［藺相如，司馬相如，名相如，實不相如］（＊）咪講笑！同Freddie Mercury同Billie Eilish 齊名！獲得誠品認證！我是一個文青！

TLDR：屯門牛呢，真係睇好嘢都慢人一步，睇戲又多垃圾。所以要有馬蘭頭獎學金

1. 實情係屯門誠品，已經有貨。都話日日去睇，我仲發現搬咗位，原本係在啲財經書度，而家已經literally 「上神枱」，同Freddie Mercury同Billie Eilish 齊名！雖然暫時我都未見有任何人拎起嚟睇。實情咁耐以嚟都冇！

2. 又，真係的，明明銅鑼灣，太古同尖沙咀誠品都一早有，屯門就要再遲啲。真係鄉下地方資訊不便。「啲小朋友都要遲兩個星期先接觸到啲高質毒物」。

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

3. 你真係唔好睇少呢樣嘢，What we talk about when we talk about 村上春樹？好多人都知道佢開coffee shop/酒吧，收工在廚房寫嘢。亦都有啲人聽過個契機係明治神宫野球場（我都去過朝聖），養樂多燕子隊

4. 但再之前呢？村上春樹係關西人，京都伏見出世，但神戶讀高中。佢唔止一次提過，神戶改變佢好多。神戶係個海港，易接觸外國文化（你見仲有異人館），佢就在嗰度睇好多西洋文學。

5. 我話睇書都慢人兩星期，當然只係講笑。「而家屯門都有Donki」「仲有Mirror」。但，你可以留意下，屯門戲院（屯門戲院並唔單指「屯門戲院」）上嘅戲，都真係同「市區」唔同。唔通會上《惡與他們的距離》？主要都係上「長相屍手」之類。有人話歧視，有人話市場考慮，「啲屯門牛就係睇垃圾」，乜都好，客觀結果都係一樣。喂，呀影帝林家棟，都公然恥笑去巴倫紐睇戲嘅人啦。2015年咋喎，香港人好尊重本地電影咩？（而不幸地，套《點對點》我都有睇，但居然唔係在巴倫紐！正如導演話頭，根本巴倫紐冇上呢套戲，全新界得葵芳新都會上，我就在嗰度睇）

6. 你都唔好話冇影響，我講兩件事你知。第一，好少同人講，當年我買樓，係有諗過買駿發花園嘅。咩話？駿發花園在邊？點解我會想買？「駿發花園咪會樓下上《惡與他們的距離》」。最後點解冇買？唔係因為冇錢（我有咁窮？況且我講緊2013年），而係因為懶，同埋我諗真啲，「我買完百老匯電椅中心搬走我咪仆街？去廟街聽數波波定食煲仔飯？定學麥路人郭富城咁去聽楊千嬅唱歌？」。第二，當然係因為我懶。租開我老母（真係我老母，唔係助語詞）屯門嗰樹好地地，咪買埋佢。係呀，買架，咪撚以為佢送畀我。電視框？框你老母（呢度就助語詞）。創屋苑尺價新高添呀！虎毒不吃兒呀。「不過冇人拎支槍迫你買」「況且之後都升咗好多」「所以真係唔使怕高追，咪縮數話咩等調整」

7. 一念任天堂，一念海天堂。一念八天堂，一念朱天堂。如果我當初買咗駿發花園？而家我係咪好有文化我就唔知，「但應該執多幾球嘢」

8. 講返，我變成「港片之鬼」，你估係偶然？並唔只係因為我細細個鍾意睇港產片。喂我年代啲小朋友，個個細個都睇港產片架啦，但大咗佢地自然就會覺得好check，我溝過N條港女，都以自己唔睇港產片為榮，我最鍾意都係我問佢睇乜戲，答曰「我個人冇乜所謂不過唔睇港產片」，充份反映到港女嗰種自以為嘅優越感同懶撚係considerate，多撚謝喎。不過我都冇諗住同佢去睇港片，因為我主要係為上床。到後來睇港片先有得上床，就係後話，只能講句十年河東，十年煩西

9. 我之所以到中學都不停睇港產片，主要係因為一個人。他的名字叫徐一刀。四十歲以上嘅麻甩佬應該聽過。根本就係香港全裸監督村西徹，佢進軍海外時吳宇森都未去荷里活。佢就係自己親身上陣，同「五十嵐」一齊拍愛情動作片

