【龔成問答信箱】（Q22541-Q22560）

Q22541：

老師！持倉部位現在-40%，請問如何調整心理質素？之前聽你說好像是去跑步

現在我天天飯都吃不下了！

龔成老師：

如果投資影響了生活，你的心理問題都開始大，我強烈建議你：

第一，唔好睇股價3個月。

第二，這段時間逼自己睇10本巴菲特相關書。

第三，這段時間睇你持有股票，佢地的年報，每一間都要睇5年年報。如果你能做到，3個月後，當你見到優質股股價跌（前題要優質股），你會變成天天都開心都不得了，每天的食量都很好。

（當然，我地要分析企業的價值有無改變，但不是睇股價，而是睇業務與前景因素，如果前景轉差，要止蝕的）

------------------------------------------------

Q22542：

龔成老師，我近日面對股票市場感到十分迷失和迷惘，我年初曾大手買入股價20元的心通醫療2160，但今日已跌穿9元，十分心痛，不知如何處理。
希望你能指引一下，謝謝

龔成老師：

微創心通醫療科技（2160）是有危有機類。最大問題是上市價貴，以及之前熱炒。

係一家中國醫療器械企業，專注於心臟瓣膜疾病領域創新的經導管及手術解 決方案的研發和商業化。

佢自主研發的第一代經導管主動脈瓣植入（TAVI）產品VitaFlowTM，於2019年7 月獲國家藥監局審批並隨後於2019年8月在中國進行商業化。

根據資料，截至2021年1月17日，有五款TAVI產品在中國獲批准或商業化，其中，VitaFlowTM是首款使用牛心包作為瓣膜組織的產品。

佢亦推出第一代自主研發的AlwideTM瓣膜球囊擴張導管及AlpassTM導管鞘，使其成為中國唯一一家全面提供自主研發互補性TAVI手術配套產品的醫療器械企業。

VitaFlowTM II是唯一在中國研發並已在歐洲開展臨床試驗的TAVI產品。

除TAVI產品之外，佢目前還擁有五款經導管二尖瓣（TMV）在研產品，通過自主研發及與全球合作夥伴（即4C Medical及ValCare，均為專注於二尖瓣及三尖瓣醫療器械研發的醫療器械企業）的共同開發戰略性地針對所有主流可行的二尖瓣返流經導管瓣膜療法（TVT）方案。

企業都有一定獨特性，同時長遠發展不差，不過估值方面就十分難，因為這刻仍未有似樣的盈利。

如果你持貨多，宜減，但如不多，就長線，耐心等企業好轉。

------------------------------------------------

Q22543：

龔sir:我已經睇緊你本「選股勝經」，想貴埋你本「80後百萬富翁」、但行咗幾間書間都只有2同3，請問喺邊度買到第一呢？

謝謝你的建議，我在過去一星期小注了

2800，0066，0002，0006 及0270 等平穩股，諗住遲D慢慢放曬D 1336 佢，平穩股慢慢長揸

我都係比較心急，在508 及500 各一入了一手 700，在14.62 又入了3500 服3067，睇來都要等下，暫時高風險股都唔入住了

揸住D現金就等個市跌多D時再入吧

龔成老師：

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的13本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第6版）
《選股勝經》（第2版）
《年報勝經》（第2版）
《5年買樓4部曲》（第2版）
《80後千萬富翁》（初版）

記住，最重要是建立一個長遠的優質股組合，用長期角度配置，同長期角度去買入，唔好心急，要有策略。

現時大市波動，點都要有一定的現金在手。

------------------------------------------------

Q22544：

老師，小弟打算4月左右移民，有40萬流動現金，請問有什麽投資建議？附上現有倉資訊，謝謝無私指導

700 一手 430入
3319 1250股 28.8入
3918 16000股 6.343 入
1177 5000股 7.214 入
6862 1000股 30.263入

感激

龔成老師︰

我地投資增值，係要長線，因為中短期有好多波動會出現，我地係預計唔到。

你只有9個月就移民，時間不多。我假設你移民前，係需要賣出所有香港資產，你40萬資金我建議最多做定期好了，一切以保本為主。

而你現時持股，現時就要開始分段沽出，去慢慢換回現金。唔好等到離開前一刻才沽，因為無人知個個時候，個大市係什麼環境。所以你要分段沽貨，去平衡價值波動的風險。

------------------------------------------------

Q22545：

老師，我明白長期持有優質股的道理，亦明白分注重要性，但跌市時分注買入優質股，永遠不懂注碼控制，

本人分注得比夠保守，可能一次恐懼跌浪當中只買了組合的百分之十，手持夠大現金，比如上年2020年3月，能把握機會，但買的量可能只有20-30%，

在上升軌當中便一值錯失加注機會，回報並不理想，記得老師說過上年把握大市購入小米，必瘦站等優質股，當時是用了多少現金或組合百分之幾去買？

過了上年3 月跌浪在之後的升浪有否加注？

同埋永遠保留適當現金當然沒錯，但如果你說恆指在23000是便宜區，我能否在範圍內增持組合股票水平至8成或9成？

我知一個熊市可能長達半年什至兩年，我應以時間比如每月去月供還是在便宜區去大手吸納？從而令自己持倉股票水平夠高，當遇上升市時有夠好的回報，謝謝

龔成老師︰

其實分注，我地無話一個好100%準則，乜野水平，就入幾多貨。

因為大市下跌，唔代表所有股票都會下跌，有時候個市開始平，但你目標股票無乜點跌，你都唔應該視佢為平宜，而去大注入貨。

所以，大市平貴所定的入市比例，只係一個參考。

由於近年恆指將好多波動性較大股票，納入恆指成份股，故便宜區都有所調整，你預23000點左右，係開始平宜。

但你要記住，這只是初步平宜區，未去到好平，持貨比例大約7-8成左右。

我地雖然唔知會唔會再跌，但基於平貴去衡量，我地必需留有資金，去等你個可能再下調的機會。

------------------------------------------------

Q22546：

龔sir, 你好！現時上緊你的課堂，真的獲益良多。有少少野想請教，我想問中泛控股（00715）你點睇？

我家人買了此的股票，已套了很久。請問呢隻係咪就係所謂嘅老千股？

龔成老師：

這企業年年虧損，你持有這盤生意，當然無意義。

這企業本質一般般，長遠價值向下，建議你賣出。如果不想一次過賣，都建議減持部分，將資金投資更有增長的股票，會更好。

你要記住，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q22547：

老師，從國策層面來看，醫藥股（中生製藥）在我們堂上研究target它為未來倍升股潛力會否長遠大受影響而大打折扣和阻力嗎？

從5月上你初班開始，我已列入「中生製藥」在我的配置表中(其中10％的潛力股之列）, 但我一直有留意著股價，

從$8.x跌到$7.x到現時$6.x, 已接近52週新低，雖然你曾說股價由之前好貴（去年$11.x, 現在已跌咗一半) 已經慢慢回落合理估值的上部或中部可以分注買入，

但我看股價圖表一直呈現向下走勢，睇返2019年低位曾經大概是$3.x，就算現在是合理估值中或下部，可分注開始買入也要$6.x，但是還有可能冒著再向下跌一半的風險，

你曾說過唔好去估個底、亦唔好去估個市，買股票就係買公司，唔好事後孔明、就算買貴咗都有得守…………

我已經睇過你很多本書籍，也十分認同你的理財和財務想法與概念，即使我的理念同樣也是———「用便宜價格買入優質股票長期持有而不理會中間價格波動」，

但我心裏仍有忐忑不安，覺得我會用多咗多餘的資金而買貴咗要捱價x年才能返回買入價，雖然你常言道不要看買入價為神聖價位只看股票本質有沒改變，

如果沒有改變不用擔心股價上落，讓優質股票慢慢成長，最終股價也會回歸到合理估值，但我心裏仍覺得不安買貴咗，從而導致少了資金去買配置表內其他優質股票…………..

