【龔成問答信箱】（Q22121-22140）

Q22121：

我騰訊高位買，而家點算，止蝕嗎？好慘，人生第一次買騰訊？你又話可以學巴菲特長揸嘅？

龔成老師：

第一，要計好企業價值，$600以上的騰訊（0700）是貴，如果你未有估值的技巧，應該用我之前講的月供股票，而不是一手手買入。

第二，買入後最好唔好理短期股價，集中分析企業價值。

第三，同一行業，同一版塊，持股%不能過多，如果你持貨並不過多，其實可以耐心持有，但如果過多，就要減持。

第四，要多提高自己的投資知識，建議你多睇書，巴菲特相關的書。

------------------------------------------------

Q22122：

你好老師，巳留意你的Facebook 有半年了！得了很多投資知識！想重整自己的分配：

今年43
1:現有一份儲蓄保險（大概有15萬）
2:月供一份退休儲蓄保險4500
2:現金30萬
3:每月可儲10000，現已每月月供股票5000

盈富2000
領展1000
港交所1000
長江基建1000
另外5000儲起

4:股票現有一手粵海，二手中銀

現在想有以下更改：

1.取出全份儲蓄保險15萬用作投資每年有5-6%收息股票，因發現儲蓄保險回報慢，但想用這筆錢用作比較安全的投資！

2:减小退休保險供款，取出2000用作月供股票（3067 or 2845)

3.而餘下的現金想取1/2或1/3

用作投資平穩增長+潛力股

請給予意見，謝謝！

龔成老師︰

1) 其實"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

若你想提取這筆資金，作較保守投資，你可以考慮以下收息股。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以

2) 可以，以你這個年紀，加多$2000去月供安碩恒生科技(3067)或/和ＧＸ中國電車基金（2845），都係可以。

但你要明白，這2隻係潛力股，增長潛力當然會優於儲蓄保。但同時間，佢風險都會較儲蓄保為高，你要明白這一點，自己要從風險與回報間，去作個平衡。

3) 以你43歲年紀，可以投資平穩增長+潛力股。

如果你現時無太多投資經驗，潛力股這類風險較高的股票，你就不要持有過多，最多維持2成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約4成，視乎你投資經驗多寡和了解這些股票程度而定。

現時部份潛力股，尚有輕微過熱情況。只有安碩恒生科技(3067)、ＧＸ中國電車基金（2845）、 騰訊（0700）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘要等等。

另外，現時大市只係合理水平，現金唔好盡用。現金預大約佔比重大3-5成，用來等大跌市出現，去掃平貨。

------------------------------------------------

Q22123：

首先，非常感謝龔成老師的解答。小姓張，今年25歲，投資新手，目前月入一萬七，每月個人平均儲蓄大約八千至九千左右。

本身持有兩手美團380、一手福耀58.5、三手小米29.9、一手信義光能17.38、五手信義能源4.72以及五手火岩控股3.08，整個組合本身已虧蝕緊約二萬二千蚊。

之前股市大跌，整個組合的虧蝕一夜間再擴大了一萬蚊，當時令我覺得半年結粉飾廚窗行動結束，大行開始大手拋售股票。

一時情急之下，我一下子放售全部手頭上持有的股票。我這個決定是否不明智?

我現在會先至少靜觀大市一至兩星期，之後再籌組投資組合。打算"伺機"分注入手以下股票:
("伺機"-暫時覺得短炒的話，用十天廿天線為參考，嚴守8%至10%或對上低位做止蝕 ; 長線持有的話，當時股價必須在保力加通道底部以及RSI處於三十左右)

基石長倉: 深圳國際(152)、中廣核新能源(1811)、福壽園(1488)
可長可短倉: 騰訊/阿里巴巴 信義系
短炒出出入入倉: 火岩控股(1909)

請問龔成老師對以上有什麼看法? 多謝指教～～～

三年前，個人資產只有幾萬港元，持有騰訊美圖碧桂園，首次玩股票就蝕左一萬一千心灰意冷離場後就好耐沒再投資，

真的估唔到0700當年300多一直不動到現在已600 700.... 今年2021年2月，在同事的薰陶之下，回歸股市，雖然近月已不斷學習投資知識，

但知道的還很少，今次蝕得更多。目前與家人同住自置公屋，個人資產全部變番現金，廿三萬港元。

龔成老師︰

選股方面，其實唔算大問題。但你整個投資策略和相關概念，問題就十分大。

首先，我地投資股票，其實等同投資一間企業。希望透過其自然增長，以達至財富增值的目的。我地投資一定係長線，而唔係短期炒賣，去賺差價。

我地會用企業質素、行業發展、財務狀況等，去計算一個合理值。再因應現時股價平貴，去制定投資策略。

係分析時，我地係唔會用技術分析。唔好睇圖的趨勢，這是好錯的投資方法！巴菲特已經講到明，技術分析沒有作用的。我地只會分析企業的質素，以及企業的價值。

記住，如果是優質股，短期股價下跌，是不用賣出的！

另外，睇你過往投資情況，我發現你都幾受大市和身邊的人影響，我見你買的都是熱炒股，而且買入價都係相當貴。

雖然貴，但因這些股票都係質素，其實你應該照持有，而唔係全數沽出。因為佢地長線都會增長，令個價值提升。持有一隻股票與否，唔好用買入價做指標，你應該係睇佢有無質素。

我建議你，先學好真正投資概念，去修正好自己本身問題，才再開始投資，咁會較好。暫時，你最多只可以小注月供股票。

你可以睇我架《80後百萬富翁》、《財務自由行》和《股票勝經》，相信可以幫到你。

你25歲，應以增值為主，以下「平穏增長股」 + 「潛力股」都適合你。現在你每月先用5成儲蓄，即$4000做月供。其餘先儲起，用一邊月供一邊儲蓄的策略。

------------------------------------------------

Q22124：

請問供股選美股好還是港股，初學者

謝謝

龔成老師︰

預期未來一段時間，中國和美國會係全球最重要的經濟體系。因此港股和美股，都係有投資價值。

但重點係，你對邊個市場較為熟識。另外，你要考慮平衡配置，可考慮同時持有。

如果你想投資，但又對該市場唔係好認識，你可以先投資係佢的相關ETF。以下3隻股ETF，都係不錯的選擇。

當中，QQQ波動性會較高，要注要風險。

Vanguard標普500指數ETF〈VOO〉，是追蹤標普500指數的ETF。

Invesco QQQ Trust(QQQ) 是追蹤納斯達克100指數。

盈富(2800)是追蹤恆生指數，買入盈富，就等同買入58隻在香港上優質股，係一個唔錯的組合。

------------------------------------------------

Q22125：

您好！龔SIR！我是澳門人，現年39歲。經朋友介紹認識你，真係相逢恨晚，因為我過去(9年股齡)就像股海中沒有指南針也看不見燈塔的小三舨，

剛拜讀過你的«股票勝經»，你的先財富增值後現金流的投資規劃，以及堅持持有優質股的投資方式已經收到晒。現因想入幾隻行業前景不錯的股票，

誠心向閣下請教，希望可給予合理價位以作參考！

1. GX中國電車-U(9845)
2. 吉利汽車(0175)
3. 小米集團-W(1810)
4. 騰訊控股(0700)
5. 港交所(0388)

另外，為籌錢入上述股票，我有兩隻蟹股因誤信友人及受投資群組騙局唆擺而坐貨，而家想壯士斷臂，但我查看損益表又顯示年年賺錢，

我完全唔識會計同睇財務報表的，所以想請教龔SIR這兩股是否劣質股？是的話我即止損離場。

1. A8新媒體(0800) - 0.99元入，持50000股
2. RIMBACO (1953) - 1.74元入，持55000股

讀完«股票勝經»，我發現估值真係一門專業技能，我現階段實在沒能力分析，到網上找了一下資料，發現有個以目前預測市盈率對比過去10年預測市盈率中位數的方法，

好像比較簡單，但我應該如何獲得某股過去10年預測市盈率的資料呢？

咁多問題真係唔好意思，請龔SIR盡量回答。萬分感謝！

龔成老師︰

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

至於，預測市盈率，其實只係一個參考數字，你可以用佢做輔助，但絕不可以用佢作為主要考慮因素。

你要記住，要去評估一隻股票，無捷徑，係要用時間。好多人見有D方法，簡單方便、易明，就走去用。但完全唔去考慮這些方法，個實用性和可確性有幾大，最終得不償失。

建議你若想學好分析企業，就多睇年報、睇相關新聞、書籍、上相關課程，才是正確方向。

Ａ８新媒體(0800)收入過往無乜特別增長，近年更出現下滑情況。睇翻佢過去，都有幾年係出現虧損。

整體而言，投資價值不高。長線換碼至其他優質股，相信會更好。

RIMBACO(1953)是一家馬來西亞樓宇建造承包商，本身業務算係一般，唔係特別吸引。

佢本身盈利和規模，都唔係好大。但上市時，個價曾經被炒到好高。但從業務上，睇唔倒有乜原因，可以支持佢升咁多。

佢雖然損益表顯示，係年年賺錢。但我對這類股票，始終較有保留。

這2隻股票，我建議你長線計，都係沽出較好。

GX中國電車U(9845)、騰訊控股(0700)現價算係合理區頂，而吉利汽車(0175)、小米集團-W(1810)和港交所(0388)現價偏貴，要回多1,2成，才算合理區頂，才可開始分注入貨。

你問的5隻股票，都係有質素。但佢地同是潛力股，雖然增長潛力較強，同時風險都較高，不宜持有過多。

以你39歲，潛力股最多只可佔約4成，餘下應用以下平穏增長股。但我建議你，暫時最多持有2-3成好了。到你學到一定投資知識，才慢慢調高，咁會較穏當。

未來時間，你就先集中在以下平穏增長股。現價計，以下股票都在合理區，可以分注。

但由於大市未算平宜，故你的資金，暫時最多只可以用一半入市，餘下應等大跌市才出手。

------------------------------------------------

Q22126：

Hi 呀 sir, 我而家一直都月供緊有66，823，1810，1177，2800。最近想加多隻潛力股 但見到好多隻都升左好多1830，2382，868，968，3868，285。

9988 因為一啲消息 都冇好大升幅。

有冇邊隻潛力股比較價值好，值得慢慢月供？

Thanks

龔成老師︰

我地投資，唔好只係聽消息，我地要從企業長線質素，去做考慮。短期股價，可以未必理想。但長線，必然可以將佢價值反映出來。

阿里巴巴（9988）有質素，有增長力。

係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但股價都有一定的波動。

始終將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

對於這類優質、有發展，可作為長線月供目標。

舜宇光學（2382）、信義光能(0968)、比亞迪電子(0285)、阿里巴巴(9988)都係可以考慮，作為長線月供之用。

信義能源(3868)、完美醫療（1830）都有潛力，但不確定性較高，用來月供，就不太建議。

而信義玻璃(0868)都有質素，可月供。但只算係平穏增長型，增長潛力無上面幾隻咁大。

------------------------------------------------

Q22127：

龔成老師：你好！剛上完股票班課程，令我在選股方面有更明確的方向，在此先感謝老師你的無私指導。學會簡單的企業分析後，最近打算重整自己的組合，

希望老師給予意見，在此先謝過老師。

29歲，月入約3.6w(連月均股息)，月儲3w，目前組合(投資金額約80w，另有20w備用資金)如下：

0001 2000股 54.375
0003 5556股 11.223
0027 2000股 63.000
0066 2500股 40.46

0388 77股 370.327
0823 1298股 64.546
1177 9055股 7.465
1211 23股 83.656

1810 1120股 25.072
2382 502股 174.404
2800 4003股 25.423
3718 4000股 1.000

因為工作關係，沒有太多時間留意股市，所以暫時維持月供：2800($4000)、0823($2000)、0388($2000)、1177($2000)、1810($2000)、2382($2000)

誠如老師所見，目前平穩增值股的比例約70%，因此未來希望逐步提高高增長力企業的比重，

所以日後打算全數賣出0003，換至0968(待$12買入)、3718(待$1以下買入)。

未知老師還有其他更好的建議嗎，謝謝！

P.S. 因為考慮中國未來目標是碳中和，以及世界未來趨勢都是與環保有關，因此會考慮與環保有關的企業，不知道環保業除了0968、3718以外，老師有其他更好的建議嗎？謝謝！

