【龔成問答信箱】（Q21421-Q21440）

Q21421：

龔sir上完你個堂，我分析左152呢間公司，因為阿Sir有推薦過548收息，而152又係548嘅母公司，我睇過佢係業務覺得佢嘅增長能力應該好過548，

所以想考慮用作收息及有所增長。現在有幾個問題唔清楚，想請阿sir解答：

1 佢2020年嘅流動負債得大增一倍幾是否係收購蘇寧易購引致呢，對佢本身有咩影響呢？

2 這股近幾年都派特別息，是否會對往後派息不穩定呢？

3 我搵左佢近5年平均市盈率係7.6-10.4，以佢最新一年嘅盈利1.1嚟剩返，得出嚟嘅估值大概係$8.4至$11.4，是否太低？阿Sir認為合理價係幾多？點計算呢？

唔好意思新手上路要勞煩阿Sir幫幫手

龔成老師︰

先講深圳國際（0152），此股係有質素，是不差的收息股。

佢主要從事收費公路的開發、營運及管理；物流中心及綜合物流港的建設、營運及管理；提供第三方物流服務、物流資訊及金融服務、港口及相關服務、物流園轉型升級服務。

過往業務穩定，生意與盈利都不差，不過就不是高增長類。這股都有長線投資的價值。現價合理，投資收息可以。

1) 此變動與收購蘇寧無關，只要你留意資產負債表，你會發現變動，主要係來自"貨款"部份。

當你再仔細睇附註25，你就會發現，其實係一些"中期票據和債券"到期日，由以往多於1年(計入非流動負債)，變成1年之內(計入流動負債)，因此流動負債才會大增。

以集團現時財務狀況，負債問題不算大。

2) 由於近年特別派息，主要來自土地轉讓的收入，這些收入都是一次性。因此，有機會往後特別派息會有波動。

3) 我地係計算合理市盈率時，會用過去10年數據，抽取中間4個市盈率7.6 - 9.6倍，作為參考。但在採用前，你先要分析，這個4個中位數，是否可以合理反映其價值。

我地睇翻過去10年的市盈率圖表，你會發現自2018年起，整體數字出現明顯回落。

因此，我地就要先去了解當中原因，點解有這樣的變化。只要你仔細留意過去幾年年報，你會發現集團近年特別派息原因，主要係來自轉讓公路資產。

集團本身收入，主要來自公路收費。而公路，自然係集團的重要資產。當這些重要資產減少，市場會預期佢賺錢能力弱左，故近年給予的市盈率估值，都會較再早幾年為弱。

因此，我地計算合理市盈率時，要作出相應調整，大約係6-8倍會較合理。再以過去5年，平均每股盈餘HKD1.846計算。

合理價值︰約為HKD11.0 - 14.7。

當然，這只是其中一個估值的角度，而投資者在進行估值時，會同時用多個估值方法去進行估值，得出更立體的結果。預佢現時估值合理中間至中下。

------------------------------------------------

Q21422：

Hello成哥，上完股票班真係學到好多嘢，令我更有信心選股同埋計算估值。我最記得一上堂時你叫我地分清楚urgent同埋important，我相信上堂學終身受用嘅知識一定係最important

龔成老師：

我地一定要分清「urgent」、「important」。

香港人太多趕急的事，以至一直都唔做重要的事，所以我先第一堂同大家講，課堂好重要，比你用一世的，我見個有部分同學好認真，佢地會為左唔遲到上堂，而要求公司早走。

我見過有同學為左做最後的大功課，請左公司半日假。

如果你之後的決定，都明白「urgent」、「important」，集中處理「important」，你往後會好成功。

------------------------------------------------

Q21423：

龔Sir 你好, 想請教你一個問題, 如果有一隻股票, 股價年頭7元, 入左2000股, 年尾8元, 另每股派息0.472, 咁回報係咪21%？ 見下計法：

原本： 7元 x 2000 = 14,000
一年後： (8元 x 2000) + (0.472 x 2000)
= 16000 + 944 = 16944元
回報： （16944 - 14000）/14000 = 21%

*以上所指係置富房託
如果回報有21%, 咁又唔錯喎
謝謝！

我指如果我無理解錯回報有21% , 收息股黎講好好, 對嗎？ （雖然只有2手）

龔成老師：

對，你計算正確。

以房託及收息股來說，這個回報是高回報，其中一個原因是你買入時，當時房託受疫情因素影響而向下，所以能以一個不差的價位買入。

長遠來說，房託較難每年有這個回報，你預是收息及基本增長。這股可長線，你的投資不差。

------------------------------------------------

Q21424：

成哥，你好啊朋友最近誤入佐以下股票

8083中贊@3.9×8000
3833新彊鑫礦@2.13×20000
235 中策@0.2575x150000
3321 偉鴻@5.2×15000
1357 美圖@2.94×3000
[email protected]×200000
[email protected]×50000

請問應否繼續持有？如重新規劃組合現時有咩可以選擇，謝謝成哥無私既分享

235係0.2575至岩，希望成哥能卑d意思，幫幫我朋友可以重整組合，謝謝

龔成老師：

坦白講，持股大多無質素或只是熱炒類，部分就有少少質素。

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

中國有贊（8083）不是劣質，但不建議持有太多。
新疆新鑫礦業（3833）屬風險類股，不能持有太多。
偉鴻（3321）無質素，宜賣出。

中策集團（0235）質素唔太好。

佢主要從事投資證券、金屬礦物及產品及電子組件貿易、放債及證券經紀業務。

睇翻過往的業務情況，非常波動，生意上落大，有時大賺有時大蝕，風險高。加上企業規模不大，投資價值不高。

這股股價有時會大升，但可能只是中短期業務與消息，長遠未必一定利好。

美圖公司（1357）正面，佢過左最差時期，現時正向好。

佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

結好控股（0064）質素一般般，不宜持有太多。
英皇國際（0163）質素不太好，賣出較好。

建議之後，投資翻一些穩健類的股，如不懂選，就投資ETF。

------------------------------------------------

Q21425：

老師，你本《5年買樓》的書好正！對我這對買樓O認識的人來說，可以在很短時間內對樓市有個整體概念和有信心可以去買樓！

可措現時樓市已回升不少，很多屋苑已破頂，現在只能繼續等待！

可否請間老師，現在手頭有大约五球，在等待樓市回調才買樓，現在應如何配置這五球呢？因為不知要等到幾時，又不想令這五球繼續遍值！謝謝！

龔成老師：

如果你本身無自住樓，而自己又有這需要，其實已經可以考慮，最重要是你資金足夠，在供款方面無問題，買樓後仍有現金剩，這樣已可買。

好多人會分析樓市走勢，但我相信這是好難的，反而考慮「自己的需要及配置」，才是你買樓更大的分析點。

香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

如果有自住需要，只要在供款方面無問題，買樓後仍有現金剩，都可以考慮下置業。

------------------------------------------------

Q21426：

老師請問成本上升算利好定不利消息? 我最近研究紙業，點解紙材成本上升，有d賣紙既公司會賺多左? 究竟成本上升係好事定壞事?

龔成老師：

其實這是複雜的問題，往往要睇行業情況，以及企業營運情況。

有些行業，當成本上升後，能將絕大部分轉嫁比客戶的，可能因為行業的競爭有限，又或全行的營運模式都相同，因此佢地會同步加價，而客戶無太大的選擇權。

當我地分析時，往往會睇翻企業有無「成本轉嫁」能力。

當你分析時，要同時睇企業的毛利率，如果成本上升但毛利率不跌，反映企業有成本轉嫁能力，即是成本對佢無影響，往往有一定的優質度。

------------------------------------------------

Q21427：

想問老師有冇一啲儲蓄型危疾保險推介

龔成老師：

無呀，因為我不從事這方面的銷售，你可以去銀行或保險公司問下。

最重要是，你按自己的「需要」去買，保險就是將你不想承受的風險，轉嫁比保險公司。這是防守的動作，不過，我地理財最重要是攻守兼備，因為不用太多，「足夠」就得。

------------------------------------------------

Q21428：

龔Sir你好！本人3x歲，想問一下長遠收息同增長，可以考慮以下股票持有或買或增持？或龔Sir 有甚麼推介？

1. 1310 （$11買）
2. 1830 （$4.4買）
3. 331 （$4.5 買）
4. 398 （$2.5 買）

5. 1373 （$2.5 買）
6. 1523 想買
7. 1883 想買
8. 3067 （月供1/2手）做增長股票

非常感謝！

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你3X歲，我一般會建議你用「平穏增長股」 + 「潛力股」的組合，先做好財富增值部份。

除非你個人極保守，或者本身有其他原因，需要有額外穏定現金流作支援。

否則，而一刻我唔建議你投資太多，中信國際電訊（1883）、香港寬頻（1310）這類收息股。

另外，東方表行集團(0398)質素較一般。這些股票，若持貨不多，可持有。但若太多，最好沽出部份換至其他股票。

珩灣科技（1523）主要以「Ｐｅｐｌｉｎｋ」及「Ｐｅｐｗａｖｅ」品牌從事ＳＤ－ＷＡＮ路由器的設計、開發、推廣，以及提供相關軟件許可及保修與支援服務。

ＳＤ－ＷＡＮ路由器可連接多個廣域網（ＷＡＮ）連接、智能分配流量給多個廣域網、可集中管理，以及必須利用加密技術建立安全連接。

業務及盈利都有不差的增長，發展不差，不過公司規模始終較細，因此始終都有風險。

這股長遠不是無價值的，但都要明白發展緊的，都是有變數的行業，所以股價潛在波動可以較大。

現價都算是合理的，但不建議大注投資，長線投資都可考慮。

必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。業績前計佢$4是合理區頂，業績後股價升左好多。現貨可持有，但暫不宜加注。

將來你可以投資以下股票，但若果你投資知識不高，可先較集中在平穩增長類股，至於潛力股，只宜小小注，最好是你提高投資知識，等你有一定知識，先慢慢增加翻潛力股比例。

現時大市只在合理區，資金唔好盡用。最好留有部份，等大跌市出現時，可以用來掃貨。

------------------------------------------------

Q21429：

龔成老師，您好!我見有讀者問你移民後的投資策略，但佢地冇提到一點，就係英澳等國家抽取資產增值稅，

例如股票買賣利潤，政府會抽取約30-40%税。如果考慮埋這因素，我們需要調整投資策略嗎?

