《第一次見…應唔應該約佢睇數碼暴龍？》 / 「你傻架？bumble profile成個文青，但帶人睇毒男戲？」南哥如是說。 「你唔係有兩個小朋友，你估你會睇魔髮精靈？」Jason好串嘴回答。 「你又唔可以咁講，魔髮精靈又幾好睇架。」南哥回應。「喂！傳波啦！」 / 疫症繼續漫延，球場開封無期，幸好還有網上世界，可以同兩位兄弟隔空打波。今晚Jason女友回娘家，終於不用打動森，可以回歸NBA的世界。不過比賽第二，吹水第一。南哥有老有嫩，老婆不想南哥亂見人然後亂帶菌回家，「小心D好」是南嫂的口頭禪，所以南哥無得選擇。幸好近來本地感染個案變回零聲少數，早幾天南嫂破例，一家大小可以去看看戲，但首選當然是合家歡卡通片。成為父親的男人，最後的station就是Play Station，可惜，童年回憶的FF7 remake，暫時也只能FF。 / 「可以打牌，可以做facial，可以跑步可以健身，但唔可以打波。咩道理？（下減100句粗口）」Jason喝了兩三杯就激進起來。 / 「不如講返正題…應該睇咩好？」我好認真回應。玩了Tinder咁耐，被人玩咗咁耐：保險、傳銷、男扮女、豬皮扮舒淇等等等等等…轉玩Bumble，終於遇到一些正常人，不過一玩就有肺炎。App度傾了數個月，終於有機一見。對上一次拍拖已是數年前，沒練習太耐，感覺有點追不回來。所以才請教兩位兄弟的意見。 / 「鬼片係王道。新上有《女鬼橋》，《紅衣小女孩》班底點都有D保證。想搞笑嘅睇《女神撞正基OL》，不過泰國笑點嘅笑點啱唔啱佢就唔知啦。」Jason都叫影迷一名，所以會留意新戲。 / 「女鬼橋？我淨係聽過菊梓喬咋喎！」食字gag我好有信心。 / 「哈哈，你咁好笑，拍返套《笑年的你》啦。」Jason又清了一罐啤酒。 / 「一係入場睇返D舊戲，哥哥套《阿飛正傳》、《白髮魔女傳》上返。再唔係睇套法國片《醫生速遞》。個電台DJ話幾好笑。不」南哥早幾日揸車咁啱聽到一個叫《二台院線》嘅節目，扮搭到嘴。唯獨我…看了網上交友101的文章，說時下最流行文青打扮，個人簡介又打上幾句王家衛的電影金句，但我其實好王晶多過王家衛…愛動漫多過愛看書，即是曲型毒撚扮文青…所以數碼暴龍一映…身體就最誠實… / 「有人話肯陪你食麥記嘅女人娶得過…咁一個肯陪你睇數碼暴龍嘅女人…應該都溝得過…對吧？」我繼續陷入苦思... / 「車！都係D人吹出嚟架啫。同埋食一個麥記最多咪半個鐘，唔通你食法式麥記咩。佢唔gur都只係忍你半個鐘。但你睇套戲唔同喎…硬食個半鐘，走又落你面，唔走又自己無癮。我真係好少聽過有女仔係數碼暴龍迷。」Jason又清了一罐啤酒，然後認真起來。 / 「你諗返細個拎住部數碼暴龍機同人對打個陣，有幾多個女仔？唔通你睇完同佢分享你點chor機，點辛苦將隻鼻涕獸變熊仔獸、同埋係佢面前唱日文版嘅主題曲咩？」南哥補多兩刀。 / 我人生第一次識唱曬成首日文歌就係數碼暴龍的主題曲《Butterfly》。細個當然聽浩南哥唱中文版，但之後聽過和田光司唱的不同版本，一首本身帶有搖滾風格的熱血歌曲，原來也可以唱得咁深情。小時候沒什留意日文歌詞，但當看完數次數碼暴龍後，才知道日文版和劇情呼應得如此貼近…亞古獸、數碼世界、友情、勇氣、正義、向前衝的決心…一睇劇場版的trailer…一聽首主題曲就起雞皮… / 最重要…今次是太一、大和跟亞古獸、加布獸的最後進化…真正的集體回憶，比54億也救不了的終章… / 「一係咁啦。你自己一個人去睇，然後約佢去睇第二套戲咪得囉。一條友去戲院有乜問題？我之後一定諗辦法甩開老婆同對小朋友，一個人去睇《我的英雄學院》」南哥拋下是夜遺言就offline而去。 / 嗯…一個人睇…都好似係唔錯的提議… #攝時間劇場 #數碼暴龍 #LASTEVOLUTION #絆 #好耐無寫故仔 #決定諗到乜 #就寫乜 #無收錢 #抒情文 @neofilmshk