【龔成問答信箱】（Q22181-22200）

Q22181：

你好，想問怎樣判斷泡沫，例如美股市場? PE一直擴張，高於歷史長期水平，但係又有新解讀方法例如利率降低所以估值可以上升，

那麼要去到哪一個水平才屬於高，才需要沾貨呢?謝謝你的意見

龔成老師︰

其實泡沫，係無一個明確的準則，去到計算邊一個位，就算係好危險。

所謂的泡沫，就是「企業價值」與「現時股價」的相差，如果股價遠遠企業價值價值，就是泡沫的概念。

我地可以從大市和企業估值，去到調整我地投資策略(現金和持股比重)，去平衡風險。

就好以現時美股，大市算係合理區頂至略貴，係投資時就不宜太進取，要留有一定現金，去等佢回調，才慢慢加注。

而新解讀方法，的確利率下跌，某程度上係可以調升估值。但同時間，當利率倒轉回升，你估值都會馬上被下調，可能由而一刻合理，變相貴。

所以，我地做估值時，唔好單單睇利率，還要從企業和市場長線發展去著手，才會得出一個較穏當和立體的結論。

------------------------------------------------

Q22182：

龔sir 你好，小弟27歲 收入唔高 每月大約儲到 一千至二千蚊

一個約月前加入市場，希望為未來做個打算，但新手入場 做得少功課 攪到輸多贏少 （亂咁走去玩GME...)，E家就離左場啦

E家大約用三萬蚊拎黎投資，放左係1919(19蚊入，收左息），美股係 Apple 同 Biotech

想問下呢家咁有冇野要調整？

同埋因為儲得少，有冇機會仲做到月供股價？

如果有要點做，同埋有冇推薦？

多謝龔sir 回答

龔成老師︰

我投資股票，就等同投資企業，有一定要認真分析佢質素，例如點賺錢、行內有什麼優勢、長線發展方向、財務是否健康等等。

而且，我地目標一定要係長線，唔好做短炒，這都是經驗之談。

以你27歲年紀，投資上應以增值為主。Apple 同 Biotech 係可以，但Biotech這行業本質風險較高，要控制注碼。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

首先，此股係無派息。你收到是10送3的紅股，但係10送3只是一些財技，你係唔會從中得到益處。

另外，你買入價係貴。此股質素只係一般，現時環球貨運緊張，才令佢收入大升。當回復正常，有機會出現調整。

長線投資價值都有，但唔算好高。若佢佔你組合較多，建議沽出部份，換至其他優質股會較好。

由於你投資經驗不多，加上定平貴能力好弱，你未來都係先集中做月供，去減低風險。

建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$1000做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

最後，你依然係好年青，應好好把握這個優勢，做好財富增值。你現時每月投入資金好少，最好可以增大至收入一半，咁會較理想。

------------------------------------------------

Q22183：

你好呀老師我係初次接觸股票我想問吓你嘅作品裏面我應該睇邊，或者應該係有冇推介邊一本會易明少少

你有時間先覆返我啊唔緊要㗎

龔成老師︰

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的13本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）
《80後千萬富翁》（初版）

你可首先睇以下幾本，會較為適合初學者：

《80後百萬富翁》
《股票勝經》
《財務自由行》

之後再睇其他。

------------------------------------------------

Q22184：

龔成老師你好 ，本人和女朋友一直有follow你的page和買你的百萬富翁系列著作，但今次想為自己父母發問 。

媽媽58歲， 全職主婦， 爸爸63歲，兩年後退休。兩老沒有投資經驗，現在擁有現金80萬。已供完自住樓，樓價現約450萬。

預計兩年退休後會有退休金有600萬。 請問可以如何分配資產，讓退休生活更有保障？ 需要分段購入收息股， 或者可以考慮年金等計劃嗎？感謝你！！

龔成老師︰

由於你佢地都已或接近退休之年，我地投資重點，會係點安排一系列可產出現金流的資產，為地退休生活作準備。

你可以將這$680萬，分成5部分。

第一部分投資收息股，你可以建立一個收息股組合，你可考慮港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之需。同時，若投資市場大跌，你可以在這時買到更多的收息股，股息率會進一步上升。

你可以將$680萬資金，平衡地分配在上述的項目上，對你來說是最好平衡風險，同時有穩定的現金流。

上市收息股︳都在合理區。你現時可以先用40萬，慢慢分注買入收息股，餘下40萬就等個市有明顯回調，才慢慢加大入市力度。

------------------------------------------------

Q22185：

你好，請問⋯ 2318 1475 1909 是否還有質素？

龔成老師：

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型，分注投資都可以。

日清食品（1475）不差的，都算有質素。

佢由日清日本（於東京證券交易所上市）分拆上市，主要於香港及中國內地從事生產及銷售麵條、蒸煮食品、冷凍食品、飲料產品及零食。

本身有品牌，加上業務穩定，盈利都不差。但比較大的問題，是增長有，但發展潛力未算好強，但市場已假設佢有高增長，所以在股價上，只視為平穩增值類別。

內地市場的確係一個增長動力，現價合理，未算平，分注都得。這股可長線的。

火岩控股（1909）有質素的。

佢主要從事開發網頁遊戲及移動設備遊戲（包括遊戲設計、編程及圖像製作）以及授權全球各地的營運商營運集團自主開發的遊戲。

遊戲已在北美、日本、歐洲及中國營運。集團收入主要來自授權費及出售遊戲幣。

業務發展理想，生意與盈利都有理想的上升，賺錢能力強，基本上有投資價值，暫時睇，前景仍是正面的。

不過要留意兩大風險，第一，佢行業是一些變化較大的類別，無人知當中的優勢能持續多久，始終市場變化可以較大。

第二，股價上落大，現價合理區中上部，未算平，投資值博率都有，但未算高。因此，：如果要投資，就要控制注碼。

------------------------------------------------

Q22186：

Sir 1177最近回了好多，我之前$8入了3手，我記得你話我太高入，現在跌到 $7可以再入小小嗎？還是等再回下先？

Sir 另外想請教你點睇 1798 大唐新能源?

