願你們平安/ #staycutecard 呢個客人上年九月已經揾我畫卡，話想一月要，因為佢有個同事一月要轉病房，半年後先返來。我十一月寄俾佢嗰陣，佢好細心提我唔好post相住，怕佢同事會睇到。佢同呢個同事冇合照，於是佢揀咗可以代表佢地嘅公仔，然後任我發揮。我畫咗着住護士制服嘅唐老鴨喺度派藥打針，一隻手攞住裝住針筒嘅kidney dish，另一隻手就整走緊支針入面嘅air bubbles；恐龍Rex就戴住stethoscope，預備好包要上嘅水。佢地兩個外型、性格都未必一樣，但大家喺呢個地方相遇、相識，然後一齊合作去照顧病人，做好病房裡面要做嘅事。 人與人嘅相遇真係好奇妙。多數嘅時候，我都覺得世界好大，所以可以認識到好知己、好拍檔、好上司都係超難得嘅事。但同時，世界原來都可以好細。就好似今日，我去咗油塘幫個朋友做佢fyp個研究，之後即興想由油塘行去調景嶺。行行下，我竟然撞返一個我十二月份出精神科病房實習識到嘅一個病人（頂，就係我黑白木偶卡嗰個post提到嗰個病人）。我嗰下呆咗，因為我冇諗過會喺醫院以外嘅地方同佢重遇，嗰種感覺好神奇。嗰刻佢見唔到我，我都冇刻意同佢相認。但嗰下嘅感覺就係覺得，呢個世界咁大都喺呢個時間點、呢個地點重遇，真係好奇妙呀救命。心入面又會諗：咦，佢出咗院之後近況點呢？情緒健康有冇改善咗呢？無論如何，呢段特別嘅緣份都係我人生中其中一段好深刻嘅經歷，因為喺同佢傾談、相處嘅過程，我可以喺佢嘅經歷裡面感受佢嘅感受，喺同佢分擔傷痛嘅時候同時了解自己更多。 唔知揾我畫呢張卡嘅客人同呢個同事最近又點呢？可能佢地喺自己嘅崗位上盡責嘅同時面對緊好大嘅壓力，可能佢地有好多難以形容嘅辛酸...... 但希望客人身邊有好嘅戰友陪伴佢，希望佢同呢個佢珍惜嘅同事都平安。都希望喺病房以外重遇嘅佢平安健康，可以喺傷痛裡面成長。

市集賣出的木偶黑白卡❤️#staycutecard 市集嗰日喺攤檔即場畫咗兩張黑白卡，其中一張就係我好鍾意但我好少講嘅木偶bb喇！另外畫咗我最愛嘅雞蛋花。 話說過去一星期出緊精神科病房實習，有個病人手上面有紋身，佢係個差唔多40歲嘅男人，我就走去搭嗲問佢紋咗幾錢，佢即刻答我：「女仔唔好紋啦！」我即刻話：「下！！！我覺得紋身好靚喔！！！！我由好耐之前已經好想紋，只係未到嗰個時間，以後我一定會去紋！」佢見我咁想紋，就問我：「咁妳有冇諗好要紋啲咩？」我諗都冇諗就即刻答：「我一定會紋雞蛋花！我覺得每個人都會有情緒低落嘅時候，都會有覺得走唔出個黑洞嘅時候，到我覺得我真係可以有全新嘅自己、跨過咗黑暗嘅時候，我就會去紋雞蛋花，因為雞蛋花嘅花語係『新生、復活』。」佢之後再講話其實佢鍾意紋身係因為鍾意嗰種痛，但又話紋嗰陣佢其實一啲都唔覺得痛。聽完我覺得好心痛佢，長期經歷緊憂鬱嘅人每日就好似行屍走肉咁，唔知為咩而生存落去，對生活嘅所有野好似失去晒感覺。喺呢個時候，好似得返痛楚嘅感覺最真實，呢種感覺先令自己感受到自己仲生存緊。覺得痛嘅時候，最感受到呢個身體原來屬於自己，世界上好似得返痛楚可以行得最近地陪住自己。但當連痛楚都感受唔到嘅時候，成個人好似只係一個空洞、麻木嘅軀殼，失去埋僅有嘅痛楚感，喺度苟延殘喘。 成件事好灰暗、好絕望，但我相信雞蛋花好快會開花，黑暗終有一日會過去，要一齊帶住希望去等嗰一日來到呀。 所以喺木偶呢張卡，我諗到木偶可以變成小男孩，有全新嘅生命，就畫咗雞蛋花落去。希望你地都過得快樂。 睇晒啲字咁叻嘅你，如果唔介意聖誕後先收到聖誕卡，可以dm我你嘅地址，再同我分享下你嘅經歷、感受，我會好俾心機寫卡回應你❤️希望可以帶啲温暖俾好攰好攰嘅你地，又或者係同開心嘅你地分享開心❤️