例如減少平穩收息股(因為抽税後利潤所餘無幾)集中喺增長股?謝謝

龔成老師︰

我自己無對海外稅務作深入研究，比唔到太多具體意見你。但當考慮到這些增值稅項時，的確會令原先回報被打上拆扣。

但除非你不作投資增值，或者移民到低稅率地區，否則這個問題，基本上係無可避免。

投資策略基本上唔會大變，但你計算長線回報率時，要因應相關稅項作扣減，以免令預測過於樂觀。

最後，我建議你去問翻當地稅務顧問，看看有沒有一些節稅方法，從而減少這方面的影響。

------------------------------------------------

Q21430：

老師你好！

今年28歲
月薪34k
要比10k 家用
有月供2k(2800)
保險每個月1.5k (每年一次過付款)
有50k Savings

有意今年同男朋友搬出黎

啱啱開始上你既堂

想用月供/ 分注投資方法放啲錢入水桶1同水桶2。

另外，今年個市似好熾熱，身邊所有人都喺度講緊股票，如果我用計公司價值判斷佢價格係貴或平，其實係咪都可以放心入股？

今年會唔會算係一個較危險嘅買入時機？

想請教老師意見同指導。感謝

龔成老師︰

現時大市在合理區，雖然部份新經濟股，有輕微過熱架情況。但整體大市水平，尚算合理。

我地唔會去估個市點走去定買賣策略，只會繼續用企業估值，去定平貴咁買貨。

但當成個大市去到一個狂熱的情況，我地就要保守少少，現時未算去到好狂熱。

以你現時28歲，投資在水桶1同水桶2，係正確做法。但你收入計，每月月供金額太少。

如果你唔係有太多必需開支，我建議你盡量將月供金額，提升到1萬以上。因為你年青，應把握時間，盡力去做好財富增值部份。

而一刻，你唔需要急住去配置，或者新加其他股票去月供。因為投資係一個長線計劃，你可以等上完堂，有一定知識和明確概念，才去調整會較好。

------------------------------------------------

Q21431：

hi 你好 龔sir，我是一位18歲學生，沒有part time 現在一邊學習緊投資知識，

1現時我有一萬元想all in 入股票，想搵一隻股票收息邊隻最好？

2我現時打算購買你的書學習投資知識，邊一本系適合我這個BB新手，多謝

龔成老師︰

1) 你這個年紀，就算資金不多，都應努力學好投資知識，甚至小注去吸收經驗，為將來準備。所以，你做法好正確。

由於你暫時經驗和資金都不多，建議你先從以下收息股入手。如果你不太認識這些股票，可以直接買3110派息基金，都可以。

但將來到你有穏定收入，又對投資有一定了解，就要加大投資力度，改為買一些較有增長力的優質股。盡力把握年青時間，去為自已財富增值。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、置富（0778）、陽光（0435）或收息基金(3110)都可以。

2) 以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q21432：

龔成老師，很喜歡睇你嘅影片，好多分析都講得好好，特別係價值投資法。

本人看好中國嘅保險業，隨住14億人口開始富起來，相信保險嘅需求會越黎越高。

想問問你對中國人壽2628同財險2328嘅睇法？同業中，長遠有高升值潛力嘅股票又可以推介一下嗎？期待你嘅回覆，多謝

龔成老師︰

我自己都係用「價值投資法」，巴菲特用左這方法賺大錢好多年，這是公開的。

但一般散戶就是貪賺快錢，而不用這方法，因此，令到一般散戶仍是輸多贏少，我們仍是賺大錢的一群。

中國隨著人口增加，城鎮化、人均收入增升等，都對保險這類產品需求，只會有增無減，故長線中國保險叢係正面。

中國人壽(2628)不是無質素，但近年有質素下滑情況。現價合理，但投資價值只係中等。

中國財險（2328）主要於國內為各界客戶提供多種財險產品，包括機動車輛保險、企業財產保險和家庭財產保險。

過往的生意與盈利都不差，不過就無乜增長動力，質素算是中等。這股現價合理，可長線，但就主要預係收息，唔好對股價有太大期望。

如果你看好中國保險業和其增長潛力，平安(2318)會係較理想選擇。佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型。現價算係合理區中上部，分注投資就可以。

------------------------------------------------

Q21433：

老師你好，我最近幾個月開始留意你page，我以往只有3次買賣股票經驗。

但有一次錯信股票group輸了幾萬蚊，加上13元買入石油股，依家跌到得番8蚊左右，真心輸到怕。

想請教依家石油股係咪唯有繼續持有？
求指教

龔成老師︰

近期好多網上騙案，就好似你所講股票group，要小心。

記住，我地買入一隻股票，一定要知道佢質素、行業前景、財務狀況等，才去投資。

如果你連間公司點賺錢、行內有乜優勢、點解未來有發展和增長潛力，都答唔倒自已，純粹係聽消息，甚至係某某群組意見。咁你就要停一停，唔好投資住。

石油股，好似中石油(0857)、中石化(0386)、中國海洋石油（0883）質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。這類商品企業，都可投資，但就要明白不是最高質的企業，不要大注。

如果佢佔你組合好多，你可以每有反彈，就慢慢沽出部份。

------------------------------------------------

Q21434：

成sir 您好！小弟年29。已經有想財務自由的目的。不想再浪費自己的人生了。

最近學習窮人與有錢人的態度及資產與負責的分別。

月入17000
扣除一切開支可以儲1萬元。
銀行有70萬。

有留意你大推盈富 港鐵 領展等等。

以最終目標財務自由及每月被動收入約20k.

小弟投資經驗0。有睇過下成sir 教導以月供模式較適合初學者。留部份現金流等大市跌時可以大手購入長線投資收息股？

小弟會睇書學習如何去計算公司的真正價值。多留意不同公司的年報表等。

有一個最不明白的是睇財經新聞。是否留意新聞介紹公司背景及行業發展？長遠是會否留意公司會否接觸新行業等？

另一個最大問題是如分配70萬去錢滾錢達到 金錢為你工作。

小弟已經開始睇投資書。增值自己才是最大的財富。長遠需要報讀會計課程？好人一生平安

龔成老師︰

如果你希望最終可以每月有2萬蚊現金流，以股息率6%計，你需要本金400萬，這就是你初步目標。

你現時29歲，係財富增值黃金時期，除了增值外，也緊記要努力提升自己投資知識。

由於你未有投資經驗，好易會買貴貨，所以用月供或分注入貨模式，對你這類初學者，會較安全。

以你29歲，可以選擇一些「平穩增值股」+「潛力股」作投資目標。

以現時大市合理區狀況，月供最好用一半每月儲蓄，另一半就先儲起架策略。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、ＧＸ中國電車基金（2845），但就要明白波動性比上述會高左，同時風險大左，你要自己平衡。

若你不懂選股，可以先用盈富(2800)作目標。其餘合適股票，到你對佢地有一定了解，才從中選股。

現時大市只是合理區，你現有70萬資金可以先投入15-30萬，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

由於你很年輕，相信要達成400萬目標不難。

我假設投資回報有10%（連股息再投資），你每月投資$10000 + 70萬本金，大約10年多後，就會增值至400萬。

至於投資知識方面，新聞主要係睇有無一些事情，對企業本身質素，或者長線發展有影響。例如早前內地監管政策收緊，就令阿里巴巴(9988)等企業的風險度增加左，這就是要留意地方。

我地要不斷吸收「資訊」，例如宏觀經濟情況，企業發展，各行業的情況。但我地睇新聞不是要知道所謂的「意見」。

除了看書、年報、新聞外，你可以報讀一些投資相關課程，去提升相關知識。

本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成。

到你讀完整個課程後，你已能自己選股、投資、評估平貴，在投資上已掌握了一定的知識。

------------------------------------------------

Q21435：

Hi 阿sir你好，想聽下你意見，本人38歲，女，月收入$53000，現時有兩個物業，供款分別15000及18000，租金收入為$15000。每月開支$15000左右。

另一單位明年亦打算出租，大概收$11000租金左右。

睇左你好多資訊，有做月供股票，每月$13000，分別銀娛$2000、比亞迪$2000、中銀香港$2000、小米$1000、阿里巴巴$2000、友邦保險$2000、港鐵$2000。

現時股票有11萬左右，現金$25萬，手上保險有50儲蓄。

想10年後，可以有500萬，想問下你意見？我現時股票組合投資是否正確？

希望得到阿sir回覆

龔成老師︰

以你38歲計，應先做好增值部份，你現時持股都係合適合。但留意，比亞迪(1211)現價偏貴，要回到$120左右水平，才建議再開始月供。

此期間，你可以用ＧＸ中國電車基金（2845）- 這基金的目標是追蹤Solactive中國電動車指數NTR「相關指數」表現緊密相關的投資回報。

或其他潛力股代替，如中生(1177)、福壽園(1448)、安碩恒生科技(3067)、港交所(0388)、騰訊（0700）。

現時大市只係合理水平，現金和股票最好各佔一半，你可以多5-10萬去分注入多少少貨。餘下資金，就等大跌市出現，才加大力度掃貨。

另外，"保險"主要係用來防守，買足夠保障就可以。儲蓄成份架保險，我就唔建議太多，增值最好都係留比優質資產(如優質股、物業等)去做。

我假設投資回報有10%（連股息再投資），你每月投資$13000 + 本金36萬，10年後大約會增值至340萬。如要達至500萬目標，你要將月供加大至$22000，才較大機會成功。

