先說結論，#奇巧計程車 Odd Taxi 是神！是四月新番的扛霸子！好久沒追番追得這麼爽又滿足了。
　
它的類型與題材很難走入所謂主流的大眾向，但能在喜愛這類型的圈子中有極高討論度，集結驚悚推理又帶社會現象諷刺的作品當今能講得如此流暢，太難能可貴，還沒補的人生大遺憾啊。
　
有看到個說法是原本作品長度是預計有２０話，這點說法從廣播劇爆出來的內容來看確實劇情架構與人物關係是足以支撐的，畢竟假三矢和二階堂這塊，尤其是假三矢才是真正核心的開頭，最後劇組經費下則選擇了「不說完也是一種說完」的形式，以１３話作結束，幹停在這邊心有夠癢的！！！
　
最後稍微理了一下之前在廣播劇2.5話中偶像團體三人玩小遊戲
原本是說【順序：大秘密/小秘密/謊話】（附圖下方為5.9貼文）
白狗(二階堂)：殺過人/正在跟搞笑藝人交往/棄屍
花貓(市村)：在做爸爸活/潛規則陪睡/線香
黑貓(三矢)：有整形/在網路上講過成員的壞話/結婚了
　
結果最後廣播劇11.10話＋正片13話得出的卻應該是如下
白狗(二階堂)：棄屍/正在跟搞笑藝人交往/潛規則陪睡
花貓(市村)：在做爸爸活/在網路上講過成員的壞話/線香
黑貓(三矢)：殺過人/有整形/結婚了
　
最純潔的反而是市村wwww 黑貓整個是黑到骨子裡的那種
假三矢黑貓的真面目到底是誰？她又是在跟誰通電話？
我有一個想法是，假三矢跟真三矢應該在某個程度上是有關係的兩人，同時媽媽桑和吞樂應該私下有一腿（從廣播劇推估啦），這樣也能解釋錄音筆會在居酒屋的原因
　
再來，從11.10話也能知道假三矢有收到長頸鹿已經公開自己的錄音一事，13.13話聽出媽媽桑(妙子)被人幹掉後，錄音筆另一頭傳出「下一個就是在竊聽的你」，長島一個危字亮起，最後再轉到13話結尾作上小戶川的車，小戶川頭上又一個危字。
　
最後一個是長島到底有沒有被幹掉？
有兩個可能性
其一、長島掛了，因為最後人形態沒有他的畫面
其二、長島沒掛，最後和野豬柴垣重新組團，論點是馬場跟長島兩個人身材都是高個兒，然而實際人形的馬場並沒有想像中帥氣，二階堂會看上我實在不太相信，所以可能就是長島
　
以上，詳細正確一點的可能要等13.13話熟肉出來，生肉啃起來啃得不是很順手w

【屍人屋苑】病毒變種、喪屍橫行，一個屋苑困獸鬥的故事……（完）
　
一切實在發生得太突然。當隻女喪屍撲低我準備咬埋嚟嘅時候，我真心以為自己死硬……
　
但佢咬唔中，可能係我掙扎之下改變咗佢咬嘅位置，又或者一瞬間嘅反射動作避開咗。總之，大難不死必有後福，我即刻出盡九牛二虎之力將佢推埋一邊。
　
「嘶啊啊啊啊啊！」但女喪屍依然死心不息，佢同我幾乎係同一時間撐起身。
　
我本身想抽刀，但佢早一步撲埋嚟，我剩低一隻左手擋唔住，結果俾佢撞埋去煮食爐嗰邊。佢再一次想咬埋嚟，但我右手正好掂到易潔鑊嘅手柄，用力握實向住女喪屍嘅頭直揮過去。
　
碰！
　
一聲悶響，女喪屍俾我直接打中失去平衡、動作亦都慢咗落嚟。見狀，我用一手一腳將佢推出廚房。見拉開咗一個安全距離，今次我順利抽出刀，下次攻勢一定可以殺死佢……
　
「啊啊啊啊啊啊啊！」
　
「唔好去呀！」
　
「琪琪！？」
　
女喪屍、阿俊、琪琪幾乎係同一時間大嗌。我唔知發生咩事，當刻只係一心想解決眼前隻女喪屍。但就喺佢再次衝埋嚟嘅一刻，突然有人擋喺我同佢之間……
　　　
－－－－－－－－－－－－－－－－－－
《屍人屋苑》前三回：
https://www.facebook.com/pg/Echo.of.Heart/photos/?tab=album&album_id=1935947799870360&__tn__=H-R
－－－－－－－－－－－－－－－－－－
　　
「媽！」喺琪琪，佢背對住我用力抱住隻女喪屍，「唔好啊！」
　
我當刻已經落刀，刀口只係差一吋就會插中琪琪嘅後頸。
　
「妳搞乜嘢呀！？」我當然係好難以置信。
　
但琪琪冇理我，佢出盡全身力量將女喪屍慢慢抱後。可以見到隻女喪屍依然係睜大雙眼望住我，雙手不斷揮舞、十指瘋狂咁亂抓，血盤大口又開又合。明明身邊就有一個可以咬嘅人，但佢依然將目標放喺我身上……
　
「媽！夠喇……我已經夠喇！妳入房先……求下妳……」
　
「真係神奇……」阿俊慢慢行入廚房，一直茫然咁望住琪琪同女喪屍，「隻喪屍居然唔會咬琪琪……呢種情況你以前有冇見過？」
　
「冇……」我冷冷咁回應，殺意依然係充斥住我腦海，「唔得，我要過去殺死佢……」
　
「喂！」阿俊伸手想拉住我。
　
「我差啲死呀！」我大聲咆哮，「差少少就會俾佢咬死！你唔係為咗條女搞到傻咗呀！？」
　
「我明……」
　
「你明條撚！」我一直盯住嗰兩母女，睇嚟琪琪係打算推佢入房。
　
「反正你都打算過去啦？」阿俊嘗試說服我，「呢邊不如交俾我處理？」
　
雖然好想拒絕，不顧一切咁衝埋去一刀插落女喪屍嘅天靈蓋。但而家咁樣俾打窒咗條氣，冷靜落嚟，恐懼感瞬間散播全身每一個角落。我可以感覺到雙手喺度震緊，背脊亦都出滿晒冷汗……
　
「你有冇受傷？」阿俊輕輕拍一拍我肩膀。
　
「唔好掂我！」我反應非常大，轉身行埋去窗邊，先搓一搓雙手，然後開始綁繩，「你自己望下個雪櫃……條女係癲㗎，你留喺度肯定死硬！」
　
「嗰條屍就係王伯。」琪琪返到嚟開聲回應，嚇到我成個人震一震。
　
我即刻轉身，再一次舉起刀，好驚隻女喪屍會再一次出現。
　
「就喺你哋闖入屋苑嗰一晚，王伯為咗避喪屍所以上咗嚟呢度。本來頭幾日都相安無事，係直到前晚，佢突然入我房……仲想強……」琪琪顯得相當痛苦，「……強姦我……」
　
「所以妳就殺咗佢？仲分佢屍？」我質問。
　
「唔係我……係我媽……趕到嚟殺死佢……然後……然後我……」
　
「嗰個唔係妳阿媽，係喪屍！妳媽已經死咗！」我咆哮，「哦……我明喇，妳之所以放王伯條屍喺雪櫃，就係想拎佢嘅肉嚟食……」
　
但因為斷電嘅緣故，雪櫃早就冇咗冷凍功能。但放入去多少可以阻隔氣味，所以我同阿俊先一直注意唔到。
　
