️ 《𝕃𝕠𝕧𝕖 𝕄𝕦𝕣𝕞𝕦𝕣》𝟛𝕣𝕕 𝕊𝕥𝕠𝕣𝕪: [bfmurmur1615] 可能有啲長🙇‍♂️不過我想一次過抒發晒出黎，然後就可以 我已經25歲, 但係上年先經歷人生第一次初戀。佢同我相差有成7年, 我地因緣際會認識。最後佢話一直都對我有好感, 然後同我表白, 。我本身個人都毒毒地唔太常社交, 所以我當時好開心接受咗，就算我當時唔係特別鐘意佢。 頭幾個月嘅熱戀期大家晚晚都會傾電話，不斷想約大家出街，好想見到對方。但可能我第一次拍拖唔識掌握比咗壓力佢，而且佢本身脾氣的確係比較暴躁，所以中間嗌過一次大交。但係我知道自己有錯，所以我最後成功氹返佢，而且我呢一刻就意識到自己已經愈來愈愛佢，同埋我已經認定佢係命中果個，同會帶佢返屋企見屋企人。 但之後問題就出現，因為佢都開始比較忙，所以就放慢咗。呢段時間我地都盡量講電話同見面，但係佢因為壓力大，所以開始會發脾氣，同埋會請啲情緒綁架嘅嘢 ：「我係咁架喇。唔滿意分手囉」 或者有時做錯少少嘢 「你咁蠢點解我當初會鐘意你」而且佢會開始嫌棄我呢樣果樣唔夠好唔醒目。我知佢可能無心，但其實每句我都好入心。不過我知佢壓力大，所以我聽完唔開心都好，我可能都係對唔住或者唔出聲，但係直頭唔出聲都會「唔想講嘢唔好講囉cut線囉」我本身無經驗，係呢啲情況真係唔知點算好，所以其實我一直都好唔開心，但我好愛佢，唔想呢段關係散，所以我一路都忍住。有幾次我真係忍唔住發脾氣同佢講我唔鐘意佢咁，但都只係換來「咁我錯囉我問題囉」我覺得佢認為自己只係發下脾氣想我氹返佢，唔知其實自己已經係情緒勒索緊我。 係呢個時候開始，我自己都會無意間開始情緒勒索佢，佢好耐唔覆機我會係咁問佢係咪出咗事，有時佢唔開心唔應機我會反過黎講啲「算啦係我無用安慰唔到你」嘅說話逼佢應我，佢都開始不滿同我講過唔鐘意我咁樣比壓力同情緒綁架佢。我好盡量改，但每次佢講果啲嘢嘅時候，我就忍唔住。雖然平時無乜事，但係我feel到段關係已經開始有分別。就算我一直想維持呢段關係，不斷約佢出街同埋傾電話，但我覺得佢已經好似變咗交貨咁。我不斷懷疑自己係咪太唔浪漫唔識拍拖，但我一直都好努力維持段關係。佢想要咩，覺得我有咩缺點我都盡量去滿足同改，希望佢開心。直至最後佢幾日唔覆機然後就話無咗感覺所以分手。 分咗手幾個禮拜到而家我知道佢到而家都覺得我成日綁架好有問題，覺得我一直都對佢唔好識錯咗人。我呢段時間心情一直都好複雜，因為仲掛住佢，所以成日忍唔到手碌佢story, 但係有時見到佢story暗地抱怨又會好嬲想同佢理論，一直輪迴搞到自己精神好差。 但去到呢幾日終於開始放低，諗通咗佢都只係一個好後生嘅女仔，點解我會期待同要強逼佢可以成熟同願意去陪我一齊去維持一段穩定嘅關係。我都領悟咗情感勒索係每段關係都好難避免，不論係男女都會，但最緊要大家衝動完可以肯冷靜傾返。如果你搵到一個肯同你冷靜慢慢傾嘅伴侶，已經好幸福。 雖然最後係好唔開心，但我真心好感謝佢比咗個機會同經歷我，令我有決心去改變自己同去嚮往拍拖呢樣我之前唔敢去諗嘅嘢。 一直都將呢段說話收咗係心底無同過佢或者朋友講，直到今日開始釋懷咗就想一次過寫低佢搵一個平台可以發洩一下，然後就可以將段回憶收埋佢展望將來。 Thanks for everything and good bye. • ♪ Song of the night: @saxyphil - 《#關於愛的碎念》 ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——— ♡投稿請按 @couple.murmur IG主頁鏈結! #hongkong #couple #lovestory #hkig #香港 #情侶 #香港情侶