行過灣仔188見到呢張龍虎門海報，細個啲回憶返晒嚟。

我係讀荃灣信義小學，隔籬有個象山村商場，當年啲街市百業興旺，買報紙去報攤唔去便利店。唔知點解，讀小學嘅我已經睇本土漫畫，會去象山村個報攤買龍虎門，不過我太細個喇，唔敢畀人知，一來係仲有另一本刊物用「龍虎」兩個字行頭，講出嚟怕人誤會，二來如果阿媽知我唔讀書而走去睇漫畫，後果不敢想像。

其實我睇呢本漫畫嗰陣已經唔知出到第幾百期，識好多中文字同埋成語都係靠佢，有次小學作文要用「高空擲物」做主題，我寫咗句：「如果隨意將雜物從大廈的窗戶擲下，除了是自私的行為之外，也可能會導致人命傷亡，令事情陷入萬劫不復的地步。」

好記得中文阿Sir畀咗我全班最高分，從眼神睇得出佢當我係天才作家，當眾表揚之餘，又叫我解釋畀同學仔知道咩叫萬劫不復，然後我：「……」

阿Sir：「講啦！講畀大家聽。」

我：「……唔……」

阿Sir嘅眼神、語氣，同埋表情，就好似啲醫生叫大肚婆：「大力啲啦，見到個頭喇，再大力啲，深呼吸！」

不過我最後都係答：「……唔知道。」

阿Sir個樣好失望，佢一定以為我搵屋企人代筆，其實件事唔係咁架！當時我好細個，唔知點樣有條理地解釋「萬劫不復」，我係睇龍虎門學，有一期王小龍死咗，王小虎、石黑龍同埋光頭星成班人好痛苦，但係已經萬劫不復喇！即係死咗人、大鑊、大單嘢，我知點運用同埋幾時用，只係唔想畀人知我睇龍虎門咋！

當時仲收埋一疊龍虎門喺屋企床下底，千算萬算，算漏咗我有個二五仔細佬，可能佢有英勇勳章攞啩，竟然走去報串，嗰陣阿媽嬲到噴火：「你睇啲咩呀？龍虎…」

我搶答：「門。」

結果成疊龍虎門就咁冇晒，我永遠記住你呀細佬！而後來我仲發覺，每個人屋企啲細佬妹都係好鍾意報串。

睇漫畫啫！點解要迫到我走投無路呀！不過人就係咁奇怪，大個咗有自由反而冇再睇漫畫，只係見到龍虎門嘅嘢會勾起回憶，所以188商場張海報我望咗好耐，究竟賣乜呢？原來係game，出版50週年……嗱！我上文講咗「其實我睇呢本漫畫嗰陣已經唔知出到第幾百期」，我唔係50年前第一期睇㗎，頭100期未改名，本書係叫小流氓，我仲未出世㗎！

如果當年已經有手機遊戲玩，click下面啲link就下載到，我咪唔使偷偷摸摸，畀阿媽丟晒啲書囉！

【正牌龍虎門】
👉下載：http://s.gameone.com/P0sHpvB

#龍虎門 #香港 #台灣 #新加坡 #馬來西亞 #澳門 #龍虎門五十年港漫精神 #儆惡懲奸 #黃玉郎 #趙汝德 #邱福龍 #張萬有 #小流氓 #行俠仗義