【龔成問答信箱】（Q21301-Q21320）

Q21301：

龔SIR 我有問題想問

1. 想問股票班，第4堂現金流折現法如果用係股票, 適合用係邊類型股票? 還是呢種方法唔係太適合用係股票?

因為股現金流折現法用係有年期同穩定無增長既資產先適用…

咁股票全部都係無年期, 加上增長率難預測, 咁係咪現金流折現法唔岩用係股票?

2. 另外想問第5堂教的估值法,,合理區範圍要加Buffer,, 想問點計個百分比, 例如合理區係 $100-$200,, 範圍百分比應該係

(a) (100/200)X 100% = 50%
(b) (100/100)X 100% = 100%

3. 都係關於市盈率估值法,,如果某公司佢係行業龍頭, 需要調高10%,,想問係調高佢PE合理區還是計到最尾個Step 先調高合理估值?

參考第5堂Notes P.34, 388為例,,388因為係壟斷狀態, 要調高

咁應該係幾時調高?
(a) 將PE合理區32.7 – 37.7 倍調高10%
(b) 將合理估值加左Buffer 後的 $212 - $298調高10%
(c) 還是無所謂, 兩個是但一個都得?

4. 我用左388 最新數據去計佢個合理估值,.

年度: 2016/2017/2018/2019/2020
每股盈利($): 4.76/6.03/7.5/7.49/9.11
每股盈利增長率(%): -28.96/26.88/24.38/-0.13/21.63

近5年每股盈利 = $6.978
增長率 = 8.76%
有代表性的EPS= $7.53
合理PE = 34.18x to 42.75x
估算合理價 = $258 to $322
因為估值範圍闊度=25% 所以唔洗加Buffer

(a) 想問以上估值計得岩唔岩?

(b) 因為我想增長率準確D, 我用左過往5年增長率相加再除5

[-28.96 + 26.88 + 24.38 + (-0.13) + 21.63)/5 , 得出8.76%,

我想問堂上你話實計既法(複式增長率) 係咪就係咁樣計? 定係我計錯?

(c) 都係關於增長率問題, 我上網睇番”預測每股盈利”

年度: 2021/2022/2023
預測每股盈利: 11.88/13.73/15.64
EPS增長率(我自己計): 30.4%/15.6%/13.9%

我可唔可以用2021既既預測每股盈利增長率30.4% 當作計算有代表性的EPS既增長率? $6.978 x 1.3= $9

咁樣計法會唔會唔準?

(d) 想問估值範圍闊度應該係(322-258)/322 x 100% =20% 還是 322-258)/258 x100% = 25%

5. 第5堂Notes. P.83, 點解公用股可以用PB Ratio 分析? 公用股Average PB Ratio 13x-16x, 大過4x 正常應該唔可以用PB 分析

有勞龔SIR！

龔成老師︰

1) 其實現金流折現法，係最正統的估值方法，基本上係適合於任何股票。

但由於計算上，有不少主觀數字。只要稍有偏差，最終計算結果的落差，係可以好大。

如果你經驗較淺，你用佢來計算現金流穏定，或者資產有固定年期的企業(好似西隧盈利)，係可以。

但若果你想計一些波動性較大，增長力較高的股票，我建議你先用其他估值方法，會較為穏陣。

2) 假如你初步估值得出，合理區係 $100-$200。

你就用佢2者的差額，即$100。再去比對估值中最高價位，即係$200。

以100/200，得出結果係50%。由於合理價格範圍，高於20%，所以你就不用在初步估值上加入緩衝區。

但假若今次，你初步估值得出，合理區係 $100-$110。

以10/110，得出結果係9%，少於我們要求。因此，你要在初步估值上，加入10%緩衝區。

最終估值，會變成$90 - $121。

其實你要明白這個加緩衝區的原理，是希望股價能更有效反映合理區，你不要公式化去用。

3) 其實港交所，一直都係獨市經驗，你用佢過往PE作參考，已經可以。

因為當中已經反映其獨市優勢，不用作調整。

至於所謂的調高多少%，其實是當比較該企業及行業市盈率時，若然這企業是龍頭，若果以行業市盈率作基礎，就有可能調高，但調高多少%，無絕對的，因為最重要是衡量該企業比行業有多強。

4a + b) 我地算增長率，唔係單單用個平均數，而係用過往多年的增長，去計一個每年平衡增長率。

由2016年至2020年，每股盈利大致上升92%。

年度化增長率︰約為+18%
有代表性的EPS= $8.23
合理PE = 34.18x to 42.75x
合理估值︰$281 - $352
由於合理區範圍只有20%，故再加10%緩衝區，估值變成︰$253 - $387

當然有代表的EPS，我用增長率18%，當我地運用時，要理性地分析，往後是否能增長18%，我地不能公式化運用，要明白每一個數字背後所代表的意義。而從18%推算出來的有代表性的EPS= $8.23，由於能有效反映近年的盈利情況，因此，我相信這數字有一定的代表性。

4c) 你都可以參考大行預測，但最好用多間大行的平均數。之後，你可以用佢結果，再更你計算結果，取一個平均數，去作為有代表性的EPS，都係可以。

4d) 以你上述例子，(322-258)/322 x 100% =20%才是正確計法。

5) 由於公用股，主要企業價值，都可以反映在會計資產上。因此，可以用市賬率，作為計算中電(0002)這類公用股平貴指標。

我相信你見到公用股佢PB去到10倍以上，是找錯左數字，你見到的數字，應該不是PB。

------------------------------------------------

Q21302：

龔老師 請教下，0548已過除淨日，係未再回落D再入好D呢

龔成老師︰

首先，你可能對派息運作，有點誤解。好多散戶都會覺得，「除淨日」後會跌，那時候買入就最抵。

其實，這個想法係不正確。

「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作。作為投資者，你唔會在此期間前後，去做買/沽貨，而出現任何著數。

所以，「除淨日」只係一個用來扣除派息權益的日子，與你是否投資一隻股票，係絕對無關。

深圳高速公路股份（0548）有質素的，這股持有不少有質素的資產，現金流穩定，不過增長力不強。

這股有長線投資價值，收息可以，但就不要對股價有太大期望。現價合理。

------------------------------------------------

Q21303：

你好阿sir，我已睇左三本你既書，分別係選股、股票同年報勝經

本人都對金錢系統同時間值有概念，識捕捉市場恐慌同熱市同有明確目標6年要有100萬

目前進度用左15個月18萬貨，4萬現金，問銀行借左平loan 10萬等恐慌入市機會

但睇完三本書始終吾識做估值衡量股票平貴

一般既市盈率同現金流折現法都明白，但吾識衡量股票平貴同搵潛力股
求指點

龔成老師：

對，保持閱讀與進步，長遠來說，你的知識一定同財富成正比。

至於借貸投資，則是有危有機，雖然利息不高，但你都要明白，這動作有風險的。我一般較建議「有明顯機會才動用「借」這個最後動用的「皇牌」，在一般情況，不太建議為借而借。

如果你現時已經借了資金，就可以等大跌市時，好好把握機會，但唔好心急動用，寧願輸利息，都唔好心急投資。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21304：

老師你好呀！
請問你點睇1358同2899呀？謝謝你

同埋358

龔成老師：

普華和順（1358）主要於中國開發、製造及銷售再生醫用生物材料產品；輸液器產品；以及骨科植入物產品。

本身業務有點波動，同時未見有好大獨特性與規模，整體的投資價值未算好高。

佢派特別股息後，股價除淨大跌，而派特別股息令佢現金減少，整體企業發展力不強。整體的投資價值唔高。

紫金礦業（2899）佢主要從事黃金及其他礦產資源的勘探、採礦、生產、冶煉及銷售。

但你要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。

------------------------------------------------

Q21305：

老師，目前只有以下的股:
939@4000,
968@2000,
1177@2000,
1810@1000.
1257@2000

想問1257和956邊隻較好，
睇左老師的書，想入

1317或1569两者選一，
1448，1830，1928，696，1458，老師可以比d建議應該咩組合較好

另外，也想問下老師如何評價558，我見佢都升得多，
謝謝你抽空睇我的留言

龔成老師：

現時持有的組合，基本上都是有質素的股，長線持有無問題，但要留意，當中持有的小米（1810）、信義光能（0968）、中生（1177）都是潛力股類別，這些都是可長線投資，但都不能過度集中在潛力股。所以當你日後增加潛力股時，要留意翻比例及上限。

新天綠色能源（0956）本質不差，值博率會高少少，有一定的增長力，但由於都有一定的負債，考慮到風險因素，現價只是合理區，未算平。

你投資都可以，分注無問題，但由於這企業規模比較細，加上有行業風險，因此唔建議太大注。

至於教育股，可考慮楓葉教育（1317）。

至於另外的5間，都是有質素的，如果想收息及平穩增長，可考慮金沙（1928），如果想潛力，可考慮褔壽園（1448）、必瘦站（1830）（當然這兩股回翻少少就較有值博率）。

------------------------------------------------

Q21306：

老師您好，請問一下必瘦站1830，您如何分析及看好的原因，希望能夠詳細地瞭解一下您的看法。非常感謝您！

龔成老師：

必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

這股我自己都有貨，都是長期睇翻，見佢之前的發展一直唔差，加上疫情仍有錢賺，這是加分的地方，你可以推算到，當經濟正常翻，佢的生意一定會唔錯。但近期升了好多，已貴，最好回少少先小注，大跌先正式買入，會較穩陣。

------------------------------------------------

Q21307：

老師我剛開始月供股票，2800 $2000，823/2388各$1500，現在有2個小朋友約10歲，我想將佢地既利是錢用黎買股票希望在佢地成年時已有一筆唔少既錢比佢地繼續投資