所以，我建議你利用明年新增租金收入，加大投資力度，以助你達成目標。

物業方面，你現時已經持有兩個物業，之後就暫時唔好增加固定資產類別，令財富組合更平衡。同時，如果可以的話，盡快將手上物業出租能有助你提高現金流。

------------------------------------------------

Q21436：

龔成老師，你好呀！現年40歲女，剛離婚無業，賣了樓有200萬現金。現在有以下股票，請問我有買啱嗎？

應該長期持有或是到一定嘅時候賣掉獲利？ 909跌了一半，我應該怎樣呢？

#1 2500股 $53.5
#2 1000股 $71.5
#941 1500股 $42.5
#291 10000股 $67
#3690 500股 $278
#909 8000股 $53.5

我嘅目標係可以在短時間內買一個細單位300～500萬內自住，唔駛再租屋，請問我嘅投資方向啱嗎？

應該怎麼樣更好呢？ 麻煩老師解答，萬分感謝！

龔成老師︰

我想先要你明白少少財富增值概念，我地做財富增值，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

所以，只要係優質的股票，我地一定會長線持有，而唔會半路中途去沽貨。除非成個大市好狂熱(現在未算)，或者個企業長線質素轉壞，我地先會賣出。

回到你本身情況，首先，你有一個明確目標，就係短時間內購買物業自住。同時間，你現時在待業狀態，故中短期內對現金需求不少。

以你40歲計，應以增值為主。你持有股票，大致上係可以。

明源雲（0909）有潛力。

佢主要係中國房地產開發商及房地產鏈參與者，提供企業級ERP解決方案及SaaS產品。

睇翻佢之前的資料，佢係中國房地產開發商的第一大軟件解決方案供應商，市佔率有約2成。係呢個市場裡面，按收入計，亦為ERP解決方案及SaaS產品的最大提供商。

其實，佢的角色可以話中國房地產行業的數字化轉型，為房地產開發商及其他參與者，開發了一套行業垂直的ERP解決方案及SaaS產品，以助其管理廣泛的業務運營。

包括銷售及營銷、採購、成本管理、項目管理、預算以及房地產資產管理，佢的SaaS產品包括雲客、雲鏈、雲採購及雲空間。

業務雖然有增長力，但你買入價唔平。現時回落近半，但初步分析，依然都係屬於貴水平。始終市場現時對這類股有好大期望，此類股票，波動性較大。

此股可持有，但由於你持股比重有點高，我建議你每有反彈，沽出部份，去平衡風險。

另外，華潤啤酒（0291）都有質素，但佢佔你組合近半，太過高。緊記，個別股票比重不要超過組合15%，否則會出現過度集中性風險。所以可考慮賣出部分。

你可以用沽出部分以上2隻股票資金，再加上30-50萬，去分注慢慢買入以下優質股，並長線持有。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、ＧＸ中國電車基金（2845），但就要明白波動性比上述會高左，同時風險大左，你要自己平衡。

若你投資知識不高，可先集中在平穩增長類股，至於潛力股，只宜小小注。到你提高了投資知識，才慢慢增加翻潛力股比例。

餘下資金，主要係用作你置業基金。再加上，你還未有工作，最少都要留有半年基本生活開支的應急錢，作為後援。

若將來股市有明顯調整，你也可以考慮用部份資金來入市。這樣安排這200萬，相信會較有彈性之餘，當你都會較有保障。

至於置業方面，你係用來自住。緊記要堅守一個準則，就係「供得起」。

現時香港樓市算係合理區頂，你可以慢慢物悉目標，到有較理想價錢，又有信心可以供得到，就可以考慮出手。

------------------------------------------------

Q21437：

你好 龔sir。睇左你fb一段時間 先買入必瘦站 會繼續持有 多謝你既分享。

另外亦留意到你之前講既粵海投資 本身想入手 但最近參股嘉誠環保工程 但網上不多關於嘉誠環保工程資料。

消息公報後 股價有所下跌 請問你對於呢個公司行動有咩睇法?

會否影響你本身對呢個股票既評價呢? 謝謝

龔成老師︰

必瘦站（1830）長遠有發展，這股有長線投資價值。

但現價已經係偏貴，有貨可持有，就唔好加注住。

粵海(0270)宣布收購嘉誠環保工程註冊股本總額合共 53%的股權，在該收購完成後，嘉誠環保工程將成為其非全資附屬公司。

嘉誠環保工程是一家在中國成立的有限責任公司，其於 2005 年成立，主要從事環境工程工作，並為工程相關工程提供投資、設計、建造、運營、諮詢、設備研發和製造服務。

嘉誠環保於中國河北省及河南省的市政給排水工作，相信集團想進一步提升在華北地區的市場份額和品牌影響力，初步睇係正面。

至於中短期股價走勢，未必一定跟企業質素和發展潛力有關。我地分析時，一定要集中用長線質素去做判斷。

現價計，算是合理水平，可分注入貨。

------------------------------------------------

Q21438：

Hello 龔Sir, 最近1638佳兆業跌了很多，值得入嗎？

另外，1503招商局有成8厘息，係咪值得入當收息？ thanks!

龔成老師︰

佳兆業集團（1638）主要從事物業發展、物業投資、物業管理、酒店及餐飲業務、戲院、百貨店及文化中心業務，以及水路客貨運業務等。

業務發展不差，不過盈利就較為波動。另外，由於負債較高，因此都有風險。現價合理的，但唔建議太大注。

招商局商業房託（1503）佢持有及投資中國相關的物業組合，物業組合有深圳市蛇口的多項物業，包括寫字樓綜合物業新時代廣場、數碼大廈、科技大廈及科技大廈二期，以及購物中心物業花園城。

物業有質素，不過較受經濟週期因素影響，租金會有少少波動，令到這股的股價較為波動。現價合理，有投資收息價值，不過唔建議太過集中在這房託。

------------------------------------------------

Q21439：

你好～～老師，我有少少問題希望你幫到我

1）想問一下康希諾6185 我400（200股）同260（200股）都有貨，呢兩日我見升返唔少，今日心大心細諗緊放唔放～～我唔係好識分析呢間公司前景好唔好？

2）我買咗中國電動車2845，138元400股～～有見過你講過買呢一個股票都不錯，我要唔要而家低價再入多少少

3）快手362 有200股，241元又入了200股

4）藥明康德189元 入了200股

我有啲股票分開兩次入，我應該取一個中間價，等升返上去放晒佢，定係低價入嗰啲，覺得升到一個價位可以先放咗佢，高價位嗰啲就照放喺度？

謝謝

龔成老師︰

你好著重個帳面數，其實你放貴個1手先，定平個1手先，係無實質分別。只係心理上，覺得放平個1手，你就賺左。貴個手就放係度，當無事，這種想法好錯。

你要明白一個概念，我地投資唔係賺差價。而係想將一些長遠只會貶值的現金，換成會增長的優質資產(如優質股、物業等)，並長線持有。

因此我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

1) 康希諾生物（6185）主要於中國從事研發疫苗產品，疫苗產品線如下：3種臨近商業化在研疫苗：

包括腦膜炎球菌結合疫苗（ＭＣＶ）組合（四價ＭＣＶ及兩價ＭＣＶＩ，均為集團核心產品）及Ａｄ５－ＥＢＯＶ（其由集團與軍事醫學科學院生物工程研究所共同研發，為中國第一種獲批淮作應急使用及國家儲備的埃博拉病毒疫苗）。

另外，有6種處於臨床試驗或臨床試驗申請階段的在研疫苗；包括針對白喉、破傷風及百日咳的ＤＴｃｐ疫苗組
合（嬰幼兒用在研ＤＴｃｐ、在研ＤＴｃｐ加強疫苗、青少年及成人用在研Ｔｄｃｐ）、肺炎球菌疫苗等。

業務有潛力，但估值好難，市場對佢有好大期望，股價炒得幾勁，反而風險高。

這類股，是有潛力。但因為佢無盈利基礎，市場都只是「估估下」。

如果持有係可以，但一定只能小注。若2手佔組合比重都唔少，建議沽出1手，去平衡個風險。

2) 中國因為能源問題，長遠一定要發展電動車，這是大方向，故此股有一定投資價值。

現價依然係合理區頂區，你已有一定貨係手，唔建議你加注。除非你資金好充裕，就可以而一刻加小小注。

3) 快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展。現貨可持有，但你預短期股仍會十分波動。

4) 藥明康德（2359）都有d質素。

佢主要從事藥物研發平台業務。係藥物開發過程，主要分為藥物發現、臨床前開發、臨床研究及商業化生產共四個階段。

睇翻佢的資料，佢的服務對應各個階段，可分為以下四個分部：（１）中國區實驗室服務（２）合約生產組織（３）美國區實驗室服務（４）臨床研究服務。

佢的客戶包括美國、中國、歐洲及全球其他地區的製藥公司及及生物技術公司。

業務其實不差的，過往的生意與盈利增長理想。

當中最大的風險，就是市場估值，現時的市盈率過百倍，就算有增長力，都計都貴，股價上落一定會好大。市場現時對佢前景有好大期望，但如果增長力比市場略減，股價都會調整。

只可以話這企業有增長，同時有風險。現貨可持有，但唔好加注了。

------------------------------------------------

Q21440：

阿sir, 我尋日入3690美團，今日跌

0285 同 2382 應該幾時入呀

剛剛$31入咗3319，係咪都高呀？

龔成老師：

你唔需太著重短期股價走勢，最重要是長期的企業發展。

美團點評（3690）有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，之前明顯貴，之後回翻好少少，大約合理區頂至略貴，不過，一定不能大注。小小注，是較好的做法。

只要你持貨不過多，都可持有的。

至於比亞迪電子（0285）去翻$40會好少少。

舜宇光學科技（2382）有一定的質素，但現價合理區頂至略貴。

過往手機市場高增長，令佢鏡頭業務受惠不少，但近年手機增速開始減慢，你預佢增長力會變得較平穏。不過，手機市場又開始向好。

在長遠，無論是手機鏡頭，又或是各種鏡頭方面的應用，只會愈來愈廣泛，前景正面，不過，中短期可能會有少少波動。

這股可以長線投資，分注或月供較好。

雅生活服務（3319）合理價，有質素，可長線。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20641-Q20660）

Q20641：

老師你好，你上堂教過除非係非常高估值或者公司質素有變，就要賣出。

但我想問下如果持有一隻股票發現佢公司發展已經開始見頂，或者佢股價已經釋放左公司既價值，係咪都可以將佢賣出?

