【龔成問答信箱】（Q22481-Q22500）

Q22481：

老師，如果我找你私人教學股票，可以？我想有機會私人向你好好學習。

我可以自己做到快速睇完一份財務報表就知道呢隻股票會升定跌，我本身都有一定的股票知識。

另外，其實你認為股票算唔算是一種技能和手藝？？

因為我較多時間放在研究股票，但啲人成日話我不務正業，又講股票等同於賭博。但我自己認為喺一盤生意。

龔成老師：

抱歉，我教學10年，都是大班教學，一次過令多人得益，而不提供私人的教授。

始終我一個人的時間是有限的，我要想想如何在相同時間，令最多人有所得著。

這與你是否有實力無關，而是我本身的時間問題。

我過往做過銀行、證券行，當中都要用到股票知識的，你現時擁有技能，其實可以好好發揮。我建議你大量閱讀，增加你的知識，然後再上我的股票班。

------------------------------------------------

Q22482：

老師，你好！因承繼了家人的股票遺產，我地想買樓所以已沽了一部分的股票，現在還持有以下的股票，想請問老師的意見

01398
01813
00005
01888
03333

00939
02689
03913
01288
02380

03377
00941
02238
00175
00388

02238
02314
02689
02800
03988
06837

因不想持有過多的股票，請問邊隻股票合長揸？有邊隻股票可以現時/近期可沽？適合賣出的價位係邊呢？請指點

龔成老師︰

1398, 0005, 0939, 1288, 2380, 0941, 2314, 3988係收息股類，增長力不高，主要只係收下息。若你係年青至中年，這類股票不宜持有太多，你可沽出大部份。相反，你都將近退休之年，這類股票你應保留，去為自己創造現金流。

3913, 2238, 0175, 0388, 2800這些股票較有質素和增長力，若你係年青至中年，這類股票建議保留。若你較年長，就不宜持有太多。

1813, 1888, 3333, 6837風險比較高，唔建議持有太多，你可以沽出部分。

2689, 3377質素較弱，建議沽出。就算相保留，都只宜好小注。

現時這些股票，大致上都在合理價位，未算好貴。但無人會知，幾時先去到一個好貴架水平，所以我建議你有策略地，去慢慢出貨。

你唔好等到要買樓先一次過沽，最好係分段，每距一段時間就沽少少。例如你一年後會買樓，可能你就每2-3個月就沽少少，以減低價格波動，所造成之影響。

------------------------------------------------

Q22483：

你好，龔Sir,小弟睇完你兩本著作獲益良多，正在步處未來十年財務計劃，希望可以盡快財務自由，希望你可以俾d意見小弟。

我和太太42 歲，三年前買了一層公屋450萬，收租$1.1萬（三成首期）

一年半前買了一個$760萬單位自住（2成首期供30年）

家庭月入10萬，扣除開資每月儲蓄3萬，手持現金$400萬，目標希望可以盡快把自住物業供完千+每月有被動收入5萬，應該可以退休。

請問應該如何投資及要花多少時間才能達成以上目標呢？

龔成老師︰

由於你現時財富組合，已經有2個物業，因此我地係未來進行增值時，會先集中係優質股上，以免成個財富組合，太偏重物業類，而造成風險。

如果你希望8年後每月有5萬蚊現金流，以股息率6%計，你需要本金1000萬。

以你42歲，可以選擇一些「平穩增值股」+「潛力股」作投資目標，去累積這筆所需資金。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

如果你現時無太多投資經驗，潛力股這類風險較高的股票，你就不要持有過多，最多維持2成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-4成，視乎你投資經驗多寡和了解這些股票程度而定。

大市現處於合理水平，那400萬資金，你可以先用100-150萬，以"分注"形式慢慢入貨。餘下資和每月儲蓄，就等大市有明顯回調，才慢慢大力度掃貨，並長線投資。

我假設投資回報有10%（連股息再投資），你每月投資$30000 + 400現金，10年後大約會增值至1600萬，這樣安排相信很大機會達至你的財務目標。

------------------------------------------------

Q22484：

老師，記得你叫唔好破產
但又差卡數 又有貸款 唔知點搞好

龔成老師：

第一，提高收入。

第二，減少支出。可以剪去所有信用卡。

第三，債務重組，將高息負債轉到較低息。

第四，定一個還款計劃。

------------------------------------------------

Q22485：

你好，請問 2814 三星 現價值得投資嗎？

龔成老師：

三星FANG ETF（2814）的投資目標，係追蹤NYSE
FANG+指數的表現。是一個美股潛力股基金。

首先，FANG+係代表美國上市多隻領先既科技股票，即係代表Facebook、Amazon、Netflix、Google，而該指數會再加上其他科技股，如Twitter、Tesla、百度等，即是全球處最前列的科技類公司。

這基金是一個潛力基金，長遠正面，但要留意價格會較為波動，加上近年科技類公司上升左唔少，因此現價唔算平，建議以月供的模式投資，或少注好了。

買入後長遠持有。

如果同時持有香港上市的科技股，再加上這基金，能有平衡配置的效果。

------------------------------------------------

Q22486：

你好！龔成老師！我係你fans。我想揀隻收息股，現價買入659，6823定939好？

本人30出頭

龔成老師︰

若果以收息股黎講，建行(0939)和香港電訊(6823)，質素上會較高，現價合理，可以分注。

但當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時30歲出頭計，是財富增值的黃金時期，應該先集中投資「平穏增長股」和「潛力股」這類增長股，而唔係收息股。

你應該係先用增長股，去累積大個財富。到你退休時，才換成收息股，去創造穏定現金流，支援退休生活。

------------------------------------------------

Q22487：

你好，我本身有買你嘅書，都有睇你yt 嘅片同留意fb。

我同女朋友依家23歲，兩個人加埋只有40萬，希望5年內儲夠130-150萬，未入過市，想入。

有留意你話要買「潛力股+平穩增長股」，想了解下京東物流、中國龍工、中國銀行、中芯國際、華虹、領展呢幾隻股票如何，值得入貨嗎？

幾多價位先算合理呢？早幾日大跌市冇建倉有啲後悔

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你23歲，應以增值為主，可以用一些「平穏增長股」 + 「潛力股」作組合，去創造一個增值平台。

京東物流（2618）和中芯國際（0981）質素係有，但未到最高質素，只宜小注。前者在合理區，而後者要等佢回多少少，才好開始慢慢入貨。

中國龍工(3339)質素只係中等，現價合理，但不值得太大注。

中行(3988)係收息股，增長力唔會太強，主要係收下息，不適合你年紀。

虹半導體（1347）有質素，發展不差。但現價有少少貴，回翻D才開始慢慢入貨，會較好。

領展(0823)有質素，現價算合理區頂，可分注。

其實我地投資優質股，一般預期年均回報大約10-15%。要單憑40萬，5年內累積150萬，係有點難。

建議你，再加上每月用$12000月供優質股，我假設投資回報有10%（連股息再投資），你每月投資$12000 + 40萬，5年後大約會增值至150萬，這樣安排相信很大機會達至你的財務目標。

策略上，你可以投資「平穏增長股」和「潛力股」。你每月5成儲蓄，即是用$6000做月供。其餘先儲起，用一邊月供一邊儲蓄的策略。

若你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有40萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22488：

龔Sir先前上完你堂明白價值投資道理，但700仍高位五百幾買入，見現在一直下跌，上了堂仍不懂補捉合理價而且現在一直下跌，

所以恐慌此股能否上回五百幾，是否要四百幾時止蝕，本身認為它是有質素的，但看完一堆股評人說好像會跌至三百幾而且好難上返去五百，

因此現在好像沒信心自己先前是選了優質股，好像選擇錯誤入了的心情。但你上堂時分享了比亞迪跌至底點仍持有的心態，好像有點困難學到。

所以想知道現在騰訊俾中國政府這樣大壓，而且北水同外資同時流走，那股價是否不能上回去，因為股值已經不是當初計的這樣，如果重身估值將可能是大跌了，

那賺錢優質股會否變成無法上升回去的股，希望老師指點下，謝謝

龔成老師︰

你要學識分辨企業質素和價格之餘，都要學懂冷靜分析大市現狀，和一些發生的因素。

就好似近期股市大跌，主要係中央一系列政策出台，加上大市氣氛較弱，令不少優質股都出現較大調整。但我地要了解翻，這些因素，係唔係會對企業造成長線影響。

騰訊(0700)的確係會對佢賺錢能力，有負面性影響。

所以，估值上會減，同時如果持有太多貨，可能要略為減持，因此政策對佢長遠有影響，影響了賺錢能力與估值，不過，未到核心性影響（即是未去到令企業無錢賺、無優勢，而是賺錢能力略減）。

