【#GOtrip台北】去台北各大夜市掃街，一定是香港人最愛嘅行程！今次就為大家整理咗台北9大必到夜市，同埋必食推介！鬧市之中，仲有唔少新奇小吃添！先睇頭4間！ . 01｜人龍街坊宵夜 南機場夜市 👻 前身為日治時期的軍用機場，出名平靚正，大部分店家只此一家，人氣長龍店數之不盡，譬如2020台北米芝蓮推介十大夜市小吃之一的阿男麻油雞及臭老闆現蒸臭豆腐、CNN GO介紹過的南機場彰化肉圓、老爺爺長壽餅、沙威瑪大王等等。阿男麻油雞夜市範圍以一棟1960年代的南機場公寓為地標，麻油雞腿NT140本是麻油飄香的名店，獲台北米芝蓮「必比登推介」後，早午晚都有不同的攤販，夜市最旺。 . 🎈阿男麻油雞｜台北米芝蓮 必比登推介 🎈山內雞肉｜台北米芝蓮 餐盤推薦 🎈好佳蚵嗲｜酥脆炸蠔餅 足料香口 🎈八棟圓仔湯｜網絡人氣票選第一名 🎈基隆黑輪綜合甜不辣｜堂食可無限續加 🎈來來水餃｜皮薄湯料多 伴吃超爽 🎈臭老闆現蒸臭豆腐｜台北米芝蓮 必比登推介 . 02｜又食又買最熱鬧 臨江街夜市 👻 臨江街夜市即通化街夜市，是台北東區著名夜市，約有200個攤位，部分攤檔營業至凌晨2點。夜市有兩個主要入口，一個是基隆路二段與臨安街口，走到臨安街與通化街39巷50弄路口就是黃金掃街地段，梁記滷味和駱記小炒都是2020台北米芝蓮十大夜市小吃之一。另一個入口位於通化街與臨江街口，必吃紅花麻辣鹽水雞和QQ 涼圓。 . 🎈梁記滷味｜台北米芝蓮 必比登推介 🎈自己來紅茶鮮乳｜自己裝杯超有趣 🎈紅花麻辣鹽水雞｜特別的煙燻雞及烏骨雞 🎈阿婆（曾）豬血糕｜創立於1958年 🎈地瓜球｜超人氣之選 🎈胡記通化街米粉湯｜老字號招牌米粉湯 🎈QQ涼圓｜台灣傳統小吃 . 03｜最多星級攤位 饒河街觀光夜市 👻 2020台北米芝蓮指南十大「夜市小吃」中， 陳董藥燉排骨、福州世祖胡椒餅及施老板麻辣臭豆腐，就在饒河觀光夜市。短短600公尺的街道兩側，商店及攤販超多，是台北市區的大型觀光夜市之一，於撫遠街及捷運松山站的兩個入口都豎有牌樓，夜市以定期舉辦傳統技藝表演而聞名。人氣小吃還有起司先生Mr.Cheese 和冰火湯丸等。 . 🎈御品元｜冰火湯丸好過癮 🎈起司先生｜兩款澎湃熱溶芝士 🎈章魚足燒｜條條長過手臂 🎈陳董藥燉排骨｜台北米芝蓮 必比登推介 🎈施老板麻辣臭豆腐｜台北米芝蓮 推薦店家 🎈福州世祖胡椒餅｜台北米芝蓮 推薦店家 . 04｜長居人氣冠軍 寧夏夜市 👻 寧夏夜市被稱為「台北人的胃」， 小吃攤集中在民生西路至平陽街一段的寧夏路上，是台北老牌夜市，老店多、傳統小吃多。2020年有兩家獲選台北米芝蓮推介十大夜市小吃，包括劉芋仔僅賣蛋黃芋餅和香酥芋丸就紅足40多年， 還有60年老攤豬肝榮仔。 . 🎈劉芋仔蛋黃餅｜寧夏夜市招牌攤檔 🎈豬肝榮仔｜屹立60多年 🎈爆漿脆皮魷魚｜多款口味超受歡迎 . #台北 #夜市 #GOtrip_sl #南機場夜市 #台北夜市 #台北美食