我見你答幾時賣1211，你話將來普及後就可能會考慮賣出。

因為我留意緊海底撈呢間公司最近既年報，指出海外市場拓展有難度，國內競爭大而且已經唔會再大規模開店。佢股價亦都反映得差不多，咁係咪可以沽售?

龔成老師：

要睇你的投資方向，首先，我地投資一定是買入優質股，這點不變的，而公司發展時，一定會有速度上的改變，但我地都要睇翻佢的優質度有無改變。

我假設比亞迪（1211）往後一定高速發展電動車，然後到10年後市場成熟，佢增長力有限，如果到時佢已經有一定的市佔率，有好強的客戶群，但增長就弱左，在企業質素來講，其實仍是有的。

但佢就由水桶1類，變成了水桶2，所以就要睇你的投資方向，如果你想集中水桶1，就有可能賣出，因為佢已經完成了「水桶1的使命」。

但如果你到時想投資平穩增長類股，其實佢是適合的。

因此，增長力只考慮優質度的其中一個指標不是唯一的指標，正如無增長力的港燈（2638）都是優質股。

------------------------------------------------

Q20642：

龔成老師，想問問有關丈夫與我的投資及退休方案。

本人是一位鋼琴老師，39歲，希望以月供股票的形式，預備大約14年後的退休生活（ 14年後是女兒18歲，之後有機會去外國讀書）。

本人有醫療保險，一份投資相連的保險（ 現在大概十萬元現金價值），以及一份月供基金（今年是第13年，需要供20年 ，每月$1600，現在現金價值大概$33萬 )。

囡囡有一份教育基金（需要付10年保費 ，年供2萬元，今年供第三年）。

股票有2手盈富基金，21手中國銀行，流動現金13萬元。

丈夫今年48歲，也有幾份儲蓄保險，以及醫療保險。 其中一份儲蓄保險，兩年後可以選擇吾供， 去到53歲 ，可以攞返大約50萬。

另外， 有一份投資相連保險， 現在現金價值大約15萬（ 每個月供$1000，要供多11年）。 現有流動現金70萬，定期儲蓄20萬（2-3厘利息）。

55歲會有一筆250萬的退休金，而每月會有大概$15000的長俸。我丈夫會延長退休年齡至60歲，故此，在55歲直至60歲，除了每月長俸外，也會有每月大約$46000月薪，以及當60歲時，有一筆90萬的約滿酬金。

如果我們兩夫妻，每月準備用一萬元作月供基金，請問有什麼建議？

另外， 丈夫及我現有的流動現金，可以怎樣運用在股票市場裏，長期持有？

另外，現住在公務員宿舍，直至退休，所以住屋方面沒有問題。但其實希望在退休時，能夠有一個真正的安樂窩屬於自己，所以想請教老師有什麼建議？

是否選擇丈夫60歲退休後買樓，就很難達成財務自由？謝謝！


龔成老師︰

你現時投資，都好集中係一些儲蓄保險、定期、投資相連保險這些產品身上。

其實保險主要作用，就係幫你做好防守部份，只要買足夠保障就可以。至於增值，我地應該集中係優質資產類別，好以優質股、物樓等。

因為長線計，優質資產的升值能力，一定比這些產品好。

所以，我建議你先審視翻現有投資產品。如果增長力唔係好高，你可以考慮調整一下保險/基金的供款，令你能夠有更多現金流，來買入優質資產。

你和你先生，距離退休尚有一段時間。可以用一些有增長力的股票，好似「平穏增長股」 + 「潛力股」去增值。

現有持股都可以，但我地創造一個理財組合，除左要適合你年紀和目標外，都講求平衡性。唔可以太偏重個別行業或企業，相同行業不可佔組合多於3成，而單一企業不要高過15%。

你現時持股太偏重係中行(3988)，而一刻你唔需要沽出，可以用未來新資金，去慢慢拉平衡翻個組合。

現在你每月5成儲蓄，即是用$5000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

但由於潛力股有一定波動性，我唔建議你佔太多，大約3成左右好了。

現時大市只是合理區，你現有100萬資金(你自已13萬+你先生70萬現和20萬定期)可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$10000 + 100萬本金，14年後大約會增值至700萬。

到你們退休時，將增值型股票，慢慢換成收息資產，去創造穏定現金流，去支援退休生活就可以。以股息率6%計，這700萬可為你們每月創造$3.5萬的現金流。

至於房屋，由於你現時資金唔算多，而且都有公務員宿舍。你可以考慮住至退休。到獲得2筆可觀的退休金時，才購入自住物業。以便在退休前這段時間，騰出更多資金，用作增值之用。

------------------------------------------------

Q20643：

老師，今年都有幾隻大股上市，如bilibili, 百度等等，其實港交所往後係咪都係升勢，長遠來講都係值得買入?

佢之前由400急升到500幾的時候，價格係唔合理?

龔成老師：

港交所（0388）一定有優質的。

而我地分析時，會著重企業的長遠價值，唔好只睇一年的業務情況。這股有獨特性，長遠股市發展仍正面，所以一定有長線價值，只是平與貴的問題。

這股去到$500已是貴的水平，當佢由$400升上$500時，就是由合理去到貴的情況。當然，企業價值慢慢會變的，但要以長遠角度去分析。

這股由於經常都唔平，如投資，利用月供較好。

------------------------------------------------

Q20644：

你好，我持有1833、2359、2269。
股價跌左，點算？

龔成老師

其實你持有的股票，不是無質素。

但你出現了集中風險情況，如果你組合全部都是醫藥相關股，當行業或大環境出現了一些不利變化，會對你整個組合產生不利影響。

加上醫藥類本身的風險比其他行業較高，如果你太過集中，風險較大。

這幾隻股都有質素，建議你股價上翻D，要開始調整翻。建立一個更平衡的組合。

------------------------------------------------

Q20645：

呀sir 我現家持有以下股票

9988，2手@242
285，2手@54
6060，7手@69.5
1858，3手@21.7

因為我入場先半年多D，呢排個市愈跌愈勁搞到我好擔心，因為我有一半資金都係入面，請問呀sir你點睇上面4隻股，我希望等佢地回升先走，唔想止蝕離場

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

阿里（9988）有質素，無問題。
比亞迪電子（0285）有潛力，無問題，只是之前貴，現價都貴。

眾安（6060）本質不差，但不建議持有太多。
春立醫療（1858）唔建議持有太多。

------------------------------------------------

Q20646：

Hi 龔成老師! 我睇左好多本你既書 再睇埋巴菲特既書 終於由一個完全唔識買股票 唔識點樣入手嘅人變到開始識買少少股票 仲要係賺緊 真係好多謝你，有你介紹既股 我通常都會好放心甘買

另外想問吓你我而家呢個投資組合有冇問題
我月入22.5 k ,28歲

盈富 月供 4000
上個月開始:
小米 月供 2000
美團 月供 2000

我想問下應唔應該停左月供美團呢？
多謝你甘多個人既問題都答哂

龔成老師：

上述的股票，都是有質素的，可以長期進行。無問題。

以你的年齡，財富有增長力，投資上述股票，可以，比例都適合。

美團點評（3690）有潛力的，佢之前出左業績，見到開始有正現金流，這是一個實質的利好因素，因為之前一直在燒銀紙，現時初步見到成效，市場對佢重新估值。

當然，現時仍有不確定性，估值唔易。

只可以話，潛力是有的，現價唔算平，但不是完全無投資價值。你以長期月供的模式進行，可以。你預佢股價上落大，唔好因為股價上落而以為佢質素有變，分析企業質素是最舌要的。

------------------------------------------------

Q20647：

老師請問（1088）中國神華現價是否合理？這股高息，所以想長遠持有

龔成老師：

中國神華（1088）質素中等，過往較有質素，近年有減弱情況。

佢始終有一定規模，但政策不是好支持行業，的確會對佢有影響，但已經在股價反映左。

另外，由於佢地的產品自主力較弱，因此不算好高質。

所賣出的是商品，當中沒有差異性，令佢地處於被動狀態，只能睇市場價，沒有價格自主的能力，這令佢的獨特性有限。

所以整體來講，這股不算差，但又不算非常好，唔好對股價有太大的期望。如果是收息的，都可以，但就唔建議太大注。

------------------------------------------------

Q20648：

成哥，我希望進修完後有機會上你嘅班學野。我現時31歲。股票投資左大約7年。當中有賺有蝕，總體係賺錢，都係短炒為主。

直到近年自留意到你，見到你好多分析同資料都好實用，明白到咩叫長線投資有潛力股票，唔好只以短炒賺錢！有以下問題想請教你：

我有一層現樓，新界屯門區，2016年當時買入價270萬，實用四百幾尺，樓齡32年，未大維修。因樓已升值覺得無咩升值潛力/樽頸位，而家想換樓，因只有單人入息，按壓力測

