［崇優，就梗係唔再去海洋公園］一切由2004年嘅愚人節開始講起，放心，你唔會記得係乜。但嗰年發生咗件改變香港近代史嘅事

1. 之前好似在經濟角度寫過下海洋公園。今次用文化角度。唏，冇話你知，本人根本冇讀過Econ？本人係文青嚟的。金融呢啲，用嚟搵食，滿足我做文青但又唔使拎文化綜援嘅物慾。

2. TL；DR　—服侍香港人又好張家港人都好，海洋公園都應該執。根本唔需要政府錢搞個主題公園。至於執咗佢起樓呀，大家分咗五十億呀，定係做隔離中心搬晒啲友去呀，後話。集體回憶？大劉先係集體回憶！

3. 古語有云，房間入面隻大笨象，冇人開口講，就我講。咁當然，話國王冇著衫個細佬千古傳頌，因為佢只係得罪國王啫。如果佢係指出所有人都冇著衫嘅，畀人亂棍打死啦（例如哥白尼）。

4. 尼采話齋，佢就係個著夜行衣嘅人，光天化日在市廣場（屯門嗰個？），畀人當傻仔。佢就只係話：我來得太早了。亦係尼采話嘅，白晝嘅光，如何理解黑暗嘅深度？

5. 先知就係早你少少知，但先知就係寂寞嘛。不過至少而家唔會畀人燒死，已經好文明。

6. 講完一大輪咩尼采，咁話你知，我半年前就知道海洋公園必死（當然嗰時唔知肺炎啦，知就發咗達）（https://bit.ly/3fCihPY），亦一早話執咗佢（https://bit.ly/2xRzVhw）。有舊文為證。唔係今日先拾人陳慧出嚟講。我亦唔介意好多其實平時同我完全唔同立場嘅人都咁講—大佬，人地食飯你走去食屎咩。Contrarian唔係咁做嘅，唔係人支持你就反對。

7. 但我由始至終，支持海洋公園執笠個理由，同好多人唔同。我個理據係基於右翼liberal思想，即係「市場撚」（＊）「獅子山學會撚」（本人正係付費會員），嗰啲。根本就唔需要用公帑去run主題樂園。乜年代呀大佬？無論個海洋公園係for 香港人定for 大陸人定係for 馬達加斯加人，都係應該收檔。

8. 所以我並不同意嗰個「海洋公園背棄咗香港人」論調（好有「要不是乜乜乜」既大爺感恩feel）。首先，你啲稅收，大家心知肚明，嚟自邊啦。大企業，高人工人士，樓市股市印花稅。基本上都好大程度係「大陸有關嘅錢」。咁大陸錢救大陸公園，又好似冇問題喎？再唔係ring fence 佢，好似隔開啲企鵝波波咁，分開舊錢咯，咁滿意未？

9. 我唔滿意噃。就算係for 香港人，一樣應該執笠。而我好懷疑上帝可唔可以在香港做一個for 香港人嘅主題公園。因為呢樣東西同上帝舉唔起嘅石頭一樣咁上下。成班離地友仲在獻計人地應該點樣做生意，十分有趣。

10. 劉公子話海洋公園係香港人嘅集體回憶，本人不同意。我三十年冇去過。貼錢我都唔去（咁當然你貼幾千我就去嘅）。咁但，當然啦，唔好咁獨裁，你唔去大把人去。唔好自己唔鍾意就覺得唔應該存在，自己鍾意就應該周圍起。呢個係好多人嘅盲點，我地年代叫做A-Club思維（＊＊）

11. 事實因為我唔係小朋友，我又冇小朋友啫。但我問返，其實身邊啲朋友係有人有同仔女去嘅。

12. 不過啦喎，我就問一個問題：你計下你過去十年去咗幾多次海洋公園，洗咗幾錢。然後又計下你過去十年去咗幾多次日本，用咗幾錢？

13. 咁你咪明點解海洋公園會執笠，亦都係必然要執笠咯！重視本地人my ass。冇大陸客死得仲快添

14. 一個字，就係而家啲小朋友好鍾意講嘅，崇優嘛。

15. 我有得去仙台餵企鵝，做乜要去海洋公園對住啲西口西面嘅員工呢？我就冇見日本動物園啲員工西口西面啦。就算有，人地都係講日文！話你知，香港呢，連啲企鵝都西口西面過人的。橘逾淮而為枳，住多幾十年啲企鵝都變晒燒鵝（或者獅頭鵝）。

