【龔成問答信箱】（Q22661-Q22680）

Q22661：

你好襲成老師，最近941中移動宣布派息，我本身早兩個月開始月供股票，但又未供足整股，

想問問我會唔會收到佢既派息之類？同麻我想收到佢派息要係幾時前買入佢股票！謝謝

龔成老師︰

只要你係「除淨日」那天之前，持有相關股票，就可以收到是次股息。

以你持有中移動(0941)，只要你在除淨日前的收市日，依然持有，就可以分到股息。

至於有多少，就視乎所當天收市，你所持有股數。未供足整整1手，係無影響，都會有得收股息。因為派息係持「股」數，而非持「手」數計。

每股會有HKD1.63股息，假設你持有10股，就會收到HKD16.3。但由於銀行或證券行，可能會收取苦干費用，故實際到你戶口的金額，有機會比HKD16.3少。

而「除淨日」那天，股價就會扣除派息部份，例如原來股價$10，派息$1。但這天你依然未會收到股息。

------------------------------------------------

Q22662：

我係進階班學生，有事想請教，大行報告「维持“买入”和目标价 34 港币，潜在上行空间为24%

我们维持 2021/2022 年非 GAAP 口径 EPS 预测人民币 0.75/0.95 元。我们 维持“买入”评级和并使用 SOTP 方法得到目标价 34.0 港币，

对应 38.9 倍 2021 年 PE，潜在上行空间为 27%(2021 年 8 月 12 日收盘价)。

我们预计 2021E/2022E/2023E 年 EPS 分别为 RMB0.75/0.95/1.09，维持“买入”评级和目标价 34.0 港币。」

呢3個資料點樣得出目標價34蚊啊？

龔成老師︰

其實大行唔係單憑這3個資料，去得出目標價HKD34。

佢地係因應小米(1810)不同分部特性，再利用相關應估值方法，去計算出各分部各自市值和每股價值。

在加總後，再給預一個折讓比重，從而計出每股目標價為HKD34。詳細係用左什麼估值法，你要睇翻份報告先知。(如果唔記得點去分析，你可以睇翻我，進階班第8堂教的內容)

而2021-23年的每股盈利，係純粹一個估算得出的主觀的數字。

記住，我地係決定用唔用而D數字時，必先要確定相關估算，是否合理。佢這3年的每股盈利預算，都偏向合理。

但每估價值去到HKD34，我就有少少保留，因為這樣的話，佢2021年市盈率去到分別38倍，唔算好平。我會保守少少，預佢市盈率約為25-30倍，即現時大約係合理區頂位，會較為穏妥。

------------------------------------------------

Q22663：

龔sir 想問下買德福花園（舊，但係有四百幾尺，實用），定係將軍澳嘅新寶城（新，唔夠400呎），投資價值較高。

龔成老師︰

從投資角度計，論位置、交通、生活配套、物業大小等。整體而言，會係德福較好。而且係大型屋苑，都係加分地方。

但將軍澳不是無可取地方，因為佢樓齡始終較新，而且將來將軍澳至藍田隧道完成，會令佢同東九商區進一步拉近，都會提升佢物業價值。

所以，好難話邊個投資價值，會係明顯高一班。

如果你係用來自住，可以考慮埋生活上因素，去再作決定。

如果係投資，現時租金回報率唔算高，其實投資優質股，反而值博率會更好。

------------------------------------------------

Q22664：

想問下3339中國龍工及3380龍光集團值得長線當收息股嗎？

龔成老師︰

中國龍工（3339）主要業務為製造及分銷輪式裝載機、壓路機、挖掘機、起重叉車及其他基建機器。佢的產品有出口至俄羅斯、中東、澳大利亞及非洲等地。

雖然近年生意不差，但以過去5年計，生意與盈利都有波動情況，這點不得不注意。而企業的賺錢能力算是中等。

以企業的質素來計只屬中等，現時不貴，股息率都算吸引，但業務波動是風險，因此投資不能大注。但長線基本上可以的。

龍光集團（3380）都有質素的。

佢係中國一家於粵港澳大灣區住宅市場的一體化物業發展商，並發展長三角核心都市圈及西南、中部城市等區域。

主要於中國從事物業開發、物業投資、建築及裝飾以及一級土地開發：物業發展分部開發、物業租賃分部、建築及裝飾等。

過往業務發展不差，生意與盈利都有增長，不過負債就少少高，略有風險。這股都有長線投資價值，現價合理區中間位。

你用來收息都可以，但行業性質令佢會較波動，如果物業發展收入減少，有機會影響到派息，故不建議太大注碼。

------------------------------------------------

Q22665：

阿Sir, 你好.我想請教下, 如何選擇收息股, 手上有10萬... 因為想安排退休之後仍然有糧出. 十分感謝

如果想每月有大約8-1.5萬收息, 要多少資金及選擇什麼股票投資? 再次感謝

龔成老師︰

你可以考慮目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

(你可睇下我本《50穩健收息股》當中仲有好多)

現時大市在合理區，你可以先用一半資金，分注買入上述收息股。餘下一半，等大跌市才動用。

如果你希望退休時，每月有0.8-1.5萬蚊現金流，以股息率6%計，你需要本金160-300萬。

若你現在無這筆資金，你就用我之前講的平穏增長股和潛力股，去累積這筆資金，為退休作準備。

------------------------------------------------

Q22666：

感謝大師您的指點。但由於恒指最近呢次插水，經濟環境不好手持蟹貨又多，個人都是節衣縮食。如大市能比較有力反彈，

港澳經濟又回復正常流動，我都想親身向老師請教請教。那麼大師對大市後市看法如何？是見底了會反彈？還是還有下行空間？thx

龔成老師︰

中短期大市點走，我唔知。

我地投資唔應該用"估走勢"架方法去投資，正確方法應該係去理解企業長線質素和前景，再了解佢處於平定貴，之後去進行資金配置。

現時大市在合理水平﹐但部份潛力股依然係略貴。你可以因應自己現時組合情況，去作出配置。

------------------------------------------------

Q22667：

如果我用以下策略可唔可行：

平穩增長
港鐵 2手
盈富基金 3手
領展 3手
長建 2手

潛力
騰迅 1手
港交所 1 手
安碩恆生科技 4手
GX 中國電動車 1手

平穩：潛力約6:4，總本金約27萬

再月供小米，騰迅及盈富基金

另外，這些股票過往增長率加起來約有幾多？

龔成老師︰

以你28歲年紀計﹐這個組合係可以。而月供部份，建議你用指數基金做主力，因為另外2隻都係潛力股，咁樣會平衡D。

現時大市只在合理區，27萬可先用一半，分注入貨，餘下的就等大跌市。

現時平穏增長股，都在合理區，可以開始入貨。但潛力股只係合理區頂，暫時不要太大注。而當中港交所(0388)更是略貴，要回2,3成才可以開始慢慢儲貨。

你以上組合，長線計你預年增長約10-12%。但這只是估算，而且你潛力股較多，不確定性較大，最終你都要睇大市情況。

------------------------------------------------

Q22668：

龔sir，我之前買入的2137騰盛博藥，買了三手，20蚊買，今日升左超多⋯雖然升很多，但我又有少少擔心，怕它會跌很多⋯唔知仲揸唔揸好…

我見佢D信息佢嘅 研發的新冠中和抗體有很好的數據，好似好有前景咁，求你的建議

龔成老師︰

騰盛博藥（2137）屬有危有機類。

佢主要從事生物製藥業務，專注於研發傳染病療法。候選藥物產品管線例如有ＢＲＩＩ－１７９（ＶＢＩ－２６０１）及ＢＲＩＩ－８３５（ＶＩＲ－２２１８）：授權引進候選藥物（其中ＢＲＩＩ－１７９為核心產品），許可範圍為大中華區（中國內地、香港、澳門及台灣）。

用於開發ＨＢＶ（乙肝病毒）的功能性治癒，已在中國內地、香港、新西蘭、澳大利亞、泰國及韓國完成ＢＲＩＩ－１７９的１ｂ／２ａ期臨床研究，及正在中國開展ＢＲＩＩ－８３５的２期臨床研究。

這類股較難分析，因為要了解藥品將來的價值，以及市場情況。

佢一定會有好多研究，但你要明白由研發到場化，係要好幾年時間，而且當中有好多不確定因素，例如研發失敗、不能成功申請藥物上市等。

只可以話有危有機，這股不建議大注。若佢佔你組合較多，而你有已有不少獲利，可以考慮沽少少，去平衡風險。

------------------------------------------------

Q22669：

老師，請問對00267中信有何睇法？是否歸納為水桶2？是否有投資價值？

龔成老師︰

中信股份（0267）係綜合企業，有多項業務：

（１）金融業分部提供銀行、信託、資產管理、證券和保險等服務。

（２）製造業分部從事生產和銷售特殊鋼、重型機械及鋁輪轂等。

（３）資源能業源分部從事原油、煤炭和鐵礦石在內的資源及能源產品的開採、加工及貿易等業務。

（４）工程承包分部為基礎設施、房地產和工業項目等提供承包和設計服務。

（５）房地產業在中國內地主要從事綜合體和商業地產項目的開發和管理以及城市更新和發展業務。

雖然業務多，但不算做得好好，每項業務的發展力都不強，整體質素只是一般。

現時股價有合理區中下部，投資價值不是無，但這股增長力始終一般。此股算係水桶1至2的股票，主要都係收息，對股價唔好有太大期望。

------------------------------------------------

Q22670：

想問「海底撈」同「雅生活服務」？6862有貨，但唔多。麻煩晒！

如果要估值，呢兩隻應該用什麼估值方法

龔成老師︰

海底撈（6862）正本質是不差的，長遠仍會正面，不過中短期會弱。

第一，管理層有講過，之前市場對佢地公司過度樂觀，估值偏高。第二，管理層話公司面對中國的市道，其實業務不是一直都好的。

加上這股之前貴，相信中短期股價仍一般。

不過以長遠來說，這股仍有質素的，佢以「海底撈」品牌經營火鍋店及外賣業務，火鍋菜單由鍋底、醬汁蘸料以及在鍋底烹飪的食材三個主要部分組成，可點單鍋、鴛鴦或四宮格鍋底組合，餐廳提供多種調料及食材，以及供應小吃、酒和飲品。

在中國有好多分店，以及外國都有。

有規模，有品牌，整體正面。相信長遠仍有發展的。

不過，這股市場之前比佢好高估值，就算近期回落，最多只能稱為合理區頂，一定未平。你有貨可長線，但暫時只建議小注，股價始終波動。

雅生活服務（3319）不錯的，佢無論在業務本質、規模、品牌、財務數據、前景，都是理想的，反映這企業有一定的質素。

加上這企業的背景因素，以及行業的發展，相信這企業的前景不差，有長線投資的價值。

整體是有長線投資價值的。現價合理，不過股價都會有時出現波動，投資宜分注進行。

這2隻，由於都有一定增長力，我建議你用翻市盈率比較法，會較好。

但雅生活服務（3319）和其他物管股，好多上市時間都唔長，你基本上唔會找到一個有意義的行業市盈率。

因此，我地只能憑佢業務性質，去大致估算市盈率區間，你預大約15-20倍。

而海底撈（6862）都有類似情況，但佢相對增長潛力會較高，你預25-30倍左右。但計算每股盈利時，最好參考早一年，因為疫情令本年數字代表性弱左，你參考2019年會較好。

------------------------------------------------

Q22671：

老師，小米 合理價 幾多點？

金沙中國 但唔怕政治 影響

龔成老師：

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價合理區頂位至略貴，小注分注可以，但唔好入得太急，預佢股價仍波動。回多10%更有投資值博率。
金沙（1928）長遠仍有質素的。政治因素有少少，但風險度唔算高，我相信佢好大機會取得賭牌。