龔成老師︰

其實一隻有質素股票，中短期變化一般都唔會好大，你係唔需要成日睇個市。

你現時持股，月供配置和成個理財方向，都係正確的。

但煤氣(0003)雖然近年增長力弱左，香港業務增長力你預未必好強，但中國部分不差，長遠仍有發展力。

我睇翻佢近年在中國的投資，仍是保持進行的，每年都有幾十億，這些投資不會好快就見到收成，但這企業就仍是發展中的。我對佢長遠發展仍是正面，是平穩增長型，值得你長線持有。

而綠色能源，將會係中國，以至全球的一個大方向。信義光能(0968)和福萊特玻璃（6865）都係我較睇好企業，但現價都係略貴，回1,2成才開始合理。

至於北控城市資源（3718），都有質素的。

佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。之前股價貴，現價落翻D，大約合理區中間。不建議這刻太大注。

------------------------------------------------

Q22128：

龔Sir 你好，看你的專頁真的獲益良多！感謝！
本人持倉及入價如下：
0762 - $13.80
1618 - $2.50
0006 - $56.20
0386 - $3.45
6600 - $18.40
0175 - $21.50

看得出來入價偏高及頭3隻持倉很多年了，亦偏重於收息股（佔了75%），所以後期的現金用來投資175了，希望令到個倉有增值的可能。

因本人有點執著，打死不輸錢放掉，所以打算放掉唯一有賺的386改買其他平穩增長的股票。

我有留意323/857的資源股，PB都偏低，感覺好像值得投資。亦想投資1810/2382，但現價是否高過合理價？

請問龔Sir 覺得應該怎部署和其他推介？

龔成老師︰

你"打死不輸錢放掉"的想法，係好錯。這個想法，也是不少散戶常犯錯誤。

唔好將個買入價，睇成一個神聖指標。我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

如果跟你策略，好大機會將好的股票放晒，最後成個組合，只餘下一些質素欠佳的股票，這樣只會令你組合變得越來越差。

你現時持有股票，都係有質素，雖然部份未到優質股水平，但都值得長線持有。

賽生藥業（6600）都有發展力。整體來說，這股都不差，有投資價值。但業務始終波動，小注投資好了。

馬鞍山鋼鐵（0323）和中石油(0857)這類商品股票，產品沒有差異性，只能賺取合理的利潤，不算是最高質的類別，投資價值中等。

PB比率，只係其中一個輔助性指標，我地是否投資，還要考慮其他指標和基本因素。這2隻股票現價算合理，但這類股質素只係中等，不宜持有太多。

至於小米(1810)和舜宇光學科技(2382)現價略貴，回多1,2成才算合理區頂，才可小注。

另外，個別企業和行業，不要佔組合15%和30%以上，否則會有過度集中性風險。故你頭3隻持倉，要作適度調整。

至於你未來集中投資那些股票，你睇翻你本身年紀、投資經驗、風險承受能力等。

假設你係較年青，應以增值為重心，中石化(0386)、電能(0006)這些收息股，增長力好弱，就唔適合你。至於其餘4隻持股，係適合。

策略上，你可以投資「平穏增長股」和「潛力股」。

選股上，你可以投資在平穏增長股︰金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只在合理區，資金唔好盡用。最好留有部份，等大跌市出現時，可以用來掃貨。

------------------------------------------------

Q22130：

龔sir 想請教下你，可以俾啲意見嗎？

我有一層舊唐樓 每月收租緊7000蚊包差餉，租金全數給媽媽做零用，但樓齡太舊，好多問題開始浮現，

黎緊可能更要夾錢做大維修，想請問如果賣左佢轉做收息股代替租金好嗎？（層樓大約估值250萬到）

如果可以既話應該點分配資金同選股呢？先謝謝你的寶貴時間（希望可以解答下我）

龔成老師︰

以租金回報率計，你現時唐樓都算合理。但正如你所講，樓齡高，的確會帶來很多問題。

除左維修成本會增加，會進一步蠶食回報外。新投資者都較難做按揭，令投資價值下跌。

因此，長線計你都係要沽出這物業，換成其他較優質資產。而你持有物業目的，若主要係為左提供現金流給你媽媽。沽出後，投入收息股都係一個可行做法。

以下是一些唔錯的收息股，你可以參考下。現時大市只在合理區，若入貨要慢慢分注，先用一半資金。其餘一半，就等大跌市機會。

同時間，係配置時，唔好太集中係個別企業或行業(個別企業和行業，不要佔組合15%和30%以上)，要平均分配，以免出現過度集中性風險。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

由於你現時物業，唔係完全無質素。你可以唔洗急住出售，慢慢睇到好價才賣出，咁就可以。

------------------------------------------------

Q22131：

我早幾日用$7.72買左8000股 3918，買完就跌，我50歲，我知尼隻係長線股，但我冇時間睇股票市場，我驚尼間公司業績及展望有所改變，

我怕自己Miss左尼D資訊，做咗錯誤嘅投資決定。我係咪應該繼續讀保留，長線投資？謝謝你

因為聽你介紹過呢個股票

龔成老師︰

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，唔洗成日睇住個市。其實一隻優質股，好少短時間內，會突然變到好差。當然你都要留意資訊，但不至於要時時刻刻都睇住。

另外，你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

金界控股（3918）有質素的，但始終新興市場，因此點都有風險。佢會因全球的疫情，而影響左生意，但這只是中短期。

長遠計，佢仍然正面，佢之前有項目獲當地政府批准發展5幢建築面積共逾580萬平方呎的物業，包括提供共4700個房間的酒店群、娛樂場所及公寓等。我相信長遠對佢仍正面。

這股股價較為波動，不過都有長線投資的價值。

你買入價係合理，但由於市場新興，在注碼上不能投資得過多。而且以你50歲年紀計，這類較波動的股票，不宜持有太多。

整體而言，這隻股票係有投資價值，但波動性會較高。若你持貨只佔組合很少比重，長線持有就可以。但若佔比重較高，我建議沽少少，去平衡個風險。

------------------------------------------------

Q22132：

老師你好。本人30歲，由於上年通知抽中了白居二，稍為做了些調查，明白了自己有多缺金錢去實現不同的事。

由於幾乎零投資經驗，一個月前閱讀了你的股票勝經和5年買樓4步曲，有點打開了新世界的感覺。剛剛開始開了牛牛戶口，

買了少許港股 (股/數量)(1000中華煤氣，1000香港電訊，3000中國銀行，500港燈，200安碩恆生科技 (大多是邊看你的貼文參考購買的)

美股則有5 X VOO, 2*SPY) 。未知可否就我的投資給予意見呢。謝謝。

本人背景: 38K月薪，下年會達50K. 你認為我抽中白居二，應該在今年樓價高位去馬嗎?

(暫時打算購買將軍澳廿年頭的居屋單位(價錢預算3百萬 尾至四百萬頭，供20年)(又或其他樓齡接近有鐵路的屋苑 (希望至少有400呎)。

你又有什麼看法呢?謝謝。

龔成老師︰

香港樓市，我自己覺得長線都係會維持上升，中短期可能會有波動，但無人知。所以，你唔好用估個樓市方法，去做決定。

我地每個人都有自住的需要，係考慮自住樓時，唔需要諗得太複雜。

你主要係從用家角度出發，你想清楚你未來5-20年生活需要，若物業係配合到，而你又有信心"供得起"，其實已經係可以行動。

但我地財富增值，其中一個考慮重點，係組合平衡性。所以，最理想的情況，係你置業同時，可以留有一定資金，去投資優質股增值。

令到你成個組合，係可以股樓並行，唔會偏重左去一邊，咁就最好。

至於投資優質股方面，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主，建議你用「平穏增長股」 + 「潛力股」作組合，去創造一個增值平台。

你現時持股，都係有質素，但香港電訊(6823)、中行(3988)和港燈(2638)係收息股，增長力唔高，暫時持有現貨好了，不要再加注。

你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

現在你每月先用5成儲蓄做月供。其餘先儲起，用一邊月供一邊儲蓄的策略。

由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22133：

老師你好，我是新手，35歲單身月入3萬8千&無經濟負擔，現持有現金50萬和股票組合如下：

0066 港鐵 500股@43.75
778 置富 5000股@7.05
1810 小米 600股@28.95
2318 中國平安 500股@77.85

2809 中國潔能150股@127.40
2845 中國電車 150股@153.20
3690 美團 100股@412.60
8083 中國有贊 8000股@3.83

請問：
1. 以上長線投資組合是否okay?

2. 3690 和 8083 現價潛晒水，應如何處理？

3. 現想買入1177 中國生物製藥，請問$7 是否合理買入價？

4. 另外想買入1928 金沙，請問32.60 是否合理買入價？

5. 應如何利用50萬現金？
謝謝

龔成老師︰

1) 你持有股票，都有投資價值，可長線持有。但中國有贊(8083)風險會較高，要控制注碼。

2) 這2隻股票，都有投資價值，但你買入價偏貴。就算現時回調，只仲係唔平。

由於這2隻股股票，不確定性較高，加上都唔平，現貨可持有，就暫時不要加注。

3) 中生(1177)現價合理區頂，你無貨，可以係現價先小注。到有較明顯回調，才加大力度入貨。

4) 金沙(1928)現價在合理區中間，可分注入貨。

5) 現時大市只在合理區，資金唔好盡用，你大約用多$15-30萬入市，餘下的就等機會。

另外，你要留意，你而家太偏重左係潛力股(1810, 2809, 2845, 3690, 8083)，佢地雖然有增長潛力，同時風險都較高，不宜持有過多。

你算年青，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

------------------------------------------------

Q22134：

Ar sir, 我目前持9988,941；分別入價位251*4手, 50.9*4手，我現時月入2萬，流動現金持10萬，有什麼投資建議。而9988同941長遠持有如何？

螞蟻金服又會唔會再上市刺激9988股價？

9988現質素有無轉差，因對手拼多多開始有超越跡象，941現股價屬於平定貴，值搏率如何，長遠會否賺息蝕價？

Ar sir，關於上樓問題，假如月入約2萬，每月儲一萬，現時投資狀況不好，沒有出現盈利，主要依靠工作及兼職收入。每年都有申請抽居屋，但都無抽中。

如果目標置業，可以如何更快地完成夢想？

龔成老師︰

首先，阿里巴巴(9988)和中移動(0941)都係有質素，2隻都在合理區。

近年雖然市場有不少阿里(9988)的競爭對手出現，但由於佢本身有一定規模，唔會輕易被對手取締，暫時唔見質素有變壞情況。

而你現時目標，係希望置業，因此投資應以增值為主。中移動(0941)就係收息股，增長力唔高，不太適合。

你可以選擇一些「平穩增值股」+「潛力股」作投資目標，去累積這筆置業資金。你可以每月用一半儲蓄去做月供股票，另一半就先儲起的策略。

大市現處於合理水平，那10萬資金就等大跌市機會出現，才大力度掃貨，並長線投資。

另外，你現時組合已經有好大部份，來自阿里巴巴(9988)，故暫時不要再加注。更安全做法，就去沽出部份，換至其他優質股，去平衡風險。

------------------------------------------------

Q22135：

我黎緊讀大學三年級，學費生活費自付

宜家有2手1928同1手1398

老師有咩建議，暑假做緊地盤紮鐵，月入三萬

學費黎緊2萬幾一年，每個月大概7800蚊供保險基金

龔成老師︰

以你現時年紀，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

紮鐵我相信都辛苦的，但這是一個很好的訓練工作機會，加上人工高，我建議你做，另外，要注意安全。

策略上，你可以投資「平穏增長股」和「潛力股」。金沙(1928)係可以，但工行(1398)只係收息股，增長力唔高，現貨可持，但暫時不要加注。

保險我地主要係買保障，增值用優質股會較好。雖然保險基金都可以投資，但係你要睇翻佢長線回報，若遜於大市，就未必值得投資。

建議你每月用5成儲蓄做月供。其餘先儲起，用一邊月供一邊儲蓄的策略。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q22136：

老師，想問而家概價位入2331(李寧)、2318(中國平安)、2313(申洲國際) 適合嗎??

