【龔成問答信箱】（Q22121-22140）

Q22121：

我騰訊高位買，而家點算，止蝕嗎？好慘，人生第一次買騰訊？你又話可以學巴菲特長揸嘅？

龔成老師：

第一，要計好企業價值，$600以上的騰訊（0700）是貴，如果你未有估值的技巧，應該用我之前講的月供股票，而不是一手手買入。

第二，買入後最好唔好理短期股價，集中分析企業價值。

第三，同一行業，同一版塊，持股%不能過多，如果你持貨並不過多，其實可以耐心持有，但如果過多，就要減持。

第四，要多提高自己的投資知識，建議你多睇書，巴菲特相關的書。

------------------------------------------------

Q22122：

你好老師，巳留意你的Facebook 有半年了！得了很多投資知識！想重整自己的分配：

今年43
1:現有一份儲蓄保險（大概有15萬）
2:月供一份退休儲蓄保險4500
2:現金30萬
3:每月可儲10000，現已每月月供股票5000

盈富2000
領展1000
港交所1000
長江基建1000
另外5000儲起

4:股票現有一手粵海，二手中銀

現在想有以下更改：

1.取出全份儲蓄保險15萬用作投資每年有5-6%收息股票，因發現儲蓄保險回報慢，但想用這筆錢用作比較安全的投資！

2:减小退休保險供款，取出2000用作月供股票（3067 or 2845)

3.而餘下的現金想取1/2或1/3

用作投資平穩增長+潛力股

請給予意見，謝謝！

龔成老師︰

1) 其實"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

若你想提取這筆資金，作較保守投資，你可以考慮以下收息股。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以

2) 可以，以你這個年紀，加多$2000去月供安碩恒生科技(3067)或/和ＧＸ中國電車基金（2845），都係可以。

但你要明白，這2隻係潛力股，增長潛力當然會優於儲蓄保。但同時間，佢風險都會較儲蓄保為高，你要明白這一點，自己要從風險與回報間，去作個平衡。

3) 以你43歲年紀，可以投資平穩增長+潛力股。

如果你現時無太多投資經驗，潛力股這類風險較高的股票，你就不要持有過多，最多維持2成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約4成，視乎你投資經驗多寡和了解這些股票程度而定。

現時部份潛力股，尚有輕微過熱情況。只有安碩恒生科技(3067)、ＧＸ中國電車基金（2845）、 騰訊（0700）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘要等等。

另外，現時大市只係合理水平，現金唔好盡用。現金預大約佔比重大3-5成，用來等大跌市出現，去掃平貨。

------------------------------------------------

Q22123：

首先，非常感謝龔成老師的解答。小姓張，今年25歲，投資新手，目前月入一萬七，每月個人平均儲蓄大約八千至九千左右。

本身持有兩手美團380、一手福耀58.5、三手小米29.9、一手信義光能17.38、五手信義能源4.72以及五手火岩控股3.08，整個組合本身已虧蝕緊約二萬二千蚊。

之前股市大跌，整個組合的虧蝕一夜間再擴大了一萬蚊，當時令我覺得半年結粉飾廚窗行動結束，大行開始大手拋售股票。

一時情急之下，我一下子放售全部手頭上持有的股票。我這個決定是否不明智?

我現在會先至少靜觀大市一至兩星期，之後再籌組投資組合。打算"伺機"分注入手以下股票:
("伺機"-暫時覺得短炒的話，用十天廿天線為參考，嚴守8%至10%或對上低位做止蝕 ; 長線持有的話，當時股價必須在保力加通道底部以及RSI處於三十左右)

基石長倉: 深圳國際(152)、中廣核新能源(1811)、福壽園(1488)
可長可短倉: 騰訊/阿里巴巴 信義系
短炒出出入入倉: 火岩控股(1909)

請問龔成老師對以上有什麼看法? 多謝指教～～～

三年前，個人資產只有幾萬港元，持有騰訊美圖碧桂園，首次玩股票就蝕左一萬一千心灰意冷離場後就好耐沒再投資，

真的估唔到0700當年300多一直不動到現在已600 700.... 今年2021年2月，在同事的薰陶之下，回歸股市，雖然近月已不斷學習投資知識，

但知道的還很少，今次蝕得更多。目前與家人同住自置公屋，個人資產全部變番現金，廿三萬港元。

龔成老師︰

選股方面，其實唔算大問題。但你整個投資策略和相關概念，問題就十分大。

首先，我地投資股票，其實等同投資一間企業。希望透過其自然增長，以達至財富增值的目的。我地投資一定係長線，而唔係短期炒賣，去賺差價。

我地會用企業質素、行業發展、財務狀況等，去計算一個合理值。再因應現時股價平貴，去制定投資策略。

係分析時，我地係唔會用技術分析。唔好睇圖的趨勢，這是好錯的投資方法！巴菲特已經講到明，技術分析沒有作用的。我地只會分析企業的質素，以及企業的價值。

記住，如果是優質股，短期股價下跌，是不用賣出的！

另外，睇你過往投資情況，我發現你都幾受大市和身邊的人影響，我見你買的都是熱炒股，而且買入價都係相當貴。

雖然貴，但因這些股票都係質素，其實你應該照持有，而唔係全數沽出。因為佢地長線都會增長，令個價值提升。持有一隻股票與否，唔好用買入價做指標，你應該係睇佢有無質素。

我建議你，先學好真正投資概念，去修正好自己本身問題，才再開始投資，咁會較好。暫時，你最多只可以小注月供股票。

你可以睇我架《80後百萬富翁》、《財務自由行》和《股票勝經》，相信可以幫到你。

你25歲，應以增值為主，以下「平穏增長股」 + 「潛力股」都適合你。現在你每月先用5成儲蓄，即$4000做月供。其餘先儲起，用一邊月供一邊儲蓄的策略。

------------------------------------------------

Q22124：

請問供股選美股好還是港股，初學者

謝謝

龔成老師︰

預期未來一段時間，中國和美國會係全球最重要的經濟體系。因此港股和美股，都係有投資價值。

但重點係，你對邊個市場較為熟識。另外，你要考慮平衡配置，可考慮同時持有。

如果你想投資，但又對該市場唔係好認識，你可以先投資係佢的相關ETF。以下3隻股ETF，都係不錯的選擇。

當中，QQQ波動性會較高，要注要風險。

Vanguard標普500指數ETF〈VOO〉，是追蹤標普500指數的ETF。

Invesco QQQ Trust(QQQ) 是追蹤納斯達克100指數。

盈富(2800)是追蹤恆生指數，買入盈富，就等同買入58隻在香港上優質股，係一個唔錯的組合。

------------------------------------------------

Q22125：

您好！龔SIR！我是澳門人，現年39歲。經朋友介紹認識你，真係相逢恨晚，因為我過去(9年股齡)就像股海中沒有指南針也看不見燈塔的小三舨，

剛拜讀過你的«股票勝經»，你的先財富增值後現金流的投資規劃，以及堅持持有優質股的投資方式已經收到晒。現因想入幾隻行業前景不錯的股票，

誠心向閣下請教，希望可給予合理價位以作參考！

1. GX中國電車-U(9845)
2. 吉利汽車(0175)
3. 小米集團-W(1810)
4. 騰訊控股(0700)
5. 港交所(0388)

另外，為籌錢入上述股票，我有兩隻蟹股因誤信友人及受投資群組騙局唆擺而坐貨，而家想壯士斷臂，但我查看損益表又顯示年年賺錢，

我完全唔識會計同睇財務報表的，所以想請教龔SIR這兩股是否劣質股？是的話我即止損離場。

1. A8新媒體(0800) - 0.99元入，持50000股
2. RIMBACO (1953) - 1.74元入，持55000股

讀完«股票勝經»，我發現估值真係一門專業技能，我現階段實在沒能力分析，到網上找了一下資料，發現有個以目前預測市盈率對比過去10年預測市盈率中位數的方法，

好像比較簡單，但我應該如何獲得某股過去10年預測市盈率的資料呢？

咁多問題真係唔好意思，請龔SIR盡量回答。萬分感謝！

龔成老師︰

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

至於，預測市盈率，其實只係一個參考數字，你可以用佢做輔助，但絕不可以用佢作為主要考慮因素。

你要記住，要去評估一隻股票，無捷徑，係要用時間。好多人見有D方法，簡單方便、易明，就走去用。但完全唔去考慮這些方法，個實用性和可確性有幾大，最終得不償失。

建議你若想學好分析企業，就多睇年報、睇相關新聞、書籍、上相關課程，才是正確方向。

Ａ８新媒體(0800)收入過往無乜特別增長，近年更出現下滑情況。睇翻佢過去，都有幾年係出現虧損。

整體而言，投資價值不高。長線換碼至其他優質股，相信會更好。

RIMBACO(1953)是一家馬來西亞樓宇建造承包商，本身業務算係一般，唔係特別吸引。

佢本身盈利和規模，都唔係好大。但上市時，個價曾經被炒到好高。但從業務上，睇唔倒有乜原因，可以支持佢升咁多。

佢雖然損益表顯示，係年年賺錢。但我對這類股票，始終較有保留。

這2隻股票，我建議你長線計，都係沽出較好。

GX中國電車U(9845)、騰訊控股(0700)現價算係合理區頂，而吉利汽車(0175)、小米集團-W(1810)和港交所(0388)現價偏貴，要回多1,2成，才算合理區頂，才可開始分注入貨。

