【影視】《雙層公寓》穢土轉生？ 前成員Youtube露端倪 日本真人戀愛節目《雙層公寓 (Terrace House)》曾經流行一時，但自出演者木村花於去年因不堪網絡霸凌而輕生，隨後爆出《雙》製作團隊指示參加者爭風吃醋、甚至為節目效果惡意剪接內容後，該節目就已經被腰斬。不過近日有日本網民就發現《雙》嘅製作團隊似乎並無放棄呢個系列，而且仲試圖以另一個方式復活節目。 一切就要先講到《雙》節目旁述之一，特林德爾·玲奈於上月尾成立嘅Youtube頻道。呢個名為「トリンドるんるん【トリンドル玲奈・トリンドル瑠奈】」嘅頻道表面就係紀錄玲奈與妹妹瑠奈嘅生活，但拍攝手法就明顯唔係普通嘅自拍Vlog形式、甚至仲有幾分《雙》嘅味道。而喺頻道簡介中，玲奈亦有提到搵咗「長久合作過嘅製作團隊」幫手拍攝Youtube影片，而且拍攝地點正正就係《雙》用過嘅輕井澤大屋，令大家估計佢講緊嘅就係《雙》嘅製作團隊。 而另一個線索，就來自於《雙》第四季認識對方、早幾日宣佈結婚嘅島袋聖南、石倉Noah夫婦。二人於去年8月就已經成立Youtube頻道「せなのあHOUSE」，一直以黎都係製作個人拍攝嘅Vlog影片，但宣佈結婚後接連發放嘅三條「求婚片」就突然有電視節目級數，而且整體氣氛、節奏、配樂以至畫面上出現嘅字體都有濃濃嘅《雙》味，最後一條片更加搵黎多位曾經《雙》嘅出演者為二人送上祝福，最後仲黎段「床上赤裸相見」戲碼——根本就係一集《雙層公寓》黎！ 木村花嘅悲劇之後，原本嘅《雙層公寓》幾乎肯定唔會重現，但睇以上兩個與《雙》製作團隊有千絲萬縷關係嘅Youtube頻道，似乎就係為《雙》嘅穢土轉生試緊水溫——而且反應相當好，島袋聖南及石倉Noah嘅求婚片發佈後幾個鐘就成為日本Youtube熱門影片——睇黎不久嘅未來就會有變種《雙層公寓》出現啦。