[gfmurmur9882] 曾經我唔太明白一句說話「愛情不在乎天長地久，只在乎曾經擁有」，今次呢段感情寧我深深體會到。 我今年21歲，拍過2次拖，而呢2次拖對我嚟講係非常刻骨銘心。第二段感情係我人生當中最深刻既一段關係, 我同佢相差4年, 一齊一年半, 聽落去好似好短時間, 好似經歷好少回憶, 好易忘記, 但係我同佢一齊經歷咗半年既生死。 / 冇錯。係癌症，第二期既淋巴癌。係我地好甜蜜咁一齊咗大半年既時間，我身體突然間生咗一個惡性腫瘤，𥚃面有D癌細胞，而且亦擴散到身體某D位置, 係屬於第二期既淋巴癌。個陣時嘅我知道咗呢個消息之後喺病房攬住佢一齊喊，完全接受唔到點解會發生係我哋身上，個陣時我亦都好傻咁喊住同佢交代身後事，叫佢好好照顧好自己等等。 幸好醫生亦提供唯一嘅出路就係要做六次化療，而呢一個亦都係唯一嘅治療方案。於是我每隔三個星期就要做一次化療, 每次化療我都需要食100粒類固醇, 仲有經歷好多副作用, 包括不斷嘔, 食唔到野又冇力出街,有幾日只可以瞓係張床度, 亦都可以想像到我同佢嘅拍拖節目只係進出醫院同屋企, 我同佢屋企相差一個半鐘頭嘅車程, 佢基本上每兩日就會放咗工過嚟我屋企搵我探我, 但佢每次嚟探我其實都唔好受，一係我就好唔舒服，一係我就喊，我因為化療成個人變得好瘦削，頭髮亦都甩到光頭，好多負面情緒都發晒落佢，但佢就默默咁去接受，在轉化成正能量去安慰我。依家諗返起都覺得好傻，我簡直係一個光頭又唔靚又好多負面情緒嘅女朋友。 我成個人嘅自信心亦都冇晒，個陣時我亦同佢講話如果你搵到一個比我更加健康更加靚嘅女仔你就去啦，唔好喺度等我啦。但呢個男仔亦都好傻，一直冇嫌棄我，一直堅持喺我身邊陪伴住我，直到我完全康復變返一個正常人生活。 / 雖然我同呢個男仔冇再繼續一齊行落去，但我好多謝佢，佢同我冇血緣關係，佢嘅身份只不過係我男朋友，但佢一直默默咁喺我旁邊守護住我。我相信佢係個天特登安排嘅天使來守護我，陪伴我渡過呢一個難關，我夠膽講佢係我見過最勇敢嘅一個男仔，可能大家會覺得我先係好勇敢嗰個，但其實我身邊嘅人先係最偉大最叻嗰個，因為佢要喺我背後默默承受好多唔同嘅嘢。我同佢而家亦都係好朋友。 我想大家透過我嘅故事同今次嘅疫情好好珍惜另一半，冇人會知道下一秒發生咩事，曾經我以為我同佢嘅緣份因為呢一個病而斬斷，但最後我哋都一齊跨過左呢一個障礙。希望大家好好珍惜大家嘅另一半。 ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——— ♡投稿請按 @couple.murmur IG主頁鏈結! #hongkong #couple #lovestory #hkig #香港 #情侶 #香港情侶