10. 但關我乜事？我又唔係蘇B（一個徐一刀有份用嘅演員）。主要係，徐一刀係我同學嘅舅父。咁佢就畀好多免費戲飛我地睇，當然唔係睇佢嘅戲（當時我中二咋），而係可以去睇任何戲。我唔知係咪只係港片，但肯定嗰時咩 凱都呀， 巴倫紐呀，仲有「屯門戲院」，都好多時係上港片。

11. 我仲記得我第一套用佢嘅飛睇嘅戲，就係《水滸傳之英雄本色》，李克勤唱主題曲，梁家輝做林沖，徐錦江做魯智深，劉青雲做大茄，但最正係豹哥單立文做高俅個仔去淫辱林沖老婆王祖賢。

12. 另外仲有《風塵三俠》（梗係柏安妮嗰套），仲有套日本人拍但廣東話配音嘅《三國志》（1990年代初，已經好過《三國無双》N倍，可見周顯揚真係食撚屎的，係呀，我又要好波過美斯先可以評論？）等等。可見我嘅中學年代，就係咁渡過。

13. 然後你諗下，埃汾太（名校女生嘛）。人地呢，午飯去Pacific Place食嘢—仆你個街到我在金鐘返工我都仲嫌貴呀！另外有個朋友仲誇張，中學年代，去「有馬」日本料理午餐。

14. 朋友同我同年，但你老味，我地年代在屯門？日本嘢？「就係去八佰伴食熱海麵屋」，好撚難食的，難食過味千。當然我好後來先知道，熱海係地名（大佬呀，嗰個年代冇維基百科，又冇一年去十次日本），而八佰伴第一間店，就係在熱海。

15. 至於我嘅名句（其實係朋友講），「嗰時食百人一朱已經覺得自己好撚high」，sorry，呢個係去到出嚟做嘢嘅事。仆你個街，我去到教書嗰時，兩皮嘢個月，都係同成班搣時去荷里活（梗係鑽石山啦，好彩未去旺角荷李活）食百人一朱咋！（話時話，就快又七夕，有冇人未聽過七夕搣時嘅教事？）

16. 睇到呢度，你心諗，有冇咁誇張。都真係有的。例如我估我好似去到2000年，即係，大學畢業，我先知咩係Tiramisu，「開頭以為日本嘢」。而家啲小朋友，幼稚園茶點都食喜知次一夜干啦！

17. 真的，as a 學霸，我博聞強記嘅能力，叻過好多「名校」嘅普通學生。但行出嚟就係冇嚟貴格，食幾多貴格燕麥片都冇用。「即係余文樂咁」，真係好多年先洗到嗰種新界牛嘅味。

18. 你話冇影響？有機會我細寫。但當年我去in Oxford獎學金，邊個in我？係李兆基，冇錯係四叔。仲有楊鐵樑。同埋羅德丞（唔係羅傑承），同埋一條牛津嚟嘅鬼。喂，我見到都變秦舞陽，腳震震啦。最記得鬼佬問我點解地盤啲鐵係工字型，我都答唔出，但其實我係知嘅。（BTW，當年我報N展，真係好彩冇收我）．後來當然獎學金拎唔到，做唔到乜乜學人，返去港大繼續have fun stay poor．四叔變咗亞洲股神。楊鐵樑變咗教英文。羅德丞？選唔到特首，冇耐死撚埋了。（原來都隔咗十年）

19. 事後諗？如果我醒少少嘅，我應該話畀四叔知，我阿麻係順德大良人。我成日返去的。拿，呢啲咪分野。但冇計，歷史沒有如果，洛賓2010年球單刀如果入咗？

20. 寫咗好多，都唔係咩獅子山下可歌可泣。你心諗，而家扁平化咗好多啦。而家屯門都上到NetFlix嘛，屋企都睇到 德國飛機吸血片啦，有得上網，拉近晒啦。

21. Yes and No．但其實，個世界，都係向比較有錢嘅人傾斜嘅。我甚至覺得，我幾幸運，我年代都仲可以叫做「上流」，即係一個普通家庭（唔好講到自己赤貧啦，至少有錢去睇戲）嘅屯門仔，都仲有得發下圍。而家？未必冇，但大家心知，越嚟越難。

22. 最新嘅趣聞，英國A Level，一半人A或A+。因為多咗Teacher assessment，fuck that 教師好專業唔偏私。但有乜所謂？好似阿婆賣紙皮咁，你會噴水上去，我又自然會計返你平啲。英國好嘅大學，更加大條道理自己搞admission test，甚至乎用自己嘅discretion—冇錯，就係傳說中嘅去緬甸做義工。點解啲名人富豪仔女都入到名大學？真係叻啲？你話呢？

