我有一個守護神（上） . 呢一刻，我拎住一把鉗，企圖將我所有指甲拔晒出嚟。 . 我好痛，但我只可以繼續努力。 . 而我個仔一路喊，一路原地跳，跳到喘晒氣都仲繼續努力。 . 唔好誤會，我唔係變態，我只係一個普通到極點嘅母親。 . ， 事情要由半個鐘頭前講起，我住嘅地方比較偏僻。 . 今日我老公出咗差，工人姐姐放假，我接仔仔放學，點知一開門，就有人從背後推咗我入屋。 . 我蹌踉倒地，然後道門關咗，我回頭一望，係兩個戴口罩嘅陌生男人，兩個人都拎住刀。 . 「太太，我哋想同你玩個遊戲。」佢哋喺地下擺咗個計時器，設定五分鐘。 . 佢哋唔係劫財，亦唔係劫色，而係兩個組隊嘅變態佬。 . ， 佢哋所謂嘅「遊戲」，係要我喺五分鐘內，親手將自己嘅指甲、腳甲，拔晒出嚟。 . 如果我做唔到，就殺咗我個仔。 . 而我個仔，就要喺五分鐘內原地跳五百下，跳唔到就殺咗我。 . 我唔知道，就算我哋做到，佢哋係咪真係會放過我哋。 . 但呢一刻，我無選擇嘅餘地。 . 我一個女人，點樣反抗兩個有武器嘅男人？ 就算我僥倖走得甩，我都保唔住個仔。 . ， 我只可以戰戰兢兢咁拎起個鉗，狠狠拔出自己嘅左手食指指甲。 . 十指痛歸心，原來真係好痛。 . 「一、二、三、四......」阿仔數數字嘅聲音響起，我一定要畀佢生存落去！ . 我快刀斬亂麻，好快拔晒左手嘅指甲。 . 但當我轉做左手拎鉗，想拔右手指甲嗰陣，我隻左手係咁震，完全用唔到力。 . 我努力咗幾次，把鉗都係跌咗落地下。 . 時間一分一秒咁過去，仔仔喘晒氣，仲努力跳緊，但離五百下仲差好遠； 而我只係拔晒腳甲同左手指甲，右手依然無能為力。 . ， 計時器響起。 . 「願賭服輸啊太太！」兩個變態佬獰笑，拎刀行埋嚟。 . 呢個時候，書架上嘅一個玉像，突然跌咗落嚟，正正跌喺其中一個男人頭上。 . 然後，書架上所有雜物都跌晒落嚟，方向一致，全部都係襲擊佢哋。 「有鬼啊！」佢哋倉皇逃離。 . 我打電話報警，然後心神一鬆就暈咗。 . ， 醒番之後，我要落口供，講到「雜物跌落嚟」嗰部份，警察認為，我只係受到太大刺激，出現幻覺。 . 唯一信我嘅，係我老公，因為嗰個玉像，係老公施捨咗一個乞兒，個乞兒送畀佢嘅「守護神」。 . 嗰陣老公都不以為然，依加睇嚟，個玉像真係有神祕力量。 . ， 不過，我哋嘅注意力好快被轉移。 . 仔仔受到太大刺激，精神出現問題，胡言亂語，有時縮埋一角，甚至會大力撞牆。 . 我辭咗職，全職照顧仔仔，並且帶佢到處求醫，但都無乜效果。 . 聽講，外國對於呢種病，有更好嘅治療方法，我同老公都想帶個仔去外國醫病。 . ， 但擺喺我哋面前嘅難題係：錢。 . 我辭職後，少咗一份收入，已經捉襟見肘，根本無咁多錢去外國醫病，但唔通要眼睜睜睇住個仔，一世瘋瘋癲癲？ . 老公企喺玉像面前，念念有辭：「守護神啊，求你幫吓我哋醫好個仔......就算唔得，都幫我哋諗辦法賺錢醫病。」 . 呢個時候，玉像居然伸出手，指住南方。 . ， 我哋都嚇呆咗，老公忍住詫異，問：「您嘅意思係......向南行？」 . 玉像點點頭，呢次我哋兩個都睇得好清楚。 . 睇嚟守護神真係有神奇力量，我哋當然聽話，老公出咗門口，一直向南行。 . 直到天黑，佢先返屋企。 . 我即刻問：「點啊？南方係唔係有生財之道？」 . 老公面有難色，原來，佢向南行，同時亦好留意四周嘅動靜。 . 之前講過，我哋住得幾偏僻，每間屋都隔得好遠，好少有路人經過。 . 待續... . #短故 #短篇 #小說 #陳美濤 #廣東話 #粵語 #tomatochan #我有一個守護神