謝謝到來欣賞😍

能夠演繹到莊梅岩小姐的劇本
並能與一班非常有才華的演員合作
...幸運是我 ⭐️

想着想着
現在才是真正的開始 💪🏻💪🏻

《短暫的婚姻》－ 如果深愛 再長的婚姻也是短暫的

要數到由電視劇去到舞台劇，我 #膠兄 數到有當年收視去到50點嘅《男親女愛》，跟住去到理工大學賽馬會綜藝館一共上演50場舞台劇。而另一套都係同樣地方上演嘅《短暫的婚姻》，一共上演18場

先唔講任何評語，但呢套舞台劇的確係好值得大家入場去支持同觀賞。因為好少香港電視劇可以再搬去舞台劇再做一次，所以如果大家有時間係值得大家入場支持

我 #膠兄 前日睇完一直都諗點樣寫呢一篇文，主要原因係劇情上睇完係沉重，同時又好想睇多次。結果再次喺viutv官網到重溫一次劇集就知道點樣寫。事實上，好多人話唔應該比較或唔好比較舞台劇同電視版。的確係唔好比較，但人往往就係離唔開「比較」。最初 #膠兄 入場前都係抱著冇睇過心態入去，但可惜 中場休息過後，突然腦入面回想返電視版嘅劇情。(只怪我太鍾意呢一套劇)
。但呢一次嘅「比較」係成功，佢哋能夠將電視原有嘅劇情再加上一啲未講嘅劇情，令到整件事情更加立體。

喺唔劇透情況下講︰
不論舞台劇還是電視版，最重要都係「劇本」。而兩個「舞台」嘅劇本都係由莊梅岩小姐編寫。 #膠兄 一直都好欣賞莊梅岩小姐寫或翻譯嘅劇，05年嘅《法吻》講述牧師與秘書熱吻之後，被控性騷擾。故事更改編為電影《暗色天堂》(由林嘉欣同張學友主演)，而12年嘅《野豬》(由黃子華、智叔、林嘉欣、陳敏兒同泰臣飾演嘅舞台劇)講述以為妥協可以相安無事，但到頭來犧牲一樣咁大。而電視方面，相信大家都會有睇過嘅︰《今日睇真D》、《尋找他鄉的故事》都係出自佢手筆。

莊梅岩曾經都係港台《好想藝術》講過︰自己可能因為心理學出身，所以鍾意描繪人性不同面。正正因為呢個原因《短暫的婚姻》更加特顯到4位主角嘅性格。

上面都提及過舞台劇版係幫補咗電視版嘅不足，例如︰Ceci(即係阿Mi嘅同性密友)同Terry之間嘅互動，Terry同佢太太阿Mi之間點樣拆解婚姻嘅「問題」。而舞台劇仲有一個難處就係電視版有時因為陳奕迅嘅歌可以帶動觀眾情緒 (因為呢套劇都係陳奕迅嘅音樂劇集，當時係宣傳佢嘅新碟︰《C'mon in~》)，但舞台劇要重新配歌或透過演員嘅對白及表情去表達返當中嘅情感，但佢哋的確做到 (相信台前幕後合作先做得到)，所以講到呢到如果你未買飛仲猶豫緊可以嘗試買飛入場。

下面有劇透，所以唔想睇就可以睇完先入返嚟睇

演員方面，4位演員我都好鍾意。但有一個演員我係特別鍾意，就係蝦頭。蝦頭今次飾演Ceci (電視版由蔡潔飾演)，呢個角色舞台劇版比起電視版更加高難道演出，因為佢係知得最多「秘密」同最「清楚」嘅人，但係所有事情都唔可以同Terry講又唔可以同佢最好嘅密友阿Mi講。由一開始性格開朗，一出場就已經食住枝煙反應極快去回應阿Mi，並講出初時佢對「婚姻」嘅睇法。而坐喺台下嘅我聽到身邊唔同觀眾講︰「佢真係食緊煙喎」(可能因為大家覺得室內禁煙) 但之後蝦頭嘅角色比起其他3位更加複雜，因為知道佢哋嘅秘密要保護佢哋。由佢知道到最後畀阿Mi講返出嚟個種過山車心情，坐喺台下嘅我都有一刻覺得呢個角色真係好慘，當最後佢出現嘅一幕，坐喺我身邊嘅觀眾都攞起紙巾抹緊眼淚。有一刻我覺得TVB真係有少少浪費咗蝦頭呢個好演員，今次係我劇場上第一次見蝦頭做戲，但就咁樣吸引咗我 #膠兄。如果蝦頭能夠睇到呢篇文，真心 #膠兄 想同你講︰繼續加油！你嘅演技真係可以吸引到好多人去欣賞。

另外三位演員同樣突出，好似有「劇團王子」之稱嘅潘燦良飾演Galen，同陳奕迅所飾演完全係唔同 (我覺得兩個都做Galen呢個角色都好好，所以冇話邊個差啲)，潘燦良飾演嘅Galen正正就好似一個「銀行家」，心底裡其實有啲「奸」，但同時好識為人著想，而個種忐忑心情，從佢對白及表情演繹係一流。禤思敏飾演嘅阿Mi，就表達到知道Terry出軌但扮作冇事，最開場時個種溫柔、賢良淑德嘅態度對住Terry透過佢嘅演技表達到出嚟，到後期同Terry嘈交，我自己認為可以激動多啲啲就好 (唔知道係咪我睇個場關係，睇得出大家有啲啲攰，特別嘈交個場林公子同禤禤都係有啲力未去到，但都做得好好)