23. 寫咁多，冇錯，最後都係講「馬蘭頭奬學金」嘅理念。呢個年代呢，你做屯門牛又冇錢嘅，真係比較大鑊。可惜我暫時都仲係只有理念，未有好多錢，更重要係未有執行力。但，總會搞到出嚟。

（＊）又，我都係早排先知，司馬相如唔係真名，正如河國榮崇拜張國榮，佢因為崇拜藺相如先叫自己司馬相如。正如司馬遼太郎，都係因為崇拜司馬遷（應該唔包括腐刑嗰part），但自愧不如亦係自謙，先叫自己司馬遼太郎。

似乎姓司馬嘅都啱呢味嘢（司馬遼太郎又會姓司馬啦！）。不過司馬賽兒，就唔係因為鍾意馬賽所以變咗馬賽。主要係鍾意波圖。講返，上季法甲馬賽第5，冇歐聯踢，所以要等波圖歐聯分組賽第三，先有機會馬賽對波圖

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

［全世界莫財政府！聯合起來！］換個口味，講公共財政嘢，唔係專家，勿插（雖然其他嘢我都唔係專家，我專長係吃喝玩樂打邊爐訓覺睇戲）

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
告個急先：Ivan已被炒，已成失業人士。未訂嘅記得訂Patreon，積小成多呀。訂咗嘅可以考慮加碼（https://bityl.co/4Y0h）。 一星期至少出返六篇文．月頭訂最抵！月費80
＝＝＝＝＝＝＝＝＝＝＝＝＝＝

TLDR：女掌門叫大家齊齊加入美國，制定最低利得稅！嘩，反了！成唔成事未知，我估冇咁易。但全球向左轉就好明顯，亦都係走返去大政府。上兩期嘅Economist 封面咪 The Big government is back

1. 呢啲，就左膠啦。雖然好多人當阿美利堅邵音音耶倫係「鴿派」，但新時代下，只有阿美利堅派。真係堅，三十年前不能想像呢樣嘢在美國出現（＊）

2. 講白啲，傳統上係講咩「央行獨立」，至少西方普遍係呢個價值。歐盟不用講，根本央行都外判埋。英國嘛，扯，搵外國人做央行行長添，咁在東方國家應該幾難接受，中國固然不可能，你諗下韓國會唔會搵日本仔做央行行長（會嘅，日佔時期咯，嘻）。當然啦，Mark Carney加拿大人，「理論上都效忠事頭婆」

3. 美國呢，都稱得上係「央行獨立」，當然你可以質疑其實都係要總統呀上下議院通過，但大約場戲都做得OK嘅，亦不致於打電話叫佢加息減息（以前侵侵就鬧點解佢冇得享受低息，可見似乎都唔係任佢玩）。至於國情有啲唔同嘅日本韓國，當然「獨立性」更低，但即係程度有深淺，你總不能話「挑，咪同大陸一樣」去講嘅（呢類泛相對主義嘅人係好煩嘅）

4. 咁但，以上種種，都係「舊時代」產物。你懂的，即係楊懷康李兆富（？）咩郭伯偉獅子山學會嗰班市場膠（包括本人），Milton Friedman（＊＊） 戴卓爾夫人　列根　新自由主義（＊＊＊）

5. 直接啲講，呢套咁嘅嘢，金融海嘯後，畀人狂媽。全球其實係左翼化嘅（雖然好多人自己係左膠又屌人左膠）。貧富懸殊呀，央行印錢呀，買唔起樓呀，上流機會冇乜呀，科企只令少數人受惠呀，政客選嚟選去（如果有得選）都係為有錢人服務呀，大家都知。

6. 金融海嘯當然係個觸發點，幾多人等咗咁多年，你班金融撚仲唔仆街，哈哈哈。點知唔係喎，公帑救銀行，銀行家照出花紅。咁當然大家好憤怒。而家就仇視啲科企小朋友，本質冇乜分別。

7. 你只睇一樣嘢，就知道全球向左轉啦。就係最低工資。阿叔讀書嘅年代，經濟學家聽親必屌。但而家已經唔係咁，最低工資已經變成norm．畢竟社會係真係會變嘅，冇錯可能「最低工資」不利就業，但人係十分奇怪嘅動物，佢地開唔開心除咗睇自己有幾多錢，仲好大程度睇其他人有幾多錢。