你問的5隻股票，都係有質素。但佢地同是潛力股，雖然增長潛力較強，同時風險都較高，不宜持有過多。

以你39歲，潛力股最多只可佔約4成，餘下應用以下平穏增長股。但我建議你，暫時最多持有2-3成好了。到你學到一定投資知識，才慢慢調高，咁會較穏當。

未來時間，你就先集中在以下平穏增長股。現價計，以下股票都在合理區，可以分注。

但由於大市未算平宜，故你的資金，暫時最多只可以用一半入市，餘下應等大跌市才出手。

------------------------------------------------

Q22126：

Hi 呀 sir, 我而家一直都月供緊有66，823，1810，1177，2800。最近想加多隻潛力股 但見到好多隻都升左好多1830，2382，868，968，3868，285。

9988 因為一啲消息 都冇好大升幅。

有冇邊隻潛力股比較價值好，值得慢慢月供？

Thanks

龔成老師︰

我地投資，唔好只係聽消息，我地要從企業長線質素，去做考慮。短期股價，可以未必理想。但長線，必然可以將佢價值反映出來。

阿里巴巴（9988）有質素，有增長力。

係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但股價都有一定的波動。

始終將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

對於這類優質、有發展，可作為長線月供目標。

舜宇光學（2382）、信義光能(0968)、比亞迪電子(0285)、阿里巴巴(9988)都係可以考慮，作為長線月供之用。

信義能源(3868)、完美醫療（1830）都有潛力，但不確定性較高，用來月供，就不太建議。

而信義玻璃(0868)都有質素，可月供。但只算係平穏增長型，增長潛力無上面幾隻咁大。

------------------------------------------------

Q22127：

龔成老師：你好！剛上完股票班課程，令我在選股方面有更明確的方向，在此先感謝老師你的無私指導。學會簡單的企業分析後，最近打算重整自己的組合，

希望老師給予意見，在此先謝過老師。

29歲，月入約3.6w(連月均股息)，月儲3w，目前組合(投資金額約80w，另有20w備用資金)如下：

0001 2000股 54.375
0003 5556股 11.223
0027 2000股 63.000
0066 2500股 40.46

0388 77股 370.327
0823 1298股 64.546
1177 9055股 7.465
1211 23股 83.656

1810 1120股 25.072
2382 502股 174.404
2800 4003股 25.423
3718 4000股 1.000

因為工作關係，沒有太多時間留意股市，所以暫時維持月供：2800($4000)、0823($2000)、0388($2000)、1177($2000)、1810($2000)、2382($2000)

誠如老師所見，目前平穩增值股的比例約70%，因此未來希望逐步提高高增長力企業的比重，

所以日後打算全數賣出0003，換至0968(待$12買入)、3718(待$1以下買入)。

未知老師還有其他更好的建議嗎，謝謝！

P.S. 因為考慮中國未來目標是碳中和，以及世界未來趨勢都是與環保有關，因此會考慮與環保有關的企業，不知道環保業除了0968、3718以外，老師有其他更好的建議嗎？謝謝！

龔成老師︰

其實一隻有質素股票，中短期變化一般都唔會好大，你係唔需要成日睇個市。

你現時持股，月供配置和成個理財方向，都係正確的。

但煤氣(0003)雖然近年增長力弱左，香港業務增長力你預未必好強，但中國部分不差，長遠仍有發展力。

我睇翻佢近年在中國的投資，仍是保持進行的，每年都有幾十億，這些投資不會好快就見到收成，但這企業就仍是發展中的。我對佢長遠發展仍是正面，是平穩增長型，值得你長線持有。

而綠色能源，將會係中國，以至全球的一個大方向。信義光能(0968)和福萊特玻璃（6865）都係我較睇好企業，但現價都係略貴，回1,2成才開始合理。

至於北控城市資源（3718），都有質素的。

佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。之前股價貴，現價落翻D，大約合理區中間。不建議這刻太大注。

------------------------------------------------

Q22128：

龔Sir 你好，看你的專頁真的獲益良多！感謝！
本人持倉及入價如下：
0762 - $13.80
1618 - $2.50
0006 - $56.20
0386 - $3.45
6600 - $18.40
0175 - $21.50

看得出來入價偏高及頭3隻持倉很多年了，亦偏重於收息股（佔了75%），所以後期的現金用來投資175了，希望令到個倉有增值的可能。

因本人有點執著，打死不輸錢放掉，所以打算放掉唯一有賺的386改買其他平穩增長的股票。

我有留意323/857的資源股，PB都偏低，感覺好像值得投資。亦想投資1810/2382，但現價是否高過合理價？

請問龔Sir 覺得應該怎部署和其他推介？

龔成老師︰

你"打死不輸錢放掉"的想法，係好錯。這個想法，也是不少散戶常犯錯誤。

唔好將個買入價，睇成一個神聖指標。我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

如果跟你策略，好大機會將好的股票放晒，最後成個組合，只餘下一些質素欠佳的股票，這樣只會令你組合變得越來越差。

你現時持有股票，都係有質素，雖然部份未到優質股水平，但都值得長線持有。

賽生藥業（6600）都有發展力。整體來說，這股都不差，有投資價值。但業務始終波動，小注投資好了。

馬鞍山鋼鐵（0323）和中石油(0857)這類商品股票，產品沒有差異性，只能賺取合理的利潤，不算是最高質的類別，投資價值中等。

PB比率，只係其中一個輔助性指標，我地是否投資，還要考慮其他指標和基本因素。這2隻股票現價算合理，但這類股質素只係中等，不宜持有太多。

至於小米(1810)和舜宇光學科技(2382)現價略貴，回多1,2成才算合理區頂，才可小注。

另外，個別企業和行業，不要佔組合15%和30%以上，否則會有過度集中性風險。故你頭3隻持倉，要作適度調整。

至於你未來集中投資那些股票，你睇翻你本身年紀、投資經驗、風險承受能力等。

假設你係較年青，應以增值為重心，中石化(0386)、電能(0006)這些收息股，增長力好弱，就唔適合你。至於其餘4隻持股，係適合。

策略上，你可以投資「平穏增長股」和「潛力股」。

選股上，你可以投資在平穏增長股︰金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只在合理區，資金唔好盡用。最好留有部份，等大跌市出現時，可以用來掃貨。

------------------------------------------------

Q22130：

龔sir 想請教下你，可以俾啲意見嗎？

我有一層舊唐樓 每月收租緊7000蚊包差餉，租金全數給媽媽做零用，但樓齡太舊，好多問題開始浮現，

黎緊可能更要夾錢做大維修，想請問如果賣左佢轉做收息股代替租金好嗎？（層樓大約估值250萬到）

如果可以既話應該點分配資金同選股呢？先謝謝你的寶貴時間（希望可以解答下我）

龔成老師︰

以租金回報率計，你現時唐樓都算合理。但正如你所講，樓齡高，的確會帶來很多問題。

除左維修成本會增加，會進一步蠶食回報外。新投資者都較難做按揭，令投資價值下跌。

因此，長線計你都係要沽出這物業，換成其他較優質資產。而你持有物業目的，若主要係為左提供現金流給你媽媽。沽出後，投入收息股都係一個可行做法。

以下是一些唔錯的收息股，你可以參考下。現時大市只在合理區，若入貨要慢慢分注，先用一半資金。其餘一半，就等大跌市機會。

同時間，係配置時，唔好太集中係個別企業或行業(個別企業和行業，不要佔組合15%和30%以上)，要平均分配，以免出現過度集中性風險。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

由於你現時物業，唔係完全無質素。你可以唔洗急住出售，慢慢睇到好價才賣出，咁就可以。

------------------------------------------------

Q22131：

我早幾日用$7.72買左8000股 3918，買完就跌，我50歲，我知尼隻係長線股，但我冇時間睇股票市場，我驚尼間公司業績及展望有所改變，

我怕自己Miss左尼D資訊，做咗錯誤嘅投資決定。我係咪應該繼續讀保留，長線投資？謝謝你

因為聽你介紹過呢個股票

龔成老師︰

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，唔洗成日睇住個市。其實一隻優質股，好少短時間內，會突然變到好差。當然你都要留意資訊，但不至於要時時刻刻都睇住。

另外，你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

金界控股（3918）有質素的，但始終新興市場，因此點都有風險。佢會因全球的疫情，而影響左生意，但這只是中短期。

長遠計，佢仍然正面，佢之前有項目獲當地政府批准發展5幢建築面積共逾580萬平方呎的物業，包括提供共4700個房間的酒店群、娛樂場所及公寓等。我相信長遠對佢仍正面。

這股股價較為波動，不過都有長線投資的價值。

你買入價係合理，但由於市場新興，在注碼上不能投資得過多。而且以你50歲年紀計，這類較波動的股票，不宜持有太多。

整體而言，這隻股票係有投資價值，但波動性會較高。若你持貨只佔組合很少比重，長線持有就可以。但若佔比重較高，我建議沽少少，去平衡個風險。

------------------------------------------------

Q22132：

老師你好。本人30歲，由於上年通知抽中了白居二，稍為做了些調查，明白了自己有多缺金錢去實現不同的事。

由於幾乎零投資經驗，一個月前閱讀了你的股票勝經和5年買樓4步曲，有點打開了新世界的感覺。剛剛開始開了牛牛戶口，

買了少許港股 (股/數量)(1000中華煤氣，1000香港電訊，3000中國銀行，500港燈，200安碩恆生科技 (大多是邊看你的貼文參考購買的)

美股則有5 X VOO, 2*SPY) 。未知可否就我的投資給予意見呢。謝謝。

本人背景: 38K月薪，下年會達50K. 你認為我抽中白居二，應該在今年樓價高位去馬嗎?