最後緊係要講林公子，之前已經睇過佢同阿葛演出嘅「笑之大學」，令人留下印象。再到上年同秋生、韋羅莎主演嘅《搞大劇場》，再到今次明顯地林公子演技係進步咗。我幾欣賞係初時Ceci知道咗佢出軌係餐廳(定係酒吧?)個一段戲，由最初想快啲叫Ceci走或者聽佢數苦，到之後知道咗佢出軌個段戲，同埋佢同潘燦良喺天台「傾計」段戲，特別係放低條鎖匙個到，個下真係令全場觀眾笑咗。林公子本身唔係演藝出身，對住另外三位都係做開舞台劇，固然會增添一份「壓力」(可能林公子冇)。但整套劇睇到4位互相補位之餘，亦睇得出佢哋投入套劇，已經加咗好多分。

好演員加好劇本，自然令到觀眾可以欣賞好劇。喺演員、劇本都具備時，台、燈、聲、道具等等都係同樣重要。我 #膠兄 好欣賞設計上個天台，帶畀人感覺佢哋上咗天台就完全放鬆先令到佢哋咩說話都可以講 (如︰Terry講佢爸爸同樣有出軌)。

《樹大招風》其中一位編劇龍文康先生曾經講過︰「創作上，舞台就是比較著重台詞，電影用鏡頭說故事，電視其實比較著重對白，但是連貫性較強，因為不只90分鐘。三件事很不同。」《短暫的婚姻》能令觀眾喜愛，劇本重要、演員重要、幕後重要，最重要係觀眾能夠投入 (唔咁講代入角色，可能有人會)。

最後，香港嘅創作並唔只係得「膠劇」，學歌神曾經喺叱咤頒獎禮講過︰「好歌有好報」，我 #膠兄 亦覺得「好劇有好報」

P.S. 如果能夠訪問到莊梅岩或者四位演員再出編文就好啦 (發夢Mode)

利申︰膠兄冇收廣告宣傳

#值得大家入場支持呢套劇
#viutv網有得重溫短暫的婚姻套劇
#好想睇多次諗緊睇多場
#有買到短暫的婚姻本書有埋莊小姐簽名
#相個一句喺嚟自舞台劇其中一句台詞

舞台劇 短暫的婚姻 POON Chan-leung 潘燦良 Hatou 蝦頭 楊詩敏 林海峰Jan Lamb ViuTV Chong Mui Ngam
=========================
Instagram：todui9atvshow
Facebook：做乜膠睇電視

【晴報】黃子華的數字人生

男神黃子華將於7月回歸，與陳法拉合演舞台劇《前度》，早前優先訂票已極速爆滿，今日正式公開售票，想必再掀炒飛潮。現年55歲的子華神貴為棟篤笑始祖，兼且是無綫視帝，歷年來關於他的事迹多不勝數，不如今次搞搞新意，從數字中認識「子華神」。

【舞台王者】第1人
黃子華是首位將歐美「Stand-up comedy」以單一節目表演形式（超過兩小時）引入香港的藝人，並親自取名為「棟篤笑」。他表示自己的個人棟篤笑表演，全由他一人度蹺。

72小時
子華棟篤笑金句一籮籮，其中經典理論「鐵達尼極限」，指男人對女人的新鮮感，僅能維持72小時，因此電影《鐵達尼號》之所以浪漫，全因男、女主角相識未夠三日。

3號
87年參加無綫《全能司儀選拔大賽》，當年冠軍為資深演員楊瑞麟。子華笑指當年落選，全因模仿金牌司儀何守信太過神似。

15分鐘
於90年首次舉行棟篤笑《娛樂圈血淚史》，子華憶述開場頭15分鐘完全冇人識笑，令他緊張得心跳加速，更自覺是人生最長的一段時間。

8,888人仔
《前度》上周開始信用卡優先訂票，門票極速售罄，在淘寶網更炒至8,888人民幣一張，足足是官方最貴票價（$880）的十倍。

100場
子華曾主演的舞台劇場數達100場，包括《男親女愛舞台劇》、《男磨坊》及《野豬》等，而新作《前度》將公演24場，預計勢必爆滿。

【威水視帝】50點
於00年《男親女愛》大結局中，與「Miss Mo」鄭裕玲上演長達30秒的「世紀之吻」，這一幕更創下全劇最高收視50點，刷新TVB史上本地劇的最高收視紀錄。

99年
首次演出無綫劇集，在《狀王宋世傑II》扮演配角賴三，男主角則是張達明。因張達明是由子華帶入行，子華對於當時要做「下把」襯托對方，坦言深受打擊。

9pm
於02年內地劇《非常公民》演溥儀，子華為求神似，不惜食減肥藥減去20多磅，但藥物影響加上拍攝辛苦，令他一度抑鬱，自言當時每晚9時，就會在旅館狂哭發洩。

【票房毒藥】$118,820
雖貴為收視福將，但卻是票房毒藥。02年自編、自導、自演電影《一蚊雞保鑣》，找來當家花旦郭羨妮，上映五日，票房只得慘淡的118,820元。

$45,647,210
子華自嘲從影以來演過最高票房的電影，是95年成龍主演的《霹靂火》，票房逾4,500萬，不過子華只是客串。

#娛樂