「我唔係……我只係想……吖吖吖吖吖吖吖吖！」琪琪尖叫一聲，然後跪喺地上面抱住頭。
　
「你而家明喇！？」我望向阿俊，「條女分明有妄想症，覺得佢阿媽仲未死！佢仲要食人！我哋咁耐以嚟都冇試過咁做！」
　
「夠喇，老超……」阿俊跪喺琪琪旁邊，對住我搖搖頭，「你過去先喇。」
　
「算，你死你事！」
　
我用力推開廚房窗，先探頭望出去，可以見到外面有個固定咗嘅晾衫架。雖然唔敢保證踩上去穩陣，但只要事先綁好繩，就算發生咩事都應該唔會跌落去……
　
「我過去啦！」當一切準備就緒之後。我先回望阿俊一眼，佢依然安慰緊琪琪，「如果我跌咗落去，你就喺度同佢長相廝守啦！」
　
說罷，我小心翼翼咁爬出窗外面。一開始先坐喺窗邊，右腳稍微用力踩一踩晾衫架，感覺穩陣先慢慢起身，過程一直扶住窗框，唔敢將重心放喺下半身、更加唔敢直望落下方……
　
我開始感覺到掌心出汗，又擔心自己腰繩綁得唔夠緊……廿五樓，跌落去一定係粉身碎骨……我伸出左手抓住另一室嘅窗邊，好彩呢一戶嘅主人本身冇閂好窗，所以免去一層功夫。
　
我拎出預先準備好嘅爆窗工具，只要解開埋窗框嘅鎖就大功告成。呢三個月實際上已經爆過好幾次，可以話係駕輕就熟……
　
終於，「嘭」一聲爆開窗鎖之後，我即刻用力推開窗框，然後毫不猶豫直接爬入去隔離屋嘅廚房。雖然最難嘅部份完成咗，但我都未敢放鬆心情，因為屋裡面絕對有可能隱藏其他危機……
　
「Hello！？」我邊解開腰繩邊大嗌，同時用刀尖擊打廚房嘅瓦磚。
　
假如屋裡面有人或者喪屍嘅話，聲音咁大係肯定會聽到的。
　
但直到我行出廳，依然冇出現任何異樣。見係咁我終於鬆一口氣，行埋去梳化成個人瞓喺上面。當我望住天花板嘅時候，有一瞬間真係諗過乾脆成世人留喺度就算……
　
但我知道冇可能的。只要捱埋呢兩日，我先可以正式脫離呢個人間地獄。
　
休息咗大約五分鐘，我開始檢查屋入面嘅每一間房。呢間屋嘅主人係一對中年夫婦，佢哋仲有一個睇落似係中學生嘅仔。一啲都唔意外嘅係，間屋果然係冇晒食物。所以估計佢哋應該係為咗搵糧食而被迫離開屋企，結果就再返唔到嚟……
　
類似嘅故事，呢三個月應該發生喺好多家庭身上吧？
　
檢查完畢後，我重新返到去廚房，然後開口問：「阿俊喺唔喺度？」
　
「喺度。」阿俊好快就回應：「你嗰邊咩情況？」
　
「安全，你係咪而家過嚟？」我執返起地下嘅布繩。
　
「睇嚟你唔記得咗我哋要用電話鈴聲吸引班喪屍？」阿俊無奈咁講。
　　
喔，因為頭先根本係怒火中燒，所以確實冇咗件事。
　
「所以點都要有人留喺呢邊，個計劃先可以順利進行。」佢接住講：「你肯定係信唔過琪琪，所以一定係等我嚟。」
　
「你點解硬係要幫佢？」我問：「隻喪屍一直喺屋裡面仲要冇鎖好門，佢根本一早想我哋死。」
　
「真係咁嘅話，佢一開始就唔會千叮萬囑叫我哋唔好入廚房。」阿俊唔同意，「老超，唔怕老實講，頭先見琪琪攬住佢阿媽嘅時候，我真心覺得個畫面好感動……」
　
「吓？」我錯愕。
　
從我呢個受害者嘅角度睇，個畫面根本係又畸形又嘔心，諗返就覺得心寒。
　
「當初我阿媽變成喪屍嘅時候，佢先冇對我咁好。如果我唔係走得快，應該一直就成為下面班喪屍嘅同伴。所以，我真係好同情佢……佢身為一個女仔，可以捱到而家真係唔容易。」
　
我冇回應，而係望返大廈最底，喪屍數量依然係有增冇減。其實到而家，我都幾佩服自己有勇氣爬過嚟。
　
「係嘞，尋日同老豆傾電話嘅時候，佢留低咗個號碼俾我，話必要時可以用嚟聯絡聽晚揸直升機嗰班人。既然我部電話聽晚就會玩完，我想你幫手一齊記低個號碼，話唔埋之後有機會用得著。」
　
「講嚟聽下。」我裝作唔在乎。實際係趁佢見唔到拎出自己部電話，打開然後記低。
　
確認好聽晚九點半行動之後，我哋就各自返去休息。雖然阿俊講到自己好同情琪琪，但我始終唔係佢……我冇辦法原諒一個瞞住我嘅人，何況，我差少少就會俾佢阿媽咬死……
　
所以，我暗暗作出咗一個決定……
　
至於呢個決定最後會引至咩結果，就要交俾阿俊嚟決定。
　
*
　
【阿俊視角】
　
轉眼間就嚟到關鍵嘅一晚。半個鐘之後，直升機就會降落喺屋苑嘅天台。
　
早喺九點半之前，我已經預先較好電話鬧鐘，再將電話擺喺屋最入嘅嗰房間。
　
「媽，我要走喇。」行動之前，琪琪不忘向倒數第二嗰房間裡面嘅「媽媽」道別，睇得出佢仲係依依不捨。
　
……嗚……
　
尋晚我同琪琪傾咗差唔多一整晚，我幾乎係將自己三個月以嚟嘅故事原原本本咁話俾佢知──我阿媽係點死、我係點遇到老超佢哋、點解會剩低我哋兩個，最後又點解會避到嚟呢個屋苑……
　
當然，佢都有同我提到自己嘅故事。雖然三個月以嚟都係留喺屋企難免有啲乏味，但呢個都叫做係好開始……
　
雖然只係一晚，但我感覺同佢嘅距離一下子縮減咗好多。琪琪佢本性善良，正如我所講佢根本冇心害人，只係一直冇辦法放低「媽媽」。只要畀多少少時間，佢一定可以恢復過嚟……
　
而安全島，無疑係一個最好嘅療傷之地。
　
「妳搞掂就入廚房。」我企喺大門前同佢講：「之後等我指示……」
　
雖然隔住大門，但我可以聽到外面班喪屍開始躁動起嚟，就好似感覺到我哋即將會放佢哋入嚟咁。
　
我望住錶，等到最後十秒嘅時候，我先深呼吸一口氣，然後慢慢打開大門……
　
「嘶啊啊啊！」即刻有隻喪屍注意到呢邊然後用力撞過嚟，但結果當然係撞埋鐵閘。
　
雖然咬我唔到，但呢個舉動卻將其他喪屍一齊吸引過嚟。我鼓起最大勇氣解開鐵閘鎖，再輕輕用力拉開少少……
　
下一秒，最入嘅房間響起電話鬧鐘，而我就直奔入廚房。
　
「閂門！」我壓低聲同琪琪講。
　
佢即刻照做，臨閂門之際，可以見到班喪屍已經開始湧入屋。接住落嚟只可以寄望鬧鐘真係可以引晒佢哋入去，清空走廊……
　
我同琪琪合力將雪櫃擋喺門前，然後就照計劃，先由我過去……
　
「妳真係冇問題？」我綁繩嘅時候再問一次，「妳唔驚我過到去之後唔理妳？」
　
「唔驚，」琪琪搖搖頭，「我信得過你。」
　
確認繩綁得夠穩之後，我即刻把握時間爬出窗外。雖然我有少少懼高症，但呢刻已經冇得驚了。我踩上晾衫架，一個反身想直接爬過去隔離屋……