現考慮應該用現樓價格換相約價格嘅唔近市中心嘅新樓博升值潛力或價錢相約嘅二手藍籌3x年舊樓承轉力較高。兩者都3百頭尺比現時小約一百尺。仍徘徊係新樓與舊樓之間。你會有咩意見？

另外手上持有多隻股票，總值約50萬，其中有阿里巴巴 、中國銀行、眾安在線、中國中車、匯豐銀行、盈富基金、京東健康、騰訊。係咪會投資得太多股票類別？ 是否應該簡化？

基金方面買了貝萊德世界科技同摩根中國基金（美元），你點睇呢2隻基金？ 短炒定長線會較適合？
謝謝指教！

龔成老師：

我地分析時，最重要睇翻長遠的價值，現時你的物業，如果質素較差，都可考慮轉，但如果質素並非太差而你又轉類似的物業，其實會用了一定的交易成本。

所以，如果你打算轉，其實最好有明顯的改善才進行這動作。

例如買樓價再大D，同時質素較好的物業（即是有明顯改變）。

如果這刻資金不算多，換樓後未有明顯改變，不如儲多少少資金，等過2、3年一次過轉好D，會較好。

如果上述兩個要2選1，二手藍籌樓比新樓好，但你都可以選一些約10年樓齡的。

至於現時的股票，基本上都是有質素的，問題不大，不算散。另外，銀行股不是過度集中。

至於基金，無研究該基金。而基金一般都不宜短炒的。

------------------------------------------------

Q20649：

龔sir,我嚟你依度面壁下。
我係基層家庭，依家讀緊yr1。

機緣巧合咁知道有你依個人。亦都受你啟發，好努力去生活，讀書，同埋去學財務知識。但因為疫情儲唔到幾多錢。成個人就好似好心急咁。好傻咁被依句“根本沒錢的人，必須要投機”刺激。

連自己set俾自己唔好短炒嘅原則都冇埋。

依家交完學費，自己都笑咗自己，輸左唔少。

哈哈 之後儲錢再上你嘅堂。

龔成老師：

每個投資者都會經歷這些，這是學習的一部分，我1999年開始買股票，頭幾年都是短炒，輸得多，先知自己行錯左，之後先用長線投資，就開始賺錢。

有D人會醒，有D人唔會醒。

你只要盡早明白就得，保持正確知識增長。

------------------------------------------------

Q20650：

龔sir你好

本人現持有
1211 500股 買入價$251.8
2845 500股 買入價$151.5
3067 3000股 買入價$21.16
1177 3000股 買入價$8.29

以上資金可以未來1至2年都唔需要動用
應該減持止蝕，還是可以等佢價位上番去?

謝謝老師指教

龔成老師：

可以持有，無問題，唔好因為股價上落而影響投資策略，你最重要睇企業業務。

不過，你買入價都貴，你應該慢慢分注買入，元應該集中在貴的時候買。

另外，有兩隻都是電動車類，你要注意集中風險。

你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

------------------------------------------------

Q20651：

老師你好，我係澳門人，有買你書「財務自由行」來看，易明以及了解自己應該點樣去努力，十分謝謝你。不過在於普通人來講唔知點樣可以將被動收入增加，因為平時返工照顧家庭已經非常繁忙。

我的目的是希望40歲可以買到一個有電梯的樓宇，剛剛學習炒股票現在資產分配如下：

股票120,000，手持6185及241。

和家人有物業，兩個已經有一定年期的老唐樓。自住不用供款

還有一個與親人合買的蚊型新唐樓，現在收租金維持到供款的一半，另每月供款幾千。希望幾年之後賣出，
現在儲蓄中每月存款大約$8000。

我想請問我如何可以在五年之後可以有一個比較好的物業。具體就是有電梯和樓齡比較年青可能目標在600萬左右。十分謝謝你的意見

我是澳門居住的，很想過來上堂，希望疫情之後有機會報名。老師會考慮有網課版本嗎。謝謝你

龔成老師：

康希諾生物（6185）主要於中國從事研發疫苗產品，疫苗產品線如下：3種臨近商業化在研疫苗：

包括腦膜炎球菌結合疫苗（ＭＣＶ）組合（四價ＭＣＶ及兩價ＭＣＶＩ，均為集團核心產品）及Ａｄ５－ＥＢＯＶ（其由集團與軍事醫學科學院生物工程研究所共同研發，為中國第一種獲批淮作應急使用及國家儲備的埃博拉病毒疫苗）。

另外，有6種處於臨床試驗或臨床試驗申請階段的在研疫苗；包括針對白喉、破傷風及百日咳的ＤＴｃｐ疫苗組
合（嬰幼兒用在研ＤＴｃｐ、在研ＤＴｃｐ加強疫苗、青少年及成人用在研Ｔｄｃｐ）、肺炎球菌疫苗等。

業務有潛力，但估值好難，市場對佢有好大期望，股價炒得幾勁，反而風險高。

這類股，是有潛力。但因為佢無盈利基礎，市場都只是「估估下」。

如果持有係可以，但一定只能小注。

至於阿里健康（0241）同樣是有潛力，不過，風險同時存在，所以，唔建議太大注。

這兩股你都可以持有，但如果持貨較多，建議部分轉其他股。

至於物業，你現時的物業情況，不用改變，但就要利用其他方法去進行增值，例如股票。這幾年要努力儲錢及投資，以平穩增長股+潛力股去作投資組合，令財富增。等你有足夠的資金。

每月$8000，可利用月供或自行分注，投資平穩增長股+潛力股，最簡單是投資盈富（2800）+恆生科指ETF（3067），同時，要留有一些現金等投資機會。

過幾年後，就賣出部分股票，加上賣出部分物業（要到時再睇情況決定），然後將資金買入$600萬物業。在長遠來說，宜將資金投資一些質素較好的物業。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q20652：

老師，想你幫助一下。

我們38歲，已有一物業租比人，cover到供樓，而剛剛又安排到政府宿舍，所以我想將原本租樓用既10000元做月供股票，作長線投資。

你建議10000元選多少隻股票？
2800，1177，1211，1810，700都係心目想選的，這些合適嗎？比例又應該點分配？或者有無合適的推介？

另外都有見你推介3067及1833但銀行無哩兩隻做月供計劃，所以想等佢合埋再以現金入貨。

先感謝你的幫忙！

龔成老師：

可以，你可以每將原本租樓用既10000元做月供股票，作長線投資。

如果你現時現金不多，都要同時留現金，月供股票每月用$7000。如果你現時已有一定現金，就可以月供$10000。

盈富（2800）$6000，餘下4隻，各$1000。長期進行。上述都是有質素，可長期月供的股票。不過比亞迪（1211）略貴，你自行決定是否供，或等回少少先供，這刻月供不是不可，但注碼不能太多。

至於3067，你可以每2個月入1、2手，同樣有儲貨的效果。

------------------------------------------------

Q20653：

你好，我係一個對股票零知識的媽媽
我月入二萬幾，扣除家庭日常開支我諗餘下8千
我想拎3千出黎做月供

我睇左你fb好耐，初步想開始月供股票
2800盈富$2000
3067 恆生$1000

請問這個選擇適合我嗎
萬分感謝

龔成老師：

如果你每月餘下$8000，用當中的$3000去做月供，可以的。只要保持長期進行就得。

不過，3067可能無得月供，你或者自行，每隔2、3個月買入一手就得。

組合都適合的，如果你本身較保守，就減慢買入3067的速度。

------------------------------------------------

Q20654：

老師您好!請問如果700未有貨，甚麼價錢為合理價值?另外想問現在新經濟，saas等類大幅回調，長遠計這類股會否被睇低而一沉不起?700仍可當作一隻長期持有的股票嗎？

另外亦想問最近很多人（包括股評人）都睇好9618，請問京東是否比阿里好？如果都是以中長期持有，您會選擇阿里還是京東？謝謝！

龔成老師：

騰訊（0700）現價略貴，不過月供無問題。或回10%開始分注投資。

至於新經濟，長遠有價值的，只是之前貴，現價都略貴，所以你預佢會好波動。

京東（9618）業務有質素，發展仍是正面，不過現價就唔算平。

佢係一間電子商業銷售平台，佢定位為「以供應鏈為基礎的技術與服務企業」，現時是中國第二大電商，有一定的品牌。同時，根據《財富》按收入統計的全球500強排行榜，集團是中國最大的零售集團。

佢目前業務已涉及零售、數位科技、物流、技術服務、健康、保險、物流地產、雲計算、AI和海外等領域，其中核心業務為：零售、數位科技、物流、技術服務四大板塊。

京東已建立自己營運覆蓋全中國的物流基礎設施，以支持電商業務，打造了線上購物體驗，係2017年、2018年、2019年，活躍用戶數達到了2.9億、3.0億、3.6億。可見已建立了一個巨大的網絡。

佢經營線上零售，以及電商平台業務，線上零售業務方面，從供應商購買產品，然後直接銷售給客戶，並從24,000多家供應商採購商品。

佢的物流基礎設施佈局覆蓋了中國幾乎所有的區縣，包括遍佈89個城市、累計總建築面積約1,690萬平方米的700多個倉庫，包括京東物流技術開放平台所管理的倉庫面積。

過往的財務數據，收入每年都是20%左右增長，2019年收入為5700億人民幣，已經有實質的盈利，2019年盈利為120億，初步以此推算，股價並不算平。當然，這股有一定的增長力，之後的市盈率會減。

從質素上，這股不差的，但估值上就不算平，算是合理區中上部至頂，如果買，都可以，但要控制注碼。這股可以長線投資的。

佢同騰訊、阿里（9988）都有長線投資價值，而佢這刻相對投資值博率會高少少（其實都接近）。

------------------------------------------------

Q20655：

龔Sir, 想問下1800 可長線嗎？我想下個月開始每個月用$3000幫小朋友供股儲錢，係集中供一隻定要分2-3隻供？有建議嗎？

龔成老師：

中國交通建設（1800）本身不是無質素，但又未去到好好，算是中等類別，但增長力不強。

負債高是扣分的地方，因此估值不會高，股價都反映了相關風險，現價算是合理。分注投資都可，但就未必適合太大注。

如果你幫小朋友供股儲錢，建議你投資ETF，這會更加適合。例如盈富（2800）、恆生科指ETF（3067）。

最簡單就是月供$3000盈富，相信最適合你的。

------------------------------------------------

Q20656：

您好, 龔Sir, 之前大市調整, 波幅都好大, 雖說要明白這是正常調整, 但心情仍很不安, 想向您求些定心丸. 請您幫忙分析一下我現有時倉, 是否健康.