龔成老師︰

以上3隻股票，都係有長線投資價值。

平安(2318)現價合理，可以分注儲貨。

李寧(2331)現價係貴，想入最好等佢出現大跌時，先再作考慮。

申洲國際（2313）現價唔平，若無貨，可以先小注或月供，到有明顯回調，才正式出手。

------------------------------------------------

Q22137：

龔sir, 你好...現持有1398工商, 1099國藥, 1024快手, 883中海油,

如每月$4000用於月供股票, 請問金沙, 小米, GX中國電車哪兩個較合適...謝謝解答...

龔成老師︰

你現時持股，都有質素。但以你33歲年紀計，應以增值為主。

工行(1398)係收息股，增長力欠奉，唔適合你。而中海油(0883)只係商品類股票，質素只係中等，都不宜持有太多。

至於月供，金沙(1928)、小米(1810)和GX中國電車(2845)都係可以。

從組合平衡性計，我建議其中一隻係用平穏增長股的金沙(1928)，而另一隻小米(1810)或GX中國電車(2845)都可以，視乎你較睇好能車定小米發展。

------------------------------------------------

Q22138：

想請問老師你，如我每月用HKD 6000做月供股，我供三隻@2000 or 供兩隻@3000 好？

想請問老師你有哪幾隻做月供股較好，較適合我？

除了進行分注買入平穩增長股外，潛力股我分注入了安碩恒生科技（3067) 13手@16.5677；會再睇住個市分注買入；

至於月供股，請問騰訊(0700)我每月供$3000，你認為怎樣？如月供的話應該什麼時候和什麼價錢開始供，還是月供的話什麼時候都可開始進行？

麻煩晒老師，感謝。Have a nice weekend

補充：平穩增長股，我暫時持有一手粵海(0270) @11.08

龔成老師︰

你現時持股，都係係有質素。每月供三隻各$2000，或者供兩隻各$3000。我較建議前者，因為可以提升組合的分散風險能力。

選股上，你可以2隻平穏增長股，再加上一隻潛力股。

潛力股可考慮︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

若你想月供騰訊(0700)$3000，都係可以。另外$3000，就最好用來供盈富(2800)，有助你平衡組合。

由於月供係一個長線計劃，透過平均價格買入法，去拉平衡個買入價。因此，其實任何價位和時間開始，都係無問題。

除非價值去到異常貴水平，我地才會減少供款，甚至停供。若你不懂定平貴，你建議你不理價格，一直供落去。

因為若你自行定平貴去調整供款，若時機錯左，係會大大影響你成個平均價格效果，繼而影響長線回報。

------------------------------------------------

Q22139：

Hi老師，想請問下海外置業如柬埔寨可否考慮？入場費約八十萬左右。

香港的發展商，用香港的法律做買賣，收港币兑換成美金做買賣的。

龔成老師︰

法律，會係我地投資海外樓其中一個關鍵位。雖然係用香港法律做買賣，但物業始終在當地，必然受當地法規所規管。因此，你唔好誤以為就好似係香港買樓咁，無分別。

我地投資海外物業，首先要問自己，你對這項目認識有幾多，堅守「不認識就不投資」的大原則。如果你真的已了解當地的物業市場、租務市場、法例、經濟發展，那可說是過了第一關。

土地是有限資源，所以長期一定上升，但你都要分析這地方的長期土地供應。

另外就是匯價如何，就算物業有穩定租金，以及樓價上升，但若然匯價不穩，都會對你的投資造成打擊，這方面不能忽視，你應該了解當地貨幣過去的變化，以及將來的強弱分析。

------------------------------------------------

Q22140：

龔成老師,本人是在職媽媽，43歲，自5年前才明白理財的重要，3年前開始月供股票，有股票資產約68萬，表面上是蝕緊的，近半年開始睇龔成老師的書，

讓我對投資有另一番體會，以下是我的投資組合，請給我意見是否合適

#3（2819股@$13.77）
#5（2820股@$61）
#6（500股@$43.4）
#11（515股@$177.2）
#12（4071股@$35）

#939（5047股@$6.47）
#1038（412股@$48.7）
#2778（11092股@$5.031）
#2800（3788股@$26.45）
#3067（200股@$17.1）

問題如下

1）我想減持匯豐，增持其他，邊隻應該繼續增持？

2）我每月可月供$10000-15000，應該如何分配金額？繼續月供邊隻？

3）另我想加入一些潛力股，想留意價位分小注入，現有現金約60萬（不計MPF，無車無樓無其他資產），思考緊1810、2845、9988，各股合理區價位幾多？

那一隻較適合我這年齡？還是保留現金再等機會？

希望很快收到回覆，謝謝老師給意見

龔成老師︰

你現時組合，持股都有質素。但有個較大問題，係你非常集中係銀行股，當中以匯控(0005)佔比最重。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

1) 在減持匯控(0005)或相關銀行股後，其他持股，其實你都可以增持，特別係安碩恒生科技(3067)。因為你現時組合，係偏向保守。

你可以再加大少少安碩恒生科技(3067)或投入其他潛力股，去提升翻組合的增長力。

2) 月供選股上，你可以投資在平穏增長股︰金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

另外，現時大市只在合理區，每月儲備唔好盡用。最好留有部份，等大跌市出現時，可以用來掃貨。

3) 除了你所講3隻潛力股，上述潛力股都係適合你。

現時只有安碩恒生科技(3067)、ＧＸ中國電車基金（2845）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘都略貴，想買就要等一等。

另外，大市只在合理區，現金唔好盡用，要留有部份，等大跌市機會。

同時間，潛力股風險較高。如果你現時無太多投資經驗，潛力股這類風險較高的股票，你就不要持有過多，最多維持2成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約4成，視乎你投資經驗多寡和了解這些股票程度而定。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21701-Q21720）

Q21701：

你好，龔老師，我是你的學生，我想通過比較同行PE來預測#1448福壽園的合理P/E範圍。

#922 安賢園，#1448福壽園，#6966中國萬桐園最近5年P/E範圍分別為2-47， 25-31， 9-22。

#6966中國萬桐園成交量少，2020年度平均成交量93萬，有76日更是0成交量，收入捨棄2019年有一個客戶貢獻2400萬的收入的因素（因為2020年已經不再有這個收入），

其收入維持穩定不變，i.e. 無增長，但其5年內P/E範圍可達9-22， 是否代表市場對這股票過於樂觀，高估其價值，

成交量少另我擔心這股票是否可以賣出或者其P/E是否可參考。

對比#922 安賢園，其收入每年都有上升，但P/E每年下降，甚至只有3倍P/E， 遠遠低於#6966中國萬桐園和#1448福壽園，請問是否代表市場對這股票過於悲觀，相較之下為何有這麼低P/E.

以上，個人簡單分析似乎都得不出可靠的P/E 範圍，請老師指教本人分析是否有誤， 對於#1448福壽園的合理P/E範圍，是否只能參考其自己的歷史P/E範圍，行業內P/E 無法參考？感謝賜教。

龔成老師︰

我地係計算行業PE在參考時，數據除了要係集中在同業，更重要係一些質素相近，甚至盈利規模等等，都接近的企業。

中國萬桐園(6966)和安賢園(0922)規模好細，品牌優勢、市佔都明顯不及龍頭企業福壽園(1448)，作比較價值不高。

因此，你可以集中翻用集團歷史市盈率去做參考。2014-21年中間4年市盈率，大約為27.5 - 30倍。

但由於近年中國政府，對行業有不少新指引，主要方向都係控制價值，避免殯儀業相關產品和服務，出現定價過高情況。相信未來，殯儀業盈利會回到較合理水平。

因此，個市盈率都要打折，你預大約15 - 20倍（當然，這數有主觀成份）。

至於每股盈利，我地可以用較近的5年平均數，再加這5年的年均增長率(約16%)去做參考，大約係HKD$0.374。

你預合理價格，大約係HKD5.6 - 7.5。

雖然增長力弱左，但由於佢本身係行業龍頭，有一定質素。而且行業市佔好分散，令佢有很大潛在發展空間，故依然係一隻相當有潛力的股票。

現價在合理區頂，無貨可小注。

------------------------------------------------

Q21702：

多謝你，你好有heart. 股票班最後一堂基礎班，聽你分享聽到眼濕濕，不過我同意，沒有捷徑，只有努力。

一兩年前，我未上你基礎班前開始睇你的本書和Facebook（未睇其他幾本），睇你解答學生或任何人的問題，解答得清楚唔馬虎，開始買月供股，每個月供一萬蚊，再一份full time 一份part time teaching教三日書，一星期做六日，過程是辛苦但有回報。

上年我終於儲夠錢去加拿大讀書，有幸在下個月走之前能完成你的基礎課程。感謝。

我下一個目標是五年後在加拿大買樓，我會帶埋啲note 去認真再溫習。多謝。安好！

龔成老師：

太好了，你都完成了「儲夠錢去加拿大讀書」的目標，之後就要完成加拿大買樓目標。

我相信每個人都有佢想做的事，可惜一般人會面對現實而放棄，但我唔會，我都希望你能堅持。

希望你過左加拿大，都會保持研究股票，應用課程所學，加油！期待你好快同我讀完成買樓目標！

------------------------------------------------

Q21703：

老師您好，早前買入了1833 平安好醫生 $94.25 @500股，怎知買入後一直跌不停，每天都先升後回，連跌十多天，是否需要訂立止蝕位？

每天看著其他股（例如阿里健康京東健康都是升的），很想賣掉，但一賣掉又立即蝕錢，現在我是否應該不理會股價，待他慢慢回升？

我本來看好平安好醫生的前景，但每天看到股價不斷下跌，有點氣餒及害怕自己判斷錯誤

龔成老師：

有時同一行業，由於企業的發展不同，股價表現都會不同，而我地最重要是集中該企業的分析。

平安好醫生（1833）長遠有發展力。只要你持貨不過多，可持有。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區頂，但好波動。

------------------------------------------------

Q21704：

阿sir,再問下你，你認為做地產經紀算唔算係創富嘅一樣野？同埋想問如果真係做得起，又算唔算係一個專家嘅項目？

睇左大半本千萬富翁，我應該試下先？

講返少少我背景，我30歲，得毅進證書，本來一心諗住讀完去考政府工，但睇完本千萬富翁就覺得係咪應該試下做銷售？

我現金同股票大約有2m,股票約1.1m，近來亦發現左一個直銷嘅機會（岩岩開始左半個月），雖然初期回報唔高，不過相信做幾年都有一定可觀回報（因為可以靠下線去幫賺佣金，令自己有一個銷售團隊）

其實有嘅儲備夠我捱到起碼幾年嘅時間，只不過我好怕做左地產會冇收入（唔知成交易唔易，同埋搵客可能好耐先有一位肯成交）

雖然我支出唔算大（大約每月8000-10000），不過都係有少少擔心入不敷支

龔成老師：

正如《80後千萬富翁》所講，地產類晨創富的其中一個方法，而當中不少職業，如地產經紀，都是可以突破的職業，你可以考慮下。

至於是否發展成專家，可以的，但要求你的條件更高，不是不可，但起碼要成為一個專業的地產經紀先。

你要有心理準備，的確有可能有一段時收入不高，但如果你的決心大，我會鼓勵一試。當然，你可以先儲多少少錢，等你較安心，之後先入行。

你30歲是黃金年齡，但就睇你決心有多大！

------------------------------------------------

Q21705：

本人31歲，因患有情緒病導致未能長時間工作，只能半職，每月6000蚊，我想請教……

1）31歲先學理財及投資會否太遲？

2）可以有咩理財嘅方法？

3）如果每個月只能拎出1000-1500蚊，可以點樣投資？
感謝龔成老師

龔成老師：

1）有心唔怕遲，你現時仍是好年青的時期，是累積財富的黃金期，絕對可以開始。

2）我不清楚的情緒病的因素，但我怕投資市場上落大，你會有較大的心理壓力，因此，如果投資股票，就要好好想清楚是否適合自己，如果自己較怕風險，就不要強行投資股票。

3）你可以投資一些較低風險的產品，例如銀行的月供計劃，買一些低風險類別（當然回報未必高）。

如果你能承受風險，就考慮每月供$1000盈富（2800）。

同時，你要留到一定的現金。

理財要一步步，不要急，從基本的儲蓄著手。

------------------------------------------------

Q21706：

老師你好，請問1686新意網你有咩看法？

另外再想請教2138醫思健康，有潛力嗎？

龔成老師：

新意網集團（1686）主要提供數據中心、設施管理、網上應用及增值服務，系統之安裝及保養服務。

行業長遠發展正面，佢已經做到全港最大，加上行業的需求不斷增長，對佢長遠都有正面影響。佢過往生意與盈利保持增長，財務數據正面。

這股有投資價值，不過現價就唔算平，大約在合理區頂至略貴。如投資，小注分注都可。如本身有貨，可長線。

香港醫思醫療集團（2138）主要以ＤＲ　ＲＥＢＯＲＮ品牌提供醫學美容服務。企業都有質素的。

（１）醫療服務：包括整形外科手術、微整形療程及由集團醫生操作的能量儀器療程及一般診症服務，以及牙科（ＯＮＥ　ＤＥＮＴＡＬ及ＯＮＥ　ＤＥＮＴＡＬ　ＰＬＵＳ品牌）、中醫及眼科服務。

