收到一啲有睇我story嘅朋友DM，而家一次過答大家先；係呀，我加入咗Nike嘅Pacer team。 諗番年幾之前，疫情嚴重，球場封框，冇波打又想保持番個運動量，就惟有喺屋企附近跑下步。有人話跑步會上癮，原來係真嘅。由最初求其立亂跑，到會自己主動睇下人哋嘅訓練方法；由認為郁下跑十幾公里悶死人，到跑下跑下跑到唔想停。安多芬嘅釋放令我想繼續向前，NRC app嘅每周每月目標令我要跑夠數先至安心；到有幸獲邀加入Nike嘅配速員團隊，有機會接受專業教練嘅指導，成件事就更加好玩。 其實到而家，我都仲係跑得唔好；慢又唔夠慢，快又快唔到。但係Pacer嘅目標就係保持均速，責任係為一眾跑友提供指標，幫佢哋喺自己嘅目標時間內完成比賽。如果可以成功做到呢件事，我覺得仲開心過破自己PB。 能夠喺自己鍾意嘅範疇影響到其他人，係一件非常有意義嘅事；運動，從來就係互相砥礪，互相支持。平時自己跑步嘅紀錄喺晒story，有人話睇咗我嘅 #亂世之中保持強健體魄 系列之後會鼓勵到佢去跑步做運動，呢樣嘢，真係好開心。 渣馬仲有兩個月左右就舉行。非常時期之下，今屆比賽有好多變數，可能未必人人有機會參加；又有人問嘞，如果今次落唔到場，咁加入Pacer team、keep住跑步又有咩意思呢？ 我反而唔係咁睇。因為 — — 你唔係為咗參加比賽而開始跑步，而係因為開始咗跑步，想挑戰下自己而去參加比賽。 而比賽，從來唔止得一個。 我加入Pacer team嘅宗旨，亦都一樣。今次未必全世界落到場，但之後嘅比賽，仲有好多；只要有需要，我哋嘅團隊一樣樂意服務各位跑友。況且除咗之後嘅比賽之外，今屆渣馬仲有Virtual run，如果換個方式，同一班因為種種原因落唔到場嘅朋友一齊玩Virtual run，好似都唔錯呀。(暫時仲係個構思，有意見嘅話不妨提出) 做運動，開闊眼界。將眼界開闊啲，今次嘅比賽，落唔落到場都好，試下將佢當成一個起點，而唔係終站；最緊要係，無論有冇比賽都好，Keep running！ 共勉💪🏻 #NikePacerTeam #NRC #NikeRunning #NikeHKG