「分離從來不易，這個你我早已知。」

唔知有幾多人同我一樣，係王傑嘅歌迷，就係鍾意佢嘅哭腔。

中學嘅時候，每次同朋友一齊去K房，我都會即刻點唱王傑嘅歌，而唱得最多嘅，並唔係佢英皇時代嘅《愛不起》，亦唔係合唱歌《還有》(因為同場只有男生，唱唔到男女合唱)，而係佢喺電影《戰龍在野》嘅主題歌《紅塵有你》。

或者因為MV個Feel太舊，朋友們見到都會問︰「嘩，咩嚟架？」「嘩，邊個點架？又係阿阮啦！」但係每一次唱K，我依然會點，然後開腔唱︰「我心的空間，是你走過以後的深淵……」自得其……悲。

中五會考唔及格，讀夜校嗰年，中午冇嘢做，就會約 偽文豪去天后吹水，兩條友戇99一度行一度唱王傑。

所以對我嚟講，王傑宣布退出樂壇唔再唱，感覺就好似有一部分嘅故事終於劃上休止符咁，有啲惋惜，同時又不得不承認，一切已成過去。