深夜無人睇，靜靜雞講故仔……大結局
　
《我老婆由細到大都鐘意紙紮公仔》
　
「我爸爸究竟幾時先會醒？」靜妍擔心地問。
　
「劉生佢個後腦受到撞擊，積咗唔少血塊喺入面，所以到呢家都一直昏迷。但如果我地開刀去拎走血塊就太危險，所以要再觀察一下會唔會惡化，至於幾時醒，我地真係答你唔到。」醫生說。
　
靜妍聽後頓時感到傷感，望住瞓喺病床中嘅爸爸更顯得有種無力感。
　
返屋企途中，靜妍一臉憂愁，諗返起嗰晚所發生嘅事就好唔開心。佢估唔到自己一踏入屋，見到爸爸想燒佢啲心愛紙紮朋友，一時之間控制唔到情緒，就隨手拎起支棍將老豆打暈。
　
雖然事後話爸爸跌親撞到個頭，警方無懷疑到佢，但靜妍已經相當後悔，因為呢個世界上面，爸爸就係靜妍嘅唯一至親，佢唔想失去咗呢個爸爸。
　
佢同自己講，如果再有紙紮同老豆兩項選擇要佢揀，佢一定會揀老豆。
　
返到屋企後，靜妍見到眼前一堆紙紮，雙眼從空洞之中變得活躍起嚟，頭先對於紙紮嘅抗拒之心一掃而空，反而內裡嗰股激動興奮心情不斷湧現，佢心諗老豆既然唔知幾時先醒，倒不如好好盡情做自己鐘意做嘅事，於是心情突然180度轉變，展露笑容咁收拾紙紮玩具。
　
而靜妍每一晚都會好細心咁幫紙紮公仔掃塵清潔，亦開始物色唔同嘅紙紮家居用品。久而久之，成間屋企都好似一個紙紮家居設計咁，所有傢俬都係用紙紮製成，令到靜妍非常興奮。
　
由於紙紮用品佈滿整間屋，而紙紮都有其獨特氣味發出，靜妍不時用力聞一下，當聞到紙紮味道時，就好似感覺到自己被一堆紙紮所包圍自己，充滿溫暖嘅感覺。　
　
但呢種滿足感，只有屋企先可以帶到比佢。
　
一踏出門口，靜妍望一望自己，見到自己著嘅衫褲，見到自己用嘅銀包，見到自己所著嘅鞋通通都唔係紙紮所造，佢頓時覺得討厭，甚至覺得自己背叛咗紙紮一樣般內疚。
　
每次返到大學，靜妍都忍唔住去廁所嘔，因為佢討厭件衫所帶出嘅氣味，佢恨不得返屋企換返紙紮造嘅衫褲。
　
靜妍知道自己唔可以再咁樣落去，佢希望可以將紙紮變成每個人都會接受嘅日常用品，但奈何自己唔識設計亦唔識製造紙紮，於是佢想搵一個可以幫到佢設計鐘意嘅紙紮，又唔會當佢變態嘅人，於是佢做咗唔少調查，最終將目標鎖定讀緊大學時裝設計系嗰個無咩地位，無咩存在感嘅學生。
　
佢叫家銘。
　
家銘係一個典形毒男，雖然時裝設計能力強，成績優異，但往往比人印象係無朋友，亦唔識打扮自己同人地溝通，所以好多實習機會或人緣都無佢份，令到家銘非常自卑。
　
呢個時侯，靜妍竟然主動親近佢，並欣賞佢嘅設計能力，呢點令到家銘受寵若驚，估唔到能夠吸引到如女神般嘅靜妍。
　
「係呢，你想我幫你設計啲咩衫？」家銘問。
　
「想知？今晚嚟我屋企。」靜妍故意賣弄關子，令到家銘個心十五十六，唔好話同女性相處，連人地屋企都未去過。
　
當晚，家銘盡佢個能力將自己打扮得好好睇睇，務求配合返靜妍對佢嘅主動。
　
「叮噹。」家銘按了門鐘。
　
當靜妍一打開門時，內裡嗰股紙紮氣味即時撲出嚟，一時之間令到家銘唔係好接受得到，於是用手掩一掩口。然而，佢竟然見到靜妍全身衣服古怪奇異，望真啲，竟然係著住件紙紮連身裙！
　
「你條裙……？」話未說完，家銘已經留意到屋內所有擺設都係用紙紮而做，驚訝得目瞪口呆。
　
靜妍捉住家銘隻手，然後溫柔地為佢逐一介紹傢私。
　
「呢個紙紮茶壺。」靜妍然後開水龍頭，將水倒入呢個紙紮茶壺，好快呢個紙紮茶壺就被水整濕，慢慢爛掉。
　
「始終都係用紙造，一濕水就玩完。」靜妍為呢個已廢嘅紙紮茶壺而感到難過。
　
靜妍緊緊地捉住家銘隻手，哀求說：「所以我想你設計出一個可以裝到水嘅紙紮茶壺，可以著出街嘅衫褲鞋襪……
　
家銘覺得靜妍痴咗線，於是甩開佢隻手，想轉身離開，但由於太過震驚，家銘不斷退後，期間誤打誤撞，撞掉一個紙紮公仔。
　
佢正想執返起佢時，佢見到紙紮公仔用一對充滿怨恨眼神望住佢，嚇到佢即時退後。
　
「你痴咗線……我聽人講過，你阿媽係受到紙紮詛咒而燒死，估唔到連你都變成咁！」說罷，家銘開門直奔離去。
　
呢一晚，家銘返到屋企後一直都瞓唔到，明明身體上好抗拒紙紮，但唔知點解，腦入面諗下諗，又發覺紙紮製成品又真係幾吸引，而且靜妍又咁欣賞自己，一諗起做人做咗十幾廿年都未有女神親近過佢，如今大好機會喺面前，無理由唔好好把握？
　
於是家銘忍唔住不斷上網搜尋「紙紮」嘅圖片，愈睇愈吸引，雙眼充滿喜悅，睇完一張又一張，完全不能自拔，慢慢投入整個紙紮世界，不知不覺間，佢已經被紙紮所詛咒。
