇多左你既FB, 想4月開始月供三千2800, 請問是否OK?

4. 知道買私人樓保值/升值潛力高D, 但budget有限, 買居屋自住係咪都OK

5. 我地住將軍澳區, 因想屋企人幫手睇小朋友,想搵番同區,但而家樓價越升越有, 真係追唔係幾到, 係咪應該搵遠d地方住呢

另現有股票組合約27萬如下, 請問有沒有重複??否需要調整

0005,1600股, 平均買入價49
0175, 1000股, 平均買入價33
1177, 3000股, 平均買入價7.63
1299, 400股, 平均買入價200股抽新股中, 200股96.5
1810, 800股, 平均買入價22.7
2388, 500股, 平均買入價15
9988, 100股, 平均買入價229.6

感謝!

龔成老師︰

1） 如果你打算1、2年內買樓，就建議留較多現金。

但若果你不打算太快買樓，就可以先利用投資，滾存更多資金先。

由於你係新手，我建議你先用月供模式，去投資一些有增長的優質股，以達至財富增值目的。

2） 抽新股係可以，但你要明白我地分析新上市企業合理價和質素時，除了了解行業發展、佢本身業務狀況外，都要參考過往財務數據。

但新股都唔會有太多這方面的可靠資訊，令成個分析唔完整。所以我地係投資新股時，就算覺得佢基本面再好好，我地都要比較保守，唔可以太取，去平衡翻參考數據不足這個風險。

3） 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你38歲計，應用「平穏增長股」 + 「潛力股」的組合。我建議你用每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、領展（0823）、希慎（0014）、太古地產（1972）

或潛力股︰中生（1177）、福壽園（1448）、小米（1810）、安碩恒生科技（3067）、港交所（0388）、阿里（9988）、騰訊（0700）、ＧＸ中國電車基金（2845）。

由於你係新手，未有選潛力股的能力，也未必能掌握投資時機的能力。你可以簡單地先集中投資係盈富基金（2800）。到你有經驗，才選其他我建議架股票。

至於現有100萬，可先用30萬，分注咁入盈富。餘下現金和每月儲蓄，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

4） 私人樓一般情況，升值潛力都較高。但從自住角度，居屋都係有佢吸引之處。當你資金不多，而目的又係自住，居屋其實都可以考慮。

5） 除非你有迫切性要搬離現有居所，否則，你應先利用優質股增值，去先增值一筆財富。另一邊，再慢慢物悉價格較合理物業，咁會較好。

另外，其實將軍澳區已經是全香港，相對唔太貴的地區，所以日後其實唔太建議你轉其他區。

因為你手上資金不多，勉強買入單位，都會令你供款好吃力。而且，買物業後，我地都應該同時留有一定股票去做增值。所以，現時未必係咁適合。

建議你如果有較長時間，先用優質股累積起一筆財富，再慢慢換屋，會較理想。

至於現有持股，都適合你。除了匯控（0005），佢主要係收下息，唔會有太大增長力，不宜持有太多。

------------------------------------------------

Q21225：

龔sir你好，因為留意你啲post開始有買少少股收息，你嘅分析同意見都好實用！

想請教你以下情況，我應該如何理財，同埋有咩理財組員較適合我

本人28歲，
月入24k，
每月儲蓄大概15k-17k，
銀行現金20萬。

唔識理財，睇完你嘅分析先識買股票收息。多謝你嘅無私分享！！！

我個倉有:
0011一手@154.2
0006一手@45.9
1972一手@23.5

現金20萬中應該用幾多錢做投資？

另外如有每月月供股票應該每月供幾多較好，同埋哪一隻股適合？

目標期望5年內儲人生第一個一百萬，同埋一直想置業，但當有一百萬個時肯定樓價升到唔夠錢買樓。

仲有一個目標就係一直都好想創業，有好多想法，但好怕蝕哂d錢，所以一直遲遲未行岀第一步

我嘅目標係創業初期賺到嘅錢一部分捐岀去比有需要嘅人，我知失業率高企，好多人飯都無得食，有能力就要幫多啲人，平時每月都會買拉車仔買乾糧捐去食物銀行

所以如果創業我希望可以賺到更多錢，同時可以利用我嘅部分盈利再去幫人。感謝龔sir

龔成老師︰

你的想法很好，有能力時，我地係應該盡力回饋社會，這才有意義。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你28歲，可以選擇一些「平穩增值股」+「潛力股」作投資目標。現有持股都合適，但電能（0006）增長力唔高，只係收下息，長線唔好入太多。