佢中短期會弱，加上全球疫情反覆，都對佢有不利影響，不過，相信這只是中短期，以長遠的角度分析，企業仍是有質素的。

在正常的經營環境分析，佢持有的資產好有質素，行業本身好賺，雖然疫情略有反覆，但全球疫情最壞的情況，相信已過。佢長遠是收息及平穩增長型。

但由於仍有未知數，加上之前虧損，因此將企業估值調低左。

現水平在大約在合理區中下部分，如果本身有貨，可長線，耐心持有就得，如果無貨，現價已經可以分注，但都要留現金。投資貨要有心理準備，中短期會弱，要長線，企業有長線投資的價值。

------------------------------------------------

Q22672：

龔 Sir 早晨 麻煩幫我分析吓組合啱唔啱？

我是一位單親媽媽48歲 獨力養14歲兒子 沒有任何贍養費 公務員月入4萬 現時每月儲一萬現金 月供股票一萬 現時現金有18萬 股票如下 :

水桶一 :
788 有10000股($1.48)
1211 有500股($210)
1448 有4000股($8.11)
1810 有1288股($23.14) 月供$1000
9988 有100股($258.6)

水桶二 :
2800 有3543股($28.19)月供$2000(之前$5000)
9月起會新加如下月供 :
66 將會月供$1000(幫兒子儲)
823 將會月供$5000

水桶三 :
1310有2000股($12.76)
1398有668股($4.49)月供$1000
2638有2000股($7.83)

現在已上了8月班第一堂 希望阿Sir比D意見我 計劃52歲退休 退休金約200萬 每月領$13000長俸 麻煩晒

目標4年後有多200萬 現時住公屋

水桶一係咪太多？

龔成老師︰

你水桶1的確係偏多，佔左你組合一半以上。以你48歲年紀，水桶1大約佔組合3成好了。

但由這些股票都有質素，你唔洗沽出，只需要用未來新資金，投資一些平穏增長股和收息股，令個組合回復平衡，咁就可以了。

至於月供方面，選股和策略(一半供、一半儲蓄)係無問題。但資金分配上，我唔建議集中係領展(0823)，佢雖然有質素，但始終係單一企業，分散風險能力較弱，你用翻盈富(2800)做主力，會較為穏當。

另外，由於於尚有4年就退休，潛力股就不要再加注，時間短，會令個風險太大。另外，平穏增長股和收息股比重，大約各一半。

餘下18萬現金，你就等大跌市機會，才出手入貨。

而且，當你愈接近退休之年，收息股佔組合比重，就應更多，到退休時，應100%持有收息股。故你要在做月供同時，慢慢調整組合持股，為退休做準備。

我假設投資回報有7%（連股息再投資），你每月投資$20000 + 現有資產約70萬(持股和現金)，4年後大約會增值至190-200萬，故這樣安排相信很大機會達至你的財務目標。

再加上你退休金200萬，將這些資金投放入收息資產，以6%息率計，每月大約可以創造現金流2萬。你可以以此作參考，調整你計劃。

但當然，你唔需要太急於去動手，投資係一個長線配置，你先上完堂，有個完整概念才開始，會更好。

------------------------------------------------

Q22673：

龔Sir，你好~ 有幸在疫情初期認識你，參照你的建議購買了以下是從現有的投資組合：

175 33.45@1000
788 1.52@10000
1211 34.2@500
2388 23.75@3000
2800 24.67@4500
9988 205@200
1928 26.2@400

上述的股票我打算長綫持有，唯一擔心的是175是否應該放？還有9988是否應該增持？以我現在的投資組合，下一步買的股票應該考慮哪個行業？博彩？醫藥？

另外，也想請教你人生規劃的意見，本人今年33歲，女，月入21K，另外有200萬現金做定期，剛置業及未婚，供樓壓力都大（每月大約12k），一直都想增值自己，

但苦無方向，生活就好像比層樓困住自己，請問龔Sir您認為在沒有特別的愛好下，應該怎樣尋找自己的價值呢？

感謝您一直以來不辭勞苦為我們解答問題，感謝！

龔成老師︰

先講你投資部份，以你33歲年紀，應先努力做好財富增值。你現時持有股票，都有質素，係可以長線持有。

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

但現價已經係略貴，現貨可持有，但暫時不要加注。

至於阿里巴巴(9988)近期有較多不明朗因素，雖然長線企業質素，唔算有明顯轉差，但風險係高左，估值上都會有少少調整。

但由於未影響到核心因素，因此你照持有係無問題。由於你本身有貨，要再加注，最好等佢回多少少先。

而定期，本身只係定息產品，無增長力之餘，利息回報都不高。建議你用來投資優質股，效益會更好。

以下股票，都適合你。

除了200萬現金外，如果你每月都儲到錢，建議你都做下月供股票。用月用一半儲蓄做月供，另一半儲起。

大市現處於合理水平，那200萬資金，你可以先用50-80萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

係進行配置時，緊記唔好集中係個部企業或行業。個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

至於如何尋找自己的價值，這個問題其實可以好複雜，而且都無一個特定答案。

如果你而一刻未找到自己興趣，或者人生目標所在。其實唔需要急，只要你多去接觸不同的人和事、睇多D不同書籍，慢慢去開闊視野，自然就會慢慢找到人生目標。

但緊記一點，這個人生價值評分，是你比自己，唔係人地比你。你要分清楚，是你自已的人生目標，還是純粹別人的期待。

只要你好好認真面對自己，一定可以找到專屬於你自己的人生價值，加油!

------------------------------------------------

Q22674：

龔成老師你好。我一直都有閱讀你所寫的書籍。目標是希望可以盡快財務自由，一生三宅，錢滾錢。

現有資產如下：
現金90萬

煤氣(3): 9883股
領展(823): 1369股 (另每月供$4000，股息會選擇以股代息）
長江基建(1038): 500股
小米(1810): 400股
金沙(1928): 800股
盈富(2800): 3018股

阿里巴巴(9988): 100股
巴郡Class B (brk.b): 10股
Snow: 10股
SPY: 11股

灣仔住宅210呎市值$400萬(按揭餘330萬)

打工月入3萬，自己小生意月入2-3萬左右。一個月大概會用1萬2千作家用或日常開支

想短期內（大概2-3年）再購入一個大尺數的住宅，資產上應該如何部署？應否如你書中所說，呢段期間增加股票百分比以分散風險？

我是否應提高月供股票的銀碼以加快速度提高股票比例？以上資產是否可以繼續持有？謝謝老師！

龔成老師︰

若你想累積資產，去購入一個新物業，用以上股票，係適合。

但個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

在創建組合初期，組合金額較少，出現超標都係可以接受。但長線你要參照這指標，去維持組合的平衡性，才算理想。

你現時煤氣(0003)明顯係超標，因此你最好沽少少，換至其他優質股上。

以你收入計，只月供$4000領展(0823)實在太少，建議你用每月儲蓄一半，去做月供，另一半就等大跌市機會。

月供方面，你可以選擇投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。如果有投資美股，可投資VOO。

或潛力股︰安碩恒生科技(3067)、比亞迪(1211)、中生(1177)、福壽園(1448)、小米(1810)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。如果有投資美股，可投資QQQ。

但潛力股波動性較高，而你預期會在2-3年會動用這筆錢的話，由於時間不長，建議集中係平穏增長股會較好。

大市現處於合理水平，那90萬資金，你可以用多20-30萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

而物業方面，你現時單位呎數太細，我比較建議有最少300呎，即一個家庭最低要求呎寸，投資價值會較好。

如果你灣仔個單位係投資用，你可以考慮3年後，用佢細屋換大屋，這樣長線增值潛力，相信會較好。

最後，你係創建一個財富組合時，除了要有質素外，都要有平衡性。意思就是，唔好太偏重於個別資產類。

就好似你現時首要目標，係增值置業。但你係置業同時，最好留有一定優質股進行增長，否則成個組合就會偏晒係物業個邊，造成風險。

------------------------------------------------

Q22675：

你好，龔成先生，我係55歲人士，前幾年離職後沒有穩定工作，最近重新入職，將有穩定收入，扣除住屋開支，每月可儲蓄4萬，想問如何善用這五年儲蓄，為退休增添收益

適合做月供股嗎？如何配置？謝謝

龔成老師︰

以你55歲年齡，是應該為退休做準備。但係進行財富增值時，就不宜完度進取，因此，你可以用「平穩增值股」+「收息股」，作為投資目標。

至於月供，其實任何人士都適合，特別係投資經驗較淺，不懂估值的投資者。可以透過月供，用平均價格買入法，去平衡買貴貨風險。

因此，你係可以做月供股票，目標係供「平穩增值股」+「收息股」，比例你預大約各一半。如果你想保守少少，你可以加大「收息股」部份比重。

但這個組合比例，不是一直沿用至退休。而係隨著年齡增加，你要慢慢增加收息股的比例。到退休時，收息股應佔100%。

目的是，讓你可以在退休後，透過收息股的現金流，支援你退休後的生活。

策略上，你每月5成儲蓄，即是用$20000做月供。其餘先儲起，用一邊月供一邊儲蓄的策略。

平穩增值股，例如指數基金、金沙（1928）、長建（1038）、中銀（2388）、港鐵（0066）、恆基（0012）、粵海（0270）、領展(0823)。如果有投資美股，可投資VOO。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q22676：

龔成老師你好!依二年除左睇新聞都比較小用Facebook,但都間中有緣份睇到你在網絡上解答讀者問題,交流同分享投資心得,非常配服你一直可以保持到敬業樂業既心態!

最近一直希望可以開始用自己香港既現金投資,因為我深明財富增值利用複息效應同時必須跑贏通脹,亦非常同意投資要有均衡組合,分散風險.同時要避免短炒圖利心態.

我今年28歲,年收入約港幣55萬左右,由於我目前長駐外國工作,日常開支主要會用自己外國戶口既收入,

香港戶口扣除家用每個月會有約1萬可以用作投資.儲蓄方面會係外國戶口做,每個月約7千.

目前儲蓄約有港幣35萬 - 港幣戶口約佔20萬(全現金,無負債)，暫時外國戶口部份打算保留現金作為應急之用.

我依個星期爬佐你既文章同埋問答與分享,亦見到你有集中推介十幾隻股票,我係投資新手岩岩起步所以希望得到你既指教睇下以下組合點樣 :

平穩增長股:
0002 月供 1000
2800 月供 2000
0012 月供1000

潛力股:
0388月供2000

其他4千暫時打算保持現金,等大跌市再加注入手以上4種,同時亦都想將現時一半現金(約十萬)買以下2種股票 :

3067@3000股 已買[email protected]
3110@2000股

想請問現時價位是否適合或者我應如何分注?

短期目標係可以係3年內連儲蓄可以滾存到150萬,5年達到200萬. 其中一半可以用黎做首期.

最後我想請教你既係我現時工作穩定,亦有望可以在2萬內加薪到年薪70萬,我收入增加部份應該投放係月供股票上定係直接一注注買入呢?

有心理準備股票會放中長線所以希望選擇正確亦可以得到你既意見嬌正心態!下年如果有機會番香港夾到你既時間,一定會報名參加你既投資倍升股課程!

祝事業順利及最重要身體健康!