　
為咗討好靜妍，家銘付出畢生努力為靜妍設計出由紙紮所整嘅時裝，令到靜妍非常開心，因為終於可以著唔同設計嘅紙紮出街，而家銘亦運用自身能力，利用特殊紙質同木製材料，製造出可以裝到水嘅紙紮茶壺，轉眼間，所有傢俱都可以利用紙紮當作日常用品。
　
當靜妍著住家銘所設計嘅紙紮時裝出街同返學，惹來唔少身邊嘅人目光注意，部份人望望下又覺得呢類紙紮時裝非常吸引，散發出獨特嘅氣質，認為呢個係流行嘅象徵，紛紛用唔同嘅方式投入紙紮世界，令香港頓時掀起紙紮熱潮。
　
家銘嘅作品更加成為眾人焦點，唔少品牌公司都向佢招手，希望佢設計出更加吸引嘅紙紮時裝。令到家銘有生以來，除咗靜妍之外，佢嘅成就係得到人重視。
　
佢認為，呢一切都係紙紮帶比佢嘅回報，令佢更加對紙紮充滿著迷。
　
……… ……… ………
　
張開眼晴，望住灰白嘅天花板，腦海完全一片空白，全身手腳都感到無力。我慢慢將個頭轉去左邊，見到個護士為個病人探熱，然後個護士轉身望住我，短短幾秒間，個護士好似嚇親咁，跑過嚟大聲問我：「劉生！你醒喇？我幫你叫醫生！」
　
我醒？呀……我一定係昏迷咗好耐。個頭好痛，但我開始有返些少記憶印象。
　
突然，我瞪大雙眼，因為我諗起靜妍受到嘅詛咒已經病入膏肓，頓時彈起身想即刻阻止個女，但我一起身，頭亦開始暈，更嘔咗一大輪。後來醫生話我長時間瞓床，所以身體仲未適應，叫我暫時好好抖下。　
　
我拒絕醫生嘅要求，夜晚偷偷地走出醫院，希望盡快返屋企，我答應過老婆唔可以比個女出事，佢呢刻只係比紙紮迷，我一定要救佢！
　
當我走出醫院後，我嚇呆了。
　
因為我見到街上有幾個人竟然著咗件紙紮衫褲出街，我望住佢地目瞪口呆，佢地望一望我，完全唔覺得自己怪異，佢地雙眼反而好奇我做咩咁樣望住佢地。我以為自己撞鬼，畢竟夜晚晚邊會有人著住紙紮出街？
　
我行到樓下商場時，我再一次嚇呆了。因為我見到幾間時裝店都賣緊紙紮。我走到其中一件紙紮衫面前，我用手摸摸，真係用紙做，但竟然可以做到好柔軟，一啲都唔生硬。
　
「先生，有興趣可以試下著上身睇下岩唔岩。」售貨員親切地走來說。
　
我激動地反駁：「你叫我著呢件紙紮？你當我死咗呀？呢啲係比死人著架！」
　
只見售貨員聽後無任何表情，仍然露出一副詭異笑容，續說：「先生，有興趣可以試下著上身睇下岩唔岩。」
　
「你都痴線！」我退後數步，然後轉身離開，究竟我昏迷呢段期間發生咩事。
　
我返到屋企前，發現門鎖已換，於是我瘋狂拍門，但無人應門。而我亦體力耗盡，慢慢跪喺閘前抖下。呢個時侯，對面屋鄰居聽到聲於是開門睇睇，見到我痛苦咁坐咗喺到，即時開門叫我入去抖抖。
「劉生！你點呀？你終於無事喇？」
　
「知唔知我個女去咗邊？」
　
「你個女？你個女無接你咩？呀！你個女呢家好出名架！」
　
「出名？咩出名？」
　
鄰居將我昏迷期間所發生嘅事一五一十講比我知，原來靜妍同佢男朋友家銘所設計嘅紙紮時裝帶起潮流，更發展到其他製成品。雖然呢種「潮流」唔係人人可以接受得到，但最詭異嘅係，好多曾經反對紙紮潮流嘅人最終都慢慢紙紮而著迷，逐漸加入紙紮一員。
　
「咁佢呢家去咗邊？」
　
「其實係人都知佢住邊……因為佢間屋幾乎全部都係用紙造成，亦成為香港其中一個打卡點。」
　
我聽後，整個人都發軟，不斷搖搖頭說：「佢再係咁落去，一定行返阿媽條舊路……唔係，佢應該比佢阿媽下場更加慘。」
　
「你睇下你成個人累到咁，你食咗嘢未？我不如煮過麵你食下。」
　
我點點頭，因為我已經好累了。
　
鄰居走入廚房煮麵時，我腦海仲諗緊究竟可以點做時，我留意到枱上嘅茶壺好似有啲特別，於是我慢慢伸手去拎起佢，竟然係一個用紙造嘅茶壺，仲可以倒茶出嚟，我驚訝得即時放手，令到茶壺跌落地下……但由於用紙造，所以無爛到。
　
「其實紙紮呢種咁靚咁完美嘅製成品好應該一早就要用！所以我好多謝你個女！如果你想阻止個女嘅話……我係唔會比你咁做。」鄰居雙眼充滿欲望，臉容亦慢慢扭曲地詭異地笑。
　
我正想起身想走時候，突然我被壓住，我轉身一望，原來有個紙紮公仔用手壓住我膊頭，他操一把流利大陸口音：「怎麼喇？想跑呀？」
　
「嘿嘿……佢叫Mary，係我屋企工人，基本上每個屋企都會有。」鄰居指住我背後嘅紙紮公仔介紹說。
　
我本來身體已經虛弱，實在受唔住呢類驚嚇，我慢慢地失去意識暈倒了……
　
　
……… ……… ………
　
「老豆！老豆！」
　
我慢慢張開雙眼，隱若見到靜妍喺我身旁喊住叫我。