　
「吓？」
　
點會估到，隔離屋嘅窗框居然重新鎖上咗。而老超就企喺窗框後面冷冰冰咁望住我。
　
「老超你搞咩！？」我當然好驚訝，「做乜鎖返住個窗框……」
　
「好彩係阿俊你先過嚟，」老超舉起一條鎖匙，「咁成件事就易搞好多。」
　
「你到底玩咩呀！？」
　
「我冇玩，我要你拋低嗰個癲女人……只要你肯咁做，我就會開鎖俾你入嚟。」
　
「阿俊，發生咩事！？」可能見我留喺外面仲未入到屋，琪琪緊張咁問。
　
「冇事，妳千祈唔好出聲！」我抓實窗框盯住老超，「如果我唔應承呢？」
　　
「咁你哋就一齊留喺嗰邊喇！」老超呢個態度明顯係認真，「呢個女人咁痴線，就算我哋可以去到安全島，終有日都會俾佢害死！」
　
「你諗得太嚴重……」
　
「因為差啲死嗰個唔係你！」
　
「阿俊，班喪屍……班喪屍好似想撞入嚟！」琪琪慌張咁大喊。
　
見到呢個情況，我決定豁出去，直接喺外面解開腰繩，然後拋俾琪琪。
　
「琪琪，妳照我尋晚教妳咁，快啲綁繩爬出嚟！」
　
「阿俊，夠喇！放棄佢喇！」
　
「我唔會！老超，你仲記唔記得阿東？」我講到呢度伸隻手入去屋入面，「如果……我哋每一次都選擇見死不救嘅話，我哋同下面班喪屍又有咩分別？」
　
老超起初聽完係有少少動搖，佢先望咗眼手上嘅鎖匙，最後……
　
隨手將條鎖匙掉喺地上面。
　
「當然有分別……」老超邊講邊退後，「就係我依然生存緊。」
　
「喂，老超！」我終於忍唔住咆哮，「你咪走呀！」
　
但老超並冇停落嚟，一個轉身就跑出廚房。
　
「吖！？」我見到琪琪已經準備爬出窗外面，睇得出佢相當恐懼。
　
而同一時間，廚房嘅拍門聲亦都越嚟越響，班喪屍好快就會破門而入……
　　
「阿俊……到底點解會咁？」琪琪絕望咁望住我。
　
唔通，呢個就係我哋嘅命運？
　
*
　
【老超視角】
　
假如頭先係琪琪先爬過嚟嘅話，其實我係打算直接推佢落樓，一了百了。所以見到係阿俊先過嚟嘅時候，其實我仲鬆咗口氣……
　
但佢最後都係唔肯放棄嗰個女人，既然係咁，唯有等我放棄佢哋。
　
反正，早喺一星期之前我已經有意欲咁做了，只係佢老豆嘅電話改變咗我嘅諗法，所以而家只係回歸初心。
　
可能你哋會問，冇咗阿俊，直升機班人會唔會唔肯接我？我當然有認真考慮過呢點，事實上已經考慮咗成晚。
　
當我打開H室嘅大門，外面走廊果然係冇晒喪屍，睇嚟真係俾電話鬧鐘引晒入屋。我迅速咁推開後樓梯門，雖然聽到下方有喪屍叫聲，但我嘅目標係上層……
　
我一連跑咗好幾層，最後順利跑到天台。就好似怪我狠心一樣，天竟然開始落起滂沱大雨。但對於留喺窗外面嘅阿俊同琪琪嚟講，呢場雨無疑係雪上加霜……
　
我任由雨水拍打身體，一直提防住樓梯門，驚會有喪屍上嚟。等咗大約幾分鐘之後，終於可以聽到旋翼轉動嘅聲音。我抬起頭，見到有道光慢慢靠近。只要再過多陣，我就可以離開呢座大廈……
　
我先留喺安全位置，等到直升機停低落嚟先至敢行近，邊行邊大喊：「太好喇，我已經等咗你哋好耐！」
　
就喺下一刻，直升機一邊廂門打開，有個人舉住長槍指向我。
　
「你就係阿俊？」
　
我曾經有一秒諗過乾脆真係扮阿俊，但一諗到之後肯定會穿煲，最後都係「實話實說」：
　
「唔係，我唔係阿俊！」
　
「咩話！？」因為場雨太大，所以槍手聽得唔清楚。
　
「我唔係阿俊！阿俊佢已經死咗，但佢臨死之前留低咗個遺言俾我，叫我要親口同佢老豆講，所以你哋一定要送我去安全島！」
　
假遺言嘅內容我當然已經諗埋，但如果佢哋唔追問，我都唔會喺呢個緊張關頭慢慢解釋。呢刻，只希望佢哋會上當……
　
「好喇！」槍手揮一揮手，「快啲上嚟！」
　
我聽完當然好激動，正想快步走過去……
　
「喂，喪屍！你後面有喪屍呀！」槍手突然大嗌。
　
我一聽到警告即刻轉身，果然有隻男喪屍偷偷跑到我背後，因為直升機太嘈所以完全察覺唔到。好彩我反應得切，巧妙咁避過佢一撲，再順勢舉刀直插落佢後腦……
　
但危機仲未解決，有更多喪屍出現喺後樓梯位置，呢個數量我冇可能一個人解決。
　
「可惡！」我激動得咬牙切齒，「點解早唔嚟遲唔嚟，偏偏而家先出現？」
　
但令我更絕望嘅係，直升機嘅旋翼居然重新轉動起嚟。我望過去，見到直升機開始急速爬升。明顯係機師感覺到危機，所以唔敢冒險等埋我……
　
「喂！等埋呀！」
　
嘭嘭嘭嘭嘭嘭嘭嘭嘭嘭──！
　
連珠爆發嘅槍聲劃破長空，我下意識抱住頭，再擰轉身，見到班喪屍一隻一隻咁中槍倒地……
　
「好呀！就係咁……！」
　
嘭─────────
　
突然，右腹一下劇痛令我成個人失平衡跪喺地上面。我曾經有一刻以為係隻男喪屍未死，然後俾佢從後偷襲。但唔係，佢依然瞓喺地上面，就同其他喪屍一樣……
　
「……好痛……」
　
我伸手摸向右腹，可以摸到溫熱嘅液體不斷流緊出嚟。當血紅色嘅液體落到地板之後，隨即被雨水所沖淡……
　
「……唔係啩……」我有個好壞嘅念頭，但始終唔想承認。
　
唔通……我係……中槍……？
　
終於，一陣強烈嘅暈眩感襲來，我即刻支持唔住瞓落地。明明係好想起身，好想盡快離開呢個鬼地方，但身體卻開始變得僵硬起嚟。只能勉強向前爬，忍住痛楚不斷爬……
　
……可惡啊……好痛……點解會咁痛……
　
眼皮開始變重，但我知道自己唔可以瞓。就快了，就快會爬到後樓梯，之後我要即刻搵個地方止血……咦？
　
但就喺下一刻，有一個身影慢慢出現喺門前，我睜大雙眼想望清楚……
　
結果，出現眼前嘅，係一個未完嘅惡夢──
　
係琪琪嘅「媽媽」，佢居然嚟到天台，注意到我之後用緩慢嘅步伐行過嚟……
　
……等等先……
　
「……嗚……」
　
……搵人開槍……開槍幫我……喂……
　
一步、一步、又一步，琪琪「媽媽」嘅目標非常明確……
　
救命……救命……啊……好痛……
　
「……開……槍……」我嘅聲音變得好沙啞，「……救……」
　
終於，佢嚟到我面前，慢慢跪低。灰白空洞嘅雙眼裡面可以搵到我絕望嘅身影。
　
「嘶啊！」
　
*
　
*
　
*
　
