已經講過幾次，連免費堂都拍過，每年必出嘅面積比例MC題，其實無須任何古靈精怪技巧。由賭Sir未出世嘅會考時代，至到最新一年嘅DSE，每一題都只係需要順序使用以下兩個概念，就可以計到答案，甚至筆都唔使拎，個腦轉得快直頭一嘢就見到答案。 . 第一步：觀察幅圖有冇相似三角形。點解要搵呢？有咩咁著數呢？著數就多囉！只要搵到一對邊嘅比例，另外兩對邊都會受用，一鷄三味，一箭三鵰，鵰鵰鵰。而且，面積比係邊比二次方，連面積都知埋，咁幫得手，你唔係唔用啊嘛？ . 第二步：觀察幅圖有冇共高三角形。我兜口兜面教嘅時候，通常都會話，考試嚟講，主要有兩款共高。第一款係來自一個大三角形切出嚟嘅，第二款係同樣地坐喺地下頂住天花板。當然，淨係得啲文字，你未必知我講乜，哈哈！只要三角形同高，面積比就等如底嘅比。 . 嗱嗱臨去 www.HermanToMath.com （去我Profile撳條Link就得）撳資源分享，你會搵到面積比嘅免費堂。 . 話說呢課嘅題目有好多解決方法，包括埋啲古靈精怪嘅花拳繡腿，若然你老師教你將平行四邊形堂長方形，或者設啲邊做xyz，甚至叫你背一堆特例嘅話，我畀勇氣你叫佢食屎。 . 難得呢個topic只係需要兩招硬功夫，就包保搞得掂，又唔係難記，何苦搞屎棍化簡為繁呢？除咗以上兩大步之外，其他方法都係多舊魚嘅Junk Skills。 . 為咗令學生安心而話考試無神技嘅，係呃X人； 為咗令學生驚嘆而夾硬搵技巧教嘅，係屎忽痕。 . 掌握咗兩大步之後，你只係淨返一個任務，就係不斷練習觀察各款各樣嘅圖。呢一點同計數無關，而係同你嘅觀察力有關。睇到就計到，睇唔到你點都計唔到，你要明確知道呢一點，計唔到唔代表你數學頭腦唔掂，好可能係你對眼唔掂而已。 . 分享到呢度先，拍硬檔幫幫手分享我嘅文章，Send去班Group，睇下我IG同YouTube Channel。杜氏數學《數學外掛懶人包》嘅理念係：幫香港後生仔後生女糾正學習方法，用最短時間跨過迂腐過時無用嘅考試制度，慳返寶貴不可逆嘅時間做自己真正中意做嘅事，重奪青春嘅控制權，活出真正嘅人生。