如果我用佢地既錢用晒黎買3067長線可以嗎？還是有其他穩陣長線部署？

自己持有
8000 股 1313 $9.34
2000股 358 $16.76
可長線持有嗎？

龔成老師：

你現你月供的盈富（2800）、領展（0823）、中銀（2388），都是有質素的，都可以長期進行。

至於現時持有的股票，華潤水泥控股（1313）本身有質素的，不過業務就較有波動，佢過往的盈利數據上落都大，因此股價的變大亦會較大。

佢之前公布的中期業績，業務有回落情況。長遠計，房屋、基建發展等因素，都會利好水泥股。因此長遠是正面，你長線持有就得。

至於江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。因此不建議持有太多貨。

至於你小朋友，集中投資恆生科指（3067）不是不可，但就始終有少少風險，要睇你地的風險承受能力。這是一個潛力股基金，當中都是潛力股，回報高，風險大。從你小朋友長線投資角度，不是不可，但就要明白這動作的風險，如果承受風險能力不高，就只宜部分投資這基金，不能全部。

------------------------------------------------

Q21308：

你好，想問下﹐我用個個估值方法對於某d股會偏差好大。

好似我用來計1177﹐佢收入一時可以增長40%﹐一時又得16%﹐今年仲下跌左﹐變相好難預計以後增長幾多%

龔成老師：

當我地進行企業分析，以及進行估值時，最重要是找一些核心因素。

例如你見佢有時收入增長較多，有時就較少，而我地會著重佢長期的收入增長是多少，而不是一年半年。

同時，你不能只公式化去運用，你要懂得將財務數據「意義化」，你要解釋翻，點解佢該年會增長較多，而另一年增長少，當時的大環境怎樣，而將來的大環境發展又會怎樣，從而推算將來的收入及財務數據情況。

因此，你要利用對企業「核心」，及「長期」的因素作為分析點。

------------------------------------------------

Q21309：

龔成老師，如果3067咩價位入比較適合？

175，2600現價可入？

龔成老師：

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

吉利（0175）業績弱將會對股價短期不利，企業價值都有少少影響，不過最重要睇翻長遠價值，吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區中上部至頂位，股價波動，有貨可長線。如果現價入貨，小注都得。

中國鋁業（2600）主要從事鋁土礦、煤炭等資源勘探開採；氧化鋁、原鋁和鋁合金產品生產、銷售、技術研發；國際貿易；物流產業，火力及新能源發電業務。

過往的業務與盈利都較波動，反映企業較受外圍價格影響，產品價格自主能力較弱。

質素算中等，現價合理，但又唔算吸引，投資價值只是一般。

------------------------------------------------

Q21310：

啊Sir，多謝你之前回覆，之前請教過你後已減持左一半煤氣轉到9988，同時亦投入左一部分係3067。以下係小弟現時既倉。

想問以下問題:
1. 餘下的煤氣應在那個價位完全減持？

2. 鐵塔長期表現不佳，我應否轉股？如果轉的話那個價位開始減持和轉那一隻股票？

3. 小米和阿里，暫時是我第二、三大持倉，我應在那價位再增持？

4. 福壽園和舜宇光學我非常看好，應在那價位增持？我看福壽園最新業績理想，合理區會由$7上升多少呢？

5. 3067,我在$19.51入市，應該算略貴，我應該如何是好？和在那價位再增加呢？

麻煩晒啊sir

優質股:
1. 煤氣x3,000@$14.5,
2. 銀娛x1,000@$52.25
3. 港鐵x3,204@$38.93
4. 領展x2,137@$62.83
5. 金沙x5,322@$28.78
6. 盈富x2,[email protected]

-潛力股
1. 鐵塔x90,[email protected]
2. 小米x5,400@$25.89
3. 舜宇x500@$129.8
4. 雅生活x3,250@$31.92
5. 中生製藥x12,[email protected]
6. 福壽園x6,000@$7.67, 4.96%
7. 阿里巴巴[email protected]
8. 3067x3,700@$19.51

龔成老師：

1）煤氣（0003）不是無質素的，因此你餘下的貨，持有都無問題。

除非你好想集中資金在潛力股，但其實我又不太建議。

2）中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。

這股長遠仍算有發展力，可長線。不過，潛力度比過往略減。

其實只要你持貨不過多，就無問題，如果你較擔心，就賣部分轉其他較有增長力的。

3）如果已經佔有一定的比例，就唔好心急，其實一隻股佔股票組合15%已經是上限，你可以考慮翻這個因素。

同時當你已經持有一定的比例，就更加不要心急加注，小米（1810）最好落翻2成以上，而阿里（9988）就落翻1成以上，先考慮加注。

4）這兩股都是有質素的，但經常都唔平，其實你可以考慮月供。如果你本身有貨，可考慮跌翻1成以上加注。

5）你預恆生科指ETF（3067）合理區頂約在$16/$17，如果低過這價，你又資金足，其實可以慢慢分注買入，以長期儲貨的模式進行。

------------------------------------------------

Q21311：

老師你好！之前因為要買樓俾首期所以將所有股票都賣晒，而家要重新建立股票組合，想再請教一下老師。

三十歲，穩定職業，月入大約十萬，扣除供樓及生活雜費後，每月大概有三萬元剩，打算每月投放兩萬蚊於股票投資，一萬作儲蓄，另外現金有30餘萬打算放入投資市場。

暫時自己選擇了
穩健的包括：

- 美股ETF: VOO

- 創科實業

潛力股包括：
- 小米
- 金沙中國
- 金界控股
- 必瘦站
- 舜宇光學
- 福耀玻璃
- 阿里巴巴

想請問一下老師我的選股是否正確，比例就應該怎樣分配？多謝老師，祝生活美滿！

龔成老師：

基本上，方向正確。

你剛買完樓，可以重新配置個整個財富組合，由於已置業，在之後的配置上，考慮以股票作為增值，是可以的，亦是較平衡的做法。

你所選的都是有質素的股票，都可以考慮，以你30歲的年齡，基本上是適合的，如果你本身有一定的投資實力，潛力股可以去到60%，如果投資實力一般，就大約30%已足夠，你可以睇翻自己的實力及風險承受程度去配置。

$20000作投資（可以利用月供或分注），以及$10000儲蓄，方向正確。

至於現金$30萬，以現時的投資市場平貴，你動用一半資金，以分注模式買股票，可以的。餘下就留現金，去等機會。

至於上述股票，無問題，VOO是ETF，佔比多少少都得，至於其他，就投資適當的比例。

要留意福耀玻璃（3606）、必瘦站（1830）、創科（0669）、舜宇光學（2382）現價唔算平，投資時要控制注碼或回少少先考慮。

------------------------------------------------

Q21312：

阿Sir！好開心我睇完你本書買左1211同1830，都係短時間升左好多

所以1211我無忍得住5手放左2手，不過已經攞返本金。必瘦站就吸收左經驗，無放到，但又後悔無買多啲

我呢種心態係未唔係幾好要改？

另外正題
我股票有

1830,13638股
1211,1500股
0066,1039股
1928,400股
823,213股

全部都係大跌嘅時候買，
所以以家全部都係賺，
但係而家有一個問題，
我唔知可以再買咩

因為好多都唔平，
但係我又唔想月供，
係咪一年只係等一次機會入，
儲多啲錢先？

龔成老師：

比亞迪（1211）同必瘦站（1830）都有質素，同時長遠有發展力的，你餘下的貨，可長線持有。

至於心態，我地永遠無得後悔，投資好需要你理性，因此你平常心就得。

其實，你現時持有的，都是有質素的股票，你持有就得，唔需要太著重當時買入價。

因為最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

至於你唔知可以再買咩，其實，投資不要心急，不要為買而買，要有機會才買，現時大市在合理區，如果部分較貴的股票，就不要心急入貨，但有部分股，其實現價仍可考慮，當然，你要有一定的資金留低，而不是用盡現金，因為以現時的整個大市平貴狀況，你留翻3-5成現金，其實都可以的。

如果你現金較多，可以考慮一些合理，平穩增長股，例如：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果不想月供，就分注進行。

但要記住，留部分現金，等機會，都是重要的。

------------------------------------------------

Q21313：

Hi, 你好. 有個關於轉工嘅小問題想請教下你

之前有間公司, 經agent幾年前問過我有冇興趣一個post, 跟住我話冇興趣, 幾個月前同一個 agent 搵我去interview 同一間公司 一個post,

佢請咗我同事, 佢係 restructure 要攞package嘅人, 跟住依家有另一個 post open, 同我而家做緊嘅嘢差唔多, 星期五agent叫咗我去interview, 星期六朝早收到offer,

佢減咗我3k人工, 大約有 50% 人工升幅, ~10k, 現在我在這間公司做了11年, 工作環境, 老細, 同事不錯, 只係沒有什麼升職機會, 想請教下你的意見, 萬分感謝

因為我公司將會有restructure, 大約5-7月才知道, 請問我應該推掉 offer, 等restructure之後才找工作( 如果真是被裁員), 其實我現在的工作也挺穩定的, 未必會被裁員,

現時3X 歲. Thanks a lot

現時人工30k

龔成老師︰

你可以多從「長期」視點去分析，就工作來說，無論做那份工作，我地的主要目的都是薪金，以及興趣。

你可以想想，10年後你希望自己的薪金如何，職位是甚麼，當你有左這個大方向，就知道這一刻的情況。

因為2份工作表面上，工作內容係一樣。但當中可以學習，進升等機會，相信會有所不同。

你已在現在公司做了11年，應該會了解，5年後、10年後、甚至20年後，你發展會係點。而這個結果，是不是你想要的?

