【假如旅遊人生已經完結，你最無悔去過邊度？】 Backpacking識到嘅朋友聚會講起，大家都有一番討論。當你開始覺得疫情唔會完，再加上香港政府嘅防疫政策，分分鐘疫情完咗你要出境都有困難時，有朋友好灰心咁諗，就算你打埋針，可能從此都再冇機會去旅行，除非你移民。如果真係有呢一日，喺你以往嘅旅遊人生入面，最無悔咩地方？ 由我第一次去長旅行、開Page到今日，其中一個座右銘都係：「不要相信一切有下次。」雖然（希係係暫時）冇得再去旅行，呢個時候最能體現到。 傳統香港人會覺得後生梗係要儲錢、有錢你方第時老咗冇得去咩？有工唔返去旅行，退休你驚冇得去咩？兩年前，你估都估唔到，有朝一日你真係有錢都去唔到，大吉利是講句，可能你唔去，一個疫情，你死咗或大病一場後，想去都冇得去，已經唔係講緊打唔打針嘅問題。 成日都話，有機會有錢有時間，後生唔好成日去日韓台，呢啲你就真真正正老咗都有得去，喺你有機會果陣，就要去遠啲、去啲老來去唔到嘅trip。嚟到今日，我哋終於明白，自己過往呢啲日子，係冇揀錯。 一班Backpacking朋友經歷好多，大家就住呢個話題都不斷拋好多奇奇怪怪地方，有人話係西伯利亞鐵路、有人話係去中亞、有人話只經陸路去歐洲、有人話去加拿大追咗半個月極光... 喂呢啲地方、呢啲瘋狂嘅行為，好耐冇聽過喇。 你問我，我都係會揀南美。雖然南美唔係我旅遊人生入面最愛地方，但絕對係最艱苦都最值得去嘅地方，唔好話疫唔疫情（雖然馬丘比丘、復活節島、哥倫比亞等地喺疫情後都經歷翻天覆地變化），係唔會你老咗有錢先至去嘅地方。喺高海拔地區五千幾米下登山、喺每個邊境同唔知香港同中國有乜分別嘅關員周旋、為咗要睇絕境行咗兩日兩夜山、為咗要去神秘景點搭足三日車，就算你唔Backpacking唔玩艱苦Trip，你都要適應當地嘅言語不通、部份惡劣嘅交通同極端天氣，更加唔好講去得南美最少都要一個月嘅長途旅行。老來，我唔覺得有體力會做到，甚至，幾年後今日嘅我，可能對比幾年前嘅體力都大有不同。 假如呢個疫情令你冇機會再去旅行－－雖然席間有人表示，大家作為廢青（如今已成廢中），無所事事要隔離21日唔會輸唔起，但始終都冇以前去得咁free。唔同國家有唔同防疫措施，一個唔好彩鎖國你走唔到又係搵嚟搞、今時今日你仲敢唔敢疫情之下住20-bed dorm？一個疫情，咩都從此不一樣。 大家又喺度拋，如果冇疫情，呢兩年有咩旅遊大計、人生又有咩唔一樣。坦白講，就算唔係疫情，南美一鋪已完咗我好大部份人生夢，我又暫時真係冇諗過要去邊，但有機會依然想完成當年未完成嘅南美之旅。以往你再努力工作儲錢都係為咗去旅行，今日冇咗呢個最大動力，有時又真係冇咩目標咁。 點都好，最少，我無悔以往咁多年嚟所做嘅每個旅遊決定。總相信有啲嘢，就要青春後生有機會果陣做，至今仍覺得「不要相信一切有下次」，無論咩都好，請好好珍惜。 你呢，你又最無悔去過咩地方？ 👉電影網店現貨品低至$5起，請即到bio link搶購！ . 【Patreon加強版】尊享優惠、更多深度獨家電影文章：https://www.patreon.com/travelerwithmovie . 📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://bit.ly/3a9wOzy 或使用Payme link：https://payme.hsbc/jackyhei 或透過Paypal捐款：paypal.me/jackyhei . 【MeWe請Follow】mewe.com/p/travelerwithmovie . #backpackers #hkbackpacker #hktraveller #hktraveler #hktravelblogger #hkblogger #travelforlife🌏 #旅遊 #香港背包客 #香港旅遊 #香港旅行 #馬丘比丘 #南美旅行 #秘魯 #生活感 #生活態度 #生活分享 #文字分享 #有故事的旅人 #travelerwithmovie