(暫時打算購買將軍澳廿年頭的居屋單位(價錢預算3百萬 尾至四百萬頭，供20年)(又或其他樓齡接近有鐵路的屋苑 (希望至少有400呎)。

你又有什麼看法呢?謝謝。

龔成老師︰

香港樓市，我自己覺得長線都係會維持上升，中短期可能會有波動，但無人知。所以，你唔好用估個樓市方法，去做決定。

我地每個人都有自住的需要，係考慮自住樓時，唔需要諗得太複雜。

你主要係從用家角度出發，你想清楚你未來5-20年生活需要，若物業係配合到，而你又有信心"供得起"，其實已經係可以行動。

但我地財富增值，其中一個考慮重點，係組合平衡性。所以，最理想的情況，係你置業同時，可以留有一定資金，去投資優質股增值。

令到你成個組合，係可以股樓並行，唔會偏重左去一邊，咁就最好。

至於投資優質股方面，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主，建議你用「平穏增長股」 + 「潛力股」作組合，去創造一個增值平台。

你現時持股，都係有質素，但香港電訊(6823)、中行(3988)和港燈(2638)係收息股，增長力唔高，暫時持有現貨好了，不要再加注。

你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

現在你每月先用5成儲蓄做月供。其餘先儲起，用一邊月供一邊儲蓄的策略。

由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22133：

老師你好，我是新手，35歲單身月入3萬8千&無經濟負擔，現持有現金50萬和股票組合如下：

0066 港鐵 500股@43.75
778 置富 5000股@7.05
1810 小米 600股@28.95
2318 中國平安 500股@77.85

2809 中國潔能150股@127.40
2845 中國電車 150股@153.20
3690 美團 100股@412.60
8083 中國有贊 8000股@3.83

請問：
1. 以上長線投資組合是否okay?

2. 3690 和 8083 現價潛晒水，應如何處理？

3. 現想買入1177 中國生物製藥，請問$7 是否合理買入價？

4. 另外想買入1928 金沙，請問32.60 是否合理買入價？

5. 應如何利用50萬現金？
謝謝

龔成老師︰

1) 你持有股票，都有投資價值，可長線持有。但中國有贊(8083)風險會較高，要控制注碼。

2) 這2隻股票，都有投資價值，但你買入價偏貴。就算現時回調，只仲係唔平。

由於這2隻股股票，不確定性較高，加上都唔平，現貨可持有，就暫時不要加注。

3) 中生(1177)現價合理區頂，你無貨，可以係現價先小注。到有較明顯回調，才加大力度入貨。

4) 金沙(1928)現價在合理區中間，可分注入貨。

5) 現時大市只在合理區，資金唔好盡用，你大約用多$15-30萬入市，餘下的就等機會。

另外，你要留意，你而家太偏重左係潛力股(1810, 2809, 2845, 3690, 8083)，佢地雖然有增長潛力，同時風險都較高，不宜持有過多。

你算年青，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

------------------------------------------------

Q22134：

Ar sir, 我目前持9988,941；分別入價位251*4手, 50.9*4手，我現時月入2萬，流動現金持10萬，有什麼投資建議。而9988同941長遠持有如何？

螞蟻金服又會唔會再上市刺激9988股價？

9988現質素有無轉差，因對手拼多多開始有超越跡象，941現股價屬於平定貴，值搏率如何，長遠會否賺息蝕價？

Ar sir，關於上樓問題，假如月入約2萬，每月儲一萬，現時投資狀況不好，沒有出現盈利，主要依靠工作及兼職收入。每年都有申請抽居屋，但都無抽中。

如果目標置業，可以如何更快地完成夢想？

龔成老師︰

首先，阿里巴巴(9988)和中移動(0941)都係有質素，2隻都在合理區。

近年雖然市場有不少阿里(9988)的競爭對手出現，但由於佢本身有一定規模，唔會輕易被對手取締，暫時唔見質素有變壞情況。

而你現時目標，係希望置業，因此投資應以增值為主。中移動(0941)就係收息股，增長力唔高，不太適合。

你可以選擇一些「平穩增值股」+「潛力股」作投資目標，去累積這筆置業資金。你可以每月用一半儲蓄去做月供股票，另一半就先儲起的策略。

大市現處於合理水平，那10萬資金就等大跌市機會出現，才大力度掃貨，並長線投資。

另外，你現時組合已經有好大部份，來自阿里巴巴(9988)，故暫時不要再加注。更安全做法，就去沽出部份，換至其他優質股，去平衡風險。

------------------------------------------------

Q22135：

我黎緊讀大學三年級，學費生活費自付

宜家有2手1928同1手1398

老師有咩建議，暑假做緊地盤紮鐵，月入三萬

學費黎緊2萬幾一年，每個月大概7800蚊供保險基金

龔成老師︰

以你現時年紀，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

紮鐵我相信都辛苦的，但這是一個很好的訓練工作機會，加上人工高，我建議你做，另外，要注意安全。

策略上，你可以投資「平穏增長股」和「潛力股」。金沙(1928)係可以，但工行(1398)只係收息股，增長力唔高，現貨可持，但暫時不要加注。

保險我地主要係買保障，增值用優質股會較好。雖然保險基金都可以投資，但係你要睇翻佢長線回報，若遜於大市，就未必值得投資。

建議你每月用5成儲蓄做月供。其餘先儲起，用一邊月供一邊儲蓄的策略。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q22136：

老師，想問而家概價位入2331(李寧)、2318(中國平安)、2313(申洲國際) 適合嗎??

龔成老師︰

以上3隻股票，都係有長線投資價值。

平安(2318)現價合理，可以分注儲貨。

李寧(2331)現價係貴，想入最好等佢出現大跌時，先再作考慮。

申洲國際（2313）現價唔平，若無貨，可以先小注或月供，到有明顯回調，才正式出手。

------------------------------------------------

Q22137：

龔sir, 你好...現持有1398工商, 1099國藥, 1024快手, 883中海油,

如每月$4000用於月供股票, 請問金沙, 小米, GX中國電車哪兩個較合適...謝謝解答...

龔成老師︰

你現時持股，都有質素。但以你33歲年紀計，應以增值為主。

工行(1398)係收息股，增長力欠奉，唔適合你。而中海油(0883)只係商品類股票，質素只係中等，都不宜持有太多。

至於月供，金沙(1928)、小米(1810)和GX中國電車(2845)都係可以。

從組合平衡性計，我建議其中一隻係用平穏增長股的金沙(1928)，而另一隻小米(1810)或GX中國電車(2845)都可以，視乎你較睇好能車定小米發展。

------------------------------------------------

Q22138：

想請問老師你，如我每月用HKD 6000做月供股，我供三隻@2000 or 供兩隻@3000 好？

想請問老師你有哪幾隻做月供股較好，較適合我？

除了進行分注買入平穩增長股外，潛力股我分注入了安碩恒生科技（3067) 13手@16.5677；會再睇住個市分注買入；

至於月供股，請問騰訊(0700)我每月供$3000，你認為怎樣？如月供的話應該什麼時候和什麼價錢開始供，還是月供的話什麼時候都可開始進行？

麻煩晒老師，感謝。Have a nice weekend

補充：平穩增長股，我暫時持有一手粵海(0270) @11.08

龔成老師︰

你現時持股，都係係有質素。每月供三隻各$2000，或者供兩隻各$3000。我較建議前者，因為可以提升組合的分散風險能力。

選股上，你可以2隻平穏增長股，再加上一隻潛力股。

潛力股可考慮︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

若你想月供騰訊(0700)$3000，都係可以。另外$3000，就最好用來供盈富(2800)，有助你平衡組合。

由於月供係一個長線計劃，透過平均價格買入法，去拉平衡個買入價。因此，其實任何價位和時間開始，都係無問題。

除非價值去到異常貴水平，我地才會減少供款，甚至停供。若你不懂定平貴，你建議你不理價格，一直供落去。

因為若你自行定平貴去調整供款，若時機錯左，係會大大影響你成個平均價格效果，繼而影響長線回報。

------------------------------------------------

Q22139：

Hi老師，想請問下海外置業如柬埔寨可否考慮？入場費約八十萬左右。

香港的發展商，用香港的法律做買賣，收港币兑換成美金做買賣的。

龔成老師︰

法律，會係我地投資海外樓其中一個關鍵位。雖然係用香港法律做買賣，但物業始終在當地，必然受當地法規所規管。因此，你唔好誤以為就好似係香港買樓咁，無分別。

我地投資海外物業，首先要問自己，你對這項目認識有幾多，堅守「不認識就不投資」的大原則。如果你真的已了解當地的物業市場、租務市場、法例、經濟發展，那可說是過了第一關。