龔成老師：

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

現價合理區中上部，有貨可持有，分注或月供可以，這股可以長線持有的。

如果你加注，要慢慢加，不要急。

大唐新能源（1798）主要在中國專注於風電項目的開發、管理及營運。

佢要從事風電等新能源的開發、投資、建設與管理，低碳技術的研發、應用與推廣，新能源相關設備的研製、銷售、檢測與維修等，與新能源業務相關的培訓、諮詢服務，以及房屋出租。

過往的業務發展不差，長遠都有投資價值，不過規模較細，唔建議投資太大注。現價合理區中上部，未算貴。

------------------------------------------------

Q22187：

我想買隻709，我係1.7買左一手所以先留意，我相信佢疫情後復甦番所以一直都冇動作，係奇怪在佢同鱷魚恤呢幾日都好似俾人有心炒起但係又冇咩利好消息咁所以先好奇

老師我想問多兩樣野，我相信我買既都係優質股，但係如果我高追左的話我應該點做？

同埋如果touch wood 真係要放手上既股票套現，我地應該用咩準則去計算邊一隻可以放先？我諗唔明我應該放高增長力先定保守既先

龔成老師︰

若果你買的股票，係有質素，但係買入價較貴。由於企業係有質素，長線係會成長，令股價上升，所以你照長線持有就可以。

記住，買入左一隻股票後，我地唔好再用買入價，作為是否持有指標，而應該用佢質素，去做決定。

至於你現套現的話，可先集中沽出，較無質素的股票。

另外，你可以睇翻邊D股票，無咁配合你目標。好以你現時31歲，應集中在增長股上，一些增長力較弱的收息股，就可以先沽出。

最後，你可以睇埋佢地佔組合比重和現時平貴，將持股較多，或股價已經相對較貴的股票，優先沽出。

但緊記，有質素和適合你的股票，不要盡沽(就算略貴)。必需留有部份，去保持增值才算理想。

------------------------------------------------

Q22188：

你好，老師。希瑪眼科（3309）可以投資嗎？現在是合理價嗎？

仲有1隻歡喜傳媒（1003），可以投資嗎？

1660（兆邦基地產）可以投資嗎？

龔成老師︰

希瑪眼科（3309）有質素的，佢主要於香港及中國內地提供眼科服務，及銷售視力輔助產品及醫藥產品。

另外，睇翻佢，都尋找加大在中國擴展業務，係2019年透過收購眼科醫院於昆明及上海拓展服務網絡及在惠州設立一間新眼科醫院。

除了一線城市，佢亦係昆明及惠州等二線城市拓展服務網絡。

這股在業務上，的確有吸引力的，相信生意將會不斷擴大。不過過現時估值都唔平，現時估值略貴，基本上已反映了企業的增長力。長線投資不是不可，但就唔建議太大注。

歡喜傳媒(1003)多年虧損，無投資價值。

兆邦基地產(1660)規模唔算好大，質素算係一般，不宜投資太多。加上現價偏貴，值博率不高。

------------------------------------------------

Q22189：

老師，我是你剛剛完成初階課程的學生，最近分析1717澳優。澳優算優質股 但行業比較時 發現6186中國飛鶴優質度更高

行業平均pe為19-24，兩隻均處於合理價低

1.如果現時兩隻值搏率那隻會比較高？

2.老師會比這類行業的pe太約是多小？

3.現是政策上對於這類奶粉股長期發展是有利，但在研究要主要那些不利因素？

龔成老師︰

1) 澳優（1717）和中國飛鶴（6186）都有質素，現價大約係合理區中間，值博率相約。

但由佢地過去股價都係較波動，投資時要控制注碼，去平衡風險。

2) 一般都係10-15倍，會係較合理。但較具潛力和規模，好以蒙牛(2319)，就會比高少少，大約可以去到15-20倍。

3) 你主要可以從成本和供求去分析，例如原料價格和成本、中國出生率、行業形象(出現毒奶事件風險)、國際奶價、競爭對手(國內外)等。

------------------------------------------------

Q22190：

你好,我已經睇了你本<80後的千萬富翁>, 比外國作家(有名的)寫的致富書都好.我買過好多致富書睇, 當中包括:

1) 有錢人想的和你不一樣 (我的最愛, 入面教的思維方法很好)

2) 致富的科學 (啟發<秘密>誕生的一本書, 看這更能感受到吸引力法則在錢或財富方面更深的思想)

3) 35歲開始，不再為錢工作：歐洲富爸爸教你賺錢之道 (這是<我11歲就很有錢>作家的大人版, 教人開始儲錢幾好)

4) 思考致富 (我覺得不錯, 但應用內容部份己見過時, 例如分享如何寫CV, 收音機發展那些...)

5) 窮爸爸富爸爸 (這本是借的, 看過一次)

以上的書, 我只留了1和2, 其他都斷捨離了, 因為覺得內容都重覆.

至於你的投資教科書, 我看了<年報勝經>, 覺得不錯, 很易明, 但內容不夠深入. 知道最好是上你的股票班, 但我真的抽不到時間, 因為我不定時工作, 有時要OT至夜深.

希望你可以寫更深入的書, 教更深的知識. 黎緊我會買埋你其他書.另外, 因為我開始做小生意了(兼職), 你會寫做生意, 同埋推薦一些實用性高的書嗎?謝謝你.

這次主要是想告訴你, <80後的千萬富翁>寫得很不錯, 真的, 比我看很多名作家的致富書好, 一來可能是你吸收了各人的大承, 二是你的文筆親切貼地, 令讀者喜歡.

期待你繼續創作寫書.

龔成老師︰

多謝支持，由於估值方法，真係要好長時間講解，你如果上過我堂就會明。所以，較難係書中詳述。

但你若對企業估值，想作進一步的認識，你可以睇《股票勝經》、《選股勝經》和《年報勝經》，會較詳細教你估值的基本概念。

至於實用性較高的投資書，你可以睇《證券分析》和《巴菲特給股東的信》

雖然不如上堂咁完整，但對初學者已經會有一定幫助。

至於創業有關的書，都可以考慮。但因為現時真係好忙，所以重心暫時只能放係股票上。未來有時間時，都可以考慮下。

------------------------------------------------

Q22191：

老師你好，我最近發現屋企人原來買咗幾隻水泥股，都唔少貨，現在蝕咗好多，想請教下應該點算，thanks

- 2233(買入價：1.32）
- 1313 （買入價：9.xx)
- 743(買入價：7.xx)

龔成老師︰

西部水泥（2233）主要在中國陝西省從事水泥生產，以「堯柏」及「堯柏水泥」商標銷售，主要用於建設高速公路、橋樑、鐵路及道路等基建項目以及住宅樓宇。

業務不過不失，雖然都有d質素，但不算好強，產品價格自主能力不高，賺錢能力不算強。可以視為收息股。這類股唔建議太大注投資。

華潤水泥控股（1313）本身有質素的，不過業務就較有波動，佢過往的盈利數據上落都大，因此股價的變大亦會較大。

佢之前公布的中期業績，業務有回落情況。長遠計，房屋、基建發展等因素，都會利好水泥股。因此長遠是正面，現價合理，但就要留意股價上落會較大，自己要注碼上控制。

亞洲水泥（0743）質素只是一般。

佢母公司亞洲水泥集團於台灣成立，並於台灣證券交易所上市。而佢的水泥及預拌混凝土產品主要於上海市和江西、湖北、四川、浙江、安徽及福建省，以「洋房」品牌出售。

這企業的主要生產設施位於江西省、四川省及湖北省。於上海、四川省、湖北省、江蘇省及江西省亦有混凝土配料廠，可生產混凝土供應鄰近的用戶。

佢擁有及經營鄰近主要生產設施的石灰石礦場，供應集團生產熟料所需的全部石灰石。過往都有發展的，但盈利波動大，佢的賺錢能力較被動，整體質素只是一般。

這幾隻水泥股，係有投資價值，只係你買入價有少少高，又唔算好高。

但較大問題係佢地質素上，不宜持有過多。再加上組合太集中係水泥行業，令過度集中性風險增加(個別行業不宜佔組合30%以上)。

因此，你要進行減持，將部份持股，換碼至其他行業優質股，去令個組合回復平衡。

------------------------------------------------

Q22192：

龔成老師，您好。一直都好想報你的班，但係因工作時常出場，現在因為疫情更加被隔離在外不能回港。請問，有無機會有網上課程？

覺得港股越來越難玩，現在手上有 2039, 2866, 6666, 1810, 除了1810睇過老師介紹，

其他的股票越揸越無信心，唔知係咪優質股，睇PE又唔覺得貴，在想應該呢刻止賺或長揸。

龔成老師︰

我同天窗出版社，合作開辦左一個網上課程，題目是關於「資產配置」的，即是講述各種資產與投資工具的特性、投資價值、在財富組合中的角色，至於股票內容就唔算多。你有興趣可睇睇：