【為什麼我要一個人去旅行】Day 1 終於出發喇，今朝起身我仲喺度諗緊「點解我要自己一個去旅行？」 由離開屋企到台北嘅酒店，一路上我都覺得平時有肥仔喺度我實在太幸福喇！ 原來平時全部粗重嘢都唔使我自己做， 佢照顧得我好好，佢唔喺隔嚟， 我坐飛機果陣隻手連放喺邊都唔知好唔自在😢 上飛機食咗個兒童餐，今次係個人樣嚟㗎！ 雖然都幾唔好食，不過有個「人」陪下都好吖！😭 好彩飛台北好近，近到連一套戲都睇唔晒。 mememormor夜晚六七點先到酒店，今次住嘅係丰居旅店忠孝館。 不過正統啲嚟講佢唔算酒店嚟，似係一間啲房似酒店嘅爆房酒店。 間房雖然無窗但唔陰森，我訂佢只係因為想好瞓啲而佢有絲漣床褥。 地點都唔錯，行無遠就到忠孝復興站，入房表面上都幾乾淨企理，只係樓下up dup啲。 都預咗今晚無乜時間，目標只係去通化夜市， 主要係想食返之前食過嘅「一口金酥臭豆腐」。 （逢星期二休息，小碗NT$50，大碗NT$60） 佢個臭豆腐其實唔臭，比一般夜市食到嘅臭豆腐細粒， 所以炸嘅面積比例上多啲，趁熱食嘅話有外脆內軟嘅效果。 不過重點其實係佢個酸菜，酸菜先係我翻兜嘅原因。 酸菜個味好清新好開胃，陣味似越式醃蘿蔔酸酸甜甜嘅味道。 加埋唔算重口味嘅醬油膏，又酸又甜又鹹， 成件事加落炸咗嘅臭豆腐變到一啲都唔油膩！ 不過如果追求臭嘅真係唔使食佢。 另一個目標就係「紅花麻辣鹽水雞」，係通化夜市有名嘅檔口嚟， 就算今晚落雨都圍滿人。（不定休） 我唔敢夾咁多，只係夾咗豆皮、百頁豆腐、紅蘿蔔、雞心同3隻雞全翼。（共NT$120） 個豆皮同個百頁豆腐真係幾好食喎！！！ 除咗雞翼之外其他嘢都好入味，成包嘢最難食反而係啲雞翼， 無乜味之餘仲要係韌果隻，我成包清晒就係食唔落啲雞翼。 而我諗有留意開嘅都知我有幾愛雞翼， 所以呢隻真係失敗嘅雞翼！！！ （我本來想叫雞肶但賣晒，我又食唔落半隻雞所以叫咗雞翼） 佢個滷汁偏甜，重點除咗好入味之餘啲材料感覺好新鮮，無霉tattat咁， 如果下次再去，我會翻兜豆皮同豆腐，可能試埋西蘭花，我見好多台灣人夾西蘭花！ 因為只係買兩檔就返酒店太無癮，所以我途中坐低咗食「阿圖麻油雞」。 係有位網友話遼寧夜市果間阿圖好出名，經過呢間分店見到好多本地人我又試下咁囉。 不過個麻油雞（NT$130）真係唔係好啱我口味， 無乜麻油香，只係好重嘅米酒味，食落仲有啲苦，唔係中藥果種甘苦， 係多酒又未散晒果種苦味。 我唔飲開酒飲多兩啖仲有真係飲咗酒嘅感覺。 有四大舊雞，雞胸鞋到阿媽都唔認得， 就算雞肶都唔滑，係緊實果種雞嚟，雖然有雞味，但煮得唔入味， 啲雞一啲酒味同麻油味都無。 見對面個姐姐食個麻醬麵（NT$40）好香，所以我又叫咗碗。 麻醬的確好香，雖然個醬都幾杰身但係食落其實無乜味， 成碗嘢加埋啲麵只可以話唔難食，正常囉。 返到酒店，一同肥仔講我今日做過啲乜我就好想喊喇， 我係唔係唔適合一個人去旅行呀？ 其實我可以一個人行街、一個人食飯、一個人拎重嘢… 但最唔習慣嘅係任何事都無一個人喺身邊分享。 好嘅事有人分享會變得更好，壞嘅事有人分擔都會變得好啲，唔係咩？ 我好掛住屋企呀嗚😭唔知阿狗痾咗屎未呢？ 希望我今晚瞓得著啦🙏