土地是有限資源，所以長期一定上升，但你都要分析這地方的長期土地供應。

另外就是匯價如何，就算物業有穩定租金，以及樓價上升，但若然匯價不穩，都會對你的投資造成打擊，這方面不能忽視，你應該了解當地貨幣過去的變化，以及將來的強弱分析。

------------------------------------------------

Q22140：

龔成老師,本人是在職媽媽，43歲，自5年前才明白理財的重要，3年前開始月供股票，有股票資產約68萬，表面上是蝕緊的，近半年開始睇龔成老師的書，

讓我對投資有另一番體會，以下是我的投資組合，請給我意見是否合適

#3（2819股@$13.77）
#5（2820股@$61）
#6（500股@$43.4）
#11（515股@$177.2）
#12（4071股@$35）

#939（5047股@$6.47）
#1038（412股@$48.7）
#2778（11092股@$5.031）
#2800（3788股@$26.45）
#3067（200股@$17.1）

問題如下

1）我想減持匯豐，增持其他，邊隻應該繼續增持？

2）我每月可月供$10000-15000，應該如何分配金額？繼續月供邊隻？

3）另我想加入一些潛力股，想留意價位分小注入，現有現金約60萬（不計MPF，無車無樓無其他資產），思考緊1810、2845、9988，各股合理區價位幾多？

那一隻較適合我這年齡？還是保留現金再等機會？

希望很快收到回覆，謝謝老師給意見

龔成老師︰

你現時組合，持股都有質素。但有個較大問題，係你非常集中係銀行股，當中以匯控(0005)佔比最重。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

1) 在減持匯控(0005)或相關銀行股後，其他持股，其實你都可以增持，特別係安碩恒生科技(3067)。因為你現時組合，係偏向保守。

你可以再加大少少安碩恒生科技(3067)或投入其他潛力股，去提升翻組合的增長力。

2) 月供選股上，你可以投資在平穏增長股︰金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

另外，現時大市只在合理區，每月儲備唔好盡用。最好留有部份，等大跌市出現時，可以用來掃貨。

3) 除了你所講3隻潛力股，上述潛力股都係適合你。

現時只有安碩恒生科技(3067)、ＧＸ中國電車基金（2845）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘都略貴，想買就要等一等。

另外，大市只在合理區，現金唔好盡用，要留有部份，等大跌市機會。

同時間，潛力股風險較高。如果你現時無太多投資經驗，潛力股這類風險較高的股票，你就不要持有過多，最多維持2成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約4成，視乎你投資經驗多寡和了解這些股票程度而定。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17541-Q17560）

Q17541：

你好，而家我覺得人生好迷失，我畢業就出黎創業，到而家28歲結束所有生意，跟住做過跟車保安好多吾同散工，為左救交租，為左生活，當中落差，我覺得好難受

人生好似已經無意義，過往創業無打工和工作經驗，都吾知點樣靠打工搵到錢，原本選讀左建造業課程，但身體腰骨天生吾好

長期太勞動又頂吾順，岩岩申請左公屋，不過單人申請要好長時間，當初因為做生意不利，所有股票都賣曬，我應該點做?

1.學一種外語，裝備自己，去外地發展

2.返澳門安穩打份工，夜晚去澳門隊訓練，打波係我鍾意既運動，不過就無錢途，不過人會較開心和輕鬆

3.繼續留係香港，可能試下搵政府工安穩工作。

因為就30歲，都吾知可以點做。

龔成老師：

我反而睇到，你比人擁有的優勢。

你試過創業，反映你有一定的生意經驗，要成功一盤成功的大生意，一般都要經歷幾次生意失敗，你已經行在相關的路道上，之後睇你的心態。

你已經得到比同年人更多的生意經驗，之後就睇你有無本事用出來。

另外，你提到會「返澳門」或「留香港」，即是你是一個兩邊地區都有住過，有聯繫的人，你可以從這些方向去尋找生意機會。

同時，你提到「去外地發展」，反映你的心態是能夠向外發展，你的視野並不是窄的，你要好好想一些不止是香港的生意。我想信以你內在的潛力，並不是跟車保安同散工，試試想得更闊。

如果你認為28歲結束所有生意，就等如你無生意能力，你就錯，因為做生意有失敗是好正常的，你唔好因為咁樣就否定自己。加油！

------------------------------------------------

Q17542：

龔sir，你好，我兒子現在是一位F.4學生,他非常有興趣於股票及基金市場的這些投資活動, 現在亦開始學習怎樣有技巧地買賣股票！

請問這類型學生如果將來讀大學的話，那一科目會是關於這類型投資的事項可以介紹入讀？

還有，請問如果他將來都向這方面發展的話，他的工作類型可以選擇那些行業啊？

龔成老師：

這問題無超出，只是近期太多問答要覆，回覆一般要多天。

首先，我會建議佢睇書，從書本上了解，以佢地年齡，我相信都睇得明，我自己都是18歲開始睇書。

以下是我認為適合初學者睇的書，部分要到圖書館找的：

《我十一歲，就很有錢》
《經濟蕭條中，七年賺$1500萬》
《富爸爸，窮爸爸》
《思考致富聖經》
《秘密》
《財富金鑰匙》
《有錢人想的和你不一樣》
《世界上最偉大的成功寶典》
《洛克菲勒寫給兒子的38封信》
《解讀巴菲特》
《巴菲特傳-永恆的價值》
《勝券在握》
《智慧型股票投資人》
《非常潛力股》
《彼得林區的選股戰略》
《誰搬走了我的乳酪？》
《人性的弱點》

另外，我的書都很適合初學者的。

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的12本書：

《80後百萬富翁》（第8版）
《80後2百萬富翁》（第4版）
《80後3百萬富翁》（第2版）
《財務自由行》（第6版）
《大富翁致富藍圖》（第4版）
《50優質潛力股》（第3版）
《50穩健收息股》（第3版）
《50值博倍升股》（第1版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第1版）

另一方面，佢可以向工商管理學科類別發展，佢可以多向老師問有關入這類學科現時的要求及方向。

佢有興趣有股票，無論是為自己將來的投資股票，還是事業上的發展，工商管理類別都是較大路，日後的發展也不差。

你可以叫佢睇晒上面的書先，之後有機會，可以報我的課堂，我相信對佢有一定的啟發。

------------------------------------------------

Q17543：

龔Sir 你對於未有盈利而財務穩健既股票如平安好醫生、Tesla既睇法係點？作為一個價值投資者係咪應該避開呢？

龔成老師︰

未有盈利的企業，估值主要係基於投資者對企業"前景"架期望。但無人知個期望係唔係一定出現，或者幾時會出現。

如果結果不似預期，股價就好大機會出現較大回調。這些不確性，就會係投資這類股票的風險。

平安好醫生（1833）可以話係潛力股，但就屬於較高風險的類別，我自己會比較怕投資這類。

首先，佢地的上市年期不算長，加上上市時是市場熱炒期，當時估值過高，對這類股有少少保留。

業務上，佢的確是高增長，同時業務有發展潛力，但睇翻佢地的財務數據，平安好醫生仍處燒銀紙狀態。唔係一定要避開，但投資時必需控制注碼。

而TESLA都係同樣情況，Tesla 2019年第3季才首次出現盈利，未來是否維持，會唔會出現資金短缺，無人知。

其實你睇好電動車，可以考慮比亞迪（1211）。佢有一個大優勢，就是中國因素，因為電動車最重要的是配套，所以國家支持相當重要，而中國對電動車的支持是正面，公共交通的訂單亦不斷給比亞迪。

比亞迪先在公車市場打穩陣腳，然後保持進攻私人市場，這是理想的策略。跟TESLA相比之下，比亞迪早已有盈利，這一點十分重要。

Tesla過去要不斷在市場各途徑集資，以維持營運及研發，但比亞迪已有正現金流，可以憑以戰養戰的模式，去穩健地發展新項目，資金鏈斷裂的問題較少，這是一個很有利的因素。

這兩間公司是全球電動車市佔率最大的兩間，但電動車始終是新興的產品，到真正全面普及仍有一段時間，當中總會存有不確定性，所以我在選股時，選了資金鏈較佳的比亞迪。

但比亞迪現時偏貴，要等佢回最少2成才是合理區頂部，到時才可慢慢分注入貨。

------------------------------------------------

Q17544：

Hi, 龔老師！How are you ? 我每日都有睇你嘅資訊！Thank you for taking your time to share your experience.

我想請問下如果我想月供!
2800, 823, 2388, 12, Hsbc

以上股票要選三個，我可以選擇邊幾隻？想供五年長線投資

我現在已經有樓700萬但只作收租！租金$14000

共他定期投資六百萬4% 回報！大約240000 一年息！

股票
74555 股 0003
40000股 6823
200股 0823
500股2388

我目標係想五年之後大約有五十萬以上年利息收入！🙏🏻

以上係我嘅投資組合! Looking forward to hearing from you ! Million thanks !