　
「老豆呀，做咩醒咗都唔叫我嚟接你呀？」靜妍喊住說。
　
我望一望佢，然後伸手掂一掂佢件衫嘅質地，發覺佢無著到紙紮嘅衫，呢件係普通嘅衫。似乎靜妍知我諗緊咩，於是急說：「我知你唔鐘意，所以我已經無再著嗰啲衫，我應承你。」
　
我虛弱地點點頭，再用最大力氣講句：「紙紮係死人用，唔係我地用。」
　
「我明呀！我唔會再著架喇！」靜妍攬住我喊著說。喺靜妍心目中，爸爸嘅重要性絕對比紙紮強，而一直昏迷嘅爸爸，靜妍曾經多次向天承諾，希望爸爸可以早啲醒，寧願放棄紙紮都唔想爸爸一直昏迷落去。如今爸爸醒返，對靜妍嚟講係一個重生機會，今次佢絕對會珍惜。
　
「係呢，我介紹你識，呢個係我男朋友，佢叫家銘。」靜妍開心地向我介紹。
　
「世伯你好。」家銘客氣地說。
　
我見佢一表人材，內心都放心好多，同時亦覺得個女終於大個了，已經識到個男朋友。
　
我表示好累想再抖下，閉上眼放鬆地瞓，估唔到個女仲咁聽我話可以擺脫詛咒，總算對老婆有交代。
　
過咗一星期，家銘嚟接我出院。
　
「靜妍呢？」我問。
　
「呀，佢今日要返公司處理啲嘢，所以我嚟接你。」
　
「咩嘢緊要得過我呀？等我打比佢先！」我嘗試搵下手機喺邊。
　
家銘笑說：「唔好喇世伯，靜妍佢唔係啲普通職員，所以公司有好多重要嘢真係要佢先處理到。」
　
我亦笑說：「我講笑咋，難得個女咁重要，我點會阻住佢，我地兩個走就得。」
　
喺車上面，我一路望住出面街景，留意到街上仲有唔少人著住紙紮，睇到我心都煩。
　
「係呢，你地呢家住喺邊？」我問。
　
「哦，放心，我地呢幾日都搬咗出嚟，無再住嗰間紙紮屋。」
　
「咁都好啲，我一聞到嗰陣味就想嘔。」
　
「其實佢地都幾可愛架。」家銘說。
　
「唔係嘛，可愛？恐怖就真。我由細到大就同靜妍講，呢啲係死人用，唔係我地拎嚟玩！拎嚟著！你睇下出面班人，著住紙紮出街？真係痴哂線。我真係為佢地父母擔心！」我稍稍激動地說。
　
「係係係，唔好勞氣。」家銘笑說。
　
我望住呢個後生仔，覺得佢份人都幾好，靜妍應該無揀錯人。
　
突然間，我見到前面好似有個熟悉嘅人企喺路邊一直望住我，直至我架車喺佢身邊走過，我先留意到佢係我老婆，我即時叫停車！然後打開車門轉身一睇，明明頭先老婆企喺到，轉眼間已經唔見咗。
　
「世伯咩事？」家銘緊張地問。
　
我搖搖頭說：「無嘢……」
　　
上返車後，腦海再次出現岩岩畫面，點解老婆會突然出現？
　
車停了，眼前有間別墅，估唔到靜妍已經變得咁有錢，連別墅都有。
　
「我拎啲行李上房先，你入去抖下。」說罷，家銘就拎住幾個箱上房。而我就行入大廳坐住欣賞間屋。
　
但我突然間覺得唔係好舒服，我不斷聞下周圍，呢種氣味正正就係紙紮嘅氣味。
　
當我發現時候，我發覺身後已經企滿一堆紙紮公仔。
　
其中一個紙紮公仔說：「這個瘋子，上一次放過他，今天一定要殺死他。嘻嘻！」說罷，佢拎住一支棍一步一步咁行埋嚟。
　
我正想退後時，突然間，家銘從後捉住我，然後說：「對唔住世伯！你醒返嘅話，靜妍一定放棄紙紮，佢放棄嘅話，姐係放棄我！我就再無用架喇！」
　
我未開口說話，我就感到巨大暈眩，然後我就被打暈了。
　
……
　
……
　
一星期後，靜妍喺張梳化到喊，家銘走去安慰佢：「唔好喊喇，我估世伯想散心行開陣姐。」
　
「究竟佢去咗邊……我好掛住佢呀……我等咗佢咁耐，點解又要突然走咗喎。」靜妍嗚咽地說。
　
家銘企起身，然後從櫃入面拎出一個紙紮公仔。
　
靜妍一望，驚訝地問：「個公仔咁似老豆嘅？」
　
家銘溫柔地說：「我知你好掛住佢，所以專登做一個紙紮公仔，係用你爸爸個樣去做。你睇下，連身高都跟足。」
　
家銘再行去靜妍身旁說：「我只係想你提起精神，見到呢個公仔，等於見到你爸爸一樣。」
　
「多謝你。」靜妍覺得身邊呢個男人除咗爸爸之外，係世界上對佢最好嘅男人，估唔到自己當初故意親近佢，如今卻有咗深厚感情。
　
「好喇，今晚我地出去食飯？你……不如換件衫好唔好？」家銘暗示靜妍應該換件紙紮衫說。
　
「嗯，我上去換件衫同你出去。」說罷，靜妍就開心地走上房。
　
而家銘見靜妍上房，望望身邊呢個紙紮公仔，然後輕聲說：「拜拜喇，世伯。」
　
二人開心地牽手離開。
　
屋內只有隱若的痛苦聲音：「吾……吾……吾……」
　
　
靜妍重拾對紙紮嘅依賴，家銘亦繼續發揮佢嘅事業，令紙紮潮流升至頂峰。
　
香港人，慢慢被捲入紙紮的詛咒，成為紙紮下的祭品。
　
　　