http://bit.ly/3pP252j

課程按「人生階段」、「財富累積」、「資產特徵」設計，更有給年輕人、已婚人士、退休人士的精明理財建議。

完成課程後，你會學到：

✓財富系統概念，不再被炒差價的框框束縛；
✓股票、基金、債券、的士牌等資產的運用和買賣技巧；
✓懂得分辨資產質素和平貴，在最合適的時機買賣；
✓如何以最低的價錢，買到最具升值潛力的物業
✓致富3部曲，如何從當下這刻開始啟動！

至於股票班，由於內容太重要，只有實體班，唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

近期環球經濟因素、疫情、中央近期政策等，都令最近市場比較波動。但我地唔好因為咁，就比市場氣氛影響左自己判斷。

我地持有一隻股票與否，都係要集中睇翻佢本身有無質素，唔好被個股價波動，影響左你左決定。

但留意，市盈率只係其中一個估值方法，未必適合所有企業。而且各個行業，市盈率的合理值，都會有所不同，唔可以用市盈率低，就判斷係唔貴。

我地仲要考慮埋企業本身質素，有時市盈率太低，反而未必係好事，可能係反映緊市場覺得這股票，係無投資價值。

中集集團(2039)和中遠海發（2866）投資價值都有，但唔算好高。若持貨較多，可以沽少少，去平衡風險。

恒大物業（6666）有質素，有長線投資價值。

佢係物業管理服務運營商，佢係中國物業服務百強企業中，以項目所覆蓋城市數目計，佢排名第二，如果以總收入、總毛利及總淨利潤計，排名第三。

類別為中高端住宅物業、寫字樓及商用物業，並已訂約管理其他物業類型如主題樂園、產業園、康養項目、特色小鎮及學校等。

佢絕大部分物業管理服務收入，來自集團控股股東恒大集（3333）所開發物業提供的服務，長線發展正面，可長線持有。。

小米(1810)都係一隻有質素的潛力股，你可以持有。

------------------------------------------------

Q22193：

老師，你好。想請教一下，24歲開始月供2800 快一年，每月$1000，今年增加供款2800 $3000,另加多一隻1177月供$1000 。

如果一直這樣供到50歲(供26年)，會有幾多錢呢？

龔成老師︰

我假設投資回報有10%（連股息再投資），你每月投資$4000，26年後大約會增值至520萬。

你24歲還很年青，你要把握好年青這個優勢，去盡力投資，加大複息效應。每月投資資金，最好係可以等同收入一半，咁就會較理想。

另外，我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

你現時係年青，可以集中係「平穩增值股」+「潛力股」。到你接近中年時，就慢慢集中翻係"平穏增長股"。到你近退休之年，就應集中在「收息股」，去創造平穏現金流。你可以睇翻自已年紀，去作出配置。

所以，你唔好諗住一個組合供到老。以下是一些相關股票，供你參考。

潛力股︰、中生(1177)、福壽園(1448)、安碩恒生科技(3067)、港交所(0388)、阿里（9988）、騰訊（0700）、舜宇光學（2382）、小米（1810）、ＧＸ中國電車基金（2845）、三星FANG ETF（2814）

平穏增值股︰港鐵（0066）、金沙（1928）、煤氣(0003)、恆基（0012）、中銀香港（2388）、長建（1038）、粵海(0270)、領展(0823)、希慎(0014)、太古地產(1972)

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

由於現時大市只在合理區，每月儲蓄唔好盡用，要留翻一半，等大市出現一定程度的下跌，才大力度掃貨，然後長線投資。

------------------------------------------------

Q22194：

本人30歲，每月收入4萬，現持10萬現金

以下持股比例想老師幫我分析一下：

收息股（水桶3, 總投資11萬）：
$70.25買（0005）匯豐1600股

平穩增值（水桶2,總投資12萬）：
$52買（66）港鐵500股，
$92買（823）領展500股，
$27.66（2800）盈富1436股，
$4.94買（3662）奧園健康2000股,

潛力股（水桶1，總投資10. 6萬）：
$6.78買（1448）福壽園1000股,
$1. 12買（788）中國鐵塔26000股，
$2. 1買（6068）睿見教育12000股，
$2.16買（1337）雷蛇9000股，
$0. 54買（860）力世紀48000股，

問題1：想問持股比例適合我嗎？同公司質素有冇問題？有部份股票都坐緊艇，有冇邊隻股係應該賣掉轉其他？

問題2：想再買入潛力股，老師最近有否推薦新的潛力股？

問題3：力世紀（860），見佢先前從事珠寶業，近年轉型做豪華電動跑車，覺得佢管理層都正面，佢收購左Apollo 條生產線，德國汽車工程服務外包提供商ideenion,

亦同上海金橋簽訂合作協議，並於今年下半年推出原型車型，可見佢唔係得個講字，而佢既股東陣容亦有雅居樂9％,李家誠9. 25 %,

與李氏關連的維港投資6.3%, TOM集團1. 9%支持，覺得亦有加分。睇過佢既現金流亦強勁，近期股價落至$0. 4, 想增持多40000股，是否有值博率？

佢已經轉型發展電動車，但有d網頁依然會將佢同六福，周大福等既珠寶業比較，其實點解？

問題4：上年與未婚妻聯名買入500萬私樓單位自住用，希望於8年內買入第2個私樓單位（預算約800萬），但感到十分困難，如果只靠投資股票，回報率要有多少才能使我買到第2個單位呢？

而方法係咪應該係儲夠首期，再將原本自住的單位甩名？再用單人名義購買新一單位，但單人又好難過到壓力測試，除非儲了3成或4成首期，感到十分迷妄，希望老師可以指點一下，感謝

龔成老師︰

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主，建議你用「平穏增長股」 + 「潛力股」作組合。收息股，就不宜持有太多。而且個別企業和行業，不要佔組合15%和30%以上，否則會有過度集中性風險。