感覺，好似發咗一場好耐嘅夢。
　
夢入面我去咗好多個地方，先係醫院、然後到地鐵站、辦公室、巴士車廂、最後係一間超市……過程中我遇到好多陌生人，每一個人都係用驚恐無比嘅眼神望住我。
　
尖叫、慘叫、最後恢復平靜……每次都係重複呢個輪迴。
　
記得，夢嘅最後，我去到一個中年女人面前，佢越望就越熟口面，唔知喺邊到見過。佢不斷走，最後俾我迫到去一個角落先嘗試反抗……
　
我本來差少少就會記得佢係邊個。但偏偏喺呢個時候，有一男一女嘅叫聲嘈醒咗我……
　
「係邊個？」我睜開雙眼。
　
返到現實之後，第一個感覺係全身上下都濕晒。慢慢撐起身，自己依然身處喺屋苑嘅天台。昏迷之前最後發生嘅事，係我好似中咗槍，然後琪琪嘅媽媽出現……
　
諗到呢度，我即刻望一望附近，見唔到嗰隻喪屍嘅身影，即刻鬆咗口氣……
　
「啊……」
　
我再摸一摸中槍嘅右腹位置，血好似已經冇再流，亦都再感覺唔到痛楚。
　
係好返咗？抑或我本來就冇中槍？越諗就越覺得神奇。見直升機已經飛走咗，我本來打算搵個安全地方避下。但就喺下一刻，有一對男女從後樓梯門走出嚟……
　
係阿俊同琪琪。
　
「嗄……嗄……」阿俊喘晒氣，見到我嗰刻不禁睜大雙眼，「老超……」
　
「估唔到你哋竟然可以上到嚟。」我無奈一笑，然後慢慢行過去。
　
「阿俊，佢係咪……」琪琪一臉驚慌，類似嘅表情好似喺夢入面見過。
　
「嗯，等我嚟。」阿俊擋喺琪琪面前，「老超，估唔到呢個就係你嘅下場……或者，呢個就係報應？」
　
「報應？」我不解，繼續慢慢行過去，「你到底講咩……」
　
就好似聽唔明我講咩一樣，阿俊居然舉起刀，而且擺出準備對我落手嘅姿勢。
　
「喂，既然情況變成咁，大家咪坐低好好傾下囉……」我就好似唔驚佢會落手咁，繼續行，「我有電話喺手，可以隨時打去叫直升機返嚟……」
　
但我錯了。
　
阿俊未等我講完就直衝過嚟，我完全反應唔切，結果俾佢一刀插落我頭蓋。
　
WTF？
　
發生咩事？
　
中刀後，我再一次倒後瞓低，想郁但係完全郁唔到。
　
阿俊，點解你要咁做？
　
為咗條女，你竟然可以咁狠心？
　
「阿俊，呢度有部電話……開到仲有電！」琪琪激動咁講。
　
「呢部電話係老超嘅，佢之前仲話冇電，原來係一直呃住我……琪琪，只要有電話，我就可以試下打去叫直升機返轉頭……」
　
啊，頭痛。
　
越聽就越頭痛，點解會咁……我係咪仲發緊夢？
　
照道理，頭中刀係冇可能頂到咁耐。冇錯，所以我肯定仲發緊夢……
　
「老超，」打完電話之後，阿俊跪喺我旁邊講：「我諗你將我同琪琪鎖喺窗外面嘅時候，應該估唔到最後嘅結果會係咁？」
　
結果……係咩結果？
　
「本來我真係好絕望，覺得自己死硬，差在係跌死定係俾喪屍咬死……但琪琪嘅媽媽居然救咗我哋。」
　
*
　
*
　
*
　
【回憶】
　
老超走咗之後，我不斷嘗試用蠻力撞開窗框，但結果都係唔成功。而且天仲要開始落雨，令到情況變得越嚟越惡劣。
　
「可惡！我應該一早要準備多套工具！」我自責咁講。
　
「阿俊……班喪屍已經爆咗道門！」琪琪驚慌咁講。
　
因為我身上已經冇綁繩，所以望過去嘅時候都唔敢太大動作。果然，廚房嘅門已經爆開咗個大窿。呢刻鬧鐘已經停咗冇再響，所以班喪屍開始將注意力放到我哋身上……
　
「妳過嚟！」我將琪琪拉近過嚟，喺佢耳邊講：「聽住，我哋可以頂住……等班喪屍走，又或者爬窗嘅時候跌落街……」
　　
但呢個過程班喪屍隨時會搞到琪琪身上嘅繩，又或者跌落去嘅時候撞到晾衫架最後整斷。無論點諗都係絕望，死路一條……

「嗚……」琪琪終於忍唔住喊起上嚟。
　
碰──當我聽到雪櫃跌落地嘅聲音，感覺就好似開始咗我人生最後嘅倒數階段……
　　
「……媽？」但就喺呢個時候，琪琪竟然睜大雙眼望返去廚房嗰邊。
　
「咩事？」我壓低聲問。
　
「係媽！」
　
「妳做咩！」見琪琪試圖想爬返入廚房，我當然想阻止佢，「喂！」
　
但晾衫架突然晃動一下嚇到我唔敢再亂郁，結果只可以眼白白睇住佢爬入去，一邊解開腰繩一邊行到門……
　
呢刻，我再見唔到門窿位置有喪屍手，聽落亦都冇再撞入嚟。見晾衫架好似越嚟越唔穩陣，一個大膽嘅念法突然浮現。我決定跟琪琪返到廚房，然後一齊望出門外……
　
班喪屍居然離開緊，一隻又一隻從大門行返出外面走廊。明明我同琪琪就喺門嘅另一邊，但佢哋完全冇望過嚟。
　
直到，最後一隻喪屍經過。佢先望咗我哋一眼，然後就轉身行出屋……
　
「……媽……」琪琪掩住嘴巴，淚水就好似湧泉一樣不斷咁流。
　
見到呢一幕，我當然都覺得好震撼……
　
「……再見喇……媽……」
　
然後，重拾希望嘅我哋，好自然咁牽住手，準備離開呢座屍人屋苑。
　
*
　
*
　
*　
　　
「雖然唔知實際係點做到，但琪琪嘅媽媽確實係引晒班喪屍走。」阿俊繼續講落去：「有啲應該係上咗嚟天台，但大部份都落返去樓下……我同琪琪見安全之後，先至行樓梯上嚟。」
　
荒謬！冇可能會咁！一隻喪屍點可能做到……
　
「假如我當時由得你殺死佢，或者結局就會好唔同。」阿俊搖搖頭，「點都好，老超……希望你可以安息。」
　
說罷，佢就用手幫我合埋雙眼。
　
「阿俊……佢……點解會變成喪屍？」琪琪問。
　
「我都唔知……直升機到喇。」阿俊回應：「琪琪，之後嘅日子就等我嚟保護妳。」
　
「嗯。」
　
我好想開聲痛罵佢哋、詛咒佢哋。但我講唔到任何嘢、見唔到任何嘢、身體亦都郁唔到，就好似會永遠被困喺呢個軀殼裡面……
　
一秒……
　
一個鐘……
　
一日……
　
一個星期……
　
………………
　
…………
　
……
　
……到底過咗幾耐？
　
終於，我腦海裡面所有複雜嘅思想、昔日嘅記憶，都隨住時間流逝而沖走。
　　
最後只係剩低一個單純嘅欲望。
　
　
　
……肚餓了。
　
（完）
　
　
《屍人屋苑》嘅主劇情到呢度正式完結，不過眼利嘅讀者應該會注意到故事入面仲留咗少少伏筆。我會睇反應決定下寫唔寫多幾篇外傳故事。😂 呢集足足成八千字，睇完記住幫手留個 LIKE 同分享出去呀！
　