所以我仍然在迷惘中和猶疑不決，不知道應該第一注資金應該幾時、什麼價位開始買入，（我正常一般都會分3注），請龔sir再指導我一下

龔成老師︰

首先，你唔好再用圖表，或者52週新低這些短炒方法，去做分析。因為股票過往價格，同將來發展唔一定有關係，特別係一些發展好快，有質素的潛力股。

我地無人會知，佢中短期股價會發展成點，只能以平貴，去定策略。係合理頂時，先小注。再回調，就再加注。到平宜區，才大力掃貨。

你唔好有個錯誤想法，等到平宜區先入，就最穏陣和回報最理想。但你要記住，優質股係有權唔回至平宜區。

如果你平宜區先去入，可能最終結果係，你乜都入唔倒，白白睇住隻股票係咁升。

策略性分注，有機會會有一段時間出現帳面虧損，而且一定唔係可以最大回報的方法。但佢可以平衡左各方面不確定性，令你可以係可接受風險程度，得到最好回報。

近期中央推出一些醫藥相關政策，對醫藥股發展的確係有影響。但長線睇，相信會加快左行業汱弱留強速度，對好似中生(1177)這類優質企業，長線反而係有利。

但你預佢中短期都會較波動，長線投資價值未見大變，你可以按我教的策略，去慢慢分注入貨。

另外，你要留意翻2019年最低價係$4.X，你記得我初班上堂有教過，當企業派息或紅股，個股價圖條線，係會全條按比例下調。由於2020年有2送1紅股，所以條線係下調左。

如果直接睇圖見2019年初係$3.X，就當佢係當時真實價位，那就錯了。

------------------------------------------------

Q22548：

想請教，66 2800 應該長持，因為2800可分散風險。66 地鐵公司長遠收息及增值可觀？

3 及11 算高位？ 待其升10%才放較好?

大家樂 大快活又如何 收息及增長?持有誰較好?

這星期港股大跌 應該持有66 2800 11 3 因長遠來說會升番 優質股不用怕 除非作炒賣?

總括咁問，2638 270 等股市升回正常價才放。11 66 2800 3 可長期持有 因是優質股？ 股市波動對其影響有限 只要不是炒賣 風險好低？thx

龔成老師︰

你現時持有股票，都係優質股，係可以長線持有。我地係唔會因為股市中短期波動，去沽出一隻股票。除非佢已經係好貴，又或者佢長線質素轉差，才會賣出。

但港燈(2638)係收息股，增長力不高，若你係年青至中年人士，就不宜持有太多。

大家樂(0341)和大快活(0052)，質素上大快活會較好。佢有平穏增長之餘，都有一定股息。但如果疫情再反復，可能會令佢中短期再現波動，要留意風險。

近期大市比較波動，但未見對上述股票，質素上有明顯轉差，你照持有係可以。

------------------------------------------------

Q22549：

早晨龔成老師，我今年35歲了，近來確診癌症，將有一筆大概250萬嘅危疾保險。想早點將這筆錢增值，因為將來我可能還有好多時間，並不想成為老公及其他家人的負累。

我應該如何分配？

我不會有小朋友，同老公及患病父親同住先母物業，不需要供樓，一家人每月支出3-4萬。

龔成老師︰

以你情況，一切都以你身體健康為重點。

這筆危疾賠償，你要先扣起一部份，最好預多少少，用現金持有，以備不時之需(生活或醫療上)。

未來時間，為了可以令你安心治病和進行療養，投資選項上，我會建議以創造現金流為主。透過現金流，去支援你生活上開支。

目標會係一些優質收息股，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，只能小注）。

現時大市只係合理水平，資金唔好盡用，大約留翻3-5成現金。等大跌市出現，才加大力度掃貨。

當然，如果你精神未必足以你進行上述操作，你可以入完首注後。用銀行月供股票服務，去將餘下資金，慢慢投入收息股當中。

但緊記，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡。同一行業不能高於組合30%，同一股不能高於組合15%。

祝你早日康復!

------------------------------------------------

Q22550：

想請教1. 如公司個人/高層持股多於50%，在評估公司質素上是否要扣分?

2. 在計算669估值上時，為甚麼用現金折流法得出的數字只是$4X? 但現價卻是$130，差距很大。然而，典業主盈餘卻是按年増加，而折現率亦採用了合理的10%，所以想問問現金折流法是否不適合用在669估值上?原因又是甚麼?

3.想請問2128 中國聯塑積素如何?

龔成老師：

1）要睇那類公司，如果是細公司，有可能佢地好易操控股價，如果大公司，可能佢只是正常持股、睇好自己公司，因此問題不大。

2）現金流折現法不易運用的，你在推算增長率時要小心計算。

3）中國聯塑（2128）這股不差，有長線投資的價值。佢主要從事製造及銷售建材家居產品、提供裝修及安裝工程、環境工程及其他相關服務、金融服務和物業租賃及其他相關服務。
生意與盈利都不差，現金流強，股本回報率理想，基本上有長線投資價值。不過股價上落較大，要注意注波動。
現價合理區中上部，分注投資都可，但不是大手時機。

------------------------------------------------

Q22551：

多謝龔成老師回覆和分享，其實我都是大約年初才買136，我現在手上還有好多不同的股票，但係全部帳面都是蝕包括

匯豐 1200@$68
恒生 500@$151
煤氣 5000@$13.28
小米 2000@$26
騰訊 100@$579

阿里巴巴 500@$278
恆大汽車 2000@$16.4
中國鐵路 20000@$1.21
醫渡科技 2000@$65
金沙中國 2000@$30

上述帳面現在合共蝕緊200,000左右

小米同金沙都係睇得你多分享先至跟買，價位都不算貴所以我不擔心，反而阿里巴巴同埋騰訊真係有啲擔心，仲有隻醫渡科技一上市嗰陣高追又冇止蝕所以搞成咁

上面的股票大部份都是由上年七月開始買入，當時因為手頭上套現左一舊資金所以就入市，另外有1,000,000我放咗入每月收息基金，

最理想的都是allianz income and growth, 一年帳面連基金收入已賺了15%，可惜我當時買了少部份，另外我買咗亞洲的基金，到現在連基金收入都是打和！

一年後review, 最大的虧損都是136

我覺得自己好失敗，將所有資金放入銀行mortage link 收息都好過現在做無謂的投資

現在我只希望所有股票回升，不要再蝕太多我已經心滿意足

龔成老師︰

你要記住，我地投資係為左財富增值，而唔係打個平手就算。

唔好用短期帳面賺蝕，去衡量持股質素，或者個投資組合成敗。因為投資係一個長線計劃，就算最優質的股票，中短期都會有波動。只有長線其價值，才會在股價中反映出來。

你現時持股都有質素，若你係年青至中年人士，這個組合係可以長線持有。(我估你"中國鐵路"係打錯，應該係"中國鐵塔")

但若你偏年青，恆生(0011)和匯控(0005)這類收息股，就不宜持有太多。

另外，醫渡科技(2158)、恆大汽車(0708)不確定性較高，不宜持有太多。

至於基金，你可以衡量基金的投資策略，所投資的資產類別、投資策略、風險程度、市場、費用成本、以及過往的表現。

你可以睇佢過往5-10年(唔好只係睇當前的一年表現)，如果回報係比主要投資市場高，就有機會值得繼續投資。

提翻你，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q22552：

成哥，你好，之前是你的學生，有問題想問問。

我計緊銀娛0027價值，用市盈率估值法，但我見他在2020年度市盈率和每股盈利都是負數，這個特別的情況(疫情）我應唔應該計算呢一年的數據？

另外，用市盈率估值法，是否每一隻股票都加多10%緩衝？謝謝

龔成老師︰

其實不論是否市盈率估值法，一些中短期發生事件，如果係一次性，預期將來極細機會會再發，好似今次疫情咁，其實我地就應該將這年的收字忽視。

但由於疫情依然反覆，預期中短期業務，都有較波動，故有需要將估值下調少少。銀娛(0027)現價算係合理區中下部，可分注。

至於10%緩衝區，唔係一定要加。當你發現你計出來合理價區間，係好窄，無法有效反映一個正常合理區時，你就要加這10%緩衝區。

你可以溫習翻初班第5堂的NOTE，重點會係SLIDE26和58，當中有較詳細指引和例子，你睇左會較易明白。

------------------------------------------------

Q22553：

Sir, what do u think about premium financing by insurance company

龔成老師︰

保單融資，其實就係透過借貸，去以槓桿形式放大回報。相比傳統儲蓄保險，佢增長潛力會相對較大，同時風險會相對較高。

若保單實際回報，係多於貸款利息，投保人自然會因為槓桿操作，而令回報放大左。

但由於保單本身，好多時回報和利率都係不保證。再加上貸款利息，多為浮息。在低息環境，固然會受惠。但進入加息週期，利潤將進一步被蠶食。

因此，用保單融資去投保，係有一定風險。

其實係財富增值上，最好集中係優質資產上(如物業、優質股)。

"保險"只係一種產品，主要係用作防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但最好係一些較傳統儲蓄保單，而非這類有槓桿性質的產品。