（２）準醫療服務：包括由已接受培訓的治療師操作的能量儀器療程，該等治療師已完成集團醫生主導的內部
強制性培訓。

（３）傳統美容服務：包括面部護理、按摩以及其他無創療程。

（４）護膚及美容產品：主要為集團的自家品牌寶特曼娜及瑞研雅。

業務發展不差，長遠有增長力，不過業務中短期會有少少波動。現價合理區頂至略貴。

------------------------------------------------

Q21707：

老師請問我這九隻股票能夠長期月供?
2、823、3、6、1038、6823、66、11、2800

剛剛供了兩個月，從朋友口中得知老師的Facebook，所以想請教一下，每隻每月供10,000，目標10年一千萬作收利息退休用

希望老師能指點指點，小弟只期望效果係保本及收利息，方法可行嗎？

龔成老師︰

首先你要明白，若你目標係保本及收利息，定期存款會較合適。

因為，就算再優質和保守的股票，都會有價格波動，只是個波動會較少，唔會完全無，唔會去到保本的地步。

若你可以承受少少價格波動風險，你可以用收息股，去作為月供目標。

你現時月供股票，都係有質素。你每月可以儲$90,000，基本上，就算沒有增長，10年後都能累積到1000萬。

你組合當中領展(0823)、盈富(2800)、煤氣(0003)、港鐵(0066)息率唔算高，但有基本增長力，所以波動性會有少少比純收息股為高。

若你不想承受這程度風險，你可以將這4隻平穏增長股，轉為其他收息股。

以下是一些較優質收息股，佢地主要係收息，波動性唔會好高。但因為始終係股票，價格波動點都會有，你可以從中選擇。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21708：

你好老師 我係最近follow你既讀者 想請教下你有關投資既問題。

本人呢十年一直係外國 所以現時只係通過某cfd平台買賣港股同美股。

本人收入同財產如下

28歲 工作收入： 20000港幣/月左右

副業： 3400 港幣/月左右

有一層唔需要供既樓正在出租： 租金收入 扣曬所以開支大約有4500港幣/月左右 （樓可以賣 而家大約值190-200萬hkd）

每月必要開支： 供自住樓連水電上網 大約21000/月左右

老婆現時收入 17000/月左右

但老婆仲有三個月左右就生，所以之後會無咩收入 或者轉做全職家庭主婦

現金流而家有35萬左右

最近幾個月先開始有做小小投資, 所以唔係好多錢入左股票, 而且比較雜

大約如下

美股
Tesla - 3000usd @ 601
Berkshire hathaway 1000usd @ 286
Baidu - 640usd @ 270
Apple - 500 usd @ 134.5
Microsoft - 500 usd @258.7

港股
9988 - 1150usd @ 213.99
700 - 985usd @ 635.5
00388 - 一手 @ 460 （屋企人代買）
0968 - 一手 @ 14.5 （屋企人代買）

目標：

1. 如你所見 如果老婆唔做野既話 基本上會頂得好辛苦 因此想睇下有咩投資組合可以減輕小小之後既經濟壓力

2. 希望投資平穩有儲錢功能既股票 主要係抗通漲又可以跑贏小小就好（我個平台買唔到2800， 唔知咩原因⋯)

3. 有睇開 比亞迪 但係一直都好高唔夠膽買 最近好似回落左d 想請問一下你認為大約幾錢左右入手會比較合理？

4. 有睇過d高息股 例如中電, 領展, 中銀 同 中移動. 當中得中移動個股價有所回落。 呢幾間值唔值得月供長渣？

5. 700, 9988 係想當潛力股咁買 但買完都係一直咁跌 而家呢個價位應該再入手嗎？

6. 間樓係可以賣 因為而家計落回報率唔夠3% 好似好雞肋咁 如果真係賣左有190-200萬現金 你會建議點樣去投資好？

7. 其實美股同港股既玩法會唔會有好大差別？ 我而家投資左一陣就覺得美股上落差比港股大同密, 但除此之外 我唔太清楚有咩分別

可能一次過問得太多問題， 唔好意思。 唔該曬老師。

龔成老師︰

1) 以你28歲，我一般建議先做好增值部份。之後，到累積到有一定財富，才慢慢換成提供現金流的收息資產。

但由於你預計將來一段長時間，家庭開支壓力會唔細，希望透過投資去加大每月現金流，作為幫補。

因此我建議你新資金，集中投資一些「平穏增長股」 。佢地增長力唔係最高，但都會有平穏增長，而且會有一定派息，可以幫補你生活上支出。

但你唔好預好多，大約3-4%股息率左右。但相信這個方法，較可以平衡你增值需要，和家庭支出壓力。

2) 上述平穏增長股，已可以做到你要效果，若你買不到盈富(2800)，你可以買其他幾隻。只要平衡咁買，唔好太集中個別1,2隻，咁就可以了。

3) 比亞迪(1211)若要直接買，你預$120才算合理區頂，才可小注。若你係月供，現價開始係無問題。

但這隻是潛力股，派息好少，而且你預要持有一段較長時間，去讓等它自然增值。以你狀況，未必適宜持有太多。

4) 這幾隻都可以，但中電(0002)和中移動(0941)係純收息股，佢派息普遍會比平穏增長股多，但增長力好弱，係佢缺點。

而領展(0823)和中銀(2388)，就係有上面講的平穏增長股。

這4隻你都可以投資，現價都合理，可以分注。你要自己從「現金流」和「增值」2者間，作出一個平衡。

5) 首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔洗理。

這2隻股票，依然係有質素。阿里(9988)算係合理區中上，而騰訊（0700）則是合理區頂，由於你有貨在手，建議有明顯回調，才再加注。

同埋，你預這2隻股票較波動。佢地增長潛力強，但派息係極少，甚至係無。以你現時情況，不建議持有太多。

6) 以香港物業回報來計，接近3%算係可接受的回報率(若你物業在海外，則作別論)。由於出售物業，都有一定成本。

物業本身是一種資產，同優質股一樣，都具有增值能力。而且佢能提供穏定現金流，對減輕你生活開支壓力，都有幫助。

記住，我地財富增值組合，除了講質素外，都講平衡性，唔可以偏晒係股票類。若你物業係有質素，其實持有係無問題。

若你最終覺得，都係沽出物業較好。這筆資金，你都可以用來投資「平穏增長股」。

當然，你唔一定要100%去投資落「平穏增長股」。

若你想增值能力高少少﹐你可以加入一些「潛力股」。相反，你希望創造多一點現金流，去減低生活開支壓力，則可以加一些「收息股」在組合內。

潛力股︰比亞迪(1211)、中生(1177)、福壽園(1448)、安碩恒生科技(3067)、港交所(0388)、阿里（9988）、騰訊（0700）、舜宇光學（2382）、小米（1810）、ＧＸ中國電車基金（2845）

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

現時大市只是合理區，200萬資金可以先投入一半，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

另外，由於你就快有小朋友出世，預期有一定額外洗費。加上你太太短期內不能工作，你要先預留半年左右開支，作為應急之用，才開始投資計劃，會較為穏當。

7) 其實投資港股定美股，個重點都係睇企業質素。若有質素，我地再從佢平貴，組合平衡性、是否適合自己投資策略等，去定買入計劃﹐咁就可以了。

------------------------------------------------

Q21709：

你好 最近4.53買左隻1571 13000股 系做汽車內飾既本身覺得隻股手頭有大約5年訂單 而且還多左tesla 蔚來 同小鵬汽車既訂單

埋e加好多汽車，電動車既既第一季季報出左出貨量都仲系增加緊，買果陣市盈率得11倍左右。但得四離多利息，

本身預佢疫情過後，會隨住電動車既增長而增長。同資本開資慢慢減少派息都越來越多，未來一兩年內有豐厚既收益，

但e加大跌到3.96我開始懷疑我買貴左好多，請問我仲keep 唔keep得過？

龔成老師︰

當我地進行企業分析時，要睇一些長期因素，中短期情況不要太過著重，要睇核心。同時在估值上，市盈率低過10倍不一定平，每間企業都有佢自己合理的市盈率，如果企業本身獨特性唔夠強，就未必值得高市盈率。

信邦控股 (1571)業務主要係為中國供應載客車輛的汽車內飾電鍍零件。

業務上，佢都算有投資價值。但睇翻佢過去1,2年表現，未見好突出，唔算好受惠於新能車發展。

初步睇佢都有投資價值，但只是中等。現價算合理區頂位，你投資此股，但若持貨太多，建議沽部份，去平衡風險較好。

------------------------------------------------

Q21710：

老師你好，本人42歲, 月入$25000現金約50萬, 持有以下股票︰

0012 - 1000 @27.90
6823 – 1000 @10
0003 – 1000 @11.5
0002 - 500 @70.5
0016 – 500 @99.95

1833 – 200 @80.7
2382 – 300 @193.4
9988 – 200 @244.5
3067 – 600 @17.7

1928 – 1200 @37
1810 – 2000 @23.7
388 - 200 @469.7
6993 - 2000 @11.92

另月供盈富$2500現大約有1850股及領展 $1500, 約360股

請問以上組合可以嗎? 不同股票會否持有太多，如想加貨應該加那一隻。我收入不多有機會做到財務自由嗎? 有何策略?

謝謝解答

龔成老師︰

其實每個人財務自由定義都不同，你睇翻你自己目標。

但相同地方是，大家都要透過財富增值，先去累積一筆資金。到有一定金額，就換成收息資產去創造現金流，去達成這個財務自由目標。

我們運用的方法，就是「先增值，後現金流」，其實你這刻年齡未大，應該著重財富的增值，到了一定的年齡及擁有一定財富後，才將持有的財富，配置到現金流類別，利用現金流去達到財務自由。當你的被動收入，大過基本支出時，就稱為財富自由。

你現時持有股票，都係有質素，都適合你。

但比重上，有少少偏重左係潛力股(1833, 2382, 9988, 3067, 1810, 0388)，令組合風險偏高。

但由於佢地都有質素，而且唔好高左好多。你只要新資金，集中翻係平穏增長股，令潛力股比重慢慢回落至4成，就可以。

現時大市只在合理區，你月供部份無問題、照做就可以。但最好每月除了月供外，都有一定資金可以儲蓄。

而這些儲蓄，就連同50萬一齊等大跌市機會，才出手掃貨，並長線持有。

------------------------------------------------

Q21711：

龔 sir, 近來開始睇你的FB及書，了解更多理財知識，獲益良多，現請教怎樣步處退休安排。本人预期下年退休， 有物業自住及資產如下:

現金: 約300萬

股票:
煤氣 17,000 股
中銀香港 2,000 股
港鐵 1,000 股
海爾智家 1,400 股

請問怎樣安排可達至每月有現金流$12,000 - $15,000?

可否月供收息股加少許潛力股，如 3067?