但由於企業有一定規模和質素，相信佢長線會適應到這些新規則，令業務重回正軌。

我暫時唔見到，騰訊長線投資價值有明顯差，現貨可持有，相信回翻上去5XX，唔係大問題。但你預佢中短期，個股價一定會好波動。但只要你目標係長線，咁就無問題。

------------------------------------------------

Q22489：

如果有500萬，全部買港燈成世收息係味最好，唔想煩。無今多時間，成日心驚驚 驚d錢變廢紙

買左50隻穏健收息股本書，重有咩會適合我架

龔成老師︰

港燈(2638)係有質素收息股，適合你家人退休之用。但完全集中晒係佢身上，就唔係咁理想。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

若你不太懂選股，你可以集中未來恒生高股息率（3110），大約佔6,7成，再加上幾隻不同行業的收息股，咁會較好。

如果你真係完全對這些收息股，無任何概念，你才100%持有3110。

但你緊記，現時大市只在合理區，未到好平。你只宜先用一半資金，分多注去慢慢入市，唔好貪快一次過入晒。

我地要分開多注，去平衡價值波動所帶來的風險。而餘下一半，就等大跌市才出手。

以下是我的13本書：書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）
《80後千萬富翁》（初版）

除了50隻收息股，建議你首先睇埋以下3本，之後再睇其他。

《80後百萬富翁》
《股票勝經》
《財務自由行》

------------------------------------------------

Q22490：

您好，龔sir，我今年26歲，月薪2萬。無投資經驗，又想資產增值，會睇下啲行業龍頭股，一年前心急入左市，依家9成資金用左黎買阿里巴巴

因為股價一直跌我又一直買，依家買左30萬貨，平均會242元，不過佢長期低位，我唔知應該一直等，定依家低位放再轉下其他股，又應該持有咩組合？希望指點一下，感謝！

龔成老師︰

其實你買入一隻股票後，買入價已經唔重要。你是否持有，應該係睇佢質素，有無長線投資價值。如果有，帳面虧損唔洗太在意，因為佢長線會增長，慢慢令價值提升。

你26歲，投資應以增值為主，阿里巴巴(9988)係合適。

但問題係，我地唔好成個組合，只集中係1隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

因此，你要沽出部份，換碼至以下增長股。未來新資金，都可以用以下「平穏增長股」 + 「潛力股」作目標。

由於你係初學者，對企業估值，點去定平貴未必太了解。我建議你先利用月供模式，去建立一個股票組合，以減低買貴貨風險。

現在你每月先用5成儲蓄做月供。其餘先儲起，用一邊月供一邊儲蓄的策略。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22491：

老師，想請教有關1024快手，我277數蚊買了很多貨，之後不斷跌，有咩對策？隻股前境仲好喺嗎？謝謝指點

龔成老師：

快手（1024）有兩大問題，第一，佢一直都貴，現價仍唔平，你在高位重貨，其實要在反彈減持。第二，政策因素，對佢賺錢能力都有少少影響，不過，佢仍是有質素的，未到劣質類。

係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展，但不宜持有太多貨。

------------------------------------------------

Q22492：

老師你好啊！ 今天大市跌了千多點，我分注買了幾隻股票，也想你對我的組合給予意見。謝謝你。

月供股票：
中電：521 @$87.6 （這隻已停供了，在高位時供的）
煤氣：1827 @$14.08
港鐵：984@$43.93
粵海：1168@$11.89
領展：326@$78.8
中生：5097@$7.11
盈富：488@$28.28

分注買入：
福壽園：2000@$7.2
金沙：[email protected]
阿里巴巴：200@$196
3067：1000@@17.23

組合共11隻，會否太散？

而大部份買入價都略高，所以現在賬面都是蝕的。 希望老師有時間可以給予意見，謝謝你

龔成老師︰

你現時持有股票和月供組合，都係有質素，買入價大致都合理。若你係年青至中年人士，這些股票都係合適的。

你要記住，就算再優質股票，中短期都會出現波動，只要質素無變，你唔洗理佢帳面虧損，照持有就可以。

組合有11隻股票，又少少多，勉強可以。

由於上述的股票都是有質素的，因此，不用改變，投資要長線，你保持進行就得。不用理短期的股價波動。

------------------------------------------------

Q22493：

老師，多謝你之前比既議建。另外改變左投資既方式，都開始睇緊你既書吸收知識。呢半年我同男朋友都為左將來煩腦緊，一直15/16唔知點決定買樓定租樓既問題

我地兩個分別37同39歲， 兩人月入$63000 因為黎緊想結婚，所以打算搬出去住， 兩人家用同保險供款$25000左右 ，一個月可儲$38000

1/ 想買細價樓 $520萬樓下 但唔知手頭既錢夠唔夠 定 應該租兩年樓 用手頭上既錢黎增值下

2/ 手頭有110萬cash , 股票39萬

如果要租樓 股票同cash 應該點分配

1038 長基建 - 500 $46
388 港交所 - 100 $508
2800 盈富 - 500 $28.956
3067 安碩 - 558 $17.458
1475 日清 - 9000 $7.348

1337 雷蛇 - 10000 $2.58 (準備放)
3399 粵運交通 - 1000 $4.96 (準備放)
700 騰信 - 100 $565
1810 小米 -2000 $24.277

3690 美團 - 100 $204 (準備放)
9988 阿里 - 100 - $279.4
241 阿里健康 - 2000 $27.2

年頭開始做月供，依家供緊
2800 -$2000
3067-$1500
1810 -$1500

想老師比d 建議我哋

龔成老師︰

以你2人收入，做9成按揭供25年或以上，應該可以供到520樓下的物業。當然最終你要睇埋，銀行佢地審批、估值、當時息率，才會知道最終結果。但粗略估值，應該可以。

至於先置業定租屋，你可以睇翻在你能力範圍內的樓盤，能否滿足你生活需要。講緊唔係而幾年﹐係未來20年。如果可以，你地又有信心長線「供得起」，咁就無問題。

但從資產平衡配置角度，你在買樓同時，必需留有一定股票，以免財富組合過於偏重物業類，造成過度集中性風險。

若你決定先租屋，去要增值多D本錢，才去置業。你可以用「平穏增長股」 + 「潛力股」作組合，去創造一個增值平台。

現時你組合和持股，都係合適。但當中的粵運交通（3399）質素未算強。美團(3690)、阿里健康(0241)、雷蛇(1337)不確定性較高，這4隻股票，不宜持有太多。

你可以減持少少，但不至於要全數沽出，因為佢地唔係無質素，只係風險較大，要控制注碼。

另外，現在你現時月供金額有點少。建議你用每月先用5成儲蓄做月供。其餘先儲起，用一邊月供一邊儲蓄的策略。

大市現處於合理水平，那110萬資金可以多用30-50萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

而租金部份，你就唔好去投資，直接留起現金去支付。

------------------------------------------------

Q22494：

龔老師妳好，首先祝你事業和運氣蒸蒸日上！我想請教一下，我有本金300萬左右，沒有投資經驗，想買一些保本的產品，目標是有4%回報和安全

之前聽你說買2800，我也打算買，不過我想買幾種產品以策安全，請問你有甚麼投資策略可推薦嗎？感謝！

龔成老師︰

其實完全保本產品，係現時低環境，你基本上係唔會找到4%。

如果你想完全保本，你可以考慮做定期、A級債券、年金之類，但唔會有4%，而且債券都有違約風險。

至於我講的盈富(2800)，或者一些優質收息股，佢地係相對穏健。但始終都係股票，一定會有股價波動，無可能做到保本要求。

而且，你現時才22歲，十分年輕，風險承受力應該較高。就算你無投資知識，都可以透過有策略地投資一些優質股，去進行增值。

你22歲，應以增值為主，建議你用「平穏增長股」 + 「潛力股」作組合，去創造一個增值平台。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。如果有投資美股，可投資VOO。

或潛力股︰安碩恒生科技(3067)、中生(1177)、福壽園(1448)、小米(1810)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。如果有投資美股，可投資QQQ。

由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。

大市現處於合理水平，那300萬資金，你可以先用30-50萬，以"分注"形式慢慢入貨。餘下資金，就等你提升投資知識後，再慢慢因應市況，加大注碼，並長線投資。

另外，除了用現有資金，我都建議你用每月儲蓄，進行月供股票，去加快你財富增長。

策略上，你每月先用5成儲蓄做月供。其餘先儲起，用一邊月供一邊儲蓄的策略。餘下一半，就等大跌市時，才出手入平貨。

------------------------------------------------

Q22495：

想問老師，點睇私樓與居屋?我目標係馬鞍山 首選新港城，呢一年升幅太誇張。337實呎2房已經要670萬起跳（議價可能650萬都得），計埋裝修30-50萬，差不多用盡2人儲蓄先比得起

