《砂之器》編曲解構 完成《狂人日記》之後，其實已經有咗第三部曲嘅Demo，又由於我自己嘅執著，定下咗今年三部都要首尾呼應（係，完全冇問過小克 @diuhak 同阿Jer @jeremylaous 😅）喺諸多限制下，全世界只有自己肯同自己玩呢個遊戲啦⋯⋯ 第二部曲我覺得係要一首「浪漫」嘅歌去中和第一部曲嘅狂，而又可帶落第三部曲嘅XXX，而母子之間嘅愛係一早（二月底）大家已經共識咗嘅題目；花咗大概兩個月嘅時間去寫，都唔知寫咗幾多個版本🤯⋯⋯終於喺五月頭寫好，不過正值Mirror開show，所以冇通知阿Jer（因為佢實分心😏）我尾場喺後台只係問佢「你聽日有咩做？」，然後5月12號就send畀大家聽。 第一句「風 起 了」，如小克所講係緊接上一部曲最尾嘅「狂～～」，不過其實重有一個細節令我用呢三個音 - 3 2 1 （me re do），因為「狂」係 6 1 2 （la do re）所以加埋就係類似一個迴環 (嗱-到-喂-Me-喂-到）純屬自己個人貪靚⋯🤓當然陸續有嚟，成首歌最尾嗰三粒音「愛 永 久」係倒返轉嗰三個音，用上 1 2 3 （do re me）重未止，中間又嚟 -「重投入」1 2 3 對 「這萬年」 3 2 1。 編曲方面，主要都係想營造BB喺子宮內羊水中嘅環境，所以有啲朋友問有個好似「上鍊」嘅聲喺第二段verse度出現係想表達乜嘢？我嘅設計係好似一啲養份由媽媽經過臍帶輸送到BB體內同埋好似係母子之間嘅一啲用嚟溝通嘅密碼。 有追開「物語系列」嘅朋友應該會發現一開始已經有《風靈物語》嘅風同風鈴聲，再到副歌部分就有《狂人日記》嘅synth pad同《迴光物語》嘅synth lead。唱到「因果的樞紐」有一吓水滴聲，亦都係子宮內嘅聲音。隨後用鋼琴簡單地彈出一段搖籃曲來作一個比較溫馨嘅氣氛，然後又由major key轉入minor key的2nd verse。 進入第二次副歌時，鼓及弦樂加入推進預備進入bridge嘅高潮，呢段其實我係引用返《風靈》嗰段bridge嘅format去寫，想再一次帶出「輪迴」嘅感覺，我第一次睇到呢一段歌詞係好感動，而且立刻visualise到個music break要做乜！ 一個媽媽輕輕撫摸著肚皮，柔柔地哼著搖籃曲，安慰著肚裡嘅BB⋯⋯呢一個係我見過最美麗嘅畫面 （多謝太太😘）；而BB喺溫暖嘅羊水中隱約聽見媽媽歌聲嘅迴音、殘響，跟住好安樂地預備出生。「漆黑中 只有愛可衝破 漏光的缺口」 最後嘅一次副歌首先breakdown，係經歷瘋狂陣痛（music break）後，BB終於出世，整個世界就喺嗰一刻凝住了⋯ 再到「成長自立後⋯」呢個位，我偷偷彈咗Twinkle Twinkle little star入去，點知好多人都聽到😅 好嘢！👍🏻 與此同時跟《狂》一樣，我都加入orchestra嘅元素入去，woodwinds喺呢個時候就同strings一齊合奏將個氣氛再推高啲（呢段歌詞真係唔能夠辜負）！最後所有樂器停止，只剩低幽幽的鋼琴帶出最後兩句歌詞：「歡笑 可篩走 寛恕 篩不走 説聲對不起 讓愛 永久」 Outro我特登留著弦樂樂手們嘅呼吸聲，我自己覺得係音樂嘅一部分，唔需要Over polish。 另外有一樣想分享係，阿Jer唱嘅所有harmony都係本身曲嘅一部分，有別於一般只是「和音」嘅處理方法。每一個聲部就代表不同嘅轉世，所以特意寫得音域比較高，營造比較女性化嘅感覺。 大概就係咁，希望冇乜漏。😎 P.S. 有一個人一定要多謝，以上講嘅嘢係要靠佢 @frankiehung_fkh 最後嘅混音先可以做到個層次！BTW阿Jer一路以嚟嘅所有歌都係佢Mix嘅👏🏻 #砂之器 #重生系列第二生 #柳應廷 #說聲對不起讓愛永久 #人哋三個鐘編一首歌 #我三個鐘揀一個聲 #學海無涯 #好耐冇寫咁多字 #hongkongmusic #hongkongmusicians #hongkongcomposers #hongkongarranger #hongkongmusicproducer #