8. 而當然，傳統上民主黨都係偏左，拜登已經冇咁左（所以咪篤佢出嚟做共主），入面有班AOC呀 桑德斯呀 Warren呀更加左

9. 咁而家邵音音已經唔再係聯儲局，但變咗係財長。有幾多「個人意志」我就唔知了。

10. 不過畀啲客觀數字嚟，錢是印得好多的，但美國嘅利息開支，畀以前仲要低。原因？低息嘛。Interest expense As a percentage of GDP，都仲低過以前。（呢啲圖Patreon成日貼）。亦因為咁，好多人（包括我）睇死佢冇得點加息。

11. 唔加息點？Easy，咪聯儲局入去買長債，壓低個債息。錢從何來？印出嚟（Technically 唔係，因為可以收水，但你都可以咁理解）。咁你話印得多會貶值？唏，真係昨晚Patreon篇第一季回顧文先講，你小擔心。唔使講美元霸權之類，你望下個美匯指數，而家93 —金融海嘯前後，75都見過呀！當時美金爆咗煲未？未嘛，要印？大把有得印。美金跌？大把有得跌。

12. 另一個問題當然係，「印咁多會唔會通脹？」。這個嘛，好似會，又好似唔會。2008年印咁多錢夠話惡性通脹啦，不過官方話你知過去咁多年都冇乜通脹（美國政府講架，唔係大陸）。又係返返嗰句：我一般唔係一個咁陰謀論嘅人，但，「你信官方嘅通脹？」。你去一次澳門咪知通脹幾多（豬扒包，唔係你以為乜？）。廿年前幾錢，而家幾錢？3% 通脹？seriously？而邊個話你知CPI 或PCE 係通脹？你問Milton Friedman嘅，印咗錢就己經係通脹。

13. 實情今次話加稅，一早放晒風。原因當然因為拜登推嘅「美版4萬億基建方案」（話時話水泥鋼鐵股都炒咗好耐）。但錢從何來？又玩印出嚟？拜登都仲有啲常識嘅。留意，MMT撚（摩登芒叻拖V飛噢威）話以不停印冇後果的，really？咁政府點解仲要收稅？（不過，Warren AOC之類，真係話不如免晒啲學生貸款欠債，誰找數？唔知喎，印多啲，聽講冇事）（但你睇，美匯指數93喎！印錢又係咪真係咩咁大件事？）

14. 我都係跟利世民學嘢，講呢啲公共財政嘢佢比較熟。之前香港講「印花稅」，我已經話「唔搞你搞邊個」？在政府角度，印花稅係好好嘅稅，你近乎冇得走數，行政成本低，受害者亦冇人會可憐，在香港更好，因為交易所都近似係政府控制嘅。

15. 咁冇咁好嘅稅呢？薪俸稅　富人稅　（有啲唔同，前者抽人工後者抽資產）利得稅都係，因為全球化，人呀企業呀可以搬走。

16. 所以就要全世界大政府，聯合起來。之前嚴打啲逃稅呀，Tax Heaven呀，安道爾盧森堡巴哈馬開曼群島，搞CRS（襟蚊利卜丁士釘突）都係咁。

17. 但齊齊加利得稅，我估就難啲。非盟友嘅固然唔睬佢，中東佬甚至香港新加坡（OK, maybe not 新加坡）直頭開香檳，「快啲搬去我度」。但盟友都好，難聽啲講句，「你美國佬洗大之嘛，關我撚事」。唔講遠嘅，講同美國好有淵源嘅愛爾蘭，N咁年都靠低稅吸企業同人才，你估睬唔睬你？同樣地，歐洲你估睬唔睬你？歐洲一向都高稅過你又點計？仲有日本韓國，你估係咪任你舞？

18. 所以，又食下花生。但暫時見股市反應就冇乜。不過，之前香港加印花稅，好多人出嚟講「全球潮流都係低稅」，不妨講兩句？我可以話你知，全球潮流一定係抽重稅，派福利，仇富，呃選票，大政府回歸。最低工資？out了。UBI，夭利窩嫂悲食現金，真係大有市場，現金嘛。

（＊）但又要另外講下，其實以前，五六十年前啦，美國嘅利得稅絶對唔係咁低的，都係新自由主義下不停減。唔好講咩二次大戰嗰時，即使70/80年代，企業交50%稅先係常態。遲下貼。

（＊＊）絶無不敬，但Milton Friedman真係「一個幸運的人」，死得早。係，94歲，但咁啱就金融海嘯前死咗！唔使畀人活著鞭屍。上帝真係對佢好的，死嗰時佢嗰套都係顯學，死後就爆煲，但佢已經話知你。

