【你又有乜UA集體回憶？】

#長文慎入

**各UA院線相關文章可看留言連結**

費事一個Post太長，不如另開一個分享吓對UA嘅集體回憶，又或者講，係UA已消失集體回憶。

網上一片洗板嘅集體回憶，可能都離不開UA沙田同UA金鐘，話曬係UA「始創店」，都曾經UA最熱門嘅兩間戲院，但自己唔係睇過好多次，學生時代嘅我，更加覺得UA金鐘係天價級別，只係睇過幾次。最深刻反而係UA黃埔同UA九龍城。

由細住喺土瓜灣（所以大家唔好再覺得我黨鐵站交收係老奉，要去交收我真係要行半個鐘，我日常生活係冇需要接觸黨鐵），最近嘅戲院就係UA黃埔同UA九龍城，細細個屋企人大時大節同我睇戲，都係喺呢兩間。喺我成長回憶入面，九十年代大片如《侏羅紀公園：迷失世界》、《哥斯拉》、《黑超特警組》、《盜墓迷城》等等，都係喺呢兩間戲院睇，兩間戲院喺今日嚟講算係大戲院，場場全院滿座，係就係迫少少，但都係我永遠都唔會忘記嘅童年回憶。好記得UA九龍城同UA黃埔有個大電視，不斷咁播預告片，細細個行過都總會睇，隨時一睇就企半個鐘（果陣仲未有上網，預告真係得戲院睇），我諗，我嘅電影夢，就係果時開始激發。

以前睇UA都有自家製片頭，冇「殊～仲傾計」咁簡單，都冇「唔該熄咗你個電話啦」咁洗腦，曾經有試過搵當時好紅嘅「戇豆」拍條戲院禮儀片，睇親都會識笑；後期就將一堆大片片段剪輯，就算唔係睇大片，都有種睇大片感覺。

仲有果一年，《鐵達尼號》上映，UA黃埔當時喺船（今AEON）果邊仲有兩個院，兩邊票房排到打曬蛇餅，《鐵達尼號》仲直落到賀歲檔嘅《新鐵金剛：明日帝國》、《我是誰》、《行運一條龍》，幾套勁片撈埋一齊，我諗係我記憶中，最熱鬧嘅「排隊買飛回憶」。

其後，UA九龍城執咗，UA黃埔就成為咗我嘅主要戲院，加埋果時入咗會同埋大學喺Poly讀，空堂就會落去UA黃埔睇，一星期起碼都去一次。果時450分就換到張飛，好抵睇。閒日空堂呢個時間，一個人包場成日出現，有我不時分享嘅「難忘回憶」，係睇「戲院鬼片」《陰容院在》，明明入場得一個人，睇睇吓愈睇愈多人，散場又得我一個人走，到底發生咩事，依家都係個謎。

喺UA黃埔結業後（最後一日我都有特登去影相，配圖就係果日影），另一個主場就變咗UA朗豪坊同UA Megabox。朗豪坊因為就腳真係冇得講，記憶最深係開幕初期播《功夫》，雖然六個院開五個院播，條隊由戲院排到落下一層條樓梯，足足排咗我個半鐘先買到。UA Megabox就正正係因為佢引入香港第一間IMAX。第一套睇嘅IMAX，都係第一套香港上映嘅IMAX電影，係《哈利波特：鳳凰會的密令》，當時仲係70mm IMAX，第一次睇清到連毛孔都睇到嘅震撼體驗，一生難忘，果時都掀起咗一陣熱潮，預售要買到成個月後先睇到。

因此，更癲就到隔年嘅《蝙蝠俠：黑夜之神》，當時預售一個月，我喺戲院開門冇15分鐘去撲飛，IMAX已經要坐到勁側。作為電影史上第一套IMAX拍攝電影，70mm IMAX配以開場果幕打劫銀行，堅係睇到有離心力，舊年包場睇返Laser IMAX，已經冇70mm種震撼力，而果期UA Megabox有做好多IMAX紀錄片，我全部都有睇，亦係早期嘅IMAX集體回憶。UA Megabox唔好睇佢好似奇奇怪怪咁，曾經都做過《死亡筆記：L的最後23天》首映，當時我真係仆去睇福田麻由子架，但相信搞首映，都係奇怪，之後好似就冇了。

其後，到UA Isquare同UA Airport開，一套《阿凡達》，有咩回憶，大家可以自行補上了。或者喺度可以加多間UA Cine Moko，突破你嘅想像，原來，IMAX可以細到咁。

至於其他消失回憶仲有UA東薈城－－唔係新果間，係舊果間。其實舊果間唔差，當年喺迪士尼做Part-time，如果返早更放工都會去睇，貪佢人唔多，戲院又夠大，早期樓下仲有個超平嘅自助餐。

仲記唔記得UA時代廣場－－都唔係新果間，係舊果間，我成日懷疑坐第一行隻腳係咪可以貼住個銀幕。對UA時代廣場最深印象，多數都係電影節，唔知點解，感覺總係好焗。

又有一間UA皇室－－亦唔係新果間，係舊果間，我指，未係變得細到唔知想點果間，當時1院好大，抬頭仲有滿天星，雖然唔係睇過好多次，但每一次都覺得好靚。人生第一次同女仔睇戲，就係喺UA皇室，果時你覺得自己好似係「人生勝利組」，依家諗返得啖笑。

唔理未來邊個食咗佢都好，多謝你俾咗咁多個光影夢我、帶我感受人生第一場IMAX，同屋企人睇同朋友睇同鍾意嘅人睇，更多係無數次一個人睇嘅回憶，成就咗我人生好多個或好或差嘅回憶，都成就咗今日變成影迷嘅我。

無論最後係邊間食咗佢都好，UA呢個名，我永遠都唔會忘記。

如果睇到呢度嘅你，有咩UA回憶，歡迎補上。果啲咩換分換飛會員點算好嘅恩恩怨怨，就唔好喺度講喇。

當你成日聽到有班老屎忽高官喺度講咩「大家忍一忍、堅守社交距離，疫情好快可以過」乜乜柒柒時，呢啲唔係阿Q精神，真係離地萬丈。

各UA院線相關文章可看留言連結。

‼️電影網店全新貨品已上架，低至$5起，快啲嚟搶購啦：https://bit.ly/3qLPkpk

【Patreon加強版】尊享優惠、更多深度獨家電影文章：https://www.patreon.com/travelerwithmovie

📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://bit.ly/3a9wOzy
或使用Payme link：https://payme.hsbc/jackyhei
或透過Paypal捐款：paypal.me/jackyhei

【MeWe請Follow】mewe.com/p/travelerwithmovie
【IG請follow】www.instagram.com/travelerwithmovie

🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu