當孟婆被機械人取代（下） . 果然，無幾耐，機械人集體反叛！ . 佢地又無搞大屠殺，只係進行政變，取代閻王政府，頒佈新法令，強調機械人嘅勞工福利，仲規定每間公司最少要請幾多機械人。 . 有啲公司，連老闆個位都俾機械人搶埋，我地已經變咗二等公民。 . ， 我就用自己嘅積蓄，開咗間「孟婆湯專門店」，當然唔係賣失憶湯，推出各種唔同口味嘅湯。 . 小本生意，自己經營，終於唔使驚俾人炒。 . 因為孟婆嘅名聲，生意亦相當唔錯。 . 但係呢排，我發現有班人，日日黎我鋪頭飲湯，風雨不改，而佢地飲湯嘅神情......如臨大敵咁，一啲都唔享受。 . ， 我忍唔住探下佢地口風，呢間鋪頭係我心血，千祈唔好搞破壞。 . 領頭果個人雙眼發光咁望住我：「孟婆，你研發好對付機械人嘅湯未？」 . 對付機械人嘅湯？我做咩要對付機械人？ . 「我地都知，當日你嘅職位俾機械人搶咗，之後你轉去涼茶鋪工作，都經常同街坊討論機械人動向，睇得出你憂國憂民。」 . 領頭人愈講愈熱血：「機械人叛變後，你開咗呢間小店，經常推出新產品，仲唔係研發緊對付機械人嘅湯？我地『抗機械人聯盟』留意咗你好耐，誠意邀請你加入。」 . ， 我呆咗，雖然我好討厭機械人，亦都成日同人吹水，但我從來無諗過要出手對抗機械人喎。 . 呢啲野，失敗會死架喎，我一個阿婆，都係唔好搞我啦。 . 如果果個咩「抗機械人聯盟」成功消滅所有機械人，咁失憶使者果個職位，咪又係畀番我做。 . 既然我坐喺度等，有著數就有我份，我點解要去搏？ . 於是，我詐傻扮懵，敷衍果班「抗機械人聯盟」。 . ， 至於佢地嘅結局係點？點我都無蝕底啦。 . 小說入面，我地總係期待主角走出黎，振臂一呼：「呢個世界咁多問題，我地一齊解決佢！」然後萬民響應。 . 現實係，大家都依然侃侃而談，分析個世界有幾多問題，然後遙遙遠望，輪廓喺月色下有幾分蒼茫，再嘆一口氣：「英雄幾時出現呢？」 . ， 咦，班「抗機械人聯盟」拂袖而去，未賣單喎！ . 哎呀，點解我無提佢地賣單呢？ . 無提佢地賣單，係今日最令我痛心後悔嘅事。 . 講咁多，都係搵食緊要啲。 . －完－ . #短故 #短篇 #小說 #陳美濤 #廣東話 #粵語 #當孟婆被機械人取代 #tomatochan