正如你所講，現職地方無乜升職機會。若果你目標係更上一層樓，咁你就要諗下現時工作環境是否真的適合。

如果不適合，我建議你可以考慮一個新環境，試一試。

當然，此前你都可以問下你轉左新公司的同事，了解一下這公司的情況，去再作衡量。

至於裁員會係一個風險，但唔係而一刻你決定去或留的主要理由。更重要係睇長線發展，邊一間先會更大機會發展到你心目中的目標。

------------------------------------------------

Q21314：

龔成老師您好，小弟對派息基金有疑問想請教下您。

留意到XXX有一種叫每月派息兩次既基金計劃，佢嘅做法係首先喺月頭買入一隻係月中派息的基金，等到佢除淨之後，就將舊錢轉落另一隻月尾會派息嘅基金度，

咁就變相一嚿錢同一個月收兩次息。我明白個本金，會因為要派息而下降， 但我留意到佢基金價格都尚算穩定，10年來只係緩慢下降，過往紀錄派息記錄好穩定。

就算基金價格慢慢下跌，但收到既利息係扣除基金價格下降後仍然有利潤 。計劃提及會有每月10%利息。

Btw我留意到XXX有同樣嘅做法，佢自稱一個月可以最多轉四次，但要喺操作上邊好完美先做到。

XXX動力亞洲高收益債券基金
XXX基金 - 亞洲高收益基金

龔成老師︰

首先，你要先了解，到底收息資產，是否適合你自己。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

因此，若你係年青至中年人士，而一刻應先集中財富增值，收息產品並不適合你。相反，你已近退休之年，又或者你係好保守架投資者，將資金投資在收息資產，係可以。

債券和派息基金，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利(你可以睇睇《財務自由行》一書，我從財富本質上，講述了當中原理)。同時，現時息口低，但未來有機會重回加息週期，債券未必是最好的投資工具。

至於債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

你以所以提及的，都是收息類產品。XXX派息基金計劃，派息係吸引。但你要留意翻是否全數為「保證部份」，還是會有波動。

而「XXX動力亞洲高收益債券基金」和 「XXX基金 - 亞洲高收益基金 」 ，主要都係投資一些「未達投資級別的高收益證券」。

這類所謂「高收益債券」，即是「垃圾債券」，風險唔細。

唔係話唔可以投資，但你要明白當中有一定風險，而非一個穏陣的收息選擇。

------------------------------------------------

Q21315：

龔成老師，你好!我現時剛出來工作，為專業人士，工作穩定，月入三萬，每月可儲2萬，現暫定每月固定存1萬去股票戶口。暫定來年會用16萬去進修，目標是30歲時買到700萬的樓。

上年開始接觸股票，現時股票戶口有 27萬，分別為
港股 15.6萬
美股 6.7萬
現金 4.8萬

另外有銀行有5萬存款、2萬 ibond及10萬定期 (4月到期)

以下為港股詳情
1. 9988 X 300 平均價:257.3333
2. 00001 X 500平均價:57.6
3. 1093 X 2000平均價:8.5
4. 00003 X 1050平均價:13.7524
5. 3319 X 250平均價:30

6. 6618 X 50平均價:146.
7. 3067 X 300平均價:17.2333
8. 1317 X2000平均價:2.3
9. 3033 X200平均價:8.675
10. 3313 X 20000平均價: 0.1515

問題1: 我打算等3313回去比較高位置就賣出，這做法可以? 除了3313外，想問問上述組合有甚麼需要改進的地方? 我需要多增加潛力股，還是增持現有個股(3319/1093)，或增加現金?

問題2: 9988 佔倉好像比較多，但之後有機會波動，我應趁低吸納，還是維持現狀，甚或賣出一手?

問題3: 想問問我的買樓目標會不會太難達成? 我又可以以甚麼方式加快達成目標?

問題4: 想問問 1523 珩灣科技是否優質股? 因為其ROE在30%升至40多%、EPS、及派息都長期穩定增長，現時PE在15左右，亦不算太高

加上5G時代對其SD-WAN路由器銷售應該起剌激作用，初步分析正面。可是，由於沒有太多大行研究報告，所以不太肯定其預測盈利。

如果是優質股，同時想問問其合理價。

問題5: 想問問6186 中國飛鶴是否優質股? 因為其ROE在這4年都維持在40多%，且5年間淨利率增幅(10.91%  40%) 顯著高於毛利率增幅(54.61%  72.5%)，反映公司有效降低成本及定價。

如果是優質股，同時想問問其合理價。

問題6: 想問問1297中國擎天軟件是否優質股? 初步分析: ROE平均有20%; EPS穩定增長，而2020年度更是有100%增長;

流動、速動比率持續有6以上，反映公司現金流動性甚高; 公司業務(退稅軟件)具低成本，高獲利性，且沒有太多競爭者。

如果是優質股，同時想問問其合理價。

感謝你的回應。

龔成老師︰

1) 雅高控股（3313）主要從事大理石開採、加工、貿易、銷售、商品貿易及貨運、倉儲和物流業務。

公司市值不高，盈利十分波動，質素不佳。企業不斷虧損，無乜投資價值，賣出這股較好。你唔好預佢會升翻好多，因為佢投資價值好低。如果你唔想一次過沽晒，你可以分注咁出都可以。

你才剛踏入社會，算係年青一群。投資上，可以較為進取，以「平穏增長股」 + 「潛力股」作目標，比重大約各佔一半。

ibond和定期這類收息產品，增長力好有限，唔建議用。

至於組合上，你而家太偏重左係潛力股，佢雖然有增長潛力，同時風險都較高，不宜持有過多。

未來時間，你要加大翻平穏增長股部份，令組合更平衡。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

2) 阿里巴巴(9988)成個組合近3成，明顯偏高，有過集中性風險。緊記，相同行業不可佔組合多於3成，而單一企業不要高過15%。

就算佢跌，你都唔好再加注住。到你組合平衡翻，你先再作考慮。

3) 大市過去年平均回報10%計（連股息再投資），你每月投資$20000再加上你現有定期、資金和持股等(約值45萬)，5年後大約會增值至250萬。

相信這筆資金，足夠幫助你置業。

4) 珩灣科技（1523）過往的增長不錯，相信長遠有發展，但公司好細間，一年盈利只有不足美金$1500萬，風險較高，現時估值算是合理，都有潛力的。

若你想投資，可以好小注博下。

5) 中國飛鶴（6186）不差的。

佢係中國從事生產及銷售乳製品，以及銷售營養補充劑，以生產嬰幼兒配方奶粉產品為主，當中可分為高端嬰幼兒配方奶粉及普通嬰幼兒配方奶粉兩大類別。

產品有一定的品牌與市場，同時過往的增長力理想，長遠有前景。

比較大的問題是估值，近期經常在合理區中上部至略貴的水平，股價有時投資值博率不足，因此要注意風險。長線投資可以，但就要控制注碼。

6) 中國擎天軟件（1297）本質不差的，市場擔心佢之後的增長動力減慢，因此估值上認為佢會較低，但如果佢能保持這增長，其實現時的股價有吸引力的。

這股的其中風險，就是規模較細，以及行業存有風險。現價其實有投資價值，但就唔建議太過大注。

------------------------------------------------

Q21316：

你好，龔sir ~ 我是在上月開始閱讀「80後百萬富翁」及 「大富翁置富藍圖」。我很後悔現在（30多歲）才閱讀你的書籍，浪費了很多時間。

我現在剛踏入股票巿場，想你幫忙分析一下組合是否合理？

周大富 20% $11入
盈富 25% $29入
海螺創業 33% $36入
太古地產 8% $24入
新鴻基公司 8% $4入
3067 ： 3% $17入

現在有2000是供基金（最少要多供2年，不算之後也會月供），月供$4000 （供2800，1929及 0586）。

另外，手頭有6萬現金，因要讀書。我應該先投資在股票巿場，都要交學費才換回現金，還是先保留？

最後，近來中國都在研究氫能量，請問你對1907 旭陽集團的前景有何看法？我比較擔心佢負債情況，但佢是行業龍頭，加上同地方政府有不同合作，也很吸引。

不好意思，一下子問你這麼多問題，希望你能騰出一點時間回應我的疑問。謝謝

龔成老師︰

你現時持有和月供的股票，都係有質素，適合你這年紀。但緊記個別企業，唔好佔組合15%以上，否則會有過度集中風險。

你周大福(1929)海螺創業（0586）明顯有這個問題，所以你月供可以先用另一隻股票代替。而現貨可持有，唔洗沽出，用新資金去慢慢平衡翻個組合，咁就可以了。

而盈富(2800)雖然超過15%，但由於佢係一籃子股票，而非單一企業，所以比重上係無限制。另外，恆生科指ETF（3067）反而你加翻少少比重都可以，但當然不是一次過加，只是這類ETF，組合佔多少少都無問題。

至於手上6萬現金，如果你1,2年內就要用來讀書，我就唔建議你投資了。因為時間太短，回報不確定性會好高。

中國旭陽（1907）無特別分析，只見之前有些報導。

佢之前公布，澄清最近涉及其於河北省定州市及內蒙古的氫能項目的若干媒體新聞報道，指定州項目試產，並擬於呼和浩特市建加氫站。

該集團指，有關於定州經濟開發區河北旭陽新能源產業園內建設運營氫氣儲運和建加氫站，有關生產基地去年7月開始試產，探索區內在氫能存儲、運輸和燃料相關電池布局機會，開拓京津冀市場等。