因此，你應該減持部份匯控(0005)，至其他有增長力的優質股，長線會較有利。

另外，你唔好用個買入價，作為判斷股票質素指標。我地著眼點，應該係睇企業長線質素。如果係有質素，中短期帳面數字虧損，唔需要太在意。

睿見（6068）政策風險較高，要時小注係可以，但不建議再加注。

雷蛇（1337）有潛力，但本質好波動，同樣不宜持有太多。

力世紀（0860）好難分析佢價值，只能說投資風險唔細。

2) 潛力股暫時都係推介以下幾隻，但現時只有安碩恒生科技(3067)、ＧＸ中國電車基金（2845）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘都略貴，想買就要等一等。

安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

3) 力世紀（0860）佢一直處於虧損狀態，雖然已開始發展電動車，但只係好初期，未到賺錢階段。

現時主要盈利，都係來自珠寶產品及鐘錶分部。因此，坊間用佢同六福(0590)比較，都係合理。

最終新能車能否發展成功，都係未知之數，現時新能車方面估值，只係得個"估"字。整體而言，此股好難分析佢價值，加上佢過往有10送1之類動作，我對這類股票較有保留，投資風險唔細。

4) 我比較建議你甩名，因為可以變回首置，從而節省15%印花稅。但壓力測試會較難過，你要預留較多首期資金。

至於股票投資回報，你預10-15%左右，只要你係投資一些有質素的增長股，長線要做到這個回報率，係合理。

建議你用「平穏增長股」 + 「潛力股」作組合，去創造一個增值平台。

策略上，你現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金和現有10萬，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

我假設投資回報有10%（連股息再投資），你每月投資$15000 + 現有資產43萬(股票+現金)，8年後大約會增值至300萬。

你可以用這個結果作為參考，去計劃你每月供款金額和投資計劃。

------------------------------------------------

Q22195：

你好， 本人35歲，已婚，家庭月入3萬5至4萬，與家人同住，需供養4大長老，每月基本開支+2夫婦保險約3萬5，每月可儲蓄金額約5千，現有約15萬股票+15萬現金

完全唔識投資 ，朋友教我買入匯豐嘗試下投資。2019年第一次投資入0005，好快就跌咗4成，有入多一手溝貨平衡成本

幾個月前開始睇你嘅facebook及剛剛開始建倉

現有投資分佈：（平均入手價）
0005：800股 （49.35）
1310：1500股 （9.34）
0636：500股 （23.35）
0823：200股 （76.15）
0066：1000股 （43.8）
ibond : 3手（2024到期）

明白投資應該要分散風險，我想問下我現在剛剛建嘅呢個倉，比例可以嗎？

同類行業不超過30%，單一股票不超過15%， 想問下係咪用金額去計？

因四大長老，只有二人有工作，但即將步入退休之年，家庭開支將會進一步擴大，現在想儲多一點現金以備不時之需。我們能承受的風險不高，短期一年內暫不考慮月供股票

但如果手頭鬆動可能會考慮在大市調整時分注購入平穩增長的股票

請問下領展，港交所及港鐵適合我們投資嗎？ 到我們儲多一點現金後打算月供或分注購入

謝謝回覆及解答

龔成老師︰

我地配置一個組合，除了因應人生階段外，都要考慮到平衡性。同類行業不超過30%，單一股票不超過15%，是一個幫你達至平衡性的參考指標。

我地係會用當時市價，去計算比重。由於股價係會有波動，所以差少少都係可以接受。

以你現時35歲年紀，應以增值為主。匯控(0005)和香港寬頻(1310)有質素，但佢地係收息股，主要收下息，增長力唔會明顯。你可以沽少少，換至較有增長力股票。

而IBOND係收息產品，比較適合退休人士。建議你沽出，贖回資金作其他投資。其餘持股都適合你，可長線持有。

現時大市只在合理區，15萬現金用來等大跌市機會。而沽出部份收息股和IBOND資金，可以換碼至以下股票。

但潛力股增長潛力大，但風險會較高，你要自己平衡。以你年紀，最多可以佔5成。但由於你現時經驗較淺，最多佔3成好了。

平穏增長股︰金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

現時只有安碩恒生科技(3067)、ＧＸ中國電車基金（2845）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘都略貴，想買就要等一等。

未來當你每月有較多空閒資金時，你都可以利用上述股票，作為月供目標，去進行財富增值。

------------------------------------------------

Q22196：

龔sir你好~本人近年才真正認真學習投資,增加知識, 同時近日在重新審視自己倉位/思考手上股票該如何部署. 其中2個問題有少少想不通,想向你請教

1.現時雖處於牛市階段, 但近日恆指走勢向下,再加上內地制定反壟斷政策/不同監管政策, 不利消息令新經濟股價下跌 ;

是否可視為趁低吸納機會,待企業適應這些政策後繼續增長? 我們可以如何理解現時市況&進行出入市部署?

2.當股市進入跌市階段時,是否有需要將資金進行調配, eg.由之前增長較高既股票轉到房地產/公用股當中? 抑或其實可以照樣保留現有股票,

同時靜待一些企業股價回落到合理/便宜位置時,再進行入市?

謝謝你!

龔成老師︰

1) 大市水平，係我地入市與否的其中一個參考。但更重要係睇企業本身，佢股價是處於什麼水平，才去決定入市。

近期中央政府，不斷推出一些反壟斷政策和監管，令很大大型企業股價受壓。現時不少由過往略貴，回至較合理水平。

表面上，因為咁樣出現左入市機會。但我地都要了解翻，這些政策對這些企業，有無造成長遠影響。如果有，我地估值可能要進一步調整，或者控制注碼，去平衡風險。

2) 當大市下跌，估值好似平時，我地就會加大持股比重，投入更多資金，去買入優質股。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

不論大市在高定低位，都不會影響我們投資選項。市場平貴，純粹只會影響我們入市策略(即現金和持股比例)。但所投資的股票類別，係因應人生階段，所以係不變的。

只要現時持有股票，係適合你年紀，而長線質素又無變壞，就算跌市，你都應該一直持有。

至於入市時機，我地唔會等到佢平，先至開始入貨。因為我地唔會知，這些優質股，係唔係一定有機會，回到平宜水平。

因此，我地會因應自已資金多少，去分成多注咁入貨。係合理區頂，只會小注。回到合理，開始慢慢加大力度。到平宜區，才大力掃貨。

咁就可以平衡價值波動風險之餘，又不會出現完全入唔到貨的情況。

------------------------------------------------

Q22197：

成sir. 之前見你對40歲少股票，多現金的見解，實在擊中心房。

本人已48，冇樓，只是揸住200萬現金，有感樓及股都實實在太貴，故過去一直等跌市，結果錯哂。

求見解未來在房及股怎樣做打算比較好？現在應買樓嗎？同埋建一個約100萬的倉應怎規劃？實在困惑無比。希望賜教，謝謝！

龔成老師︰

由於香港樓房屋供應失衡，相信長線維持上升，機會係會較大。

而是否買樓，從投資角度，而時租金回報率不高，應先投資優質股會較好。但若從自住角度，只要物業係附合你長線生活需要，而你長線又＂供得起"，咁置業都無問題。

至於投資優質股方面，你可以投資優質，平穏增長股，作為投資目標。現價在合理水平，你可以將100萬分成多注，可慢慢入貨(唔好一次過去入貨)。

餘下100萬就等大跌市出現，才出手掃貨。或者此期間，你物悉到合適的自住樓，你就用來做置業基金，都係可以。

------------------------------------------------

Q22198：

龔老師你好，follow了你大半年，零經驗的我都好同意你長線持有嘅說法。

今年26歲，每月可儲$10000，最近都想入手,盈富，港鐵，領展，請問咩位入係最好的？如何分配？有什麼要注意， 謝謝～

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你26歲，應以增值為主。盈富(2800)、港鐵(0066)、領展(0823)都適合你，建議你以盈富作主力。