16. OK，你係員工，你唔西口西面，但你老細西口西面嘛。況且成個配套都唔同啦。我去完海洋公園上Marriot爆房？

17. 事實呢，同香港眾多流行文化嘅消亡一樣，就係因為你「崇優」

18. 你得廿歲嘅唔怪你，但有三四十歲嘅，唏，你應該記得，有一段好長嘅時間（2000-2010？），香港人係以睇港產片為恥，聽廣東歌為恥嘅！而家忽然本土就自有其原因，但歷史不容抹殺嘛。你見嗰時上咩巨聲定乜嗰啲，十個有十一個都係英文歌，國語歌，日文韓文歌。嗰時你約女（OK，係我約女）睇戲，問佢睇乜，人地講明「冇所謂，不過唔睇港產片」。

19. See？呢啲就係高級女文青嘅崇優。

20. 冇錯喎。有人話，「唔通垃圾都睇咩」。正是。咁，唔通海洋公園唔垃圾咩。

21. 咩話？海洋公園好好？咁請你睇多第12段一次。

22. 有啲離題，但當年嘅咩香港流行文化，我敢話，好多都係過譽嘅。你嗰時冇比較之嘛。嗰時一樣有好多五音不全呃飯食得個樣嘅歌星（唔好開名），Beyond都要唱《醒你》，「那萬人迷　走音走爆咪　包裝多過一切」。呢啲咪係當時嘅樂壇面目咯。

23. 抄歌，抄造型，抄舞，抄MV，成套嘢抄晒。只係當時你冇得上youtube冇得睇原唱啫。到你有網上，你就發現你同人地原唱比，爭咗十幾班。

24. 無意討伐樂壇，但就係舉個例。以前好多嘢，你心目中嘅美好。一來因為你美化舊屎，二來係你目光未夠（正常，人會進步），三來你冇得比較。等於我細個都覺得椰林閣好好食，覺得百人一朱好high。

25. 但，打從2004年愚人節，潘朵拉個盒都打開埋，又好似《幽遊白書》個結界入口咁，群魔亂舞呀，一切都返唔到轉頭。

26. 2003年愚人節張國榮死咗，2020年係匯控忽然彈弓手唔派息。知唔知2004年愚人節發生咩事呀小朋友？呢件事改變香港近代史呀（＊＊＊）

27. 就係，香港特別行政區護照持有人可以免簽證到日本旅遊！（https://bit.ly/2WMA5PL）

28. 我話你知，呢件事真係改變香港近代史，直接間接影響幾多行業，搞到幾多人結婚離婚發達破產。我好奇怪呢件事並未獲得應有嘅重視。

29. 再加埋廉航當道，你除咗去日本仲可以去韓國去泰國去台灣。你有咁多比較，有競爭之下，大家咪崇優，唔掂嘅，咪被淘汰。即係你去過日本食人地啲象人精神日本餐，就唔撚會再食香港啲MK仔 奧馬卡些咁。同一道理。明冇？

30. 當然啦，如果用本土情壞，就可以蓋過好多嘢嘅。在華北（睇＊＊＊）就叫做小粉紅民族主義，在華南咪叫本土情壞。即係明撚明間茶餐廳難撚死到仆街啲伙記又油頭粉面間嘢又有老鼠，但你一樣可以支持小店食得好開心。品味嘅嘢可以好主觀，特別係食嘢。

31. 但，你會唔會咁支持海洋公園？請睇多次第12段。同埋睇多次，2004年愚人節發生乜事

32. 其實亦唔只香港係咁，公平講句，你見優秀嘅日本人都係咁。N咁多主題樂園（唔好淨係去環球影城同迪士尼啦，雖然我兩個都冇去過）一樣冇人去養草。

33. 我記得我去阿蘇個動物園，真係熊啤啤多過人！我有數住！幾十隻熊！但遊客得十幾個！計埋職員都唔夠熊多！都未計啲企鵝刺猬之類。呢啲一樣係大白象，泡沫經濟年代下嘅產物，以為側邊起溫泉酒店就帶到遊客。結果溫泉酒店而家就啲小朋友去一泊二日美少女完全予約制爆房（香港貴嘛）。動物園啦喎，點吸當地人？你唔係靠啲大陸同香港遊客，點掂？固然其實有埋遊戲，養住咁多熊同人，都係用公帑。當然因為種種原因（主要因為投票），都係唔肯執。

34. BTW，一定要講。蒙朋友扯線，我在不同場合見過劉公子，聽過佢叫做私下講嘢。對佢印象其實幾好，我絶對唔會好似其他人咁批評佢之類。不過呢，都係要講，講「集體回憶」，劉公子老豆先係我地「集體回憶」！帶畀我地幾多歡樂呀！免費添呀！係咪抵過海洋公園好多先。我真心認為香港應該有更多大劉！

35. 係呀，大劉生性風流，買名牌，玩女人，食福臨門（而家冇食了）。但又如何？佢係咪用你啲錢？唔係嘛。咁關你春事？佢免費娛樂你，應該你多謝佢先係。所以，see the difference？