而居屋可以4xx呎5xx萬，但我擔心過多十年會甩皮甩骨 始終質素不及私樓。

但我地深信10年後300呎係唔夠住 有了小孩一定要換大啲

依家好忐忑不安 唔知買咩先啱

龔成老師︰

如果你買入新港城，要資金盡用，其實唔係咁理想。我比較建議，係買樓同時，都可以留有一定資金和優質股作增值。

其實，居屋投資價值不及私樓，但勝在入場費較低，令你可以有更多資金空出來，作其他投資。所以，作為自住樓，居屋都有佢存在價值。

你可以睇翻你長線生活需要(10-20年)，如果4xx呎係可以，而佢質素又唔係太差，其實你選擇居屋都無問題。

相反，如果4xx呎都係唔夠住。你就可能先買一個較細單位(私樓/居屋)，去暫住。同時間，用優質股保持增值，等將來可以細屋換大屋。

另一個方法，就係唔買屋住，直接用優質股增值，之後買理想物業。但就有一個風險，就係萬一股市跑輸樓市，你買樓成本變相會升左。

選擇那一個方案，你可以睇翻自己人生計劃和實際情況，去作決定。

------------------------------------------------

Q22496：

我今年27歲，每月可以儲1萬5千，現時流動資金約15萬

股票持有：
騰訊$492 100股
雷蛇$2.5 15000股
金沙$31.52 4000股
海螺水泥$42 1500股
香港寬頻$11.3 10000股
安碩恆生科技$18.07 1500股

我現時投資組合可以嗎？

我另外想儲錢買樓、我應該買居屋(假設實抽到)定私樓好？

龔成老師︰

你現時才27歲，應以增值為主。你現有持股，大致上都適合。

雷蛇(1337)不確定較大，唔建議你持有咁多，最好沽出部份，換至其他有增長力的優質股。

香港寬頻(1310)主要係收息，唔適合你年紀。

現時大市只在合理區，你現有15萬就等大市有明顯回調，才慢慢加注。

至於置業方面，居屋投資價值，比私樓為低。但由於佢售價跟市場價相比﹐係有折扣。

你考慮時，可以從長線角度去考慮，邊個方法先至可以令我地，有較多現金流空出來，作投資增值。

因此，從財富增值角度，居屋係值得考慮。

所以，其實無話邊個明顯較好。若係自住樓，你可以考慮埋邊個物業，可以配合你長線生活需要，而且又有信心"供得起"，去作最終決定。

------------------------------------------------

Q22497：

龔老師，你好，想請教你。我有100股阿里巴巴，買入價是$287，應唔應該現在再買入100或200股呢？或者，會唔會應該將資金買入小米（冇貨在手的？

另外，想問下，如果吉利及渣打，應該選擇邊隻好？我有400股渣打，買入價50.5。本身是沒有其他銀行股的，亦沒有任何車股。

麻煩晒你，更加多謝你，得到你的提醒，及看你的書，知道應看企業質素，買入優質股，沒有因股市大起大落就情緒波動。

龔成老師︰

從現價計，阿里(9988)算係合理區中間，而小米(1810)仲有少少貴，要回多1成倒，才算開始合理。

以平貴水平計，你係應該加注阿里(9988)。但你要考慮多一件事，就係持股組合平衡性。

如果你本身資金不多，我建議你分少少去買小米(1810)，去分散風險會較好。如果你資金較充裕，尚有2,3注資金係預留入阿里，現價可加1注。

至於吉利(0175)及渣打(2888)，我會建議等入吉利(0175)，但現價略貴，要等佢回多1,2成才好開始入貨。

而渣打集團（2888）質素只是一般。

雖然未到劣質，但質素不高，但本地銀行股中，賺錢能力算是較弱。加上銀行業近年的環境不及過往，賺錢能力不及以前咁好，相信佢之後，都只是好基本增長，不要對股價有太多期望。

投資價值只是一般，我會建議你慢慢換至其他銀行股較好。

你可以考慮恆生(0011)或中銀香港(2388)，現價合理。前者係收息為主，加少少增長。而後者增長潛力會較強，但風險都會略高。

------------------------------------------------

Q22498：

1: 老師，我想問下，如果想用nav來衡量股價的高低，除左地產同銀行類，仲有冇其他行業係適合？

2：老師，想問這幾天都跌了咁多，最大持倉可加到幾多成？

3：老師，我自己計9698估值係下限大約60附近，依家跌穿左咁多，但我又真係唔認為我計錯，因為我都綜合左好多卷商報告，想問算唔算係恐慌式下跌跌凸左？

4：另外承上題，第3題，通常呢d殺錯價，係未好快會升番，因為我又諗，冇理由咁好比個錯位我地慢慢買，我呢個諗法岩唔岩？

龔成老師︰

1) 一些資產可以明確反映到佢價值和賺錢能力的股票，其實主要係地產同銀行類，有部份製造性行業，都可以用到。但你要先了解清楚，佢資產價值，有多大程度可以反映佢賺錢能力。

如果係有好核心性影響，你才可以用市賬率去分析。

2) 無大變，大致持有3-5成現金等機會

3) 萬國數據（9698）有質素的。

佢的業務為開發及營運數據中心，根據佢公司提供的資料，佢係全中國最大的運營商網絡中立數據中心服務提供商，市場份額約2成。

現時主要通過GDS上海、GDS北京及其子公司進行該等業務。GDS北京及GDS上海各自持有經營業務所需的互聯網 數據中心牌照。

佢提供託管和管理服務，包括創新和獨特的託管雲價值主張，機房面積為266,260平方米，有一定的規模。

見佢生意有一定的增長，行業前景正面，現價算係合理區中間倒，未至於跌到好平。此股投資價值都有，但就唔建議太大注。

4) 佢幾時會上翻，無人會知。近期不少中央政策，令成個大環境多左不確定性。佢客戶當中，包括阿里巴巴(9988)和騰訊(0700)這些最近較受打擊的大企業。

故市場可能憂慮，佢生意會唔會受到影響。畢竟佢頭2大客戶，佔生意額過半。雖然年報無列明頭2個客戶是誰，但相信離不開某2間。

只能說，投資此股係可以，現價都合理，但唔好太大注。

------------------------------------------------

Q22499：

想問老師，最近研究緊新能源氫氣概念股，這些都是未來世界大趨勢？我見到有好多大國家都有實質政策扶持

想問長城汽車，金馬能源，中國旭陽，中國石化和濰柴動力都是有優質股嗎？

老師你有哪個氫能源股推介？

想問老師 我有3手阿里巴巴。依家跌穿左招股價，應該走哂3手？

受監管下，阿里巴巴本來的質素有下降嗎？

龔成老師︰

其實綠色能源，一定會係未來大趨勢，新能源氫氣有機會係其中之一。

但我地唔會因為咁，就盲目去投資一些相關概念股。因為你要本身這個能源，係有一定效益，而企業又能成功將之市場化，才有機會有投資價值。

好多時，當中央出現政策扶持時，就會造就不少相關企業急速發展，但好多時都係良莠不齊。因此，你要認真分析企業本質，才去下投資決定。

我未有研究氫能源相關股份，所以無建議比你。

如果你睇好新能源類，可以考慮GX中國潔能（2809），其目標為追蹤SOLACTIVE中國清潔能源指數NTR之表現。

當中佔最多為"半導體產品與設備"股份，約組合4成，其次是逾2成的"獨立電力及可再生電力"。

此股平貴不易分析，而且頭10大股份中，除了信義光能（0968）外，其餘都在內地上市。潛力度是有的，但會比較波動，如投資宜慢慢分注，可長線。

長城汽車（2333）、濰柴動力（2338）、金馬能源（6885）、中石化(0386)都有質素，但未算係最高。

濰柴動力（2338）不確定較大，要控制注碼。而金馬能源（6885）、中石化(0386)增長力唔高，主要係收下息。

中國旭陽（1907）無特別分析，只見之前有些報導。

佢之前公布，澄清最近涉及其於河北省定州市及內蒙古的氫能項目的若干媒體新聞報道，指定州項目試產，並擬於呼和浩特市建加氫站。

該集團指，有關於定州經濟開發區河北旭陽新能源產業園內建設運營氫氣儲運和建加氫站，有關生產基地去年7月開始試產，探索區內在氫能存儲、運輸和燃料相關電池布局機會，開拓京津冀市場等。