龔成老師︰

你的投資理念，大致上都正確。只要你選擇正確的優質股，在合理區價，甚至平宜水平買入，並長線持有，自然就可以獲得唔錯回報。

我地做財富增值，一般希望做到架合理回報，係每年增長10-15%。

我假設投資回報有10%（連股息再投資），你每月投資$10000 + 20萬現金，5年後大約會增值至100萬。你現時這個目標，用股票投資去做，風險會好大，較難達到。

如果你無其他增值方法，建議你按部就班，透過月供和買入優質股，去為自已資產作增值。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時28歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

你現時月供策略和選股，都係可以。如果你本身外國戶口，每月都有額外儲蓄，你可以再加大少少現時月供金額，都無問題。

但如果你每月儲在外地戶口$7000，係生活費，或者用於當地生活應急，就不用調整，照現時計劃就好了。

大方向係用每月一半儲蓄做月供，一半儲蓄等大跌市機會的策略。

現時大市在合理區，你30萬現金，可以用10-15萬去分注入貨，餘下部份同樣等大跌市。選股方面，派息基金(3110)無乜增長力，主要係收下股息，唔適合你年紀。

你可以用以下股票代替，而安碩恒生科技(3067)係適合你投資，但唔好全數只入3067。

因為我地配置時，除了要考慮質素外，都要顧及平衡性。個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

安碩恒生科技(3067)係科技股指數ETF，故算係單一行業，只宜佔組合最多3成。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。如果有投資美股，可投資VOO。

或潛力股︰安碩恒生科技(3067)、比亞迪(1211)、中生(1177)、福壽園(1448)、小米(1810)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。如果有投資美股，可投資QQQ。

平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)、QQQ勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22677：

龔老師，想問下 6823
總負債點解噤高到6成
但派息又超過100%
公司噤既情況係唔係唔健康?

謝謝 解答

龔成老師

第一，佢負債比率雖然有少少高，但未到危險，因此整體問題不大。

第二，佢本身業務穩定，以及現金流穩定，所以就算負債有少少高，佢都有足夠的現金流去支持佢的情況。

至於佢派息，雖然100%，但由於有很強的現金流支持，因此無問題。整體穩定，是理想的收息股，不用擔心。

------------------------------------------------

Q22678：

你好！龔成老師, 本人現在22歲, 剛畢業, 現月入$15,000。

計劃:
月供美股:$10000HKD
(主力供ETF :VOO, QQQ, ARKK, VUG), 每月各1股左右。

家用&日常洗費&現金儲備:$5000HKD

請問老師現在我這樣的組合會否過於進取?應否更多分散投資, 例如投資高質潛力港股?

希望可以得到老師的回復 ! 感謝老師

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你現時22歲，十分年輕，財務負擔相對較少，進取少少都係可以。

但你要明白QQQ, ARKK和VUG都係潛力股，佢地增長潛力係高，但風險都會較大。我比較建議你用平穏增長類的VOO作主力(約佔40%)，其餘潛力股每隻約20%，咁會較好。

如果你想進取D，全部平均25%都可以，但風險會偏高，你要明白這一點。

另外，現時大市只在合理區，每月最好留有3-5成儲蓄，用來等大跌市機會。

除了美股，你都可以考慮加入一些港股，去平衡地區性風險。以下都係適合你的股票，你可以參考一下。但緊記潛力股風險較高，要控制好注碼。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22679：

你認為加密貨幣可投資嗎？
小注投資如何？

龔成老師：

虛擬貨幣，我不是這方面的專家，所以我無太多意見。

如果你能承受風險，小注投資不是不可，而你一定要等倍計回報，利用以小博大的模式進行，同時明白有風險。

以本質來說，這是人為創造出來的，絕對不是「資產」，有沒有真正的價值，如何定義真正的價值，未知。

這些人為創造的貨幣，因為關注度由很少變得大，價格會大升，但這背後是否有真正的支持，我不知道。只能說，投資這些貨幣，投機味好重，可能大賺，亦可能蝕到一文不值，因為，當中有沒有價格，我不知道。

但這不代表佢無價值，佢可能好勁，只是我自己不知佢好勁定好差。

佢長遠的價值，取決於「有多少人用」，即是說，雖然無真實價值，但可以有「交易價值」，如果長遠好多人用，的確可能有高價值。

因此，這些虛擬貨幣，由於我無法作出專業分析，所以，我不會投資。

但如果你分析到佢長遠的交易大，大家都持續關注，就有價值，就值得你投資。

我並沒有支持或反對投資虛擬貨幣，只能說，虛擬貨幣風險高，因此不建議大額投資。或者你可以用以下的心態投資，首先，你預期可能會大跌，心態上只用「閒錢」投資，就算不幸大跌對你都無影響，但你的要求回報一定是倍計，博虛擬貨幣有多倍計的升幅，絕不要升少少就賣。

------------------------------------------------

Q22680：

老師你好，想問隻293點睇？謝！

龔成老師：

坦白講，國泰（0293）的質素只是一般。

其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算佢重組，得到新資金，只是比佢「捱過這一關」，並不是賺錢能力方面有改善。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21621-Q21640）

Q21621：

龔Sir, 想請教一下你，我現在持有股票
1801 1000股 89.65入
9992 400股 92入
2125 2000股 10.7入
在這之前我止蝕了1024 300股 300 -> 210

我想全部走曬買入比亞迪股份，咁追會否快D？

謝謝解答

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你如果集中在比亞迪（1211）就會出現單一風險，加上這股現價貴，這刻買入的值博率唔高。

信達生物（1801）、泡泡瑪特（9992）並不是無質素的，泡泡瑪特由於你在貴的價位買，因此要較耐心先守到，你可以等佢上翻多D，減少少。

至於稻草熊娛樂（2125）本身不差的，但未算好強，雖然有藝人作為主要股東，但不一定對長遠發展有利。同時行業的變化大，不確定性高，未能確定企業好有獨特性。

這股小注投資都可，但又唔太值得佔組合比例太多。

我發現你有3個的核心問題，第一，就是心急，你偏向在貴的價位買入，無耐性去等一個較合理的價，另一個核心因素，就是不懂企業基本的估值，建議你多學習，對你長遠將有好大影響，第三，你無經過嚴緊分析，就好快買入股票，記住，買股票前要做足夠的功課，先可入市。

------------------------------------------------

Q21622：

龔成老師你好, 我是您的讀者, 希望港澳通關後可做您的學生. 有拜讀閣下選股勝經內講述中國電動車的內容,

本來本人對純電動車有一定保留, 因要考慮充電設施是否能真正普及, 所以比較偏向混能車, 近日見比亞廸也推出混能車, 確能填補這方面的需求.

而有關石油方面, 為減少對別國石油的依賴, 本人有設想過中國會否發展生物能源取代石油, 請問閣下對生物能源之類有何看法?

可否跟大家分享一下. 感謝撥冗閣讀本文.

龔成老師︰

我看好比亞迪（1211），主要係佢的電動車部份。在中短期，相信混能車都有一定市場。但長線計，應該會係純電動車為主。

電動車有環保的概念，這點令政府會加以幫助，而市民亦會支持，但其實，電動車真正的價值並非在環保，而是慳錢，用電比起用油平得多，因此只要各種配套都完善，車主沒有理由不選擇電動車。

只要有金錢利益推動，人們的習慣將輕易改變，在70年代的石油問題，完全改變了美國人使用汽車的習慣，由一向追求大汽車的習慣，轉變到鐘情於小排量慳油的日本車，令日本車大舉入侵市場，當其他車廠發覺時已經太遲，最終成就日本車霸主的地位。

雖然將來的油價難以估計，但到經濟好景，各國都大量用油的情況下，石油需求大增，電動車的優勢亦愈來愈明顯。

另外，比亞迪在中國發展電動車，可說是佔盡地利因素，因發展電動車必需要有完善的配套，政府的支持十分重要，另外，若政府肯帶頭使用對推廣很有幫助，現時比亞迪的電動巴士已經行走在中國多地的公路上，由公共交通開始發展，可見政府對電動車是正面及支持的，然而，中國政府在支持電動車背後亦有個重要因素，就是石油。

中國並非產油大國，未來的石油供應難以滿足中國的汽車需求，而發展電動車就成為辦法，同時中國在西藏擁有不少能生產電池的鋰資源，若能用電動車取代傳統燃油車，中國對石油的依賴可減少，對別國的依賴能減少，從整個國家發展的戰略角度分析，中國發展電動車的誘因並不少。

同時，中國是政府主導的國家，要建立配套及支持業界，比資本主義國家更容易（在西方國家，石油業的既得利益者並不希望見到電動車的出現）。

投資中國的企業有一個要點，就是順從中央的方向，這不是指個別一兩個政策，而是一個大方向，因這會對企業的長遠發展有重大的影響。

比亞迪在新能源汽車方面，經過幾年的發展開始有起色，混能車銷情理想，而電動大巴在政府支持下銷量亦理想，而部分歐洲國家亦開始試行比亞迪的電動大巴（這是有利的指標，因歐洲的標準甚高的），雖然只屬起步，但情況不錯。

現時比亞迪的新能源汽車遍佈全球6大洲、多個國家和地區，其中包括美國、德國、 英國、日本等主流汽車強國市場。

所以，我睇好這企業的電動車，但你預不是一兩年就見到收成。

至於中國會否大力發展生物能源，我不排除這個可能性。因為中央政府大方向，係想發展綠色能源，以減少對傳統能源的依賴。

所以生物能源，都有機會成為其中一個發展點。但現時內地，相信依然係光伏和風電，會較為主流。

------------------------------------------------

Q21623：

龔sir 早晨，我睇緊你本80後千萬富翁，講到早日辭職，全力以赴去創富工作。

我情況係我有個興趣，寵物美容，但尼門技術靠一對手，生產力有效，手停口停，所以遲遲都踏吾出步去開始事業。

我可以有咩商業模式靠寵物美容創業，又可以有乘既效果呀？

想睇下你嘅睇法係點

龔成老師︰

寵物市場愈來愈大（因為香港人生育少左，養寵物多左，這是長遠方向）。當然，你要學習多種相關技巧，同時，與寵物相關生意好多。

其實在初期，你未有相關技術和經驗，較難做到「乘」的效果。

但當你有一定技巧，甚至知名度後。你可以從幫人打工，變為發展自己生意。

再慢慢用你經驗，訓練一班技師，為你工作。你的角色，就由一個只有一對手的「生產者」，變成「複製生產者」的人。

到第一間店生意上軌道，你可以將這個成功模式複製，變成多間分店，你就會一步步享受到「乘」的效果。

------------------------------------------------

Q21624：

Hihi 老師請問點睇美股 (已歷史新高), cnooc 883.HK 和 china mobile?

龔成老師︰

美股現價算係合理區頂位置，預期未來一段時間，中國和美國會係全球最重要的經濟體系。因此美股，都有長線投資價值。

如果你想投資美股，但對美股又唔係好認識，你可以先投資係佢的相關ETF。以下2隻股ETF，都係不錯的選擇。

當中，QQQ波動性會較高，要注要風險。

Vanguard標普500指數ETF〈VOO〉，是追蹤標普500指數的ETF。

Invesco QQQ Trust(QQQ) 是追蹤納斯達克100指數。

但由於現價不平，只宜小注，或以月供儲貨都可以。

中國海洋石油（0883），質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。現價合理，這類商品企業，都可投資，但就要明白不是最高質的企業。

中移動（0941）有質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

可視佢為收息股，增長力不算強，這股有長線投資價值。現價合理，可分注。

------------------------------------------------

Q21625：

老師，1910最近由過年贏緊2萬幾到而家輸番3千幾，好似變得咁快既

旅遊氣泡出我睇都會好啲，但又一直跌

龔成老師可否指點下

龔成老師︰

新秀麗（1910）本質唔差的，但較受經濟影響。

近期疫情，令市場對其產品需求大幅下降，盈利由2019年賺1.3億，下跌至2020年度虧損12.77億。

就算扣除當中有逾9億的減值虧損，但扣除後都有近4億赤字。

而且，企業近年負債增加得好快，都令佢風險增加左。疫情之前2年，業績盈利都出現下跌，反映佢賺錢減弱，在疫情前已出現。

但這股長期仍是正面的，相信疫情後會轉好。但質素上因負債和賺錢能力減弱，會減左分。

此股投資可以，但若你持資較多，建議減持部份。餘下的部份，可以守。

------------------------------------------------

Q21626：

龔Sir您好！我今年38歲，一家四口，我負責賺錢，月入約$50,000，每月支出$35,000，每月儲蓄約$15,000。手持現金二十萬。

現持有一份儲蓄保單(供十年，年供$40,000，已供五年)；及一份每月派息基金(本金$80,000，每月派$500)。

現並無任何股票投資，近期有意取消派息基金並將$80,000本金買股票。有些問題想請教一下龔Sir，先謝謝您：

1. 如果以$80,000為起步，建議買甚麼股票？1810，3067和2800可以嗎？

2. 708恒大汽車值得買入嗎？

3. 知道龔Sir建議月供股票，但以我所知只有銀行才能月供，而且手續費偏高。如果我能持續地每月以原用作儲蓄的$15,000，透過證券行買入股票，效果是否相近，

對於我這想法龔Sir有何意見？

十分感謝您！

龔成老師︰

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

由於你係初學者，對企業估值，點去定平貴未必太了解。我建議你先利用月供模式，去建立一個股票組合，以減低買貴貨風險。

你38歲，應以增值為主，你所講的盈富(2800)、安碩恒生科技(3067)、小米(1810)都係可以。

建議你用「平穏增長股」 + 「潛力股」的組合。現在你每月先用5成儲蓄，即$7500做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

