[gfmurmur9849] (續:#gfmurmur9622) Hello🥴 我係［#gfmurmur9622]嘅樓主，多謝你哋嘅comments，我全部都有睇，其實只要俾個渠道我訴到苦我已經覺得好開心，現實生活中我都唔夠膽同身邊嘅人去討論感情問題🙏🏼 回應返對我哋情況嘅疑問先，點解會覺得係「我養緊我男朋友」？我諗大家誤會咗，我唔係講緊我現在養緊男朋友，我係講緊如果再咁樣落去我係咪要變咗養緊男朋友？ 其實我同佢共同儲嘅呢一筆錢，真係為咗共同嘅一齊去上車同日後嘅生活，兩個人一齊用嘅錢嘅規劃，但佢將呢一筆錢洗晒係佢屋企人身上，獨力靠我自己而家呢一筆錢去用，其實如今我已經睇開咗都冇乜所謂，已經同佢一齊去睇樓中。 另外就係我同佢嘅生活費，以前都係share嚟用，我而家其實都係我會盡量比多啲，因為唔想佢辛苦，但佢都好體諒我，基本上都好少出街，而買嘢方面本身我哋兩個人個性格都唔係好中意買嘢嘅，都有共識。 另外回應返點解我覺得「佢屋企人對佢唔好」？就係因為其實我男朋友真係每個月大部份嘅錢，三份二嘅人工都係俾咗屋企，但佢屋企裝修完佢就住一個仲細過工人房嘅房，基本上入面淨係擺到一張床，用舊梳化椅墊嚟比佢做床頭墊，真係超級細嘅房，連我男朋友平時咁鍾意打機嘅位置都冇，呢個已經係佢唯一嘅興趣，但佢屋企人就係住大房瞓五尺床，大書櫃大衣櫃，用Mac機用dyson風扇，裝修得好靚真係新屋嘅樣，但係佢間房就死氣沉沉又up dup，第二個人根本入唔到去佢間房嘅個種屈質，我真係好心痛佢點解咁辛苦使咗咁多錢出去，但自己咩都用唔到； 佢屋企人出入次次都飛的，就算係去好近嘅地方上堂，佢屋企行去MTR真係兩三分鐘路程，都係的士出出入入，話驚出汗喎，但我男朋友平時送我返屋企，我哋都係行路咋！相反佢屋企人買親咩都要用大牌子，風筒都有好幾款，音響又要買最好，梳化又要買最貴，床褥又要最貴，呢啲唔係我吹水，係有次我去佢屋企，佢屋企人自己同我曬命嘅時候講，其實佢哋要點樣洗錢我冇所謂，因為真係唔關我事，唔係佢哋咁樣洗我男朋友嘅錢，然後我望住我男朋友件T恤着到穿晒窿見到lin頭都唔捨得買新，我真係超級心痛，之前見到佢條褲爛到個褲袋係見到入面孖煙通，我當時雖然嬲佢但都係死死地氣去u記買件新比佢。 佢阿媽如果煮飯比佢兩姊妹食嘅話佢都會煲湯煮花膠真係認真煮啲有營養嘅嘢，但我男朋友夜收工返嚟，佢就煮公仔麵，其實我就好唔鍾意男朋友食公仔麵，佢平時已經食唔定時個胃唔係咁好，唔健康又冇營養，之前我同我男朋友住過一排，我收工返嚟幾夜都好會去買餸，煮飯俾佢食，星期六日都會煲湯，有時都會煲下啲中式糖水比佢，因為佢嘅工作好辛苦，要好多體力，唔明點解次次都係煮公仔麵俾佢！ 佢哋都有follow呢個page我唔想俾人認得🙏🏼我表面上都做得好大方，扮唔care，但講真我care嘅唯一原因只係心疼男朋友 第三樣嘢就係有人問點解唔可以去我屋企住？ 其實坦白講我屋企人都唔太鍾意我男朋友，而我男朋友自己其實都好怕羞，我屋企人喺度嘅時候佢都唔係好夠膽上嚟，佢都會上嚟但係佢會好緊張，所以有時佢真係唔鍾意嘅話我都唔會逼佢。 