感激萬分

龔成老師︰

如果你希望退休後，每月有1.5萬蚊現金流，以股息率6%計，你需要本金300萬。

因此，你現時資金，基本上數字已足夠達至退休目標。

由於你退休所需資金己經存在，其實你已可以為你退休組合，開始進行配置。

至於你現時持有的股票，基本上都有質素，而煤氣（0003）、港鐵（0066）、中銀（2388），雖然未算完全的收息股類股，但風險不高，都可留在退休組合。

另外，你可以將這$300萬，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

至於現有持股和你提議的安碩恒生科技(3067)，雖然有質素，但由於佢地作用主要係增值。而作為退休人士的你，增值已經不太重要，重點反而係創造穏定現金流。

所以，你可以開始慢慢將現有持股，換碼至收息股中，去增大你組合產出現金流的能力。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之需。同時，若投資市場大跌，你可以在這時買到更多的收息股，股息率會進一步上升。

你可以將$300萬資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q21712：

Hello. 睇完你的選股勝經及股票勝經後. 發現自己有幾隻股票 係因為人性因數而買入而非理性分析.

例如美團3690 係240 有一手. 後來經估值後 PE合理區間為 $132 - $240 左右. DCF 方法為 $167 - 213. 對於重新檢視後發現 因為買入在昂貴區,

我地應該點樣應對? 我明白買賣在於企業本身的質素. 但考慮整體組合, 我應該持有定出售，去張資金放入另外有經分析過又合理區下的股票?

龔成老師︰

我地投資一隻股票前，必需先做好分析和估值，之後出手，才算正確方法。

但由於你已買入，我地就應審視翻，這隻股票有無質素，去決定是否持有。因為已買入，所以重點已經係睇質素，買貴左，定平左，而一刻唔會係我地持有與否的理由。

若分析後，發現此股係有質素。我地就要了解，佢是否適合我地成個財富配置。

以美團(3690)為例，佢係潛力股類，但不確定性較高。若你係退休人士，就不適合持有，有質素都要沽。

若你係年青人，這股適合。但佢佔你組合比重好高，我地就要沽少少，去平衡個風險。

美團本身係有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，之前明顯貴，之後回翻好少少，大約合理區頂至略貴。

你持有此股係可以，但此股暫時不宜太大注。

------------------------------------------------

Q21713：

老師，我男朋友之前入左4手中國碳中和(1372)，在5.5買入，你覺得這股票有前景嗎，長線持有可以嗎？謝謝你

另外，我都睇好新能源股，老師對於大唐新能源01798有咩看法？可以分注吸納長線持有嗎？

龔成老師︰

中國碳中和(1372)主要在香港從事土木工程項目、樓宇建造和保養；以及開發、生產及銷售汽車發動機。

企業規模唔算好大，股價、營業額和盈利都十分波動。過去有多年出現虧損，加上過去幾年，核數師都比出「無保留意見 (修定報告)」

雖然唔一定有問題，但我地對這類股票，就要保守少少。

整體而言，此股投資價值不高，你勉強可以好小注持有。但長線計，換至其他優質股較好。

大唐新能源（1798）主要在中國專注於風電項目的開發、管理及營運。

佢要從事風電等新能源的開發、投資、建設與管理，低碳技術的研發、應用與推廣，新能源相關設備的研製、銷售、檢測與維修等，與新能源業務相關的培訓、諮詢服務，以及房屋出租。

過往的業務發展不差，長遠都有投資價值，不過規模較細。現價合理區中上部，可分注，但唔建議投資太大注。

------------------------------------------------

Q21714：

Sir：這些年來不斷看老師的書和 Facebook post，使我的理財和投資知識增長不少。

今次想請老師你看看我的投資組合，給予我一些意見。

我現年27歲，全職+freelance月入為$3萬至$3.5萬，扣除開支每月可儲約$2萬元。

目標在5年後Full Pay買入市值$300萬以下的村屋單位自住，並於40歲前財務自由過半退休生活。

現時手持$20萬現金和總值約$40萬股票，組合如下：

2 中電 117 @$74.89
5 匯豐 835 @$43.83
66 港鐵 257 @$42.10
1810 小米 1000@$26.54
2800 盈富 363 @$27.19
9988 阿里 1036@$250.36
ARKK 27@USD$140.46
TSM 34@USD$125.93
PYPL 10@USD$253.40

中電、匯豐、港鐵和盈富月供$2000，阿里就$3000。

因為尚算年輕，所以股票組合側重於增長股。最近科技股回調不少，雖然有時會因而感到憂慮，但憂慮過後明白波動只是一時，應該把目光放遠。

比較擔心的是ARKK，高位買入太多了，現正盤算是否應全數賣出轉做現金，然後等待時機買入VOO，還是在低位時再加貨？

老師認為我的組合還有其他地方需要作出調整嗎？

另外，我正考慮購買儲蓄保險/年金，希望40歲後有固定收入/一筆錢用作日常開支，你認為儲蓄保險還是年金會比較適合我？

老師對我的40歲前財務自由計劃還有其他意見嗎？
Thanks!

龔成老師︰

不論是置業，還是你財務自由目標，都尚有一定時間，係而一刻我地應先做去增值部份，累積一筆財富，為這2個目標作準備。

你現時持股和月供選股，都係有質素。但中電(0002)和匯控(0005)主要係收息，增長力唔高，不宜持有太多。

而儲蓄保險和年金，這類產品，都不太適合用於財富增值。

以你現時27歲去計，可以投資「平穏增長股」和「潛力股」。你每月5成儲蓄，即是用$10000做月供。其餘先儲起，用一邊月供一邊儲蓄的策略。

選股上，除了盈富(2800)和港鐵（0066）這類平穏增長股，你都可以投資同是平穏增長股的VVO、金沙（1928）、恆基（0012）、平安(2318)、中銀（2388）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下的另一半儲蓄和$20萬現金，我地就等機會，當大市出現較大回調，就加大力度掃貨，然後作長線投資。

至於ARKK，係有質素。但你預佢股價較波動，係潛力股類，要控制整體注碼。但現貨唔洗沽，長線持有就可以。

我假設投資回報有10%（連股息再投資），你每月投資$20000 + 現有資產60萬(現金和持股)，5年後大約會增值至240萬。

但我唔建議你用FULL PAY去買屋，因為現時係低息環境。若你有一定投資知識，應用借貨模式買入物業，以便留下較多資金去做增值。

假設你動用一半資金去置業，之後再用同一方法去增值至40歲，大約可累積到500萬。

再將佢換成6%收息資產，每月大約可以創造2.5萬現金流。

你可以用我以上預算作為參考，因應自己情況和目標，再作調整，去提高達成你目標的可能性。

------------------------------------------------

Q21715：

老師你好，本人持股2318，貨量唔多，長線看好，但睇返新聞先知有華夏事件，我在87蚊買的，適宜在81蚊多買一注嗎？

另外亦有939，有20000股，在2018年買入，一直跌，買入價7.8左右，宜繼續買入，定收住息先？

手上有中國人壽20000股，16.3買入，長線看好這公司嗎？

龔成老師︰

華夏幸福(600340)公司出現流動性緊張，平安(2318)為其第二大股東，在此公司投資額約為540億。

以平安資產規模計，算唔上一個大投資，而且集團最終損失，都不是以這個投資額作準。

因此，這個問題唔算係好嚴重。反而要留意，將來會不會陸續出現同類問題。如有，就反映平安係投資決策上，可能有不足之處，那就有需要扣分。

暫時睇平安質素依然存在，你可長線持有。但再加注，最好相隔10-15%，所以建議等人回多少少先。

建行(0939)有質素，但主要係收下息。若你目標係收息的話，不用理股價波動，照持有就可以。

中國人壽（2628）並不是無質素，不過增長力唔強。同埋企業的賺錢能力不及過往年代。

相信這股唔會再大跌，但要佢大升都不易，長線持有價值都算有，但暫時唔好對股價有太大期望。

若你持貨不多，係可以。相反你持貨佔組合較多，建議沽出部份，換至其他優質股﹐去平衡風險。

------------------------------------------------

Q21716：

老師，我又來請教你了，因為我多了月供的預算，以及媽媽聽我說願意把自己只懂得放在銀行的其中10萬儲蓄嘗試給我幫她投資，

為了保險起見，還是想問問你的意見~另外我也看了你的財務自由行，80後百萬富翁，五年買樓四部曲，50優質潛力股等書！

現在排緊預約你的股票勝經呢在100多名後哈哈。

我今年剛滿27歲，打算幾年後結婚置業，現在月供緊：

2800盈富1000
0027銀娛1000
3067 安碩恆生科技1000

另外有兩手3067和一手小米

1. 過多一段時間，我供完自己讀書後，每個月會再多出7000可投資，總共每月可投資金額1萬。因為老師你說要預留些資金，所以打算每月儲蓄4000，投資6000

（還是可以再多些？因為我今年才開始投資股票，起步較晚）。

請問以下6000的投資方案哪個較好？是方案一分散投資，或方案一集中etf投資，因為手續費的問題，或者老師你可以建議我怎樣調整我的投資方案嗎？

我還年輕，可承受風險較高，那麼舊經濟股和新經濟股可一半一半嗎？甚至新經濟股比例可再更高？因為想五年內可買細價樓投資。

方案一:
2800盈富2000
0027銀娛1000
3067 安碩恆生科技1000
1810小米1000/或港交所好？
1177中生1000

方案二：
2800 盈富2000
0027 銀娛 1000
3067 安碩恆生科技 3000


2. 另外，我媽媽（佢年齡唔算大，相信仍可財富增值），佢願意拿儲蓄其中10萬給我嘗試投資，不過她說虧了我就要賠給她成本，贏了就算我的哈哈。

她比較保守，我打算買收息股，現在幫她買了一手0548深高速@8.020，剩餘84000左右，打算會繼續買收息股如港燈、香港電訊、工行、置富等老師你說過的收息股。

那麼，我媽媽是否應該將其中一半投資平穩增長股如盈富、領展、港鐵等呢？還是收息股比較穩當，因為我不能虧了她本金哈哈。若賺了我還是會分她一半的。

謝謝老師你的無私分享，問題比較長，希望不要介意，繼續向你學習！

龔成老師︰

1) 你現時月供$6000，儲蓄$4000，根據大市平貴水平而言，已經係可以，唔建議再調高每月供款。

你現在還很年青，操之過急，反而會對你不利。只要用對方法，長線持有這些優質股，自然會有不錯回報。

其實方案1和2都適合你，選擇重點會係月供成本和你對這些股票的認識。

若你係特別睇好小米(1810)、港交所(0388)和中生(1177)，你可用方案1。

小米(1810)、港交所(0388)都係好優質，你可以視乎個人喜好和認知程度，去做決定。

如果你想月供成本少D，或者你唔係咁熟這些潛力股，又或者想分散D個風險，方案2會較合適。

2) 至於你母親，雖然以佢年紀計，的確好似你所講，係有一定增值需要。

但由於佢個人比較保守，風險承受能力不高。我建議你照她意願，集中係收息股，會比較適合。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