你現時投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

至於餘下的現金(每月儲蓄和8萬)，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

而你本身手持20萬，我建議你作家庭應急資金。因為你家庭收入只是單一來自你本人，風險較高。留有這筆應急錢才投資，會較穏當。

同時間，如果出現大跌市，你都可以動用這筆資金，去掃貨。

2) 恒大汽車（0708）雖然可能有潛力，但風險高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

我唔係話佢無投資價值，只係不確定性較高。投資時，必需控制注碼，不能太大注。

3) 其實在證券行和銀行，做月供股票都可以。最重要係比對個月供費用，和方便程度。

因為月供費用太高，會影響到長線回報率。

------------------------------------------------

Q21627：

龔成老師你好, 近日幫家人打理股票戶口, 發現當中有不小質量挺甘的股票, 已及時止損.

留下的有788, 968, 2342 和1701, 其中最讓我擔心的是1701, 因為全冇交易量...

請問現時968 2342 有質素可以守嗎

龔成老師︰

中國鐵塔（0788）和信義光能（0968）係有質素，可以守。但由於佢地都有些波動性，若你家人較年長（即係較近退休之年），就不宜持有太多。

京信通信（2342）同樣有質素，增長力唔會有前2者咁高。你預佢中短期業務仍會較一般，要長期先有收成。

途屹控股（1701）本身質素不佳，如果你有睇佢的業務情況，生意大跌，同時出現虧損。長遠計，你一定要賣出這股，但可以有策略地咁賣出。

佢係中國的出境旅遊產品及服務供應商，如果全球疫情過後，有機會升翻少少，你可以等半年至1年時間。

你見佢升翻D，就要賣出。另外，如果這股現時佔財富組合一定比重，最好現時先減少少，去平衡個風險。

------------------------------------------------

Q21628：

覺得自己持貨太散，有邊啲可以放棄?

5, 11, 3988 , 6886 , 1810,
144 ,175 , 823 , 836 , 1317 ,
1288 , 1516 , 3319 , 1918 , 6055 ,
6969 , 688 , 2013 , 2318 , 288 ,
9988 , 1833

龔成老師︰

你這個組合好雜亂，而且數目太多，長線要慢慢集中翻。

假設你組合總值100萬以上，持股大約10-15隻。若不足100萬，則5-10隻左右，就好了。

持股質素上，未見有重大問題。但要留意，以下3隻。

ＨＴＳＣ華泰證券（6886）波動性大，不宜持有太多。

融創中國（1918）不是完全無質素，但佢負債好高，你要明白背後的風險，同時明白這一定會令股價較波動，自己最好控制注碼。

平安好醫生（1833)有質素，但不確定性高，不宜大注。

以你38歲年紀，應以增值為主，除非你好保守，否則收息股(0005, 0011, 3988, 1288, 0288), 不宜持有太多。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你組合中，有4間是銀行類(0005, 0011, 3988, 1288)，小心有過度集中風險。

因為銀行業營運模式較特別，風險會比一般行業為高，所以你要審視清楚。必需堅守30%這個準則，若能控制20%以內，會更理想。

------------------------------------------------

Q21629：

龔成老師你好，最近有意入市買樓自住，由於係第一次買樓，好驚借唔足按揭、又好驚會俾經紀呃、又驚買著間化妝樓要執手尾，發覺真係有好多野要注意，

同時買樓自住隨時住一世而又好怕做錯決定。而且身邊唔多置業人士俾到意見，所以想請教下老師你

背景：

2人共有160萬(股票+現金)

我28歲：月入15000，有雙糧，花紅最近2年都有

佢34歲：月入18000，冇雙糧，花紅去年有今年冇

由於唔想問雙方父母借錢，粗略計過，我地認為買450萬(未計稅..佣金等雜費) 既樓會比較穩陣,不過呢個銀碼既盤少只又少。

有既會係西斜樓或者裝修差既，樓齡35年以上，係咪應該繼續增大本金先買比較妥當？還是先上車？

仲有，雖然睇樓前可以到銀行查詢初步貸款額，但係實際上銀行職員都只係好初步睇你年薪假設你所有條件符合既情況下計算

但係現實係當簽完臨約俾左細訂先可以到銀行正式做按揭，14日後就要再俾大訂，但係呢刻銀行應該係仲未批出按揭，

一諗到呢步就覺得對買家好冇保障，會怯，怕批唔足貸款額就會連首期都輸埋。。

一諗到呢到就想放棄，就會諗都係等抽居屋算啦。。唔想連首期都輸埋。。

唔知係咪睇得太多撻訂新聞，有啲平時信貸紀錄良好既，準時還卡數，做按揭時先驚覺自己俾人偷取資料去借貸或做擔保而導致按揭貸款唔成或不足，

咁作為買家可以點樣做足功課先呢？去環聯做信貸評級有冇用？

龔成老師︰

其實較多的撻訂個案，都是一手樓的，至於二手樓，只要你做好計算，撻訂風險相對就較少。

如果你入息穩定，其實又不用太過擔心，你可以找大型或信譽良好的地產經紀行，到時問清楚，就較安心。

當然，按揭最終審批，都係睇銀行。所以，我地用架計算方法，都只係一個初步數字，不能作準。

我地唯一可以做，盡量預鬆動些，如果你計過按揭入息測試，自己只係剛剛合格，就唔好博。

你可以先投資在優質股，為自己累積更多本錢才再出手，會較安全。

若果你想同一價錢，但希望物業質素較佳，樓齡較少的話。較有效方法，是改變目標地區，選擇一些較偏遠地區。當然都要從你日常生活便利度，去作個平衡。

至於抽居屋，會係其中一個解決方法，但無人知你幾時會抽到。所以，我地一定要2手準備。邊抽居屋之餘，再作財富增值。

當發現居屋以外的置業機會時，你可以有本錢出手。

------------------------------------------------

Q21630：

你好龔Sir，康宏環球（01019）被聯交所取消該公司上市地位，想請教一下呢種情況會對小股東有咩影響？股票會唔會變成癈紙？謝！

龔成老師：

簡單來說，公司仍會存在，小股東仍是持有股票。

不過，就由原本有得在港交所賣出，變成無上市，無得賣出。

之後只能以私人的模式賣出。我見康環球表示，除牌後，將不會有正式機制協助進行股份買賣。公司現正委聘一個為非上巿公司而設的電子交易平台，為有意出售其股份之股東及有意買入股份之潛在投資者提供對盤服務。

------------------------------------------------

Q21631：

老師,想問下樓市, 見你話香港樓長遠向上 , 潛在的購買力是否會推高樓價?

因為現在就係有尼類人存在... 到幾年後大家都儲到一定既錢就去買樓.... 咁樓就愈推愈貴, 愈儲愈少... 我尼個諗法係咪唔正確呢???

龔成老師：

對，潛在購買力會慢慢推高樓市，但不是大升，而是平穩。

因為多年來的供應不足，而需求大，買不到樓的需求並不會無左，而是「累積」，所以這些需求會慢慢釋放。

就是你所講的當儲到錢，慢慢就會買樓。

------------------------------------------------

Q21632：

龔sir, 你好。3月正式月供 ，麻煩看看有否問題，我看過你的財務自由行，我是可承受中風險級別，月供計劃如下 :

$2000, 700
$2000, 388
$2000, 2382
$1000, 2319
$1000, 981
$2000, 77

Total 10000 per month
Many thanks again

龔成老師︰

中芯國際（0981）本質不過不失，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為好優質的股票，只屬中等。再加上中美問題，令不確性增加左。因為有些舉措，未知會否對集團發展，造成長線影響。

這股不宜供太大注，你保持$1000就得。

進智公共交通（0077）主要業務為於香港經營綠色小巴服務及提供中港兩地之跨境公共巴士服務。

企業本身規模唔大，營業額都唔算高。睇翻佢財務狀況，過去數年盈利都十分波動。加上佢本身負債不輕，都係要扣分的地方。此股質素只是一般，唔適合月供。

我建議你用平穏增長股，去取代這隻股票，否則你個組合波動性會好高。另外，現時大市只在合理區，每月資金唔好盡用。最好留有部份，等大跌市出現時，可以用來掃貨。至於其他股，無問題。

------------------------------------------------

Q21633：

龔成你好，有以下問題想請教你︰

1.我想問下我之前0.5時候入左d縱橫遊 8069，依家有擔心佢會唔會有機會執笠，好唔好放曬佢定繼續持有等旅遊業

2.另外想問1250 北控清潔能源呢隻股票如何，值得持有嗎，定放走較好

3.地產或銀行股 有冇較推薦，組合中已有小米以及3067，有金莎和煤氣，想加入多小小較好和進取的股票

十分感謝

龔成老師︰

1) 縱橫遊控股(8069)以「縱橫遊」品牌於香港從事設計、開發及銷售旅行團、銷售自由行產品、提供旅遊配套產品及服務等。當中，以日本旅行團為主。

此股市值不高，過往營業額都好波動，再加上佢多年來都係虧損，狀況不太理想。

暫時睇唔倒此股有投資價值，建議你沽出較好。

2) 北控清潔能源（1250）主要從事光伏發電站的投資、開發、建設、營運及管理、光伏發電相關業務以及風電相關業務。

佢本質不錯，都有一定潛力。但業務比較波動，而且負債好高，都係風險所在。

若你持股較多，建議沽出部份，換至其他優質股。如果持股只係好少，你可以長線持有。

3) 以你28歲年紀，地產或銀行股方面，可以考慮以下股票。

平穏增長股︰恆基（0012）、中銀（2388）、領展(0823)、希慎(0014)、太古地產(1972)

由於優質地產或銀行股，大多數已有一定規模，增長力唔會好高。

若你想提升組合增長力，可以考慮以下潛力股。但由於佢地風險較高，若你投資經驗較淺，這類股票佔組合3成好了。

相反，你已有一定投資經驗，可以進取少少，提升比重到5成都可以。

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

但你要留意翻，部份潛力股已有輕微過熱情況。只有安碩恒生科技(3067)、ＧＸ中國電車基金（2845）、 阿里（9988）、中生製藥（1177）、福壽園(1448)勉強算在合理區頂部，可分注入貨，其餘要等等。

------------------------------------------------

Q21634：

你好，龔Sir,今年26歲，我係由上年開投資。

想請教下你我以下嘅投資組合有冇需要改善嘅地方，組合如下：

3號 1000股 $12.040
12號1000股 $29.2
66號 500股 $38.850
590號 1000股$17.56
823號400股 $76

1398號3000股$4.540
1928號400股$29.7
2800號500股$27
01044號 500股 $51.2

叧外想問02148，09888，00293 值唔值得去投資？

同埋我個人覺得我現時投資項目好似有啲散，咁策略應該點好？謝謝你！

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時26歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