各位感謝各位一直嘅支持，有讀者 PM 話好想呢本出書，我會認真研究下可能性！
　
最後，下面有嘢想講！見過嘅讀者可以直接無視，當然都希望可以繼續支持。
　
－－－－－－－－－－－－－－－－－
　
【地方的無默媽資助計劃】（試行中）（非呃嬲 post）
　
呢個計劃其實上年年初已經構思緊，但因為遇上反修例運動，覺得唔係適合嘅時間所以就一直擱置，結果到今年就撞正武漢肺炎。嚴峻疫情下，大眾書局突然宣告結業，令我下定決心要推出呢個計劃。
　
其實喺香港寫作真係好難，之前喺唔同場合都提過，作者透過賣書得到嘅錢真係好少好少。呢點絕對唔係出版社同書局嘅錯。講到底，一本書賣出去，最大筆錢係落咗去地產商身上。所以喺呢個大環境下根本培養唔到作者，一係要兼顧正職結果寫得太慢漸漸被淘汰，一係就主力寫但最後慘到要靠光合作用嚟維持生計……
　
所以我見到好多唔願意放棄嘅作者都開始轉型，一係自己賣書寄書、一係換個平台發展、一係直程轉第二種模式創作。而我暫時都係想寫，堅持寫落去。
　
有時見到讀者們話想支持作者，心裡面都會忍唔住覆一句：最好嘅方法，其實就係直接資助。既然遊戲平台可以資助，拍片嘅平台可以資助，點解寫作唔得？大家都係提供娛樂，無理由有呢種差別待遇。
　
而家大眾書局結業，大型書局其實就得返嗰幾間，而小型書店本身都經營困難。可以預見將來作者嘅生存空間只會越嚟越細，加上疫情持續落去書展隨時可能搞唔成。可以嘅話我都唔想用到呢種方式，但現階段……只想努力掙扎求存。因為我真係鍾意寫故事，好想一直寫落去。
　
而呢個計劃，就係基於以上種種理由出現。
　
放心，資助並唔係強迫性，有困難而資助唔到係絕對了解、想幫手足先更加係應該、剩係想買書支持亦都絕對歡迎。我唔會因為冇讀者資助而罷寫，亦唔會突然有篇故要畀錢先睇到（呢個平台都做唔到呢個效果）。當然，資助得多絕對會加速寫作速度。而資助金額係隨心而定，即使係一蚊都可以，只要有心就得。
　
當然，我都研究緊一啲方式答謝資助得多嘅讀者──例如聖誕送下聖誕卡、間中送下小禮物、甚至研究緊用資助嘅錢去整廣播劇、桌遊嘅可能性。但因為而家只係試行階段，唔想亂咁開空頭支票，有進展一定會即刻通知大家！
　
暫時只提供 payme 同轉數快兩個平台，會睇情況再考慮其他資助方式。再強調一次，資助唔係強制性，一蚊可以、繼續免費睇都得。只要有心，平時肯留個 like 分享下我都已經心滿意足了。
　
Payme 連結：
https://payme.hsbc/echoofheart
　
轉數快 FPS ID：6065460
　
－－－－－－－－－－－－－－－－－
　
【廣告時間】《無異之初》、《時間守衡者》、《絕命上映》、《絕望走廊》、《絕無轉機》各大書局有售！
　
－－－－－－－－－－－－－－－－－
　
IG：echoofheart

《無異之地》惡夢島（完）
　
其實我可以救到佢的。
　
無論係阻止佢開槍，抑或開槍後嗰短短幾秒鐘嘅關鍵時間。只要我願意出手，或者喺呢一刻，731號依然可以活喺呢個世上。
　
但我猶豫了……而猶豫，令我錯失咗兩次機會。
　
「唉，」我嘆咗口氣，彎低身幫佢合返埋雙眼，「點解你臨尾都要送一條難題俾我？」
　
假如換轉係你，你會願意犧牲一個人，去拯救更多嘅人嗎？
　
731號選擇咗犧牲自己。
而我，亦喺一瞬間選擇咗犧牲佢。
　
我當然可以話，就算救咗佢，佢離開呢度之後都會過得生不如死，孤獨而無助咁去面對呢個世間嘅「惡」。而我亦都冇辦法擺出一副好似明白佢嘅表情，叫佢勇敢去面對……
　
但呢個都只係冠冕堂皇嘅藉口，我心裡面明白，更大嘅原因，係我放棄唔到自己嘅「願望」。
　　
＝＝＝＝＝＝＝＝＝
！！！記住睇到最後，有嘢想講！！！
　
《惡夢島》連載中：
https://www.facebook.com/pg/Echo.of.Heart/photos/?tab=album&album_id=1861298627335278
　
《惡夢，藏在門後》全集：
https://www.facebook.com/pg/Echo.of.Heart/photos/?tab=album&album_id=1342167935915019
　
《極樂謊園》全集：
https://www.facebook.com/pg/Echo.of.Heart/photos/?tab=album&album_id=1736011713197304
　
【廣告時間】《無異之初》、《時間守衡者》、《絕命上映》、《絕望走廊》、《絕無轉機》各大書局有售！
＝＝＝＝＝＝＝＝＝
　　
「你只係再一次證明我係幾咁自私。」我用火機點著一支荒靈木，再掉到731號身上，隨即燒起一場烈火，「兄弟，將來見喇。」
　
之後，我繼續行，一直行。穿過迂迴曲折嘅天橋、走過一式一樣嘅大廈。唔知行咗幾耐，我終於嚟到一條窄巷嘅某道門前。雖然外表睇落好似通去垃圾房咁，但門嘅另一面實際上就係成個惡夢島嘅中心──「魘」。
　
然而，就係我伸手準備開門嘅一瞬間，窄巷嘅另一邊盡頭突然傳嚟一把男聲：
　
「無二，我哋果然冇估錯，你真係喺度。」係清理小隊嘅隊長Match，而399號呢刻就喺佢旁邊。
　
「原來你哋死唔去，」我平淡咁回應：「真係可喜可賀。」
　
「呢段路的確係好驚險，我哋只係大步檻過，但275號同664號就冇咁好彩。」
　
「咁嗰個後生仔呢？」我詐傻咁問，睇嚟佢哋並唔知731號嘅情況。
　
「如果你係指731號……以佢嘅能力，應該係冇可能撐得過。」
　
「明白。」我轉身望返道門，「放心喇，等我搞掂門後面嘅核心之後，呢場惡夢就會結束……」
　
「等陣！」399號喝停我，「我哋已經搵到控制室嘅實際位置！」
　
「控制室，你指嗰座焚化爐？」
　
「唔係，係真正嘅控制室。」Match回應：「我同399號研究過仲有修復嘅可能，只係需要你嘅幫手。」
　
見我冇回應，399號再接住講落去：「喂，你唔係唔記得咗自己嘅任務呀？」
　