1337 18/1 $2.55 10000股
1516 27/1 $21.5 2000股
1810 3/2 $28.7 3000股

1337 曾升穿3.3 但我無沽到, 我知道佢發盈喜, 請問仍有長期時有的價值嗎?

1516 曾升穿28 但我無沽到, 我知道佢既物管比係3.0比碧桂園更高, 即代表將來有更多發展空間, 有更多收益, 我咁樣理解正確嗎?

1810 曾升穿32 但我無沽到, 有點後悔買入量太多, 應分注, 我知道小米有質素, 佢既軟件方面做得很好, 市場佔有率亦高, 佢亦會發展更多家居智能產品, 對用家有黏貼性, 可長期時有, 無奈我持有價位有些高, 應否等佢回升少許時沽出, 再等低位入返呢?

請您可否分析一下175, 1475, 2812

請問以上股的合理區是多少錢?

另外, 我上月買到您本百萬富翁, 3日左右睇晒了, 好滿足, 感覺你好偉大, 無私分享您用時間金錢累積的經驗, 我會再翻睇的, 而且會介紹俾有需要的人.

我亦好奇您時有哪些股票, 通常會持有多久? 想作參考.

非常感謝您! 祝安康!

龔成老師：

我地最重要是睇企業長期的發展，並不是睇短期股價，而你講「曾升穿XX但我無沽到」，這是無意思的，因為我地根本就唔需要太著重短期股價，同時無人能捉到最高位。

我地只要睇翻企業的質素，以及在我地組合所佔比例是否適合，就可以。

雷蛇（1337）有潛力，但本質好波動，盈利不足，所有的市值，都只是基於「將來預期」去產生，這個預期可以變得好快，因為大家都只是「估」。

同時，電競行業的真正營運模式，賺錢能力如何，充滿了未知數，一個遊戲可以好受歡迎，亦可以好快無人玩。

另外，佢近年都有發展一些新興業務，潛力度有的，但仍左有不確定性。

因此，這股有前景，但有風險，無人知真正的價值。而佢另一些業務較是較新興，同樣有危有機類，所以，佢有可能有潛力，但風險方面就要注意。

融創服務（1516）有質素的。

佢由融創中國（1918）分拆上市，主要在中國提供物業管理服務及增值服務。而融創中國本身係中國好有規模的地產發展商，有這個背景優勢，佢長遠發展唔差。

睇翻佢資料，佢客戶主要包括融創中國及其合營企業與聯營公司，以及其他房地產開發商、業主、住戶及其他客戶（如社區增值服務相關的廣告公司）。

財務數據唔差，生意與盈利增長快，現金流強，整體正面，這股有長線投資價值。不過，現價貴，如投資，真的小注好了。

小米（1810）有質素，長線就得。

至於吉利（0175）現價約在合理區頂。日清食品（1475）合理區中上部。三星中國龍網（2812）略貴。

至於我持股，講幾隻啦，比亞迪（1211）、金沙（1928）、小米（1810）、中生（1177）。

------------------------------------------------

Q20657：

老師，如果我月供組合係 2269，669，3690，每月各1000，可以嗎?

龔成老師：

可以，這些都是有質素的股票，你可以進行。

藥明生物（2269）、美團（3690）都是潛力度好高的股票，不過現價都略貴，你以月供模式，慢慢收貨，是適合的投資策略。

最緊要是「長期進行」。

另外，最好每個月仍有少少現金剩，等出現大跌市時可以把握到機會。

------------------------------------------------

Q20658：

我的投資目標是要長期財富。我已50歲，我想

a. 潛力新經濟股的比例只想5% （例：比亞迪(1211)、小米（1810）、必瘦站 （1830））

b. 平穩舊經濟股的比例只想15%（例：盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、粵海（0270）、希慎（0014））

c. 收息舊經濟股的比例只想15% (例：領展（0823）、置富（0778）、陽光（0435）、港燈（2638）、中電（0002）、深高速（0548）

d. 優質平穩新經濟股的比例只想15%（例：3067）

e. 現金的比例只想50%

請問我的組合的風險如何？
平衡配置如何？

龔成老師：

上述的分配，方向是可以的，但潛力股+潛力基金3067已去到20%，單以股票組合內部計已去到40%，其實有點多，以你的年齡，可以調整翻少少。

同時，隨著你年齡慢慢增加，宜增加翻收息股的比例。

至於上述選股，無問題，都是有質素的，不過隻數有少少多，除非你財富組合金額數目好大，否則，可以減少少隻數。

基本上，上述組合風險平衡，配置無大問題，只是一些小調整。

------------------------------------------------

Q20659：

有好多60幾歲嘅人同我講，佢話佢玩咗股票咁多年，都係打平手，甚至係蝕D

我對股市股票基金呢啲東西沒有太大的概念，我一心想搵錢，所以我希望有一個正向同埋正確嘅價值觀對待呢樣嘢，謝謝你指教

龔成老師：

我過往做銀行、證券行做了多年，見到唔少客都是輸錢的，因為佢地不斷買買賣賣，而有小部分人賺錢的，佢地的方法好簡單，買入優質股長線投資。

你試想想，港交所（0388）、騰訊（0700）、比亞迪（1211），如果以升少少賣出等跌的心態，就無法賺到10倍、100倍的回報，你只要買入後唔理佢，就能有高回報！

------------------------------------------------

Q20660：

龔老師：請問現有20萬現金流應如何投資，因現在有質數的都好貴，請問有沒有一些有質數而現在入貨都可以考慮的。請指點。謝謝賜教！

龔成老師：

你可以考慮舊經濟股類，這類股現價仍在合理區。

例如港鐵銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果有增長力，而勉強未算貴的，其實阿里（9988）、吉利（0175）都算，不過暫時不是大注時期。

大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19041-Q19060）

Q19041：

你好，請教你怎樣看美團及京東？ 前255買入 後309，都是小注， 應該繼續持有，還是止賺呢？

龔成老師：

這兩股都有質素，長遠的發展不錯，可以長線持有的，但你有心理準備，股價會好波動。

美團點評（3690）有潛力的，佢之前出左業績，見到開始有正現金流，這是一個實質的利好因素，因為之前一直在燒銀紙，現時初步見到成效，市場對佢重新估值。

當然，現時仍有不確定性，估值唔易。

只可以話，潛力是有的，現價唔算平，但不是完全無投資價值，不過，一定不能大注。

京東（9618）業務有質素，發展仍是正面，不過現價就唔算平。

佢係一間電子商業銷售平台，佢定位為「以供應鏈為基礎的技術與服務企業」，現時是中國第二大電商，有一定的品牌。同時，根據《財富》按收入統計的全球500強排行榜，集團是中國最大的零售集團。

佢目前業務已涉及零售、數位科技、物流、技術服務、健康、保險、物流地產、雲計算、AI和海外等領域，其中核心業務為：零售、數位科技、物流、技術服務四大板塊。

京東已建立自己營運覆蓋全中國的物流基礎設施，以支持電商業務，打造了線上購物體驗，係2017年、2018年、2019年，活躍用戶數達到了2.9億、3.0億、3.6億。可見已建立了一個巨大的網絡。

佢經營線上零售，以及電商平台業務，線上零售業務方面，從供應商購買產品，然後直接銷售給客戶，並從24,000多家供應商採購商品。

佢的物流基礎設施佈局覆蓋了中國幾乎所有的區縣，包括遍佈89個城市、累計總建築面積約1,690萬平方米的700多個倉庫，包括京東物流技術開放平台所管理的倉庫面積。

過往的財務數據，收入每年都是20%左右增長，2019年收入為5700億人民幣，已經有實質的盈利，2019年盈利為120億，初步以此推算，股價並不算平。當然，這股有一定的增長力，之後的市盈率會減。

從質素上，這股不差的，但估值上就不算平，持貨要控制注碼。這股可以長線投資的。

------------------------------------------------

Q19042：

你好 龔成老師 ！ 想問下關於樓換樓既問題！我同另一半於幾年前以3百幾萬買左現在居住既單位，
而家單位已經升到630-650萬 。

我地都有意想換樓，目標係想換青衣站上蓋既2房單位。

但都至少要8百幾萬，而我地流動資金亦唔夠比首期。請問係呢個情況下，你有什麼建議

龔成老師︰

幾個方法，第一，先沽出現有物業去取得首期，中間有機會要租屋，變相增加換屋成本。此期間，新物業也可能會出現變數，如貴左、已出售等。

第二個方法，若你想先取得首期，用先買後沽。但你現時唔夠資金，因此要同加按方法，但較進取，同埋有可能會在罰息期賣出要罰錢，因此唔太建議。

先加按，套現一筆錢去做首期，但你要考慮自己還款能力。同時增加了之後按揭的難度。

因為你同時持有2個物業，係做按揭時會用2套房去計。你要確保有足夠收入，過度銀行審批和壓力測試。

另外，由於係第二套房，你要預繳15%「雙倍印花稅」，都會令買樓資金需求增加。（但如果在一年內賣出原有物業，政府會退翻）。

第三個方法，你地將現有物業拆名，然後加按，再用另一人名去買新物業，但就要計清楚數，這方法太進取，所以都唔太建議。

所以，第一個方法較可行，先賣出，後買入，只要買賣中間的時間差唔太長，就無問題。如果計過數資金都唔足夠首期或供樓，就累積多D財富先，遲少少先進行計劃。

------------------------------------------------

Q19043：

你好老師, 我係你舊生, 上完你堂獲益良多, 係選股/估值/心態都feel到自己係有進步. 而家基本上日日坐車, 放LUNCH, 放工返屋企就係上網睇資訊,溫你D NOTES, 睇書(最近睇完非常潛力股&選股戰略, 而家睇緊證券分析)