36. 實情，你估劉公子唔知咩。我好難得同意毛姨姨講嘅嘢：今次50億，但下年又點？大家都係人在江湖，柏木由紀啫（呢個gag永遠都credit返賴叔，係呀，嗰個賴叔）

37. 呢篇三千字嘅文，亦都係半個鐘左右。

（＊）其實呢啲都好含糊。話自己右翼可能畀人當係新納粹，話liberal又會畀人當係LGBT美國民主黨大愛左膠（雖然我都算係，但唔係呢個context下），所以都係「市場撚」比較清楚

（＊＊）A-Club，執咗幾十年嘅動漫雜誌。啲小朋友就日日寫信去，最撚好個個電視台廿四小時都播動畫，十分中二病。

（＊＊＊）本人出咗世咪近代，正如深圳河以北（一說係界限街以北）就係華北。而西班牙就係華西。

------------------------------
版務：收費專欄已推出，支持埃汾高質文章。幾舊水睇三個月，一星期三篇

請去呢度訂：bit.ly/2wVXndj
課程編號填: CC01
科咗水後後有Login及Password畀你

逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。

［情人請知道 在這天 誰已經開始挑戰你］英國Metro Bank，一晚跌三成

繼Thomas Cook爆煲後（http://bit.ly/2mxiwox），呢間英國公司Metro Bank都不遠了。一晚跌咗三成。不過其實兩間公司冇乜可比性，一間二百年老店，一間後起之秀，十年未夠。Metro Bank最新問題係發債唔成，但一早已經問題多多。跌三成之前，已經跌咗九成（而the beauty is，一隻股票跌完九成可以再跌九成）

Metro Bank啦喎，我見都冇見過！因為我在英國讀書已經係廿年前嘅事（呼，人生）。而呢間咁嘅嘢，十年歷史都未夠 — 就已經分分鐘收檔。銀行嚟講都幾短命。因為銀行呢啲嘢，好似碟仙咁，易請難送。

諗諗下都幾勁，呢間Metro Bank係英國150年來第一間新銀行 — 指high street bank，匯豐萊斯巴克萊之類。真係傳統開地舖之類。固然而家你恥笑話人人都virtual bank Fin Tech — 而家阿水都知。 但其實十年前都應該估到呢種模式相當雞肋。

記得初做銀行時，標哥成日話做銀行最搵笨實。諗落都有理。佢個邏輯係，你去雲吞麵舖打工，儲夠錢偷夠師可以自己開一間，對抗返你老細 — 但你做銀行會唔會可以自己開間銀行？梗唔會。因為銀行係一個入行門檻好高嘅行業，特別係而家。以前咩潮洲三角碼頭咕喱佬炒舖炒油（食油！唔係石油！）炒金，搵到第一桶金，然後開間銀行服侍啲架忌冷，而家邊有呢支歌仔唱

（順手講埋，標哥故事下半部係講，做銀行搵笨實，做中資銀行就笨實中嘅笨實，嗰時唔知邊個中資銀行高層畀人判死刑。標哥話都痴Q線，做銀行做到打靶，中國先有。所以呃錢都去外國呃，你睇啲鬼佬仲可以拍戲出書）

（而當然我地係在間中資銀行入面講呢啲嘢）

講返，Metro Bank當然其志可嘉，但do try harder。顛覆行業嘛，你顛埋我嗰份。點解冇乜人支持？好簡單，因為今日今日可以搞間銀行嘅，本身都係極有錢嘅人。

Metro Bank，好大程度美國佬話事。好架，顛覆行業，佢定位做challenger bank（大吉利是，李小加咩，挑戰者號就爆炸埋）。針對傳統英國啲大銀行嘅不知所謂地方，搵其「痛點」，去解決

解決咩「痛點」？哦，原來係話早啲開門，晏啲閂門，星期日都開。同埋啲服務冇咁老味。去過外國銀行就明香港啲分行職員幾咁好容忍力，個個西客只係敢在香港啲分行撒野，我冇見過呢啲人夠膽在外國銀行咁多事實，幾十萬存款就叫人經理見佢。正如在香港食飯就多多事實，去到日本呀料理長喝你一聲即時收晒皮電話都唔膽拎出嚟，仲要話人地好有匠人精神。賤人就欺善怕惡，唔屌唔鬆化。

搵到「痛點」 — 可惜搵唔到個G點

G點為何？就梗係賺錢。同好多顛覆行業一樣，就梗係燒錢，但型。積極擴張，但輸錢。冇事還冇事，但總有一日有人覺得唔對路。UBER呢啲就叻仔快手上市，Wework就慢一步