------------------------------------------------

Q22554：

老師你好! 我和先生40歲, 每月收入共$54000, 有一層自住物業, 市值700萬,尚有170萬要還, 每月供款$12000, 月儲$13000, 股票合共約45萬, 外幣加現金共$44萬,

如果層樓唔想做加按, 如何能制造每月被動收入$15000-$20000?謝謝

龔成老師︰

如果你希望每月有2萬蚊現金流，以股息率6%計，你需要本金400萬。

若你想做到這個財務目標，你可以透過投資一些「平穩增值股」+「潛力股」，去累積這筆資金。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

假如你現時無太多投資經驗，潛力股這類風險較高的股票，你就不要持有過多，最多維持2成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-4成，視乎你投資經驗多寡和了解這些股票程度而定。

現時大市只是合理區，你現有44萬現金和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$13000 + 現有約90資產(現金和持股)，預計10年左右時間，就會增值至400萬。

你可以以此作參考，視乎你自己情況，再去調整月供計劃。

------------------------------------------------

Q22555：

本人51歲，計劃四年後退休，先生和我各月入5萬，依家手上有500萬現金，有三個鋪位，租金約6萬，貸款尚欠110萬

股票約90萬，係中銀香港、電能實業同埋永利，計劃買多100萬中銀香港收息，

亦有投資保險類年金，仲有八年要供

小朋友剛剛大學，疫情過後去海外升學，咁樣資產部署退休可以嗎？

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

若你4年後就會退休，我地就要將資產，慢慢轉向收息項目。透過這些收息項目，去創造穏定的現金流，去援你退休生活。

你現時財富組合中，主要係物業類。這些物業用作收租，能提供現金流，所以應保留作你退休組合一部份。但由於佢地佔成個組合比重好高，故物業類就唔好再大了。

現時你應加大優質股部份，去令財富組合更平衡。

你現時持有的股票，都係有質素。但永利(1128)雖有增長力，但派息都幾波動，長線不宜作為收息股一員。你現時可持有，但要慢慢換至其他優質收息股上。

至於中銀(2388)和電能(0006)可長線，退休時都可以持有。

我地唔好成個組合，只集中係2,3隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

所以，唔建議你再投資中銀(2388)太多，以免因過度集中，造成風險。

以下是一些適合你的股票，你可以一半資金儲指數基金，佢係一籃子組合，就算持有30%以上，都唔會有過度集中性風險。

你可以用佢，係退休前作適度增值。另一半資金，就買入不同收息股，係用來為退休後生活，作準備。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，只能小注）。

現時大市只是合理區，你現有500萬資金可以多投入150-200萬，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

退休後，除了收息股、收租物業外，你都可以加入一些年金(現有那份可照供)、定息產品、A級債券等，去令自己收息組合更多樣性和平衡。

而小朋友升學資金，由於好快會動用，所以不宜投資。你要另外以現金模式扣起，到升學時就動用。

------------------------------------------------

Q22556：

龔成老師，早前拜讀了你那本80後一、二、三百萬富翁、五年買樓4步曲。你的看法讓我打通了自二十年前看富爸爸窮爸爸開始認識的概念。並且能確實、有效實踐出來。

我打算繼續在股票市場努力學習投資，直至儲夠一百萬，就買樓。

但有以下一些疑問：

想請教如何可了解現時樓市是否合適買樓的時機？因擔心一買樓，樓市便下跌。

龔成老師︰

中短期樓價點樣走，其實好難預測。但我認為香港樓，長期會向上。

首先，我用身邊的朋友去分析（因為佢地都是適婚年齡的），我見到一個現象，唔少朋友結婚後，買唔到樓，要同父母用住，這幾年都係咁，而且人數不斷增長。

佢地正在儲錢，正在等樓價跌，只要在適當時機，就會搬出去住，你知道這是甚麼？這就是潛在的購買力，而且不斷累積！

香港樓長期供應不足，需求正不斷累積，這將會令樓價保持向上，跌少少，又會升過。

另外，你要明白，樓是資產，現金不是真財富，所以物業長期一定向上，中間會有上落。這是財富系統最典型的模式，詳細概念你可以睇《財務自由行》，當中會話你知，點解資產長期一定升，現金一定跌。

另外，我地做財富增值，會考慮埋成個組合平衡性。

所以，係你置業同時，最好留有一定優質股作增值。否則，你就會成個財富組合，偏重左係物業一邊，造成風險。

------------------------------------------------

Q22557：

你好龔sir! 經朋友介紹睇你個page，有問題想問問：

話說早排試下開始接觸股票（0經驗+無study）閒錢只有5萬，入左以下兩隻：

1. 3300(中國玻璃)@2.95/3手
2. 6909(百得利)@7.67/2手

請問龔sir點睇呢兩隻？

另外想買你既書睇但無從入手，邊本較適合我呢類0經驗者睇？股票勝經？

期待回覆，謝謝！

龔成老師︰

中國玻璃（3300）主要從事生產、營銷及分銷玻璃與玻璃製品；設計及安裝藥用玻璃生產線。

佢的產品包括無色玻璃、有色玻璃、鍍膜玻璃、節能及新能源玻璃產品（如超白玻璃、低輻射鍍膜玻璃及光伏電池模塊產品）。

這股不算，但又未到好高質。

整體發展正面，但盈利有點不穩，不值得持有太多，同時要留意股價較為波動。

百得利控股（6909）主要在中國從事提供汽車銷售、售後服務及其他汽車相關增值服務。

佢經銷之汽車品牌包括保時捷（Ｐｏｒｓｃｈｅ）及賓利（Ｂｅｎｔｌｅｙ），而豪華品牌包括梅賽德斯－奔馳（Ｍｅｒｃｅｄｅｓ－Ｂｅｎｚ）、奧迪（Ａｕｄｉ）、沃爾沃（Ｖｏｌｖｏ）及捷豹－路虎（Ｊａｇｕａｒ－Ｌａｎｄ　Ｒｏｖｅｒ）。

售後服務包括維修及保養服務、配件及其他汽車相關產品銷售、保險代理服務及車牌登記服務。而其他汽車相關增值服務則包括汽車融資（將客戶轉介予融資公司及商業銀行）及二手車經紀服務（將客戶轉介予從事二手車評估及交易業務的第三方公司）。另集團的經銷店亦可協助召回汽車事宜（汽車製造商可能不時召回汽車以糾正問題）。

質素算是不過不失，但企業獨特性及增長力唔算強，此股只宜小注投資。

其實你現時無投資知識和經驗，對企業估值，點去定平貴未必會太了解。我比較建議你先利用月供模式，去做增值，可以減低買貴貨風險，對你而言會較理想。

現在你每月先用5成儲蓄做月供。其餘先儲起，用一邊月供一邊儲蓄的策略。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

書本上，你可以先睇我架《80後百萬富翁》、《財務自由行》和《股票勝經》，都適合初學者。

同時間，你要去多讀其他投資相關書本、年報，新聞和課程，努力累積投資知識，長線回報才會好。

------------------------------------------------

Q22558：

龔老師你好啊！想請教你1928 金沙中國而家可以入嗎？重有請問呢隻買得過嗎？

龔成老師︰

金沙（1928）有質素的。

佢中短期會弱，加上全球疫情反覆，都對佢有不利影響，不過，相信這只是中短期，以長遠的角度分析，企業仍是有質素的。

在正常的經營環境分析，佢持有的資產好有質素，行業本身好賺，雖然疫情略有反覆，但全球疫情最壞的情況，相信已過。佢長遠是收息及平穩增長型。

但由於仍有未知數，加上之前虧損，因此將企業估值調低左。

現水平在大約在合理區中下部分，如果本身有貨，可長線，耐心持有就得，如果無貨，現價已經可以分注，但都要留現金。投資貨要有心理準備，中短期會弱，要長線，企業有長線投資的價值。

------------------------------------------------

Q22559：

龔成老師你好，人到中年，想投資股票增值財富，但投資知識拙劣，想請教一下老師。

以下幾隻股票，可以長線持有嗎？（一年以上）

00823 領展
01038 長江基建集團
02638 港燈
00008 電訊盈科
01373 國際家居零售

另外有否其他平穩增長股票提供？謝謝老師指教

龔成老師︰

你持有股票，都係有質素，適合長線持有。當中領展(0823)、長建(1038)會有息收之餘，都有平穏增長力。而其餘3隻，主要係收下息。

但留意電訊盈科(0008)負債較高，唔係無投資價值，只係風險較其餘4隻為高，故不宜持有太多。

其實以你中年人士計，都有財富增值需要，但係策略上就會保守少少，主要集中係一些平穏增長股上。以下是一些有質素的平穏增長股，你可以參考下。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、領展(0823)。如果有投資美股，可投資VOO。

現時大市只在合理區，未算平，你可以先用一半資金，分注慢慢買入上述股票，並長線持有。餘下一半資金，就等大跌市，才去掃平貨。

------------------------------------------------

Q22560：

龔sir 最近d 人話恆指成份股換入d 好高PE 既股票 例如6862. 搞到恆指既代表性不及以前 以致恆指愈來愈弱 無乜起息 月供2800係咪已經失去優勢?