想補充！我現在係美國！之前諗住報你股票班、早在一月已叫你助手留位上你五月股票班！但因為coronavirus 所以我唔敢飛、取消咗我嘅回港行程.

我仲有一個問題唔係好明...點解2800 係成個股票組合中嘅比例要佔多啲？

Thank you！

龔成老師：

你現時持有的基本上都是有質素的股票，因此—可以長線投資。

至於所選的月供股票，都是有質素及可以進行的，盈富（2800）、恆基（0012）、領展（0823）。

不過，增長力就不算強，所以，如果你想組合的增長力增加，可以加入少少較有潛力的股票。

雖然你目標想集中持有收息股，但你都可以用「先增值，後現金流」作方法。即是先投資有增值類資產，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

至於盈富（2800），在組合佔多D都無問題，因為這是一個50隻股票的組合，你持有能有「平衡風險」的作用，同時可以補足你自己選股的不足，因此就算佔一半以上，都無問題。

希望疫情盡快過去，到時見！

------------------------------------------------

Q17545：

你好，龔成先生，我係上個月先開始投資嘅萌新，有d問題想你比d意見：

1.最近投資左中芯（981），均價35.55，由23開始分注投資到41.85，本身到40已經覺得高，但見討論區一直話中芯未來會前景光明，係國家意志，所以又開始係40價位投資落去。結果上市之後股價就一直跌緊....

想問下係唔係所有回流A股上市嘅公司都係上市前炒起，上市當日就會跌番去之前未炒起嘅價位？

見好多人將中芯同之前中石油同中車比，佢地係咪真係有可比性？

最重要嘅係......中芯會唔會可以上得番之前嘅價位？如果會嘅話大概要等幾耐左右？

2. 經過呢次教訓，我希望可以學習點樣搵到一間公司嘅合理估值同估價，講問老師建議我睇咩書比較好？

希望老師可以解答一下我嘅問題

下面呢部份希望可以唔好share出去，一開始投資中芯見一直升，所以問左屋企人借錢，又買左牛證同借左孖展炒，點知而家跌到咁甘，我好迷惘唔知點算

暫時一股都未賣，因為一日未賣出去一日都係浮虧，但好多人話一定會再跌落去，到底我應該而家即刻止虧好，定係等佢升番上去好？

龔成老師：

1）就算一間公司再優質，都可以「貴」。

中芯（O981），發展正面，業務將以快速增長，但如果股價的增長遠遠超過企業價值的增長，股價去到某一個位，都會下跌。

所以，你唔能夠只分析因素，同時要分析企業價值，這股近期炒作較多，其實已經到了貴的水平。另外，凡炒作多的股票，都要較小心，投資唔好大注。

這股如果你持貨太多，就要賣出。

至於回流A股因素，每次都不同的，但的確過往都有唔少股，當回流A股，港股就會下跌。另外，投資股票，最重要賺翻企業質素與平貴。

另外提翻你，根據統計，大部分散戶都是輸錢的，你聽網友意見，相信大部分都是無價值的意見，你應該用一些「真正賺錢的投資方法」，建議你盡快了解下，全球投資最賺錢係邊個，佢用甚麼方法。

2）《股票勝經》《年報勝經》，建議你盡快睇。

------------------------------------------------

Q17546：

你好，有啲股票投資想問吓！
本人持有
1818 5000股 9.64買入
3 4000股 13.68買入
853 3000股 41買入

這個組合應該繼續持有嗎？

龔成老師：

招金礦業（1818）是商品企業，質素不算好高，投資價值中等，持有可以，但長遠來說，又唔值得持有太多。

煤氣（0003）仍是有質素的，但增長力弱左，不過有得守，只要唔好太多貨就無問題。

微創醫療（0853）主要專注於治療血管疾病及病變的微創介入產品，潛力是有的。但現時股價都貴貴地，你要注意風險，如果小注無問題，太多就宜減。

------------------------------------------------

Q17547：

你好龔老師，我去年拜讀了你幾本書，在讀之前本已跟丈夫共有一自住物業，有幸在2009年買入，現價大概900萬。

當時已想稍後再買樓收租，所以讀完你的財務自由行，更覺得可以實行，就將自住物業轉到我個人的名下，再套現作為首期，希望可買到樓。

當時樓價高企，覺得短期內未必買得到，就打算將自己的現金，及部分套現出來的資金，買一些股票，同時跟丈夫二人在空餘時間去不同區域看二手樓。

計劃好像很好，不久後股市開始跌，我也就開始入了點貨。我自己心想股市會跌，樓市通常要稍後才跟隨，本沒想到會很快買樓。

但丈夫看中了一個新樓盤，覺得地點非常好，有升值潛力，因為市況問題，發展商的優惠好像很吸引，在9月的時候就買入了一個近800萬的單位。

由於前境越來越不明朗，丈夫申請按揭也遇到很多波折，蝕賣了一些股票，托賴還是順利完成了交易，聽聞已有業主開始收樓。

但現在我遇到一個很大問題，就是本來我和丈夫的工作尚算是較穩定的，但我早幾天被辭職了，我突然有點不懂得去想可以怎麼辦，所以想請教你。

現丈夫收入大概5萬，我每月要還款大概萬6，丈夫收樓後每月樓宇支出會由萬8升至3萬。若然能夠順利將新樓租出，每月也還是入不敷支大概萬5元。我當然希望可找到新工作，亦打算儘量縮減日常開支，但市況不好，真的說不準我會何時找到新工作。

現在我持有2, 1093, 1177大概13萬，現金32萬，一個隨時可對現的退休保大概13萬，外國基金大概20萬，公司應會發出大概10萬的final payment。

我今年37歲，丈夫39歲，若果找到新工作，我們當然希望儘力保留現有物業。我到底應該怎樣打算？

1. 可以的話兩年後賣，不用雙倍印花稅，但可能要將現在持有的股票、基金、保險等全兌現（若果不能順利租出）

2. 盡快賣新樓（雙倍印花），雖然蝕了但應有錢餘下，買股票或基金慢慢升值再另買物業

另外，我有點生意的念頭，很想在未找到工作時慢慢試一試，如果你有建議都請話我知。

龔成老師：

如果之前已順利做好按揭，這樣最煩麻的已經過去，接下來，最重要是你地的「供款」，首先，要留意一定的現金作防守，所以暫時唔好進行投資。

有現金你就可以買到時間，令你地有資金慢慢守，同時你在找工作上及之後的財富配置上，可以較有彈性。

可以的話，應盡力保住物業，因為這是資產，唔應該比短期情況影響到。同時，物業買賣成本貴，你地會因此而有一定的開支。

所以，你第一步是「留現金」，第二步是「找工作」，第三步是「賣股票及保險」，第四步（最後一步）是賣樓。

如果可以的話，唔好進行第三四步。

至於你想搞生意，要在零成本下進行，你可以試，但這刻建議你地留現金去守。

雖然近期市道差左，但不是不元可找到工作的，只要你肯做，應該無問題。

------------------------------------------------

Q17548：

Hello 龔成老師。本人現年30歲， 係一個理財小白，明白到用資金滾存資金才是增值財富的最好方法。

現時月入大概26K，每月儲大概1萬元，手上有120K現金，加上有70K 基金投資。

如果想5年内達到財富有800萬，有什麽投資好辦法？月供股票是一個好選擇嗎？謝謝老師指路明燈

龔成老師：

如果5年要去到$800萬，你要非常進取先有機會做到！

首先，要集中投資潛力股，你要比市場早一步找到，另外，你要不斷尋找股票，相信你每星期要花大量時間去選股。同時，你要大量增加投資知識。

同時，你要找資較高風險，較高潛力的類別。當見到有機會，就集中投資（當然這是高風險）。

總之，過程是一個高風險行為，同時難度好高。

建議你降低你的投資目標。

------------------------------------------------

Q17549：

我29歲
目標35歲前買到500萬樓
月儲10K

現有
2388 - $23.9@6500
2388 - $23.8@2500
338 - $2.16@8000
386 - $4.61@2000
386 - $4.6@4000

請問需唔需要轉下組合?
或增持邊一邊種股?