你現時組合股票，都係優質股。但工行(1398)係收息股，增長力較弱，唔適合你。

另外，以你年紀計，組合有少少保守。建議你加入一些「潛力股」，去提升個組合增長潛力。

你除左直接入貨之外，我都建議你好好利用每月儲下來的閒置資金，進行投資增值。

策略上，你可以投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

你現時無太多投資經驗，潛力股這類風險較高的股票，你就不要持有過多，最多維持2-3成好了，可先較集中係平穏增長股類。

到你有一定投資經驗﹐潛力股比重可以相應調高，佔組合約3-5成。

餘下的另一半每月儲蓄，我地就等機會，當大市出現較大回調，就加大力度掃貨，然後作長線投資。

VESYNC（2148）有少少潛力的。佢係美國小家電線上市場的市場參與者。根據報告，在小家電零售商中，佢係美國就通過亞馬遜產生的零售額而言排名第三及通過所有線上渠道產生的零售額而言排名第五。

係美國通過亞馬遜產生的零售額而言，其空氣淨化器於其類別中排名第一，空氣炸鍋於其類別中排名第二。

佢業務主要專注於線上營銷及銷售品牌下的自主設計開發的小家電及智能家居設備。主要通過電子商務交易市場，主要為美國最大的電子商務交易市場亞馬遜銷售其下的產品。

佢的產品主要銷往美國、加拿大、英國、德國、法國、西班牙、意大利及日本等數個國家的用戶。

業務不算差，發展有潛力，但企業規模始終較細，業務未穩定，加上現價略貴。整體都有風險。

這類股，小注投資都可以，但就要明白當中的風險。

百度（9888）有質素，有獨特性，長遠發展不差。

佢係全球最大的中文搜索引擎「百度」的營運商，係內地用家搜尋資訊主要對口，用戶規模突破10億，百度App日活潑用戶超過2億，多個指標都處中國第一。

現時佢坐擁不少資訊和客戶群，就可以利用佢地去發展很多不同業務，可以話係一個好大的優勢。佢收入不差，長遠有發展，但由於本身有相當規模，因此，未必是高速增長型。

百度在規模和質素上，一定係有。但近期科網股波動，風險高左，同時到上市一刻不確定性高左。

現價都唔平，合理區頂，但長線有增長力，小注投資都可。

而國泰（0293），質素只是一般。

其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

過了疫情，生意會好翻D，但長線發展，都唔算係太理想，投資價值只係一般。

------------------------------------------------

Q21635：

同埋好想請教你一樣野，你之前話物業嘅總金額或者首期唔係評價物業平唔貴嘅重點，但好想請教你，有時都要睇吓自己負擔得到個樓價？

即是話如果我搵到一個10,000,000左右嘅樓佢嘅呎價係好抵(就算比較嗰同區最平係佢)，但我都負擔唔起10,000,000嘅樓.

但而家香港現實係如果四百幾萬嘅樓, 用你呢個方式去衡量平貴, 咁佢一定係會好貴, 如果咁嘅話我哋應該點樣揀呀。

有時我都會覺得好矛盾, 我本人33， 月入大約$51000， 其實去到呢一個月薪好似連一棟樓都冇好似唔係好甘心，

依家處於兩難嘅局面，係我究竟應該儲多幾年錢等個首期再多啲然後買再貴啲嘅單位？定係而家唔理佢嘅平貴有四百幾萬嘅兩房細單位

（但係可能已經有三40年樓齡，維修費可能都會好貴嘅私人樓）就買咗先，驚第日通脹再加上銀紙貶值，再加上第二日啲樓越嚟越貴，

再加上驚我儲多幾年錢但係啲樓價嘅升幅仲快過我儲嘅錢。

定抑或我而家一次過買個貴嘅單位780幾萬左右私人豪宅兩房單位，但我諗我會供樓供得好辛苦，仲要搵埋屋企人做擔保人先至可以借到九成按揭。

但係諗落又係呢一種700幾萬嘅單位先比較適合自己長住。如果真係買咗個四百幾萬嘅三40年樓齡舊樓可能自己都唔想喺度住好耐。

(個人又比較喜歡青衣區, 但係區內嘅私樓選擇唔多)

唔知老師你可唔可以俾啲意見幫幫我呀?
謝謝你

龔成老師︰

我意思係，唔好見一間屋入場費細，就覺得係抵。我地要從租金回報率等，去衡量佢價值。

至於置業目標，唔係單從價錢、回報去睇咁簡單。

簡單講，每個人都有自住需要，最終都會買個自住物業。

由於係自住，除了從投資角度考慮(如租金回報率)等，更重要，係可以做到「供得起」這個大原則。

你要找的，不是一定要同區最平，質素最理好單位。而係你要因應自己能力，實際生活需求，去決定買入什麼樣的單位。

這個考量，唔係講眼前而一刻，而係睇長線。你5年、10年、甚至20年的人生計劃，做底要一個點樣架物業，先可以配合到你。

之後，我地再制定一個可行計劃，一步步向你目標DREAM HOUSE推進。

如果你目標單位，唔係太貴，而你又有一定資金。可以買入單位之餘，有一定資金留下，進行投資增值，那計劃可以直接進行。

若你現時資金較少，你可以先用優質股，去累積資金，再去置業。

或者目標單位較貴，你可以先買入較細單位，之後放租。令你可以有一個物業，用以資產追資產方法，減少物業價格波動，對你購入最終目標物業的影響。

另一邊，再用優質股增值，到有一定資金，就細屋換大屋。

你要睇翻自已情況，去決定邊個策略最適合你。你可以睇我本<5年買樓4步曲>，會對以上買樓策略，有較深入解釋。

如果你覺得，最終目標係7XX萬的樓，而現時不論首期和供款，都係尚有一段距離。

我建議你按部就班，先投資優質、再細樓(但質素都唔好太差，要有一定投資價值，因為你要用佢放租和換大屋)，最後才是你DREAM HOUSE，。相信咁安排，會較適合你。

------------------------------------------------

Q21636：

663金山能源，可唔可以幫我諗辦法解套，幫幫忙。

386..中石化$4入...今日已經升咗上去，甘之後繼續持有長渣定係點？

龔成老師︰

金山能源(0663)佢生意好雜，有白銀開採、石油及天然氣、光伏，資產融資、旅遊﹕貿易等等。

佢規模好細，生意額唔多。過去幾年，生意持續虧損，睇唔到有投資價值，建議沽出。

中石化（0386），質素算是不差，但又未到好好，始終這只是商品企業，沒有一些太大的優勢。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

生意近5年只是上上落落，無乜增長力，這是受油價等因素影響，反映佢處於一個被動的狀態。

雖你持有此股目的，係為左收息，你長線持有就可以，但你預佢增長力唔算強。

------------------------------------------------

Q21637：

龔成老師，之前見你推介福壽園，我睇過佢嘅資料，亦都睇好，已經小注入左，靜待收成期。

想問問如果心儀健康股，想問問阿里健康241，京東健康6618，平安好醫生1833，邊隻比較好？另你認為咩價位入算合理區，而咩價位入屬於平呢？

另外，想問必瘦站幾錢入值博率較高？因為由1個幾升到7個幾，最近回落左少少，但都見係高位，暫時唔敢入住

龔成老師︰

福壽園（1448）有質素有發展力，現價在合理區頂，想加注的話，等佢有明顯回調，才再出手。

京東健康(6618)、平安好醫生(1833)和阿里健康(0241)都係有質素和潛力，但問題係佢地是有危有機的類別，雖然業務增長好快，但這刻仍處於燒銀紙的狀態中。

估值上好困難，因為無實質的盈利數據作為基礎，市場只是估估下。

質素和值博率計，平安好醫生(1833)會較為佔優。現時平安好醫生，算係合理區頂，你可以先小注。到有明顯回調，才再加注。

這些企業都可投資，但緊記只宜小注。

必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

業績前計佢$4是合理區頂，業績後股價升左好多，雖然我之前好大機會會調高佢合理價值，不過，現價都有少少貴。

所以，如果無貨，你可考慮回少少，先小注，然後等跌多d先正式分注投資。

------------------------------------------------

Q21638：

你好，龔成老師。我36歲，跟太太月入5萬，有430萬的樓宇貸款，每月供樓後儲蓄約18000，另有現金50多萬。現持有以下股票：

1. 中電 1000股，73蚊買入
2. 香港電訊 4000股，10.96買入
3. 領展 400股，68.85買入

最近開始睇你專頁後，認為你的價值投資法很適合我，所以按你推介小注買入以下股票，之後再加注：

1. 安碩恒生 600股，17.13買入
2. 中生製藥 1000股，8.31買入

我只是投資新手，有以下問題想向你請教：

1. 以上組合潛力股比例是否太少？如果再買入潛力股，航空或物流股可有推介？國泰可以嗎？

2. 香港電訊只是收息股，該賣出再買入更多潛力股嗎？

3. 平穩增長股方面知道你推介港鐵，但請問你又點睇載通（062）呢？

4. 你對於我這個組合有意見可再給我嗎？

謝謝你解答。

龔成老師︰

1) 以上持股，都係有質素。但以你36歲計，應先集中係增值部份。

香港電訊6823)和中電(0002)主要係收息，增長力唔高，不宜持有太多，暫時不要再加注。

由於你係新手，未必對企業估值、點去定平貴太了解。我建議你都利用月供模式，將每月儲蓄投入股票組合，以減低買貴貨風險。

將來投資和月供，建議你用「平穏增長股」 + 「潛力股」的組合，比例大約各一半。現在你每月先用5成儲蓄，即$9000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有50萬資金可多投入10-20萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

至於航空股，中短期都會較弱，而且航空業面對競爭和問題都不少，暫時唔建議投資相關企業。

至於物流業，你可以留意嘉里物流（0636）。這股算不差的，順豐入股後長遠發展更正面。

佢本身由嘉里建設（0683）分拆上市，係亞洲的物流服務供應商，主要從事綜合物流及國際貨運業務，亞洲、澳洲、歐洲及南北美洲的35個國家及地區設有逾400個業務點。

業務以第三方物流服務供應商身份為世界各地的製造商、零售商及其他客戶提供綜合物流服務，包括主要在亞洲提供廣泛的物流服務，如倉儲及增值服務、陸運及配送、退貨管理及各種配套服務。

另外，亦有從事國際貨運：提供的國際貨運服務絕大部份位於亞洲區內以及亞歐大陸之間，涉及空運、海運及跨境陸運服務。

這股長遠都有發展的，不過近年股價上升左唔少，這點要注意風險。現價算是處於合理區頂，以長線投資的角度，有值博率的，可分注。

2) 此股都有質素，但始終增長力較弱。你可以考慮沽部份，換碼至較有增長力的股票，係可以。

3) 港鐵（0066），係一個不錯的選擇。

但載通（0062）質素只屬中等，但不是無質素，持有不應該太多。佢的優質是現金流強，但如果仔細分析佢的財務數據，會見到佢成本增加的速度，大於收入增加的速度，這反映佢無成本轉嫁的能力。

你預這是收息股，股價增長力不強，唔係太適合你。

4) 你成個財富組合，主要係物業部份較大。但初期係正常的，未來你新資金，盡量先投放在優質股類，令成個財富組合，平衡性提高。

因為我地長線係希望建立一個平衡、優質、有增長力組合。所以，唔好太偏重係單一資產，否則個別市場有較大波動，對你成個組合，就會有嚴重性影響。

------------------------------------------------

Q21639：

龔sir 你好,因為前幾年一直幫屋企還緊債務，所以出左黎做野3年基本上冇儲過錢，直到最近已還清，一直冇任何錢做其他野。

如果想一年內儲返60萬可以嗎？人工每月只得20k 希望老師可以幫到我。感激!