但你現時無投資知識和經驗，對企業估值，點去定平貴未必會太了解。所以你先利用月供模式(暫時唔好自行定平貴入貨)，去做增值，可以減低買貴貨風險，對你而言會較理想。

現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

由於你係較年青，長線可以加入一些潛力股，去增升組合增長力。以下都是一些有質素的潛力股，你可以參考下。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22199：

丫sir 唔好意思又麻煩你，我想為隻（1558）東陽光藥估值 ，但發覺現時醫藥行業股既pe 都好高，我試將市值由高至小，

pe 唔過50既6隻股票做一個平均數得出黎係31pe 請問呢個數據可相性高嗎？

另外我拎1558 （東陽光藥）5年平均pe 為25.6 ，最有代表性既eps 為1.18，但佢係20年發紅股1送1 令佢pe 大減 ，

所以我將佢平均pe 減半變成12.8 同時都將行業pe 減半變15.5。

估計合理pe 約12.8-15.5倍估算合理價為12.8x1.18-15.5x1.18

15-18加多10%緩衝=13.5-20

我計得啱唔啱。唔該丫sir

定我應該再減半多次 變成6.75-10呢個先係佢合埋價

龔成老師︰

你計算的基礎，基本上係正確。但數字判斷方法，有些地方係要修正。

首先，現時很多醫藥相關企業，好多都被炒到好貴，所以PE都偏高。加上這些企業，上市時間唔算長，參考價值會被打折扣。

行業本身係有發展潛力，但一般需要較長時間去投資。東陽光藥（1558）本身係有質素，但佢收入較集中在磷酸奧司他韋，考慮到專利到期時，會對佢造成不利等問題。

BOC網中每股盈利，已經考慮了這個1送1影響，所以你計算每股盈利時，唔洗再調整。

至於佢PE大跌，唔係因為1送1紅股。發送紅股，每股盈利和股價係會同時下調，因此唔會影響到PE。

你記翻上堂教你的PE架公式，係市價/每股盈利。即係PE大跌，主要原因應該來自股價大跌，或/和每股盈利上升所致。

於在2020年，受新型冠狀病毒肺炎疫情影響，中國國內人口流動性降低，醫院的診療活動數量、處方量及藥品銷量也隨之下降，因此集團收入有較大下滑。

因此，好明顯不是後者，而是因為前者，即股價大跌所造成。

由於這個是一次性問題，相信唔會長線影響企業，係我地計算每股盈利時，應排除2020年數字會較好。用過往4年平均，約為HKD1.276。

係估算合理PE時，因應企業產品種類、發展潛力和未來面對風險，我地要向下調，你預大約6-10倍。合理價，大約HKD7.7-12.8。

東陽光藥（1558）不是零質素，但業務有少少轉弱，加上業務都有少少風險。雖然現價係吸引，但某程度都係反映市場對佢睇法較淡。

因此，此股係可以投資，但唔可以太大注。

------------------------------------------------

Q22200：

想問下網上有講按揭存款掛鈎戶口可代替交息的概念？ 但睇左唔係太明, 想請教下你, thanks.

想問下如果自住的話, 其實青衣(藍澄灣/ 海欣花園)或者深井(浪翠園/碧提半島) 呢2區作為選擇，請問老師有咩建議? 覺得邊區會好D & 升值潛力好D呢?

唔好意思呀, 突然問幾條問題, 知道你好忙, 但仍細心解答我既問題, 萬分感謝!

龔成老師︰

其實簡單咁講，就係你可以存一筆錢落去個戶口，佢派息金額係足以和你按揭利息支出，作對沖。

但佢會限你存款金額，會係等同你按揭的一個百分比。至於多少，你可以問翻銀行。

從投資角度，青衣(藍澄灣/ 海欣花園)會係較好，始終交通較便利和較近市區。

但這是你自住樓，你要考慮埋你長線生活需要，你要諗佢地配唔配合到未來5-20年生活。若然係可以，又供得起的話，置業係無問題。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19481-Q19500）

Q19481：

龔sir，第一次inbox，多謝你願意花時間指點迷津。

本身從未諗過投資，鍾意消費，有剩先儲，錢都儲得不多。只係人越大越發現如儲現金想買樓，無父幹係天方夜譚。我睇過你兩本著作《財務自由行》同《股票勝經》

覺得你所講既買入企業價值呢個核心理念好正確，因此手頭上既股票都會以長揸為目標。

我本身對數字唔敏感，更加無金融方面既知識，依家未有能力分析股票既價值。因此決定先月供股票儲資產。希望日後有機會上你堂再學多點！

背景：
27歲 未有家室 未有物業
月入5萬 開支18000
已投資股票15萬
現金23萬

目標3年內儲100萬！

已入手股票：
京東健康 100股 170.4@
盈富基金 1000股 24.87@
小米 1400股 16.85@
陽光房產 2000股 3.72@
比亞迪電子 500股 35.3@

另加美股約5萬

我打算先開始月供12000港股，睇過龔sir既介紹，諗左個組合出黎：

2800 盈富基金 $5000
0002 中電控股 $2000
1211 比亞迪股份 $1000
1810 小米 $2000
2382 舜宇光學科技 $2000

但最近見1211升好多，是否應該先轉供另一隻潛力股？
始終係呢個年紀想投資多d潛力股先，所以我應該只集中供一隻收息股（盈富），其餘全投放係潛力股？多謝龔sir賜教