《完》

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

終於都完咗呢個故事，大結局，希望大家一定要like爆佢，留言爆佢，我想睇一睇大結局究竟可以去到幾多like 幾多留言！
就當對我嘅一種鼓勵吧。
我每個留言都會睇！！！！！！！！
　
我真係要休息一下，然後再重新出發寫更多故仔比大家。
　
雖然故事完咗，但記得都要支持買返本書
因為本書仲有其他故事架，我亦應讀者要求，寫個阿傑嘅外傳喺入入面＝」
　
我嘅網店：https://homingming.boutir.com/

感謝大家！
　
同埋再次提大家，今次係預售，幾多人訂就印幾多～
過咗三月就無得再訂同買架喇～＠＠希望大家買書支持
四月就會製成同寄出～～

深夜無人睇，靜靜雞講故仔……（最後兩回）
　
《我老婆由細到大都鐘意紙紮公仔》
　
得知外母跳樓自殺呢個消息之後，我完全係呆咗，因為呢件事我從來都無諗過會發生，唔通我前幾日罵走咗佢，佢接受唔到而自殺？如果係嘅話，我咪係殺人兇手？而且對象仲要係自己嘅外母……你叫老婆點肯原諒我？
　
過幾日後，當我一直感到內疚時候，警方將遺書交託比我，我先正式解開內心入面嘅疑問。
　
遺書入面提到，真正令佢地頭家散嘅人就係外父，係佢將紙紮嘅詛咒帶嚟呢個家庭。
　
原來外母當時嫁比外父時候，本身一路都好開心，但有一日外父返內地公幹返嚟之後，成個人都變哂，唔知點解突然之間好鐘意紙紮，不斷話紙紮係一件藝術品，好想收藏同發掘更好更靚嘅紙紮。
　
開頭外母以為佢只係純粹個人喜好，完全無諗過外父愈嚟愈變態，不但買咗好多紙紮返屋企，而且日常生活都用到紙紮，仲逼佢地兩母女都要一齊鐘意，因為外父話紙紮唔想屋企有人討厭佢地。
　
外母奮力抵抗，但最終都對於紙紮有一種著迷感覺，不能自拔，而個女因為想抵抗詛咒而得到情緒病，自此，外母為咗個女健康，而放任佢。
　
後來外父突然之間認為坊間嘅紙紮製成品參差不齊，已經滿足唔到佢慾望，得知內地有個紙紮師傅好出名，於是決定返內地繼續追尋佢嘅完美紙紮製成品。而外母亦鬆一口氣，但可惜個女已經被迷惑得深，最終自焚害死自己。
　
外母已經無咗個女，認為靜妍可能都受到詛咒，當我住喺醫院時候，有試過禁止靜妍接觸紙紮，但靜妍真係好痛苦，令佢諗起當初個女得到情緒病就係因為咁，於是唯有忍痛比靜妍玩。
　
但如果我將靜妍交比外父湊嘅話，佢一定極力反對，但深知我唔會聽佢嘅說話，於是決定以死明志。
最後，外母寫咗一句：
　
「對唔住，我地呢家人為你帶來麻煩，呢點係我一直覺得慚愧，希望你能夠原諒我地。」
　
我拎住封信，實在唔知講咩好，腦海只係浮現出當初喺呢個屋企趕外母走嘅情景，諗起外母寫呢封遺書時候一定係一個非常傷心。我仲記得當時見佢無咗個女一定好孤獨，仲承諾要好好照顧佢，而佢一直好愛靜妍，估唔到最後結果，係我逼佢上絕路。
　
靜妍岩岩瞓醒，仲有些少睡意問我外母今日會唔會嚟，我忍痛地說：「佢去咗旅行，好耐先會返嚟。」
　
靜妍聽後，一聲：「哦。」就轉身去梳洗。希望佢將來知道真相後唔會受到太大打擊。
　
由於外母本身無咩朋友，所以身後事都比較簡單，只喺靈堂設靈一陣就完算。
　
而外父亦突然出現，只見佢毫無精神，雙目沉寂，呆呆咁一步一步走到外母照片前。
　
我禮貌地交上幾支香比佢，佢接過嚟後，拜幾下再裝香。
　
然後嗚咽咁講一句：「八婆，你叫我點算？」之後佢就轉身離去，即使我點叫佢都好，佢都無理我。自此之後，我就再無見過外父。
　
而我同靜妍亦都重新展開新生活，雖然靜妍間唔時都會話想要玩紙紮玩具，但經我不斷打壓，靜妍慢慢都少提出，而佢亦都變得正常，健康快樂地成長。
　
當我以為遺傳於佢阿媽嘅紙紮詛咒已經消失時候，一切都告一段落，但原來有個巨大危機一直蘊藏於靜妍身上。
　
喺靜妍二十四歲嗰年，每年佢生日都會同我一齊慶祝，但我事前去咗公幹，所以靜妍一直以為今年將會破例唔會同佢慶祝生日，但事實上，我一早已經搭飛機返嚟諗住比個驚喜比靜妍。
　
落機後，雖然只係短短兩星期無返嚟香港，但我已經急不及待想見一見個女。始終我同佢相依為命廿幾年，中間面對過好多困難挑戰，但都被我地一一克服，呢份深厚感情，我知道對比其他父母係幸福得多。
　
我事前whatsapp靜妍今晚佢生日有咩活動，而佢話會同朋友一齊出去食飯慶祝。
　
而我趁呢段時間好好佈置屋企，等靜妍返嚟有驚喜同一齊慶祝。