龔成老師：

其實恆指進行較大的改革，長遠會將成份股，加至80-100隻，會加入更多不同類別的股票，例如一些新經濟股，長遠反而會令恆指的增長力提高。不過，同時會令波動大左。

由於這改革只是進行左短時間，而我地睇表現，一定要以長期作單位，所以，你以短期表現去衡量，並不正確。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20421-Q20440）

Q20421：

老師，我想請教下，一間冇盈利既公司，例如（1833）佢點解可以令到股價高上，而投資者又願意買呢隻股票？

龔成老師：

因為市場集中在佢將來的價值。

在企業估值的方法，不少都會考慮到將來的情況，例如現金流折現法，就是計算將來現金流，變成現在價值的總加。

這並不是考慮最近1年，而是1年、2年、3年，一直考慮。

就算企業這刻的現金流較少，只要將來的現金流較強，都會有一定的價值。

當然，愈是將來的現金流，不確定性愈高，就會令股價波動愈大。

------------------------------------------------

Q20422：

老師，自從睇左你嘅書（但未睇哂），我開始每月儲錢，而家28歲，月入20k，每月儲到8,000-10,000，而家儲左50k. 我有以下2個大方向想請教：

1. Hkd 5, 000供股＋買增值股，暫時打算hkd 2,500係盈富(2800)，hkd 2,500係比亞迪（1211），再每月買1手etf(3067)

2. 月供4000落儲蓄保險，（之後第2年開始年年派20,000），每月買1手3067，之後佢每年派息先再買股票。

真係多謝老師，如果唔係你嘅書，我好肯定我唔會每個月儲到8000-10000

龔成老師：

太好了！你已經踏上了正確的理財之路，保持知識與財富增長！

28歲，如果你可承受風險，可選（1），而（2）會較保守的（當然，如果你本身好怕風險，就（2））。

不過（1）的方案，現時比亞迪（1211）貴，建議你供其他，盈富（2800）+2845+3067都得，這個組合會較穩健。

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

------------------------------------------------

Q20423：

老師，弱弱一問我用富途牛牛投資如果想買收息股佢會點派息？

同埋3738（阜博集團）值得投資有潛質嗎？
thanks

龔成老師：

當你買入某股後，就要睇翻該股有無息派，以及除淨日幾時，這是一個介定有無息收的日子，如果這日或之後先買，就無法收該次的股息。

如果確定你有息後，就會在派息日派息，一般都是現金的，會直入你戶口，除非佢有「以股代息」，你就有權同佢講要股（但可能要你主動提出）。

阜博集團（3738）是較高風險類。

業務是線上視頻內容保護服務供應商，客戶包括七大全球電影公司、電視網絡公司及其他內容擁有者。

過往一直虧損，近年開始有錢賺，業務增長加快，不過，本身的獨特性不是好強，規模未算好大，因此，未見佢有好確定的優勢。

潛力度有的，不過就存有較有不確定性，這類股只適合小注投資。

------------------------------------------------

Q20424：

請教下：
27.4入左1818
7.7入左1448
長線投資，可以？

龔成老師：

招金礦業（1818）不過不失，佢主要從事勘探、開採及銷售黃金。

本身的資源有一定的價值，但盈利始終受國際黃金價格影響，因此本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

股價很大程度與黃金掛勾，由於人類對資源的渴求在長期不會停止，而資源是有限的，所以，長遠都會有上升的潛力，但中短期就會波動。

近期受惠於金價上升，此股升了不少，市盈率去較高水平，唔平。

此股唔係無質素，但只屬中等，不建議持有太多。

福壽園（1448）有質素有發展力。你可長線。

佢係中國最大的殯儀企業，有一定的規模，而針對的是高端市場，服務有一定的質素，擁品牌及知名度，有相當的賺錢能力，財務穩健負債少，因此企業本質不錯。
由於行業處增長的市場，而新競爭者要入行不易，因此對原有企業有利，故福壽園是優質的企業。

佢憑著本身的優勢，能取得比同業更好的回報，而福壽園管理層表明會持續擴展，策略上會透過併購同業及買墓園去擴充。

由於福壽園的模式成功，因此只要投入資金去發展，複製過往的成功，已經能取得理想的再投資回報率，長期來說此股有一定的增長潛力。

不過，由於此股業務好獨特，因此業務情況在年報上或資料上，未必能完全反映，雖然數據及資料上都顯示此股有質素，但往往要時間證實。

至於企當估值方面，市場對此股的評價亦不低，企業經常處略貴水平，$7是合理區頂，不能太過進取，以分注小注投資是一個策略。

管理層的野心很大，投資後不要升少少就快，要耐心持有，等長期更大的收成。

你有貨可持有，無問題，但就不要太急去加注。

------------------------------------------------

Q20425：

老師你好，我今年42歲，現時財政狀況如下：
本人及先生月入：$60000
年尾花紅：$10-12萬
樓按揭：餘12萬（快供完）
現金：45萬

MPF: 70萬，高風險為主
儲蓄保險：8年前實供9萬，現值12萬，擺多10年會收番20萬（唔知應否提早取出？）

自己人壽儲蓄：$6萬/年，尚要比多2年
自己危疾儲蓄：$1萬/年，比多10年
先生人壽儲蓄：$3萬/年，比多5年
股票：只有1000股匯豐，平均約58入，每月月供股票$4000

本人想財富增值，日後早少少退休，想請問：

1. 月供股價應否轉為2800？
2. 儲蓄保險應否提早取出？今年11月可取回12萬
2. 應該如何投資，可令財富穩定增值？

謝謝你的回覆

龔成老師︰

1） 匯控（0005）主要用來收息，增長能力好一般。建議你轉做盈富（2800），增值能力會較好。至於現有持股，由於唔算多，持有住都可以。

2） 其實"保險"只係理財中防守部份，買足夠保障就可以，增值應留比優質資產（如優質股、物業等）去做。但由於你們保單都就供完，甚至已供完，故唔建議去做變動。

3） 現時你成個資產組合中，股票比例明顯太少。建議你用"平穏增長股" + "潛力股"作組合，去創造一個增值平台。分配上，應用"平穏增長股"作為主力，再加一些"潛力股"。

現在你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或潛力股︰中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

現時大市只是合理區，你現有45萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q20426：

龔sir，你係成功過程中
點樣調整到蝕左錢個心態

有時蝕左錢就好想即刻追返
心急就亂，亂就好易出事

龔成老師：

我持有比亞迪（1211）12年，多年前由十幾二十蚊，見佢上到$88，其後見佢有$88跌近9成，去翻$12！

比亞迪當時已是我最大持股，由賺變蝕！

我的財富當然大幅貶值，我同自己講，過往的無辦法，最重要是將來，理性分析現時應該持有/加注/賣出，在投資世界，理性是最重要。

我上了一課，經歷財富的大起大跌，心理質素大幅提高。

記住，最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q20427：

男神，我同你報喜
我由2019年12月識你之後
就開始進行月供股票
到目前為止

盈富增值＋16.22%
港鐵增值＋12.18%
中銀增值＋3.47%
金沙增值＋55.16%一手手買
中間有小小炒賣
必瘦站增值＋104.41%
不過中生制藥就－14.85%
都係多謝你先 之前我只會將錢儲定期 一年有1-2萬蚊已經十分開心

而家唔止增值1-2萬蚊
真係好開心

您真係致富明燈
任勞任怨帶領大家財富自由 你真係超級無敵靚仔兼大善人
真心多謝你 ！

龔成老師︰

能夠幫到你，咁就好！

緊記月供係一個長線計劃，月供最少維持3年，並持有這些股票5年以上，才會有較理想效果。

當中會有升有跌，但係正常的。只要持股係有質素，中間股價波動係唔洗理，長線持有就得。

另外，唔好短炒，可能一次半次有賺到錢。但我之前做銀行、證券行咁多年，見證大量客短炒全部最終都係蝕錢，只有長線才能有錢賺。

長遠來說，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q20428：

老師，有個情況想問你意見：

當年我媽退休時（我還未接觸股票），被他人說服用退休金買2628，仲要以高位（大約@33）買入共46手。買入後大跌，她也沒有止蝕（因她也不太懂股票）keep住到而家。