至於去年，該集團合營企業與呼和浩特清水河縣政府簽訂另一項氫氣項目框架協議，合作於清水河縣開展氫氣開發項目。

與定州項目相似，該集團將負責於清水河縣進行氫能生產、運輸和建設加氫站，把該市發展為華北地區氫能輸出基地。

只可以話有風險有回報的類別，如真的想投資，一定要控制好注碼。

------------------------------------------------

Q21317：

老師你好，本人24歲，扣除家用每月儲蓄約$15,000(自己較少開支和娛樂)，現金約有$100,000。

目標是28歲前置業，但預計現時置業需$400-$500萬或以上，不知這目標是否在能力和資金範圍內，所以想請教你的投資方向和意見。

股票如下：
0003 11.5，10,000股
2382 175，100股

另外，想問繼續買0003，還是賣出？定轉移集中買其他潛力股如舜如丶中生或小米。謝謝。

龔成老師：

你有4年時間準備，都可以利用投資，去適當利用股票去進行財富增值，到你準備買樓前的一年，就要將股票分段賣出，準備所需的資金。

你可以投資「平穩增長股」，加上小量「潛力股」為組合，助你幾年內財富增值。

煤氣（0003）增長力不強，你不宜持有太多，建議減部分，但留部分是無問題的。

另外，舜宇（2382）、中生（1177）、小米（1810）都是適合你的，都是有潛力的股。不過，你不能只集中在潛力股。

你現時的現金，可以動用$5萬，分注投資。

至於每月儲到的$15000，初期可月$10000去做月供或分注，到後期，就要慢慢減金額。

------------------------------------------------

Q21318：

hello 啊Sir
想問問

#2318 中國平安
#2518 汽車之家
#388 港交所

呢3隻長期持有可以嗎？
合理價大概係幾多？
謝

龔成老師：

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型，分注投資都可以。

港交所（0388）絕對是優質股，獨市生意，加上香港的金融中心角色，這企業有長線投資價值。

多年來的生意與盈利都有理想增長，派息不差。

但要留意，由於這股的盈利會受股市成交影響，因此股價都會有影響。

這股雖然有質素，但近年成為市場焦點股，令佢經常處貴的水平。現價略貴，你預回1成較好。

這兩股都好有質素，你月供都得。

至於汽車之家（2518），都有質素的。

佢中國的汽車消費者在線服務平台。根據資料，以移動端日活躍用戶計，在汽車服務平台中排名第一。

透過旗下網站為汽車消費者提供全面、獨立及交互式的內容和工具並為汽車價值鏈的汽車製造商和經銷商提供全套服務。

根據資料，集團是最大的在線汽車廣告及線索服務供應商，就媒體服務及線索收入而言，於中國在線汽車垂直媒體廣告及線索市場中佔據的市場份額約3成。

佢收入源自媒體服務、線索服務及在線營銷及其他。

佢係2008年成立，最開始是一家內容型垂直媒體公司，專注於媒體服務。於 2016年，推出「4+1」戰略轉型方案，打造了一個囊括「車內容」、「車交易」、 「車金融」及「車生活」的平台，從內容型垂直公司轉型和升級為數據和技術驅動的汽車平台。

自2018年起，專注於用人工智能（AI）、大數據及雲技術（統稱ABC）開發全套智能產品和解決方案，透過提供跨價值鏈的端到端數據驅動產品和解決方案，構建一個連接汽車行業所有參與者的集成生態系統。

展望未來，計劃繼續利用「軟件即服務」（SaaS）能力連同核心AI、大數據及雲技術同時進行橫向和縱向擴張。

發展力是有的，但價位都唔算平，如果控制注碼，這股都可長線的。

------------------------------------------------

Q21319：

你好，想請教你，25歲，月入$25000，一直都是月光族
每個月要還卡數$7500（大約仲有1.5年）

但依家想改變，唔想再喺呢個循環，因為經常都會自責、內疚，依家想儲錢結婚、買樓，自覺好似得番好少時間，已經25歲

已報了你的投資班，希望學習投資知識，因為一直都無接觸理財、投資知識。

屋企人有買你的書，應該睇邊本先？

依家我打算先儲蓄、供月供股票，但係我應該供邊隻，同埋應該供幾多錢？仲有d咩可以做？
謝謝你！

之前只在中銀開左個股票戶口，我應該喺中銀做月供股票，定係有其他建議？謝謝你！

龔成老師：

過去的情況無得改變，自責無意義，你只要做好這刻就得，你現時25歲，只要行翻正確的方向，已經比好多同齡的人做得好。

現時，不要再增加卡數，如果卡數利息較高而又可以提高還款，就盡早處理。

之後，就要留有一定的現金，作為備用及等投資機會。

到餘下有資金，可以長期都不動用的，就可以做長線投資。

你25歲，財富有增長力，可投資「平穩增長股」+「潛力股」，在你知識未算高時，潛力股不用太多。

暫時，你可考慮一些ETF，如盈富（2800）以及恆生科指ETF（3067），至於個股，我會建議你上完堂後，先正式加入。

另外，現時大市波動，唔好用盡現金投資。

投資不用急於一時，這是一個長期的策略，所以好多野都可以等你上堂先進行配置。

------------------------------------------------

Q21320：

本人在銀行工作，part-time 要徵詢公司的同意，是不可能的事，但轉工是一個可行方案。不過，本人在這間公司任職，倘餘幾個月，快將7年了！

如果工作屆滿10年， MPF （僱主voluntary 部份）可以拿到100% 。現在要離開公司的話，損失40%, 大概都有幾十萬，唔捨得！

距離屆滿10年，尚有3年多，現在打算好好裝備自己。

老師，我明白在股票投資組合裏要取得平衡，投資增長力較強的股票的同時，亦要投資平穩增長股。

請問如果用7年的時間分別投資平穩增長股及增長力較強的股票，平均7年回報的差距有多大？

龔成老師：

其實我以前都做過銀行10年，我未過試用期，已經出現做兼職了，當然，銀行不會同意，佢地亦不會知。

這當然有風險，但有時做人，又唔好有太多限制思維。

但如果你不想做兼職，當然無問題，只要好好利用這幾年的時間，裝備好自己就得，因為我都睇得出，你的目標是起碼想做多3年，那你就好好利用這3年時間。

如果用7年時間，投資平穩增長股，我假設回報為8%，假設每月投資$10000，預期7年後滾存到$108萬。

如果用7年時間，投資平穩增長股，我假設回報為15%，假設每月投資$10000，預期7年後滾存到$130萬。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19761-Q19780）

Q19761：

老師你好，我之前高位買易鑫，手上仍持有12500股，策略上應該買入攤平成本嗎？定唔睇好睇位放？

龔成老師：

我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

易鑫集團（2858）質素中等。

佢主要係中國從事汽車交易平台業務及自營汽車融資業務。於中國經營互聯網汽車零售交易平台，交易平台業務。

例如交易促成及增值服務，客戶為汽車經銷商、消費者及汽車融資合作夥伴，服務包括提供成交促成服務（即安排現場驗車及試駕、汽車融資解決方案、提供定價參考及保險計劃）、貸款促成服務等。

另外，亦有廣告及會員服務：為汽車製造商、汽車經銷商、汽車融資合作夥伴及保險公司提供廣告服務，另為二手車汽車經銷商提供會員服務。

業務發展暫時只是一般，未見有好強的投資價值。

你持有就可以，不要加注。

------------------------------------------------

Q19762：

老師，您好！本人現金有130000萬，月入15000，之前看了你的分析

這個月開始月供3000，2800。你覺得我應該如何布屬，因為我是第一次玩月供。可以幫我分析一下嗎？萬分感謝！

龔成老師︰

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

如果你年青，可以"平穏增長股"+"潛力股"。中年人士，可以較集中翻係"平穏增長股"。當你已近退休之年，就應集中在"收息股"，去創造平穏現金流。

建議你用每月5成儲蓄，去做月供，其餘先儲起，用一邊月供一邊儲蓄的策略。

平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（0823）、希慎（0014）、太古地產（1972）

潛力股︰中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）、舜宇光學（2382）、小米（1810）

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548）、收息基金（3110）。

由於現時大市只在合理區底部，現有13萬可以先用一半，以"分注"形式，慢慢入貨。餘下一半和每月儲蓄，就等大市出現一定程度的下跌，才大力度掃貨。然後長線投資。

但緊記月供係一個長線計劃，月供最少維持3年，並持有這些股票5年以上，才會有較理想效果。

------------------------------------------------

Q19763：

想請教2269及1177長遠邊間前景會較好，你說現價1177還是貴，那麽甚麼價位是合理區和便宜區？

2269的巿盈率這麽高，適合現階段開始月供嗎？它的合理區又應該是甚麼價位？謝謝

龔成老師︰

中生（1177）現價是合理區頂位，可以分注入貨。但未算平，故要控制注碼。

藥明生物（2269），主要提供有關生物製劑藥物發現、開發與生產服務。

佢涵蓋生物製劑發展過程的所有五個階段，即藥物發現、臨床前開發、早期臨床開發、後期臨床開發及商業化生產。

潛力是有的，因為過往的財務數據的確理想，但現時的估值唔平，這刻投資值博率一般。（不過，佢是有質素的，但值博率計，中生這刻略高）。

不過，這類股好難話現價一定貴，因為佢有好高的增長，只可以話現價唔平，但如果之後有高增長，那就未算太貴。只可以話，如果你真的想投資，小注好了，你要明白業務有不確定性，同時股價會好波動。

至於月供，中生係可以，但藥明生物就唔係咁適宜。

------------------------------------------------

Q19764：

龔sir, 之前喺20.5入咗兩手小米，如果依家想再入多少少適合嗎？？？

同埋如果想入福壽園，係咪應該等佢回落啲先入？？？大概回落到5-6呢啲價位？？？
thanks

龔成老師︰

小米（1810）有質素，但現價已經偏貴，要回多2、3成才算合理區，才可再慢慢加注。

福壽園（1448）長期處於偏貴水平，近期回落不少，但都在略貴水平。

無貨可現價入少少，有貨則等佢回多1成才入貨，會較好。

------------------------------------------------

Q19765：

我現在28歲, 男友同齡, 希望可2年內置業, 需要一同供樓, dream house可能要1200萬,

但我和男友沒有父幹….家人最多比幫到50萬….我與男友各自有資產150萬,

大家的職業穩定及人工都是50,000, 各自在股票上一年約可賺10萬,

想2年後買1200萬是否真的不太實際?你還是覺得我們應該買便宜點例如800萬的單位?

第二個想到的問題, 如果要置業, 你建議應保留多少百分比的金錢作股票投資?

你認為哪一區較具升值潛力?