但緊記，係你創建收息組合時，唔好太集中係個別企業和行業，以免有過度集中性風險。

------------------------------------------------

Q21717：

老師想請教下你，3883及2233、799邊隻較有質素？現價邊隻較抵買？

龔成老師︰

其實3隻股票，性質好唔同。我建議你除了價格值博率外，都要因應自己風險承受能力，去選股。

中國奧園（3883）主要於中國從事物業發展及物業投資業務，近年增長快速，這是受中國樓市保持向好的情況帶動，加上佢利用大量負債運作，當好景時，佢就會好好賺。

但佢的負債有點多，有危有機，好景時好好賺，但逆景時，就幾大件事。

所以，這類股不是無前景，現價合理，但此股風險較高，唔建議大注。

西部水泥（2233）主要在中國陝西省從事水泥生產，以「堯柏」及「堯柏水泥」商標銷售，主要用於建設高速公路、橋樑、鐵路及道路等基建項目以及住宅樓宇。

業務不過不失，雖然都有d質素，但不算好強，產品價格自主能力不高，賺錢能力不算強。

比較吸引的是現價唔貴，但長遠對佢增長就唔好有太大期望，可以視為收息股。這類股唔建議太大注投資。

IGG（0799）業務上都有質素的，但卻是有風險的類別。

雖然佢財務數據不差，但業務本質的不確定性大，軟件及遊戲都是變他較大的行業，這種不確定性可以令企業好勁或好弱，因此你要明白這點。

佢股價上落大是正常的，如果你投資要明白這點，就算長遠企業價值向上，都要明白股價波動。這股不是無質素，現價算合理。但由於有風險，因此唔建議大注。

------------------------------------------------

Q21718：

龔sir，可否分析一下現在經濟狀況，是否偏向滯帳。

現在由於（1）疫情，資源生產受影響，（2）另加上多國量寬政治，引致資源價格大升，不只是大升，是創歷史新高。

但另一方面，經濟重啟亦受各地疫情影響，經濟停滯不前。通脹升溫，而經濟沒跟上，引致滯脹危機風險，現在是否很高。

以往，很少出現滯脹，但印象中，有一次，是所有資產價格會下跌包括股票，物業，債券。。。那時是現金為王。

可否聽聽龔sir你的看法。

龔成老師︰

各國係疫情期間，加大印銀紙速度，令市場預期通漲會進一步升溫。引至滯脹機會，係存在。

但我地係制定投資策略時，應集中在企業層面去作考慮。而唔係估會否出現滯脹，或者出現後，成個大市會點走向。

我地做架事，其實應該係偏向被動，而唔係去預估將來。只要市場出現變化，令價格調者至有利位置，我地就可以有策略地出手。

當然，宏觀經濟唔係完全唔理，但只會佔較少比重。較要留意，這類宏觀因素變化，會唔會影響到企業長線發展，咁就可以。

------------------------------------------------

Q21719：

龔sir你好，睇完思維篇之後，有幾題問題想請教老師

（1） 書中提及過辭職，我想問當時你同上司講辭職原因係咩？

（2） 書中提及進攻型思維，前提係都要有基本防守，我股票組合大約$30萬，當中大部分都係水桶2，想問咁算唔算防守？

（3）本身月供緊1177，2800，788，066，下個月將788變成供1211(如果唔貴的話)，算唔算增加進攻？可行嗎？

（4） 如果我強項及興趣在於股票/理財/投資/數學，應否全面集中提升這些技能既實力，還是都要發展其他技能？

（5）小弟幾鐘意數學，但數學能力其實可唔可以幫助理財/投資？

謝謝龔sir指導

龔成老師︰

1) 同佢講我想尋找其他發展，首先想休息下，之後再轉其他工作。（但其實，當時我已經寫緊書，已經建立了出面的副業，但無同上師講）。

2) 你現時26歲，係財富增值的黃金時期。而且你年輕，風險承受能力，理應較高。

水桶2，係要有，但大約佔組合一半好了。因為水桶2有增長力，但唔算最高，主要係幫你穏中求勝。

其餘部份，應投入水桶1股票，去做進攻。但我唔係要你盲力地加大比重，因為始終水桶1要求投資知識較多，風險也較大。

如果你經驗較淺，可以先小注，大約佔組合3成左右。此期間，你要努力學習，去提升自己投資知識水平。到你有一定知識和經驗，你可以投資到約5成比重。

3) 要睇你供款比例，水桶1(1177, 1211, 0788)和水桶2(2800, 0066)，應大約各佔一半，當然你視乎投資能力，去再作調整。

4) 我建議你先集中係自己強項，但唔代表其他唔理。就好似我自己，投資商業/股票較強，所以會先集中這部份。

但同時間，我都會學習其他地方，令擴闊自己知識之餘，都看看其他地方，有無發展機會。

5) 坦白講，係有D幫助，但唔會好大。除非係會計方面，個幫助就會較直接。

------------------------------------------------

Q21720：

龔成老師，近期股市調整令股票資產-30% 心理上有壓力，本人持有 9988，3690，1810，175，6690，2400

請問以上是否有質素的股票？是否應該長期持有？現在應唔應該溝貨？感謝

龔成老師︰

你持有股票都係有質素，可以長線持有。你要明白，就算優質股都會有波動，唔好太受個買入價影響判斷，要從企業質素去諗，到底隻股票值唔值得長線持有。

但我發現，你持有的股票，都是近半年較熱門的類別，反映你在選股時，只跟著市場較多人投資、近期較多人談論的類別去選股，而這類股（近期熱門類），一般都已經炒起左，因此一般都貴。

如果你日後都以這方法投資，往後仍是好易買貴貨的情況出現。

但好彩的是，上述持股，不少都有質素的。

另外，我想你留意，以下幾個問題。

首先，你組合中除了海爾智家(6690)，全部都係潛力股。佢地雖然有增長潛力，同時風險都較高，不宜持有過多。

特別係心動公司(2400)、美團(3690)這類不確定性高的公司，投資時不可以佔組合太高比重。

就算你現時好年青，風險承受力較高，潛力股都最多都只可以佔約5成，餘下應投資平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

對於你想再加注，我就唔建議。

因為本身你組合已經風險偏高，就算再平，暫時都唔建議加注在這些潛力股。到你組合開始大，個比例回復正常，你才考慮是否加注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21561-Q21580）

Q21561：

龔成老師，我想請問：例如我買入一隻股票，佢$400，假設兩年後佢升到$600，如果佢一直跌價只係跌到$580咁上下，那我應該幾時再入貨？

因為當初我入係$400，由於企業質素好，佢一直升，那我再買的時候，由當初$400， 會拉高購入價？謝謝

龔成老師︰

我地制定入市策略架時候，必定係用當時平貴，去作指標。

首先，我地要睇下當時個股價，是否在合理區內。如果已經係偏貴，就唔會再加注。

若在合理水平，你就要睇你資金多寡、持貨是在什麼水平買入，去作決定。

每個股價水平，都有一定入貨比例，越接近合理區頂，動用資金會越小。若越接近平宜區，動用資金入貨比重，就會越高。

以你個例子作解釋，若你資金係好充裕，可以分多注。$400為合理區中下部，$580算合理區頂。係而個情況，你都仲可以在$580加1小注。

但若你資金不多，只能分2,3注。因為注數少，那就應該等跌到接近平宜區，一個明顯平的水平，才出手入第2注。

------------------------------------------------

Q21562：

阿SIR 你好，我正在計緊股價合理區，但吾肯定有冇計錯

2382舜宇光學

5年每股盈利：
2016(1.3), 2017(3.2), 2018(2.6), 2019(4.08), 2020(5.31)
平均: 3.3

10年市盈率:
10.85/ 18.18/ 18.52/ 24.88/ 31.53/ 32.89/36.05/37.06/ 39.38/ 54.23
RANGE: 24.88-36.05

如果假設增長有20%，即3.96

即股價合理區: 98.5-142.76

咁現在股價198.6 咪好貴…..我有冇計錯…..?謝謝

另外，我想小米股價合理區….但得3年市盈率，係咪計吾到呢?

龔成老師︰

由於智能手機近年快速發展，對高質手機鏡需求大增，預期長線都會維持較高需求水平。

因此，我地係計算時候，用較近年數據，才會更有效反映實際情況。

每股盈利，我會用2017-20年的4年平均值，再用+25%增長去計算，大約係$4.75。

至於市盈率區間，係正確。故用市盈率去推算的合理估值，大約為$118 - 171。

但你要記住，這只是其中一個估值的角度。投資者在進行估值時，要同時用多個估值方法去進行估值，才可以得出更立體的結果。預佢現時估值為略貴，回多2,3成合較合理。

至於小米(1810)，由於上市唔太耐，參考數據會較少。我地可以找相類似企業，用佢地市盈率，去作參考。

小米收入以手機為主，舜宇光學(2382)和比亞迪電子(0285)雖然業務上係不同，但同時間係直接受智能手機發展所影響，都有一定參考價格。

你預合理市盈率，大約為22-30倍。再用上市3年的每股盈利平均數計，再做少少調整，會得出估值為$15 - 24。

但始終參考數據較少，加上企業在急速發展，所以以上估值，只係一個較粗略估算。未來，你要再就其發展情況，作進一步調整。

------------------------------------------------

Q21563：

你好啊 龔成老師，本人是新手上路，希望你能指點一下小弟:

1)想問下 9618 京東集團 你有咩睇法啊？有冇長線持有價值？

2)睇你fb Q20570 解答，你建議可以做月供1810小米，想問下月供跟每月小注手數買入有無分別？

3)另外想問下美股Tesla而家還值得長遠投資嗎？

4)睇你fb主要都係分析港股，想問下美股是否適合新手投資者？

希望得到老師的解答，謝謝。

龔成老師︰

1) 京東（9618）業務有質素，發展仍是正面，不過現價就唔算平。

佢係一間電子商業銷售平台，佢定位為「以供應鏈為基礎的技術與服務企業」，現時是中國第二大電商，有一定的品牌。同時，根據《財富》按收入統計的全球500強排行榜，集團是中國最大的零售集團。

佢目前業務已涉及零售、數位科技、物流、技術服務、健康、保險、物流地產、雲計算、AI和海外等領域，其中核心業務為：零售、數位科技、物流、技術服務四大板塊。

京東已建立自己營運覆蓋全中國的物流基礎設施，以支持電商業務，打造了線上購物體驗，係2017年、2018年、2019年，活躍用戶數達到了2.9億、3.0億、3.6億。可見已建立了一個巨大的網絡。

佢經營線上零售，以及電商平台業務，線上零售業務方面，從供應商購買產品，然後直接銷售給客戶，並從24,000多家供應商採購商品。

佢的物流基礎設施佈局覆蓋了中國幾乎所有的區縣，包括遍佈89個城市、累計總建築面積約1,690萬平方米的700多個倉庫，包括京東物流技術開放平台所管理的倉庫面積。

從質素上，這股不差的，現價算是合理區中上部至頂，可小注，這股是可以長線投資的。

2) 我在這條所講的分別是「月供」和「小注」，2個是不同的入貨模式。

「小注」意思是，只可以先用你預設投資在小米(1810)的資金，其中「一小部份」。例如你預備總共會買5手小米，那小注，就代表你可先入1手。

因為，現時價格只係合理區頂部，價格值博率不高。但由於若果無貨，而我地估唔倒佢將來升，定跌。如果一直升，我地就會錯失入貨機會。

所以，係平衡2者利弊後，先買入小注，會係較好做法。

而月供，則是你每月用一個固定「金額」去買入股票。股價高時，買入股數會少D。股價低時，能買到股數就會多D。

透過長線去做，令個買入價拉平均。

「月供」模式會較適合初學者，因為佢地定平貴能力較弱。用月供，可以減少佢地買貴貨的風險。

3) Tesla(TSLA)不差，增長快，近年當業務由虧轉盈時，股價向上好勁。不過穩健度不足，股價上落好大。

例如在資金上，要不斷在市場各途徑集資，以維持營運及研發，未能憑以戰養戰的模式，去穩健地發展新項目，資金鏈斷裂風險存在。

市場方面，有危有機，因為電動車是高增長市場，但行業結構變化大，存有未知數。

另外，股價上落太大，市場超前反映前景因素，只要增長力比預期差少少，都會有明顯回落。

如果你長線睇好，預佢股價上落一定好大，唔好理中短期股價，只要你投入注碼不過多，可長線，等更大收成。

4) 預期未來一段時間，中國和美國都會係全球最重要的經濟體系。因此港股和美股，都係有投資價值。

作為新手，如果你想投資美股，但又對美股唔係好認識，你可以先投資相關的ETF。以下2隻股ETF，都係不錯的選擇。

當中，QQQ波動性會較高，要注要風險。

Vanguard標普500指數ETF〈VOO〉，是追蹤標普500指數的ETF。

Invesco QQQ Trust(QQQ) 是追蹤納斯達克100指數。

------------------------------------------------

Q21564：

175吉利，股價高時買入兩首$31.2。現在雖然有純電動車的發展，但遇上原材料缺乏及成本問題未見有上升趨勢。

請問龔sir，需要繼續長線持有？係咪較難上返買入價的水平？謝謝！

龔成老師︰

短期可能會有不利因素，影響集團盈利能力。但我地分析時候，應以長線作為考慮目標。

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

你現時主要問題，係買入價偏貴，令帳面出現虧損。

但吉利係有質素，長遠價值總會上升，從而帶動股價上升。相信長遠佢會上返你買入價，這股票值得你長線持有。

------------------------------------------------

Q21565：

龔成老師，我是一名老師，沒投資經驗，受你指導開始月供股票。因遲些會同仔女去英國讀書，要停月供和賣出股票。

到英國後要找工，靠saving 先生活，找到工後可怎樣繼續投資致富？

龔成老師︰

其實做財富增值的策略，在香港，定英國，都唔會有太大分別。

同樣都是根據你年紀、投資取態、經驗等，去建立一個長期、優質、平衡、又適合你的組合。

當你到達英國，開始有穏定收入，而每月又有閒錢可以動用時，你就可以月供一些優質股，去做財富增值。

在開始投資計劃前，你最好留有半年開支，作應急之用。

如果你在英國都可以投資港股，你可以用以下股票。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股︰安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。