　
當我喺街市買咗唔少靜妍鐘意食嘅餸後，經過街市角落，我先發現，不知不覺間竟然去咗當年阿傑開舖嘅街市，而呢個角落位置仍然賣緊紙紮，只係換咗個老闆。
　
諗返起，阿傑當年嘅死真係一個迷。我喺遠處望住，已經覺得堆紙紮好吸引，好想行埋去望清楚同欣賞。最後我行到去呢間舖面前欣賞唔同嘅製成品。
　
老闆係一個阿伯，佢見我喺到望，於是說：「有需要燒比人？」
　
「無，我只係覺得整得幾靚，忍唔住望下。」
　
「既然無需要就唔好望喇，你愈望佢，佢愈想你買咗佢。」
　
「佢？你指呢堆紙紮？」
　
「你以為紙紮只係一堆紙？任何嘢都可以附身，而紙紮就係專門被鬼附身嘅容器，如果你唔好運買咗個附身紙紮返去，咁你就要小心。」阿伯淡淡然說。
　
佢一講，又諗起外母一家。
　
「總之你唔需要就唔好望喇，走喇。」阿伯似乎唔想我喺到。
　
我正想離開時候，見到阿伯背後有一堆紙紮公仔堆咗喺入面，而佢地一直都望住我，感覺上佢地好似笑緊我，剎那間令我有股寒意，於是就離開。
　
當我返到屋企後，我真係嚇呆咗。
　
我驚見屋內擺放住大量紙紮玩具喺地下，而飯枱上仲擺放住一個生日蛋糕，而每個位置都有個紙紮公仔安放住，就好似一家人一齊慶祝咁。究竟發生咩事？點解屋企會有咁多紙紮？
　
我終於明白，原來靜妍一直都抑壓住自己對紙紮欲望，佢根本一直都無脫離過詛咒，佢只係唔喺我面前玩，我一旦去公幹，佢就拎返哂出嚟玩。
　
我嬲到緊握拳頭，我絕對唔會再比靜妍行返佢阿媽條舊路。
　
於是我將眼前所有紙紮玩具撕爛佢，撕得有咁碎得咁碎。
　
「這個瘋子是她的爸爸。」
　
突然有把內地口音嘅聲音出現。我頓時停咗手，望一望間屋，應該無人吧？
　
「把他殺死不太好吧？靜妍會傷心。」
　
「不殺他，那讓他來殺我們嗎？」
　
「那怎麼辦？」
　
我走到廚房房間同雜物房都唔見有人，但屋內一直出現呢堆對話，究竟係咩人講緊嘢？
　
「係邊個呀！出嚟喇！」我大叫。
　
「他叫我們？哈哈哈！」
　
當我意識到聲音係堆紙紮公仔發出時候，我立即轉身，但已經太遲，見只數個紙紮公仔將我壓住，明明只係一堆紙，點解力度好似大人一樣，令我完全反抗唔到。
　
「真的把他殺嗎？」
　
「靜妍會傷心吧。」
　
「我很討厭他呀！」
　
我不斷掙扎同大叫救命，希望附近鄰居可以聽到，但紙紮公仔用佢隻手封住我個口，令我不斷發出：「唔……唔……唔……」聲音。
　
當我見到佢地三個公仔喺到討論我時候，留意到佢地臉部表情同眼神不斷轉換，恐怖非常。
　
我用手不斷抓爛佢地隻腳，當我一抓，佢地隻腳就變得軟爛，頓時失去平衡。我先趁機起到身，跑到大門前，而佢地隻腳唔洗一秒，又變返原狀。
　
「看吧，真討厭呀。」
　
「殺他吧。」
　
「但靜妍會傷心呀。」
　
我從褲袋中拎出打火機，然後對住呢堆公仔大叫：「再行埋嚟我就燒撚死你班垃圾！」
　
只見三個公仔一直望住我，臉容表情不斷改變，最終三個臉容變成一個恐怖笑容。
　
佢地三個異口同聲地說：「敲下去吧！靜妍。」
　
靜妍？
　　
我轉身一望，只見靜妍雙眼充滿怨狠咁望住我，手上拎住個掛衫嘅木棍，然後一嘢向我個頭毆落去，我即時失去意識，然後暈倒了。
　
「可憐的瘋子！」
　
……
　
後來，我一直昏迷。
　
由於無咗我呢個顧忌，靜妍嘅欲望一下子完全釋放，甚至失去控制，將詛咒散佈到整個城市。
　
原來受到最深詛咒嘅人，唔係佢阿媽，唔係外母，唔係外父，而係靜妍。
　
（待續）
　　
仲有兩集就大結局。
　
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

故事已經去到尾聲，大概仲有兩集就會大結局。
如果呢集聽晚前真係有7000 like，聽晚我會出比大家睇。
如果唔夠都唔緊要，唯有比我抖下～～呢排公司好多嘢做。
　
所以大家記得like 同留言 同share～每個留言我都會睇。
　
另外，未買書嘅讀者記得買書支持，如果多人買，我考慮會同大家一齊睇大結局……！
　
我嘅網店：https://homingming.boutir.com/
　
知大家買書可能遇上問題，但我只有一個人，所以處理好慢，大家耐心等我……感謝大家！
同埋再次提大家，今次係預售，幾多人訂就印幾多～
過咗三月就無得再訂同買架喇～＠＠希望大家買書支持

深夜無人睇，靜靜雞講故仔……
　
《我老婆由細到大都鐘意玩紙紮公仔》
　
「嗚也！！嗚……呀呀……！」