「我當然記得。」我合埋雙眼，腦海隨即閃過如初、Abraham博士、嗰一對男女、仲有731號嘅臉頰，「但我改變咗主意。」
　
就喺我講完嘅一瞬間，現場嘅氣氛突然出現微妙嘅變化。唔單止Match同399號嘅情緒，呢種變化仲遍佈窄巷嘅各處……粗糙而明顯。
　
「我可能聽唔清楚，等我確認下，你嘅意思即係打算直接消滅『魘』，唔會同我哋過去控制室？」Match換個嚴肅嘅語氣問。
　
睇嚟，佢哋兩個事前已經做好晒準備，喺窄巷預設好攻擊程序。假如我唔聽佢哋指示，就算霸王硬上弓……
　
「冇錯。」
　
但如果佢哋以為咁做就可以成功，又未免太過天真。所以只可以假設佢哋仲有其他隱藏手段……
　
聽住喇，永遠唔好低估對手，就算異能等級只有五或者六，都可能會擁有令人意想不到嘅殺手鐧。何況佢哋嘅目標並唔係殺死我，所以難度一定係稍為低啲。
　
「你應該知道，呢度嘅命運係同仇小姐連成一線。」Match威脅道。
　
「我當然知道，所以咁重要嘅事我冇諗住同你哋兩個商量。」
　
「你嘅意思……」
　
「我嘅意思係你哋身上唔止有無線電，仲有監視器。」我指向自己腦袋，「唔好當我白痴，我一早知道成段路程佢哋都喺度食緊花生。我有冇講錯呀？船上面嘅各位。」
　
今次Match並冇即時回應，等咗陣先喺袋裡面掏出一部無線電。再過多幾秒後，隨即響起青鹿把聲：
　
──啊，不愧係無二先生，就同我哋嘅BOSS一樣，真係無所不知。
　
「青鹿，呢段旅程咁精彩，應該夠你哋飲幾枝紅酒啦？」我回應。
　
──唔好講笑喇，我哋係認真做事嘅人，點會喺呢個情況下飲酒呢？
　
「哼。」我嗤之以鼻。
　
──為咗證明我真係冇飲，等我清楚講一次我哋之間嘅君子協定──你哋到惡夢島之後，首要目標係救控制室，肯定救唔返先去毀滅「魘」。只要任務成功，我哋就會將仇雪杏小姐嘅靈魂交返俾你，同時承諾唔會傷害佢……
　
「啱呀，睇嚟我怪錯咗你……」
　
──咁我就唔明啦，點解你會突然改變決定？
　
「因為，成個協定嘅大前題係你哋冇嘢隱瞞住我，但事實你哋有……」
　
──無二先生呀，呢個行動咁多細節，我哋好難每一樣都清楚交代……
　
「我講緊嘅唔係細節，而係最關鍵嘅部份。」我右手一伸，本來仲喺399號衫袋裡面嘅無線電即刻隔空飛到我手上，「我有冇講錯呀，阿杏？」
　
短暫嘅沉默。
　
「你哋全部唔講嘢即係證明我啱啦？」我對住無線電講：「阿杏，唔好扮瞓喇……我知妳喺度。」
　
幾秒後，終於有一把女聲喺無線電裡面傳出嚟，佢用略帶抖震嘅聲線問：
　
──你係幾時知道㗎？
　
「我本來都仲係半信半疑，一直到399號喺假控制室度懷疑我係同妳夾埋。」我望向Match，「隊長，仲記唔記得你當時講咗啲咩？」
　
「我……」Match露出難以啟齒嘅表情，大概係怕再講多一次。
　
「等我代你答埋──你話『冇可能，而青鹿可以保證呢點。』當時我就諗，點解你哋可以咁肯定我冇同阿杏夾埋？照道理唔係應該好合理先係？我哋明明成晚喺酒店房，應該可以傾出一個天衣無縫嘅計劃先係。終於，我腦海叮一聲得到一個答案──唯一嘅解釋，就係你哋先係事先夾埋嘅一方，所以先可以咁肯定。」
　
片刻過後，青鹿用冰冷嘅語氣回答：
　
──大意呀，阿Match，今次真係好大意。
　
「對唔住，」Match聽完即刻道歉，「當時情況太危急……」
　
──我冇怪你，只係怪自己，當初唔應該乜都同你講。無二先生，你講得冇錯，我哋的確係同仇小姐事先夾好。為咗迫你出手解決呢件事，所以先用到苦肉計呢招。
　
「所以請假嗰啲嘢全部都係假嘅？」我追問。但其實我都知道答案，只係為咗更加肯定。
　
──唔係，全部都係真。
　
今次回答嘅係阿杏。
　
──我之所以請假離開惡夢島，係因為我見到惡夢島上面嘅實驗者開始組織埋一齊反抗，而且好快就會去到「魘」。但我並冇阻止到佢哋，甚至幫佢哋隱瞞，所以俱樂部班人先完全發現唔到……
　
真相大白喇，頭先博士講嘅時候我已經奇怪佢哋點解會成功。原來答案從頭到尾都係咁直接同單純……因為阿杏就係內鬼。
　
──但我知道自己所做嘅事係瞞唔到「白色秩序」，所以我主動接觸佢哋。只係冇諗到，白老闆會同我直接聯絡。
　
白老闆當然係指白笑燭。既然青鹿冇打斷到佢，即係到現時為止都仲係可以透露嘅部份。
　
「佢冇懲罰到妳？」
　
──嗯，白老闆佢話自己一直都唔鍾意俱樂部做嘢嘅手法。我所做嘅嘢，反而係幫咗佢一個忙。
　
講就好聽，但以我對白笑燭嘅認知，佢點會在乎島上面班人嘅性命？佢肯定係有其他目的……
　
──但既然呢件事係我搞出嚟，就要由我親手處理返，然後……
　
──仇小姐要加入我哋組織。
　
青鹿突然打斷咗阿杏，睇嚟終於到咗唔講得嘅部份了。
　
──當然只係暫時性，因為我哋咁啱有個大工程需要到仇小姐嘅才華。只要佢加入，「白色秩序」除咗前事不計，仲可以保護佢唔怕俾俱樂部嘅人尋仇。
　
之後，就係大家都知道嘅發展。
　
──二哥，對唔住，我呃咗你。
　
「妳知我唔係想要妳嘅道歉。」我冷冷咁回應阿杏。
　
如果你問我呢刻嬲唔嬲，話完全冇當然係呃你哋，但又未去到想反枱殺人嘅地步。而我從來都好識得去利用少少嘅憤怒，去達致我想嘅目的。
　
「青鹿，既然你頭先提到君子協定，咁我又順便講下。記得我喺船上面提過，只要你哋冇嘢隱瞞嘅話，我就唔會亂嚟。但而家明顯係屬於我可以亂嚟嘅情況。」
　
說罷，我一手用力握爛手上嘅無線電，再轉身將手擺喺門柄上面。
　
下一瞬間，即刻有多重攻擊喺四方八面襲來，如同萬箭齊發一樣。但既然我早就知道，當然做好晒防範唔會對我造成任何傷害。
　
「隊長，我哋而家應該點做！？」等到煙塵散去之後，可以見到399號已經舉起槍指住我，枝槍睇落係佢嘅私伙嘢，唔係對「蝕客」用嘅槍。
　
「既然我做錯咗，就只可以將功補過。」Match喺身後拔出一把長劍，「399號，你想走嘅話……」
　
「我唔走。」399號打斷佢，「其實我一直都睇佢唔順眼，而家正好有機會……」
　
