呢個時候，阿公環視四周，留意到小鬼們開始向潘叔聚攏，躲喺幽暗角落，眼睛綻放出綠光，就好似黑夜中嘅野獸一樣。但從佢哋嘅能量嚟睇並無惡意，單純好似小朋友見到父母返屋企咁高興雀躍，其中一隻小鬼仲激動到全身毛髮豎起晒。 「班小鬼喺度等緊你。」阿公。 「無…無啊…」潘叔。 『小鬼』唔一定係小孩嘅靈體，亦有可能係動物靈，死後長時間喺人間吸收自然能量，固定形態後就可以四處走動，好似野獸咁四處覓食。 小鬼修煉到某個程度，悟性足夠嘅話，就可以投胎轉世，若吸食太多負面能量，就會墮入邪道變成「精」或「妖」，繼續修行或得到高人指點就能夠修煉成「仙」，但呢種情況非常罕見。 遊樂場呢種高情緒波動嘅場所，都係小鬼們喜歡嘅樂園。 「所以，你承認可以見到班小鬼？」阿公。 「我、我…自小就有陰陽眼。」潘叔。 「好多人都可以見到人嘅靈體，因為頻率相近，但小鬼就唔一樣，需要有修法嘅人先睇得到。」阿公。 「唔好再講咁多，你睇完就快啲離開，如果被其他人發現我帶你入嚟，會害我無咗份工。」潘叔。 阿公無再追問落去，佢決定自行尋找真相，只要搵到成件事嘅「動機」，真相就會水落石出。佢拎住電筒喺鬼屋內部四周圍尋找線索，潘叔喺旁邊喋喋不休講唔停，試圖分散阿公嘅注意力。 「啊哈！」但係，當阿公用電筒照向上方就有所發現。 「我們留得太耐喇，不如走啦。」潘叔想拉走阿公。 年輕嘅阿公唔係善男信女，佢一手甩開潘叔：「唔好擋住我視線。」 「作為清潔工，你真係大頭蝦！」阿公電筒光線循住天花板嘅「污垢」照射，再退後一步，想睇清污垢嘅真面貌。 符咒…係一個巨大到覆蓋成間鬼屋嘅符咒。 阿公揚起眉毛望住潘叔，潘叔未開口詭辯，阿公就搶先一步：「你應該記得，你個女仲喺屋企，佢不幸被比較凶猛嘅小鬼纏住，魂魄被小鬼咬住，如果趕唔切救佢，佢就會出事。」 嚟荔園之前，阿公暫時將小鬼嘅力量封住，唔畀佢繼續傷害瑋晴，潘叔吩咐鄰居暫時照顧佢先放心出門。 潘叔臉色鐵青，一臉被抓住罪證嘅表情，但阿公無打算放過佢，繼續窮追猛打。 「呢個符咒唔可以構成傷害，主要用嚟封住靈體，唔～呢間鬼屋就好似一個巨型嘅煉鬼場，你想用鬼屋養古曼童？命令小鬼幫你做嘢？」 「我都唔知你講乜！呢個只係鬼屋嘅裝飾，咩煉鬼場？你都癲嘅！」潘叔氣急敗壞，急步離開鬼屋。 其實阿公一開始就留意到，潘叔嘅步姿有啲古怪，行路時右腳一拐一拐咁，睇嚟有傷患喺身。 阿公唔可以自己留喺荔園，只好緊隨潘叔身後，就喺荔園門外，潘叔遇到另外一個人。 嗰個男人身型龐大，遠睇成隻灰熊咁…呃，係大咗肚嘅灰熊，嗰個大肚腩令男人行動笨拙，但佢一見潘叔就走過去。 「阿潘！係咪你啊？！」男人雙手捉住潘叔肩膀。 「你認錯人。」潘叔想走開，但無法掙脫灰熊嘅巨爪。 「我係李卓榮啊！你嘅中學同學…你唔使再扮啦，之前我喺鬼屋一眼就認出你！」自稱李卓榮嘅男人愈講愈激動。 更令阿公睇得膛目結舌嘅係，講完呢句之後，佢就跪喺潘叔面前：「求吓你放過我個仔家寶，好唔好？」 「我都唔知道你講乜。」潘叔。 「我知…我哋曾經傷害過你，但…我哋只是一班同學玩吓㗎咋，都過咗咁多年，你都唔可以傷害我個仔㗎？」 「玩？！好好玩咩？點解過咗好多年就要我忘記呢件事？你知唔知…你哋嘅『玩』，害咗我一世啊！」潘叔好似計時炸彈剪錯線咁突然爆炸。 終於，全靠呢個自稱係潘叔中學同學嘅李卓榮，阿公接連幾日喺荔園等小鈞母親同婷婷嘅律師父親出現，幫佢哋解決小鬼嘅問題。 而當晚阿公亦喺半威脅之下，從潘叔口中得知呢件事嘅真相，一個跨越數十年嘅復仇計劃。 君子報仇，十年未晚。 《阿公講鬼４：魑魅》預售開始！ ７月出貨！ 留言「買」我inbox 你