　
我每日都會發出痛苦嘅呻吟聲，每一日都受到地獄般嘅煎熬。特別係護士每隔一個鐘幫我換紗布時候，由於大部份呈碳黃色嘅皮膚沾上整塊紗布，令撕開期間連埋我皮膚都一併撕開，呢種痛苦令我生不如死。
　
「劉生你嘅情況係二級燒傷，即係話已經傷到真皮層，由於無咗外層皮膚嘅保護，令到你神經綫外露，所以千其唔好亂郁，因為就算郁少少……你都會好痛。」醫生喺身旁安慰著我，但呢啲廢話我唔想聽，我只係想知我幾時先可以好返出院，因為我個女需要我。
　
基本上長期住院期間，起初好多身邊嘅朋友都會嚟探我，但我其實心底裡面唔想見人，我知道自己個樣變成點，我已經毀咗容，每個朋友探我時候都不經意露出一副睇怪物嘅臉容，即使佢地扮到幾唔在意，但實質上佢地對我係好恐懼，久而久之就再無人嚟探我。
　
而外母不時都會帶個女嚟睇我，但每次靜妍見到我都會好驚咁捉緊外母，雙眼展露出對我充滿恐懼，因為我真係搵唔到有咩嘢可以證明我係佢老豆，我樣同皮膚都已經毀了，連我把聲都失去，難怪突然有人話呢個人就係你老豆，靜妍一定接受唔到。
　
「靜…………妍………」每當我用盡最大力氣去叫靜妍並向佢伸出左手時，靜妍都會被嚇得退後數步，然後細聲地問外母：「我地可以走未？」
　
即使外母多番解釋眼前呢個人就係爸爸時候，靜妍更加對我感到恐懼，我都係第一次見到靜妍咁驚對住我，呢種冷漠同恐懼嘅眼神，比起我皮膚傷痛更加痛得入心入肺，每次眼見佢離開，我都哭成淚人，痛不欲生。
　
有一次，阿傑嚟咗探我。
　
我望一望佢，由於我對佢無咩感情可言，就算佢嚟探我，我都唔想理佢。
　
而阿傑見到我咁，竟然露出令人心寒嘅笑容，佢不斷欣賞我嘅皮膚，雙眼好似見到寶藏咁碌到大一大，然後輕聲對我說：「你燒到啲皮膚凹凹凸凸，仲見到幾條紅根郁下郁下，真係好特別，原來燒傷就會變成咁，嘻嘻！」接著，阿傑閉上眼，再近距離大力用鼻索一下，然後精神地說：「份燒焦味仲喺到！好爽呀！」
　
我本來就覺得佢份人古古怪怪，呢幾下舉動比著平時嘅我一定將佢打到半死，但呢刻嘅我竟然無任何情緒，連嬲都無，只係咩都唔想理，猶如一個已死嘅人。
　
因為我覺得對比靜妍對我嘅恐懼，呢種侮辱算得係咩意思。
　
「你成日喺醫院一定好悶，就好似我當年比你地打到唔敢返學，日日都喺屋企瞓……所以我帶咗個朋友嚟陪你！」然後阿傑周圍望下，見無人留意佢之後，就將一個好似手掌咁大嘅紙紮公仔塞落我張被入面。
　
當我見到「紙紮」放咗落我張被入面，我激動得不斷發出叫聲，再用一個兇狠嘅眼神瞪住佢，示意佢叫即刻同我拎返個公仔出嚟！
　
「你唔好咁激動住先喇！我都知你好開心！要多謝我就遲啲先！唔阻你！你慢慢抖下喇！嘻嘻！」說罷，阿傑就轉身走人。
　
我不斷搖擺身體意圖想掃掉個公仔出嚟，但我一郁就頓時感到極大痛楚，令我痛不欲生。護士見到我咁都叫我唔好再亂郁。
　
呢刻我咩都做唔到，委屈到喊出嚟，我連將一個紙紮公仔拎走嘅力量都無，我真係想死咗去。
　
…………
　
夜晚，醫院一片寂靜，情緒稍為冷靜落嚟，我呆呆咁望住天花板，諗返起我自焚嗰晚發生咗咩事，我好似被鬼迷咁，無啦啦迷迷糊糊咁走返屋企，又迷迷糊糊咁將白電油淋喺自己度……
　
但雖然當時意識模糊，但我仍然好記得我被水淋熄時，見到老婆傷心咁企喺廁所門到望住我。
　
係佢救咗我？老婆，我真係無用，明明係你頭七回魂，我竟然令到你咁擔心同失望。
　
突然間，我見到老婆企喺我身旁，一臉憂鬱咁望住我。我望一望佢，可能日有所思，夜有所夢，竟然比我發夢見到老婆。
　
「老公，對唔住。」老婆開口了，第一句就係對我道歉。
　
道歉嗎？點解要道歉，要道歉嘅人應該係我吧。
　
老婆慢慢伸手輕輕摸摸我隻手，但我竟然無感到絲毫痛楚，而係感受到老婆嘅溫暖體溫，令我有一種舒服嘅感覺。
　
個天可能可憐我，安排老婆同我夢中相見吧？嘿，總算待我不薄。
　
老婆然後輕輕摸一摸我臉容，更流下眼淚，十分傷心。
　
老婆，對唔住，你一定認唔到我吧？畢竟連靜妍都唔願意接受我呢個臉容。
　
「老公，我地一家人受到紙紮嘅詛咒先攪到咁，靜妍大個咗之後會遇到更大嘅挑戰，你一定要好好保護我地個女，知唔知呀？」
　
靜妍大個會有更大挑戰？老婆預測到將來個女會出事？
　
不過，對唔住老婆，我攪成呢家咁已經無可能再保護到靜妍，我已經變成廢人，咩都做唔到。
　
老婆輕輕吻了我，然後說聲：「係我害到你同個女咁，我甘願做陰間嘅奴隸，換返你嘅皮膚返嚟。」
　