以現時大市合理區狀況，月供最好用一半每月儲蓄，另一半就先儲起架策略。

由於潛力股要求你有一定的投資知識，因此這刻不用急著投資，你可以集中在平穩增值股先。

每月用$7000去月供盈富（2800），餘下就儲起，等大跌市機會。其餘合適股票，到你對佢地有一定了解，才從中選股。

平穏增長股：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、ＧＸ中國電車基金（2845），但就要明白波動性比上述會高左，同時風險大左，你要自己平衡。

由於你投資知識不高，因此可較集中在平穩增長類股，至於潛力股，只宜小小注，最好是你提高投資知識，等你有一定知識，先慢慢增加翻潛力股比例。

現時大市處合理區，20萬資金，可先用7,8萬，分注咁慢慢盈富及其他平穩增長股。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

當你累積到一定資金，就可以入市買樓。若此刻資金不多，可先從小物業入手，再慢慢換成大物業。（詳細做法，你可以睇我本<5年買樓4步曲>）

至於創業，你可以從你的興趣、強項、認識的事著手。

例如你本身對某類產品很有興趣，你會在那裡買？如果你在網上買這產品，這個網站的模式如何？

初期投入唔一定要多，可以用網店模式、網上買賣這些低成本模式著手。一邊做正職，一邊創業咁試都可以。最重要係行出第一步，因為未行過，你係唔會知乜野情況。

你最初要有學習的對象，你先尋找一些自己認為不錯的商店，了解一下佢地的商業模式，最始好大型及小型都有，先以小型作學習對象，然後就試下佢地的模式，能否成為你創業的方向。

記住，最好唔好做得太雜，要專注在某一範疇，等人容易記得你。

------------------------------------------------

Q21226：

龔Sir，想請教一下。

1. 522同981有潛力嗎？可以作月供選擇嗎？如可以，那一隻比較好？

2. 另外，聽你講過3067係供股好選擇，請問現價合理嗎？

龔成老師︰

1） ASM PACIFIC（0522）有質素。

佢係半導體和發光二極管行業的集成和封裝設備供應商，為跨國芯片製造商，為獨立集成電路（ＩＣ）裝配工廠和消費電子產品製造提供半導管裝配設備及材料。

過往的生意與盈利都有增長，不過盈利有點波動，這都會令股價略有波動。長遠有一定的發展，可長線投資。現價合理區頂位，如分注小注或月供，仍可以。

而中芯國際（0981）業務有增長力，但未必能稱為好優質的股。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。

加上此股近年升了不少，就算有所回落都唔算平，加上之前熱炒過，股價大上大落，投資要注意風險。這股唔建議大注，也不建議用作月供選項。

2） 安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q21227：

龔sir你好。我又忍不住在反思自己的組合了，希望你能給些意見！

問題1：我現在計劃的組合比例ok嗎？（我19歲）

問題2：現在的組合內，所有都有持股，除了小米。最近見你話小米波動性大咗
（因開發電動車），我應仍選擇它嗎？（如不應該，組合比例亦會考慮調整）

我月供的金額分配ok嗎？（每月有$17000能放入股票市場）

問題3：我另外還有些以前買咗，但現在不太想加入做我的組合的股票。你覺得我對這幾隻股票的處理正確嗎？（特別是9988）

現在計劃的組合：
科技 （700, 1810） —— 22%
安碩科技 （3067） —— 30%
醫療 （1833） —— 8%
舊經濟潛力 （388） ——5%
平穩 （66, 823） —— 10%
盈富 （2800） —— 25%

一手手買股票
- 騰訊 （when drop to $520）
- 平安好醫生
- 領展
- 小米

月供股票 （至少供3年持有5年）
- 港鐵 （1k）
- 港交所 （1k）
- 騰訊 （2k）
- 盈富 （2k）
- 安碩科技指數 （每個月買1手）

組合外現持有的股票：

打算就咁擺喺到：
11恒生1手@124
12恒基162股@30.92 （放棄了月供因增值較其他慢，好似我大個啲再買翻好啲）

等賣：
883中海油1手@6.7
9988阿里巴巴2手@272 （知道有質素的，但我現在好像已有不少科技股，而個人對這股
有些失去信心） （但如果不要小米，應保留？）