應該點樣既投資方法先適合

龔成老師︰

以你現時人工，想透過用優質股增值，去到一年要儲60萬，比較難。

因為你本身可動用資金不多，加上優質股一般年增長，約為10-15%。而且係講一個長線平均數，如果你1年咁短時間，個回報會好波動。

你唔好預期短期內投資優質股，會有倍數級增長。因為投資股票，就等同投資企業。就算再優質，都要比時間佢慢慢成長，唔係一年可以做到的事。

我建議你按部就班，用每月儲蓄，去投資優質股，為財富增值。

由於你現時收入，較難達至目標。故你首先要做，就係增加收入來源。

你可以考慮轉換工作，做一些多勞多得，例如銷售方面工作。或者，你可以加入副業，可增加收入來源。

另外，你都要審視開支，看看有什麼不必要開支存在，盡量去縮減，加大你每月可投資金額。

投資方面，可以選擇一些「平穩增值股」+「潛力股」作投資目標。

------------------------------------------------

Q21640：

阿sir, 你好，本人現在30歲頭，現握大約10隻股票，全都係有質素，但發現股票組合不平衡。現持有水桶1:2:3 比例為 35:40:25。

而另外亦發現股票行業，比較集中資訊科技和電訊，各大約比例為37%和35%，其他則28%。

想問如果現擁有的優質潛力股持有太多要重新調整組合，但某些買入價偏高，應仍為重新調整組合平衡風險，而蝕賣出一些嗎？

另外想問941 應是桶2 還是桶3？

龔成老師︰

唔係太著重個買入價，我地是否持有一隻股票，要睇佢本身質素，買入價只係必理因素。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

而你現時30歲頭，水桶1:2:3佔比，大約為60:40:0。當然，水桶1風險較高，如果你投資經驗較淺，或者想保守少少，可以調低少少個比重。

以你年紀計，組合有少少保守，潛力股稍為不足。而行業上，都出現過度集中性問題。

但由於情況唔係好嚴重，若你持有股票都係優質，唔想沽貨的話。你可以利用新資金﹐慢慢去調整翻個組合比重，令佢平衡性回復正常。

中國移動(0941)，算係水桶3股票。此股有質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

你可視佢為收息股，但增長力不算強，這股有長線投資價值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19461-Q19480）

Q19461：

龔成老師你好，我一向都有關注你所分享的信息，我是一個24歲的打工仔，因為以前既任性， 現在都係處於負債階段

每個月都要還錢， 依家就嚟解決到呢件事， 我想重新好好規劃理財方式，同埋學習一下真正既理財及投資知識， 雖然我都有主動網上學習同埋睇你嘅訊息

不過我相信都唔夠全面，我知道老師都有出書， 我想請問會唔會有邊本書係適合我呢個階段去睇同學習，同埋想知道老師有無咩建議？打擾了

龔成老師：

你24歲，好年輕，只要你這刻努力，幾年後會比8成以上的同齡人財務情況更好。

我建議你睇《80後百萬富翁》《財務自由行》，都是適合你的。之後再睇其他。

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的12本書：

《80後百萬富翁》（第8版）
《80後2百萬富翁》（第4版）
《80後3百萬富翁》（第2版）
《財務自由行》（第6版）
《大富翁致富藍圖》（第4版）
《50優質潛力股》（第3版）
《50穩健收息股》（第3版）
《50值博倍升股》（第1版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第1版）

------------------------------------------------

Q19462：

老師，我係你學生。有時候想做分析 我發現要對想分析既企業（eg 823領展）本身處於既行業（房託/地產股）營運模式

不同時期既大環境，政府政策等等資料配合先可以了解到更多企業/行業過去/現時/將來發展大方向

想請教老師 除左年報/企業網站 有冇咩網站推介係有唔同行業既一啲基本資訊可以參考 可以俾我有初步了解先？

龔成老師：

一般的財經網站，都有每個行業的基本資料，但只是好基本，坊間無一個網站有各行業的詳細資料。

之前第2堂比個一個網站你，有關行業的資料的，以中國為主，不過，佢不是每行業提供資料比你，而是你要自己在網站找一些報告。有時會有行業報告的。

另外，你睇招股書都會有行業資料。

------------------------------------------------

Q19463：

老師，想問下你現時持有邊幾隻股票？

另外再問下當我地資詢你股價是否合理時，股價可能已浮動了，那麽我地又再點部署？

龔成老師：

我一般會持有5-10隻，多年來都大約是這個數。要留意，如果你投資實力未算好強，適當的分散風險是需要的。

我一般以長期的角度去分析企業，去計算估值，因此，除非股價大幅波動，否則影響不大，你照我建議的策略去進行就個得。

------------------------------------------------

Q19464：

老師，留也想請教
是否可以月供基金
當儲錢

我mpg agent suggest
mpf

另外，1813是否再跌dd好d

龔成老師：

月供基金都是一個不差的儲錢策略，你可以進行。不過，基金有好多種，你要仔細分析，該基金的質素，以及長遠的增長力如何，過往長期能否跑贏大市。

至於合景泰富（1813）有質素。

佢係廣州的大型房地產開發公司之一，物業的質素不差，目標客戶的收入可以話屬中高收入人士。

物業項目涵蓋中高端住宅、豪華別墅、洋房、服務式公寓、甲級寫字樓、五星級酒店、高級購物中心等各種
類別。

睇翻佢的發展，佢的業務亦由傳統物業開發及銷售，擴展至資產經營及物業管理等發展領域，並且形成以廣州為中心的華南區域、蘇州為中心的華東區域、成都為中心的西南區域、北京為中心的環渤海區域之發展戰略布局。

前景仍是正面，不過都有三個風險，第一，中國樓市經常處高位，如果有較大回落，對佢有影響，第二，佢負債唔少，這是風險因素，股價有潛在波動。第三，現價唔算平，可以話處合理區頂部，就算投資，都唔建議太大注。而這股可長線的。

------------------------------------------------

Q19465：

龔Sir, 你好, 我現在開始看你的書, 還未看完.

但有些問題想問問, 我妹妹的朋友說學了你的投資, 沒有上堂, 只是看看facebook 及你出的書, 她有200萬, 現在可用你教賺來每月交租10000.

我一直不明白, 我看你Facebook說買優質股, e.g. 778, 都有7%回報, 如果只靠這些都可以每月賺足, 但必需派息穏建, 但你教不可以全放這隻, 還要將錢放其它不同股票及投資上, 有些是低息的,

例如: 盈富, 港燈, 港鐵, 那就做不到每月7%, 還要放長線, 沒有賣出, 又怎可以有7%收益. 還有些要持現金, 等平先大量入貨.

這樣的, 怎可將200萬做到每月有10000交租? 基於是妹妹的朋友, 所以都沒有斬釘截鐵去問. 用你的方法真的可行嗎? 請指教一吓?

現希望先看書了解一吓你的股資方案, 確定後希望有錢上你的堂. 先謝 !

還有買1211, 這隻沒有息賺, 只可等價低買及價高賣, 如一直不賣出, 又怎可以每月有現金流?

龔成老師：

首先，當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

比亞迪（1211）是潛力股，當投資增值後，就可以轉在其他股，令自己有現金流，當然，這過程不用急，因為這是一個長期的策略。

至於你問收息方面，其實現時好多收息股都有6%，例如深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。$200萬收6%，已經有$10000一個月。

如果能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等。有些股股息更高，必瘦站（1830），我自己都有貨，平均價$2，股息率有超過10%。所以，要建立股息組合其實好易，不過，如果你這刻年齡，就建議你做好「增值」方面。

------------------------------------------------

Q19466：

你好，本人是一名完全沒有收入的家庭主婦，剛剛才學習投資股票，數月前才開始入手盈富（2800）及中電（2）

現有$60萬現金流計劃兩年後移民澳洲，想問應該作怎樣的投資分配？現金只可作短期的投資

希望在這兩年增加被動收入，為日後可以於澳洲購入更大/更有價值的單位，可以給予一些投資意見嗎？

另外，作為長線投資，本人對港股有些看淡，如果想投資美股又有建議的ETF 或國企股值得留意嗎？

龔成老師︰

港股依然有不少有發展潛力的企業，都是值得長線投資。當然美股都有不少好股票，你可以考慮投資Vanguard標普500指數ETF〈VOO〉，佢是追蹤標普500指數的ETF。

以你情況，60萬現金只有2年時間做投資，這個時間很短，策略上要較保守。選股上，我建議用"收息股"，佢地雖然增長力唔高，但都有一定派息。而且勝在波動無咁大，令最終回報較有預算。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

現時大市只是合理區，60萬資金可先用一半，以"分注"形式，慢慢入貨。餘下一半就等有較大回調出現，才大力度掃貨。

------------------------------------------------

Q19467：

海底撈好嗎?

龔成老師：

海底撈（6862）正面，有質素。

佢以「海底撈」品牌經營火鍋店及外賣業務，火鍋菜單由鍋底、醬汁蘸料以及在鍋底烹飪的食材三個主要部分組成，可點單鍋、鴛鴦或四宮格鍋底組合，餐廳提供多種調料及食材，以及供應小吃、酒和飲品。

在中國有好多分店，以及外國都有。

生意增長力強，有規模，有品牌，整體正面。相信長遠仍有發展的。

不過，這股市場比佢好高估值，現價貴。如果有貨可長線，但無貨最好跌翻D先考慮。

------------------------------------------------

Q19468：

老師，想問分析一間公司係咪主要市盈率 (P/E Ratio)、市脹率，現金流及負債比率？

同埋你邊本書有講？

龔成老師：

當我地投資股票時，就是買入一盤生意，買一間企業，當然要對企業仔細分析，上述都是一些指標，你要分析，但絕對不止這些指標。

我建議你睇《股票勝經》《年報勝經》。

------------------------------------------------

Q19469：

成老師，由2018開始上了你的堂，之後開始定期做功課看公司的年報和分析，累積升幅至今有33%。

而原定今年目標是累積100萬資產，亦因為兩隻倍升股而提早達標(比亞迪和中軟國際)，最後想不到股票淨值已經超過100萬，感謝老師不求回報的付出!

今年也因疫情關係多了時間，自我增值考了些証書，希望為明年轉工和嘗試創業作準備，期待進階班見。

龔成老師：

太好了！

這是你知識及努力，得到的成果！

記得保持進步，多用課堂派的「企業評估表」，加油！

進階班見！

------------------------------------------------

Q19470：

最近留意緊潛力股，請問你本身有投資網上醫療相關的股票嗎？

如果平安好醫生及阿里健康，邊隻會較優質？我見前者主要網上看診，後者則網上賣處方藥。我自己對網上看診感覺較保留。

係我保守得滯嗎。平安好醫生幾多先叫合理價中間區？阿里健康又幾多先合理值博呢？

龔成老師：

我有投資中生製藥（1177），我是長線投資的，已買一段時間，已時算是有超過一倍的回報。相信醫藥類是將來的大方向，但現時部分股有少少過熱，投資要小心。

但長線投資仍是有理想回報的。

平安好醫生（1833）及阿里健康（0241）都有質素的，長遠發展都正面，不過阿里健康現時略貴。而平安好醫生則在合理區頂位，這股長遠有潛力的，但收成可能比阿里健康長。

平安好醫生的網上看診，唔會好快見到收成，但相信是長遠解決醫療系統資源配置問題的方向，因此，長遠會正面。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算是合理頂位。

------------------------------------------------

Q19471：

龔成老師，感謝老師每次既回覆。
我最近開始睇老師推薦既書，而家睇緊富爸爸窮爸爸。

好深感受。我記得我廿歲嗰陣，工作上有個姨姨同我解說過咩係投資。佢話一罐汽水今日賣5蚊，10年後問我只唔只賣5蚊，當時我識答佢唔只，一定會貴過今日。而佢都有同我講，所以那怕今日罐汽水係做特價賣3蚊，都無所謂。