其實六七年嚟，每次過時過節佢阿媽生日定係母親節，我都會買嘢送俾佢屋企人，但係咁多年來佢都冇買嘢送俾我屋企人，有嘅話都係一兩次同埋係我買完之後，係我屋企人面前講話係佢買嘅，至少氹吓我屋企人開心，等佢哋知道其實我男朋友都好好，但其實我男朋友真係好遲鈍，都係食到近呢一兩年我真係喺佢面前講，話希望佢可以到我屋企人都主動啲，買野比佢哋，唔需要貴重但係至少係一個心意，大時大節都祝福一下，然後佢都淨係買咗一次野，仲要係佢叫我自己去買，買完之後佢過返數俾我……….. 其實我都幾唔開心㗎，因為佢屋企人其實樣樣野都要名牌，我買野比佢阿媽都冇得慳，都會買啲好野比佢，但係佢買野比屋企人就冇乜心意，我都明白其實佢因為唔了解我屋企人所以就比較難去拿捏佢地喜好，但係唔知點解我仲係覺得怪怪地咁😞 佢阿媽成日都覺得佢個寶貝仔係最好嘅，有幾次都話我整嘢食都唔好食，如果寶貝仔同我結婚嘅話第日真係有排佢捱，呢個真係佢原句嚟架，咁多年來我煮飯俾佢食啦仲多過佢煮俾我食啦，如果真係唔好食嘅話點會食到咁多年呀？而且我啲朋友同埋屋企人都冇話過我整野難食，至少我都肯整呀。之前同過男朋友住一排，我收工返嚟都係要買餸煮飯俾佢食呀，咪又係咁過，幾時有委屈過佢？究竟係咪每一個阿媽都覺得自己隻寶貝仔就係100分？人哋個女就係地底泥？ ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——— ♡投稿請按 @couple.murmur IG主頁鏈結! #hongkong #couple #lovestory #hkig #香港 #情侶 #香港情侶

【凍到瞓唔著？#冚被順序影響保暖度】 ------------------------------- Follow @likemagazinehk | 每日送上優質生活Tips ------------------------------- #天文台 預測，寒冷天氣會持續多幾日，直至下周中左右先暖番啲。夜晚 #瞓覺 時，有無愈瞓愈凍感覺？明明拎咗全屋最厚嗰張被嚟冚，瞓到半夜仍然凍醒？為咗再保暖啲，有人冚厚被外再加料，冚多張毛巾或毛毯，但你知道應該冚邊張喺面先啱呢？原來冚被順序錯咗，保暖力大減。 #羽絨被 輕身保暖大熱 寒風呼呼吹，匿喺暖笠笠嘅被窩令人有幸福感覺。冬被質料愈出愈多花款，講到近年大受歡迎嘅有羽絨被。羽絨被輕身，保暖度高。其保暖原理係當身體與被身接觸，體溫會令羽絨膨脹，造成空氣間層，帶來保溫效果。至於老一輩至愛嘅 #毛毯，質料多數為聚酯纖維等，能阻止熱能散走，但質料問題，同時難散濕氣。傳統嘅棉被，內裡塞滿棉花，非常重，冚起嚟唔舒服。新一代冬被採用人造合成纖維，雖然比棉被輕身，保暖度高，但唔夠疏氣，夜晚瞓瞓下可能會出汗。 冬被組合順序建議 呢幾晚氣溫一直降，晚間氣溫徘徊十多度。為免冷親，好多人近日除咗冬天冚開嗰張被外，會再加多被。多冚幾張被係暖啲，不過冚到成座山咁，好難轉身，瞓得唔爽。如要一夜好眠又夠暖，原來冚被順序係關鍵。日本專家話，冚被順序應該輕身貼身，厚重在外。假設你嘅保暖組合係棉被加毛毯嘅話，由於棉被較重，建議直接接觸皮膚嗰層係毛毯，然後先冚棉被。若果保暖組合係羽絨和毛毯，順序應該先冚羽絨被，後冚毛毯，咁就可以得到最好保暖效果。原因係，喺身體與羽絨被之間冚咗毛毯，羽絨無法充分變得蓬鬆，羽絨被嘅保暖功能大減。 床單舖毛毯增暖感 羽絨被係暖，但要瞓一段時間先見效，有人討厭羽絨被起初冚上身嗰種凍冰冰感覺。要解決呢個小問題，換個質料含絨毛嘅被套就可以。又暖又滑嘅感覺，會令你好快入眠，而且瞓得好。若果冚多張被仲未夠暖，小魔法係喺床單上鋪張毛毯。由於熱氣會從身體下方散走，床單上有毛毯，提高保暖效果。但注意毛毯要天然材質造嘅，如羊絨、羊毛等，天然物料疏氣排汗力較好，唔會造成悶熱，讓濕氣帶走體溫。 全文：http://bit.ly/36jOpCi