至於去年，該集團合營企業與呼和浩特清水河縣政府簽訂另一項氫氣項目框架協議，合作於清水河縣開展氫氣開發項目。

與定州項目相似，該集團將負責於清水河縣進行氫能生產、運輸和建設加氫站，把該市發展為華北地區氫能輸出基地。

只可以話有風險有回報的類別，如真的想投資，一定要控制好注碼。

另外，你唔好用買入價，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

阿里(9988)近期受中央政策風險和大市氣氛影響，出現明顯回調。但暫時唔見長線質素，有明顯變差，現貨照持有就可以。

------------------------------------------------

Q22500：

你好呀龔sir！請問面對依家嘅跌市，我應該點變動我嘅投資組合呢？

00909@1000 (31.4)
01044@1000 (52.35)
01177@3000 (7.5)
01299@200 (92.5)
01448@1000 (7.35)

01530@1500 (9.067)
01810@400 (24)
02126@500 (25)
02158@400 (52.75)
03309@2000 (9.4)
03690@300 (331.667)

06618@300 (111)
06690@600 (28.433)
09633@600 (45)
09988@300 (235)
ibond@400

月供緊(每月每隻$1000)
00066@326 (43.4)
00388@17 (482.176)
00823@257 (70.086)
02800@498 (28.559)
03067@776 (17.372)

我明白依家嘅組合實在太散，而且資金只能夠支持我繼續保持月供股票。請問我應該蝕放D貨再趁低買其他股票溝貨定點？

唔該哂

利申：我27歲

龔成老師︰

這些股票，只要係有質素，你係應該長線持有，等佢自然增值。唔建議你咁換來換去(除非已經好貴)，如果其餘股票真係平，你可以用新資金投資。

你現時持股真係好亂，好散。未來時間，你要集中翻係10隻以內，否則你好難定期去審視佢地質素和管理。

以你27歲計，應該先做好財富增值部份。你現時月供組合，係可以。

而ibond只係收息產品，唔適合你。

你現時持股，都係有質素，但有個好大問題，就係你非常集中係醫藥股。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但你唔洗沽出，只要用你新資金，去慢慢將個比例拉翻平衡，咁就可以了。

另外，明源雲(0909)、三生製藥（1530）、藥明巨諾(2126)、醫渡科技(2158)、美團(3690)、京東健康（6618）不確定較高，雖有長線投資價值，但不宜持有太多，暫時唔建議加注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18501-Q18520）

Q18501：

龔老師，之前睇你的post介紹陽光(00435), 佢現在的每股盈利是負數，這是甚麼意思？現在買正確嗎？

長遠來說，領展還是陽光較好呢？

龔成老師：

陽光（0435）是不差的收息股，佢的每股盈利負數，只是「物業重估」出現虧損，但這只是一個會計上的數字，並無真正現金流的減少。

我地分析房託，最重要是「長期的租金」，有租金就有收入，而房託規定要將90%的「可分派收入」作派息的，因此，我地投資者好重要是分析，長遠的租金。

房託中短期的租金一定差，但這只是影響中短期股價，而疫情影響總會過去，慢慢會好轉，因此，長遠無問題就得。

而陽光持有的物業不差，長遠仍是正面，雖然不是高增長股，但作為收息股，可以，現價仍合理。

至於領展（0823），都是有質素的房託，現價仍合理。佢會比陽光較有增長力，不過，股息率陽光就會較好。

------------------------------------------------

Q18502：

不好意思龔sir ，有個問題想問問你的，關於止蝕和溝貨

如果係高位買了一個資產，就如騰信兩年前若果450 在不懂估值時買了， 佢下跌了一整年幅度都可能有40%； 這些情況是要止蝕還是溝貨？

龔成老師︰

先講"止蝕"，我地唔應該用佢股價跌多少來衡量，咁係好錯，我地係應該用佢本質來做決定。如果企業長線質素和行業前景無變差，就算股價跌多少，我地都唔需要沽出。

反而這種下跌，造就了我們用平宜價錢，買入優質股架機會。

當出現這個拾平貨機會，我地去唔去加注，就要睇"溝貨"與"分注"這個概念。兩者聽落好相似，但實際上係完全不同。"

"溝貨"是愈跌愈入，同時不理企業質素，不理自己的原先設定金額，盲目去入。

"分注"則是「一早定好買入策略，一早定好本金總數，並以有策略的模式進行」。

所以，係而個平貨機會出現時，你預定投資騰訊（0700）架資金未用盡，就應把握機會再入貨。相反，如果預設資金已用盡，就算再平也不要加注，否則只會加大風險。

------------------------------------------------

Q18503：

老師，我今年23，現時有30000存款，試過一段時間投資股票，都輸，所以之後都想月供增值，想請教下咩組合會適合，需要點分配資金

我都有留意老師既post，都會推薦2800，但現時一手股價系一萬幾，但我又睇到你會分配$2000去供2800咁樣，系咪買碎股既意思？

而如果想學習投資股票基本，應該睇咩書先，因為老師既課堂都未能負擔到個費用。麻煩你了

龔成老師：

我所指的是「月供股票」，你要先去銀行或證券行登記先得。每月投入相同金額，買入指定某股。

比起你過往投資出現虧損，利用月供股票，有規律地累積財富，這是更好的方法。

簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

你睇《股票勝經》最適合。

------------------------------------------------

Q18504：

龔sir, 想請教你以下購買的股票是否正確，會不會太穩陣得濟？現時應該先持有現金，不再入貨嗎？

我28歲，月入2萬，每月草8000-10000，供盈富6000，現金快到9萬。

持有股票：
港鐵-41.2 @500
粵海-13.32@2000
領展-70.2@600
長建-51.5@500
中國神華-14.78@2000
金沙-32@400
中銀香港-24.1@500
盈富-25.135@1417
（合計約20萬，正在蝕2萬，即現價18萬）

龔成老師：

上述的股票，基本上都有質素的，不過全部都是「平穩增長股」，而無潛力股在其中，而你28歲，在組合上應該要有潛力股的。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以考慮盈富（2800）$4000。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18505：

請教龔sir, 知你忙長話短說。我再一次複雜股票聖經，其中以下不明白：

股東收益=盈利+折舊攤銷-資本開支 （點解不是減折舊攤銷，折舊不就是等於要開支嗎？）

龔成老師：

因為盈利本身已經減去了折舊攤銷，而這個「股東收益」，其實是想找出一些類似現金流的概念。因此，原本是支出的折舊攤銷，是非現金流的支出，而這個「股東收益」，希望調整翻，所以會從盈利，加上一些非現金流的支出。

------------------------------------------------

Q18506：

老師您好，我媽媽剛剛60歲，月入只得一萬，四年後就退休。

我想幫她每月以$8000買些平穩增長股及收息股，讓她退休時都可以收息作為收入來源。

現時月供計劃：
$3000 盈富 (2800)
$2000 香港電訊 (6823)
$1500 港鐵 (0066)
$1500 港燈(2638)

1. 想請問您對此計劃有甚麼意見，投資比例及選擇是否合理？

2. 如果改以月供金沙或是中國移動會否更好？

3. 我原本心儀陽光房地產（435），可惜這隻股不能月供，我應該選擇繼續月供上述股票，還是每月買入一手陽光房地產更好？謝謝老師！

龔成老師：

1）「想幫她每月以$8000買些平穩增長股及收息股，讓她退休時都可以收息作為收入來源」，方向正確，不過由於距離退休時間較近，所以唔好太進取。

你的月供，無問題，可以進行。

但如果佢本身現金唔多，可能要減少少金額，等佢有一定的現金在手，這都重要的。

2）上述已是很好的計劃，不用改。

3）你可以久唔久買一手陽光（0435），例如每2、3個月。

------------------------------------------------

Q18507：

老師可否淺談近期推出的ETF產品，「2806，中國消費龍頭品牌」和「2845中國電動車」，如果我想投資中國市場，會否比「南方或安碩A50」為好呢？

因為未來國家政策指向雙循環，我覺得疫情過後，經濟慢慢增長，未來的發展路向一定會傾向以「內需，5G和新能源汽車如電動車等為主力的方向性作發展的慨念，謝謝你。

龔成老師：

ＧＸ中國消費（2806）係追蹤Ｓｏｌａｃｔｉｖｅ中國消費品牌指數ＮＴＲ之表現，見到當中都是龍頭股，我相信，不少都是中國消費龍頭品牌，及較為高端化消費的公司。

我相信長遠都會有一定的增長力，不過就比較波動。

ＧＸ中國電車（2845），這基金之投資目標為追蹤Ｓｏｌａｃｔｉｖｅ中國電動車指數ＮＴＲ之表現。這ETF能夠投資於對中國電動汽車業發展類別的公司，例如比亞迪（1211）就是成份股之一。