謝謝你的無私幫助

龔成老師︰

1） 19歲係一個好年青架年紀，正值財富增值的黃金時期，策略上可以相對進取些。

你現時月供組合，無問題。其實恆基（0012）仍是有質素，當然增長力減少左，預期佢中短期都是弱，不過，這股是睇長線及超長線的。

如果你將來有資金多，都可以考慮月供翻佢。至於恆基（0012）和恆生（0011）現貨，可持有。

但你現有持股，有少少偏重左係潛力股，令個組合波動性略高。以你年紀，唔好超過6成。

2） 小米（1810）由新能車發展有一定不確定，故你要預佢波動性大左，但整體質素係有，你照持有係無問題。

你現時月供金額和選股，都無問題。

3） 這些股票都係有質素（包括0011, 0012, 0883,9988），唔建議你沽出，照長線持有就可以。

但留意中海油（0883）只係商品類，價格自主性低，質素只算中等，不宜再加注。

------------------------------------------------

Q21228：

龔sir，你好，本人今年46 歲，有現金 $200,000，想買公用股作長線增值投資和收息用途。
目標有：

中電（0002），煤氣 （0003），電能（0006）
請問那一隻較適合我？

龔成老師︰

若果以收息角度，中電（0002）和電能（0006）會較好。

但我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你現時才46歲，都應該作一定程度上的財富增值，而唔係純收息。我建議你用「平穏增長股」，去創造一個增值平台。

現時大市只在合理區，你20萬可先用一半，分注咁慢慢儲貨。餘下一半，就等大市有明顯回調，才再出手。

------------------------------------------------

Q21229：

成老師你好呀，我現年22歲，月入21k，我學習價值投資開始了大約9月開始月供11k股票

直至現時，月供包括（均價）2800（$26.9）,0066（$41.9）,0002（$73.1）,0027（$60.1）,2013（$13.5）,0981（$21.2）,9988（$237.4），另外曾一手買入9988（$227.8）一手，0981（$20.2）一手，0823（$58.4），一手。

1.我想問一問我的投資組合風險會唔會唔太適合我這個年齡？

2.這個月供組合會唔會太保守是否需要作出轉換？

3.是否需要加大月供額？

4.我亦有儲現金作一手低位買入，如果需要買會唔會有一些建議？

我亦想好好把握黃金10年做好投資將現金轉換成資產。
謝回覆

龔成老師︰

1） 以你22歲計，係財富增值的黃金時期，可以承受較高風險。

你月供組合中的股票，大部份都有質素。但中芯國際（0981）業務有增長力，質素都有，但未必稱得上最高質。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。故此股作月供，就不太適合，或最多小注月供好了。

微盟集團（2013）財務數據的增長都強勁，但波動性較高，唔建議用來月供。

但這2隻股票現貨，你照持有就可以。

2） 我不清楚你月供供款比重，故難言是否太保守。但從選股上看，都可以。你22歲，建議你用「平穏增長股」 + 「潛力股」作組合，比例約各一半。

以下都是一些適合你月供的股票，你可以用來加入。

平穏增長股︰盈富（2800）、銀娛（0027）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）、ＧＸ中國電車基金（2845）。

現時大市只在合理區，每月資金唔好盡用。最好留有部份，等大跌市出現時，可以用來掃貨。

3） 最好將可以動用的閒錢，都用來投資。因為你年紀，越做累積財富，個複利效果會越理想。

4） 現時大市在合理水平，現金和股票最好各佔一半。若果你現金唔多，可以先等大跌市出現，才出手。

至於投資目標，就係我2）中所講的股票。到時你可以因應自已持股情況和股價平貴，去用現金掃入這些優質股，並長線持有。

------------------------------------------------

Q21230：

老師你好，一直以來我都係對股票投資既概念都係半桶水，直至幾年前開始睇你既書，睇你係網絡

上分享你既心得同知識，慢慢學識投資係應該長線同睇企業既價值，亦都因為你，比亞迪

令我賺咗人生第一桶金，所以好想多謝你令我感受到賺錢原來咁開心，我來緊想抽居屋

同老公買樓，但係我唔知道應該點樣分配，所以想請教老師既意見

我現在持有268金鍱，9988阿里巴巴同3067，大約總供有二十萬

現金二十萬，每月可儲蓄15000，我應該月供股票令資產增值，還是應該儲蓄現金作為首期，我想兩至三年之間可以

賺多少少，幫補買樓，希望老師能夠指點一下，謝謝老師

龔成老師︰

比亞迪（1211）係有質素，雖然股價已升了不少。但由於佢有潛力和質素，最理想係繼續長線持有。

我建議你先用股票增值，但2至3年唔算係一個長架時間，增值時要保守些。

現有持股可持有，但由於佢地波動性略高，唔建議再加注住。未來以平穏增長股作為目標，去創造一個組合。

你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、領展（0823）、希慎（0014）、太古地產（1972）