奴隸？咩陰間奴隸？老婆點解要咁講呀？老婆？呀？點解我講唔到嘢？好想安慰老婆，好想伸手抹掉你流緊嘅眼淚。
　
老婆最後說聲：「好好照顧個女。」然後慢慢消失了。
　
見到老婆慢慢消失，但我就無辦法出聲， 甚至連身體都無得郁動，感覺好似被鬼壓住咁。突然間，我覺得我被入面有樣嘢爬緊出嚟，係蟲？究竟係咩嚟？
　
然後無數個紙紮公仔突然喺我被入面出現了，嚇得我即時大叫，但卻叫不出聲。
　
一個……兩個……三個……目測已經有三十幾個手掌般嘅紙紮公仔不斷爬到我身上。
　
係阿傑留低嘅紙紮娃娃！
　
其中一個紙紮娃娃跳上我塊臉，然後用一把流利嘅普通話說：「你老婆已經答應了，作為交換條件，我們現在來幫你換皮膚。」
　
換皮膚？隻嘢究竟想點？
　
轉眼間，一大堆紙紮公仔已經佈滿我全身，然後露出令人心寒嘅笑容。
　
「給我拆！」其中一個明顯係佢地大佬，一聲令下，各紙紮娃娃開始拆我嘅紗布，然後鑽入我皮膚裡面，呢種痛，比起護士幫我換藥更加痛，但我叫唔到，又郁唔到，只能夠默默承受呢種痛苦。
　
最後我痛得失去意識昏迷了……
　
直到第二朝早，護士想準備幫我換紗布，驚見我全身紗布都被撕開，更驚訝嘅係，我皮膚竟然慢慢好起來，於是連忙急召醫生，而一輪嘈雜聲音下，我慢慢醒來。
　
見到身邊有好多護士醫生圍住我檢查，佢地臉上充滿疑惑，但又為我高興，於是主診醫生對我說：「我地發現你皮膚竟然慢慢回復，我地都解釋唔到咩原因……但點都好，你應該好快出院。」
　
聽到醫生咁講，我即刻要求要鏡睇下自己個樣，而護士即時緊張地搵鏡比我。
　
一照之下，我臉上已燒焦的疤痕竟然消失了，雖然仍然幾條紅痕外，但我幾乎回復面貌。
　
我頓時醒起老婆琴晚出現講過，佢同人交易嚟換返我皮膚，原來唔係發夢而係真？
　
雖然我唔知點解咁，但最近老婆頻頻出現嚟幫我，似乎佢知道我陷入危機之中，仲甘願做陰間奴隸嘅代價換我皮膚，亦預示個女將來會有危機，仲希望我可以好好照顧個女，免受紙紮帶嚟詛咒。
　
我傷感得哭成淚人，醫生同護士以為我喜極而泣，但我卻為老婆嘅苦心而喊。
　
……
　
抖咗一晚後，第二日我就已經執嘢出院。我第一個地方就係返番去屋企將個女拎番嚟我身邊。
　
到咗屋企用鎖匙開門後，但發現屋企已經裝修過，亦配咗另一條鎖匙。
　
我不斷按門鐘，屋內嘅外母慢慢開門，當見到係我時驚訝地說：「你做咩出咗院嘅？仲有你啲傷……？」
　
我無回應佢，因為我只係想睇個女。我推開佢走到大廳前，見到阿傑竟然喺到陪緊靜妍玩，而且成地都係紙紮玩具。
　
「你知唔知呢個人叫咩名？ 佢叫傑仔呀！ 而呢個人就係你爸爸！阿明！」阿傑拎住一個手掌般大，貌似自己同我，同著住校服嘅紙紮公仔，然後喺到做話劇，睇到靜妍好入神好吸引。
　
「有一日，阿明帶住成班同學，係咁打呢個傑仔～係咁打！係咁打！打到佢喊哂口！」阿傑邊說邊將自己嘅紙紮公仔不斷用拳頭打落去，攪到個公仔被打到支離破碎。佢竟然將當年佢比我地欺凌嘅故事用紙紮公仔形式呈現出嚟比靜妍睇。
　
我即刻走去拉開靜妍，然後對住阿傑兇惡地說：「你同我即刻走！」
　
阿傑見到我突然出現，一時之間比唔到反應，只係驚訝咁問：「吓？點……點解呀？我地玩得好開心喎！」
　
我捉住佢講：「以前係我對你唔住，係我同班人打到你無再返學，但你都唔洗咁樣嚟攪我個女呀！」
　
阿傑一臉無奈，然後不斷說：「我無呀，我只係陪你個女玩……」
　
「你同我走！即刻走呀！以後唔好比我見到你！」我大叫。
　
阿傑見我情緒激動，即刻收拾返地下嘅紙紮玩具，然後離開。而靜妍可能比我嚇親，走咗去攬住外母不斷喊，而外母見到咁，正想勸我冷靜時，我已經對住急不及待咁向佢發炮：
　
「佢做咩比呢個人入嚟呀？你知唔知佢係嚟做咩架？」
　
外母解釋說：「佢話係你嘅中學同學又係你好朋友，所以佢話想探靜妍同佢玩……我咪比佢入嚟。」
　
「你都唔知你係有心定特登，你知唔知佢喺到同靜妍玩緊咩？紙紮公仔呀！你個女就係比呢啲嘢害死架，我呀！我攪成咁都係呢啲嘢害架！你竟然仲走去比個孫玩？」
　
「我都知唔係拎嚟玩，但靜妍佢真係好想玩，佢日日喊住話要玩，喊到我個心都痛埋，唔比佢玩嘅話，你叫我點算好呀？」外母一臉哭訴。
　
但我無理，我繼續瞪大雙眼連珠炮發：「外父講得岩，你根本就係有問題！你比呢啲紙紮落咗詛咒！你害死你個女仲唔夠，仲想害埋我個女，你真係一個惡魔，你點做人老母呀！」
　
此時，靜妍喊得更大聲，不斷喊住叫我唔好再罵外母。
　