【#成日瞓唔著？3款飲品助你舒壓好眠】 ------------------------------- Follow @likemagazinehk | 每日送上優質生活Tips ------------------------------- 現代人公私兩忙，壓力大，加上生活不規律，好多人明明攰到想死，但瞓落床總係眼光光，瞓唔著，度過無數 #失眠 夜。民間流傳解決失眠花款多：數綿羊愈數愈清醒；做 #輕運動 要郁動會出汗唔ok；以為睇勁悶嘅書快催眠，結果都無效。如果話你知，飲杯嘢就可以舒壓入眠，你有興趣試一試嗎？ #牛奶 助眠真定假？ 有一種說法，失眠因為體內陽不歸陰。意思係，人體內本來有陽氣和陰氣，晚上應該陰氣主場，陽氣休息，但當我們陽氣亂竄，就會打擾心神，令人失眠。若身體狀況不佳，都會影響心神。有人話，夜晚飲杯牛奶好瞓啲。原因係牛奶富含色氨酸，色氨酸係血清素嘅前驅物，而血清素又可轉化為褪黑激素，血清素、褪黑激素都可穩定睡眠。但牛奶今咉的色氨酸其實分量非常之少，飲一杯攝取嘅色氨酸肯定不夠催眠，就算畀你飲夠分量，有研究指高蛋白嘅食物會降低色氨酸進入大腦，簡單講，飲咗都無用。牛奶被認定係助眠，估計因為飲牛奶令人連接兒時美好回憶，因而身體放鬆咗，所以易入眠。兒時快樂回憶未必人人有，無嘅飲牛奶都無法入眠。另外有指牛奶多飲易令身體產生痰濕，影響身體平衡，影響瞓眠。 杏仁汁 #調理身體 助眠 唔飲奶，可以飲乜調理失眠呢？有建議話飲杏仁汁。杏仁汁有化痰作用，能將體內嘅痰濕問題化掉，減輕咗負擔，就能瞓得好。杏仁汁好易做，將甜杏仁用清水泡軟，加水，放入攪拌機打成汁，然後放鍋煮滾，放涼後就可以飲。盡理飲原味，唔加糖最好，因為糖都會引起痰濕。杏仁汁唔一定睡前飲，平日飲用調理平衡好身體，夜晚自然瞓到覺。 玫瑰檸檬茶疏肝寧神 若果你係經常心煩氣燥，瞓著因為好多嘢煩，口特別苦，好熱氣，小便較黃，大便較乾，就係屬於肝火擾亂型。要解決失眠問題，可以瞓前飲杯玫瑰檸檬茶，有助疏解肝氣，安心寧神。玫瑰檸檬茶做法簡單，將 #玫瑰花 放入杯內，加沸水，悶泡一陣。待水溫下降至70度左右，然後放入 #檸檬 片及 #蜂蜜，攪拌後就可以飲。呢杯茶除可降火，仲可以除口氣，玫瑰更有美顏淡斑效用，如正值生理期女生唔建議飲用。 冷泡 #綠茶 好舒壓 有人話臨瞓前或者晚上唔好飲茶，因為茶有咖啡因，會令人保持抗奮，影響睡眠。但有日本睡眠專家指，助眠秘方係綠茶。原來用唔同水溫泡綠茶，釋出嘅成分會唔同。如果用冰水沖泡，可將咖啡因降到最低，臨瞓前飲都無問題。茶裡嘅茶胺酸有放鬆作用，有助舒壓。一講到冰水泡茶，有人驚訝臨瞓飲凍飲，唔係更精神咩？當然唔係要你冷冰冰咁飲，而係預先製作，瞓前2至3小時用冰水泡綠茶，臨瞓前飲，茶味和成分已釋出，但水溫回復至室溫，呢個時候飲杯先瞓，令你感覺良好，有助入睡。 全文：http://bit.ly/37Fg4iy