相信長遠會受惠於電動車發展，不過，由於行業估值現價唔平，你要慢慢分注入，或月供。

你投資這兩基金，會比「南方或安碩A50」更有潛力，但就更加波動，你要明白當中的風險。

我相信中國經濟中短期仍會波動，但在長遠睇，仍是不差的（當然不是高增長年代）。

------------------------------------------------

Q18508：

成哥，我上星期買咗3隻美股共5萬HKD（Tesla, AMC, 理想汽車，蝕緊幾千

今日抽中一手農夫山泉，我知自己性格急進，想主攻短炒但又欠乏投資眼光，求大神指點迷津

龔成老師：

我20年前，都是短炒者，技術分析者，用左幾年，輸足幾年，之後長線投資，就開始不斷賺錢。

我好後悔當時浪費左幾年去學這些分析技術，我當時不斷睇書、上堂學短炒，但最後都是輸，好後悔，只怪我當時無知。

之後做銀行同證券行，見大部分輸錢的客，就是短炒的一群！這是我10年見到的情況，這是行內的秘密，根本大家都知短炒者一定輸，但業界一定唔會講！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特更講明反對短炒，反對技術分析。

只要我地細心少少去想，都會明短短炒根本賺唔到錢。長線先至係王道。

你買入的股票無問題，只是短炒有問題。

------------------------------------------------

Q18509：

成哥，我想問買樓既問題：

我自己月薪約3萬5，現金有約40萬，股票30萬，同屋企人同住屯門私樓約值5百萬， 一直有個心願想置業，改善生活質素，最好係自己投資有道買樓，唔想按屋企人層樓，話說屋企人最近有興趣搬去4小lung 昇悅居：

(1)你會建議我屋企人賣左屯門私樓買昇悅居一起住（樓換樓）？之後果20年我自己供埋個差價約2百至3百萬。

（2）還是我買屯門細單位自己多個物業第時升值再考慮買最心儀果間？

昇悅2房而家值700至800萬我現時人工唔可以供得起就，所以我一方面諗係咪結婚先係好時機買樓，同 覺得未結婚情況下就供樓

會唔會影響我future 有surplus cash 買樓……另一方面其實自己都想improve 下生活質素同屋企住好D, 供樓咪當儲錢，好彩既話升左值咪到時拎果筆同另一半合份買多樓， 咁昇悅比daddy mommy 住到老。

真心想聽下成哥既見解。

龔成老師：

你長遠的價值來說，四小龍會比屯門較有質素，長遠對你的財富會較正面。

因此，你地考慮四小龍，從財富分配上，會較好。

當然，你都要考慮你地的負擔等能力，以及你本身的需要。方案2的彈性會較高，所以都要睇翻你自己的需要，以及一些財富分配的方法，你自己覺得點樣分配最適合自己。

------------------------------------------------

Q18510：

龔老師你好，我睇完你嘅書優質潛力股已及穩健收息股二本書，但仍然唔知點決定好，我是一個單親媽媽，42歲

仔仔只有8歲，前夫不負責任沒有贍養費，而我因身體差暫時都唔可以做嘢，因有資產約200萬，所以唔可抽公屋，只能每月捱貴租

我有120萬是做咗銀行定期，約50萬想做一啲定期穩陣嘅收息股，我有386（4.25入有10000股）另778（8.75入5000股）2800 （25.36入 500股）

想請教下，以我狀況又是新手，只係想多賺點生活費，我應該買咩股會合適

另1830及1448合我買嗎？如二選一我應選邊隻會合適，另外778我應唔應該加注，另以我情況邊隻收息股會合我⋯⋯感謝龔老師指教...

龔成老師：

由於你有家庭負擔，加上無收入，所以投資要好穩陣，唔好承受大多風險。你$120萬作定期是正確的，我建議這部分唔好變。

至於餘下的資金你應該建立一個穩健組合。你投資$40萬好了，餘下資金就等機會。

現時持有的都可以持有。如果要加注，建議你加香港電訊（6823）、港燈（2638）、陽光（0435），盈富（2800）都可。

------------------------------------------------

Q18511：

龔sir，認識你原來不夠2個月，暫時已睇完《百萬富翁1-3》，《財務自由行》，你既所有youtube片及每日睇你既FB。估唔到短短時間對我既沖擊咁大，思維上影響唔少，當然我真係覺得好有道理。

我而家現狀條件非常一般，有不確定性，但由睇第一本《80後百萬富翁》，到完成剛剛所講既4本書，我竟然夠膽將我既目標放大。

由原先只希望4-5年累積到一個數目財富，到而家目標5年有自己物業，再加7年有第二個物業 (到時50歲了)。

呢啲都係從前認為不可能既事，因為樓價太貴，到而家我覺得原來「這麽遠，那麼近」，全靠你既書有清楚既參考方向。

你其中一個網友講得好啱，的確你每一本書既含金量好高，你既FB亦是，呢2個月我學咗好多野。

由於我本身條件真係好一般，我已為自己定下計劃，去逐步走向目標，包括：

- 增加投資知識 (下個月上你堂了，對呢方面興趣大增，希望學識自己釣大魚，而唔係只靠阿sir捉魚俾我地食，哈哈~)。

- 同時盡力減低開支 (我要先辛苦，後享受) 。

- 及增加額外收入 (要有突破，本身有做網上小生意作為小小副業，主力外國市場，會再發掘下更多網上機會，我相信網上潛力好大)。

希望將來有好消息同阿sir你分享！內心非常感恩認識到你！(早2年睇掌佬話我黎緊10年運會不錯，而家諗，可能因為認識到你~ 但我知阿sir唔信呢啲野，因為你相信自己~)

感謝！！！

龔成老師：

你的方向正確，你只要保持進行就得，知識、財富都要不斷累積！

你一步步行，這刻，首先完成左5年目標先，之後先想其他再之後的目標。

你最重要是保持動力，香港人最弱的就是這部分，第一下好有火，之後就無左，所以，你都要想方法去保持動力。

加油！下個月股票班見！

------------------------------------------------

Q18512：

老師，我月供緊7千，供左2年：

0066港鐵 HKD2000
0823領展HKD2000
2800盈富 HKD3000

最近股市下跌，想大手入買入
請問該什麼價位購入？

龔成老師：

首先，上述的月供，可以保持，你長期進行就得。

如果你現金多，可以等跌多少少大手。港鐵（0066）$33可大手。領展（0823）$55，盈富（2800）$23大手。你預這些價開始平。

當然，如果到時跌到這些位，都要分析翻大市的發生甚麼事，決定入市的力度與留現金多少。

------------------------------------------------

Q18513：

老師，想搵你做少少人生規劃建議..

本人33歲，做part-time ,平均月入$10000草唔到錢...17歲有理財觀念

「股票」
#386 @5.04/28000
#3690 平均買入價@145/200
#823 @75/400
#981 @30/600
#1928 @30

「物業」
市價$430萬樓，現收租回報7里，剩餘還款額80萬左右，另有同家人夾份唐樓湯樓 （我夾$30萬現我果份升值到$90萬，回報10里）

預期1年多另一層供斷既樓可套現$200萬

手頭現金剩餘$60萬左右

請問如何利用資金同搵錢能力係7-10年間滾至$5000萬？生意？工作？

有什麼可有效又成功率高去達成 ，如果賣樓套現又怕日後要再比稅，唔賣又未必有太大資金攪生意，非常感謝老師

老師既人生大目標是什麼可否分享下？除了投資同股票會令資產幾倍升值還有其他方法嗎？

龔成老師：

你33歲，其實擁有的資產不差，不過收入方面較弱，我相信這年齡仍可以做到好多野，你可以想方法提高收入，令你可投資金額增加，相信之後的財富累積會更加理想。

如果你的目標是$5000萬，最好就是做生意，你如果打工做兼職，根本無用，你一定要利用生意，又或投資，又或其他創富方法。

用盡你的時間，去建立一盤生意，我相信你與你家人都有這方面的頭腦的，你可以盡力花時間在這方面。

你初期唔需要投資太多資金，只需要投入時間，到見到生意有增長，是一盤可發展的生意，到時先投資較多資金。

另外，你現時的持股，基本上無問題，都是有質素的，你可以長線。而之後的選股，應該加強潛力股部分，當然，你都要同時提高你的投資實力。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18514：

請問中國銀行$3.25 入了三萬股，現可再入溝淡嗎？
煤氣$14.85 入了萬二股，現又可溝淡嗎？

293 國泰又值唔值得買，咩價買呢
謝謝

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

至於中行（3988）是否加注，不是「你想拉低平均買入價」，而是你想這股佔你組合比例多少。這是收息股，質素不差，但增長力不強，現價合理。

至於煤氣（0003），道理都是一樣，這股有質素，但增長力比過往減少左，不過長遠仍有投資價值。

國泰（0293）的質素只是一般。

其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算佢重組，得到新資金，只是比佢「捱過這一關」，並不是賺錢能力方面有改善。

------------------------------------------------

Q18515：

龔老師， 感謝你的分享，最近follow 你的page讓我對股票略有概念， 亦十分認同你的投資模式!!