龔成老師：

你上述的組合，增長力中等當中股票不是無質素，但以你的年齡及目標，其實可以投資較有增長力的類別。

阿里（9988）、騰訊（0700）、港交所（0388）、舜宇光學（2382），但就要明白波動性比上述會高少少。同時由於現價唔平，你唔需要心急這刻增加，你可以等回少少先。

小米（1810）處合理區中上部，都可考慮。中國鐵塔（0788）則合理，都可考慮。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17550：

想問你意見，今年底會推綠置居，即公屋住戶可抽籤申請買現有公屋貨尾單位，價錢平好多。你話如果抽到，買居屋還是公屋好？

龔成老師：

其實政府樓在投資的角度，一定唔及私樓。

因此，一般都會以自住的角度行先，你要睇下邊度方便自己，邊度好住。另外，如果可以用較少資金，而得到你在自住上差不多的項目，當然會考慮資金較少的。

至於投資角度，居屋一般都會比公屋好，但這個因素可能在這次的分析，未必是首要考慮。

------------------------------------------------

Q17551：

老師 我係一個90後 28歲 打工仔
今星期開始睇左你既 80後百萬富翁 睇左一半已經另我對錢 同賺錢既概念轉變

一路已黎既迷糊都開始清晰起黎 依本係我近十年第一本有恒心睇落去既書 我亦都買左2,3百萬富翁 同 財務自由行 決心睇晒去學更多錢 同投資既野

我依家環境非常惡劣 希望黎緊有機會參加你既投資班
純粹有種感激 睇左你既書覺得自己都可以做到 更加有恒心學習thx

龔成老師：

加油！我自己都只是一個公屋長大的香港人，正正由於屋企細，一直都好想有天可以有夢想物業，這成為我的動力。

你已有「潛在動力」，之後就要好好發揮，創造自己的命運，你要保持進步，希望有日在堂上見到你！

------------------------------------------------

Q17552：

龔成老師你好，我心中有一個疑問想問問你。

我看到很多收息股現在的股價很低，想現在買入等待日後股價上升，達成（財息兼收）。

但身邊很多朋友說要買入潛力股，可是如果收息股在日後回到比較合理或貴的水平時，我又覺得不太值得買入。

假如在較便宜的時候買入，等待到日後派息增長，本來５里派息變成了６里７里。不是更好嗎？

本人現在持有6. 電能實業 1000股 平均價 44.3
66. 港鐵公司 1500股 平均價 40.59
778. 置富產業信託 6000股 平均價 6.96
1310. 香港寬頻 2500股 平均價13.41
6823. 香港電訊-ss 4000股 平均價 11.47

我考慮加入大快活，恆生，宏利，粵海投資，這是好選擇嗎？

如果本金只有５０萬，你會建議持有多少隻股票呢？
本人現在的持倉又有沒有問題？謝謝你的解答

龔成老師：

其實最重要是平衡，建立一個適合自己的組合。

潛力股的增長當然可以好吸引，但同時間，風險都可以高，每個人承受風險能力唔同，唔好比人影響。

收息股，增長力當然不及潛力股，但好處是有派息，股價相對較穩定，因此不同人有不同的配置。

如果你本身比較保守，就集中在收息股，就算投資潛力股，都只能佔較少的比例。

在較便宜的時候買入，等待到日後派息增長，本來5里派息變成了7里，這方向是正確，不過，部分收息股由於經濟弱會影響生意，因此中短期可以較差，要慢慢先能增長翻上去。

你現時持有的，都是不差的收息股，可持有。至於想加入的4隻股，都是有質素的，可加入，平均去入就得。

你可以動用$25萬，分注投資，餘下現金就等機會。

------------------------------------------------

Q17553：

請教下對2018看法長線看多少錢

龔成老師：

瑞聲科技（2018）有質素的，這股有平穩增長能力，長遠有發展，但你預佢不是爆升的類型，只是基本增長。

所以，如果要上升一倍，相信要4-7年的時間。

------------------------------------------------

Q17554：

老師，想請教老師 3309 希瑪眼科 係潛力股嗎？值得長線投資嗎？

鑒於現今趨勢 傾向電子化 而電子產品對眼睛嘅傷害不少 青少年近視 視力退化 視網膜問題 青光眼

白內障問題 相信會日益嚴重 咁對眼科嘅需求亦都會大增 而希望眼科擁有一流嘅眼科醫生

同醫療設備 公司亦都致力開拓大陸市場 佢嘅股價近年亦都上升左不少 想請教老師 這公司升值潛力高嗎？是倍升股嗎？先多謝老師回答

龔成老師：

希瑪眼科（3309）有質素的，佢主要於香港及中國內地提供眼科服務，及銷售視力輔助產品及醫藥產品。

另外，睇翻佢，都尋找加大在中國擴展業務，係2019年透過收購眼科醫院於昆明及上海拓展服務網絡及在惠州設立一間新眼科醫院。

除了一線城市，佢亦係昆明及惠州等二線城市拓展服務網絡。

這股在業務上，的確有吸引力的，相信生意將會不斷擴大。不過過現時估值都唔平，現時估值略貴，基本上已反映了企業的增長力。長線投資不是不可，但就唔建議太大注。

------------------------------------------------

Q17555：

龔sir:之前都問過你意見，我$5買入6088，呢段時間都上升好多，不過都突破唔到$5，我都揸咗好耐，我又唔想$4.5走，所以問下意見，你覺得我要止蝕嗎？

龔成老師：

一隻股票持有與否，最重要睇質素、前景，而優質度亦會決定你持貨比例。而你的買入價、短期股價走勢，都不是分析的因素。

FIT HON TENG（6088）有一定的質素，但企業本身的L賺錢能力唔算好強，平穩增長型，並不是潛力型。這股可持有，但又唔算好值得持有好多。

------------------------------------------------

Q17556：

老師你好，我係投資新手，正準備月供四隻股票，分別係盈富基金，中銀，港鐵同金沙，每隻各$5000，請問合適嗎？或者有其他建議？謝謝！

龔成老師：

這4股都是有質素的，盈富（2800）是一個組合，所以金額應該較多，例如$10000。而其餘的3隻，金額$3000。

你可以長期進行，現價已經是合理區，可開始。

但要留意，你唔好用盡現金，即是你每月除月供外，都要儲到一些現金。第一，你是新手，留現金是一定要。第二，現時大市未算平。

另外，當你有一定的知識與經驗後，可以加上其他較有增長力的股，會令你的組合更加平衡。

------------------------------------------------

Q17557：

雖然阿sir話優質股係長期向上，但係果時未上你堂買左匯豐同領匯，轉頭跌到咁，真係嚇親我。

而家靠睇盈富同港交所賺錢黎安慰自己，一想到而家買，平均買入價就會拉高，就會有d心魔。

我而家手頭可以投資既錢大約有兩萬蚊左右。

咁睇返我個組合好似都係水桶2，有金融（？）、地產、綜合類、銀行。

如果我想加多一隻，應該就要加水桶1。我個腦淨係浮到比亞迪同金沙，阿sir重有無推薦呢？

另外就係d人一路唱話港紙好快變廢紙，我應該去買金定換外幣（想換英磅）比較好啊？

唔該晒你呀

龔成老師：

我地投資，以「組合」的模式去運作，當中一定有較好、有較弱的，最重要是整體性。

組合應該有不同的行業，新舊經濟，各類增長，這才是平衡，如果你銀行類較多，宜減翻個比例增持翻其他的經濟類別。

你可以考慮比亞迪（1211）、騰訊（0700）、小米（1810），由於現價都唔平，所以可以等回少少先入，又或小注月供，你可以同時入這幾股，只要總資金合世較少就得（即是將你原本打算入的一筆錢，分成3份去入，有效分散風險）。

至於港紙，完全唔需要擔心。

------------------------------------------------

Q17558：

老師，我現時投資如下

Stock 股數(買入均價）
2388 1500 (23）
0001 1000 (56.15)
0005 400 (47.1)
0066 1500 (40.05)

現有可動資金30萬
有一物業月供約17000
每月可儲約3至4萬

現時是否不宜追貨，其實想入0700,但依家好貴，唔知會不會回落至380以下？

龔成老師：

現時組合，較多銀行及舊經濟，我地最重要是建立一個平衡的組合，你最好平衡翻少少。原有的股票可持有，不是無質素，但增長力不強。

騰訊（0700）要落翻$380好難，但你其實可以用月供，又或分注模式投資新經濟股，而不是一直等股價跌。這刻唔少相關股的確唔平，但我又唔建議你完全無貨，所以可以先小注，等跌先正式入。（如果你本身怕風險，就入小小好了）

現金$30萬，這刻唔建用太多，反而每月的儲蓄，可以更有效運用。

------------------------------------------------

Q17559：

老師 我現持有 241 ($22.15) , 2328 ($7) 823 ($幾隻股 62.75) , 想長hold 等大市升

或有什麼股現價好建議呢。

龔成老師：

這些股都有質素的，你可以長線持有，但要留意阿里健康（0241）的風險會較高，雖然潛力大，但唔建議持有太多。

至於其他股，如果平穩增長類的有：盈富（2800）、銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382），但就要明白波動性比上述會高少少，現價唔算平，要小心控制注碼。

------------------------------------------------

Q17560：

龔sir，我想問點解好多投資者都話騰訊阿里⋯潛力大可以買，但佢地自己反而係冇入貨，唔係好明佢地心態，係因為新經濟股科網股波動好大，同埋唔係佢地一直以黎投資策略嗎？

另外想問比亞迪有冇機會落番合理價先入手，因為我想入一手，如果冇係$70入係米貴左D，定可以入吉利，會唔會冇比亞迪咁大潛力？

同埋網易你點睇佢前景，畢竟佢係網易二哥，騰訊目前價位太高了，係米可以投資係網易？

以現家潛力黎睇，9988、1211、175、9999，阿sir你會點排，認為買邊隻先比較合理？

9988佢有機會柒藍，現家入佢之後係米會有機會大升？

因為我係投資新手，己經買左隻1928，下一隻唔知買邊隻好，目前有5萬現金係手，見好多都升得好誇張落唔到手，希望呀sir俾D意見，幫我解答問題

龔成老師：

這個世界有唔少人都是「講多過做」，例如我一直話比亞迪（1211）$40平，一年前在$60，唔少網友話跌到$40會入，之後到了今年3月，去到$3X佢地又驚，真正入貨的人唔多。