想問一下如何處理？（想幫佢好好咁manage一下佢既退休金）

現在賣出轉其他收息股？等回到某一水平才賣？還是keep住唔賣，就咁收息？謝謝

龔成老師︰

其實已退休人士，應集中係"收息股"身上。用佢產出架穏定現金流（即係股息），去支援退休生活開銷。

中國人壽（2628）近年賺錢能力弱左，質素只算中等（不是無質素）。但佢唔係收息股，唔適合你母親，就算持貨都不應太多。

你可以慢慢沽出（唔係一次過，要分段做），再建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

現時股價只是合理，未到平宜，因此換碼時宜分注。同時，可保留一部份作現金，等大跌市才動用。

最後，你要留意係創建這個收息組合時，唔好太集中係單一股票上。相同行業不可佔組合多於3成，而單一企業不要高過15%，否則會有過度集中風險。

------------------------------------------------

Q20429：

龔sir，想問平有教我們供股票既意思是否定期一手一手禁買入跟晤同既股價追上?

因為我之前入咗隻莎莎國際1.2 入的～ 這股都用供股形式去分段投資合理價嗎？

因為我之前以為供股個意思係張啲股票同一口價落三成本金跟住借七成 畀你股24個月禁供

這樣是否誤會咗你嘅意思

龔成老師：

我所講的是「月供股票」，要先同銀行登記，簡單來說，就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

如果你不想用上述月供，用「自行分注」都得，例如每1、2個月買入一手。

莎莎（0178）都有質素的，相信最差時期已過，你都可以久唔久入一注，但最近升左上去，又唔值得買入得太密，同時未必值得持有得太過多。你原有貨不持有，但就加注未必要加得太急。

------------------------------------------------

Q20430：

請問6837可以入貨嗎？之前d潛力股都未返到買入價。謝謝你

龔成老師：

海通證券（6837）業務有：證券及期貨經紀、資產管理、自營交易、投資銀行、直接投資、管理本部及其他分部、融資租賃、海外經營分部。

業務主要地是中國，近年的生意不算差，但增長力唔算強，同時盈利略有波動，始終行業都會受投資市場上落因素影響。

現價合理，但你預佢都會有波動風險，長線投資價值都有但不是高增長類。

------------------------------------------------

Q20431：

Hello,想問0175 同3993 前景如何

龔成老師︰

吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

現時價位在合理區頂，甚至有少少貴，股價波動，有貨可長線。最好回少少，或這刻小注等跌再加。

洛陽鉬業（3993）並不是完無質素，但不能說是穩健，佢的營業額同盈利都十分波動，這點令分析佢較困難。因為好難確定到往後經營環境對佢的影響，同埋，佢亦因成本令佢盈利較波動，這同樣是較難預測的。

我地好需要，用過往的數據去分析，同時判斷往後的經營環境，如果過往數據變化太大，會較較分析。

另外，這股的股價較為波動，這股不是不能投資，但不建議大注。

------------------------------------------------

Q20432：

龔成老師你好！ 睇你專頁都有一段長時間，晌上年開始我入市以下股票：

0003-2100股 平均價$13.14
388-8股 平均價$382.65 （之前月供，上到$500後停供）
823-631股 平均價$65.94
1177-3000股 平均價 $9.4
2628-2000股 平均價 $16.42
3328-5000股 平均價 $4.75
8328-4000股 平均價$5.22

每月我大概可儲$14000，當中有$7000月供領展。
2628同3328 ，我打算升番d就平手或賺少少離場。 到時大概有5萬，再加我手上餘錢，合共8萬左右。

我有諗過以下想法，想問下老師的意見？

1/ 8328最近升左好多，請問值得高追1-2手嗎？
2/我睇中1789及3718，請問老師對此兩隻股票意見？
3/ 0003 現價好平，值得現在加注嗎？

謝謝老師

龔成老師︰

1） 信義儲電（8328）都有質素，但盈利上好波動，不宜持有太多，唔建議加注。

2） 愛康醫療（1789），以長遠業務分析，正面的。佢以「愛康」品牌從事設計、開發、生產及銷售骨科植入物，並專注於髖關節及膝關節置換植入物。

睇翻佢的資料，佢的產品包括用於初次手術的骨關節植入物，以及為置換、修復或升級前次手術的植入物或部件的翻修手術而專門設計的骨關節植入物。都是有前景的業務。

這股業務不差，有增長潛力，盈利增長，這反映企業有實際的價值提升。不過，這股經常處於少少貴的水平。現時市盈率達40倍以上，投資時要考慮價格風險。

北控城市資源（3718）有質素的。佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。現價大約合理區頂位，不建議這刻太大注。

3） 煤氣（0003）現價係合理區中間，加小注可以。但緊記，個別企業唔好佔組合15%以上，否則會有過度集中風險。

另外，投資記住係用長線持有模式，讓優質股自然咁增值，而唔係做短炒。

現有持股中，中國人壽（2628）質素較中等，不宜持有太多。你可以將部份換至其他優質股，咁會較好。

而交行（3328）主要係收息，若你係年青至中年，由於佢無乜增長力，都唔適合你。

------------------------------------------------

Q20433：

龔成老師您好，本人是來自澳門的一位80後的家庭主婦。最近開始閱讀你的作品，希望從中可以學習到投資的知識，期望你不久的將來可以過來澳門開班。

目前有小小問題想請教一下你，本人大約在6年前自以爲懂投資的情況下，購買了以下股票，購買了之後就一直跌到現在

本人想放售然後入小米，但還是想聽聽龔成老師意見，應該繼續持有，還是怎樣，感謝你的解答

751--10,000股 （成本價$6.6）

1060--60,000股（成本價 $2.78）

1816--20,000股（成本價 $4.5）

龔成老師︰

創維集團（0751）從事電機、智能系統技術業務、智能電器業務等，中國及海外都有市場。

近年增長力唔算強，生意未見有擴展力，盈利有點波動，整體的品牌價值及銷售網絡，未算好強。長遠發展力只是一般。你預佢增長力唔算強，長遠算是不過不失。

如果佢只係佔你組合小部份，持有都可以。

阿里影業（1060），炒作較多，風險高。這企業到現時仍未有盈利，市場只憑佢前景去評估，其實這會有相當的風險，這類股最多只能小注。

中廣核電力（1816）主要從事發電及電力銷售，以及核電項目及非核清潔能源項目的建設、運營及管理。

佢主要於中國從事核能發電業務，包括運營及管理核電站、銷售電力、管理及監督核電站的工程建設，以及向工程公司提供相關技術及維修服務。

這企業發展平穩，但增長力不強，收息可以，但就唔好對股價有太大期望。

現時小米（1810）都有點貴，想換碼入貨，等佢回1成先會較好。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q20434：

希望龔sir可以審視一下我既理財妝況

背景： 26歲，未計雙糧花紅月入20k ，月儲12k,其中7k月供股票，現金儲4-5k

現時現金大約11萬，投資組合現值約32萬

現時月供 2800 - $2000
066. - $2000
788. - $1500
1177. -$1500
手持股票：
2800。2400@$27.3
066。 1100 @$44.2
788. 9750 @ $1.35
1177. 408 @ $7.3
178. 6000@ $2.21
1211. 204 @. $44
1212. 3000@ $8.24
1257. 3000@ $3.45
1928. 800@ $27.83
1972. 1200@ $21
2388. 1020@ $28.2

（1）. 股票組合係咪偏向平穩而唔夠進取？

（2）增持1212會唔會好過增持178？

（3）長遠來說，放走178/2388而換其他增長力較高既股票，得益會唔會更大？

（4）如果公司私有化，對股票持有人會有損失？

（5）. 新經濟股佔比係咪太少？現價太貴而不敢入市

（6） 我將家用交俾家母時，原來她一直都會將一少部分儲起，再若干年後（大約15-20年）送贈給我，
但問題係現金已經不斷貶值，如果我說服家母儲起既現金慢慢入手黃金會唔會更加好？