我30歲，想進取投資但卻又一竅不通， 多年來只持有939 (平均價6.6).

最近一年持有005 (平均價 44).
睇完你的page, 想跟你的提議買希慎和維達， 現在入合適嗎？

另外 比亞迪都想買, 什麼價位會比較好? 還有沒有其他股票都適合我呢？ 感謝回覆!

另外又想買D 2800 來收息。
唔計已有的939 和005

我打算投資多200K, 請問點分佈好？
Thanks a lot for your kindly help.

龔成老師：

你30歲，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

另外，你持有的銀行股，都只是收息股，因此未必太適合你。

希慎（0014）和維達（3331）會較適合你，希慎現價合理，可以入。維達合理區中上部，分注都得。

至於比亞迪（1211）$7X會較好。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：華夏恆生科技ETF（3088）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金（暫時要留$10萬現金），而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18516：

因為之前就有d誤信左兩個大行既報告目標價,搞到過左賣出價之後個股就跌左唔少,有時都唔明佢個目標價定到咁高做乜。

龔sir 依家美國總統換左人,你會唔會重新估算一下一d中美相關既股票? 畢竟拜登既對華政策好似無特郎普咁強硬,中美相關既股會唔會有機會有更大既上升空間 ?

但我早前入左少少2333長汽,佢有新能源概念但前10個月銷售不太好,洗唔洗換馬去175 好少少? 我都係睇長線,不過175都升左好多,我覺得現價有少少貴。

最近嗰隻831利亞派特別息,我入左一手,因為我都係覺得佢特別息好高,所以想入一兩手。

其實係咪唔應該貪圖佢呢d特別息,但我自己有分析過831,ok店係佢最高收入既一個來源,但佢依家賣左,現金流係好左好多,但係佢無左其中一個賺錢既來源，長遠係咪應該要睇下佢有無其他收購計劃? 我自己係咁諗。

依家都開始睇你出嗰本(年報勝經),從基本面開始學,龔sir你買左股票之後會唔會日日都睇下個市? 定只係一兩日先睇一睇？

龔成老師：

大行報告，最重要是「資訊」，「意見」就不要太著重，當參考下就算。

我自己睇大行報告，要睇佢估值的基礎，這些預測是否可信，就能推算佢計出的目標價是否可信。

至於中美，會有利好的，但要具體先可以知道點樣調整，這刻唔會有具體答案。

我地是重要分析，仍是企業的本質。

長城汽車（2333）都有質素的，你持有都可以。我地分析時，唔好太著重中短期因素，要睇長遠的企業發展。

利亞零售（0831）出售香港「ＯＫ便利店」業務，作價２７﹒９億元現金，交易完成後，擬向股東派發特
別現金股息每股３﹒８５元。利亞零售預期出售收益約２９億元。

利亞零售表示，便利店業務主要以密集運營模式服務香港市場，並且由於其覆蓋之產品種類繁多，因此涉及相對龐大的物流營運設置以及供應鏈基礎設施。

另一方面，剩餘集團的品牌（聖安娜、Ｍｏｎ　ｃｈｅｒ和Ｚｏｆｆ），其實都適合利用互聯網及線上平台，對中等收入客戶群更具吸引力，並且更少依賴物流設置以及供應鏈基礎設施。

但始終賣左資產後，發展只是一般，同埋之後好睇佢資金的運用情況，現價合理區中上部，投資價值只是中等。

要留意，唔好只貪佢特別息，派息後股價會除淨，自然下跌翻，而特別息只有一次，之後唔會有的。

我買股票後，可以一個月唔睇股價，我持有比亞迪（1211）12年，根本好多短期因素，完全唔洗理，你愈集中短期因素，愈難賺大錢。

------------------------------------------------

Q18517：

龔老師你好。想請教有咩股票組合會比較適合我？
我呢家23歲，岩岩出黎做野有穩定入。

現時free cash $400K, 收入約$15K 平均每月儲蓄$7K。
目標28歲前財富增值至$2M。

我最近先開始接觸股票市場，個人認為自己風險取向偏高同心理質素都經得起考驗。

希望老師你可以推薦一些適合我既投資組合同埋未來既選股方向。Thanks!

想補多句 打算每月供＄3000 [2800], $1000 [0027], $1000 [6823], 會適合我嗎？

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你投資經驗不多，所以唔好太進取，同時，你唔好投資太多資金，暫時$10萬先，留多少少現金。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：華夏恆生科技ETF（3088）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

至於你打算月供的3隻股，都有質素的，但香港電訊（6823）只是收息股，因此可考慮其他。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18518：

成哥，想講多謝你，2018上你堂開始月供投資比亞迪，變成我第一隻倍升股，想問過左100蚊會唔會過熱，諗緊放1/3攞尼買領展/長建/金沙

龔成老師：

太好了！

比亞迪（1211）的貨你可持有，賣部分是可以的。可以停一停月供。

資金可以供你上述的3股，無問題。

------------------------------------------------

Q18519：

老師，小弟調整月供組合後,月供$7000下調為$6000

2800 $2000
66 $ 2000
788 $ 2000

剩餘$1000的，等1211/恒指科技ETF回落後先月供

•25歲
•月入20k
•月儲現金5k(已扣除月供股票)
•持有現金$85000
•持有股票$200000

(1) 現金股票比例大約3:7
係咪唔應該加注？現金太少嗎？

（2） 呢兩個月都要睇牙醫，預算$20000內，月供需要減少嗎？

（3）等待恒生科技etf回落後，月供科技etf會否比1211/2388更加好？

（4）等178/1257升返上去，到時再換第二隻股，可以嗎？

（5） 本身持有066，入手270/0002會唔理想嗎？

龔成老師：

1）合理，現時的大市平貴，你預持有3-5成現金適合。

2）唔需要，因為金額不算高。

3）因為月供是一個長期策略，有時唔算太貴，都可以進行，月供科技etf，$1000，已經可以開始。

4）可以。

5）可以，但唔建議太多，因為增長力不算強，你要睇翻自己的投資組合比例與目標。

------------------------------------------------

Q18520：

你好 一直有留意你fb
之前其實都問過你 我有負債問題 點樣可以重新開始？
求下你比啲意見

我做sales，收入唔穩定，
一般$15000-$18000，
月光族，因誤信網上投資騙案，所以有卡數同貸款問題供晒款都無錢剩

卡數只能還minpay,
唔想家人擔心，
有諗過借錢再投資，
定申請破產/債務舒緩

龔成老師：

第一，唔好申請破產。

第二，睇翻卡數而家的實際年利率，如果太高，就要處理左佢。

你可以去銀行，做私人貸款，目的是還卡數，雖然無解決到問題，但就可以幫你減少利息成本。同時，你可以拉長翻個還款期，等自己有空間，無咁大壓力。

你唔好做投資，這刻處理左負債先，理財要一步步，你太急反而仲危險。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q14461-Q14480）

Q14461：

想問一下
窮同有錢的定義？

龔成老師：

其中一個是「為錢為生活工作的程度」。

若一個人，要不斷為錢而工作，同時無任何所剩，過著不太好的生活質素，同時不能夠停下工作，否則手停口停，這可以叫做「窮」。

相反，若一個人，「錢為佢而工作」，持有一些不斷產生現金流的項目，每月得到不錯的收入，而這個收入有不錯的生活質素，這就是有錢。

------------------------------------------------

Q14462：

老師，想請教下一些技術性的問題：

A君持有甲公司股票，然後他申請將該股票轉為實物持有，放在家中。某天他打算把實物股票賣給B君，請問他可以繞過交易所和B君私下直接做交易嗎？謝謝

龔成老師︰

可以，買賣雙方先填妥一份股份轉讓書，列明轉讓人（即賣方）及承讓人（即買方）的身份、股份名稱、買賣數量及牽涉金額。買賣雙方再自行訂立買賣單據，之後到稅務局繳交從價印花稅。

當買賣雙方完成以上程序後，買方就可帶同有稅務局蓋印的股份轉讓書和原有的股票證書，到過戶處辦理股份轉名手續。當過戶處確認賣方身份、簽名、核實各項資料正確後，買方就正式成為新股東和收到新的股票證書。