「教訓我？」我冷笑一聲，用不屑嘅表情接埋下一句『就憑你哋？』，「Match，我仲記得你喺控制台講過嘅嘢……」
　
我邊講邊用萬變紙變出一把軍刀，同Match喺控制台遞俾我嗰把係一模一樣嘅款式。
　
「既然你咁想見識，我就喺度成全你！」我怒聲道，正準備落刀嘅一刻……
　
──夠喇！停手！
　
青鹿氣急敗壞嘅聲音再次喺Match嗰邊傳嚟。
　
──Match，399號，由得佢喇。任務雖然重要，但人才一樣重要。你哋兩個今次表現都好出色，唔值得喺呢個位置犧牲。何況BOSS都唔想組織同無二先生嘅關係搞到咁僵。
　
「但係……」Match明顯已經豁出去。
　
──夠喇，呢個係命令。你哋走喇，船已經泊咗喺碼頭，你哋知道位置……等佢毀滅咗「魘」先走就嚟唔切。
　
「喂，聽落你哋好似冇諗住俾我上船？」我笑住問，同時收返埋把刀。
　
──我都想預埋你呀，但時間真係夾唔到，你只可以自己搵方法返去喇。仇小姐，最後喇，有冇嘢想同無二先生講？
　
──二哥，之後再見。
　
對話結束後，Match同399號兩個即刻離開現場。而我都爭取時間開門，盡快摧毀「魘」嘅話，或者仲可以厚住臉皮去搭個順風船。
　
門後面係一條通向深處嘅長樓梯。雖然已經加快腳步行，但結果都行咗足足三分鐘先到底……
　
底層係一間類似實驗室嘅場所，二百呎左右唔算好大。可以見到一邊牆身掛咗好多張合照──我認得出Abraham博士，而佢旁邊嗰位小女孩，隨住唔同嘅合照慢慢成長為婷婷玉立嘅女人……雖然冇親眼見過，但應該就係博士嘅親生女。
　
就算俾自己個女背叛，去到最後……佢都係依然疼愛住佢。
　
「唉……」
　
有人一生都得唔到父愛；有人卻擁有而從來唔識得去珍惜。
　
嘆息咗幾秒後，我轉身望向整個實驗室「靈力」最重嘅物件──今次係一張即影即有嘅菲林相，相入面有一班人：包括Abraham博士、如初、仲有惡夢島上面其他嘅倖存者，佢哋每一個人都笑得好開心，應該係喺派對中途影低……
　
我反轉張合照，可以見到背面寫住：
　
　
【致美夢來臨的一天。】
　
　
「終有一日。」
　
我用軍刀喺食指上面劃咗一刀。然後合埋雙眼，專注毀滅依附喺菲林相上面嘅「魘」，從而保留住本體。就喺「魘」嘅氣息完全消失嘅一瞬間，成個島開始猛烈搖晃起嚟……
　
「之後……」我望返去樓梯嗰邊，呢個狀態下想行返上去本身已經一件難事，「先係最麻煩嘅部份。」
　
但再艱難，痛苦都會過去。
黑暗過後，總會見到光明。
　
安息吧，各位。
安息吧，731號。
　
接住落嚟就交俾我。
　
*
　
*
　
*
　
【仇雪杏視角】
　
自從惡夢島事件得到解決，我可以名正言順咁返番香港之後。我幾乎每晚都會落酒吧，只為咗等一個人。雖然每次逗留嘅時間唔算好長，但我知道的……佢會出現嘅話，就算我只係留一分鐘佢都會出現。
　
轉眼間就過咗一星期，嚟到十月八日（星期二）。
　
「靚仔酒保，唔該再嚟一杯Manhattan（曼克頓）。」
　
「但呢杯……」男酒保注意到我上一杯只係飲咗少少。
　
「收咗佢就得，因為已經暖咗……飲落零舍苦。」
　
其實我當初只係諗住飲一杯就走，但結果一個電話打嚟，傾傾下就冇咗件事。
　
「好好好，等我幫妳整過。」
　
酒保正想收走杯酒，但突然有人出現喺我身邊同佢講：「唔洗收走喇，杯Manhattan俾我……你整多杯Cosmopolitan（大都會）俾呢位小姐就得。」
　
「吓？」酒保愕然。
　
「你照佢說話做就得。」我微笑住同酒保講，然後同旁邊嘅男人講：「二哥，我等咗你好耐喇。」
　
「妳明知自己唔飲得Manhattan仲要格硬叫。」二哥無奈咁講。
　
「因為我掛住你呀。」我毫不掩飾照直咁講：「每次飲一啖，就好似可以體會到你飲嗰刻嘅感受。然後，就會覺得你好似喺我身邊咁。」
　
「如果唔係架船走得咁快，我應該一早就喺妳身邊。」佢怨恨咁講。
　
「咁你最後係點返嚟？」我瞧咗眼二哥雙手，上面並冇任何傷痕。當然可能係已經好返。
　
「講起就辛酸，我要衝去碼頭搵架細艇仔，然後用木棍慢慢划出海……」
　
「唔係啩！？」我好驚訝，「划！？」
　
「最衰都係因為妳個結界，就算惡夢島毀滅咗都仲未消失，」二哥繼續埋怨：「結果我要一直划出結界外面，再等到有漁船經過帶我去最近嘅城市。仲差少少俾人當係偷渡客，好彩有朋友趕得切嚟接我……唔係隨時幾個月都返唔到嚟。」
　
「明明，只要你願意一定可以更加快返到嚟。」
　
「就當係多個人生體驗呀。」二哥笑言：「而且，都可以俾啲時間我哋兩個冷靜下。」
　
之後係短暫嘅沉默，直到酒保將新酒送上嚟，我先開口講：
　
「二哥，我咁對你，就算你嬲我都好合理。我都唔會奢望你可以原諒我……」
　
「所以妳冷靜完都係得呢個結論？」二哥表情略帶失望，「阿杏，識咗妳咁耐，我知道妳唔係咁蠢嘅女人。」
　
我聽完不禁睜大雙眼，然後微笑住講：「二哥，你之所以願意上呢個當，係因為你想我報答你。」
　
「而家就正常得多喇，睇嚟喺病房嗰陣妳果然係扮瞓。」
　
「我當時仲期待你會錫上嚟。」我拎走酒杯底嘅杯墊，再喺手袋裡面拎出一枝筆，喺上面寫咗一串數字，「二哥你總係唔知女人想要啲咩。」
　
「的確唔知。」二哥接過張杯墊，然後將我飲剩嘅Manhattan一飲而盡，「所以妳今晚都只可以陪自己……」
　
「因為你有緊要事做。」我點點頭，「明嘅。」
　
「多謝妳嘅『密碼，我行先。」二哥企起身準備離開，本來已經行咗兩步，但又突然轉頭望返過嚟，「阿杏，下次……」
　
「下次？」見佢講講下冇講，我皺起眉頭問。
　
「下次唔好搞到件事咁複雜喇，直接啲……」
　
　
「只要知妳有事，我就會嚟救妳。」
　
　
望見二哥難得帥氣嘅眼神，我內心不由自主咁產生悸動，心撲通撲通咁加速跳動。假如可以嘅話，我真係好想衝過去從後攬住佢，話俾佢知我內心嘅痛苦同寂寞。
　
但我知道唔得……因為呢度並唔係屬於我哋兩個嘅地方，而家亦都唔係合適嘅時間。
　
等到二哥離開之後，我重新拎起手袋裡面嘅電話。因為二哥嚟得太突然，所以我並冇收到線……
　