龔成老師︰

以你們現時資產水平，2年後置業應該都可以，但要$1200萬物業，就要$600萬首期，這會較難，總之你地在考慮計算上，要考慮首期數目，以子堅守"供得起"這個大原則，咁就無問題。

置業後，我地都必需留有一定資金和股票作增值，大約係1/3至一半。

若然2年後，你覺得成件事依然係吃力。我會建議你考慮先買入一間細價樓作踏腳石，之後再跳上DREAM HOUSE這個方法，相對會較輕鬆。（你可以睇我本《5年買樓4步曲》，會有詳細解釋。）

而升值潛力較大地區，好似西環、黃竹坑、九龍城等都係有潛力地區。同樣我書中，都有一些潛力地區上的介紹，你可以睇下。

------------------------------------------------

Q19766：

龔sir，早晨您好！我已追看您的專頁好一段時間，計劃報讀您的課程

想請問下老師，對1137香港電視和1951錦欣生殖看法，大約幾多先係合理購入價？

龔成老師︰

香港電視（1137）業務有前景，但有兩點存有風險的。

第一，佢都會依靠人的因素，王維基成為了公司最值錢的資產，佢的想法好多，有生意頭腦，但我對這類太依靠個人的企業，不建議太過大注。

第二，這企業現時搞網購，有增長力的，但同時存有一定的未知數。疫情過後的增長力會否減慢？另外就是估值方面，我都好難講這刻的估值，只能話唔算平，如果投資，不建議大注。

錦欣生殖（1951）本質不差的，長遠有增長力。佢主要係中國及美國，透過合約安排從事經營及管理輔助生殖醫療機構，以提供輔助生殖服務、管理服務，以及輔助醫療服務。

佢的自有輔助生殖醫療機構，包括位於中國的成都西囡婦科醫院及深圳中山泌尿外科醫院，以及位於美國加利福尼亞州的３間ＨＲＣ　Ｍｅｄｉｃａｌ手術中心以及ＮｅｘＧｅｎｏｍｉｃｓ　ＰＧＳ實驗室。

佢過往的財務數據不差，生意與盈利都有不差的增長。

不過，佢上市年期不算長，加上佢現時市值去到$350億以上，就算佢盈利增長快速，相信佢接下來幾年，每年盈利都只會有幾億，以這作假設推算，佢現時的估值都幾貴。

如果你見佢有明顯回落，才小注投資，咁會較穏當。

------------------------------------------------

Q19767：

龔SIR 你好
我32歲, 目前持有組合如下

9988 700@229
0005 [email protected]
0883 [email protected]
9618 [email protected]
1810 [email protected]
1038 [email protected] 月供2500
0012 [email protected]
1450 [email protected]
0939 [email protected]

想問下想進取D, 目標想5年內可以令組合增長40-50%
想請教配置上有冇重組需要及可以增加那類型/行業的股票? 謝謝

龔成老師︰

你現時組合已經好進取，以你年紀應"平穏增長股"和"潛力股"最多各佔一半。

但你現時已經偏向左潛力股個邊，成個組合波動性會高左，唔係咁理想。

現時持有待匯控（0005）和建行（0939）只係收息股，無乜增長力。而世紀睿科（1450）連年虧損，無投資價值。

中海油（0883）質素係有，但只屬中等，不宜持有太多。你可以慢慢沽出/減持這4隻股票，換碼至一些平穏增長股，令你組合更平衡。已你現時組合計，5年內有50%增長，應該是可以的。

平穩增值股：盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）。

------------------------------------------------

Q19768：

老師您好！上年家人抽了藍月亮，原本想立即套現，但我用老師嘅理論叫家人長線持有，現時已經見到成績，感謝您！

現時見到02158醫渡科技抽新股，想請問老師抽得過嗎？我見佢財務報表仍蝕錢，唔太敢貿然叫家人抽

龔成老師︰

醫渡科技（2158）提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

根據安永報告，於2019年，集團收入在中國所有醫療大數據解決方案提供商中排名第一，在中國醫療大數據解決方案市場中的市場份額為5.0%。

睇翻大行對佢2020-23年預測，收入和毛利增長分別為73%和83%，增長力唔錯。

佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

但你所講，佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

------------------------------------------------

Q19769：

老師又要麻煩你，持有1171，這股有無質素？可長期持有嗎？買入價6.8

係咪現時應該走轉其他優質股？感謝你

龔成老師︰

兗州煤業股份（1171）的質素屬中等，佢雖然有一定的資產及規模，但生意多年來都無增長。同埋由於佢受資源價格的影響，情況有點被動。

見佢過往的盈利上落都幾大，而投資者好難預期之後的資源價格發展，因此，當中的不確定性會比較大。

如果你持有比重唔多，可以持有。但若較多的話，將部份換至其他優質股，會係較理想做法。

------------------------------------------------

Q19770：

龔成老師，您好！最近開始留意您的頁面，見到每次年輕人想月供股票，您都係推薦盈富基金（2800）。我唔係太想月供，有能力直接買一手或以上。

想請問龔成老師，盈富基金現時買入價會唔會太高？咩價位買入較好？

長線持有這隻股票是否一個好選擇？波幅不大但會穩步上升、同時長線持有可當收息，是這樣嗎？謝謝您，龔成老師！

龔成老師︰

盈富（2800）是一個很好的「平衡組合工具」，當中有52隻成份股，對股票組合有平衡作用。

盈富不是高增長的項目，股息率大約2-3%，唔算高。但長線計，平均一年都有8-10%增長（連股息），算係不過不失。

我過往做了10年銀行及證券行的經驗，比起散戶自行選股（輸錢），投資盈富有基本的增值，反而是更好。

所以，我一般會叫網友，以盈富作中心，加上其他股，這就是一個穩中求勝的策略。

盈富現時在合理區，現價已經可以分注入貨。但由於大市只在合理區，故每月儲蓄不要盡用，要留部份等大跌市機會。

------------------------------------------------

Q19771：

老師，又有煩惱想問問你。

我早前借咗稅貸買日本樓收租賺息差，昨天銀行找我話可以再批貸款共128萬，分60期還，每月還款22613，約年息2厘幾。

我想投資在股票市場，有何建議？

龔成老師︰

通常我自己會視借貸投資，是我最後一張「皇牌」，真的有需要時才會動用，即是見到一個明顯的投資機會，全世界都平貨，值博率好高時，才會動用。

現時恆指只在合理區，明顯未係一個好時機。

當然你用借貸投資去賺取息差，由於你貨款息口不高，係可以。但在大市未算好平時候去進行，會有「賺息蝕價」的可能性。

即是說，借貸投資計劃不是不能用，但要等到有把握才用會更好。

------------------------------------------------

Q19772：

龔sir你好！我前一排因為某D原因停晒月供股票嗰D。現時股票同現金比例差唔多1:1。

如果依家相再做月供，除左2800我一定會做，你仲會建議邊幾隻？

依家好似比較有潛力嘅股票都好貴⋯目標月供嘅錢大概唔超過2萬蚊。

龔成老師︰

這個要視乎你年紀，若你年輕，可以用"平穏增長股" + "潛力股"，偏中年"潛力股"比重要減少，到近退休應集中在"收息股"上。

現時雖然不少潛力股，己經係略貴，但月供依然係可以。

平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（0823）、希慎（0014）、太古地產（1972）。

潛力股︰中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）、舜宇光學（2382）、小米（1810）。

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548）。

大市現處於合理區，每月儲蓄唔好盡用。最好留有部份，等大跌市出現時，用來掃貨，增值效果會更明顯。

------------------------------------------------

Q19773：

你好，龔sir,去年年初開始接觸股票到而家都一段時間，一直好buy你講既價值投資法，長線投資

即使身邊好多人都叫我賺左先，但一直買左好多股票都係無放，到近期終於見到有少少回報。感謝

現階段我既投資組合同比重係咁：

小米1000股 ：23.78%
阿里巴巴200股：32.17%
中手遊2000股：4%
中生製藥2000股：10.4%
藍月亮1000股：12.6%
太古地產1000股：16.78%

唔知咁樣既組合還可以嗎？同埋因為一直無放股票，所以就無產生到比較多既現金流

我放少少去再作投資定係都可以繼續長揸較好呢。

龔成老師︰

只要股票係優質，長線持有個增值效果會最好。

但你有個問題，就係組合中大多為潛力股或較波動性高的股票（除了太古1972）。就算你好年青，這類股票都適宜佔組合一半左右。若你偏向中年，潛力股比重應更少。

你要建立一個長遠的「組合」，要優質，要平衡，同一行業最多30%，同一股票最多15%。

至於中手游（0302）和藍月亮（6993）都有質素，但上市年期不算長，這會令財務數據代表性較低，不確定性大，暫時只宜小注投資。

若你係年青至中年人士，建議你再有新資金的時候，優先放在一些"平穏增長股"，去令你個組合更平衡。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）。

------------------------------------------------

Q19774：

老師， 我重整緊手上嘅股票
本身持有：

5手（01177） 9.92入
1手 （00001）73.95入
1手（00005）63.4入
22手（00788）平均價1.72入

現價打算繼續持有， 手頭另有5萬蚊現金，26歲，月入18k，除左家用$4000係必要，同埋可能預多$3000-$4000洗

無咩必要開支，可能每月不定嘅卡數，出黎做左野四年都草唔到錢。加上，手頭上嘅股票走唔到，之前見領展低都無錢入貨。

所以新一年想重整一下股票，由於現金唔多，打算$5000月供3隻股票。

$2000 （00388）
$2000（00823）
$1000（02800）

請問此組合是否可以？ 但我見唔少股票而加都高位， 如果而加開始月供係咪都可以？ 有無其他潛力股建議？

手上持有嘅嘅股票，我知都有質素，所以唔會放， 但吸收教訓，唔會再咁高位入。謝謝

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時的年齡，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