當時我聽極都唔明。不過我一路都記住咗佢講既耶。
自此之後，我就再無遇上過會咁樣同我講投資基本概念既人了。

中間記得我有問過姑姐佢會投資啲咩，聽佢講買基金賺咗錢，不過佢答我好就風險唔啱我。

直到而家網絡資訊發達，睇過好多，老師就係講緊個姨姨既汽水道理。

因為我同朋友都無試過傾談投資既話題，我就開始試下同朋友傾，我相信如果同人地討論，我會學到更多或朋友會有例子俾我參考學習。

可惜我一問，有無買下保險呀，大家啲錢會點打理呀，會唔會投資啲咩㗎。得到既反應好奇怪，大家都好避忌，仲會話唔投資㗎，唔識，唔會賭。有啲又會問我問黎做咩。。。

然後我兜咁大個圈想多謝老師你，真係好無私。而我跟住老師既建議，我終於都嘗試到咩叫累積財富唔係用加法，係用乘法。

然後富爸爸窮爸爸有提到，唔好諗住靠公司，靠父母，靠政府。又有好大感受。公屋限住入息係12800，資產限住廿幾萬，跟本去到年老時係唔夠過。

老師真係真係好感激你咁無私分享。

龔成老師：

有錢人只是少數，就是佢地擁有的知識，一般人唔知，一般人唔學。

所以，當你問身邊的人，如父母、朋友、老師，佢地根本唔會知道投資的正確方法，唔會知道財富系統的真相。

因此，我地要學，就一定要跟有錢人學，你見我所講的投資，就是巴菲特的投資方法。同埋，我所講的財富系統，就是我睇了大量有錢人書籍後，明白到這個方法。

你現時已知道這個方法，之後，就要好好運用，我自己都是由憑這方法累積一定財富，我相信大家都可以。加油！保持進步！

------------------------------------------------

Q19472：

老師我想分享，其實要識得分析一間企業，真係要好多心機，睇好多資料，重要睇埋行業大環境，政府支唔支等等，睇緊你本《50值搏倍升股》，越睇越覺得你真係堅勁！

如何從各方面數據分析到當時股價是否合理？前境如何？學睇年報。呢啲都係我想要學嘅嘢，可惜暫時未能上龔Sir你嘅堂，依家只好睇定啲書，希望日後有機會上到你堂，謝謝之前一直嘅回覆，依家疫情嚴重，小心保重，加油

龔成老師：

我都花了20年時間去累積經驗，研究企業是一件唔簡單的事，要花時間花心機，不過，這是唯一能投資成功的方法。

其實在課堂，我會盡量用一些簡單的方法去教，同埋會比較多指標學員去跟，例如「企業評估表」，是很有用的工具。

保暫時睇書增值先，遲D課堂見！

------------------------------------------------

Q19473：

龔 sir, 我本來一直月供6-7隻股票，但近來心多了，睇啱咗十幾隻二十隻股票，而且供開那些有些開始貴

所以我篩選咗二十幾隻有潛力/高值博率的，打算將來在當中每月按價位選6-7隻，不斷調整月供组合

代替以前固定幾隻股票和月供額度，請問你覺得這個做法有没有問題？會不會令組合太雜？

龔成老師：

最緊要你要從「長遠建立財富組合」的角度進行。

你要分析，長遠同時持有這些股票，是否優質，是否在組合中發揮作用。

如果原有的6隻已經唔平，你之後供其他是可以，但之後的最重要都是優質股，同時風險度適合你。

你現時選了20隻，要小心選股，大約投資5隻是適合的。

長遠來說，一個成熟的組合，擁有10-15隻股票可以。

------------------------------------------------

Q19474：

Sir，您睇好比亞迪，咁比亞迪電子又點睇？現價42.9算平？合理？定貴？可長線？

另外阿sir覺得而家邊隻會係比亞迪2.0? 啫係邊隻潛力優質股現價平又可長線？

龔成老師：

比亞迪電子（0285）正面，其實這股在2016年出的《50股》一書，已放在潛力股類別中。

這股長遠正面，現價就有少少貴，去翻$30以下較合理。如果本身有貨，可長線。

現時不少潛力股都唔平，唔建議太進取，如果O你組合無潛力股，可考慮加安碩恒生科技（3067）。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q19475：

呀sir, 請問現時適合買樓嗎？還是等多半年/一年才買？

龔成老師：

現時已經可以開始留意物業，相信這1、2年是買樓時機，可能會跌（但不會大跌），之後會平穩甚至少少向上。

經濟差會對樓價會有影響，不過，需求始終大。所以這1、2年可考慮。

------------------------------------------------

Q19476：

龔sir 你好，謝謝你的回覆，本人是澳門人，今年開始剛對理財有概念和需求，留意到有很多人都大讚龔sir 的為人和投資能力，所以也期望你將來澳門有課程可以讓我們報名。

想25年後就做到財務自由，不知道方向應該怎樣
盈富基金應該加大到幾多股適合？

現在價位是月低，是入手時機嗎？看不太懂這隻股票是怎樣派息的，用手機apps查喱隻股佢顯示既野同其他派息股好似有d唔同...

如果想早日退休 應該多入中國銀行和工商銀行嗎？
感謝龔sir

應該月供安聯的收息增值基金還是自己買港鐵，盈富，等股票會比較好？

龔成老師：

如果你目標是財務自由，可用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

因此，你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以月供/分注投資。

你可以考慮盈富（2800）。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

如果你不懂股，就集中供盈富。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q19477：

龔成你好，本人三十歲，月入35k。我亦有拜讀你所寫的作品。怎樣可以做到財富增值？

現持有2800 （3手）
1883 （14手）
435（4手）
1928（1手）
303（1手）

未來想購入709、12、1448
及增持2800、1928

請問這個組合可以嗎？有沒有更好的建議？

謝謝你，希望收到你的回覆

還是建議我以月供股票投資709、12、1448、2800、1928？

龔成老師：

你現時持有的股票，都不是無質素，可以長線持有，不過，增長力就不算強，所以要睇翻你自己的投資目標。如果你本身想收息及有少少增長，這組合無問題。但如果想有較高增長，就要加入潛力股（當然，風險度都會提高）。

你可以月供盈富（2800）、恆基（0012）、金沙（1928），福壽園（1448）就等機會入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19478：

龔成老師，近日見你學生紛紛多謝你
雖然我不是你學生 但都有睇閣下書籍 我都想係度多謝你

我同樣係80後
雖然第一個100萬係坐樓市順風車

你令我對理財投資有另一番體會
係上年年尾開始睇你書同fb
加上肺炎跌至21000時機

分段投入老師既倍升潛力股
1211 1810 388 9988等等
至今已達至第二個100萬

飲水思源
多謝老師啟蒙

雖然市面上好多人取笑你攻擊你
我知老師心理質素好好
繼續支持你龔成

龔成老師：

太好了！相信你得到之後更多的$100萬，速度會更快！

其實我整套投資模式，多年來都無變，網上來來去去都是講價值投資法，叫人月供股票模式當儲財富，不選股票就投資盈富。

其實唔少人講盈富無乜回報，但佢地唔明，盈富的作用是平衡風險，對唔少不懂選股的人來說好有用。

自從FB專頁人數上到10萬以上，就多左人攻擊，無所謂，我從來只求做好自己。

------------------------------------------------

Q19479：

龔成sir你好呀
我係從事空中服務員
未被裁員
但係人工減咗好多

支出方面係兩位小朋友學費較貴 大約萬三蚊左右

現時叫有房屋住，唔需要供樓

冇咁大負擔 而伴侶的工作也十分穩定
但我地一直未上車

現有股票大約120萬
股票組合尚算多樣化
平穩增長

另有現金100萬
及70萬左右基金連外幣

現在大灣區樓盤很盛行
有意於內地置業
主要for投資
最近見到珠海金洲有個上車
盤80萬兩房 75平

如果拎四十萬做首期再月供3.25厘 值得投資嗎

其實主要想自己的投資組合咩都有啲
現在只欠磚頭

定係還是將呢啲錢再繼續投資股票呢

龔成老師：

珠海這地區正面的，長遠會受惠大灣區發展，以及澳門的發展，有長線投資價值。

如果你想組合有物業，加入這區物業，都可考慮。

但你就要小心分析，因為一個地區，都會有好與壞，要睇交通與發展。

另外要睇租金回報率，如果太過低，就有可能已經貴。

------------------------------------------------

Q19480：

龔成，我是一位00後，手持約27萬資金。

投資組合大約分佈：

恒生月供5年人壽儲蓄保險 (月供暫佔11%)
港股： 中海油 (0883) (28%)
中生製藥 (1177) (11%)
三生製藥 (1530) (14%)
現金(37%)

打算買入中芯或現貨黃金，想請教意見。
讀者

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

中國海洋石油（0883）雖然質素都算有，但不是最高質類別，佢對油價較為敏感。

雖然佢都有一定的規模，但卻不是最高質素的企業，這是由於佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由於質素中等，唔建議大注投資，但相信油價上翻佢會上升的。

因此，中海油本必值得佔你組合比例太過多。

至於兩隻醫藥類股，持有，但唔好太心急加，因為行業佔你組合的比例有點多，你應該尋找其他股。

至於中芯（0981），小注都得，因為未平。

黃金，可以成為組合其中一部分，但由於無現金流，因此唔值得太大注。

其實現金37%都合理，不算過多，可以慢慢分注及等機會入市。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

噓……
天空墨黑，厚雲沒星。手錶上指針是凌晨二時，大部分人已熟睡就寢，街上一片寂靜，黑暗滿佈街角，昏黃街燈，照得人睡意濃濃。

嗞嗞……
機器的轉動聲卻在深水埗福華街，一排關閉的鐵皮小排檔叢後，一間鋪頂上書「坤記士多」四個大字，在鐵閘縫中透出幾扇白光，聲音就從這製糕工場發出，訴說着眾人皆睡我獨醒，明碼實價的起早摸黑，辛勤的一天就從這嗞嗞作響揭開序幕。

「由晚到朝，由早到夜，循環不息，兩三點鐘起身開工磨米，做埋洗埋嘢賣埋，兩更人，收埋鋪夜晚八點幾，年中冇息休㗎！不過唔緊要，慣㗎啦！」半頭白髮的傳永祥一口沙啞地說。

傳永祥是坤記老闆和掌舵人，64歲，對這數十年如一日的辛勞已司空見慣。還有弟弟傅永康，三個協力的阿哥阿姐夥計，同時在凌晨開工，默默無語。守在四五十度高溫的火爐邊，人人揮汗如雨，各佔各崗位的忙着磨米、抽出抽入竹筲簊、提上提落重甸甸的石頭壓漿，誰也沒注意到這百忙的街外上一絲靜態。


咔嚓……
一手拉開了店面的鐵閘。時為早上七時許，深水埗地鐡站B2出口旁，這不過百呎，80年代士多的舊模樣，汽水、香煙、啤酒、土炮……，老士多的產品。然而主角是陸續放到店門當眼處的各式老糕，白糖糕砵仔糕芝麻糕紅豆糕……琳瑯滿目，吸引途人。連銷售也數十年不變。現時外面的糕都早已包裝好，這裏卻依舊即切即放磅上秤重量，再入小袋給客，這樣的動作常惹客人投訴慢。

「件糕幾重就收幾多，冇呃秤，夠均真！幾廿年都係咁，冇變過，舊時啲人冇投訴㗎！」

隨時代變遷，深水埗生活改變了，舊的事物正在消失，他仍竭力保留這裏的一點一滴。分毫不動，緊握着舊。

「我都後生過，輕佻過，試過變新，錯咗一次，唔可以再錯！」像他的白糖糕，水靈模樣，心眼兒透亮，會有點調皮。他也曾稚氣未脫，違反父旨，背叛自己，陷於迷惘，卻終歸是貼心的。還不忘父訓：「做人做生意要對得住天地良心。」


一度無心之心，使他念茲在茲，謹遵此宗旨，勤懇守着，天荒地老。縱使父已逝，精神卻長存。

父技藝恭謹以待

嗯……
閉目沉思的他，想起父親，思緒如泉湧。他祖籍順德，鄉下作為魚米之鄉，河澤廣佈，水域通達，適於稻米生長。賦予了製作米糕的創造力。選粘米、糖、水這些家常材料製成的白糖糕、砵仔糕等，是稻米變身的傑作。