結果打後（即係近十年）發生嘅事，都係好簡單，亦唔難估。前無去路，唔多動搖到傳統銀行，後又有追兵，新型嘅「銀行」直頭分行都唔使，全部用手機用virtual bank。標基話齋Banking is necessary; banks are not ．其實好怕／好憎人講呢句嘢，cliché是也。人地1994年講啦。不過好似好多人都未聽過，證明都未係好cliché．反正林肯都話，網上啲嘢都好信嘅？
咁，就梗係蝕錢啦，仲話計錯數，計多咗資本，明明係窿當咗係資本，咁都得？資本開始滿足唔到監管需求，然後啲金主開始唔肯再玩，撥備升，資不抵債，股價跌，信心動搖，仲有銀行出事必備嘅，擠提。

股價呢？年頭仲有兩千，而家？兩舊都冇。半年多啲跌九成，同爆煲有乜分別。得返三十億市值左右，港紙啦大佬。

不過又講下，銀行呢味嘢，係相當paradox的。一方面，佢係最能夠代表資本主義，liberal右翼嘅行業，正所謂百業之母。但另一方面，全世界嘅銀行，亦都係最嚴格規管嘅。所以差不多一定係幾間獨大。

或曰，你科網都係winner take all 。係，但有啲唔同，銀行嘅winner take all，主要係嚟自監管。頭先已經講咗入場門檻高，幾個小朋友可以車房搞間蘋果，溝唔到女返哈佛宿舍可以搞間Facebook。但你總冇可能在銀行排咗個幾鐘隊把幾火然後返屋企搞間銀行

跨過個門檻後，要stay in the game，亦都唔易。Metro Bank又跌三成嘅導火線，咪話發唔到債。但做乜要發債？主要亦係要滿足監管需求。仲要係之前發過新股，滿足完一個機構又要滿足另一個。然後你睇到個矛盾啦。個個都話要監管銀行，多啲監管 — 但正正會令到冇新公司入到場，繼續係匯豐花旗。當然亦有人冇所謂，反正可以罰佢錢，呢度又十億嗰度又十億，幫下庫房，係幾爽的。但罰左去政府又唔係去你度。
________________________________________
點歌時間，羅敏莊，挑戰者（http://bit.ly/2lwtpqn）。其實當年唔覺得好好，但相當有特色。特別係唱副歌時，相當咬牙切齒。當年啲小花女歌手唔興的。不過講唱得最好聽，係佢後來翻唱《沉默的眼睛》。原唱係安全地帶嘅玉置浩二（http://bit.ly/2lynZey），張學友改編過，李克勤都唱過。但真係羅敏莊唱得最好，不過個版本有啲難搵，上大陸網搵到，自己去。

都話我對歌嘅版本好執著，對龍馬都係，對龍一都係。
________________________________________
彩蛋：上次篇文畀女讀者投訴有啲重口味（http://bit.ly/2lzeEmz）（男讀者嘅理得你啦）。今次成篇只係用咗一個粗口字咋，巧有進步巧叻叻。歡迎你去搵下在邊度用咗。而我諗嚟諗去都諗唔到可以點唔用粗口而表達到嗰句嘢。即係好似張學友隻《餓狼傳說》大碟咁，原本係想全本地創作，但佢實在太鍾意《來來回回》，所以保留咗唯一一首改編歌。正如我都係太鍾意呢句「唔屌唔鬆化」，唯有保留。

以上「本地創作」種種，如是我聞。當年已經質疑，李偲菘都本地創作？坡佬嚟喎。但畢竟劉諾生都係算本地創作，而再想當年芹澤廣明啲歌係專幫譚詠麟作，唔係改編。正如李偲菘劉諾生啲歌都係特登寫，唔係改編第啲，冇問題，過骨。

《來來回回》，張學友（定歐丁玉？）好鍾意，過骨。但，《天與地》都唔係改編？李東珍係香港人貪潮改個韓國名？哦，我地當年香港人呢，啲標準好隨意嘅。改編日本或英國美國咪係改編，因為你有機會聽過。改編韓國歌咪唔係改編，韓國都未開化，有流行曲架咩？改咗抄咗你都唔知啦。所以只得《來來回回》係改編喎，咁咯。

打後香港樂壇點解黑暗期啦喎，近年鍾意自省嘅廢老可以講埋呢啲。日本歌好嘅年代，陳慧嫻唔止改編荻野目洋子啲歌，連造型MV表情神態都抄足。正如韓仔歌出色嘅年代，鄭秀文一樣改編李貞賢啲歌，一樣係造型MV表情神態都抄足—不過韓妹就冇架妹咁厚道，有開口出嚟鬧的。（講明，我實話實說，我對陳慧嫻鄭秀文冇乜意見，狂粉勿吠）