輕談淺唱不夜天今晚同大家講吓《砂之器》嘅緣起及創作過程。 自從前年寫《是但求其愛》開始，鍾意諗返每件事嘅源頭，點解我會寫到呢首歌？有乜嘢驅使我去寫呢首歌？就會自然追溯到幾日前、幾個月前，甚至幾年前。類似佛家的「緣起法」，諗吓諗吓你會明白，原來一件作品，係無數因緣和合而成，真係一切都是緣份，當中因果難分。 《砂之器》嘅「今生情侶，下世母子」呢條主線，除咗由細到大中國人講嘅「無仇不成父子」、「女兒是你前生情人」之類「討債」式論述，仲有幾年前睇咗一本對我好重要嘅書——《靈魂的出生前計劃》，裡面有一章講「流產」，我實在太鍾意呢一章（詳見拙作《偽科7》p.128，如果你有興趣），一直想放落歌詞，都放咗一段仔落周仔嘅《夜空的呼喚》，但首歌佢未消化到所以無唱，咁咪再等囉無所謂，不過都知好難有監製肯放手俾我寫呢樣嘢。（後補：有網友提醒，原來我在陳慧敏 @chan_wai_man 的《沉默之間》最後一段也寫過。係喎！我自己都唔記得咗！😅） 去到今年年頭，《樂壇已死》派台，某記者致電訪問，剛巧那晚我正開始寫重生第一部曲。訪問後該記者DM我，說多謝我寫的《四季》，陪她媽媽走上最後一段路。我除咗「節哀」之外都唔知講乜好，但就受她的message影響，突然諗番起《靈魂的出生前計劃》那故事，於是自作主張當晚寫了份初稿（當時連名也未有，暫名《搖籃物語》），就是一份關於「今生情侶，下世母子」的詞。翌日阿Jer覺得份詞太深亦非他想要嘅嘢，於是再改寫成後來的《狂人日記》。 然後，來到五月，開始構思第二部曲。Jer發來短訊，話要寫《零極限》頭兩式「對不起，請原諒我」（《零極限》係一本知名身心靈叢書，時間關係自己google，如果有興趣），咦？briefing就係咁？平時佢會send好多相加千字文過嚟㗎喎？因為當時他剛完成Mirror演唱會得番半條人命，無電再send相了。咁我就打蛇隨棍上，問佢好唔好用番上次《狂人》份棄稿的題材，去講「對不起，請原諒我」？佢話可以，咁我就嗱嗱淋趁佢病攞佢命，盡快爆seed寫成《砂之器》（不過都典咗三晚，首歌太Q難寫，加上我哋個黐線王姓監製堅持此曲第一句一定要連住上一曲《狂人日記》的最尾一隻字「狂~~~」！喂淨係呢句「（狂）風起了」都諗咗我半日啦）！ 寫詞中途，在YouTube發現有位叫Tommy Sir的仁兄以純佛學角度去分析《狂人日記》，兼預測第二部曲走向（都係嗰句，自己search，如果有興趣）！好精闢！當中提到「宿命論」與「自由意志」的對立，我才如夢初醒：係喎！其實可以把這種對生命的struggle延續到這段母子關係裡，首歌會更豐富！亦因為「宿命」兩字，咁啱撞正我寫到結尾「沙漏」兩字，神奇的火花點燃起了！突然想起松本清張！砂，之，器！這部經典小說的主旨正正就是「宿命」（書好睇，雖然好厚，但74年那部改編電影更精彩！竟然把書中主角那首《宿命》piano concerto，四十多分鐘的樂章，原原本本放在電影最後四十五分鐘的montage！你有無睇過一部戲最後係長達四十多分鐘嘅MV而極少對白？野村芳太郎導演，橋本忍、山田洋次編劇，again，自己google，如有興趣）！ 係，終於寫到！但，係，我自己都覺得好深，但又好鍾意。見交詞後三日團隊都無人feedback，暗自擔心今次能否懷孕成功。因為望子心切，遂於三日後在group中發了一句「嗱呢份詞如果唔收會絕交！」，聽聞嚇到阿Jer面青，其實佢應該係忙到癲根本無時間睇詞，Sorry囉！ 我最想講，人越大我越唔信一件作品係純粹關自己事，所有前因起點、時間醞釀、所有當中出現來幫忙成事的人事物，因緣和合地成就一首歌，都要逐一感謝：《靈魂的出生前計劃》、《樂壇已死》、周仔、喪母記者、《四季》、Tommy Sir、松本清張、花姐、條Jer、Carl叔，Sheng導，甚至唱Demo的吳林峰（其實仲有身陷囹圄的兩個人、其中一個叫張可森，也是個填詞人，他寫了篇樂評，看穿我在《狂》開始沒有用上「我」為第一身，係，今年三首我想抽離少少去看輪迴這回事，《砂》中唯一一個「我」字屬Quotation，唔係Narration，可惜那文章已消失了⋯⋯），都各自有其崗位及作用，我只是神派來把文字盡量啱音地寫出來的其中一個角色，而已。緣份千絲萬縷，我們其實活在一張意識巨網之中，所有東西都相連互通（又介紹一本書叫《無量之網》The Divine Matrix，講呢樣嘢講得好好，google it，誠推）。 無嘢了，眼瞓。聽聞好多人睇完MV爆喊，好事來的！把情緒釋放出來吧，然後再努力築起下一個砂之器，一起對抗所有宿命。多謝大家喜歡這歌。Night~ #砂之器