好多人都只是得個講字，其實你唔需要理，我做人的方式，就是只求做好自己，唔理別人！

你預比亞迪在$70以下投資會較好，如果$7X就月供好了。

另外，你唔好只集中投資新經濟股，要建立「平衡組合」各類股都要有，你上述講的4隻股，都有增長力的，都可考慮，但都唔平。反而盈富（2800）現價合理，可以分注投資。而金沙（1928）都可長線。

至於網易（9999）有質素的。

先講講佢基本業務，佢創立於1997年，為用戶提供優質的內容和服務。以中文門戶網站起家，並推出了至今仍在發展的媒體及電子郵件服務。

2001年，戰略擴展到在線遊戲業務領域，根據App Annie的數據，按2019年iOS 及Google Play綜合用戶支出計算，集團現已成為全球第二大移動遊戲公司。

2006年， 推出有道業務，後已成為在紐交所上市的智能學習平台；2013年，推出音樂 流媒體平台網易雲音樂；2016年，開設電商平台嚴選，迅速成長為一家主流的自有品牌商品平台。

佢而家提供超過140款手遊和端遊，涵蓋遊戲類型廣泛。集團並內部孵化並發展出一系列創新且成功的業務，包括智能學習及其他業務，如音樂流媒體平台、自有品牌電商、互聯網媒體、電子郵件服務等。

整體上，佢業務有一定的優勢，以及仍有增長力。

不過，現時唔算平，同時市況波動，因此唔建議太進取，而小注投資是可以的。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q14321-Q14340）

Q14321：

龔成老師，你好！我可以現價買1810嗎？長線2年可以增長幾多？唔該老師

龔成老師：

2年並未能定義為長線，只能說是一個中線投資，企業發展仍有變數，股價仍會受市場波動因素影響。

小米集團（1810）本質不算差的，業績亦等算合理，我相信佢長期仍有得發展的，不過，市場就會認為「只是如此」，而發現過往一直都「預期得太高」。不過，近期已合理翻。

佢慢慢會受惠5G及物聯網，相信佢會平穩增長，但未必是最初出面估值爆炸性好強的類別。長遠有機會有爆發點，但好難預期幾時出現，所以，2年未必能正式顯出到佢的價值。

現價分注投資可以，合理價。

------------------------------------------------

Q14322：

龔成老師你好:
我剛剛成功報了你的進階班! 期待吸收更多更深入的投資知識!

1.如果我的目標股票組合有10至15隻優質股票，包括地產，汽車，醫藥，金融，科網，殯儀，保險，公用，博彩板塊。是否仍要加隻盈富ETF? 因個股組合已好多元化。如果不一定要加盈富，可以將月供資金分配到水桶1股票。

2. 銀娛合理區和便宜區是多少? 此增長股估值用上堂教的現金流折現法是否合適?

3. 假設一隻股票合理區是$50-70, 嚴重高於合理區時可以開始考慮分段部份沽出,嚴重高估是大概高過$70多少(20%?30?)

龔成老師：

1）可以加入盈富（2800），盈富本身是平衡組合的風險，就算你本身已有不同行業的持有比例，你都可以加上盈富的，無問題。

但要留意，建立多元化組合是好的方向，但不要為建立而建立，當中一定要是優質企業，以及你已經對其完全了解，有能力持續跟進。

2）現金流折現法是適合的，但比較難掌握，到了進階班，我再會教一些更針對這兩間企業的估值方法。

現時佢地都在合理區內。

3）每間公司不同的，如果是好優質的企業，要求「貴」的水平會較多，例如在合理區中間位，加多一倍（當然無絕對的）。

------------------------------------------------

Q14323：

你好~
請問 2500啟明醫療 值得現價位持貨嗎？

龔成老師：

啟明醫療（2500）這類半新股，會比較難分析，因為資料較少，加上初上市股價有可能波動，要小心。

講翻基本面，佢係中國的經導管心臟瓣膜醫療器械企業。
根據資料，按2018年TAVR產品植入量計，集團在中國的市場份額為79.3%。其自主研發的產品VenusA-Valve是首個獲NMPA批准及在中國進行商業化的TAVR產品。

佢係2009年創立，專門從事經導管心臟瓣膜產品的設計、開發及商業化，開發出一個全面的產品組合，涵蓋四個心臟瓣膜的經導管解決方案及主要配套產品。

隨著於2018年12月收購Keystone，集團亦在產品組合中新增一款處於臨床階段的主要CEP裝置－TriGUARD3。

目前，佢擁有389項專利及專利申請，其中包括中國93項已公告的專利及60項專利申請以及美國及歐盟等主要海外市場100項已公告的專利及136項專利申請。

但要留意，雖然佢業務增長力唔差，但企業規模細，未有正式的盈利，風險高。前景不算差，如真的投資，現價小小注都可以。

------------------------------------------------

Q14324：

您好，龔成老師，請問維他奶國際（345）值得投資嗎？合理價格多少，謝謝！

龔成老師：

維他奶國際（0345）是很不錯的優質股，這股在3年前出的《50優質潛力股》，已推這股為優質股，更有「4分」的小數高評分，可見有一定的優質度。

這股前景正面，但這股比當時推介時，之前上升了倍幾，之前到了貴的水平。其後股價回落唔少，但現價仍處合理區頂。

你可以等佢回落10%，開始慢慢分注入，咁會比較平衡。這股有長線投資的價值。

------------------------------------------------

Q14325：

老師，我很認同你所講：「只要肯定及相信自己可以做到，不放棄就一定會行出一條路達到目標！」

不過老師，我想分享下，做生意真的不一定成功及有穩定收入，況且要養家及不想為自己目標或理想而令屋企人生活質素而改變！

投資股票可能是比較容易實踐及起步，及不會太大動作而影響身邊人。

龔成老師：

做生意，當然不會一定成功，就算有最大的決心，都不一定成功。不過，如果我地相信自己，不放棄，成功率就會提高，這才是最重要的。

一般人可能做生意，成功率只有2成，但如果有超強信心及決心，成功率可能增加至5成。雖然都會失敗，但我地相信自己，總有相當的作用！

做生意的風險的確較高，穩健投資股票，成功率會較大，所以，行邊一條路，每個人不同，但最重要是知道，在香港，唔能夠打死工，一定要想其他方法並行或突破！

------------------------------------------------

Q14326：

老師你好。銀行給了一個方案畀我參考。

比如目標儲蓄以200萬為本金.
銀行出130萬，客人出放70萬，再月供2700左右，儲十年。

十年後大約取302萬，扣除銀行取回的130萬，客戶取回172萬，而客人總支出了1,025,000,平均回報約8.5%一年.

這個都是儲蓄計劃，不是投資產品。只是保險計劃配合融資方案， 即係客人和銀行一齊做一張儲蓄計劃， 所以客人回報倍大左。

你覺得這個方案值得投資嗎？

你之前講過2800 盈富基金的投資回報都有10%以上，但投資股票並不是有保證回報。
謝謝你的意見

龔成老師：

表面上，回報是不錯，但你一定要問清楚一些問題。

首先，你10年後取$302萬，這是保證嗎？有那些情況不能做到這數目，機會率多少，你要分析翻這數目發生的可能性，是佢地自己推算，還是點計，要問清楚。

佢地以那些基礎去假設出這數目，如果這些因素改變，結果會變嗎？

如果外圍加息，會否影響你借貸的利息，如影響，最終會對你的回報產生怎樣的影響？

如果這是一個極低風險的產品，而有8%回報，其實是可以作為財富組合的其中一部分。當然，你要同時有其他增長力較強的項目，不能只集中在這產品中。

------------------------------------------------

Q14327：

請問老師，大家樂，現價18.4 屬於便宜區嗎？

龔成老師：

大家樂集團（0341），有質素的，但佢務做得有點雜，定位不及大快活清晰，而我地發現，大快活（0052）的股本回報率較大家樂為高。

大家樂近期受香港情況影響，股價下跌不少，但仍未到平宜的區，這刻只是合理。雖然我地預期香港因素對佢只是中短期的影響，並不是核心性，不過，在估值上，都要有適當的調整，以反映不確定因素。