同睇年報. 身家準備踏入第2個一百萬(都可能因為最近股市很瘋狂吧, 但係第二個一百真係比第一個快好多)

但我而家暫時放低左個市, 升得太多了, 個個朋友係咁買買買. 我暫時目標係40歲1000萬, 仲有13年時間

而家等報你下次進階班，記得你講過大約下年年中，係週末班，希望到時再見。同埋你介紹個價值網都幾好用，比左一年最高級個plan。

龔成老師：

你的心態好正確，你無受朋友影響，同時保持溫書進步，我相信你在40歲有$1000萬是可以的！

該網不差的，我成日都覺得，最重是睇「價值」，唔好太著重「價格」。

加油，你的方向好正確，相信財富會以更快速增值。

2021年中，預期會開進階班的星期六班，到時見！

------------------------------------------------

Q19044：

多謝老師 好詳盡 我最近都有開始睇樓 主要係荃灣/大角嘴區 老師你介唔介意我問埋如果我target 500萬左右物業

我投資大約100萬去物業 會唔會太過進取 身邊好多人話年輕人要keep 多D cash係身

龔成老師：

荃灣/大角嘴區，都是不差的地區，有長線投資的價值。

如果你本身承受到風險，你用$100萬買物業，可以的，不過，你要考慮按揭方面是否順利，這是最大的風險，所以買樓時唔好去得太盡，本身都要有資金剩。

同時買樓最重要是「供得起」，樓價升跌未必是最重點，但「供得起」就好重要。

------------------------------------------------

Q19045：

龔sir你好，睇咗你兩本書，突然有個啟發想做，唔知可唔可行，想你比d意見

我本身住緊居屋，仲有大約一百萬未供完，物業估價約500萬，如果以一般銀行借貸（不是轉按/加手按，能否借到約二百萬？

因為我有個諗法，想用其中一百萬去供斷個物業，然後再用另外一百萬做一d比較穩陣嘅投資，如高息定期， 或買高息藍籌股。

想請問這個方法可取嗎？
謝謝解答

龔成老師：

最重要是計算「息率」「回報率」。

你用一般的銀行借貸，通常都會較高息率（當然你要問清楚），如果銀行借貸息率高過按息，這就無意思。

相反，如果銀行借貸息率好低，用作還按息，就可以。

至於部分投資收息股，不是不可，但都要注意。

第一要睇「息差」，例如借的息為「2%」，之後將資金投資收息股，約收「5%」的股息，息差為「+3%」。這的確過了第一關。

第二關，就是虧損的可能，股價是會升跌的，若然買入後股價下跌，你就會出現「賺息蝕價」的情況，那計劃就會得不償失。

當我地進行上述模式時，要好大程度確保價格上不會損失，將「賺息蝕價」的可能性減少。

收息股平貴度算是中等，都可以考慮，但就不是最好的時機，你要明白仍有「賺息蝕價」的風險。自己衡量。

另外，當你借銀行借貸，還按揭及買收息股，你的還款模式改變左，你要明白翻新還款模式是否適合自己。

------------------------------------------------

Q19046：

亞sir，想問下如果想移民定居英國
香港有一物業 我應該出租當被動收入

還是賣出 因為是村屋租金回報少於3厘 而且都有維修同其他雜費 在英國要處理相對困難

用賣出的錢做一個債券股票的投資會不會更易管理
我很希望可以離港前上進階班
物業已經供完

龔成老師：

如果物業村屋及要維修，我會建議賣出，始終你到時在英國，要睇住該香港物業有點難，因此賣出轉其他資產更好。

資金可以投資股票，平穩增長股及收息股都得，債券都可視為組合的其中一部分，再加一定的現金。到你在當地安定好後，可以再調整。

我應該會在2021年中開星期六的進階班。

------------------------------------------------

Q19047：

你好龔sir,
唔好意思問題較多,希望老師可以幫下我.(唔急)

背景:
小弟今年28歲,月入3萬,每月可存2萬.
現金20萬,股票40萬
當中30萬是收息股
10萬其他股
270 @12.24 2手
788 @2.16 10手
823 @67 2手
1038 @45 1手
(所有股票連同利息帳面上蝕了10%左右)

1) 問題
1)a) 想問問你的書籍中哪些適合新手看?書本的建議閱讀順序是?
1)b) 看過老師的書如股票勝經/選股勝經 是2018年年中出的,幾時會出新一版?會唔會夠Update?
1)c) 如果想報名老師的課堂,睇左邊幾本書先會好D?
1)d) 想知道您係點計個股票合理區/邊本書會提及?
1)e) 股票/現金的比例是? at least keep現金夠用6個月開支?

2)收息股
2)a) 因為年初時才留意到老師的fanspage,想問下你的本人持有的收息股有什麼建議?(已經無再入貨,銀行股居多)

3)增長股
3)a)當中788 由上市初高位買入後到現在接近無左一半,可以長線持有嗎?
3)b) 想問下你的本人持有的增長股有什麼建議?
3)c) 恆基 的合理價位是?
3)d) 港交所 的合理價位是?
3)e) 粵海 的合理價位是?
3)f) 領展 的合理價位是?
3)g) 希慎 的合理價位是?
3)h) 中生 的合理價位是?
3)i) 舜宇光學 的合理價位是?

4)月供
4)a) 盈富 /潛力股/平穏增長股 既建議入市比例係?
4)b) 潛力股有哪幾隻較合適月供同現價適合入市嗎?

thanks.

龔成老師：

1A）你可首先睇：

《80後百萬富翁》
《股票勝經》
《財務自由行》

之後再睇其他。

B）通常一年更新一次，但這兩本書，其實是知識型而不是資訊型，所以就算舊版，都無問題。暫時未必再出新。

C）《股票勝經》《年報勝經》

D）《股票勝經》

E）最少持有3-6個月的備用現金，餘下可以投資。你預現時大約3-5成現金適合

2A）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你持有的收息股，都有質素，不過，以你年齡，唔應該持有太多收息股。

3A）唔好比較「曾經見過的高位」，無意義的。要分析企業現時業務情況、前景、估值等。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。

這股長遠仍算有發展力，可長線。不過，潛力度比過往略減。

但如這刻買入，分注入可以的。

B）唔明你問那些股。

C）現價合理區中間

D）現時略貴

E）現價合理

F）現價合理

G）現價合理

h) 現價合理區頂

i) 現價合理區中上部

4A）以你的年齡，可以6成平穩增長股，3成潛力股，1成收息股（但你投資知識增加後，可增加潛力股比例）

B）可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分現價貴，要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19048：

你好 我想問問康師傅買唔買得過？
仲有241 依家高追o唔ok？謝謝你

龔成老師：

康師傅控股（0322）有質素的，現價合理，不過發展力不算好強，只是平穩增長類，不是高增長類。可以投資作收息及有平穩增長之選，現價都可分注。

阿里健康（0241）這是潛力股，佢營運醫藥電商、互聯網醫療等業務。

「醫藥電商業務」，這業務主要有兩種業務模式，由自營電商和天貓代運營，涉及非處方藥品、醫療器械、計生用品等。

另外，就是「互聯網醫療業務」，阿里健康與國內多家二三級醫院建立合作關係，患者可以通過阿裡健康、支付寶等平台，做到線上掛號、問診、諮詢用藥等等的服務。

阿里健康利用醫療AI系統「DoctorYou」去進行營運，該系統包括臨床醫學科研診斷平臺、醫療輔助檢測引擎、醫師能力培訓系統等，輔助醫生睇病。

業務上，有好大的潛力，不過，本質波動，股價上落大，消息多，市場炒作多，這類股風險都不少。最大問題是無人能正確估值，市場現時只是估估下，推將唔到佢將來的價值。

這類股只建議小注持有，唔好加注，原有貨，如果你本身目標是長線，繼續持有無問題，但你預佢股價上落大。

------------------------------------------------

Q19049：

成哥你好！ 因大陸物業賣出後會有6百多萬的現金 ，資金全數會擺反香港銀行。 請問資金應如何分配從而有每月3萬的被動收入？

債券/ reits / 股票？ 唔知道可以點組合而能夠分散風險。 多謝你意見

龔成老師：

要睇你的風險承受程度，如果能承受風險，可以投資一部分在平穩增長股+潛力股。

如果你目標是「低風險，現金流為主」你可以將這$600萬，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將$600萬資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q19050：

龔Sir,想請教一下, 小妹剛學習投資, 現時手上股票都低於買入價,

我係米繼續持有就可以(每隻大約5千-1萬股)??