再次祝福龔sir工作順利！！

龔成老師︰

1） 以你年紀，平穏增長股和潛力股比例，大約各佔一半。所以，你月供配置，係可以。但持股比例，就偏保守。

2） 利福國際（1212）和莎莎（0178）其實都差唔多，大家都受經濟週期和疫情影響。但利福國際（1212）負債較多，風險高少少。

3） 莎莎（0178）都有質素，但近年係弱左，不過不是無質素，只要不過多貨就得。而中銀香港（2388）係有質素，可長線持有。

4） 要睇翻佢私有化個收購價，如果比你買入價低，會有財務上損失。同時，由於你不在持股，你將失去佢升值的得益。

5） 以你年紀計，係偏少，潛力股和平穏增長股各佔一半左右，會較理想。

現時部份新經濟股，有輕微過熱架情況。要若直接入，最好等回翻先好入市，或者用月供去儲貨都可以。

6） 黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，你可以投資黃金，但不用佔財富比例太多（<3%），而且持有的應該為實金。其餘最好投放在優質股，增值效果會較理想。

------------------------------------------------

Q20435：

龔sir～ 我係一個大學生最近先開始玩股票～ 依家手持01810 06993 03800

暫時感覺都唔錯 都問下有機會突破嗎？ 同埋都買左 01076 00438 想問下呢兩隻股既睇法～

因為都偏冷門小小，麻煩你

龔成老師︰

我唔知佢中短期會唔會有突破，但只要股票係優質，長線持有佢就會自然增長。

小米（1810）係優質潛力股，可長線持有。

藍月亮（6993）有質素，畢竟係新股，有一定不確定性，唔好持有太多。

保利協鑫能源（3800）質素只是一般。佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估，這炒作不少，現時值博率不算高，小小注好了。

博華太平洋（1076）主要從事博彩及度假村業務，包括發展北馬里亞納群島聯邦塞班島綜合度假村。

集團生意一直下跌，連年持續虧損。而且，2018和19年核數師意見出現有小問題。

整體而言，此股無投資價值，賣出較好。

彩虹新能源（0438）主要從事太陽能光伏產業業務；生產和銷售發光材料和鋰電池正極材料；太陽能電池元件及其他配件交易。

此股盈利波動，賺錢能力唔高。加上佢負債係一個唔理想架水平，長線我建議你換碼至其他優質股較好。

你在選股能力和經驗上，都未算太理想。我建議你先學好選股和定平貴知識，再慢慢去投資。就算想現在投資，也先集中係一些大路股票，會較穏陣。

你可以睇我寫架"80後百萬富翁"、"財務自由行"和"股票勝經"，會幫助到你。

------------------------------------------------

Q20436：

啊Sir想請問一下我今年37歲。以下組合可以如何優化？太多銀行股同時蝕緊錢。
應止蝕轉其他潛力股嗎？

1. 煤氣x1,000@$16.94
2. 匯豐x400@$76.05
3. 港交所x200@$279.4
4. 騰訊x200@$463.4
5. 領置x200@$59.5
6. 中生製藥x4,000@$8.58
7. 比亞迪x500@$69.8
8. 小米x800@$25.3
9, 舜宇x200@$126.1
10. 中銀香港x500@$26.55
11. 雅生活x250@$37.5
12. 中國銀行x10,000@$4.72
13. 阿里巴巴x100@$176

龔成老師︰

你上述持有的，基本上都是有質素的，問題不算大。而你37歲，可以在當中作一些調整。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時的年齡，應以增值為主。匯豐（0005）、中行（3988）只係收息，無乜增長力，唔適合持有太多。

其餘股票都適合，但你潛力股佔比重佔好高。佢地有增長潛力，但同時波動性都好高，所以最多只可以佔你組合4成左右。未來新資金，可以優先投資平穏增長股，令組合更平衡。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

另外，潛力股可考慮安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20437：

老師，我媽取25萬給我幫佢投資，我既諗法係用最低成本幫佢買入高息股以賺取股息，我睇了以下兩隻：

00808（50手）及03988 （50手），你覺得可以嗎？
謝謝

龔成老師：

上述兩隻都是有質素的股票，收息無問題，現價合理，可投資。

其實，持有2股有少少集中，你可以建立一個收息股的組合，目標是5%、6%的股息率的收息股，可以考慮加入以下股票（在當中選股）：

例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

------------------------------------------------

Q20438：

老師，想問下你意見，（大概18歲時曾經問過風水師，佢話美容行業唔岩我）

賭場我已經做左十幾年，一直無起色，職場上明爭暗鬥令我很累，加上自身性格問題，做得唔開心就轉工

但以家開始年紀大，唔想捱夜，如果35歲先試學做美容，咩都從新頭開始，係咪太遲。

加上美容店都請勞工（有經驗），而我就無經驗，條路好似好難行。

龔成老師：

我從來不信命運，我只會信我自己。

如果你真心想試，就大膽去做，你這年齡仍是可改變的時期，你試完，如果唔得，都可以轉去賭場。

好多野我都唔試，永遠唔知結果的！

你美容從頭開始雖然有點遲，但如果方向正確，過5年後、10年後，仍可以有一翻作為，加油！

------------------------------------------------

Q20439：

老師，當我見我個倉每日跌2%，個心又不安了，究竟要點樣先可以培養到好嘅心態？

龔成老師：

我持有隻比亞迪（1211）已經有12年，試過由$88跌到$12，跌左9成！之後先慢慢上翻。

你要集中分析「企業長遠的價值」，唔好太理會中短期股價，同時，唔好集中一隻股，要建立「組合」。

記住，「企業」是重點，短期股價不是，要平常心，同埋唔短期股價波動，最好練唔好日日睇股價。

------------------------------------------------

Q20440：

老師，我想問中國生物製藥現價算合理嗎？

另外，騰訊的主要收入來自網絡遊戲，風險會否因此比阿里巴巴高？騰訊現時價格是否太高？

希望㰍sir能抽空解答。謝謝！

龔成老師：

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

現價合理區中上部，有貨可持有，分注或月供可以，這股可以長線持有的。

騰訊（0700）與阿里（9988）都有質素的，都可以長線投資，月供適合。騰訊雖然網絡遊戲佔了一定的比重收入，但佢最有價值的，就是「平台」，這亦是現世代好有發展的資產。

我地分析企業時，要思考那些是核心的企業價值。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績十分理想，又身處高增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。

現價略貴，如投資要明白當中的風險，這刻在注碼上不過份大注，就可以投資這股。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18061-Q18080）

Q18061：

龔Sir，第四堂課上有幾個問題想請教：

(1). 在三個基分析的方向中「經濟分析」除了筆記上所列的5項指標外，有否其他值得留意的分析要素？

(2). 在「折現率的計算」部分，筆記中指出「恆指過往50年，升幅連股息回報率為14%」「過往10年至20年，則大約為8%-10%」，有關恆指升幅及股息回報率在哪裏可以找到？還是這是老師計出來的數字？若是老師計出，可否請教是如何計出的？

(3). 在「現金流計算」部分，指出公司可能會有增長率，這個增長率是否指「盈利」的增長率？如果是，盈利增長率是如何計算？

以第57頁PPT為例，若要計算西隧2020年會出現的盈利增長率是否(12-10.8)/12X100%，即「盈利增長率」為10%。如果單是西隧的盈利增長率為10%，是否不宜用DCF去計算？然而放到港通(0032)中去計算，西隧只佔50%，盈利增長率除2，是否就仍可用DCF計算？

有勞老師賜教，候覆，謝謝。

龔成老師：

1）當然有，經濟分析可以好多，而課堂所講的，是較重點的指標，其實如果你有睇財經新聞，都會見到有講一些重要的經濟數據，你可以留意。而到進階班，會再有相關的講述。

總之你記住，要找「對經濟有長期影響」的指標，並不是短期性的。

2）你上恆指服務公司的網站，而我的計算，就是將過往50年，數據，取複息平均，再加股息率（股息率在網站都有）。

3）對，是盈利。

你唔能夠只用一年的數據，要用多幾年，得出長期增長，再進行推算。

如果計算無限年期的數目，增長率就一定不能大過折現率，但如果有年期，如西隧，就算增長率10%都無問題。

港通佔一半權益，因此在計好西隧的價值後，就會除價值除2，就為港通的資產，而不是增長率除2。

------------------------------------------------

Q18062：

老師，我與丈夫月入12-14萬
自住樓950萬，月供14000尚欠380萬
出租樓1： 540萬，租可抵貸尚欠250萬
出租樓2： 350萬，月有4000盈餘 尚欠80萬 （與弟弟聯名）