其實現價都有投資值博率，分注無問題，但不要用盡現金。

------------------------------------------------

Q14328：

龔生你好。我一直有睇開你facebook。

我有一筆現金，想買香港二手樓投資，請問買邊區樓既回報率會高啲？

早前我睇你分享的問答，有位讀者600萬的樓，有22000一個月收租，回報率好高啊，想知道邊區既樓有咁樣既回報率？謝謝

龔成老師：

抱歉我已經唔記得該讀者的區分，因為我答了好多類似的問題，無法完全記得。

如果你想投資物業，我地要考慮「出租」因素，你要選市區，交通方便，易出租的，最好是當區長期供應不多的，例如堅尼地城。

你可以選一些唔太新，但維修方面無大問題的物業。

------------------------------------------------

Q14329：

想問下1666可以一試嗎？

龔成老師：

同仁堂科技（1666）業務有少少轉弱，我相信中短期仍會較一般，但長期來講，不是無質素的。

佢主要從事醫藥技術開發、技術諮詢、技術服務；製造、銷售中成藥、生物制劑。但要留意，這類股的行業變化較大，同時研發上，無可避免有風險。

雖然同仁堂算是藥業保健股中，較穩健的一隻，但都無可避免受行業不確定性影響，因此，只要投資不太大注。現價在合理區中下部，可小注投資。

------------------------------------------------

Q14330：

Hi 龔老師，本人是一位單親媽媽，因為想改變生活狀況，但缺乏像人家大量的資金，不想再這樣子下去。希望幫忙分析，給點方向

*每月收入大約一萬五千
*之前借了貸款，每月要還3000至至2022才完
*每月開支大約12000，包括還貸

龔成老師：

我相信你一定有好大的生活壓力。以你現時的收支情況，要改變並不易，因為就算再慳，作用都有限。

反而最大的改變位，是提升收入。

你要想想，長遠唔可以只得$15000人工，有無機會得到更好人工的職位，想想有無轉工，又長遠睇，前景較理想的行業職位。

另外，就是開拓一些小生意，利用空閒時間去做就得，我相信你會好明白單親媽媽的需要，你反而可以向這個市場著手，會更有發展。

你要相信自己可以做到！加油！

------------------------------------------------

Q14331：

成成老師，之前我誤信奸人，買左邁博藥業b (2181) , 金泰豐 (8479), 太興 (6811), 全部都做左蟹貨，可以提供建議幫幫我嗎？

龔成老師：

邁博藥業（2181）仍處一個燒銀紙的階段，只能以「博」去形容，無人知幾時成功，佢研發和生產用於治療癌症和自身免疫性疾病的新藥及生物類似藥。

無人知最終的結果點，所以，根本要睇你博唔博。只可以話，如果你太大注，要賣部分，小注就當博下。

金泰豐國際控股（8479）這類創業版的股票，一向都是風險高，投資價值低，業務波動，投資價值不高，要守都不易，你最好先現價賣出部分，再等有較大的反彈後，賣出。

至於太興集團（6811），這是唯一有得守的持股。

佢本身不是無質素，不少品牌都受歡迎，只是上市時估值高。加上受香港的情況影響，對佢點都有打擊，但香港因素只是中短期，過左之後，股價會慢慢上翻，可以守。

------------------------------------------------

Q14332：

呀sir你好
我想問點解唔先買收息股然後再用佢地派息嘅錢去投資潛力股？咁樣唔係更加安全咩？

龔成老師：

你用回報率計就明，如果你有$10000，投資收息股，每年有6%，即是$600，你可以將這$600再投資。雖然每年都可以有$600收息作投資，就算3年計，都只有$1800投資（本金有限）。

如果你先投資增長股，將$10000，3年增長至$20000，然後到時再投資收息股，會產生更大、更平衡的財富效果。

同時，我地一定是先增長財富，之後才守住增長左，已較多的財富。

如果你一開始投資收息股（即是以守住財富的策略），但財富根本不多，那根本無法產生最有效的效果。

------------------------------------------------

Q14333：

本人今年24歲 啱啱做左野半年 月入29k 。平時都有買開股同留意股票行情。

想問老師 如果想5年內比到首期 應該點做？
謝謝！

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

我希望你能做到「每月逼自己月供股票$10000」。如果你做到，相信5年能滾存到$80萬-$110萬。

你可以考慮盈富（2800）$4000。

另外再加3隻（每隻$2000）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

如果你不懂股，就集中供盈富$10000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14334：

老師，你點睇系海外買物業？始終香港樓價太貴..再買香港樓難度較大...

加按香港自住樓去買海外物業收租會吾會系好既方法增加資產？

龔成老師：

如果你年齡不大，同時能承受風險，加按本身香港樓，將資金投資海外樓，都是可行的策略。你可以視為建立一個環球的財富組合。

其實，當考慮海外樓是否投資，當中有兩個關鍵位。第一就是你的認識程度，你一定要了解當地，社區結構、人口結構、城市發展、那些人會租樓、法規等，你都要知，你清楚後，才可投資。

另一點，就是這物業是否值得投資，你要分析長遠的供應需求，社區的發展，地點是否方便。最重要的，是租金回報率，這個將衡量你現時的買入價是高是低。如果地點方便，租金回報率不低，才可以考慮。

------------------------------------------------

Q14335：

我係一個21歲剛出社會既女生，我想學下投資，我咩concept都冇，其實啱啱開始應該點做好？

龔成老師：

你由最基本的理財開始，先記低每日支出，量入為出，慢慢再學投資。

睇書、留意經濟及財經新聞、上堂，是最基本你要做的事。

你可以睇書先，我的《80後百萬富翁》《股票勝經》都是適合初階者，你可以先睇，之後再睇我其他書。

------------------------------------------------

Q14336：

成哥 你好，我唔係好睇到778係一隻倍升股 現時價位已經睇到市場情況 同時香港經濟亦逐漸衰退

對於以物業收租股 股價最多亦只會因派息等消息才會上漲 長遠只有靠通脹，才有機會倍升 只能當作穩陣收息股

龔成老師：

我相信，置富（0778）的確未必是一隻倍升股，但就是一隻優質，可長期收息的股票。

持有物業收租，好處是長期的租金收入，以及穩定。這都是收息股的特性，除非租金及物業的價值能大升一倍，否則難以做到倍升，因此，我地可以定義佢為收息股。

香港經濟雖然轉弱，但佢持有民生類物業，受影響的情況會相對較少。

------------------------------------------------

Q14337：

老師 想問問雅生活？
前景如何？thx

龔成老師：

物管股，不少都有一定的質素，因為業務穩定，現金流強，加上有背後企業支持，同時這在內地仍是發展中的行業，前景正面。

只是不少估值都較高，雅生活（3319），算是值博率較高的一隻。

佢翻佢的業務情況，佢行中高端路線，名列中國物業管理企業品牌價值第12名，在中國數十個城市提供物業管理服務，管理物業總面積超過2億平方米，服務業主及住戶超過100萬。近年不斷透過收購擴大業務。

中國不斷城鎮化，以及人均可支配收入增長，成為物業管理行業的主要增長原動力，而雅生活近年積極進行併購活動，帶動業務不斷增長，相信管理層仍有野心，這企業仍會保持一定的增長力。

簡單來說，雅生活無論在業務本質、規模、品牌、財務數據、前景，都是理想的，反映這企業有一定的質素。加上這企業的背景因素，以及行業的發展，相信這企業的前景不差，有長線投資的價值。

現價算是合理區中上部，小注投資可以。

------------------------------------------------

Q14338：

老師:你好!有野想請教

1, PEG是市盈率/每股盈利, 大於1=貴, 小於1=平, 依1177為例13/0.841=15.58, 咪好貴?

2, 788和1448，依現在股價來看是否788有值慱率?

3, 社會運動如持續一年或以上, 在投資應該要有什麼對策?(因本人有月供股票的習慣)

4, 想問3140的過往市盈率在什麼WEBSITE可找到?合理價是多少?
3140會否好像2800一樣隔一段時間會踢走業績無禁好的公司, 加返一D好業績的公司落去?

未答都先謝

龔成老師：

1）不是。「PEG公式是：市盈率/每股盈利增長」，大於1=貴, 小於1=平」，不過，這只適合用於高增長股，中生製藥（1177）適用。

另外，這個方法只是估值模式的其中一種，專業投資者，都會參考下，作輔助之用，並不是估值的核心。

同時，這方法的「每股盈利增長」，要計算多年的每股盈利增長複息平均。

另外，中生製藥上年因為有特殊收益，所以真正的市盈率，並不是13倍，而是30倍左右。

2）置富（0788）在合理區中間，有投資值博率，福壽園（1448）雖然少少貴，但有潛力，所以就算小注都有少少投資值博率。當然，置富可說是投資值博率這刻高少少。

3）除非當該企業的業務，造成了核心性的影響，否則，不用改變。暫時睇，未有核心性影響。

4）你可以上一些網，找翻「標普500指數」的市盈率。正如盈富（2800），都要去恆指服務公司的網，找恆指的市盈率。

------------------------------------------------

Q14339：

老師，假設我在月供組合中調整 $1500 供潛力股，應該選哪一隻？
還是1211，1177，1448 各$500 這樣配置？

龔成老師：

因為福壽園（1448）應該無得做月供，所以你可以月供比亞迪（1211）$1000、中生製藥（1177）$1000

------------------------------------------------

Q14340：

老師，我想買入優質嘅收息股，而且傾向一年收兩次息。

自己之前睇過你發表的分析，加上自己一些心儀的目標。綜合下來有以下

1. 02638 港燈
2. 06823 香港電訊
3. 00778置富產業信託
4. 匯賢產業信託

如要分先後次序，哪個會比較好？
希望得你指點迷津

龔成老師：

上述都是不差的收息股，其實你可以以分注模式去投資，買入價能有效平均。同時持有上述的收息股，能有分散風險的效果，因此全部買入，建立一個組合，可以。

以這刻的投資值博率，你可以先買入置富（0778）、香港電訊（6823）。之後再入餘下兩隻。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。