我想一步一步養成儲蓄習慣先
將來會儲多點月供會加碼，務求早日達成目標！

祝身體健康，長搵長有！

龔成老師︰

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

雖然你暫時未有物業，但這刻先以股票集中做好財富增值先。

初學者當未能掌握平貴，用月供去儲貨，係一個最穏健的做法。

比亞迪（1211）現價計係貴架水平，月供最好都等到$120以下才開始，咁會較理想。而盈富（2800）唔係收息股，佢派息率唔算高，但有一定增長力，都適合你。

組合上，潛力股和平穏增值股比例合適。你可以用這個月供組合，每月餘下資金先儲起，用一邊月供一邊儲蓄的策略。

現時大市在合理區，23萬資金和每月儲倒的資金，就等大市出現一定程度的下跌，才大力度掃貨，然後長線投資。

而你持股中，陽光房地產（0435）主要用來收息，增長力唔高，唔適合你。因此，暫時唔好再加注了。

你這年齡，雖然可以投資更多潛力股，但前題是你都要有一定的投資實力，因為潛力股要求的技巧與承受風險較多。

------------------------------------------------

Q19482：

老師您好，我最近留意到823，778同2778呢三隻reits類型既收息股，但睇返佢地各自個息率都有幾大分別。

如果想揀其中一隻用黎做穩定收息既話，請問會揀邊隻比較好啲，麻煩哂

龔成老師：

3隻都是不差的收息股，但由於持有物業類別不同，因此都有不同。

領展（0823）會有增長力，置富（0778）則較穩定股息較好，所以要睇你要那類。

至於冠君產業（2778），都有質素的，不過風險度比置富略高。

------------------------------------------------

Q19483：

你好，對於一個剛剛在社會打聘左一年，戶口數字就接近六位數字，成積是否算不錯？

以下是我的部置
1.中芯×1000股
2.小米×600股
3.中銀香港×1000
4.煤氣×1000
20000現金
是否可取?

龔成老師：

這是一個不差的成績！是很好的開始！

你要繼續努力，你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

上述的4股都是有質素，可以持有，整體的分配無問題。如果你能承受風險，以及投資有實力，其實可以加多少少潛力股。

------------------------------------------------

Q19484：

老師1153有投資價值嗎？

龔成老師：

佳源服務（1153）質素不算差，但又不算好強。

佢係浙江省的綜合物業管理服務供應商，管理的物業組合涵蓋住宅物業、工業園區、多功能綜合體、購物中心、辦公樓、醫院及學校等。

佢由佳源國際控股（2768）分拆於香港聯交所上市，並主要提供以下三項服務：

（１）物業管理服務（２）非業主增值服務（３）社區增值服務。

業務不差，生意穩定及保持增長，都有盈利，不過規模不大，加上母公司規模不算大，都令發展力只是一般。現價合理區中上部，投資價值都算有，但不算好強。

------------------------------------------------

Q19485：

龔sir 岩岩上完你股票班 感謝分享

以下是我打算的投資組合 可比點意見嗎？ 今年36 歲。
每月打算儲15000， 7-8k 買股票

現持
0823 200 股 @63
0002 500股 @72.1

未來
1177 月供$1000
1448 月供$1000
2382 月供$1000
823 想$65 再入2 手
6823 月供1000
20000基金（ 3 厘回報）

2.如果想買金沙， 現價約33$ 應該直接入還是月供？

3.我另想用20 萬投資（已留現金）， 請問應該如何配置？

4. 考慮緊入同仁堂， 現價$4.8 值得入嗎？

龔成老師：

1）36歲，仍是財富有增長力的年齡，你可以投資平穩增長股+潛力股。現時持股雖然有質素，但增長力不強，你之後加上月供潛力度高少少的股，可以。

你打算買入及月供的，都無問題，香港電訊（6823）是收息類，未必太適合你。

如果你能承受風險，可考慮月供安碩恒生科技（3067）$1000。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

2）現價合理，如果你資金足夠，可現價入。如果現金不算多，就月供。

3）平穩增長股+潛力股。

平穩增長型：你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力型：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

4）同仁堂科技（1666）小注可以，這股都有質素，但增長力比過往減。現價合理區中下部。

------------------------------------------------

Q19486：

你好，想問下內航股走勢，想入753 or 670 。
感謝

龔成老師：

兩隻中中國國航（0753）會較有質素。

中國國航（0753）主要基地位於中國北京，亦係中國最大之商業航空公司之一。

主要業務包括航空營運業務，即提供航空客運及貨運服務。以及其他業務包括提供飛機維修服務、地勤服務及其他航空公司相關服務。

過往多年，生意與盈利都算有上升，不過，有時會因經濟等因素令佢有點波動。

不過，質素未算最高級別的類型。

其中一個風險，是油價。油價對佢成本影響好大，令盈利有波動。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

現價合理，經濟好轉與疫情過去對佢有正面影響，但由於本身不是好好賺，因此，又唔值得投資太多。

------------------------------------------------

Q19487：

龔先生你好,我比你本股票勝經吸引而買左
剛剛開始睇,但有d不明白之處, 望指教：

內容提到複利息, 我明白公式計法, 但如何應用呢？

例如我買左一隻股票每年有息收, 所持有既股票繼續在證券戶口, 你意思收到既息儲下仍放在戶口, 滾存再買另一隻股票, 對嗎？ 我不明白複利息如何應用在買股票上.

龔成老師：

複利息的概念，其實我地投資股票，就是買入企業，而企業本身會賺錢，然後再投入落企業裡滾存，企業會以複息的模式增長。

同時，你買股票會收到息，你只要將利息再投入該股，不斷買入股票，財富就能產生複息力量。

------------------------------------------------

Q19488：

你好呀，龔成老師！經過朋友介紹，留意到你嘅Facebook專頁。看完一個月真是獲益良多，非常感謝你的分享。我有問題想請教下你。

我現時工作了5年，因為沒有理財知識，主要都係靠慳錢定存而儲蓄。現時大概有90萬元，九成是現金，其中部份金錢就做定期，餘下有3手政府ibond，而因為聽聞滙豐是穩定收息

大概一年半前從高位入咗2手匯豐（$69），但是仲沒有放，現在價值大概3萬多元。

睇左你個FB大概一個月，明白到資產增值的重要性，而現金不是資產更會眨值，股票樓宇才是比較重要。

想投資但是不知道該如何分配，而且想在未來大概2年內樓市下跌時入手。

我現時打算以長期資產增值為目標，可以承受中至低風險。

睇完你FB後打算投入10萬元分批每季購入盈富和領展，股票比例是否太少？而對於股票選擇
想請問老師有什麼意見？

另外，我計劃預留10萬元作中高風險較高回報的投資，不知道基金是否一個好的選擇？

除此以外，想問請可以先拜讀老師哪一本著作先？因為時間不多，一方面不想未準備充足就入市，另一方面又怕錯過時機。感謝老師

龔成老師︰

現金係可以無限量發行，長線只會貶值，不宜用來做財富增值。我地應該集中係優質資產，好似優質股票、物業等。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你只工作了5年，相信你是位年青人，組合應以增長力為主。IBOND、匯控（0005）都是用來收息為主，不宜有太多。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448），但這些股票風險較高，你要自己平衡。

現時大市在合理區，你現有90資金可以先投入一半，用"分注"形式，慢慢買貨。餘下一半就等大跌市，才大力度掃貨。

書本上，你也可以睇我寫架"80後百萬富翁"、"財務自由行"和"股票勝經"。

------------------------------------------------

Q19489：

你好～京東健康 現價值唔值得入？如果現在入一手 如何？

另外華潤萬象生活 值得長線投資嗎？

你好！福萊特6865 同 信義光能 現價值得入嗎？ 那一隻比較好？

龔成老師︰

由京東（9618）分折出來京東健康（6618）其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大，同時暫時計唔平。如你只是一手，可以的。

