青蛙王子（上） . 喺呢片彊土上，有東、南、西、北、上、下、左、右八個國家。 . 而我就係西國嘅公主，你係咪以為，一國公主一定好威威？ . 唉，我細個嗰陣，母后就病死咗，父皇再娶新皇后，納好多妃子，生多一堆皇子公主。 . 我呢個喪母公主，完全無存在感，不過都衣食無憂嘅。 . ， 宮中無乜人理我，我鍾意睇書同出宮玩，今日喺樹林度，遇到一隻青蛙。 . 隻青蛙好生猛，喺我身邊跳嚟跳去。 . 我同佢玩咗一陣，見天色漸暗，諗住回宮，點知青蛙一直跟住我。 . 我問：「你係唔係想跟我返屋企啊？」 . 青蛙亦步亦趨，用行動回應我。 . ， 於是，我就帶咗青蛙回宮，點知佢好麻煩。 . 我畀蟲佢，佢唔肯食，係都要食我個碗裡面嘅嘢，仲要跳上我張床度，同我一齊瞓。 . 大佬，一隻青蛙同你食同一碗飯，唔嘔心咩？ . 我特登去詢問皇宮嘅老師，有咩辦法可以調教一隻青蛙，令佢乖乖地食蟲。 . 老師答：「隻隻青蛙都食蟲㗎啦。」 . ， 唉，睇嚟呢隻係壞咗嘅青蛙。 . 我唔想再養佢，但我唔係一個浪費嘅人，我打算親手煮一碟炒田雞，獻畀父王，展現吓我嘅孝心。 . 於是，我就喺書堆中搵食譜，點知搵吓搵吓，我搵到一本童話故事，叫《美女與野獸》。 . 大概係講一個美女，同一隻野獸相愛，美女錫咗野獸一啖，然後野獸就變成王子。 . 原來王子曾被巫婆詛咒，要得到真愛之吻，先可以變番人類。 . 從此，兩個人幸福快樂咁生活落去。 . ， 其實，呢個故仔我之前都睇過，不過我嗰陣無養動物，所以無太上心。 . 依加我突發奇想，我隻青蛙咁刁鑽，又唔肯食蟲，會唔會佢都係王子變㗎呢？ . 諗到呢度，我決定去吻一吻隻青蛙。 . 雖然有啲噁心，但係無乜成本，話唔定搏一搏，單車變摩托。 . ， 我捉起青蛙，一嘢嘴埋去。 . 然後，青蛙就變成咗一個靚仔，深情款款咁望住我：「公主，多謝你救咗我。」 . 嘩，原來動物真係會變王子，我好驚喜。 . 「我係南國嘅王子，被巫婆詛咒，變成青蛙，佢話要真愛之吻先解除詛咒。」王子眼有淚光。 . 真愛之吻？但我本來諗住炒田雞，唔通呢啲都算真愛？ . ， 不過呢啲都係小問題，重點係，王子繼續講：「我哋既然係真愛，我一定會娶你為妻，帶你返去南國，從此一世對你好。」 . 我好感動，正諗住應承佢，突然間，我諗到一個大問題。 . 雖然佢係王子，聽落好高級好有型，但我都係公主，我唔受父皇寵愛，就過得唔好。 . 點解女人都鍾意「王子」？王子唔代表有型靚仔，代表嘅係有權有錢。 . ， 萬一呢個南國王子唔受寵，無權無勢，我嫁畀佢，咪同我依加嘅生活無分別？ . 我問：「你有幾多個兄弟姐妹啊？」 . 「我有三個哥哥、四個家姐、兩個弟弟。」 王子神情黯然：「不過，我十年前被變成青蛙後，就唔再知道屋企嘅消息，可能依加已經多咗幾個細佬妹。」 . 咁多兄弟姐妹，一聽就知佢父皇妃嬪唔少，再加埋十年無見，佢父皇會有幾重視佢？ . ， 呢啲諗法迅速喺我腦海中閃過，我就同王子講，我雖然好愛佢，但我母后當年係俾人害死嘅。 . 為報殺母之仇，我一定要留喺西國皇宮。 . 王子好心痛：「你一個女仔，勢孤力薄，咁樣太辛苦啦。」 . 「母后對我好好，我唔可以任母后枉死，自己開開心心咁嫁人。」 我講到眼眶都紅晒，其實母后真係好錫我，只不過佢唔係俾人害死啫。 . ， 王子勸咗我好耐，我都唔肯跟佢走，最後佢依依不捨咁離開：「如果你有咩需要，派人嚟南國搵我，我一定會幫你。」 . 我望住佢嘅背影，我意識到，我吻咗一隻青蛙、救咗一個王子，但我無得到任何回報！ . 佢雖然會幫我，但一個唔受寵嘅王子，幫得我幾多？ . 唉，如果佢係一個得寵嘅王子就好啦。 . ， 我忍唔住諗，會唔會有其他動物，都係王子變嘅？ 如果係就好啦，話唔定其他王子係受寵嘅。 . 諗到呢度，我即刻出宮，喺森林搵動物。 . 無幾耐，我發現咗一隻行為怪異嘅狗，一吻之下，佢就變成咗上國嘅王子。 . 狗王子感謝我嘅「真愛之吻」，提出要娶我，我繼續講「為母后報仇」嘅藉口。 . 狗王子走咗，留低信物，應承會幫我...... . ， 我搵晒森林嘅每一隻動物，牛羊豬狗蛇蟲鼠都唔放過，逐隻逐隻錫， . 甚至搵侍衛幫手，綁住老虎個嘴再錫佢。 . 估唔到，森林裡面真係有好多動物係人變嘅，唔止有王子，仲有丞相嘅仔、高官嘅仔......總之全部都係家世好好嘅男人。 . 待續... . #短故 #短篇 #小說 #陳美濤 #廣東話 #粵語 #tomatochan #青蛙王子