你現時月供組合可以，現時港交所（0388）係略貴，但月供長線可以拉平均個價，所以現在開始供係無問題。

持股當中，匯控（0005）收息股，增長力唔高，唔好再加注。

現時大市只在合理區，每月儲蓄唔好盡用。最好留有部份，等大跌市出現時，可以用來掃貨，增升增值效率。

------------------------------------------------

Q19775：

龔老師，我想請教你一個問題，若果我資金真係好少約10萬內，如果投資長線股，增值能力真的會好慢喔，
是否如資金少，是否適合投資短炒好。

龔成老師︰

長線投資，重點唔係因為資金多，而係這個才是正確的財富增值方法。

短炒根本是無法賺錢，我之前做銀行、證券行多年，見證大量客短炒全部都蝕錢，只有長線才能有錢賺。

現時大市在合理區，你可以因應自已年紀，選擇合適股票。你可先投入一半資金去入貨。餘下一半，就等大跌市。

如果你年青，可以"平穏增長股"+"潛力股"。中年人士，可以較集中翻係"平穏增長股"。當你已近退休之年，就應集中在"收息股"，去創造平穏現金流。以下都係一些有質素股票，你可從中選擇。

平穏增值股︰盈富（2800）、港鐵（0066）、銀娛（0027）、煤氣（0003）、恆基（0012）、中銀香港（2388）、長建（1038）、粵海（0270）、領展（0823）、希慎（0014）、太古地產（1972）

潛力股︰中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）、舜宇光學（2382）、小米（1810）

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548）

------------------------------------------------

Q19776：

老師，你好。我現時29歲，月入30K，月可儲17K，現金約50萬。

我較少投資經驗，希望3年內可以買樓，長線和中長線如何部署較好？

現時1177，1810，3067適合入手嗎？

龔成老師︰

係投資增值策略上會用「先增值，後現金流」方法，初期投資較有潛力股票，去做財富增值。到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時人生階段計，應以"增值"作為重點。你先用每月5成儲到的錢做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、長建（1038）、長建（1038）、粵海（0270）、領展（0823）、或

潛力股︰港交所（0388），中生（1177）、福壽園（1448）、安碩恒生科技（3067）、阿里（9988）、騰訊（0700）。

現時大市只是合理區，你現有50萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

至於，中生（1177）、安碩恒生科技（3067）和小米（1810），前2者在合理區頂部，可分注入貨。而小米已經略貴，要回3成才算合理。

------------------------------------------------

Q19777：

老師，點睇呢3隻股！3993 6865 968 都係內需股，邊隻潜力高d！想長揸

龔成老師︰

洛陽鉬業（3993）業務波動比較大，質素只算中等。

福萊特玻璃（6865）主要在中國生產及銷售光伏玻璃。

此股都正面，但盈利就比較波動，反映行業的不確定性。現價略貴，但由於有一定波動性，故不宜大注。

信義光能（0968）有質素，環保能源會係大勢所趨，未來光伏行業，在中國以至全球發展都係正面。此股股價較為波動，但多年來都保持向上，2018年的生意就出現了下跌，但近年慢慢回復增長力。

最近有不少炒作，令相關股份都升左唔少。現時價格係貴。

3隻股票中，信義光能整體質素會較高。你可以等佢回到接近合理區，才慢慢分注入貨。

------------------------------------------------

Q19778：

您好，剛follow左你fb個多月，真獲益良多，已開始計劃月供2800 （3000）, 金沙 （1000），港鐵（1000）.

另一個問題是樓宇按揭仍欠50萬，每月供8000. 但我手上有資金30萬左右，可以先用來還款

另有備用資金，足夠一年生话費。請問老師覺得先還30萬樓按？還是30萬保留資金

等侍股市大跌入貨？或買年金扣稅？謝謝

龔成老師︰

這個是機會成本問題，由於現時按息唔高，相對投資優質股，還錢的作用明顯係低（以投資盈富2800為例，年均回報約8-10%。）。

所以，我地而個時候應該先用這筆錢來做增值，咁成個增值效果會較好。

現時大市在合理水平，現金和股票最好各佔一半，餘下一半就等大跌市機會，才入貨。

------------------------------------------------

Q19779：

你好，老師，小朋友有15萬利是錢，想投資下，收下息，有咩股可買？

另問9988,$270買入，買左4手，前路如何？
多謝解答
及無私奉獻

龔成老師︰

如果小朋友仲細，距離用這筆利是錢有5年以上，我建議買一些"平穏增長股"相對會較好。若年期較短，可選"收息股"。

現時大市只在合理區，15萬先用一半，餘下等大跌市機會，才加注。

盈富（2800）是最好的選擇。

另外可加：銀娛（0027）、恆基（0012）、中銀（2388）、港鐵（0066）、煤氣（0003）、長建（1038）、長建（1038）、粵海（0270）、領展（0823）

收息股︰港燈（2638）、香港電訊（6823）、工行（1398）、匯豐（0005）、置富（0778）、陽光（0435）。

阿里巴巴（9988）近期面對內地監管可能收緊，風險度增加左。

早前螞蟻金服因貸款業務問題，被叫停上市。中央就是擔心這些小型信貸增長過快，但監管又未及銀行嚴緊，會危害實體經濟。

但內地唔係想佢唔賺錢，只係想規管佢。由於佢本身己建立一個完善的業務，因此本身是無得輸，只是賺多賺少架問題。

此股質素依然存在，但你預佢增在力會弱左，長線投資價值仲係有係度。

------------------------------------------------

Q19780：

龔老師你好，本人現時是一位無業遊民，想將手頭上有的錢滾大啲。現持有的股票如下:

（1810）小米 2000股（24入）
（3690）美團 200股（296/276入）分別各一手
（9988）阿里 100股（251入）
（0823）領展 500股（66.8入）
（6993）藍月亮 2000股（15.68入）

1）現時領展或小米可以再入嗎？
2）還是買其他股？
3）我有睇你介紹2800盈富，如我要入，現階段水位高嗎？

可否麻煩老師幫我分析下呢謝謝你

龔成老師︰

1） 領展（0823）算合理區，由於你有貨，所以唔需要太急入，你最好等股息率到5%或以上，才加注。或月供。

小米（1810）係偏貴，要回多2、3成才算合理區。

2） 你現時好集中係一些潛力股和新股，佢地有增長潛力，但不確定性都較高。建議你加入一些平穏增長股，去令組合更平穏。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）

另外，美團（3690）和藍月亮 （6993）不確定性較高，不宜持有太多，暫時唔好加注住。

3） 現時已在合理區，可分注入貨。

但由於你待業，在投資前應先預留約半年生活開支，才開始投資計劃。現時大市在合理區，未算好平，故資金唔好盡用，要留一半等大跌市機會。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19521-Q19540）

Q19521：

老師~有問題想請教！現持有10手700平均買入價$300左右，你認為放一半定或繼續持有呢？近期升得好誇張，其實自己又唔係好想放住！

龔成老師：

要睇你持有騰訊（0700）佔組合的%，以及現金%情況。我地最重要是建立一個平衡的組合。

首先，如果你想獲利，賣部分是可以的，例如賣3-5手，總之，點都有貨是長線的，成為你投資組合的一部分。

如果你現時持有騰訊的比例太高，那可以賣少少。如果你現時現金少，可以賣少少。

相反，如果這股佔你組合比例唔過多，同時現金足，其實不用賣出。

------------------------------------------------

Q19522：

上年五月嘅時候，我仲記得我嘅資產大概900,000左右，之後再拜讀你數本書之後， 決定想你的班，自己有五年嘅目標，想完堂之後，真心覺得好好用！

但由於年紀唔算細，自己只係準備咗大概三份一嘅資金去嘗試實踐股票嘅投資，諗住之後再慢慢增加，而且，亦都聽你上堂時候講嘅心得，Mark低自己每月洗咗幾多錢

同埋應使則使、慳得就慳嘅方法去進行理財，去到今年一月，自己在進行整理嘅時候，當然知道股票個方面係有上升嘅

但係與此同時，亦都因為比以前慳咗，所以自己計過自己嘅資產去到1,370,000左右，其實上升咗四成有多。

其實講緊都係八個月左右嘅事，真係真心覺得好有用，亦都好多謝你嘅教導改變左我理財嘅方法

以前覺得冇可能，而家去到呢一步， 覺得唔係吖，其實真係有機會喎。我會再勤力啲做啲股票整合，多謝你。

龔成老師：

太好了！

我一直出書、教班的目的，就是想幫大家財富增長，現時相信做到了。

加油，理財是長期戰，你要保持進行！

------------------------------------------------

Q19523：

龔成你好，一直有看你的文章，早前為自己置業（同另一半夾份買，一人一半），儲蓄常常清空，沒有閒錢投資。

現時我正職收入3萬，副業收入1至3萬 （視乎疫情），再加其他收息基金每月數千。

每月支出供樓6000，零用3至5千。 每月可儲3至5萬。現時儲蓄現金20萬，另有約25萬股票，如下:
工商銀行 1萬股 （四蚊入）
建設銀行 1萬股 （五蚊入）
中國人壽 6千股 （17蚊入）
阿里巴巴 2百股 （252蚊入）

我想2年內儲1百20萬，贖番層樓。請問應該點做?