------------------------------------------------

Q14463：

你好，想問為何港股不能像美股般以一股為單位交易？如能一股一股買賣，港股交易量應該會提昇，對港交所有利？

龔成老師：

雖然美股能以1股作單位買賣，但當你考慮埋交易費用（以每筆交易計），單買1股的成本可能很高，除非你是買好像巴郡這些價值較高的企業。

至於一股一股買賣，港股交易量會否提昇，我會有保留。

因為港股一般股價不高， 如1股騰訊（700）也只是$350，交易成本很可能已佔1股的1/3，所以單買1股對投資者並不吸引。

而且1股買賣雖令令散戶入場費降低，更易入場，中短期有機會令成交增加和推高股價。但長遠計，投資者應著重看企業本身價值，而非這些與企業本質無關的因素。

------------------------------------------------

Q14464：

Hello,我今年25歲月入18K,如果每月可儲3K,供緊1份人壽和危疾保險。現持有2手2388（25.4入）,3手煤氣（2手16.8入,1手14.74入）,2手福壽園（6.51入）。

所有資產現金連股票合共約175000。如果希望5年內儲到100萬,可以用咩方法,月儲3K月供股票夠嗎謝謝。

龔成老師︰

以恆指過去年平均回報10%計（連股息再投資），你每月投資$3000再加上你現有資金和持股，5年後大約會增值至40-50萬。如果要達至你的財務目標，月供金額必需增大至$10000。

現在你要看看你自已的開支，有沒有一些部份可以調整來增加月供金額。如果無，你就要從開著手，轉工（如SALES，一些多勞多得的工作）、找PARTTIME、網上生意等，令你每月可儲資金大幅提升，以助你達成5年後100萬的目標。

投資策略方面，你可用每月儲到的資金，去做月供股票，你可以選擇投資在平穏增長股︰

盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、長建（1038）、粵海（0270）、領展（0823）。

或潛力股︰比亞迪（1211），中生（1177）或福壽園（1448）等。如果你投資實力與經驗不算高，潛力股只能小注。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q14465：

老師，有樣野想問下，如果當1個行業，出現2隻龍頭股，例如中生製藥同石藥，比亞迪同吉利汽車

大家都係行業龍頭既優質股，呢個情況應該2隻股票都投資定係專心投資1隻，想教下你既做法

龔成老師︰

我地買入一隻股票，會睇佢本身質素和前景，去決定是否值得投資。當中因素包括盈利能力、產品獨特性、集團市佔、財務狀況、未來行業發展等等。其實行業中出現2個較強龍頭是會有的，但連以上背景都會一樣，機會就十分微。

就以你所講中生製藥（1177）同石藥（1093）為例，分析5年平均股本回報率，可以令我地了解企業的賺錢能力，你可以見到這兩間企業，都是處高水平，比其他企業、其他行業明顯地高。

而在兩隻中，你會見到中生製藥（1177）會略高，所以賺錢能力較強。雖然從整體上，這兩企業優質度相近，但中生稍稍佔優。

而比亞迪（1211）同吉利汽車（0175）相比，由於比亞迪在電動車發展上明顯佔優，而未來汽車業相信重心會向電動車方向發展，所以比亞迪會在發展潛力上勝過吉利。

只要你多研究，就會發現其實好多好似相近的行業龍頭，其實背景和潛力大不同。

------------------------------------------------

Q14466：

龔成老師，想問明知股市中短期會跌(新SARS)，賣咗佢先再等SARS情況好轉再買入會否更好？因為SARS會令普遍香港公司中短期業務質素變差？

等業務質素恢復才再買入企業？

我本身都個portfolio都有高質素藍籌美股，或者應轉將資金加到美股，因美國並非疫區

同時享受到資產增值？

龔成老師：

我唔建議「賣左先」這個策略。

好多散戶成日都會想，個市將會跌，現時賣左先，之後再買翻是好策略，但這種預期市況的模式，根本是好難做到，反而優質股長期持有，唔好理中短期市況，集中分析企業長期發展，會更好。

你可以建立一個平衡的組合作配置，中國、美國、其他國家都可以有。雖然這次事件對中國企業會有影響，但好多優質企業的質素仍在，長遠發展無問題。

因此，唔需要太刻意作調整，反而，如果中國企業的股價中短期大跌，就是一個很好的時機。

------------------------------------------------

Q14467：

可吾可以解釋下Alibaba PE, 有人話20幾，也有人話40幾？

PE 對這隻股有甚麼影響

龔成老師︰

簡單來說，市盈率是衡量企業平貴的其中一個指標，能助投資者理解到當前股價處於平或貴，以便作出投資決定。

在估算市盈率時，我們會先以大市及行業的市盈率作基礎，以此基礎再作出上下調節，有優勢的、有增長力、行業較好的，就會給予較好的市盈率，從而將範圍調高。相反，企業較弱的，則調低。

由於我地估算市盈率時，除了企業本身質素外，還要看行業本身平均值。有些行業會較高（如高科技行業），有些會較低（如內銀股）。將這些因素考量後，才會得出一個合理市盈率估值。

由於佢上年度有些特殊收益，令盈利增加左，所以，有投資以真正的盈利計，有投資者用表面公佈的盈利計，就會得到兩個數。

阿里巴巴（9988）雖然有質素和潛力，但真正經營計的市盈率去到4X倍有點高。長線投資的話，回至30倍比較理想，所以，現價只能小注投資，但如果原本有貨，就可以長線。

------------------------------------------------

Q14468：

龔成sir你好，我最近看完你出的股票勝經，了解到長期投資的重要性，謝謝分享！打算下月1月起開始月供盈富基金，長期5年。

但我手上有7300的股票，是2018年11月買的，恆生指數的反向，一直溝貨到現價5.58，有24000股佔我2/3儲蓄。

由於現時中美階段已達第一段簽署，是否應全放了它？ 謝謝指導！

龔成老師︰

首先你要明白，我地係唔會去估個大市走勢，大環境其實好難預測。我地會策略性地行動，睇翻當時市場情況，再去決定資金如何部署。而唔係去做預測，去"估"個市。

過往恆指PE區間多維持在8-22倍，現時恆指PE只有約11倍，未算平，但以是偏低位置。所以我地會先部署一半資金入市，其餘等待時機。

而你所投資的南方恒指（7300），係反向追蹤恆生指數每日表現。如果恆指跌1%，你就會獲利1%（另扣管理費）。但若然恆指向上，你就會虧損。

我對這類產品有保留，恆指在過去數10年反覆向上，所以長遠計持有這股對你一定"弊"多於"利"。

建議你長遠就算不全數沽出，也最好沽出大部份，換碼至其他優質股較好。

------------------------------------------------

Q14469：

龔成老師，你好！想了解1728正通汽車前景如何？現時可入貨嗎？

汽車板塊在2020年前景如何？對比175吉利，哪些汽車企業更有投資優勢？謝謝！

龔成老師︰

正通汽車（1728）係汽車經銷商，亦提供汽車相關物流業務、潤滑油貿易業務，以及金融服務。佢銷售之汽車品牌包括寶馬、ＭＩＮＩ及奧迪等豪華品牌，此外，還包括日產、現代、本田及雪佛蘭等中檔市場汽車品牌。

近年生意都有增長，但見盈利增長有減慢情況。股本回報率處較低水平，同埋佢較受經濟週期影響，對貿易相關都會有影響，所以股價會較為波動。

近期中國車市放緩、外來競爭、行業競爭加劇等不利的因素，都對整個汽車行業造成影響，相信中短期仍會對佢不利。此股雖然有質素，但只算中等。投資價值一般，你將資金投放到其他優質股會較好。

中國車市中短期會放緩、外來競爭、行業競爭加劇，都對行業造成不利。但我地分析時，唔需要太著重中短期的數據。

汽車股中我最睇好比亞迪（1211），發展電動車是中國，以至全世界一個大方向。比亞迪在行內技術、品牌和經驗，都看高一線。

長遠來說，這企業正在靜靜起革命，好多大型投資仍在進行中，例如超大型的電池廠等。加上中國政府對行業仍支持，佢長遠會慢慢有野睇，長遠計我最睇好比亞迪發展。

------------------------------------------------

Q14470：

你好！想請教你，我現時月供滙豐、中銀香港、領展及煤氣，各一千元，供了大概一年，見你近排話銀行業增長有限，想知道有需要轉換上述組合嗎？

另外，9月時以$250.8入了兩手港交所，及很早前抽到了一手雷蛇，當時沒有放，現時蝕緊，請問呢兩隻現在應保留還是應該怎樣？謝謝你

龔成老師︰

港交所（0388）有質素，而你買入價有少少貴，但都可以，此股可以長線持有。

雷蛇（1337）雖然可以有潛力，但本質好波動，上市2年仍處於虧損狀態，但公司市值已有$115億，所有的市值，都只是基於「將來預期」去產生，這個預期可以變得好快，因為大家都只是「估」。

同時，電競行業的真正營運模式，賺錢能力如何，充滿了未知數，一個遊戲可以好受歡迎，亦可以好快無人玩。因此，這股有前景，但風險好大，無人知真正的價值。投資這股只能小小注，你IPO抽到一手可持有，但不要加注了。

