阿公講鬼【遊地府】(中) . .全家人開開心心食完飯，摸住個肚睇緊電視，就畀阿公一句嚇到所有人望向門口… . .頭先啟華入嚟，阿公明明閂返好度門，但而家度木門打開咗，個鐵閳猛咁郁，好似有人用力搖佢咁。 .「唔使驚，佢入唔到嚟。你哋全部入房先，藍橙你幫手睇住啟華，佢有咩事即刻話我聽。」阿公。 . .「好啊，我都想睇。」反正我想食花生，有阿公喺大廳，我梗係唔驚。 . .阿公即場寫咗幾道符，就走埋去向住門口大喝一聲：「妳想點啊？係咪想拉埋佢落去陪妳？」 . .鐵閳搖得愈來愈勁，仲好似有人拍打鐵閳咁『砰砰砰砰』聲。 . .「師傅，點、點啊…？」啟華。 .「佢就係你喺見到嘅飛蛾人，你遊地獄時佢附咗上你度，但係佢個口畀鬼差封實咗，講唔到嘢…但有啲奇怪，若果佢死嘅時候有心願未了，應該落唔到地府排隊投胎…」 . .阿公嘆一口氣，坐咗喺佢平時最鍾意坐嘅古董木凳，雙手平放喺椅柄，成個人放鬆晒咁挨喺椅上。 .. .「阿公，佢會唔會拆咗道鐵閳入嚟㗎？」 .「唔會，我帶佢返落去，順便搵朋友問一問情況。」阿公口中唸唸有詞，好似訓著咗咁郁都唔郁。 . .果然，隔咗一陣度閳真係無再搖，我仲見到有一道白光喺走廊好快速咁飆走。 . .阿公又訓咗喺度，見悶悶哋，我就好奇咁問啟華，如果個女仔真係佢前世老婆，咁佢會點？ . .「我邊理得上一世咁多事啫，佢咁樣搞住我，我以後仲要結婚㗎！」啟華。 .「咁又係，咁你有咩打算？」 .「咁咪叫師傅搞掂佢囉…」 .「但佢又無害你。」 .「你都見啦，隻女鬼周圍走，我搬屋都無用啊…唔通畀佢跟住一世咩！」 . .見到啟華全身冒冷汗，我有衝動沖杯香爐灰水畀佢飲，但就喺呢個時候，阿公突然咳咗兩聲就醒咗。 . .阿公起身行入廚房，用個化寶盤燒咗一大疊金銀衣紙，佢話係用嚟畀鬼差嘅。 . .「師傅，點啊？」啟華問。 .「嗱，而家有兩個選擇畀你揀，第一，畀佢留喺屋企…」 .「吓？！點得啊？」 .「你聽埋我講先，如果你接受唔到，我可以幫你打散佢，呢個女仔就永遠喺你輪迴圈度消失。」 . .見啟華有啲猶疑，阿公繼續講。 . .「我問過鬼差，呢個女仔都幾慘，你可以聽完我講先再決定…」 . .原來，啟華上世係一個被派嚟香港嘅英軍，亦因為咁而結識咗個女仔。當年，無人相信日本夠膽攻打香港，但估唔到日本以好快速度就由深圳打落新界、九龍… . .啟華被派去幫手守住港島區最後防線，當時英軍寡不敵眾，加上通訊不良，啟華所屬小隊收唔到總部投降同撤退嘅消息，一直死守，最後被日本軍隊圍攻之下殺死。 . .而打敗仗嘅香港，就被日本統治咗三年八個月。當時香港人糧食短缺，慘到食樹皮食人嘅屍體，有少少錢嘅就搭火車返鄉下，無錢都咬緊牙關徒步逃離香港。 . .而呢個女仔唔理全家人勸告，誓要留喺香港，因為佢相信啟華會返嚟搵佢。 . .結果呢個女仔下場係點？女仔無依無靠，好快就被日軍捉咗去做「慰安婦」，好多婦女入到去捱唔夠一陣就會自殺，因為實在太唔人道… . .但呢個女仔一直都堅忍住，直到最後都被日本軍折磨至死。 . .鬼差話，個女仔落到地府之後，先發現原來啟華一早就投咗胎，但佢又無辦法返上人間，於是就只可以喺地府不斷受苦。亦因為佢同家人失去聯絡，根本無人燒嘢畀佢，於是個女仔經常受到鬼差欺負，直至時間耐咗，情況先好轉。 . .所以…當個女仔知道啟華有女朋友，就附身落隻飛蛾度想見佢。不過啟華就誤以為隻飛蛾係佢母親，仲專登遊地獄搵佢…個女仔梗係跟埋佢上人間唔肯離開啦。 . .「其實個女仔唔係想害你，佢只係想睇住你結婚，想關心你啫。咁你仲打唔打散佢？」阿公。 . .「但係…好恐怖喎…我點同女朋友講，有個前世嘅老婆喺我屋企長住啫，仲有冇其他方法啊？」 . .「一係咁，你可以幫佢設個靈位，每日上香畀佢，指定日子就燒啲嘢畀佢，開飯時喺靈位前加對筷子，飯餸留一份畀佢。咁佢喺地獄都會過得好啲。」 . .「即係養鬼仔啊？」啟華。 .「其實同你屋企拜祖先一樣，佢都會保佑你全家平安。」 .「咁…都好嘅。」 .「但有一個條件！就係你要同我落一落地府，同個女仔解釋清楚…因為個女仔咁急上嚟搵你，其實仲有一個原因…」 . .「咩原因？」 .「你今世個女朋友，就係上世殺死你嘅日本士兵！所以佢對你女朋友仲有恨意！」 . （待續）