我想講我今日去咗睇醫生，然後再喺嗰度着住畢業袍同個醫生影咗呢張相（係咪好膠）。 話說呢個醫生喺我住嘅呢條邨啱啱落成初期就開咗呢間診所，阿媽話我細細個（佢話三歲喔）就開始睇佢。因為我由細到大都成日病呀感冒發燒嗰啲，加上以前媽咪返百佳仔女睇醫生有津貼，所以就久唔久都去睇呢個醫生（當時邨入面得佢呢間西醫診所）。 仲記得呢個醫生當年仲係廿幾歲，就好似一個大哥哥咁。佢好温柔好細心，講野細細聲咁，又會好有耐心咁問你邊度唔舒服，聽你講野。雖然好細個嗰陣嘅記憶已經好模糊，但我仲好記得幾段經歷⋯ 記得我小三定小四發現有近視，但我唔肯戴眼鏡，因為我覺得戴眼鏡唔靚，我媽咪特登打電話俾呢個醫生。我到宜家都好深刻記得佢喺電話裡面好耐心咁勸我要戴眼鏡，如果唔係會深得快啲。明明係件咁小嘅事，佢都唔介意花時間勸我，我諗真係好少醫生會咁樣做🥺仲有次佢寫過張卡仔俾我勉勵我，到我升中派位入到第一志願，我都有打電話同佢分享呢個消息，佢好替我開心，仲鼓勵我要繼續努力。 佢除咗好親切，毫無架子，佢仲好細心去處理我身體嘅不適。我仲記得中學有排我個心唔係幾舒服，佢好認真咁聽咗好耐我個心跳，然後話聽到間唔中有少少雜音，之後就寫咗封信俾我去公立醫院做下心電圖詳細檢查下。多謝佢咁認真看待我嘅唔舒服，從來都唔會hea我😭 再大個啲之後，我病少咗，加上阿媽轉咗工冇津貼，睇呢個醫生都幾貴，所以我就少咗睇佢，可能成一兩年先睇一次。但大前年我有啲事去咗睇佢，嗰陣我叫佢唔好話俾我媽知，驚我媽擔心，佢話：「放心啦！病人私隱來家嘛，冇妳同意我唔會同任何人講！」嗰次係我讀大學之後久違地再去睇佢，亦係我第一次自己一個人去睇佢（平時阿媽死都要陪我睇醫生）。平時啲醫生可能好趕時間問你幾句就叫你出返去，但佢處理完我嘅問題，仲同我傾咗陣計，關心我嘅近況⋯ 嗰一次真係特別多謝佢。 至於今日無啦啦做乜揾佢影呢張相，其實真係好即興。話說我呢幾日病咗，斷斷續續咁發燒，食咗幾轉panadol今日冇再燒，但仲係唔係幾舒服，但我又book唔到政府門診（呢幾日打咗幾次電話去呢區嗰兩間都Full晒），所以頂唔順去咗睇佢。去睇佢之前，突然諗起，咦我今年大學畢業喇喔！佢都係一個由細睇住我大嘅人，而某程度上，我今日會讀nursing都有部份原因係受佢影響（因為佢我下定決心想做一個醫生，但去到後尾我唔夠叻唯有讀nursing🤣），所以我就好想影呢張相留念。但我話晒都已經又隔咗三年冇睇過佢，又唔敢茂茂然攞件袍去影，於是我喺睇緊醫生、問晒症，佢同我傾計嗰陣，鼓起勇氣問咗句：「你一陣放工有冇少少時間！」跟住個醫生呆咗，我即刻補充：「我今年畢業，所以好想着住畢業袍同你影張相呀！」點知佢答：「緊係要啦！！」然後佢再問：「件袍喺邊？」我話：「喺屋企。」佢笑住咁問：「咁妳做咩唔帶埋落來！宜家一次過影埋吖嘛！」我話：「睇緊醫生嗰陣影我驚要其他人等🥺🥺」佢之後就約咗我喺四點半佢放工嗰陣去揾佢影相，佢講byebye嘅時候話：「好啦，妳宜家返去食藥，下晝再見啦！byebye！」嗰下覺得好温暖！！！呢啲係人情味呀！！！我真心感受到佢好樂意去同我影呢張相，去見證我完成學業，即將投身社會開展一個新嘅階段。 最後我返到去食完藥，頂住啲唔舒服趕咗張卡俾佢，寫低咗我想表達嘅感謝～時間過得好快，想當年佢仲係一個年輕有為嘅醫生，我仲係小朋友；今日佢就快五十歲，我就出來做野喇！！！諗起我揀咗nursing之後仲同佢講笑話以後可以喺佢診所做野🤣而我最後喺張卡真係寫住：「如果我以後喺公立醫院做到唔想做，我就幫你打工算數啦，哈哈🤣」 多謝你，我嘅半個家庭醫生。 P.S. 我攞咗件袍幾個禮拜都冇着過來影相，呢張係第一張。 再P.S. 其實條邨之後開咗另一間診所有個老啲嘅醫生都係超好人，我細細個嘅皮膚問題成日都係睇開佢。有時想慳錢我都會睇嗰個醫生（價錢平一百），仲好記得大學時期我去睇嗰個醫生，明明睇得唔係好密，但佢都記得我係讀nursing，又係會關心我幾句讀書讀成點，去邊度實習⋯ 不過佢上年定前年退咗休喇/_\ 少咗一個又好又有經驗嘅醫生真係可惜，但感恩佢喺我成長嘅路上醫咗我咁多次🤣❤️ 所以呢個世界有好人架，呢個社會仲係有人情味架，擁有嘅要好好珍惜呀，同埋要將你接收到嘅愛再無限share出去❤️❤️❤️