儲蓄（私己70萬，共同儲備15萬，丈夫儲蓄不明但應該不會多)
每月可儲約3-6萬 （已包括稅務，保險，供樓，父母家用）

有一份20萬基金，還有有數年才可取回

個人12萬股票，005(平均買入價$85) 001 (平均價$95）
共同股票20萬，001佔重（平均價105), 其他有001及2888，還有少部份藥業股 （我不太清楚）

我與丈夫都是40歲，但投資都沒有方向，股票投資亦差不多虧損50%... 想以十年達致財務自由，請問投資方面可以點做？

1. 考慮賣出股票，轉為其他比較有增長空間的股票

2. 明年可能打算賣出出租樓2, 因為其質素較低保養成本較高。如事成可能會有多一百萬現金，之後應考慮什麼樣的投資

3. 現有現金積蓄都放在mortgage link, 只有低息，值得用此買入其他股票或基金嗎？

龔成老師：

1）可以賣出，以你的年齡，財富仍有增長力，轉其他是較好。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

2）因為香港買賣物業的成本高，賣出後如果日後要買翻可能會較煩。

當然，如果你想賣出都可以，因為你現時的財富組合，較偏重於物業，所以都可以，但一定要想清楚先。

3）應該部分投資股票，你現時的財富組合，股票比較少，不過，你一定要同時留有現金，做備用，以及等大跌市入市之用。

------------------------------------------------

Q18063：

老師，我開始了月供 $2000盈富 $1500銀娛 及 $1500小米。

我存款只有十萬， 月入$25000但月儲只有$8000左右. 除了以上月供計劃，如果我以現價買入一手粵海長線持有，呢個動作合適嗎？

龔成老師：

首先，你可以保持月供，這動作可長線進行。

另外，你現金$10萬，由於現時大市合理，但不算平，因此，唔能夠動用太多，要留現金備用及等跌市投資之用。

你現價入一手粵海（0270）可以的，這股有質素，現價都合理。

------------------------------------------------

Q18064：

龔成老師，想問今日公佈即將入恆指成份股的2269藥明生物是甚麼公司？

我見到這公司的EPS 5年平均每年成長率達80%

感覺十分優質
同時P/E都非常高
達170

想問老師覺得合理區大約位置？
我暫時只分析到現時非常貴

龔成老師：

藥明生物（2269），主要提供有關生物製劑藥物發現、開發與生產服務。

佢涵蓋生物製劑發展過程的所有五個階段，即藥物發現、臨床前開發、早期臨床開發、後期臨床開發及商業化生產。

潛力是有的，因為過往的財務數據的確理想，但現時的估值唔平，這刻投資值博率一般。

不過，這類股好難話現價一定貴，因為佢有好高的增長，只可以話現價唔平，但如果之後有高增長，那就未算太貴。只可以話，如果你真的想投資，小注好了，你要明白業務有不確定性，同時股價會好波動。

------------------------------------------------

Q18065：

龔sir

想問一下點解甚少見你提「騰訊」呢隻股票？佢好似好多方面都符合你講優質股既條件？

以你所講 潛力股會用「升一倍放一半」策略，咁如果平穩增值股（如港鐵），股價未必能倍升 又應該怎樣獲利？

同埋想龔sir幫手評價一下我的月供投資組合

背景是25歲 月入約5萬
每月可儲用2萬元作投資，全數用作月供（因為成日覺得唔用作月供怕d股票會升左）
港鐵 領展 港交所 盈富基金 約佔1萬2千（平穩增值類）
阿里爸爸 海底撈 比亞迪 福壽園 平安好醫生 等等潛力股佔8千元

會唔會出現供太多隻既問題 變相每隻好似力度唔夠大。同想問以一個25-28歲年青人 倉的水桶1,2股票分別應佔多少。謝謝龔sir解答，再三勞煩你

龔成老師：

騰訊（0700）有質素的，只是早前較貴，所以沒有多講。

這股有長線持有的價值。

如果港鐵（0066）這類，可以一直持有，你唔要著重「賺左先」、「賺現金」，你可以長線或一直持有的。

至於你的組合，太多集中，應該減少少少，至於你的年齡，水桶1可在30%-60%，要視乎你的風險承受程度，以及你的投資實力，因為潛力股需要你有一定的投資實力。

------------------------------------------------

Q18066：

龔sir，見到你fb share一個在2年內賺到一百萬的case，好心動。想問如果我只有3萬現金，可以在5年內賺到一百萬嗎？因為想買多一層樓作投資。

下個月才上你的課程，但想有個目標。謝謝，現在看你的百萬富翁3，但到理財創富問題的專用語不太理解，例如REIT, ETF等。

龔成老師：

理財與投資，要一步步。

如果你想5年累積到$100萬，每月就要有一定的儲蓄及投入，你最好每月，要自己儲到$1萬，再加上投資，這樣就較易做到5年有$100萬。

REIT就是房地產信託基金，ETF是交易所買賣基金，這些都是適合初階者的投資工具，我的股票班都會教的。

你上堂前，建議你多睇理財及投資的書，《股票勝經》都是入門書，適合你睇的，下個月見！

------------------------------------------------

Q18067：

你好，想請教一下，我是家庭主婦，沒有收入，老公月入3萬左右，供樓1萬多

家用同囡囡讀書等開支已經冇多餘錢，儲蓄10萬左右，待囡囡上學後會做兼職，還可以有什麼方法儲更多錢呢？謝謝

龔成老師：

你之後做兼職是提高收入方法，你可以做一些高時薪的工作，從收入去增加。

同時，可以在生活上慳錢，例如唔好亂用信用卡，多有效利用優惠（但不能因此要消費多左），盡量唔好用信用卡，要有每天記低消費的習慣。

另外，就是定一些目標，例如每個月要儲到多少錢，或參加銀行的儲蓄計劃、月供股票計劃，都是有用的。

------------------------------------------------

Q18068：

你好老師，我24歲，無咩投資經驗。月入20k, 每月流動資金10k。打算用6萬投資。

本身有留意開2800, 3, 708, 想問下係咪適合時機投資，有冇其他可以入手？謝謝

龔成老師：

你可以以盈富（2800）作為核心，再加上其他股，煤氣（0003）可以的，現價合理，都可投資。但恆大（0708）風險高，唔太建議。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18069：

老師你好，我今年33歲，已婚有一兩歲女，我同老公月入共3萬5 ， 今年年頭開始睇老師既書，亦開始月供股票 ，0388 $4000 ，0003 $1000，0066$1000 ，0002$1000 ，另一手0066，一手02638

現手頭現金10萬，每月可儲1萬，可如何運用現金？

另外想問我睇左你本財務自由行，我儲蓄率可有30%左右，以股票增長率保守8~10%，係咪可根據你書中所提及12~14年左右得到基本財務自由？

龔成老師：

你的選股都是有質素的，但如果想財務自由，可以加多少少較有增長力的股。

要財務自由，會運用「先增值，後現金流」作方法，初期應投資較多增值類資產，而較年長的，則應投資較多保守類項目，因為初期的財富系統未成形，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

手上的現金，建議大部分持有現金，備用及等跌市機會，同時，可保持月供。

你可以考慮加入：盈富（2800）、銀娛（0027）、領展（0823）。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

------------------------------------------------

Q18070：

Hello龔老師，我接近30 歲，有現金25萬，股票戶口有30萬，股票之前在高位買入且較分散，而且選的股票潛力亦不高，但現時亦未有合適時機賣出。

由於現時股票市場較為波動，如果我想長年買入一些較穩定的產品以達到複息效應，請問您有甚麼推介嗎？謝謝！

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

我相信對你來說，投資指數基金，以及一些較穩健的股票，長線持有，是較為適合。

盈富基金（2800）、南方Ａ５０（2822）、VOO都可以。這些指數基金，會比單一股票較穩陣。

另外，個股可考慮：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

如果你擔心股票的風險較高，可以考慮基金，或一些銀行的投資產品。

------------------------------------------------

Q18071：

老師你好 我係投資新手 想供月供股票

請問以下組合可以嗎？
每月供$3000
領展1000
盈富1000
中電1000

還是每月只供盈富$3000比較好？
謝謝

龔成老師：

可以，上述都是有質素的股票，3隻都是有質素的，所以可以進行，只要你保持長期就得。

如果日後你資金增加，就可以加大盈富（2800）的金額。暫時就各供$1000先。

------------------------------------------------

Q18072：

龔成老師你好！最近開始留意你的Facebook，並閱讀你的書，發現你的理財觀念啟發了我不少，希望你繼續努力，出版多些書教導理財技巧。

本人有些投資問題，希望你可以解答我的，以下是我的背景，謝謝！

-35歲，女性，公務員，已婚，每月收入5萬，月儲3萬現金
-去年購入自住單位，仍有400多萬按揭，丈夫負責供款
-現供一份醫療保險及每月$6000儲蓄保險（供15年）
-現有現金30萬
-沒有投資經驗，想購入股票在長線投資

