人生只係一場夢（上）
.
我叫阿朗，今年三十八歲，係一個普通白領。
.
每日返工，同老婆一齊賺錢供樓，養大對仔女，生活有苦有甜。
.
直到今年，發生咗一件事，令我屋企天崩地裂。
.
我八歲嘅大仔，放學途中，俾一個黑衣人捉咗上車。
.
我哋報咗警，用盡所有精力去搵阿仔，三日後警察搵到......佢被...
人生只係一場夢（上）
.
我叫阿朗，今年三十八歲，係一個普通白領。
.
每日返工，同老婆一齊賺錢供樓，養大對仔女，生活有苦有甜。
.
直到今年，發生咗一件事，令我屋企天崩地裂。
.
我八歲嘅大仔，放學途中，俾一個黑衣人捉咗上車。
.
我哋報咗警，用盡所有精力去搵阿仔，三日後警察搵到......佢被虐殺嘅屍體。
. ，
警察未捉到凶手，亦唔肯定點解阿仔會被虐殺，唔係綁架唔似尋仇，可能只係遇到變態殺手。
.
我同老婆好傷心，但生活總要繼續，我哋仲有一個五歲嘅囡要養。
.
不過，自從阿仔死後，我經常發奇怪嘅夢。
.
夢嘅開始，永遠係阿仔冰冷嘅屍身，然後鏡頭一轉，變成一啲陌生嘅生活，
有時係機械人，有時係古裝......總之喺夢中，我係另一個人。
.
可能係阿仔嘅死，令我精神出現咗問題，我都預約咗心理醫生，諗住求助。
. ，
但我仲未睇心理醫生，早上起身，我聽到有把女人聲：「小詩，起身啦，夠鐘返學！」
.
我睜開眼，一個陌生嘅中年女人衝埋嚟，我喺一間陌生嘅房，連我嘅身體都係陌生嘅。
.
呢一次，同我以前發夢嘅零碎片段唔同，我腦海裡浮現出清晰嘅記憶。
.
我知道我係小詩，一個中五女學生，正準備面對公開試，
日日操past paper，我甚至記得，乜嘢圓球體面積公式xyz應該點計。
. ，
我渾渾噩噩咁上咗「阿媽」架車，返咗學，迷迷糊糊咁過咗一日兩日三日，間中俾老師鬧我上堂唔專心。
.
一切都無改變，我依然係小詩，無變番阿朗。
.
我開始偷偷地出街，嘗試搵我做「阿朗」嗰陣嘅朋友親人，
但我發現呢個世界並無阿朗，亦無阿朗嘅老婆，甚至連我個仔間小學，都從來無存在過。
.
唔通關於阿朗嘅記憶都係假？咁依加嘅記憶係唔係真？
. ，
呢個時候，小詩個阿媽，或者講係我阿媽，發現咗我偷偷地出街，又成日魂不守舍。
.
佢懷疑我拍拖，佢搵唔到證據，不過佢依然沒收我嘅電話，監視我嘅行蹤，
並且日日教導我：「唔好痴埋啲男仔度，你唔知會發生咩事，拖拖吓手就......墮胎好傷身。」
.
呢種語焉不詳嘅性教育，對於三十八歲嘅阿朗嚟講，十分可笑。
.
當我嘗試講：「其實我知會發生咩事」，
阿媽就會用一巴掌嚟回應我，話我「學壞晒，唔知醜」，然後更嚴厲咁監控我。
. ，
我無再嘗試對抗阿媽，反正我都未搞清楚，到底我係小詩定阿朗。
.
困惑之際，我發咗一個夢，夢中有一個機械人，佢叫我「林先生」，順帶一提，阿朗唔係姓林。
.
我就嚟崩潰：「林生又係邊個？」
.
機械人微笑：「唔好意思，自我介紹先。我係『時空管理局』嘅『意外處理部』AI經理，
而你係『穿越部』嘅職員林生，今日係5086年3月20號。
.
簡單嚟講，三千年後穿越技術發達，市民都可以穿越到唔同嘅時空，或者係平行世界，同搭飛機去旅行差唔多。
.
穿越人數太多，穿越嘅能量波動，可能對其他時空嘅靈魂造成損害，令佢哋暫時『失魂』，痴呆短至兩三日，長至十年八載......」
.
，
我打斷佢嘅說話：「得得得，我係嚟旅行？呢次旅行好辛苦，我想返屋企。」
.
機械人搖頭：「想像一下，如果經常有人突然痴呆，會造成好大恐慌。
所以政府派出『穿越部』職員，當其他時空嘅靈魂受損，你哋要暫時上佢身，代替佢生活，直到佢本身嘅靈魂康復。
.
當然，為咗令你哋嘅工作更加順利，每次穿越，都會封存其他記憶，只有對方嘅全部記憶，令你以為自己真係......小詩或者阿朗。」
. ，
我愈嚟愈混亂，我本來諗，到底我係阿朗，夢見自己係小詩；
抑或我係小詩，夢見自己變成阿朗。
.
依加機械人話，我唔係小詩又唔係阿朗，我係返緊工嘅林生。
.
我嘆氣：「仲複雜過『莊周夢蝶』。」
.
機械人答：「John Chau？佢咪係你上司囉，之前佢都要周圍穿越，
有次佢去咗中國古代做莊子，講咗個『莊周夢蝶』典故，好型㗎！」
.
我又諗起：「照咁講，我做咗小詩，我應該忘記阿朗嘅事，點解我仲記得？」
.
待續...
.
#短故 #短篇 #小說 #陳美濤 #廣東話 #粵語 #tomatochan #人生只係一場夢