（＊＊＊）不吐不快，好多「襟蚊籮膠」，以為「有襟蚊籮就金融中心」。呢啲真係不幸嘅巧合。先唔講香港北水之前，金融中心係東京，鬼佬報亞洲指數都係報日經，恒生不入流，上海更加唔知乜撚嘢，東京又行「襟蚊籮」？況且，英國唔知行咗幾多年「襟蚊籮」，但倫敦變成金融中心，正係多得Big Bang，1986年，正係鐵娘子戴卓爾夫人，deregulation，開放市場，新自由主義。係因為呢件事，倫敦先一躍成為同紐約分庭抗禮嘅金融中心。借問聲，之前三百幾年，英國行乜law？仲有，香港人就係咪都打飛機，但戴卓爾夫人釘蓋嗰時，大把「真英國人」開香檳慶祝，仲在Facebook齊齊推到” Ding-Dong! The Witch Is Dead ”（中譯：倪坤死咗我想開香檳慶祝）上返流行曲榜。當然唔係我工作識嗰啲倫敦金融撚，而係北部嗰啲藍領。真係煩精（？）話齋，你咪撚去利物浦曼徹斯特紐卡素新特蘭同人講你支持戴卓爾夫人呀，畀英國人打死你呀。而最正係，當年推到上榜都好，BBC都係冇播首歌嘅，「幾撚可恥」。

＝＝＝＝＝＝＝＝＝＝＝＝＝＝
2021比別人知得多。subscribe now。Ivan Patreon，港美市場評點，專題號外，每日一圖，好文推介。每星期6篇，月費80，半年已1400人訂！（https://bityl.co/4Y0h）。 年費仲有85折
＝＝＝＝＝＝＝＝＝＝＝＝＝＝

［崇優，就梗係唔再去海洋公園］一切由2004年嘅愚人節開始講起，放心，你唔會記得係乜。但嗰年發生咗件改變香港近代史嘅事

1. 之前好似在經濟角度寫過下海洋公園。今次用文化角度。唏，冇話你知，本人根本冇讀過Econ？本人係文青嚟的。金融呢啲，用嚟搵食，滿足我做文青但又唔使拎文化綜援嘅物慾。

2. TL；DR　—服侍香港人又好張家港人都好，海洋公園都應該執。根本唔需要政府錢搞個主題公園。至於執咗佢起樓呀，大家分咗五十億呀，定係做隔離中心搬晒啲友去呀，後話。集體回憶？大劉先係集體回憶！

3. 古語有云，房間入面隻大笨象，冇人開口講，就我講。咁當然，話國王冇著衫個細佬千古傳頌，因為佢只係得罪國王啫。如果佢係指出所有人都冇著衫嘅，畀人亂棍打死啦（例如哥白尼）。

4. 尼采話齋，佢就係個著夜行衣嘅人，光天化日在市廣場（屯門嗰個？），畀人當傻仔。佢就只係話：我來得太早了。亦係尼采話嘅，白晝嘅光，如何理解黑暗嘅深度？

5. 先知就係早你少少知，但先知就係寂寞嘛。不過至少而家唔會畀人燒死，已經好文明。

6. 講完一大輪咩尼采，咁話你知，我半年前就知道海洋公園必死（當然嗰時唔知肺炎啦，知就發咗達）（https://bit.ly/3fCihPY），亦一早話執咗佢（https://bit.ly/2xRzVhw）。有舊文為證。唔係今日先拾人陳慧出嚟講。我亦唔介意好多其實平時同我完全唔同立場嘅人都咁講—大佬，人地食飯你走去食屎咩。Contrarian唔係咁做嘅，唔係人支持你就反對。

7. 但我由始至終，支持海洋公園執笠個理由，同好多人唔同。我個理據係基於右翼liberal思想，即係「市場撚」（＊）「獅子山學會撚」（本人正係付費會員），嗰啲。根本就唔需要用公帑去run主題樂園。乜年代呀大佬？無論個海洋公園係for 香港人定for 大陸人定係for 馬達加斯加人，都係應該收檔。

8. 所以我並不同意嗰個「海洋公園背棄咗香港人」論調（好有「要不是乜乜乜」既大爺感恩feel）。首先，你啲稅收，大家心知肚明，嚟自邊啦。大企業，高人工人士，樓市股市印花稅。基本上都好大程度係「大陸有關嘅錢」。咁大陸錢救大陸公園，又好似冇問題喎？再唔係ring fence 佢，好似隔開啲企鵝波波咁，分開舊錢咯，咁滿意未？