正在構思：

1.與丈夫儲多一年現金作按揭partial prepayment，盡快清還按揭，減少利息及縮短還款年期

2.月供或一次過購入盈富基金

龔成老師：

現時處於低息環境，還錢並不一定有著數，其實最重要是計算「按揭利息」及「回報」之間的差別。

例如你有$100萬，如果投資收息股能取得6%股息，你就得到$60000一年，如果你想這$100萬作還錢，就可以慳利息，如果按揭利息3%，你就慳到$30000。

比較之下，你唔還錢，將錢作投資，得到$60000去支付$30000按息，會更著數。

當然，投資收息股有價格上的波動，而減少負債能令你減少風險，因此，各種選擇相會有利弊，但你先要明白，並不一定「盡快還錢」就是最好。

在低息環境，你拖長還錢反而有利，而高息環境，就應該盡快還錢。

我建議你這刻，唔好做任何動作，首先學投資先，同時可以月供盈富（2800）每月$10000。

你利用3-6個月時間，努力增加投資知識，理財知識，之後先再計劃應該點做法。

------------------------------------------------

Q18073：

Hello龔sir，我25歲，持有3690 一手、6958一手同700少量碎股，想請教以下問題：

1. 請問3690既業務質素？現時股價會唔會處於泡沫邊緣？因為都知佢呢幾個月被炒得好犀利，但我係想長期持有。

2. 最近中美關係緊張，本來打算月供700先入左少量碎股，但見佢最近被美國打壓，股價有少少影響，請問佢前景係咪仍然睇好，可以長期投資呢？

3. 6958既業務質素

4. 如果我想5年內擁有100萬，每個月月供應該分配分多金額呢？Thanks!!

龔成老師：

1）有質素，這企業的業務的確有增長，同時發展力仍大，只是估值難，如果你一手，可以長線投資，雖然中短期預佢會波動，但唔好理，長線持有就得。

2）中短期有可能會弱，但你月供，要長期進行，其實這樣就不用擔心，佢只是中短期不利，不是長期問題。

3）業務正面的，不過現價略貴，要注意風險。

4）每月要投資$10000在股票，你可以部分月供，部分留現金等機會投資。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18074：

你好，想請問2588現在可以入貨嗎？

以前睇好作收息，由40升到46後放左。之後一去不復返。
現在疫情跌反去50。

之前飛機出租率高，相信無問題，但疫情航空次數降，加上航空股跌，2588反而向航空公司買多左飛機，租反給航空公司。其實有信心先會咁投資，對嗎？

另一面，佢比業界好係因為有中銀作水喉，低息借給他。中美關係，會否受政治因素影響？
謝謝。

龔成老師：

中銀航空租賃（2588）本身質素不算差，但又未到好好，主要原因是負債太高。佢利用高槓杆的模式，進行飛機租賃等業務。

即是借錢，買飛機，再租出給飛機公司。

佢的動作是長期之用，而我地分析點，都應該以長期作衡量，可見佢長遠發展唔算差。不過航空業及借貸模式，始終有不確定性，令佢風險增加左。

至於政治風險，有可能有，但較難分析，始終變數多。

投資可以，但唔建議太大注。

------------------------------------------------

Q18075：

成老師你好，我手上有1200股6185康希若，平均價212買人。呢2日有跌到落$192，你覺得呢隻股會升反上去嗎？
我聽到幾多佢呢利好消息，唔知點解會跌呢？

你建議我止蝕走嗎？
麻煩你！

龔成老師︰

其實一隻股票中短期上落係好正常，只要佢唔係出現左一些影響佢長線質素的問題，咁就可以。

康希諾生物（6185）主要於中國從事研發疫苗產品，疫苗產品線如下：3種臨近商業化在研疫苗：

包括腦膜炎球菌結合疫苗（ＭＣＶ）組合（四價ＭＣＶ及兩價ＭＣＶＩ，均為集團核心產品）及Ａｄ５－ＥＢＯＶ（其由集團與軍事醫學科學院生物工程研究所共同研發，為中國第一種獲批淮作應急使用及國家儲備的埃博拉病毒疫苗）。

另外，有6種處於臨床試驗或臨床試驗申請階段的在研疫苗；包括針對白喉、破傷風及百日咳的ＤＴｃｐ疫苗組
合（嬰幼兒用在研ＤＴｃｐ、在研ＤＴｃｐ加強疫苗、青少年及成人用在研Ｔｄｃｐ）、肺炎球菌疫苗等。

業務有潛力，但估值好難，市場對佢有好大期望，股價炒得幾勁，反而風險高。

這類股，是有潛力。但因為佢無盈利基礎，市場都只是「估估下」。如果持有係可以，但一定只能小注。

------------------------------------------------

Q18076：

老師你好 00303怎麼樣 現在股價被低估 我覺得各種指標都不錯。pe低 以往業績不錯 缺點就前景一般般

龔成老師︰

偉易達（0303）雖然近年的股價較一般，但本質都算不錯的，但就唔叫好強。

佢過往派息比率高達9成，成立於70年代，業務是電子產品，這麼高的派息，反映管理層明白這公司已過了最高增長的年代，之後只會是平穩增長。

公司已不需要每年投資發展，反而管理層、大股東，偏向想收息，因此這是重派息多過重發展的公司。

雖然佢係某些業務做得不錯，但發展心不強，同時大環境並不是高速增長，故相信佢之後都會平穩。近年這公司的生意，都是平穩增長，如果比較幾年前的盈利，都是差不多。

如果你目標係收息為主，此股可投資，但不能太過大注。

------------------------------------------------

Q18077：

老師你好，我最近先開始接觸股票投資
想學下長線投資

我有睇過 PFE, CureVac, XPH
請問哩啲醫藥股會較為穩定嗎

龔成老師︰

其實美股中有不少優質企業，但由於我自已無特別研究，所以這些股票比唔倒太多具體建議比你。

但你可以從佢地企業質素、行業前景、財務狀況等，去定佢大約合理價值，再決定此股這一刻是否有長線投資價值。

若然你對個別醫藥股無太多認識，道富SPDR製藥指數基金（XPH）包括一藍子相關企業，你可以考慮。

------------------------------------------------

Q18078：

Hello想問3143、883值得入手嗎？

龔成老師︰

ＢＭＯ香港銀行股ETF（3143）基金的投資目標為提追踪納斯達克香港銀行股指數之表現。

佢包含左香港上市的銀行，當中4大持股為匯控（0005）、建行（0939）、工行（1398）和中行（3988），佔組合近6成。

這些都是收息股類別，所以你預個ETF比較以收息為主，增長力預佢唔會強。如果你目標偏向收息，這個ETF你都可以考慮。

但留意佢成交易好少，故買賣時個差價會較高，影響你回報，你要知道這個風險。

中國海洋石油（0883），質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

------------------------------------------------

Q18079：

你好呀龔成先生， 我今年24歲，月入$15000，儲蓄有2萬蚊 。

由3月份開始月供股票 00005 00386每個月 2K 平時儲蓄每個月有5000-7000，我係投資初哥， 做過少少research ，留意過呢兩隻股， 想問聲我呢個投資組合係咪有問題？

除左2800股票有邊d潛力股係值得我投資？ 我個目標係5年內儲到100萬，請問有咩建議。感謝你！

手頭上有 00005 AVGP $41.84 402股
00386 AVGP $3.74 1309股

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，匯豐（0005）、中石化（0386），以你的年齡來說，並不適合。

------------------------------------------------

Q18080：

老師想問下，宜家煩緊買20年定30年既樓，買30年既負擔無甘大，但呢一次既買樓係諗住住一世的，擔心大樓齡日後做唔到逆按揭。

龔成老師︰

睇翻按揭證券公司資料，一般係要求50年以下樓齡。但高過又唔係一定做唔倒，只係要個別再考慮。不過，無人知幾十年之後的情況。

由於你現時買入的是自住房屋，我會建議你買整體負擔無咁大的一間。因為咁樣，你可以用多出來的錢去投資，為自已退休生活作準備。

假若，到你退休時真的不能作逆按揭。你也可以透過賣出現有物業，轉買一些較平宜物業（如較偏遠、或小一點）來釋放更多資金，去支持自已退休生活。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。