至於你的2隻銀行股，中銀香港（2388），由於有獨特地位，同時賺錢能力不錯，可保持月供。

而匯豐（0005）這企業的賺錢能力比過往年代已減，作為收息股是可以，唔會有太大增長力。再者你組合4隻中有2隻為銀行股，會有過度集中風險，建議你將匯豐換成其他優質股較好。

------------------------------------------------

Q14471：

老師1918融創怎看？

龔成老師︰

融創中國（1918）近年的生意唔差，這是由於中國樓市唱旺，但這不是無風險的。

首先，中國樓市如果逆轉會有很大打擊，另外，這股的負債超高，無事就無事，有事大件事。

因此，投資這股不是不可，因為不是完全無質素，但你要明白背後的風險，同時明白這一定會令股價較波動，自己最好控制注碼。

------------------------------------------------

Q14472：

老師 我岩開始月供 ，月供9000 應該點分配較好

1）匯豐 3000
2）越秀房地產 3000
3）0992聯想 3000

需要調整嗎？

龔成老師︰

匯豐（0005）這企業的賺錢能力比過往年代已減，但作為一隻收息股是可以的，不要對股價增長有太大的期望。

越秀交通基建（1052），主要的資產項目，都集中在廣東省珠三角地區，特別是廣州市周邊地區。業務有平穩增長能力，長遠仍正面，但就不是高增長類別，只是平穩增長，同時長線收息不錯。

聯想（0992）算是有質素的股票，但過往的品牌定位等較弱，近年開如好翻，相信之後有平穩增長的能力。

如果你目標是以收息為主，這3隻都可以，但你唔好預佢地會有高增長力，未來只會很平穏發展。

------------------------------------------------

Q14473：

老師，我睇2282美高梅財務報表，2018年比2017年營業額上升，但點解盈利會下跌？盈利由17年23億跌到得10億？

3號港煤上半年業績盈利按年下跌18%，請問你有什麼睇法，還適合長期持有嗎？

龔成老師︰

美高梅（2282）集團於2018年2月，旗下新建物業"美獅美高梅"正式開幕。

雖然令收入上升，但整體成本升幅明顯大於新生意的增長，以致純利率被拖低。因此你會見到在收入上升同時，純利反出現倒退。

至於煤氣（0003）近年的增長力有減慢情況，這的確會影響估值。雖然如此，但企業的本質，早已壟斷了全港的煤氣行業，甚至有產品價格自主能力，具典型優質股條件。

雖然近期內地增長力減慢，但長遠質素還在，依然適合長期持有。

------------------------------------------------

Q14474：

老師，你本書入面所講既估值方法，現金流折現法，賬面值估值法，市盈率估值法，我都好想學，你都提到係股票班都要講3個鍾。

但我想問，呢幾種估值方法你會否出書？等我可以報你股票班之前先睇左有關估值書，了解左先，咁上你班就可更易吸收。

龔成老師：

有關於企業估值方面，應該唔會出書講，因為要有較新的業績、大環境，先可以準確分析，而出書會好快過時。加上估值較難表達，書未必能講得明，所以，只會安排在股票班講。

------------------------------------------------

Q14475：

龔先生，打算月供股票$5000。分別為1211 比亞迪、1928 金沙中國 各$1500，1448 福壽園 及270 粵海投資 $1000。請問你認為分配如何？有改善的地方或建議嗎？

另外，發現銀行無法月供 270、1448，請問可如何解決這問題？

祈候示覆，感謝龔Sir。

另外，也希望請教龔Sir，若希望未來也月供3918 金界控股，但見銀行也沒有這選擇，請問可在那裏月供270、1448 及3918？

這問題有點奇怪，低智，莫見怪。
祈候示覆，感謝龔Sir。

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你以上月供的4隻股票都是潛力股和平穏增長股，都是有質素，適合需要增值的年青和中年人士。至於那一間有得月供福壽園（1448）、粵海投資（270）和金界控股（3918），我無特別研究，可能要你自已向銀行查詢。

如果無的話，你可以儲錢到足夠1手才直接買入，都是一個可行方法。

但你要留意一點，金界控股（3918）雖有質素的，佢是柬埔寨最大的酒店、博彩及娛樂運營商，而且壟斷了金邊的業務。

但金界所發展的是較新興的市場，若然比較澳門的賭業股，金界的增長及潛力較大，但當中的風險同樣略高，因為業務難免存有不確定性，這點你要明白。

加上你本身已月供金沙（1928），再供金界會有過集中博彩業風險，所以此股就算供，也不宜佔太多比重。

------------------------------------------------

Q14476：

你好，要找到穩陣又增長的股票好似不多！連港燈都話派息会減少……你諗幾年後市場上仍保持有5%回報per year 的股票多唔多？

龔成老師︰

港燈（2638）減派息，只是中短期，這是由於新的利潤管制協議。現時佢已經開始了資本投資計劃，之後的股息，過2年會慢慢上翻。

其實市場尚有不少平穏增長股，平均年回報達10%，甚至更高。當然我係講長線持有的平均數，一般以持有5至10年計。

例如盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（823）、港交所（388）

至於收息類，都有不少優質可以選擇，現價計有5-6%的股票。

例如港燈（2638）、香港電訊（6823）、工行（1398）、匯豐（0005）、置富（0778）、陽光（0435）

但大前題是要長線持有，因為再優質的企業中短期都會有波動，你要明白這個重點。

------------------------------------------------

Q14477：

老師你好，如果現時我月供（2800，12，66各2千），另外係合理區分別儲2388和12（買入一手），這個操作可以嗎？

定係要將12一手買入轉為其他比較好，令資金唔會太集中一隻股票？如果一手買入你會推介邊隻？

龔成老師：

上述的4隻股票，你都可以進行月供，這都是有質素的股票，你長期進行月供就得。

要睇你本身股票與現金數目，如你本身無股，而現金不多，你買入一手恆基（0012），會有少少集中，所以我寧願你買幾手盈富（2800）會較好，始終盈富是組合，風險會比較平衡，除非你買入一手恆基後，只佔你股票組合比例不多，就可進行。

又或者，你唔好以一手手模式買，而是加大月供金額，這樣會較為平衡。

------------------------------------------------

Q14478：

老師 我係廣州有兩間屋 估值大約600萬左右 係我爸爸留低既 我想問下點樣增值係最好既選擇

1.按左兩層樓 然後再投資大灣區

2.按左兩層樓既錢去投資

我而家21歲 就黎讀完大專 不過未搵到工 未有穩定收入

龔成老師：

首先，你21歲，這個年齡，是財富增值的黃金時期，要好好把握，盡你一切的力量去儲蓄、投資、學投資知識。

雖然你的投資，應該以增值為主，但同時，增長力較強的資產，要求你有一定的投資知識，因此這刻不用急著投資較進取資的資產，你可以集中在平穩增值類別先。

由於你的財富組合，已有一定的物業，因此在配置上，宜投資股票類。平穩增長類股票先。

不過，利用加按投資，有利有弊，因為這會同時放大回報與風險，因此，當中有兩個好關鍵的因素，去決定加按與否。

第一，你的投資知識與實力，如果你未有足夠的實力，暫時唔好加按投資住，先自行儲現金，穩健投資。

第二，有無明顯的投資機會。加按就是利用借貸，因此不建議為借而借，而是有明顯機會才動用借這一步。

------------------------------------------------

Q14479：

龔成你好，我好奇想問一下，為什麼長和系到處收購人地的公司/企業，但人地又會願意賣比佢？

相信生意持有人都清楚自己的生意盈利及前景，即使長和系叫價吸引，但都無奶油寧願賺取一次性收入而拱手相讓一盤長期的生意嗎？

龔成老師：

長和系，特別是長建（1038），正正是利用大量收購去莊大自己。

佢地會研究好多好多投資項目，就適合的項目開價，當然，開出的價，在當刻計算，其實是合理的，所以賣方先至會賣。

但在長遠計，該項目的價值慢慢顯現，這就是佢地的成功之道。有時，當刻的經營環境不太好，果邊都有少少想賣，而長建比一個合理價，這就會成事。

------------------------------------------------

Q14480：

請問老師點睇碧桂園(2007)?

龔成老師：

碧桂園（2007）不能說無質素，但可以話存有風險。

佢本身都有一定的業務價值，無論品牌、物業質素、銷售網絡、規模等，在近年內地樓市唱旺的情況下，佢的盈利理想，但如果樓市逆轉，對佢會有影響。

而較大的問題，就是佢的負債，負債比率高得可怕，好景是當然可以好賺錢，但市道逆轉，又或遇到某些危機時，就會有不利情況。

因此，這股不是不能投資，只是背後存在風險，投資時要控制注碼。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。