以香港人身份講兩句《軍艦島》
（含輕劇透，電影於810正式上畫）
—
1.劈頭一句好睇，要做到今年我睇過最滿意嘅戰爭片唔難（其實睇過D乜？《明月幾時有》同《DUNKRIK》？仲有無？）
—
2.雖然前半套戲比我感覺頗公式化，又係典型日本軍人勞役朝鮮人嘅描寫，鋪咗好多唔知頭唔知路嘅線，加上唔係太認得邊個打邊個，而堆主角要被迫入軍艦島嘅描述都幾牽強，但電影後半真係大顯神威，將故事深度提昇咗幾個層次。
—
3.有咩層次可言？就係將戰爭嘅層次拓闊咗，唔一定係槍林彈雨，唔一定係下下炸彈轟埋嚟，人群之間嘅政治交戰仲恐怖。尹先生呢個角色係神來之筆，亦令我諗起香港嘅政治現況，究竟邊個政黨／政治人物係香港嘅「尹先生」呢，表面上係精神領袖，領導朝鮮奴隸爭取應得權益，實質就係「小講大幫忙」，台底下便就係利益交換，原來係間諜。世間險詐，尹先生同宋仲基果幕對質戲算係我睇呢套作品最深刻嘅地方。
—
4.仲有個共鳴位係成班豬仔比人呃咗去軍艦島嘅SETTING，入島要經過「再社會化」嘅過程，例如驗身，剪頭髮，換曬制服咁，講就講到會出好多人工，實際就係巧立名目，仲為咗「你的未來著想」，幫你買曬國債（喺戰爭中仲邊有未來？），結果辛辛苦苦，D錢比錢交通同伙食，出現咗好多句「從薪金扣除」嘅對白，但就連瞓覺嘅地方都無。生於香港，唔知大家有無同感呢？
—
5.性別定型，女就做家務同慰安婦，男嘅就採礦，軍艦島從來無比機會每個有獨立志趣嘅員工發展（除咗唱歌嘅主角們，佢地係主角嘛），出路單一，你係邊類人都係同一個榨汁機度攪成一模一樣嘅肉醬，香港近七成嘅大學生都話畢業之後做公務員架！
—
6.唔知點解，雖然角色演員題材都唔同，但套戲比我嘅感覺都係好《屍殺列車》，只係元素由喪屍變咗做打仗，又係有個老豆帶住個女，又係一幅亂像之下嘅眾生浮世繪，個結局亦都係父親覺悟獻身然後GG，令我時時刻刻都諗住孔劉大神。
—
7.究竟有乜可以改變到一個人呢？可能就係你喺世間中搵到一個你會拚命守護嘅人嘅時候。究竟人與人、國與國之間點解會相爭呢？喺戰爭入面，其實人人都係輸家，爭在你輸多D，定係輸少D，而再宏觀D去睇，虐人者好，被虐者好，其實都係輸咁多。因為好多人從來都無諗過去贏，例如被勞役者會真係埋首工作，因為驚死同比人打；又或者做埋韓奸，加入虐人行列。
—
8.但個事實係，做細齒輪，或者透過出賣同胞做粒大少少嘅齒輪，又有乜意思呢？到你滑咗啞無用嘅時候，唔理你係黑幫大佬崔龍星，定係賣國求榮嘅韓奸，都只係會落得被輾碎，或者套戲比人趕走活埋嘅下場。所以，不如一齊從機器之中退場，忠於自己，試下夾手夾腳搞LUM部機好過。無錯，你都有機會被輾碎，但亦有機會無事，而如果唔企出嚟，就一定會出事！
—
9.世界無咁烏托邦，總有人臨死前都唔知自己錯咗D乜，其實每分每秒都有改正嘅機會，但亦可能下秒已經會比炸彈炸死咗，係悲哀，只能夠講句：「卿本佳人，奈何作賊」。
—
10.而人究竟係咪天生係好勇鬥狠嘅呢？所長死咗，宋鍾久死埋，日軍棄甲曳兵，其實喺戰爭中，大家都係受壓迫，大家都只係想有安樂茶飯，千祈唔好咁容易比人煽動，唔好好似坤哥咁做隻棋。
—
11.戰爭雖然會令好多人顯露出人性，但同時亦能推動真嘅感情，去到緊急關頭，D嘢係真係假，邊個都呃唔到。一樣嘅十字步，一樣嘅雞蛋，都變得好有意義，因為我地學識咗咩叫珍惜。
—
12.舉起蠟燭齊心抗敵果幕戲，我諗起《饑餓遊戲》入面MOCKING JAY三隻手指嘅決志動作。
—
13.戲入面兩邊都殺人，連細路女都殺人，喺戰場上好難再企喺道德嘅高地，但你諗嘅係你係咪為住「正義」而戰，「正義」可大可小，但千祈唔好為咗苟且偷生而連自己都呃埋。
—
14.宋仲基粉絲可能會失望，戲份唔夠多，最搶眼反而係飾演爸爸嘅「康旭」同佢個女。
—
15.現代戰爭玩「扮死」原來係唔WORK嘅，一個炸彈飛埋嚟，你就渣都無。
—
感謝 Movie Express電影速遞贈票
—
Edko Films Ltd. 安樂影片
Song Joong-Ki 宋仲基송중기
Sjkhkfc 宋仲基香港後援會 Song Joong Ki Hong Kong Fans Club
宋仲基台灣後援會SJKTW
蘇志燮sojisub台灣粉絲後援會
Sojisubar 蘇志燮貼吧