【影視】「狼人」有望回歸MCU？Hugh Jackman於社交平台曬Kevin Feige合照 自從2019年迪士尼以713億美元收購21st Century Fox，唔少Marvel迷都非常期待「狼人（Logan）」、「死侍（Deadpool）」以及其他「X-Men」英雄可以回歸MCU。繼Marvel Studios落實會開拍《Deadpool 3》之後，睇嚟即將又有好消息！近日「狼人」演員Hugh Jackman突然喺IG貼出「狼人」藝術照，以及同Marvel Studios主席Kevin Feige嘅合照，似乎暗示「狼人」有機會喺MCU電影「復活」！ 近日Hugh Jackman喺IG限時動態貼出兩張引人遐想嘅相（圖2），一張係由藝術家Bosslogic所畫嘅「狼人」藝術照，而另一張就係同Kevin Feige嘅合照，雖然兩張相都冇任何文字說明，但網友們就猜測佢係暗示緊將會回歸MCU再演「狼人」，不過亦都有網友認為佢貼兩張相只係悼念緊2000年電影《X-Men》監製Richard Donner逝世。 其實早喺2019年Kevin Feige就講過，隨住21st Century Fox被迪士尼收購，旗下嘅「X-Men」系列英雄都將會納入MCU，而早前Marvel Studios亦落實會拍《Deadpool 3》，考慮到「狼人」呢個IP深入民心，迪士尼又點會唔好好利用，拍返幾套戲呢！ 雖則Hugh Jackman喺2015年就表明過電影《Logan（盧根）》係最後一次飾演「狼人」（圖3），隨住角色喺劇中逝世，自己亦會卸下長達17年嘅「狼人」身份。但好多嘢都唔一定咁死嘅，一嚟佢嗰陣唔知21st Century Fox會被迪士尼收購，二嚟如果迪士尼搵第二個人扮「狼人」，粉絲們都唔會收貨啦，就好似積克船長已經等同於Johnny Depp，陳浩南就係鄭伊健，咁狼人自然要搵Hugh Jackman先合適，所以迪士尼想拍「狼人」電影嘅話，首選緊係搵Hugh Jackman做返，既可以引起舊粉絲轟動，又可以避免搵新演員會係咁被人比較。 不過以MCU依家個日程表，就算Hugh Jackman同迪士尼傾掂數出演新「狼人」電影，都唔知要排到幾時先可以開拍。可能大家會好奇「狼人」唔係已經死咗啦咩？呢方面，根據《Logan（盧根）》電影設定，狼人死嗰陣係2029年，可能迪士尼出套新戲設定喺2029年之前啩，又或者玩平行時空，相信佢哋想拍嘅話就會諗到方法寫故仔，大家又期唔期待Hugh Jackman再次飾演狼人？ #狼人 #Logan #HughJackman #MCU