- 《帶我去月球》影評 「是講遺憾不是講夢想」 —論校園電影樽頸兼談電影的自癒心法 （含劇透慎讀，宋芸樺好正） — 未講故事，先講對套戲嘅評價。 — 青春校園電影近年嚟就成為咗台灣片攻佔香港嘅一大殺著，由《不能說的秘密》、《九降風》等等萌芽，再到2011年火紅的《那些年》，然後成就了我心中傳奇的《我的少女時代》。雖然偶有失手，例如《那些年》跟《六弄》我實在覺得一般，而今次嘅《帶我去月球》表現仍然不錯，但我就真真正正感受到台灣校園電影嘅隱憂。 — 坦白講，你所預期套戲會有嘅嘢，佢全部都比到你，有青春偶像，有別開生面嘅故事，有跳舞有唱歌，起承轉合樣樣都齊，但我嘅感覺係呢個類型嘅電影已經走到一個好窄嘅樽頸位。 — 原因係在於我對電影入面嘅元素已經相當麻目。又係一部向偶像致敬嘅電影，乜唔係上次《我的少女時代》先玩完劉華咋咩？又係畢業又係打波又係騎車，又係錄音帶同埋天台，雖然故事唔同，但我真的開始厭倦，校園電影可以點樣走落去，或者係咪一定需要講愛情，呢個都係值得思考嘅問題。就好似今年嘅日本校園電影《帝一之國》、《去吧啦啦兵團》等等，都唔係講純愛，一樣可以別開生面。再重申一次，《帶我去月球》仍然係幾好睇，但上述嘅嘢係必須正視嘅危機。 — 講番故事，我係頗欣賞嘅。好多人都以為套戲係講夢想，你想做一池郁都唔會郁嘅死水，定係燃燒至死嘅星星？如果比你預知道自己必定會殆盡嘅結果，咁你仲會唔會去做你呢家做緊嘅嘢？對於呢個思辯我係非常有共鳴嘅，亦令我諗起《天煞異降》呢套戲，女主角預見到未來，知道會同老公離婚，但你仲敢唔敢去愛？ — 而《帶我去月球》套戲入面，就分咗兩派人。一派當然係劉以豪，佢嚟自未來，明白到宋芸樺追夢係真正嘅死路一條，所以佢好想阻止女方去參加小室哲哉嘅徵選。而宋芸樺當然又好想參加徵選啦，作為學校萬人迷嘅佢如果把握到呢個機會就可以平步青雲。 — 而呢個故事嘅矛盾位係，即使你已經知道未來會係點，我哋應該阻止人去做自己想做嘅東西嗎？喺電影故事入面，因為蝴蝶連鎖效應之下，成功改變咗未來，宋芸樺既可以追夢，最後亦得到咗好大嘅成功，係好完美嘅結局。 — 但現實又有無呢支歌仔唱呢？唔通我哋都識穿越時空？其實《帶我去月球》呢個故事擺喺現實，仍然係有好強嘅警世意義。可能我哋喺日常生活都會見到好多旁人必死無疑嘅做法，例如由朝打機打到黑，然後同你講佢想做電競選手；有好多不良嘅習慣，可能一日最少飲一公升酒，吸毒作奸犯科等等，當然你唔可以喺最後抹殺佢哋獲得成功嘅可能性，例如真係打機打到世界第一，作奸犯科到發咗達等等，但喺絕大部份嘅情況之下嘅下場都係悲慘嘅，就好似《帶我去月球》嘅情節一樣。 — 所以你就「為佢好」，為你所重視，所愛嘅人，所以學劉以豪咁以千方百計阻住宋芸樺參賽？可能之後宋芸樺又真係衰咗，你會好怨自己點解當日無狠心啲夾走佢，因而好內疚。但《帶我去月球》話比你聽嘅自癒心法係，你唔夾佢走，唔代表你唔可以做其他嘢去幫佢，只要盡咗力，又洗乜內疚呢？你可以盡力去同宋芸樺講佢追夢之後究竟會有幾慘有幾折墜，但唔該你最後比番個選擇權人哋。 — 回想起我個人都有過一個咁嘅經歷，曾經打過一個比喻：「如果前面就係懸崖而你係蒙住眼，我會盡我所有嘅能力話比你聽前面有危險，叫你唔好行過去，但我唔會阻你行前任何一步。」最後當然係跌到粉身碎骨。 — 「條路自己揀，仆＿唔好喊。」幾時都係真理，你不能在減卻別人在努力後失意的同時，徒添了對方無法追夢的遺憾。 — （一篇影評其實要寫嘅時間真係頗長同相當費心力的，正如呢篇野都過左千五字了。如果你覺得文章係寫得好嘅，我一個人嘅力量真係非常有限的，唔好吝嗇你嘅like同share吖，甚至幫手推薦比朋友知道原來睇戲之後係可以有反思的，一齊傾，一齊分享同感受。網絡的力量可以很少，一篇千文字可以只像一粒沙，但同時亦可以很鉅大的，依靠的就是你，你，和你，感激不盡！）