現在的股票應該長持有收息，還是有升幅先放，再等低位入呢。 謝謝你的意見

龔成老師︰

首先，2年係一個短時間，就算再優質股票，都會有機會出現波動，影響最終回報。

我建議你用每月儲蓄5成，去做月供。其餘先儲起，用一邊月供一邊儲蓄的策略，來進行財富增值。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

或一些潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177）、福壽園（1448）。

餘下的另一半儲蓄和現金20萬就等機會，當大市出現較大回調，就加大力度掃貨。

另外，你持股中的工行（1398）和建行（0939）佔組合比重太高，再加上佢地增長力麻麻，建議將部份換至以上股票。

以上月供計劃，你最好維持至少3年，並持有5年，效果會較好。記住財不入急門，好的財富增值係要按部就班。

------------------------------------------------

Q19524：

龔Sir, 早安！請問福壽園和華潤水泥現在哪個在更值搏水位？

龔成老師︰

華潤水泥控股（1313）本身有質素的，不過業務就較有波動，佢過往的盈利數據上落都大，因此股價的變大亦會較大。

長遠計，房屋、基建發展等因素，都會利好水泥股。

福壽園（1448）主要在中國從事殯儀及相關業務，此股質素和潛力上，會較華潤水泥高。

但以現時股價計，值博率華潤水泥會較高。但此股波動，不宜入太多。

------------------------------------------------

Q19525：

你好呀龔sir，我聽咗你上次嘅意見去咗睇股票勝經，去定立我嘅股票組合，希望你可以指點下

問題1：請問這組合ok嗎？（我19歲）

以下係我諗緊嘅組合，括號內為該行業中所考慮的股票：

科技 （9988, 700） —— 30%
公用（388, 66） —— 25%
地產（823, 12） —— 15%
賭業 （27） —— 5%
零售業 （590） —— 5%
盈富 —— 20%

問題2️：我決定月供的股票合理嗎？

我的考慮：

- 我每月只有16k可放入股票。很多我現在考慮中的股票1手價錢對我來說並不是小數目
所以保險起見好似月供好啲，但不知是否正確的決定。
- 想調整一下我的組合，所以決定先停供恒基和盈富一陣
- 銀娛好似好少人會月供

以下係我宜家有嘅股票：
現有股票
11 恒生 100股@$124
12 恒基 162股@$30.612
883 中海油 1000股 @$6.7
2800 盈富 1034股@$25.632
9988阿里 200股@$272

穩陣（11,2800） 37%
地產 （12） 4.7%
潛力 （9988） 52%

打算1月開始月供的股票
- 港交所 （如果1月頭<$390就開始） （3k）
- 港鐵 （3k）
- 恒地 （停一停先）
- 銀娛 （3k）
- 盈富 （停一停先）

問題3️：我打算一手手買的股票的選擇，和定的價位ok嗎？

（9988已經佔我現在的組合一大部分，仲要我買的價錢很高，現在一直跌很有衝動去溝貨。不過，
見你答其他人話如已有貨就再等下，所以現在就hold住先）

打算一手手買的股票
- 阿里巴巴
- 騰訊 （<$530 第一注）
- 領展 （<$60 第一注）
- 六福（<$18 第一注）

問題4️：睇完80後、股票勝經後，應睇邊本？

好多謝你無私嘅花時間俾意見我😭
祝 身體健康 開心 平安

龔成老師︰

1） 以你年紀，係財富增值黃金時期，應以增值為主，故這組合係可以。

騰訊（0700）要回多1成，而港交所（0388）則要回多2成才算合理價，才可開始分注，慢慢分段入貨。

2） 初學或資金唔多的投資者，月供會較一手手咁自已儲理想，因為操作上較方便。

持股中，中海油（0883）質素較中等，唔好再加注了。

你現時月供5隻股票都合適，包括港交所在內，都無停供需要。但你5隻中只有港交所較有潛力，其餘都平穏增長股。我建議你換入一隻潛力股，去提升組合增長動力。

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177）、福壽園（1448）。

另外，現時大市只在合理區，每月資金唔好盡用。最好留有部份，等大跌市出現時，可以用來掃貨。

3） 由於你資金唔多，而阿里（9988）你已有2手，唔建議加注住。

領展（0823）和六福（0590）現價合理，可分注。騰訊（0700）等回到$500才算合理水平，這時首注會較好。

4） 你可以睇<財務自由行>和我本新書<5年買樓4步曲>。

------------------------------------------------

Q19526：

你好，我見到9988市盈率現在小于30，其實係好還是唔好？因為關於市盈率我從來都冇研究過

所以都想請教下你，反而拼多多市盈率現在是虧損，股價反而爆升

龔成老師：

其實呢類新經濟股，市場睇將來多過睇過往，市盈率都有參考作用，但由於市場對企業睇法可以變得好快，因此無得話絕對幾個倍市盈率係合理。

當市場對一間企業的睇法改變，就有機會調低市場認同的合理市盈率，這在新經濟股經常出現。

我地進行估值，往往以多種估值方法一同進行，例如現金流折現法與市盈率。就算企業這刻的盈利好少，但之後的盈利多，用現金流折現法仍可以計到高估值。

你預阿里（9988）現時處於合理區中上部，不過中短期仍會波動。

------------------------------------------------

Q19527：

早晨老師，我想請教一下，想長線投資一隻醫藥股，可月供或分注吸納

如以下三隻選擇

1801信達生物,2126藥明巨諾，1177中國生物製藥

邊隻會比較吸引，值博率高呢？如我想比較這三間公司是否睇曬roe，現金流，營業增長，毛利，前景等，最好資訊果隻係咪代表最高值博率呢，謝謝老師指教

龔成老師︰

分析任何企業，我地都應該了解佢質素、行業前景、財務狀況（如ROE、負債、現金流等），從而推算佢投資價值。

信達生物（1801）係一家中國生物製藥公司，開發了集研究、發現、開發、製造及商業化於一體的生物醫藥平台。

而藥明巨諾（2126）是中國臨床及臨床前階段細胞治療公司，2間都有質素。但由於仍處於燒銀紙的狀態，潛力度是有，但不確定性都好大。投資都得，但只可以好小注。

相比之下中生（1177）已一套成熟經營模式，也現有穏定盈利。雖然潛力未必及以上2隻，但相對穏健，整體質素和值博率都較好。

中生現價在合理區中上部，可分注，但要控制注碼。

------------------------------------------------

Q19528：

尊敬的龔成老師您好！唔好意思打擾你，因我係股票新手，韭菜中的韭菜，投機當投資，又保守又貪心，從六月至今

本金用了16萬買了，全部都係虧，hold 唔住。

本人中年四十多，從事體力勞動，每月可存8000–10000；現金有10萬。

股票有：[email protected]萬股均價1.43；914@1000股均價50.2；9999@200股均價141；9988@200股均價245.6；1099@400股均價18.8 我應該點樣做好？好擔心，長期投資大概要幾耐？

短期又指多短呢？我要從頭來過嗎？好亂。如有時間，肯請幫我分析一下，感激不盡

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你現時股票，都係有質素，而買入價都算合理水平。這些股票一直長線持有就可以，無需太在意這些短期波動。

但留意網易（9999）和阿里巴巴（9988）有潛力，但波動性都高，以你年紀，不宜持有太多。國藥控股（1099）負債偏高，同樣要控制注碼。

我建議你用月供"平穏增長股"，作未來增值平台。策略上，你用每月5成儲蓄做月供，其餘先儲起，用一邊月供一邊儲蓄的策略。

你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

如果想組合多少少增長力，就安碩恒生科技（3067）。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

選股方面，如果你對這些股票唔係咁識，可以先用盈富基金（2800）作為你投資目標，佢係包括52間質素不錯上市公司股票的組合。到你有一定能力，才買其他我建議的股票。

10萬現金和每月餘下另一半資金，我地就等機會，當大市出現較大回調，就加大力度掃貨，然後作長線持有。

所謂長期持有，講緊最少5年。當然，股票質素一直無變的話，一直持有會更好。

------------------------------------------------

Q19529：

龔成老師，我的父母有$1.2M的現金，想幫佢地買入一些穩健的收息股長期收息，經過初步研究

希望分注買入中華煤氣 （0003）、領展（0823）、龍光地產（3380）、華潤水泥控股（1313）、碧桂園（2007）和龍湖集團（960），請問這個策略如何?

這些股票的股價和收息長遠看穩健嗎? 謝謝 !

龔成老師︰

你以上股票，如果作為收息股的話，其實未算最適合。

中華煤氣 （0003）和領展（0823）是當中較穏健，但股息率唔算高，而且都有一定波動性存在。其他內房股，有一定派息，但負債狀況好唔理想，唔建議用來在收息股投資。

你父母可以用這些收息股作組合，目標是5%、6%的股息率，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

