平安夜想分享呢兩個星期出手術室嘅經歷。 話說呢兩星期出完手術室，講得最多嘅應該係「好凍」、「腳好痛」。講真，着住件短袖喺凍冰冰嘅手術室都真係好凍，加埋要企好耐，真係血液都就快凝固。呢兩個星期睇咗好多手術，例如微創攞個腎呀胃呀出來，開肚將成抽大腸放喺肚面慢慢切呀搞呀，切除乳房，換膝關節呀，骨折嗰啲復位同固定⋯望住啲surgeon攞住錘仔同電鑽咁嘅工具去敲啲骨，又或者係喺微創手術手勢好靈巧咁樣喺咁細個傷口用啲長鏡同工具喺體內剪剪切切咁樣，總之真係睇到呆晒。但我不嬲對啲血腥野都冇咩話驚嗰啲，所以每次睇剩係覺得個病人醒返一定好痛，又冇咩特別深刻。不過估唔到今日手術室last day反而係最深刻。 今日睇咗兩個眼科手術，仲要咁啱呢兩星期都冇睇過眼科。第一個手術係幫一個得三個月大嘅bb做laser，因為佢24周就出世，身體都未發育成熟，出現咗早產兒視網膜病變。望住一個咁細粒嘅bb插晒喉，真係好心痛，但我諗佢嘅父母一定更心痛。嗰陣一路望住surgeon幫佢打laser，一路心入面祈禱希望呢個小生命喺治療之後對眼可以健康成長。 第二個手術係一個印度男人。佢好後生，得3x歲。一開始入院係因為發燒嗰啲，之後發現係敗血症（有細菌入咗血），仲要係隻勁菌（Klebsiella pneumoniae）。anyway搞搞下啲菌去到對眼度，搞到對眼發晒炎，眼球入面嘅玻璃體（vitreous humour）全部都係膿（本身應該係透明嘅啫喱狀物質，用來支撐個眼球嘅形狀同埋等啲光可以清晰折射落後面嘅視網膜度）。總之我一望個螢幕，見到佢隻眼真係呆咗，係好混濁好混濁，好似有一堆發霉嘅芝士喺眼球入面咁樣。醫生用咗四個鐘來清啲膿都搞唔掂，到我放工嗰下佢地都仲做緊，所以我都唔知最後做咗幾耐。 深刻嘅位係，醫生喺未開始手術之前，話：「唉，最心酸係佢（病人）同我講話佢想可以睇住佢個仔大個，但佢對眼真係發炎發得好勁，打antibiotic都成三個禮拜，都冇乜好過，真係唔知點幫佢。」有個姑娘喺手術做做下都望住個mon同我話：「妳睇下，對眼情況真係好差，已經冇人敢問佢對眼最後睇唔睇到野。」我聽完，再睇返排版，原來佢個仔先得一歲幾，如果一個爸爸一世人只可以親眼見到自己個仔一年多啲嘅時間，以後就唔可以再望到佢個樣，睇唔到佢成長嘅階段，會有幾難受呢。加上個病人嘅父母都喺印度，宜家疫情嘅關係，連同父母團聚都變得好困難好困難。當一個人經歷患病，有機會以後都睇唔到野，但都冇機會有父母喺身邊支持、陪伴自己⋯總之我睇睇下個手術，又眼濕濕咗。 之前我話過記憶對我來講好重要，而我諗咁多種感官裡面，我會最唔願意失去視覺。當然，失去任何一種感官都會好影響一個人嘅生活，但我由細到大都一直覺得可以睇到野真係好感恩。可能因為我有個鄰居廿零歲嗰陣突然有病失明，令到我細個已經擔心我會唔會去到廿零歲就好似佢咁盲咗，所以我成日都覺得到今日我仲可以睇到野真係好感恩。今日睇呢兩個手術更加令我覺得，其實每個你所睇到嘅風景、人物，都係好多人好想睇卻冇機會睇到嘅。先天嘅不足可以令一個人由一開始已經失去欣賞呢個世界嘅機會，突如其來嘅病患亦可以奪走一個人以為可以一直擁有嘅景色。失去雙眼嘅話，人只可以靠記憶去回想嗰個身邊最親密嘅人嘅模樣，慢慢記憶都變得模糊，卻已經冇機會再用新嘅影像來刻劃對方嘅樣貌、神情。 今日雖然係平安夜，但有好多人都活在不安恐懼之中。無論係今日做手術嘅bb同佢嘅父母，定係嗰個年輕爸爸，對佢地來講今日都一定係難捱、不平安嘅一日。希望我地喺平安裡面，都繼續記念其他人嘅需要，為佢地守望。無論係正受病患折磨嘅病人（除咗武肺，呢兩星期睇到好多cancer病人都好努力生存😭）、流亡海外嘅手足、十二位被送中手足、流亡台灣但唔知情況如何嘅手足、手足家人、露宿者（呢排仲要咁凍）、貧窮家庭、心靈疲乏無力嘅人（俾武肺搞到失業嘅、俾政權摧殘嘅真係隨時走上絕路）⋯⋯雖然好似好左膠/大愛L feel，但都好想提起呢班人嘅需要。平安夜，希望好人一世平安。#staycuteprocreate #staycutewardsharing