看來簡單，實際上製作十分繁瑣。父親傳承的技藝，他不怠慢，淘米、浸米、磨粉、壓水、和餡、發酵、灌籠、水蒸，做足八道工序，糕才爽香可口。

滴噠滴噠……
磨米的滴水聲，回應着石頭壓印米漿滴出的米水聲，格外清脆。他將用半新舊的泰國粘米按比例混合，浸泡一晚軟了的米放進磨機，扭動水喉，米粒漸研磨成漿，奶白的水柱細細流進布袋。紮好裝滿米漿的布袋，然後抬塊大石把米漿重重壓着，待水分全部流走，壓成半乾濕的米粉糰。以壓乾的米粉糰上秤，斤両才準確。

「用磨米壓出嘅米漿嚟蒸糕，啲糕有一種膠質，特別煙韌。」他一時忙着調校不同糕點的糖水米漿，這個要加黑芝麻漿，那個要放紅豆……一時又要磨糯米粉，做煎堆、包茶果。磨米機在一邊動，他也像機器一樣，沒有一刻停下來，多磨人！

最不容易是順德獨有的白糖糕，壓成的米粉糰，加入糖水搓勻，擺放到晚上，粉糰不停發酵，晚上變「老種」，又配搭新加了糖的米粉糰去，再發酵到第二日才蒸，往而復來，日日如是。白糖糕好不好吃？還是靠發酵。米與糖水的比例怎樣？發酵時溫度如何？全靠他拌和米漿時，一雙巧手去感應。

將發了酵的米漿倒在竹箕上，拿去蒸。「蒸起咗啦！蒸起咗啦！」隨着他揭開蒸鍋，熱氣上升，夾著帶酒味的甜米香，一股複合香氣撲面而來。剛蒸好的白糖糕白嫩蓬鬆，密密的小氣孔如同蜂巢一般，光滑剔透。嘗一口，軟滑爽口，甜甜的滋味帶着剛出爐的暖意在舌尖化開，口感綿密帶韌勁，微微似米酒的香氣，意想不到的清新吸引。

家傳秘方不易來

呼……
他大力地呼出一口煙圈。這個做糕的家傳秘方，是寶貴的經驗及睿智，都是他的父輩，順德人一代代口耳相傳下來的結晶。最初，也與一口煙有關。

「我老竇叫傅坤信，戰前喺順德嘅茶樓打工學整糕，佢個師傅做嘅白糖糕爽彈細膩，點樣整？佢就教啲唔教啲。不過呢個師傅係食大煙嘅！」

食大煙，即抽鴉片，當年是合法的，很平常，但價格高昂，普通打工的吃幾遍可花掉一個月人工。他父親知師傅有煙癮，出錢請食，期望師傅上足電，會過招教他。這樣的討好非一推即就，師傅一次不教、兩次不教，直到第八次才教少許。之後不斷請食，師傅才像擠牙膏般逐少逐少地教。

「請佢食個大煙，嗰份糧畀晒佢㗎啦！老竇先慢慢學到做糕竅門！」到他父親成功獲知箇中秘訣，幾已傾盡家財，可謂得來不易。和平後，他父親就帶着這秘方，到香港打工。

做米糕養家餬口

依呀﹗依呀﹗
石磨在轉動，轉一圈就依呀一聲，昔時就是用石磨磨米做糕。「我老竇嗰時喺香港嘅油器白粥大牌檔做糕，用石磨磨米，憑學番嚟嘅秘方整出好食嘅糕，其他師傅都冇佢整得咁好，啲客咪叫我老竇不如自己出嚟做生意！」

1965年，他家住唐九樓，在十樓的天台自立做糕，山寨原始，做批發生意。「點知攞貨買嗰啲商戶客，好生意就嚟攞，唔好生意就唔攞，落雨唔嚟攞又唔找數，啲糕剩喺度唔通倒咗佢，我阿媽咪拎出街賣囉！」山不轉路轉，他母親挑起擔挑，秤兩隻竹籮，糕點放在籮上，到福華街、北河街沿街擺賣。那時小小的傅永祥，已跟着媽媽一起上街。

「老竇真係好勤力，佢一個人，用手磨米、石頭壓水、米漿溝糖水、發酵、入爐蒸，嗰時仲用燒柴，乜都一腳踢！」父親就靠這糕養活一家九口，逐漸做到有生意，坤記的雛形就是這樣形成。

窮人孩子早當家

鈴鈴鈴鈴……
鬧鐘響起，早上六點，傳永祥兒時最痛恨這聲音，他不情不願的起床來。「起身幫老竇開檔，之後七點幾返學，到下晝三四點放學返嚟，又磨米、搓糕，整呢樣整嗰樣，到夜晚九點，先去做功課……」

對一個小孩，體力及精神都往做糕去，上學沒精神，成績也越來越差。「整整下無心機讀書，升唔到班，咪冇讀，一路跟住老竇去做糕。」中二就輟學，這遺憾一度令他無法釋懷。

「人哋放學就去玩去踢波，禮拜六禮拜日去露營、去旅行。我禮拜六禮拜日都要開工，好辛苦架！做糕有咩樂趣？」他很矛盾，對做糕，嘴裏說着嫌棄，實則卻又留有美好回憶。「當年冇咁多電子產品，我細個陪老竇開檔有得食，又同其他檔口嘅細路玩，賣出啲糕，老竇賞我零用錢，幾開心㗎！」多年後憶起與父親一起賣糕的時光，苦中有樂，很寶貴，他特別珍惜！

他與父母漸漸做到生意，從街頭做上排檔，他的工資也多了。「嗰時未識諗，冇儲低！啲錢淨係愛嚟行街睇戲食飯，唔夠咪問阿爸攞囉！」

人迹渺意興闌珊

轟隆轟隆……
地鐵行走聲音劃破寧靜的深水埗，時為79年起地鐵。坤記被迫搬到南昌街的大牌檔。「因為唔就腳，完全冇生意，做糕生意差，搵唔到錢。」同期麥當勞又進軍香港，市民多了選擇，坤記漸被擠到邊緣去。生意不佳，令傅永祥更加意興闌珊。

「我都要支人工，飲茶食飯都要錢。做糕冇前景，都諗轉吓行啦！由細對住呢行咁耐真係厭㗎，邊至想做？當然唔想做！」常言做那行，厭那行。他放下了做糕，離開父母和弟弟。當時他考到的士牌，就去揸的士搵食。

當了的士司機，他才發現爭食的士愈來愈多。「的士多，分薄咗，難搵食，我覺得揸的士已經唔合時宜。」他只好回家再做糕去。

人心之花散落時

哎呀﹗
這痛楚的嘶喊，如被一拳激中喚醒做糕的初心。他離去而再回來，父親沒有責怪，但最終也要靠父母，他感覺像欠了一個情。這時父親年事已高，還交付給他打理。他有感傳統磨米、壓漿、發酵，花工夫又費時，生產能力低。適逢工場拆樓，沒地方磨米，他打出如意算盤來。「新時代講求快，可以用現成嘅粘米粉，節省咗磨米艱辛嘅過程，慳番唔少成本。」

有不待風吹而自行散落者，人心之花是也。人心搖蕩、人性明暗，有跡可循卻難以理解。他騙得了自己，卻瞞不到客人，有些熟客吃過，覺得不是死實實，便是散收收，味道不同了。當他面前，把糕丟進垃圾桶，這恍如大力地摑了他一記耳光﹗「我好唔開心！」

客人騙不了，一個個離去，不單虧本，父親打下來的江山招牌也搖搖欲墜。他痛過，才領會，才醒覺。「老竇曾經同我講，做生意最緊要老實，對得住啲客，如果啲嘢唔得賣畀人，等於呃人。」

痛定思痛，自此，他堅持用傳統方法，磨米蒸糕，慢慢把客挽回來。

兵戎相見終告捷

傾哐！傾哐……
電視機傳來武俠劇的刀劍聲，短兵相接，仿如與同行舞刀弄劍的惡鬥……八十年代，大牌檔人稀少，父母接受他的提議，到較多人流的福華街租鋪，他可以邊看着電視邊賣糕。

如今他不辭勞苦，店仍維持磨米做糕，果然吸客，生意滔滔。那時深水埗有不少經營糕點的行家，見其客人川流不息，不免見獵心喜。某行家到來請教，叫他傳授做糕訣竅。「老竇當年都千辛萬苦先學識，而家問一問就要教你，有冇咁便宜嘅事？況且你又喺深水埗做糕，教咗你，咪搶自己嘅生意？傻㗎！」

他拒絕了，於是行家心生一計，急遽地將其租鋪買下。「佢買咗間舖，繼續租畀我哋，遲遲唔收，等我做旺咗佢先至要返，到時接收晒我啲客，賣佢嘅糕。」

他被擺了一道，但對方有鋪佔了優勢。他覺得租鋪不是長遠計，立意要父親買鋪。機緣下他們買到隔鄰的店，即現址的角落鋪，於是搬到鄰店繼續賣糕。行家業主收回原店，賣同樣的糕品，兩家並列打對台。「大家爭，佢鬥平，佢賣五蚊三件，我一件三個半。啲客嚟買，話我貴，但一樣幫襯，因為我嘅糕好食過佢。」

對家乏人光顧，大拍烏蠅，結果結了業。「以前一直覺得老竇嘅手藝好平常，而家我知道係寶。」他深深感到做糕秘方的強悍和魅惑力，亦全憑這贏了漂亮一仗。

仍不敢須臾或忘

啪啪啪啪……
掌聲響起，在百般磨難過後﹗97年金融風暴後生意轉淡，他想到增加產品提升銷售。「試過加整老婆餅、合桃酥，同芝麻糕、紅豆糕、馬蹄糕。啲客都係鍾意食用磨米做嘅糕，麵粉做嘅老婆餅冇得留低，磨米嘅紅豆糕同芝麻糕都賣得，就繼續賣到而家。」

他將芝麻磨粉混合米漿倒進盤內，先蒸熟第一層，然後第二層、第三層，如此類推，蒸到第九層，做出芝麻糕。入口綿細軟滑，慢慢化開，不甜膩，飄散出芝麻香氣，細嚼還能感覺到點點的黑芝麻末，滿嘴生香。內裏沿用父親的磨米米漿，糕身特別柔韌有米香。

03年，《飲食男女》報道坤記，指明香港製造。「由嗰時開始旺，生意幾倍咁升。到15年攞米芝蓮推介，多咗好多外國遊客慕名嚟幫襯。」

店子紅了，親友都建議他擴大工場、增加產量。「要快就要機器生產，就冇咗手做嘅味道。」用手做糕，時間有所局限，快不得，產量不多，如白糖糕一天最多二十多底，砵仔糕一天只一千幾百碗。他斷然回絕。

「唔會大量生產！我一定唔會再犯錯！」他絕不容犯下些許錯，縱使別人不追究，自己卻不敢須臾或忘。堅持遵循父法，不粗製濫造。09年父親因年邁身故。「我會盡自己能力細心做糕。咁樣做係為咗品質，亦係為咗啲客。更大嘅意義，係為咗阿爸。」他回憶中的父親，為人正直，扛起家庭和事業，勤懇堅忍，從未埋怨過辛苦。做人忠誠，對客童叟無欺，因而儲落大批熟客。

入夜，他開啟門口射燈，照着坤記的招牌，淡淡的糕香，歷五十年而不散，讓人念念不忘，有燈就有人，延續父親的精神。

撰文：孟惠良
攝影：關永浩

坤記糕品專家
地址：深水埗福華街115-117號北河商場地下十號鋪
電話：2360 0328
營業時間：7:30am-8pm
詳情： http://bit.ly/2QLfzLk