這些股票派息唔錯和相對穏定，作為收息股會較適合。

現時大市只在合理區，120萬資金可以先投入一半，用"分注"形式，慢慢入貨。餘下一半60萬，就等大跌市出現，才去掃貨，然後長線投資。

------------------------------------------------

Q19530：

老師，可以幫我檢視投資組合嗎？
總投資金額：$393,280

盈富基金 $24.68@8000股 {50.2% （所佔投資比例）
太古地產$20.6@1800 {9.4%
領展$68@600股 {10.3%

必瘦站$3.2@8000 {6.5%
中國生物製藥$7.2@6000 {10.9%
阿里巴巴$245.8@200 {12.5%

另外我對1448福壽園，1211比亞迪股份，0027 銀娛，1928 金沙，都很有興趣想入手

我而家持有嘅股票會太多嗎？應該點樣調整？

（我25歲，月入29K，手持21萬現金，喜歡主動式投資術，希望水桶1水桶2比例是60:40）

其實我超鐘意必瘦站
因為我對女人為左靚 既瘋狂 好有信心

龔成老師︰

你現家持股都有質素，而且都唔算太多。你想入手的4隻股票，都可以。當中以比亞迪（1211）和福壽園（1448）潛力較大，但現價偏貴。

但你現時組合的增長潛力略為弱，未來可以加大潛力股部份。

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

現時大市只在合理區，應持有一定現金比例。故餘下21萬現金，就等大跌市，才出手掃貨。

我自己都持有必瘦站（1830），這股正面的。

其實你現時整體的方向正確，無乜問題，之後只要小心等機會入市就得，如果你可以承受風險，就慢慢增加潛力股的比例。

------------------------------------------------

Q19531：

龔sir,1579有咩建議?可入貨麻？

龔成老師：

頤海國際（1579）有質素的，佢以「海底撈」品牌銷售產品（火鍋底料、火鍋蘸料及中式複合調味品）予經銷商、餐飲服務供應商及網絡購物者（透過電商如天貓及京東）。

並於河南省鄭州市及四川省成都市設有生產設施。集團亦為海底撈集團（由主要股東兼非執行董事張勇及施永宏創立）於中國的火鍋底料產品獨家供應商。

業務與發展正面，有質素，有長線持有價值。

不過，現價就唔平，這股現價貴。最好回翻多少少先考慮小注。起碼都1、2成先考慮。會較穩陣。

------------------------------------------------

Q19532：

之前信了别人所謂內幕，於$3.98大手買入1759，之後直插至現價$2多徘徊，整份資金都被壓在此。請問閣下點睇呢隻，可返上？謝謝！

龔成老師：

中油潔能控股（1759）在廣東省、河南省及江西省經營液化石油氣和壓縮天然氣相關業務。

本身這類商品企業，賺錢能力就唔會太強。因為佢產品無差異性，故定價能力唔會太高。

佢本身規模好細，盈利都唔多，連1千萬都無。見佢近年盈利一直下跌，暫時所見質素好一般，其實無乜投資價值，你最好睇位賣出。

------------------------------------------------

Q19533：

龔成老師 hello，有個問題又想請教你 唔關股票增值事 不過關自我增值事

我覺得自己嘅技能經驗太普通 而且人與人嘅political/argue每日不斷重重複複 亦都令我好精神好困擾

想學專啲繼續頂硬上係本行發展 定學新技能轉行
如：
本行：digital marketing data analysis /retail training
轉行yoga/florist/arborist

有排都未去到財務自由 係咪就要放棄自我增值呢？每個course都幾萬幾廿萬 我無咁多錢應該點取捨 定係借錢都要讀左先呢？

困左係個死胡同度 個人自我感覺越來越低落 好似好多野都無價值 生活得毫無意義咁

龔成老師：

我地每個人的資源有限，時間有限，所以要好好計劃及善用。

你要從自己的興趣與強項去想，如果人做乜你又做乜，只會令你好普通，但如果你發展自己的興趣與強項，唔止做得開心，同時會做得比人好，所以，你一定要從這方向去想。

另外，想想在事業上，學那些範疇會對你長遠最大幫助，能夠配合到你的發展。

另外，你要從長遠的角度想，5年後、10年後，你想做甚麼？收入怎樣？生活怎樣？

當你有了目標後，之後就要想想，怎樣達成目標，這些學那一個範疇的事物，對你的目標最有利。這就是你這方向。

其實每個人都會有突破機會，但機會不會常常到來，不過你可以先作準備。

------------------------------------------------

Q19534：

老師，我想為(幫)我個女(佢一月出世)早點投資for第時讀書又好、出國又學。

如果我投資係一d新興市場既assets 例如基金：法巴能源轉型股票基金USD 、貝萊德世界科技基金USD、同埋一些etf 例如ARKK、QQQ、VOO 等等！

我當每月為個女儲少少(可能只係幾百至一千)買以上提及既assets (當然未必每期都買曬), for long time 睇，say 10年，20年，個投資回報會唔會理想？

我最期望每年能有10% return 。

策略只係月供/定期加注、當新興既市場轉型就換另一種。ps 唔會買個股，盡量想減低風險。

龔成老師：

你長線投資上述基金及ETF，可以，但就要留意一點，上述大部分都與新經濟類別有關，會有風險，你要明白這一點。始終風險與回報是相對的。

長線進行可以，只要你明白都有基本風險存在，就得。建議你保持長期月供，唔好心急入。

------------------------------------------------

Q19535：

成哥唔好意思，我本身住公屋，黎緊好大機會會抽到居屋，由於本身資金唔多

買樓之後，每個月大部分錢會用左去供樓
我估大約只有$3-4k 儲蓄

你覺得呢個時候買樓既選擇正確嗎？

龔成老師：

如果本身有自住需要的，其實可以進行，只要你「供得起」方面無問題就得。

雖然接下來1、2年，樓市有可能下跌（不會大跌），但實際情況無人知。而長遠會上翻。因此，只要你有自住需要，就可以進行。

之後就努力儲多D資金，再利用股票滾大財富。

------------------------------------------------

Q19536：

龔成老師您好，本人42歲，已經有個14歲嘅小朋友，而來年3月將會有新生命誕生。我而家創業階段，所以未有回報，老婆人工$18,000，流動資金20萬，人民幣定期96萬(24/11/2020到期)，同埋以下股票。

1037-6,000 $2.2185
2380-6,000 $1.6995
2638-62 $7.9923 (23/10開始月供$500x2)
2800-19 $26.0147 (23/10開始月供$500x2)
3033-2,000 $8.0311
3316-500 $17.7094
8491-20,000 $0.6467

3-2310 $15.162
5-810 $69.586
6-1,000 $57.74
11-200 $159.422
788-10,000 $1.265
823-204 $77.297
1008-10,000 $0.604
1313-2,000 $11.838
1810-400 $19.2
3175-4,000 $5.388
6063-16,000 $1.53
8491-55,000 $1.837

想問下我可以點樣製造被動收入?以上股票有冇需要更改?人民幣定期回報低，有冇更好嘅意見，謝謝!

因為之前遇到老千股，所以依家都唔敢隨便買，機緣巧合喺Facebook見到你，聽你講過要了解股票先好買，所以買咗呢幾本書硏究"股票勝經""年報勝經""財務自由行第6版”，謝謝您Facebook 分享!

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你42歲，財富仍有增長力，因此，不用著急爭取被動收入，這刻可以目標為財富增值先。

雲智匯科技（1037）、COOL LINK（8491）、貴聯控股（1008）、智中國際（6063），質素都不太好，賣出較好。

至於中國電力（2380）、港燈（2638）、匯豐（0005）、電能（0006），只是收息股，未必太適合你，長遠宜調整翻。

你之後唔好再投資一些不知名的股票，不要再信陌生人推介，要有自己分析，我建議你考慮以下股，O作為之後的投資方向。

盈富（2800）。

銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

你最重要是保持知識的增長！

------------------------------------------------

Q19537：

老師，我報左你個進階班啦，希望再可以跟你學多d嘢😊，但7月先上，這段時間我應該做d咩可以之後上你堂，又可以跟得好d？thx

每星期看二份財務報表？

有沒有咩其他書介紹可以備課？你的書我看晒了
Thx

龔成老師：

你可以每星期研究一間公司，你要仔細少少睇年報，唔好睇完就算，要「解讀」數字背後的意義，同時用「企業評估表」進行，我寧願你仔細分析一間，深入了解，都好過表面分析幾間。

另外，你可以睇《年報勝經》《選股勝經》，以及巴菲特相關的書（初班最後一堂有一些書推介的，你照住睇）。

------------------------------------------------

Q19538：

有咩股票係會穩定增長一倍

龔成老師：

有唔少潛力股在2020年都升左，所以這刻要買入高增長的股，反而有風險。如果你能承受風險，可考慮安碩恒生科技（3067），可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q19539：

成哥你好！
有幾個問題希望能夠賜教下細佬

1. 相信你都有睇過今日關於藍籌門檻嘅新聞。呢個改變會對恆指以及盈富造成咩影響？會唔會係根本性，令相關指數質素下跌？

2. 本人對香港對景持保守態度，再加上同國際嘅關係，我對香港市場嘅增長並唔樂觀。如果因此而選擇投資其他股票市場嘅ETF, 例如S&P500，係唔係一個可取嘅做法？

3. 近日有KOL指出恆指過去10年嘅增長麻麻，甚至只能平通脹，令盈富嘅表現非常一般。你會點樣回應以上嘅評論？我明白股票係forward looking, 但睇番頭先我對香港嘅睇法，盈富嘅投資價值係咪俾以前冇咁吸引？

4. 我希望揀一隻增長股，配合ETF作月供投資，你認為邊隻現價處於平或合理水平，可以開始投資？比亞迪是否好嘅選擇？

多謝老師指教！

龔成老師：

1）其實長遠是好事，因為現時的選股較少，代表性未夠，同時在選股中，未能反映現時的經濟結構，所以，長遠改變是好事。

2）可以，其實你可以加入美股指數基金VOO，如果能承受風險就加入QQQ，港股美股無衝突的，其實可以配合。

3）我建議投資者買入盈富（2800）的原因，是「平衡風險」，不是「增長」，因為我過往做了10年銀行工與證券行，見了大量散戶投資成績，我發現大多數人輸多贏少，其實對不少人來說，簡單投資盈富最好。

這是一個「穩中求勝」的工具。

當然，近年由於經濟結構改變，新經濟類企業增長力較強，而盈富較多是舊經濟股，所以過往回報一般，因此，恆指公司之後會改革指數。

其實你可以建立平衡組合，盈富，安碩恒生科技（3067）、VOO、QQQ。同時持有。

4）由於現時唔少增長股都貴，建議你考慮指數基金，如3067、QQQ。

------------------------------------------------

Q19540：

先多謝啊sir. 應用了大半年你的價值投資方法，除了身心上增長，荷包也鑊益良多，希望疫情盡早變成過去，可以跟你見個面，說句謝謝！

現有「公司」如下，777，1787，6049，2013，772，1501，1797，1801，2048，2382，9698，9618，9988，9999，9901，9992

其中，9618，9988，1801 佔了一半左右，另外其他每隻大約5-10 萬左右，全部共约230 萬，另外有40 萬現金留用隨時在適當時機加貨。原來望得很遠的房子，看來也不是沒有希望。

龔成老師：

我睇翻你的持股，基本上都是有質素的，不過有兩個問題，第一是有點散，之後未必要太急加入其他股。第二，較多是潛力類股票，這會增加了你的風險類。

同時有少少行業集中的情況，你要注意這點。

你講得對，「原來望得很遠的房子，看來也不是沒有希望」，我過往都有這想法，以為很難完成的目標，其實可以做到。

加油！現時你的財富，是你努力的成果！

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。