9. 我唔滿意噃。就算係for 香港人，一樣應該執笠。而我好懷疑上帝可唔可以在香港做一個for 香港人嘅主題公園。因為呢樣東西同上帝舉唔起嘅石頭一樣咁上下。成班離地友仲在獻計人地應該點樣做生意，十分有趣。

10. 劉公子話海洋公園係香港人嘅集體回憶，本人不同意。我三十年冇去過。貼錢我都唔去（咁當然你貼幾千我就去嘅）。咁但，當然啦，唔好咁獨裁，你唔去大把人去。唔好自己唔鍾意就覺得唔應該存在，自己鍾意就應該周圍起。呢個係好多人嘅盲點，我地年代叫做A-Club思維（＊＊）

11. 事實因為我唔係小朋友，我又冇小朋友啫。但我問返，其實身邊啲朋友係有人有同仔女去嘅。

12. 不過啦喎，我就問一個問題：你計下你過去十年去咗幾多次海洋公園，洗咗幾錢。然後又計下你過去十年去咗幾多次日本，用咗幾錢？

13. 咁你咪明點解海洋公園會執笠，亦都係必然要執笠咯！重視本地人my ass。冇大陸客死得仲快添

14. 一個字，就係而家啲小朋友好鍾意講嘅，崇優嘛。

15. 我有得去仙台餵企鵝，做乜要去海洋公園對住啲西口西面嘅員工呢？我就冇見日本動物園啲員工西口西面啦。就算有，人地都係講日文！話你知，香港呢，連啲企鵝都西口西面過人的。橘逾淮而為枳，住多幾十年啲企鵝都變晒燒鵝（或者獅頭鵝）。

16. OK，你係員工，你唔西口西面，但你老細西口西面嘛。況且成個配套都唔同啦。我去完海洋公園上Marriot爆房？

17. 事實呢，同香港眾多流行文化嘅消亡一樣，就係因為你「崇優」

18. 你得廿歲嘅唔怪你，但有三四十歲嘅，唏，你應該記得，有一段好長嘅時間（2000-2010？），香港人係以睇港產片為恥，聽廣東歌為恥嘅！而家忽然本土就自有其原因，但歷史不容抹殺嘛。你見嗰時上咩巨聲定乜嗰啲，十個有十一個都係英文歌，國語歌，日文韓文歌。嗰時你約女（OK，係我約女）睇戲，問佢睇乜，人地講明「冇所謂，不過唔睇港產片」。

19. See？呢啲就係高級女文青嘅崇優。

20. 冇錯喎。有人話，「唔通垃圾都睇咩」。正是。咁，唔通海洋公園唔垃圾咩。

21. 咩話？海洋公園好好？咁請你睇多第12段一次。

22. 有啲離題，但當年嘅咩香港流行文化，我敢話，好多都係過譽嘅。你嗰時冇比較之嘛。嗰時一樣有好多五音不全呃飯食得個樣嘅歌星（唔好開名），Beyond都要唱《醒你》，「那萬人迷　走音走爆咪　包裝多過一切」。呢啲咪係當時嘅樂壇面目咯。

23. 抄歌，抄造型，抄舞，抄MV，成套嘢抄晒。只係當時你冇得上youtube冇得睇原唱啫。到你有網上，你就發現你同人地原唱比，爭咗十幾班。

24. 無意討伐樂壇，但就係舉個例。以前好多嘢，你心目中嘅美好。一來因為你美化舊屎，二來係你目光未夠（正常，人會進步），三來你冇得比較。等於我細個都覺得椰林閣好好食，覺得百人一朱好high。

25. 但，打從2004年愚人節，潘朵拉個盒都打開埋，又好似《幽遊白書》個結界入口咁，群魔亂舞呀，一切都返唔到轉頭。

26. 2003年愚人節張國榮死咗，2020年係匯控忽然彈弓手唔派息。知唔知2004年愚人節發生咩事呀小朋友？呢件事改變香港近代史呀（＊＊＊）

27. 就係，香港特別行政區護照持有人可以免簽證到日本旅遊！（https://bit.ly/2WMA5PL）

28. 我話你知，呢件事真係改變香港近代史，直接間接影響幾多行業，搞到幾多人結婚離婚發達破產。我好奇怪呢件事並未獲得應有嘅重視。

29. 再加埋廉航當道，你除咗去日本仲可以去韓國去泰國去台灣。你有咁多比較，有競爭之下，大家咪崇優，唔掂嘅，咪被淘汰。即係你去過日本食人地啲象人精神日本餐，就唔撚會再食香港啲MK仔 奧馬卡些咁。同一道理。明冇？