「我聽日就會叫外父幫手湊返，你唔洗指意可以騷擾到我地！」
　
外母本來一臉無奈，但聽到我一講到外父，佢即刻變得好驚，然後不斷求我：「你唔好叫佢湊呀！佢先係攪到我同個女咁咋！你唔好信佢呀！靜妍比佢湊一定比佢害死架！」
　
「你仲想屈外父？你真係無得救！」我搖搖頭不禁相信外母竟然係一個咁嘅人。
　
然後我捉住外母不斷拉佢到門口大叫：「你同我走呀！唔好比我見到你！」接著，推佢出去門外後便大大力關門。而外母則不斷喺門外拍門大叫：「唔好搵你外父呀……求下你！」
　
我將地下剩返嘅紙紮物品通通收起，並整爛佢塞落垃圾袋入面。而靜妍見到我，都已經無之前咁恐懼了，但佢仍然堅持要玩紙紮公仔，於是我將佢鎖落廁所入而反思，無論佢點叫點喊都好，為咗介咗佢惡習，亦唔會比佢出嚟。
　
我決心將靜妍脫離迷上紙紮嘅詛咒，以免老婆死後都要繼續擔心。
　
下午五點，街市入面人來人往，嘈吵非常。剛被阿明趕走嘅阿傑氣衝衝咁走入舖頭入面，然後將喺阿明屋企帶來嘅紙紮公仔通通撕爛，情緒十分激動。
　
「仆街明！！！！你以為自己係邊個呀！！！！敢嚟教訓我！！！！」阿傑不斷踢爛撕爛舖頭紙紮公仔發洩情緒。
　
當阿傑嬲嬲地望住店內嘅無數個紙紮公仔望住佢時候，阿傑愈睇愈唔順眼，於是大叫：「做咩呀！睇我唔起呀！你班用紙造嘅垃圾！」然後隨手拎起幾個公仔不斷撕爛佢。
　
突然間，店內其他紙紮公仔突然慢慢郁動，佢地互相對望，然後望住正在撕爛緊紙紮嘅阿傑。
　
「這個瘋子，想把我們怎樣？」其中一個紙紮公仔竟然用流利普通話出聲。
　
阿傑聽到有人講嘢後，頓時停手，然後轉身一望，心諗邊個喺到講嘢？阿傑只見數個紙紮公仔企喺佢面前，於是行前望一望紙紮公仔，再望望周圍，正想轉身時候，其中一個紙紮公仔竟然伸手將阿傑把口封住，嚇得阿傑大驚，於是用手想將紙紮公仔隻手撕開，但無論點撕點甩開佢，隻手仍然緊緊咁將佢把口封住。
　
「嗚嗚…嗚…嗚……」阿傑不斷掙扎不斷叫喊，但完全發不出來。
　
突然間，其中一個紙紮公仔竟然拎起一把用紙造嘅刀，然後說：「這個瘋子，該去死吧。」
　
阿傑碌大雙眼望住，然後激動地叫喊，只見個紙紮公仔慢慢行到阿傑面前，再用手上嘅刀一下子插落阿傑肚入面，鮮血好似噴泉一樣不斷噴出。
　
阿傑非常痛苦，然後想跑到店外求救，但無數個紙紮公仔一個接一個跳到阿傑背上，亦將阿傑壓倒喺地下，然後一刀又一刀地插落阿傑背上。
　
阿傑不斷捱住刀傷咁痛苦地爬去店口，見到有個師奶喺門口望一望，然後師奶問：「我要兩袋香呀！有冇人呀？」
　
阿傑正想伸手求救時，其中一個紙紮公仔將佢隻手壓住，並繼續用刀一下又一下斬落阿傑身上。
　
「嗚……嗚……嗚……」阿傑痛苦地叫喊，但聲音被紙掩蓋。而師奶見無人回應就轉身離去。
　
雖然好多人經過阿傑門口，但無一個人聽到阿傑嘅求救聲。
　
最後阿傑身中百多刀，瞓喺血泊之中。而紙紮公仔笑著說：「活該的瘋子。」然後所有紙紮公仔都慢慢退後一角， 一動也不動地望住阿傑條屍體。
　
…………
　
「叮噹…叮噹…」門外鐘聲響起。將我從睡夢之中驚醒，起身時候即時望望身邊嘅靜妍，見佢瞓得好淋，我就放心。然後我再落床開門。
　
開門後，見到幾個警察，我問：「咩事？」
　
原來外母今朝早六點，喺屋企跳樓身亡，亦留低一封遺書比我。
　
《待續》
　
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
今集超多字，大家可以慢慢睇喇！
我知道唔會篇篇都超過7000 like嘅，所以我勇敢地承諾多次，如果呢篇又超過7000like，我會即刻打文！
　
記得狂like 狂留言 狂share！你地每個留言我都會睇！
　
另外，未買書嘅讀者，希望可以支持我
如果多人買，我就可以貼埋大結局同大家一齊睇！
我嘅網店：https://homingming.boutir.com/
　
知大家買書可能遇上好多問題，但我只有一個人，所以處理好慢，大家耐心等我……感謝大家！

春天濕氣重、蟲蟻多，許多人會趁此時到鵝頸橋找婆婆打小人。在鵝頸橋擺檔廿多年的梁婆婆，年資最久，她每天朝十晚七開檔，揮舞鞋子，唸唸有詞，用肥豬肉擦擦紙紮白老虎來進行祭祀儀式，趕走小人，替客人出一口氣。
戲中描述打小人，多是婆婆兇神惡煞地詛咒小人。現實中梁婆婆卻指打小人其實是求神令小人遠離自己，並非詛咒他人。她拒絕指名道姓地打小人，「有很多人也叫李嘉誠、梁振英，我怎可以照打？」