華潤萬象生活（1209）由華潤置地（1109）分拆於香港聯交所上市，主要從事住宅和物業管理服務。

此股都有投資價值，但佢剛上市不久，參考數據唔多，很難估值，暫時只宜小注投資。

福萊特玻璃（6865）和信義光能（0968）都有質素，主要在中國生產及銷售光伏玻璃。

你預佢盈利會比較波動，因行業有一定不確定性。現價偏貴，要回較多才算較合理。

------------------------------------------------

Q19490：

龔成你好 ，很多謝你不厭其煩的分享價值投資法。在耳濡目染下終於擺脫短線持股、享受到股票倍升嘅回報。
讀了你幾本著作及跟進你的post後有幾個問題想請教：-

1. 記得你話現在市況適宜保留一定現金，可能約40-50%等大跌時入市。但又明白現金長線只會貶值

那若大市一直沒有大跌或到便宜區（可能會等好幾年？
）那一直手持那麼多現金怎辦？可否分享以你為例，
你現在手持的現金百分比是多少、平均年度持股百分比又是多少？

2. 知你一直很推介中國電塔，原因是國內3大電訊商都是他的客戶。但我認為正因他的成立是要服務各大電訊商，那他怎能有好的利潤/profit margin? 想看看你對我的看法有何意見？

3. 請問你怎樣比較平安好醫生、阿里健康同京東健康？我buy線上睇醫生嘅長線概念，本來想等價買平安好醫生，
但發現他的賺錢能力還有好一段時間才能改善，所以不知三者那個較好。謝謝

龔成老師︰

1）我地點都要留一定的現金，除非你見到大市大跌，處恐慌期，同時好平，否則，留有一定的現金是需要的。以現時的市況平貴，你預要留3-5成現金，當你不斷有收入，現金的比例會增加，其實就算未大跌，都可以適度入市。

我在大一般的市況，會留3-5成，之前2020年頭跌市，就用了部分「之前儲起的現金」，令現金數跌至2成左右，然後又因為有收入加上大市去翻合理，現金比例自然上翻3成。

2）你的想法都正確，由於佢客戶係3大電訊商，議價能力會打折扣。

但我地會睇埋成個行業架發展，佢會因為5G而直接受惠。加上佢在內地極高市佔率，是內地鐵塔龍頭，有壟斷優勢，因此長線整體發展會唔錯。

不過，佢的增長力的確無過往咁強，但質素仍在的。

3）京東健康（6618）、平安好醫生（1833）和阿里健康（0241）都係有質素和潛力，但問題係佢地是有危有機的類別，雖然業務增長好快，但這刻仍處於現金流不強的狀態。

估值上好困難，因為無實質的盈利數據作為基礎，我地這刻只能靠"估"，好難明確話邊隻明顯係好D。

暫時睇現有數據，值博率會係平安好醫生（1833）較為佔優（以長期業務增長力）。這些企業都可投資，但緊記只宜小注。

------------------------------------------------

Q19491：

老師你好，我22歲，而家累積左五十萬儲蓄，沒有任何投資過的經驗，請問可以如何入手，透過投資增大自己的資產？

龔成老師︰

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

平穩增值股︰盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

若你對這些股票都唔認識，可以先集中在盈富（2800），佢係包括52間質素不錯上市公司股票的組合。

現時大市處合理區，你可以先動用一半資金，慢慢咁分注入市。餘下一半，就是等大跌市時出手。如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19492：

睇左你4-5本書，終於明白多d，現金變資產既理念，會逐步將之前既股票轉做一d更有價值既資產

我想問，我現在有大約30萬現金，對於0788有d搭糖，因為5G發展，佢似乎係其中一個巨頭，配合未來5G既發展，應該是不錯的資產股。

但我同時明白，買入價會影響回報，但我仲未識計合理價同便宜價（遲d會上堂架啦），想問現價1.16，是合理價嘛？

佢既合理價同便宜價係？如果我把30萬全部買佢，可以嘛？

龔成老師︰

中國鐵塔（0788）有質素和前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入正不斷增長，盈利都保持向上，但股本回報率不高，是這股較弱的地方。現價在合理區中間位，可分注，慢慢入貨。

但留意任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單個別企業不要高過15%。

------------------------------------------------

Q19493：

請問0027 現在一個月低位 可以入嗎？
請問合理價/入手價大約應該係幾多

龔成老師︰

"一個月低位"是一些短線技術指標，唔建議用佢來做參考。

股票平定貴，我地應用佢長線質素、行業前景、財務狀況等基本因素來做判斷。

銀娛（0027）現價算是合理區中上部，可分注。但未算平，故要控制注碼。

------------------------------------------------

Q19494：

想問下sir, 1579頤海國際，6862海底撈，9922九毛九，哪隻會比較優質，它們都屬水桶一的股票嗎

龔成老師︰

頤海國際（1579）、九毛九（9922）、海底撈（6862）都係有潛力股票，算係水桶一至二之間。

現時估值都係貴架水平，值博率都唔算高，你投資要注意風險。

若考慮整體質素、品牌等，海底撈（6862）會係當中較優勝的一隻。

佢以「海底撈」品牌經營火鍋店及外賣業務，火鍋菜單由鍋底、醬汁蘸料以及在鍋底烹飪的食材三個主要部分組成，可點單鍋、鴛鴦或四宮格鍋底組合，餐廳提供多種調料及食材，以及供應小吃、酒和飲品。