30. 當然啦，如果用本土情壞，就可以蓋過好多嘢嘅。在華北（睇＊＊＊）就叫做小粉紅民族主義，在華南咪叫本土情壞。即係明撚明間茶餐廳難撚死到仆街啲伙記又油頭粉面間嘢又有老鼠，但你一樣可以支持小店食得好開心。品味嘅嘢可以好主觀，特別係食嘢。

31. 但，你會唔會咁支持海洋公園？請睇多次第12段。同埋睇多次，2004年愚人節發生乜事

32. 其實亦唔只香港係咁，公平講句，你見優秀嘅日本人都係咁。N咁多主題樂園（唔好淨係去環球影城同迪士尼啦，雖然我兩個都冇去過）一樣冇人去養草。

33. 我記得我去阿蘇個動物園，真係熊啤啤多過人！我有數住！幾十隻熊！但遊客得十幾個！計埋職員都唔夠熊多！都未計啲企鵝刺猬之類。呢啲一樣係大白象，泡沫經濟年代下嘅產物，以為側邊起溫泉酒店就帶到遊客。結果溫泉酒店而家就啲小朋友去一泊二日美少女完全予約制爆房（香港貴嘛）。動物園啦喎，點吸當地人？你唔係靠啲大陸同香港遊客，點掂？固然其實有埋遊戲，養住咁多熊同人，都係用公帑。當然因為種種原因（主要因為投票），都係唔肯執。

34. BTW，一定要講。蒙朋友扯線，我在不同場合見過劉公子，聽過佢叫做私下講嘢。對佢印象其實幾好，我絶對唔會好似其他人咁批評佢之類。不過呢，都係要講，講「集體回憶」，劉公子老豆先係我地「集體回憶」！帶畀我地幾多歡樂呀！免費添呀！係咪抵過海洋公園好多先。我真心認為香港應該有更多大劉！

35. 係呀，大劉生性風流，買名牌，玩女人，食福臨門（而家冇食了）。但又如何？佢係咪用你啲錢？唔係嘛。咁關你春事？佢免費娛樂你，應該你多謝佢先係。所以，see the difference？

36. 實情，你估劉公子唔知咩。我好難得同意毛姨姨講嘅嘢：今次50億，但下年又點？大家都係人在江湖，柏木由紀啫（呢個gag永遠都credit返賴叔，係呀，嗰個賴叔）

37. 呢篇三千字嘅文，亦都係半個鐘左右。

（＊）其實呢啲都好含糊。話自己右翼可能畀人當係新納粹，話liberal又會畀人當係LGBT美國民主黨大愛左膠（雖然我都算係，但唔係呢個context下），所以都係「市場撚」比較清楚

（＊＊）A-Club，執咗幾十年嘅動漫雜誌。啲小朋友就日日寫信去，最撚好個個電視台廿四小時都播動畫，十分中二病。

（＊＊＊）本人出咗世咪近代，正如深圳河以北（一說係界限街以北）就係華北。而西班牙就係華西。

------------------------------
版務：收費專欄已推出，支持埃汾高質文章。幾舊水睇三個月，一星期三篇

請去呢度訂：bit.ly/2wVXndj
課程編號填: CC01
科咗水後後有Login及Password畀你

逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。

夜幕低垂，坐着輪椅的黎志偉在一幢89層高大廈的外牆奮力向上攀着，然而風勢強如三號風球，攀爬的繩都被纏住，花了整個小時也難以解開，令他寸步難移，攀爬了超過10小時的他體能已超越了極限，加上強風令他開始開始失溫，令一直充滿毅力的他也要開始考慮終止挑戰……

黎志偉半生充滿不平凡的經歷，曾是職業攀石運動員、拿過4屆亞洲冠軍、最高世界排名第8、曾贏得長洲「搶包山」比賽，然而約10年前從人生的高峰墮下，遇到交通意外令下半身癱瘓，卻不阻他在輪椅上奮起，獲十大傑青之餘，更在4年多前坐着輪椅爬上獅子山。這些經歷令黎志偉有不少頭銜，但他到今日也強調自己是名「攀登者」。

攀登者的特質就是勇於接受新挑戰，在征服獅子山後，黎志偉的新挑戰就是爬上摩天大廈，這更是他健全時已有的夢想。籌備多時後，黎志偉終獲如心廣場合作，可以有機會完夢，而這次攀登的大廈高約320米，是爬獅子山時的約3倍。

