「點解你隻眼咁紅嘅？」妃歡問我。 「哦無，我太開心啫。」我。 「我都係啊。」妃歡依偎喺我懷中，一臉幸福咁端詳手中嘅鑽石戒指。 我當然唔會話佢聽，呢一隻係我老婆嘅遺物。 當年無喺求婚戒指上刻佢個名，係正確嘅選擇。 我唔知道自己點解要將戒指送畀妃歡，但老婆都死咗，梗係要物盡其用。 反正鑽石賣出去又唔值錢，妃歡亦唔知道我曾經有老婆，送畀佢做禮物最適合不過，總之，佢無誤會我想同佢求婚就得喇。 望住隻閃閃發亮嘅鑽石，我就記起向老婆求婚嘅畫面。 當日喺海灘，黃昏嘅夕陽將海面照得閃爍不停。 我單膝跪下，都仲未講晒預先準備好嘅誓言，佢就喊到成面都係眼淚，仲不停點頭。 但因為佢屋企人反對我哋嘅婚事，我哋只好喺外國舉辦咗個簡單而隆重嘅婚禮。 前排，我老婆不幸去世。喺我老婆嘅父母眼中，佢早就同「我」斷絕咗來往，自然唔會知道我同她合租一個住所嘅事，儘管佢嘅遺體已經火化，遺物依舊喺我屋企。 佢父母手上嘅所謂陪葬品，只是一大堆著舊咗嘅衫褲，當然我都無出席老婆嘅葬禮。如果唔係，不難想像佢父母會將一切都怪罪喺我身上。 本來我同老婆仲預備咗一大筆儲蓄準備買樓，而家都歸我所有。 「點解我覺得尺寸好似有啲大，鬆鬆咁…」妃歡輕輕甩動手腕，粒鑽石就轉到手指下方。 「夏天妳隻手指會發脹，呢個尺寸啱啱好。」我同她十指緊扣。 我當然唔會話佢聽，呢個係我老婆手指嘅尺寸。 「咦，你話邊個會發脹啊～！」妃歡作勢打我，我趁機會一啖錫落佢度，等佢將戒指尺寸嘅事拋到雲霄。 我同妃歡已經一齊好耐喇，但一直都係情婦嘅關係，而家老婆死咗，妃歡就順利成章變成我嘅「第一順位」，晚餐過後，我甚至提議佢隨時可以搬嚟同我一齊住。 「真係可以？！」妃歡高興得雙眼發亮。 「當然可以，反正我一直都一個人住。其實我前排都換咗雙人床同大啲嘅衣櫃。不過，妳都唔使咁心急決定～」 我當然唔會話佢聽，呢張係我同老婆瞓過嘅舊床，仲有嗰個係我丟晒老婆啲衫空出來嘅衣櫃。 結果，妃歡隔日就將所有嘢搬晒入嚟。佢仲花咗大半日將我嘅屋企變成「我哋」嘅屋企，佢睇嚟好滿意，女人就同狗一樣，總係鍾意霸地盤。 「不過，嗰度點解紅紅嘅？」妃歡指向牆角。 「應該係油漆啩？我一直都無注意到添。」 妃歡仲打算之後將牆身重新油成米黃色… 我當然唔會話佢聽，嗰啲係我老婆嘅血跡。 2000like & 200share達標！明天下集！ 男主角故事會連載到完結，但大家一定期待阿公出場吧？！ 咁就要睇《阿公講鬼４：魑魅》了～ 已公開預售，７月出貨～ 留言「買」我inbox 你