在中國有好多分店，以及外國都有。

生意增長力強，有規模，有品牌，整體正面。相信長遠仍有發展的。

不過，這股市場比佢好高估值，現價貴。如果有貨可長線，但無貨最好跌翻D先考慮。

------------------------------------------------

Q19495：

龔老師，你好！想請教一下關於比亞迪的問題。我本年5月開始月供$1,00比亞迪，至今7個月。

平均購入價為114左右。我見比亞迪的價錢月來越高，是不是應該暫停月供呢？

（備註：每月$1,000月供不是問題的）謝謝你！祝 聖誕快樂，身體健康！

龔成老師︰

比亞迪（1211）係一隻有質素潛力股，如果你係年輕至中年人士，係適合。

月供雖然可以平衡價格波動，但當個價係異常地偏高，我地就應考慮減少，甚至停供。

比亞迪現時係貴的水平，月供應該停一停，等回到$120再開始。

------------------------------------------------

Q19496：

老師，請問TCL電子屬於潛力股嗎？

龔成老師︰

TCL電子（1070）全球最大的電視生產企業之一，其產品銷售遍及全球各主要市場。

集團本質不差的，業務穩定，生意不差，有持續的盈利。不過，過往的增長力該就不算強，稱唔上係潛力股。

此股負債略高，係一個唔理想架地方。現時估值，可說是處合理區水平，可分注。

------------------------------------------------

Q19497：

龔sir 你好呀，近排留意隻信義玻璃 868 想買入並長期持有

但依家持有1762 萬咖壹聯同 6988 樂享互動 2隻都蝕緊
分別 29%同9% 想問下仲可咖可以持有定或者要止蝕

多謝你既意見同時間

龔成老師︰

一隻股票是否持有，係睇佢質素和前景。買入價只係心理因素，唔好用佢來考量。

萬咖壹聯（1762）上市年期唔算好長，我無仔細研究此股，初部睇佢業務上，都算有潛力。

由於2020年中期業績有所回落，而且佢本身上市價唔平，過去市場對佢預期很高。當市場覺得佢表現不似預期，就會出現較大回調。

雖然佢回落不少，但現價只是較正常水平。如果佢佔你組合唔多，可以守住先。

樂享互動（6988）於內地專有商業智能技術（包括數據收集、產品分析、產品推薦等）及平台在行業客戶與自媒體發布者之間架設紐帶及提供服務。

同樣地，都係上市不久，都要一段時間才見真章。以2019年盈利計，現時估值十分高。若現貨不多﹐可以守。

信義玻璃（0868）長遠正面，不過就未必是高增長的類別，潛力度比過往略有減少。

加上佢不斷將較高增長的業務分柝左上市，令現時的信義玻璃增加，只是平穩類。

現時估值偏貴，投資值博率一般，回翻少少才可以入貨，或只小小注等跌先正式入。同時，你預佢中短期會比較波動，要長期先見到收成。

------------------------------------------------

Q19498：

龔sir 請問868及2331 是否有足夠的潛力於現時去投資？

龔成老師︰

信義玻璃（0868）近年的增長力弱左，不過，佢在技術上的行業優勢仍在，相信長遠仍是正面，不過就未必是高增長的類別，潛力度比過往略有減少。

加上佢不斷將較高增長的業務分柝左上市，令現時的信義玻璃增加，只是平穩類。

現時股值己經係貴，回翻D成才算合理區。你要預佢中短期都會比較波動，長線才會見倒收成。如真的想入，現價少少注好了，等跌先正式入。

李寧（2331）本質不差，本身有品牌，生意與盈利都有理想增長，賺錢能力不錯，相信前景正面。

但現時已經貴，你預佢起碼回較多，才算合理水平。

------------------------------------------------

Q19499：

你好，我現時持有0066和2628
兩隻都係剛剛開始月供

0066供左雨個月，現價覺得高，會視乎情況去供
2628覺得如果價在15.7--17.5(暫定)，會月供2000

但我幾隻股票想問下你的意見

005滙豐，如果價去到36-39，可否入貨？
941中移動是否有潛力，長線持有？
0012恆基地產價格都是3年低位，地產一向回報唔差，可否長線持有？

823房產信託基金你睇好長遠前景嗎？

按道理，呢四隻個價都係2-3年低位，是否值得考慮(它們市賬率低過1，係咪可定性抵買？)

龔成老師：

月供股票唔應該太多變化，一般是5年的投資，最少都3年。你要想清楚，這些股是否優質，是否適合你，在長遠你的財富組合上，發揮那一個作用。

港鐵（0066）有質素，你長供都得，短期內不內停。至於中人壽（2628）雖然都有質素，但增長力比過往年代減，你在$18以下先供，都可以的。

至於匯豐（0005）$39以下合理，但你預佢只是收息，增長力不強，所以要睇翻你的投資目標。

至於中移動（0941）同樣只是收息股，現價合理。

恆基（0012）現價合理，平穩增長型，可長線。

領展（0823）長遠仍正面，不過增長力比過往年代略減。

------------------------------------------------

Q19500：

你好呀老師 我想詢問一下6055 中煙香港 呢間公司算唔算有護城河？

長渣的話係咪一個適合既投資公司?

PS 細佬未接觸你地既書之前買落，賺左幾次短炒，然後再買左幾手壓左住貨。謝謝

龔成老師︰

中煙國際香港（6055）係中國煙草總公司的全資附屬公司，承擔中國煙草總公司國際業務的管理及運營工作。

中國煙草總公司為中國唯一根據國家煙草專賣制度從事煙草專賣品生產、銷售及進出口業務的實體。

業務上，的確有獨特性，不過，上市時間未算好長，真實面要慢慢先見到。加上佢股價十分波動，因此是較高風險的類別，唔建議持有太多。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

🙋🏻‍♀️有磅重控在嗎？(🎉星期日前15% off 連免運 )

雖說減肥要放鬆
體重每天也會上上落落
不過我自己都是習慣了每早空腹（屙埋第一督薯薯）
就會磅一磅來作個記錄

您是腹肌/泡芙人？
近年來看一個人的體態及健康與否
已經不能單憑以往使用的BMI來做為標準
因BMI只看體重，忽略了體脂和肌肉量的計算
舉例來說假設有兩個身高163cm的女生，
體重都是53公斤，
但是一個體脂肪是22%，
一個體脂肪是36%，
就算兩個算出來的BMI是同樣的數值
一個可能有看得出來的腹肌，但一個已經是所謂泡芙人

體脂率是什麼？
體脂率是指人體內脂肪重量佔總體重的比例，它反映人體內脂肪含量的多少。體脂率 = （脂肪重量 ÷ 體重） × 100%
體脂對體型的影響比體重更重要。相同身高體重的人，體脂率高的人看起來會比體脂率低的人更胖。

Why inBody?
inBody可說是市面上堪稱最精準的儀器
InBody是一個量體脂肪的指標，
一台商用Inbody要價不斐，大概要5-8萬
（成為我gym room的學生當然可以來任check xd )

InBody 家用版。
好消息是這個品牌發行了家用版的體脂儀
比起普通家用體脂秤（多為單電流測量，eg 小米，絕不準確）
準成度、重覆性、準確性都更高

InBody Dial H20技術。
是一款無線智能分析儀，
讓用家可以觀察體內脂肪，
而且在分析儀上可顯示身高/體重/身體脂肪百分比/肌肉量/內臟脂。
用家亦可配合智能手機應用程序使用。
利用生物電阻抗法測體脂率，即「BIA測試法」。
體脂秤上有8個電極片，
利用電極片發出的微小電流測出身體阻抗值，
結合測試者的身高、體重、性別，
利用國際公式算法模型推算出該阻抗值對應的體脂率。

InBody Dial H20使用。
建議可以考慮買一台體脂計，
2~3千塊可以用很久，
而且全家都可以量。
自己有一台的話比較方便，
隨時想量就可以量，追蹤自己的進度，並從鏡子看自己體態的變化

InBody歴史。
InBody是世界上智能體測儀歴史最久的品牌次一
InBody智能體測儀匯聚了InBody在體成分分析領域20餘年的研究成果和所有先進技術。
為得出精準的測量值，使用獲得了發明專利的8點接觸式測量法。

有意請到以下官網訂購

https://inbodyshop.com/products/inbodydial

付款前輸入discount code: 15offhk
本週日前可享15% off和免運費❤️

P.S 記得選paypal 付款，不用賬户也能使用信用卡