黎志偉指自己交通意外後，做的事除了是自己想做外，也是希望有意義，因此是次挑戰除了為脊髓損傷患者籌款，也是希望在疫情下鼓勵市民面對逆境時不要放棄，「將獅子山精神帶到山下。」

挑戰一度因天氣問題延期，但終在1月16日早上舉行。黎志偉起步時風和日麗，但到他攀登了三十多層時風勢開始增強，比他想像中大風，「有陣風吹到我無辦法控制自己，有幾下係人同輪椅一齊撞到玻璃」，攀爬的繩更一度纏住，已令他差點要終止攀登。

幸而問題得到解決，黎志偉可繼續攀登，且愈戰愈勇，「65樓去到70樓係爬得好快，其實心裏都有90%把握最尾可以爬到上頂，但無奈最終就係遇到我哋登山者最大嘅難題，就係天氣。」當時風刮得更加大，風勢強如三號風球，「將我喺70樓高空坐住海盜船咁，飛左飛右過咗3、4米以上。」

強風更令繩再次纏着，經歷一個小時的掙扎，不論自身的技術、或是支援的繩索隊都無法解開繩索，情況更令身經百戰的黎志偉有一絲的恐懼，不停要拍自己的頭令自己不要害怕、再想辦法向目標進發。

黎志偉當時已攀爬了超過10小時，體能已超越了極限，8隻指頭都長了水泡、身體各處也輪着抽筋，然而他卻形容自己當時的身體狀態是進入了另一境界，「係調節得好好，去到以前攀石比賽高度集中嘅狀態，其實嗰個狀態係好正，亦覺得係可以成就大事，超越咗自己意志同體能。」

「嗰種狀態真係喺受傷之前、十幾年前，真係運動員階段嘅黎志偉」，也是牽動了他的情緒，「就係拎返運動員嘅要求，只有成功同失敗、無任何藉口，嬴就係嬴、輸就係輸，嗰刻我都好難說服自己話我爬唔到、我要放棄呢次攀登」，因為目標近在咫尺，「只要畀多我40分鐘內嘅時間，我就可以爬到上頂。」

無奈繩就是解不開，黎志偉經歷大半小時的掙扎，始終要開對講機跟隊友說要停止攀登，「好多人都唔信我會講呢句說話」，在等待協助的約20分鐘，對黎志偉也是煎熬，「好唔開心、好想喊，但係不停叫自己頂住，亦都說服自己，呢個係最明智嘅決定，因為我已經沒無辦法再前進，如果繼續僵持落去，只會令整個團隊愈來愈辛苦。」

回到大廈內，黎志偉也要面對其他人，因為當日有不少傳媒報道活動，更有不少市民在網上甚至現場支持自己，要在這麼多人面前承認自己失敗，是難以開口的，「我覺得係辜負咗大家對我嘅期望。」

完了儀式後，黎志偉拖着疲倦的身體回家，「諗住可以瞓好耐，點知原來係瞓唔到」，其實他的心情是未平復的，「我覺得應該係自己未放低嗰份執着、嗰份成功與失敗之間嘅掙扎。」

失眠的情況持續了數天，已經開始影響黎志偉的思維與日常生活，他知道不是辦法，就選擇面對心底那根刺，回到大樓下，望了3、4個小時，除了想如何可以解決繩被纏住的問題外，也是再一次跟自己說要放下這事情，及放下運動員的黎志偉。

黎志偉的確在大廈外爬了250米，是全世界第一個坐輪椅爬摩天大廈的人，他不成功的經歷也令更多人留意事件，「帶出嘅訊息係比我爬到上頂更加成功，因為大家都會感受到係件好困難嘅事」，他說這總算沒有浪費辛苦攀登的目的，「其實都想鼓勵大家幾艱難都好、盡力去做，一切盡自己能力後，就交畀個天，最重要係做到自己無憾。」

可是，對黎志偉而言，這件事一直都會是他的遺憾，他不諱言這段經歷令他更加成熟，，因為他能夠對自己坦白，「我夠膽同自己講我失敗咗、我承認呢次係失敗，可能換轉以前角度嘅我，會覺得今次係成功。」

他也希望其他人也對自己坦白，「每一個人生都係屬於自己，你唔需要如人交代、都唔需要模仿人，去做返自己、去演活你自己，你嘅人生先會豐盛同精彩」，也鼓勵大家追夢，「無論你傷殘又好、健全又好，只要你抖緊氣，就去追你自己想做嘅嘢，唔好畀自己生命太多遺憾。」