386中石化 $3.42
861神州 $6.47
382 中匯 $5.87
1093 石藥 $8.8

龔成老師：

我地投資，最重要是睇企業質素，前景。以及這股是否適合你，在你的組合配置上是否適合。從上述的股票，基本上都可長線的。

中石化（0386），質素算是不差，但又未到好好，始終這只是商品企業，沒有一些太大的優勢。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

生意近5年只是上上落落，無乜增長力，這是受油價等因素影響，反映佢處於一個被動的狀態。收息是可以的，但增長力唔算強。

神州控股（0861）主要從事大數據運營、物聯網及人工智能業務，業務領域包括智慧城市、智慧產業鏈、金融科技、智能製造、智能農業、智能運維、量子通信等。

都是有前景的行業，長遠有發展，不過，業務就有較大的不確定性，始終行業結構不穩，變數大。

過往盈利增長不差，不過就有少少波動，這是企業的風險所在，股本回報率不高是扣分的地方。

整體來說，業務長遠仍有發展，不過現時估值唔算平，投資投資值博率只是中等。長線投資都可。

中滙集團（0382）佢係中國提供民辦高等教育，現時於廣州運營兩家學校（華商學院及華商職業學院）。

睇翻佢的資料，佢主要提供本科課程及專科學歷課程，包括會計、金融、經學濟及商務英語。

亦係澳洲墨爾本營運一間學校（澳洲國際商學院），提供職業教育培訓課程及非學歷教育課程（如短期遊學課程、海外留學生英語語言強化課程、職業培訓課程及文化探索課程）。

財務數據方面不差的，業務發展正面，不過由於上市年期唔算耐，因此分析時的參考價值會減。整體都有質素的，相信長遠前景正面，小注投資都可。

至於石藥（1093）：有質素的，長遠有增長力，可長線。

------------------------------------------------

Q19051：

老師，現時恆指已升現水平，是否已經在高台？我還可以入貨嗎？還是等待回調到23000先？

沒貨在手，有80萬現金

龔成老師：

恆指貨在合理區，你唔能夠100%現金，無人能預知股市升跌，無人知能否等到，建議你先用$20萬-$30萬，分注入貨。

最重要是分注，慢慢入。

可以主力投資優質的舊經濟股，因為這類股現價仍合理。小部分投資新經濟類股，因為現價大多唔平。

完成投資後，等跌先再加貨。

我地最重要是建立一個長期，平衡的組合。

------------------------------------------------

Q19052：

龔成老師你好，本人今年23歲，原本有一份穩定工作，月入$17000，但很可惜因為身體問題，於今年8月辭掉工作休息，打算年尾才會工作。在這3個月來也沒有收入。

本人過往一直對成人用品，情趣內衣生意充滿興趣，以往亦於社交媒體中有嘗試做小生意，每月收入大概$3000-$5000，收入很有限

而且未知如何可以在眾多競爭對手中突圍而出，生意不多，更沒有很多經營生意知識及經驗，再加上以前工作忙碌，所以暫停了此生意。

此外，得到龔老師書中的啟發後，每天不斷學習投資股票。

3手盈富（2800）（平均買入價$24.2），1手領展（0823）（$61），1手金沙（1928）（$30.85）。另持有31萬現金儲蓄，請問龔老師下一步我可以如何計劃？謝謝龔老師！謝謝龔老師

龔成老師：

如果你已能在成人用品這個生意中，每月賺到一定收入，這已經是好成功，你可以集中思考，怎樣發展這個事業。

第一，你要有自己的定位，目標是清晰，要等客戶好易記得你，要做「專」不是做「雜」。

第二，要思考怎樣宣傳，要令人認識你，知道你的存在，要從多各度宣傳，甚至用一些奇怪的方法都可以。有需要就動用你部分現金，投資發展這事業。

第三，你要尋找這個客戶群的群組、年齡等，集中去他們宣傳。

第四，要「創造需求」，要思考怎樣令原本以為無需要的人，變成有需要。

至於你現時的股票，優質，可長線方

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你的方向應是加強增長力。

------------------------------------------------

Q19053：

龔sir 你最近常說大市在合理區 提我們留有現金， 本人現在30歲，我永明mpf 現在是一半在香港股票b 一半在保守, 這配置正確嗎？

請問我這年紀在這市況是不是應該更進取？ 謝謝龔sir
本人現存mpf 金額為50萬

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你30歲，可以進取少少，保守基金的%可減少。

由於強積金是超長線投資，唔需要太著重中短期的大市情況，照你年齡與風險承受程度度，進行配置就得。

------------------------------------------------

Q19054：

龔sir，我最近終有自己既第一個一百萬了！其中1211居功至偉，雖然只係買左3000股，但係一直持有。用左不到5年時間，終於達標！好想同你分享！

不過由於近期1211都升左好多，市盈率過百陪，我放左一半，另一半繼續持有。

感謝龔sir一路一來既分享，你真係好大公無私，我以你為榜樣！

龔成老師：

太好了！

比亞迪（1211）你賣部分都可以，始終有點貴，最重要是點都留翻部分貨長線就得，因為當企業價值向上，就可能由貴，慢慢轉為合理。

期待你財富更上一層樓！

------------------------------------------------

Q19055：

龔sir，我前年在3.52和3.02買咗3988

5萬股作收息用。依家佢跌咗好多 ，我諗住唔放，長揸3 、5年，因為已經退休。請問長揸OK嗎？佢仍然係優質股嗎？多謝你的指教。

龔成老師：

如果你是退休人士，可以建立一價收息股組合，你持有中行（3988）是可以的。

這股都有質素，雖然增長力唔算強，不過收息不差。

但要留意，你最好同時持有其他收息股，建立一個平衡組合，這樣會更有效減少集中風險。

------------------------------------------------

Q19056：

龔Sir，想請教以我既年紀點分配我既資金係投資市場
本人31歲，月入25K，總資產大約40萬

有21萬係股票，5萬實金，2萬外匯，其餘現金
如果我想投資更多的資金係股票市場，留十萬現金會否太多？

如果想平穩增值，黃金可以嗎？想加落7299。還是現有既貨可再加倉？

788@20000share
2342@6000share
2840@55share
7299@5000share
1558@1000share
0008@3000share
3175@7000share

謝謝阿Sir

龔成老師：

財富分配方面，大致合理無問題，黃金可以持有少量，但不用太多，所以唔太建議你加注。外匯同樣不用太多，長遠只會貶值。

至於股票方面，大致無問題。

電盈（0008）增長力不強，未必適合你這年齡。

Ｆ三星原油期（3175）亦不建議長期持有太多。

------------------------------------------------

Q19057：

呀Sir
1. 問置富這股可以用市率盈來到計平價位?

2. 如不適合用市盈率計置富這股,應用什麼方法？
麻煩晒你

龔成老師：

1）置富（0788）由於是房託，在盈利中有一項為「物業重估」，由於只是一個會計數，因此「盈利」數字不能作準，令市盈率都不能作準。

如果要用市盈率計算，你就要調整翻盈利數字。

2）你可以用股息率去進行計算，尋找過往多年的股息率，作為參考。推算下年度股息，從而得出估值。

------------------------------------------------

Q19058：

老師 我記得當初你係話比亞迪係$40以下平 依家都係過左差唔多半年 質素改變應該唔大

咁其實依家成200蚊係咪好高估呢？如果股價長期會回歸價值咁點解你依家唔會諗住賣

同埋我仲想問下 股價每日不斷咁改變係由咩野決定？純粹供求影響？

龔成老師：

比亞迪（1211）$40是平，不過，佢近期公佈的財務數據，都反映業務向好，我遲些會調升的，不過不會大幅調整，始終我在企業估值方面，會偏向穩陣。

至於每日股價，當有人買，有人賣，就有成交，這就是股價，供求影響每日的股價，而供求背後，才是真正的因素，為何這刻買？為可賣？一般散戶無具體的答案。

但專業投資者、機構，就會計算企業價值，去考慮這刻是買？賣？還是等跌先買。而根據研究，長期股價與企業價值的相關系數好高。

因此，短期股價只因短期供求決定，長遠股價就由企業價值決定。

------------------------------------------------

Q19059：

Hello 你好 我係新手 已經睇左你兩本書 都諗住月供盈富基金 但想問下 甘其實月供盈富係點賺$?

係米都係等佢價位升就放?
Thanks a!!!

龔成老師：

原理就是不斷累積盈富（2800），當佢長期增長後，你可以賣出，又或不斷收息，都是得到回報的方法。

月供，一般都是長線投資的，唔建議太急去賣出。因此，你的概念不是心急賺差價，而是一個「財富累積」的過程。

------------------------------------------------

Q19060：

Hello龔sir!
我由上個月開始月供盈富$5000同恒地$2000。
亦都買咗你嘅書繼續增長啲理財concepts!
但係有啲specific嘅問題想問，希望你抽空答我啦

我宜家19歲，每個月有1.6萬可擺落股票。
覺得自己其實算贏在起跑線，所以更加想好好把握自己有嘅資源。

現有股票：
11 1手 $124
12 67股 $29.53
2800 697股 平均價$25.179
9988 1手 $269

本身計劃：
月供$5000盈富$2000恒地
月儲$9000

但係我發現我儲完根本唔知應該投資啲咩
以下係我考慮緊嘅股票：

- 地產：置富
- 珠寶：六福
- 旅遊：中旅
- 港鐵
- 港交所
- 小米
- 阿里巴巴
- 恒生

我的問題：
1. 我宜家好似考慮緊太多股票，請問我應該點取捨？

2. 揀好咗呢啲股票之後如果全部一手手買好唔好？定係揾一啲加入我月供嘅組合好啲？應該點分配？

好多謝你用時間睇🙏🏻希望你可以答我啦
thank you so much!!
祝身體健康

龔成老師：

1）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

首先，你不要思考買入那一隻股票，而是要分析，自己想「設計一個怎樣的投資組合」各類別比例如何，要適合你自己。

有左大方向後，就知道應該點樣分配，選那些股票。

現時的持股，恆生（0011）未必太適合你年齡。而中旅（0308）質素只是一般般。

2）要睇你的現金情況，以及各股票的平貴，上述大部分都是有質素，如果這些股較貴的，例如阿里（9988）、小米（1810），就月供好過一手手買。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。