「喂？」我先確認對方係咪仲喺度。
　
「有個願意為妳赴湯蹈火嘅男朋友真係好呀。」男聲回應。
　
「你知道我同二哥唔係呢種關係。」
　
「明嘅，而家啲後生仔女嘅感情世界就係咁複雜。點都好喇，妳頭先冇收到線，呢個決定非常明智。妳忍住冇同佢講……亦都非常聰明。」
　
我聽到呢度手不禁顫抖一下，如無意外……對方肯定注意到呢點。
　
「但二哥佢，應該都察覺到你嘅存在。」
　
「我就係想佢注意到呀。」男聲講：「等佢知道妳仲未解除危機。仇小姐，妳要知知道，入『白色秩序』裡面做內鬼，並唔係一件容易嘅事呀。」
　
對，其實從到到尾，惡夢島事件都係一個佈局。而佈局者，就係呢位自稱袁先生嘅人。
　
我作為一個知名嘅結界師，假如主動要求加入「白色秩序」，佢哋肯定會覺得事有蹊蹺。但若果係「帶罪而加入」嘅話，就係另一種講法……
　
所以，我一直按照袁先生嘅指示，引發惡夢島災難。再等「白色秩序」嘅人親眼見識我嘅結界技術。為咗更長遠嘅利益，佢哋係唔會殺死我，而係招攬我……一切都如袁先生所料。
　
「但都係多得袁先生你，我先可以連白笑燭都瞞得住。」我回應。
　
「瞞得住？咁又未必。」袁先生笑住講：「就算妳捱得過佢嘅『讀心』，佢都唔會真心相信妳……只可以講，各取所需喇。」
　
「咁我下一步……應該要做啲咩？」
　
「照佢哋說話做，直到我下次聯絡妳。仇小姐，為咗我哋嘅『共同願望』，記住要萬事小心呀。」
　
嘟──收線之後，我總算可以鬆一口氣，但雙手依然係不斷咁震緊，連酒杯都拎唔穩。
　
曾經有人話過，「極樂園」嘅園長陳瀚洋以及「白色秩序」嘅白笑燭係影子世界裡面城府最深嘅兩個老孤狸。但計我話，真正老謀深算嘅人，永遠係藏喺最深處，就算到割喉一刻都唔會意識到佢存在。
　
我甚至有懷疑過，當初路易斯俱樂部之所以睇上惡夢島，可能都係佢安排。
　
一切，都只係為咗佢嘅大計。
　
而為咗我嘅「願望」，我選擇咗同呢個惡魔合作。
　
「二哥，對唔住喇。」
　
我嘅事……暫時都只可以繼續複雜落去。
　
*
　
*
　
*
　
【韋家聰視角】
　
──叮噹叮噹──
　
我喺房間裡面聽到外面嘅門鐘聲，正諗緊係邊個咁夜上門。幾秒後，熊哥打開門同我講：
　
「聰仔，」熊哥一臉厭惡嘅表情，「又係嗰個男人……」
　
「你指無二？」我激動咁彈起身，然後毫不猶豫咁衝出房間，見到無二就企喺閘後面，「你到底去咗邊？點解而家先返嚟……」
　
「我走咗成個禮拜，睇嚟你應該嬲完啦？」無二打斷我，「嬲完就換衫，我哋要去一個地方。」
　
「吓？」
　
「唔好吓啦，我哋冇咩時間……個密碼凌晨十二點就會改，快啲去換衫。」
　
雖然唔知發生咩事，亦都唔知佢所指嘅「密碼」係咩，但我都係照佢說話做，即刻入房換衫。呢刻時間係夜晚嘅十一點。
　
「我哋要去邊？」閂好閘門之後，我問無二。
　
「去九龍城寨。」無二回應：「正確嚟講係『城寨幫』，我哋要偷偷入去搵一個人。」
　
「搵邊個……」
　
「凌永岳──『城窠幫』嘅少幫主。呢個世上只有佢有能力解決到狄陀。」
　
「但點解……咁突然嘅？」入到𨋢之後，我再問。
　
「因為我突然諗通咗。」無二微笑道，「有時等唔係辦法……」
　
　
　
「適當嘅時候就應該主動出擊。」
　
為咗，一班曾經犧牲過嘅人而戰。
　
《無異之地》完
　
　
第三部──《無異之局》（暫定）
　
　
完故啦！睇完又鍾意嘅朋友記住留個 LIKE，同埋幫手分享開去呀！另外，記得睇埋下面……有個全新計劃試行中！
　
－－－－－－－－－－－－－－－－－
【地方的無默媽資助計劃】（試行中）（非呃嬲 post）
　
呢個計劃其實上年年初已經構思緊，但因為遇上反修例運動，覺得唔係適合嘅時間所以就一直擱置，結果到今年就撞正武漢肺炎。嚴峻疫情下，大眾書局突然宣告結業，令我下定決心要推出呢個計劃。
　
其實喺香港寫作真係好難，之前喺唔同場合都提過，作者透過賣書得到嘅錢真係好少好少。呢點絕對唔係出版社同書局嘅錯。講到底，一本書賣出去，最大筆錢係落咗去地產商身上。所以喺呢個大環境下根本培養唔到作者，一係要兼顧正職結果寫得太慢漸漸被淘汰，一係就主力寫但最後慘到要靠光合作用嚟維持生計……
　
所以我見到好多唔願意放棄嘅作者都開始轉型，一係自己賣書寄書、一係換個平台發展、一係直程轉第二種模式創作。而我暫時都係想寫，堅持寫落去。
　
有時見到讀者們話想支持作者，心裡面都會忍唔住覆一句：最好嘅方法，其實就係直接資助。既然遊戲平台可以資助，拍片嘅平台可以資助，點解寫作唔得？大家都係提供娛樂，無理由有呢種差別待遇。
　
而家大眾書局結業，大型書局其實就得返嗰幾間，而小型書店本身都經營困難。可以預見將來作者嘅生存空間只會越嚟越細，加上疫情持續落去書展隨時可能搞唔成。可以嘅話我都唔想用到呢種方式，但現階段……只想努力掙扎求存。因為我真係鍾意寫故事，好想一直寫落去。
　
而呢個計劃，就係基於以上種種理由出現。
　
放心，資助並唔係強迫性，有困難而資助唔到係絕對了解、剩係想買書支持亦都絕對歡迎。我唔會因為冇讀者資助而罷寫，亦唔會突然有篇故要畀錢先睇到（呢個平台都做唔到呢個效果）。當然，資助得多絕對會加速寫作速度。而資助金額係隨心而定，即使係一蚊都可以，只要有心就得。
　
當然，我都研究緊一啲方式答謝資助得多嘅讀者──例如聖誕送下聖誕卡、間中送下小禮物、甚至研究緊用資助嘅錢去整廣播劇、桌遊嘅可能性。但因為而家只係試行階段，唔想亂咁開空頭支票，有進展一定會即刻通知大家！
　
暫時只提供 payme 同轉數快兩個平台，會睇情況再考慮其他資助方式。再強調一次，資助唔係強制性，一蚊可以、繼續免費睇都得。只要有心，平時肯留個 like 分享下我都已經心滿意足了。
　
Payme 連結：
https://payme.hsbc/echoofheart
　
轉數快 FPS ID：6065460
　
p.s. 資助咗嘅讀者最好留句支持說話～方便整理，可能將來送聖誕卡有用！
　
IG：echoofheart