由於你無投資經驗，而潛力股有一定波動性風險，你可以先集中係平穏增長股，甚至盈富(2800)。

此期間你要努力學好投資知識，到你有一定投資經驗﹐可以加大潛力股比重。

另外，你要留意，如果你是在短期內離開香港(少於1年)，你就要開始，慢慢將手頭上的股票，分段沽出。

唔好等到走前一刻，才去一次過沽貨，因為咁樣個價格波動性風險，會太大。

------------------------------------------------

Q21566：

老師你好！最近幾個月先開始睇你嘅書，發現自己已經太遲起步，加上從未投資。

小弟今年已36歲，扣除開支，打算做月供股票，每月$3000，知道我呢個年紀應該做啲平穩增長股，例如2800。

但希望可以先增值，所以諗住投資一啲增值類，以下幾隻係自己心水

2800 盈富基金
0388 港交所
0066 港鐵
1810 小米

請問老師認為只有$3000應該如何分配月供？還是有其他更適合？

感謝老師

龔成老師︰

你現在才36歲，尚算年青。只要你認真學習，學好投資知識，用正確方法去增值，都可以有不錯的效果。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，投資應以增值為主，建議你用「平穏增長股」 + 「潛力股」作增值組合。

你每月先用$3000做月供，係可以。但現時大市只在合理區，除了月供那$3000，每月都要一定額外儲蓄，等出現大跌市時，可以出手掃貨。

你上述4隻股票﹐都係適合的選擇。但由於你每月供款不多，加上你未有投資經驗，你最好同時留有現金，不能無資金在手，你可以先集中係盈富(2800)$1500，另外3隻各供$500，不過這個組合會出現一個情況，就是你供$500，每月能買到的股數會較少，你要好長時間先能有一定的數目。

你可以自行決定，是否長遠進行這計劃，又或將計劃改成盈富（2800）$2000，再加上其中一隻股。

------------------------------------------------

Q21567：

老師，我現倉輸緊17萬，請問我有咩股係需要減或者唔揸，定可 繼續長揸？
跌到我心慌

916 21000 股@11.828
1801 500股 @95
6969 1000股 @71.1
9666 800 股 @78.6
9995 1000股@136.25

龔成老師︰

首先，一定要了解股價下跌的原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

你現有股票，係有長線投資價值，但佢地都係波動性偏高架類別。

好似信達生物（1801）和榮昌生物（9995）佢業務上，係有潛力架地方。但由於佢一直無有盈利，故不確定較高。

唔係話佢地無質素，但由於佢地架價值都係估估下，所以當市況轉弱，佢地自然就會較波動。

因此，這兩股唔建議持有太多。

金科服務（9666）上市不久，新股好多時都要過一段時間才見真章，現時要準確估值，會較難。

至於餘下兩隻，質素會較好。

這些股票可持有，但不宜佔組合太多，以免風險過高。

------------------------------------------------

Q21568：

不好意思，想請問教陽光能源，廣匯保信，日照廣裕廊，還是思捷環球，這些都持手，看能否走出來。

恒騰這股我從16買了，現在只有9元多，還值得溝貨離場嗎？

龔成老師︰

陽光能源(0757)多年出現虧損，加上負債沉重，建議你沽出。

廣匯寶信（1293）和日照港裕廊 (6117)投資價值好一般，建議你每有反彈，就慢慢沽出，換至其他優質股會較好。

思捷環球（0330）當多年前，環境改變令佢「生意持續下跌」，佢的質素已經改變，佢已經要進行止蝕的動作。

恒騰網絡（0136）有危有機類。

現時企業盈利不多，但市值極高，市場對「前景」有無限幻想，有時炒作會升好多，但跌都可以好勁。

如果長遠業務成功，會爆得好勁，但失敗，會跌得好勁。

因此，若你持資貨較多，建議沽出部份，去平衡風險。餘下的小注，可以守。

我發現你手上的持股，都有長期不止肯蝕的情況，相信你有些投資概念有核心問題，你要小心，最好之後改正翻這個概念，記住，我地不是睇賺蝕，而是睇質素，質素不好就是賣出。

另外，你在加注概念上，同樣有問題。記住，我地決定加注與否，要睇幾個因素。但絕對不會是因為「拉低平均買入價」而去做。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

------------------------------------------------

Q21569：

hi 龔sir，想問埋3808中國重汽值唔值得投資？見佢2020年營收同純利都好唔錯，分別升左56同89%，純利有成74億，但估值得5百幾億。

值唔值得中長線投資？打算17-18蚊建倉。感謝

雖然依家集中賣重型卡車，唔知將來有冇機會發展新能源技術

龔成老師︰

中國重汽（3808）這股都有質素的，佢主要業務為專營研發及製造重型卡車及有關主要總成及零部件。總部及主要生產基地位於中國山東濟南。

佢連同母公司按銷量是中國最大的重型卡車生產企業。長遠來說，其實是有質素的。

睇翻佢資料，佢重型卡車產品品種包括貨車及貨車底盤（總重超過14噸）、半掛牽引車（准拖掛總質量超過12噸）、自卸車及各類專用車底盤等，是國內驅動形式最全和噸位品種最多的重型卡車生產企業之一。

重型卡車產品廣泛服務於基礎設施、建築、集裝箱運輸、物流、礦山、鋼鐵及化工等行業的客戶群。

過往的生意與盈利理想，有長線投資價值。

將來會否全面投入新源市場，都係未知之數。

而現時質素而言，此股有投資價值。17-18蚊算係合理區中至上部，可分注，並長線持有。

------------------------------------------------

Q21570：

早晨龔sir！我之前已經有留意你既堂，不過因為小朋友剛出生不久，呢兩年夜晚都要早早回家，所以一直無報讀，我都有曾經諗過，問問你會否用zoom或teams搞網課，不過因為可能會被人偷錄，我都不好意思問出口

至於打算加注的資金，我最近拜閱緊你的50潛力及50值博兩書，當中50值博真的好厲害！

龔sir你於18年尾出書，到現在21年首季，約2年半的時間，超過一半公司已經超額完成倍增成果；另有部份即使面對疫情逆境，都沒有遭受毀滅性打擊，公司非常優質，證明龔sir你分享既理論同埋眼光都非常正確！

龔成老師：

對呀，因為股票班，由於內容太重要，只有實體班，唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

至於《50股》一書，我寫的方向，是從企業長期發展去寫的，中短期股價可能波動，但長遠這些都是有質素的企業，因此都有長期投資的價值。

------------------------------------------------

Q21571：

龔sir你好，四年前受你啟發，開始月供股票、工作跳出舒適區，人工由當時14k變為現時$30k，生活質素大大改變了。

最近一年，我更踏入一生令一階段，並有想在這一年置業的打算。

本人33歲月入$30k，月儲$20000。

太太29歲，月入$23k，每年跳point，月儲$14k。

現在只有我月供股票：12 $2000，66$2000，1177$2000

我們有130萬現金，股票80萬（其中是月供1211@$50.687 1883股，謝謝老師）

1. 我們打算買6.5m的樓，應該要借9成定8成好? 借9成還可以有現金投資，借8成不用還太多利息

2.買樓後，月供應該要停供還是繼續月供?

3.股票組合中有12、66、823、1177、1211、1810、1448、9988、2628，新經濟股跟舊經濟股佔5050，未來應該要轉換股票組合嗎?

謝謝老師回覆!

龔成老師︰

1) 現時利率較低，盡借9成，令自己可以空出較多資金，來進行投資增值，咁會較好。

但都要留意，成數愈高，按揭保費會愈高，你要自己計算一下，而我相信8成半或9成都可考慮的。

2) 月供是一個長線策略，盡量維持月供。

而且，係你買入一間物業後，個財富組合會較左係物業個邊。因此，你必需去加大翻股票比重，維持月供，係較理想的做法。

當然，買樓前就不用太進取投資股票，等完成買樓過程後，先慢慢加強股票部分都得。

3) 以你33歲計，係可以。但新經濟股會較波動，你要明白這個風險。

另外，你持股中有不少地產股(0012、0823、0066算半隻)。緊記個別行業，佔組合比重不能高於30%，否則會有過度集中性風險。

你現時每月月供$6000，以你們每月儲蓄水平計，係偏少﹐最好可以做到一半儲蓄，用於月供股票。

持股中，中國人壽(2628)近年增長力弱左，質素只係中等，不宜持有太多。

其餘股票都有質素，你長線持有就可以。

由於你未來一年會置業，時間太短，你要先扣起這部份支出，不可用作投資。

現時大市只在合理區，扣除置業開支後的現金，可以先儲起，等大市有明顯回調才出手。

------------------------------------------------

Q21572：

老師，開始遇到樽頸，已有物業及股票，不知點行下一步。

只有車位及細價工廈選擇，唔知老師新作千萬富翁有冇教?

龔成老師︰

首先，我地要從成個資產配置去考慮。你現時組合中，己持有物業及股票，但當中比例是否平衡?

如果係明顯偏重係物業，而一刻，你要做的事，就是加大股票比重，令個組合平衡翻。

若果組合平衡性無問題，你就可以考慮其他資產，好似車位及工廈。但留意這類物業，比較適合較專業和有經驗的投資者。

近年車位和工廈的回報率不高，投資價值只屬中等。 但如果你找到租金回報率較高，有潛力的項目，都可考慮。

我本新書《80後千萬富翁》﹐都有講述一些有關車位和工商廈等的投資技巧和注意點，你可以參考下。

------------------------------------------------

Q21573：

你好呀，睇左你facebook都有一段時間, 有跟你教入左1211,靠佢令到整個組合不至蝕，因之前有原本高價入落的 0002/0011/0303/939，現有持貨市值720k+。

補充小小個人資料，48歲，現每月淨大約35000，其中5000會多供個人MPF, 有11000會去月供股票。

而加想加大月供去到20000, 打算供以下股票，而1177/1810/9988 是打算新增加的，希望個組合唔止著重收息。

呢個組合會否太散，有需要減數目或換其它股？同埋現市況，會否太大比重放左落月供？ 唔該哂！！！

0002 2500
0011 1500
2638 2000
2800 6000

6823 2500
1177 2000
1810 1500
9988 2000

龔成老師︰

你現時中電(0002)、恆生(0011)、偉易達(0303)和建行(0939)雖然帳面有虧損，但這些股票都係有質素。

而且佢地都係收息股，持有目的主要係收息。以你48歲，你組合中係需要有一定收息股，故你可以不理股價波動，照持有就可以。

而比亞迪(1211)質素，但以你的年齡，其實要開始慢慢為退休做準備。

比亞迪(1211)、中生(1177)、小米(1810)、阿里(9988)這類潛力股，增長潛力係高，但波動性都大，現時最多佔組合約2成好了。

你現時月供組合，基本上都可以，唔會係太散。

但大市只在合理區，如果$20000就係你每月可投資資金總數，你就要按比例減少少個月供供款。令到可以每月留有一定現金，用來等大跌市時掃貨。

最後，你要緊記隨著年紀漸長，潛力股比例要慢慢下降，將佢平均地轉入其餘「平穩增值股」(2800)和「收息股」(0002, 0011, 2638, 6823)中，去平衡風險。