大市現處於合理水平，20萬資金和每月儲蓄，就等大跌市機會出現，才出手掃貨。

------------------------------------------------

Q21231：

大佬，我依家股票組合係咁

Stock 5, $46.3, 14000股
Stock 386, $6, 4000股
Stock 737, $3.95, 10000股
Stock 941, $74.75, 1000股
Stock 1789, $12.77, 4000股

Stock 1810, $31.75, 2000股
Stock 2333, $27.65, 2000股
Stock 2638, $6.84, 5000股
Stock 2800, $26.5, 5000股

我想問再整合一下。有冇咩股票會放左佢會好d ?

龔成老師︰

從質素上計，這些股票都係優質，可以長線持有。

但我地財富組合，除了係優質股外，都要因應自已年紀，去做相應的配置。

我地會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你現時這個組合，主要收息股為主，係偏向保守。若你係中年或接近退休的人士，這個組合都可以。

但當中有個較大問題，就係成個組合偏重左係匯控（0005），佢佔組合近一半。緊記，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

建議你，慢慢沽出部份，換碼至以下股票，去令組合回復平衡。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安（2318）。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金（3110），都可以。

------------------------------------------------

Q21232：

龔sir: 早前$15入咗3手藍月亮6993，之後係咁跌，買入的時候冇考慮市盈太貴，依家又冇咩息收，呢隻可
繼續持有？還是溝多兩手平倉就沽？

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

另外，我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，不過現價唔平，之前貴，現價算是合理區頂，唔係加注的時候。但此股有質素，現貨持有係無問題。

------------------------------------------------

Q21233：

成哥
本人38
我現在持有物業自住
每月可儲二萬
用作月供1177 及700
每月6000 供1177
8000 供700
其餘用作儲現金
手頭現金 約二十萬

手上持股
388 @ 451.6 100 股
700 @ 580 100 股
788 @ 1.2 20000 股
1211 @ 228 500 股
2158 @ 61.6 200 股
3067@ 17.83 400 股

6618@ 29.2 100 股 （因高位賣了接低成本）
9618 @330.7 100 股
9988 @ 255.2 300 股
2638 @ 7.2 8000 股
2800 @ 28.5 10000 股
3033 @ 8.3 4000 股
1177 及700 供了幾個月

目檟 ： 希望在十年後 有每月五萬被動收入

1）現在月供出這兩隻 可以嗎？
2）想增加潛力股 有那些值得投資十年後收成的倍升股？
3）現在持倉可以嗎？
4）想再集中儲倍升股 有沒有推介？ 例如 儲1448 及3067 可以嗎？
5）以上做法 能否做到十年後 有被動收入五萬？
6）現在倉位 會否太散？
7）178 好想買 值得現價大量入嗎 大約1.8

龔成老師︰

1） 我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你現時持股和月供組合，都係太偏重係潛力股。以你38歲去計，潛力股和平穏增長股最好各佔一半。否則，你個組合架波動性風險會過高。

而且，大市只在合理區，每月儲蓄最好先用一半，另一半儲起去等機會。

2） 以下股票，都係有質素架潛力股，有力可以成為倍升股。

潛力股︰中生（1177）、福壽園（1448）、小米（1810）、港交所（0388）、阿里（9988）、騰訊（0700）、比亞迪（1211）

但大部份現價偏貴，買入前要做好估值。

3） 跟月供組合一樣，偏重左係潛力股類，但情況無咁嚴重。這些股票可以持有，再利用月供和新資金，慢慢修正翻個比例。

若你想投資恆生科技股ETF，我建議用安碩恒生科技（3067），佢費用成本比3033為低。

另外，港燈（2638）係收息股，增長力欠奉，你不宜持有太多。

4） 這兩股都可以的，同時你都可以睇我本<50值博倍升股>，當中會有更多選擇，但要注意組合比重問題。

5） 要做到10年後每月有5萬蚊現金流，以股息率5%計，你需要本金1200萬。

以大市過去年平均回報10%計（連股息再投資），你每月投資$20000再加上你現有資金和持股（約值85萬），10年後大約會增值至600萬。

如果要達至你的財務目標，你要再加大投資力度。可以看看你自已的開支，有沒有一些部份可以調整來增加月供金額。

如果無，你就要從開源著手，轉工（如SALES，一些多勞多得的工作）、找PARTTIME、網上生意等，令你每月可儲資金大幅提升。或者拉長增值年期，以助你達成10年後1200萬的目標。

6） 有少少，長線最好維持8-10隻，咁會較易管理。

7） 莎莎（0178）仍有質素，但佢已經無過往年代般的賺錢能力，同時香港的零售市道有風險，都令這股近年的表現較一般。

這企業本身在行業有一定的地位，賺錢能力不差，但就會受經濟及零售市道影響，令股價較為波動。

其實股票班我都有講這股的估值，在過往10年，自由行較為黃金年代過左，所以從估值上，無之前咁高。

佢在行業的優勢仍在，但整體行業及零售市道，無過往咁強。長遠仍有質素，這刻處合理區，但投資注碼不能太大注，亦要有耐心先有收成。

------------------------------------------------

Q21234：

請問2186 綠葉製藥 $6入左3萬股，請問前景好何？止蝕位？待覆。謝謝

龔成老師︰

綠葉製藥（2186）主要銷售腫瘤科、心血管系統以及消化與代謝三個領域的新藥品，基本上都係有市場的，其實長遠又不是太差，只是市場有時對佢的增長力會有不同。

但近年佢質素的確有少少轉弱，但相信最差時間已過，這股本身的風險較高，唔建議投資得太多。若佢佔你組合比重唔多，可長線持有。

至於止蝕位，我唔會用一個價格來定。

只會在其長線質素出問題，或者個市去到好狂熱，令個價異常地高，我才考慮沽貨。若質素不變，就算中短期出現波動，都需要太在意。

除非你持有貨太多，就建議你在反彈時減少少。

------------------------------------------------

Q21235：

龔Sir，想請教一下，我有10000股中國人壽是賺返嚟的, 我想賣咗佢, 換馬 買比亞迪, 請問你意見如何？

雖然換取比亞迪只係大約800 - 900股, 但前景會更樂觀嗎？

龔成老師︰

這些股票賺翻黎與否，佢始終都係你做財富增值的本錢，我地都要認真對待。

中國人壽（2628）並不是無質素，不過增長力唔強。同埋企業的賺錢能力不及過往年代。

長線持有價值都算有，但暫時唔好對股價有太大期望。你可以考慮沽出部份，換至其他優質股，都係可以。

比亞迪（1211）去年營業額1530億人幣，按年增長26%，而市場一般預期為1400億-$1500億。

至於盈利為$42億，比上年增長1.6倍，不過，這就差過市場平均預期的46億人幣。每股盈利1.47。

其實整個業績，都算同市場相差唔太遠，而我地分析時，最重要是長遠的企業發展。業績初步反映，新能源車的市場仍處增長狀態，動力仍在，不過賺錢能力這刻仍算好強，但當技術進步、市場規模增加、成本控制等因素慢慢出現，賺錢能力進一步提高。

預期佢2021年新能源車銷量，應該能達到40萬至50萬輛的水平，已經能獲得一定的市場佔有率，新能源車仍是增長動力，仍是正面。

反映比亞迪長遠仍是正面，不過我自己在估值上，暫時未有提高，始終這刻市場太著重前景因素，因此，這刻仍是略貴，初步保持我之前對這股的合理價，$120。如果想投資去翻$150先月供會較好。