------------------------------------------------

Q21574：

你好，龔成先生！我係一個普通男仔，24歲，大學商科畢業，與家人同住已供滿嘅居屋。

面對香港不斷通脹嘅社會，好多人食飯買樓都成問題。我唔想有一日冇選擇而要住劏房、食冇營養嘅食物、冇好嘅醫療保障、請唔到工人照顧父母。

所以我想學投資，利用資產保障自己同家人嘅未來生活質素。

以目前情況，投資股票係現階段我能夠做到嘅嘢。然後下階段就諗自住物業(2019年抽中居屋前5個號碼，不過應該唔輪到我揀樓)，我會 Keep 住抽居屋。

希望可以請教到龔生喺投資方面嘅睇法！多謝！

工作背景：
合約工作，月薪$17,000，應該續約至2022年
(打算完約後投考ACO)

銀行儲蓄：
$100,000
(每月可儲蓄$10,000)

持有股票：
3067安碩恒生科技 / 100股 / 16.70
1810小米集團 / 200股 / 24.80
0270粵海投資 / 2000股 / 12.24
2628中國人壽 / 1000股 / 16.02

5月份開始月供
0388 香港交易所 / 1000元
0700 騰訊控股 / 1000元

心儀股票
0823 領展房產
1177 中國生物製藥
1448 福壽園
3110 GX恒生高股息率
0066 港鐵公司
1928 金沙中國

龔成老師︰

正確，當不滿現時生活，就要作出行動，去改變。

你現時想法和策略，都係正確。係我地資金不多時，應先用優質股去增值。

到有一定資金，我地就加入其他優質資產，好似物業。令到成個財富組合，更完整和平衡。

你現時係24歲，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

在你持股名單中，中國人壽(2628)近年增長力弱左，質素只算中等，現貨可持有，但不要加注。

而心儀股票中，GX恒生高股息率基金(3110)主要係收息，增長力好弱，不適合你。

月供策略上，你可以投資「平穏增長股」和「潛力股」。你每月5成儲蓄，即是用$5000做月供。其餘先儲起，用一邊月供一邊儲蓄的策略。

除了你所選的2隻月供股票外，可以加入以下這些股票。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

增長力較強的，可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

由於潛力股有一定風險，你現時無太多投資經驗，除了月供0388和0700各$1000外，其餘$3000應先集中係平穏增長股，甚至盈富(2800)。到你學到一定投資知識和經驗後﹐才慢慢加大潛力股比重。

現時大市只是合理區，你現有10萬資金可以先投入3,4萬，用"分注"形式，慢慢買入平穏增長股。餘下資和每月所儲倒的資金，就等大市出現一定程度的下跌，才大力度掃貨，然後長線投資。

學習方面，你要去多讀投資相關書本、年報，新聞和報相關課程。

書本上，你可以睇我寫架"80後百萬富翁"、"財務自由行"和"股票勝經"，都適合你這類初學者。

------------------------------------------------

Q21575：

龔老師，我朋友有買保險公司的每月派息基金，10萬元在一年裡增至11萬，另利息共$7,200。但要限年期5年，若中途要取出，就會有些罰款。

她鼓勵我要唔要也考慮買，幫忙我的財富能增值。

請問若購買這樣的基金，與自行購買ETF / 優質的收息股比較，我比較適合哪一項？

這類基金當中有無一些魔鬼細節
是不太建議的地方？

龔成老師：

你要問清楚，在那些情況會增加到$11萬，然他派$7200，是一定？還是在某些投資環境先有？要問清楚。

另外，$7200是怎樣派？這是指每年？還是甚麼？佢會以怎樣形式派比你？是投入在基金，選是派現金到你手？要問到好清楚。

另外，問清楚5年內賣出，會有甚麼後果。

如果各方面都無問題，這類基金都可以成為財富配置的其中一部分，不過，增長力未必強，你要同時投資其他項目。

------------------------------------------------

Q21576：

龔sir，你好呀～～我係你而家基礎班既學生，首先好多謝你，因為你令我對股票有新認識，由初初讀你本「80後百萬富翁」、到like你FB、到而家直頭報埋你既股票班，我自覺獲益良多。

雖然仲未好掌握選股學問，但從我聽你上堂同睇你既post，都考慮緊自己應該要買咩股票，黎緊我諗住少少地月供買呢幾隻股票，不竟而家隻隻都好似唔係平入價，希望你可以指點下我。

（2382）舜宇光學：月供$1000
（0027）銀娛：月供$1000
（0669）創科：月供$1000
（1448）福壽園：月供$1500
（3918）金界：月供$1500

另外，如果供埋呢隻美股有冇得諗呢？我記得阿sir上堂你話呢隻係水桶1（QQQ 納斯達克）謝謝～

Sir，餘下幾堂我會俾心記聽書

龔成老師︰

以上提及股票，都係有質素，當中金界(3918)、舜宇(2382)、福壽園(1448)波動性會較大。

現時你經驗不多，如果你對這些股票，未算好認識，最好先較集中點係水桶2。到你有較多經驗，才加大水桶1，就會較安全。

至於美股，都有投資價值。如果你對美股股票，唔係太識。你可以用QQQ或VOO ETF，前者係水桶1(追蹤納斯達克100指數)，後者係水桶2(追蹤標普500指數)。

其實月供係一個長線策略，我建議你唔好急於一時，可以等上完堂，對投資有較全面的理解，才去慢慢做配置，咁會更好。

------------------------------------------------

Q21577：

你好， 老師。 我見你之前話太古地產比大古A好。 但太古a既價格不斷上升。

好快可以上番疫情前的水平，而且太古地產的成交量亦比太古a低很多

第日疫情好的話，太古a入邊既國泰都應該會慢慢好番。

龔成老師︰

我地投資一隻股票與否，唔好用成交量作參，要睇翻佢本身質素。

太古地產（1972）有質素的。佢太古地產是香港及中國的綜合地產發展商、業主及營運商。簡單來說分做三個部分：物業投資、物業買賣、酒店投資。

持有優質的物業組合，加上定位於中高檔次，當中的租金回報亦理想，加上物業組合有相當價值，長遠計的租金會保持上升，當然中短期一定有上落。

另外，由於太古地產有發展大型綜合項目的技術與經驗，這是獨有優勢，無論是發展中國又或是外國的項目，都能為太古地產帶來理想的回報，亦會令往後的總租金收入長遠能向上。

因此，太古地產有相當的質素，是不錯的優質股，長遠投資有一定回報。

不過，疫情因素對這企業都有一定的影響，但只是中短期不利，長遠會好轉。

另外，在家工作及網上購物，都會對這企業造成影響，但長遠而言，市民對實體購物，以及實體寫字樓，都有一定的需求，因此長遠仍不差，但增長力可能略有影響，令增長力不會太高。

現價合理中至上部，對追求收息及平穩增值的投資者，這股適合，但就不是高增長類別。

太古股份公司Ａ（0019）佢是綜合企業，佢都正面，但整體質素上算係中等。

但佢業務已經好大，長線增長力會不及1972高。現價算是合理區中上部，你可以分注投資。

而國泰（0293）質素只是一般，航空業對經濟週期較敏感，收入不穩，同時唔算係一個好賺錢的行業，因此這股的質素只是一般（國泰會影響太古A的）。

過左疫情，佢會好翻D，但始終賺錢能力都係弱左，唔好對佢有太大期望。

------------------------------------------------

Q21578：

龔老師：弱弱一問，2823安碩A50 ，3煤氣 及 2828 恆生中國企業，係屬於平穩增值股嗎？

因想改下水桶123的持股比例，唔好意思，打攪哂

龔成老師︰

其實煤氣（0003）有質素，但增長力弱左，而佢改為20送1，反映增長力可能減少左，但不算差。

香港業務不強，但中國部分不差，中短期雖然較一般，但見佢的長遠發展力仍在，但就要耐心點。

由於佢一向都穩定派「相同股息」，在這情況下，反映派息的增長會少左。但整體來說，這企業仍是有質素的。

我睇翻佢近年在中國的投資，仍是保持進行的，每年都有幾十億，這些投資不會好快就見到收成，但這企業就仍是發展中的。我對佢長遠發展仍是正面，只是增長力的問題。

安碩Ａ５０（2823）資目標為追蹤富時中國Ａ５０指數之表現，即是當國內股票升，佢都會上升，是一個中國股票的組合。

相信長遠仍有增長力，不過國內股股價一向較波動，令到這基金都會較為波動，如投資，最好用分注或月供的模式進行。可長線。

恒生中國企業ETF（2828）有投資價值。

這基金的投資目標，是追蹤恒生中國企業指數之表現，即是中國的企業，當中不少都有一定的質素。只要中國經濟長遠增長，而這些企業合理增長，就能帶動價格保持上升。

由於這些國企的股價較為波動，你最好以長期的模式去進行月供，每次供的金額不用太大，以較長時期去平均價格，自然能減少風險。

以上3隻股票，煤氣（0003）係平穏增值股，而安碩Ａ５０（2823）和恒生中國企業ETF（2828）係平穏增長股，至潛力股之間。

增長潛力較煤氣高，同時風險都略高。但相比煤氣，這2隻ETF係一籃子股票，故分散風險能力會較好。

------------------------------------------------

Q21579：

明白, 謝謝老師. 其實我一直考慮一個問題就是, 價值投資是好好, 我在想如果它可以制造現金流會更加好, 因為價值投資需要時間累積.

我亦明白你既投資理念. 先儲蓄後增值. 當增值到一個大數後就可以利用收息策息來賺取穩定收益.

我從2018年開始就想擺脫打工仔既生涯, 我睇左你本千萬富翁, 思維篇的內容可以話就係我而家做緊既野, 不斷去嘗試. 搵機會。不斷明確自己欲望和目標. 我亦相信最後我一定做到.

我而家背景是已婚人仕, 有一女, 準備再添一男. 收入是穩定, 兩公婆加埋有大約10萬收入。

我而家每日都同自己講, 我出年會實現搵到每個月被動收入6萬蚊. 講左一排後發現自己真係會係咁唸點樣先可以達成尼個目標。

我出年係公司做夠15年, 可以攞到七成退休金, 再加埋其他資產, 大約有3-400萬現金, 所以我就係度唸, 我點樣可以運用尼筆資金黎制造現金流, 令到我可以達成尼個每月6萬元穩定被動收入既目標.

感謝老師回覆

龔成老師︰

將資金變成製造現流工具，方法好簡單，就係有策略地，分注買有優質收息資產(如收息股、年金、定息產品、債券等)。

透過佢地派息，從而獲得現金流收入。

如但要做到每月有6萬蚊現金流，以股息率6%計，你需要本金1200萬本金。

以你現時情況，你退休金+其資資產總金額，跟目標1200萬尚有一定落差。建議先用優質股，再進行一定程度的增值，才實行財務自由計劃，咁會較好。

除了你每月可以做月供股票外，這筆退休金，都可以投入以下股票，進行財富增值。

以你36歲計，投資目標可以用「平穏增長股」 + 「潛力股」，你每月先用5成儲蓄，其餘先儲起，用一邊月供一邊儲蓄的策略。

但潛力股有一定風險，如果你覺得自己都有一定投資經驗，最多比重可以去到5成。否則，大約佔3成好了。到你有經驗時，才慢慢提升潛力股比例。

退休金，到時可以因應市況，分注入貨。餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21580：

阿Sir我想問你，我啱啱賣咗自己層樓，想轉三房。因為而家兩個小朋友，要多點空間。

我想問你認唔認識麗城嗰邊？如果喺嗰邊買樓20幾年樓細屋苑得兩三座或者單幢樓，你覺得投資價值係咪相對麻麻。

但因為荃灣西三房新屋苑閑閑哋都過千萬，真係頂唔順。

龔成老師︰

荃灣本身算是不錯的地點，這是市區與新界西的重要連結位，交通方便，區內配套齊，算唔錯。

作為自住樓，除了睇投資價值，都要考慮埋本身財務狀況和生活需要。

你所講地方，我相信係蔚景花園、韻濤居。這些屋苑較細，甚至只有單幢。樓齡剛過20年，唔算係好舊。

而且交通算係可以，步行10-15分鐘，可以到荃灣西站。初步睇，都算方便。

如果佢尺寸、位置等，配合到你生活，同時做到"供得起"，我覺得可以考慮。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。