當然，之後到比亞迪正式有詳細財務數據、年報、附註等資料，會正式重新估值，相信調高的機會有超過一半。

你現貨可長線持有，但想現時將中國人壽（2628）換碼至比亞迪（1211），我就不太建議。

最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q21236：

成sir，你好。小弟睇了《年報勝經》，書中提及經營現金流-資本開支＝自由現金流。

如果要搵上述資料，是不是在年報中的現金流量表就可以？

我想計算［215］和記電訊的自由現金流，可唔可以麻煩你指教一下。

以上是和記電訊的現金流量表，要計算自由現金流，應該用那一個金額計算呢？麻煩晒成sir。謝謝。

龔成老師：

佢2020年的資本開支，$5.93億

而佢的經營活動現金流，為$12.97億

所以，你只要將$12.97億減去$5.93億，就可以理解為佢的自由現金流。$7.04億。

------------------------------------------------

Q21237：

老師你好，我想請教一下買樓問題。我個portfolio入面己有70%係樓(澳洲投資物業），現已達正現金流狀態，睇個勢仲有機會升，真心唔想賣。

而我依家喺香港跟屋企住，都會想有更多私人空間，但稱不上係有迫切需要。

而我依家買樓唔係唔得，因為我人工穩定而且接近6萬，但要放晒所有股票做首期，就會變成All-in樓市既狀態

所以想請教老師，你認為我應否係香港買層自主樓？定係保持分散風險嘅原則，keep返三成股票？

龔成老師：

澳洲物業如果已有正現金流，同時質素唔差，其實可以持有

由於你這刻在香港，無太大的逼切自位需要，加上你在整個財富配置比例中，已經較集中在物業，因此，暫時你未必要好急在香港買樓。

你可以集中用股票作為投資工具，先將財富增值，到你有自住需要，又或樓市出現較明顯下跌，有明確機會時，才考慮買樓。

其實最好是，當你買樓時，只需賣出部分股票，買樓後仍有一定的現金及股票剩，就最平衡。

------------------------------------------------

Q21238：

龔sir 你好！我有個疑問：一般來講，投資股票越早越好，因為時間越長越有複利效果，而分注/月供就可以減低市場波動的風險。（我理解對嗎？）

但經過上年3月，我之前月供的股票（約供了兩年）帳面蝕咗好多，雖然我明白長線不用擔心，而之後今年年頭都升返啲

但好似輸咗機會成本，因為如果不月供而將儲到嘅錢大跌時入貨會賺多好多。

我知道老師你都沒有月供，而係耐心等機會。

咁其實我應唔應該停月供/分注，儲現金等到個市再大跌至入貨？

但又覺得留現金會蝕通脹及享受不到複利效應。我現在股票現金比例（2:1）（金額都好大下）......
謝謝

龔成老師：

股票愈早買愈好，這個大方向是不變的，當然，只限於優質股，但都要留意，這是講長期的，而中短期會波動，簡單來說，你今年買，會著數過5年後買，但如果以中短期計，只要我地能把握到買入時機，有機會在一年後的買入價比這刻好。

另外，月供是一個長期儲貨的策略，好處是平均了買入價，有效減少一次過在高位買入的風險，但缺點就是，無法一次過捉到低位。

因此，對於投資實力不足的人，利用月供是很好的方法。

但如果本身已有投資實力，能把握投資時機，有企業估值能力，其實不用月供都得，所以我自己都無月供。

而我一般的建議，都是部分資金月供，同時留部分現金，等機會，這是一個較平衡的做法。

你現時現金的比例，都可以的。

------------------------------------------------

Q21239：

龔sir，有幾個問題想問

第一，請問閱讀你12本著作的順序

第二，我已有1百萬流動資產，是否可以不去讀（80後百萬富翁）？

第三，你的二個面授課程，應分別在讀完你那本書的時候報讀？還是讀完你的12本書便無需報讀？

第四，看到你有一網上課程，你的12本書或面授課的內容可完全覆蓋到嗎？讀了你的12本書後是否無需報網課？

第五，我即將38歲，對於我閱讀你的書、面授課、網課的計畫會有建議嗎？

第六，網課會再推出限時優惠嗎？

第七，你的12本書中，相信大部分會是說「心態」、「經驗」，不會過時，但其中3本：50優質、50穩健、50值博，提及的股票會因時間而出現變化，現在或將來才買的話，會否過時呢？

龔成老師：

1）你可首先睇：

《80後百萬富翁》
《股票勝經》
《財務自由行》

之後再睇其他。

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

2）不是，因為書都是教你累積財富，同時無太大順序的。

3）課堂大部分內容，都是無在書講過的，而一些實戰，更具體的投資技巧，都只會有課堂講述。

例如企業估值技巧、5種選股模式、選股程式的具體應用、年報分析的實戰技巧，同時會派一份6頁紙的「企業評估表」給學員，令你可以自行為企業進行有系統的質素評分。

你可以當書只是頭1、2堂的入門部分。

4）網上課程是配合《大富翁致富藍圖》的，你可以理解是書的實戰版。

5）我建議你先睇《80後百萬富翁》、《股票勝經》、《財務自由行》，然後可以上股票班（基礎班），這樣進取最大。

6）暫時都無推出特別優專。

7）《50股》的3本書，你要睇下出版日期，因為久不久會更新的。當中分析股票，因為都是一些大方向，因此無太大變化，但平貴度，你就要留意可能會變。

------------------------------------------------

Q21240：

老師，如果想幫港交所做估值，應該使用甚麼模型比較適合？

龔成老師：

你可以用現金流折現法，以及市盈率估值，如果用市盈率估值，可以用佢過往的市盈率作參考。

其實要深入進行估值，要考慮企業長遠的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。