《失憶者的日常小反抗》

點解我會响度嘅？

我忽然醒咗之後，發現自己身處一個可怕嘅地方；雜物、報紙同冷氣混和嘅氣味……非常難受。我發覺自己坐响一張寫字枱前，上面有一部開著咗嘅電腦。不過，最另我不安嘅唔只係我唔知自己身處邊度，而係我連自己係邊個要唔記得咗。

我無好似B級電影咁對住空氣問：「我响邊呀？我係邊個呀？」
因為成個office ，除咗我之外，一個人都無。

雖然我唔記得自己係邊個，不過一般嘅知識仍然未忘記。要了解自己，最好上facebook。我打開桌面上嘅browser，好彩facebook 自動login，我立即見到一張大頭相，相中人同我一模一樣。咁亦証明咗眼前部電腦果然係我用開嘅。

上到facebook 之後，我先發現自己叫Gigi Ip。不過，隨咗不停見到share 圖片，大量自拍同食物照片之外，我幾乎搵唔到任何同自己身世有關嘅線索。點解我嘅生活就只有攪笑圖同食物？

或者，我可以問下朋友，點知我一睇……689個朋友之中竟然無一個online ! 果然靠唔住！

8：35……或者係因為時間仲早，所以大家都未返到公司。好！我等。
8：45……仍然一個人都未有。正常！今時今日，仲有邊個會早返工？
9：00……無論係facebook 定公司都未見人。唔通今日放假？
9：05……我由手袋之中搵到一個屬於我嘅銀包同電話。

由銀包內嘅身份証上，知道我中文全名叫葉永嵐。雖然我非常唔想認同身份証上張相嗰個係我，不過除非好似電視劇咁，胡杏兒死咗之後仲有另一個胡杏兒做續集。否則，不認不認還需認。

我除咗額外知道自己遲耶蘇一日生日之外，身份証就同一張碌爆咗嘅信用卡一樣；只係裝飾用。至於年齡……相信係每一個女人嘅秘密。我搵過枱面同銀包之後，都唔發覺有一張印住我名嘅卡片。或者，我係一個低級員工。

我攞起自己個電話，幸好唔係用密碼鎖機。於是，我不斷咁「Hi」whatsapp 中所有朋友。不過，無人覆我。當我正對所有朋友漠視而感到莫名嘅悲哀嘅時候，我發現咗一件好奇怪嘅事；佢地全部上次上線時間，係今日8：30。

突然間，一陣恐慌嘅情緒湧入腦海之中。我曾經聽人講過只要網絡世界出現毀滅性嘅破壞的話，人類嘅生活將會完全崩壞。唔通係咩太陽黑子影嚮地球所有通訊系統。

諗諗下，乾等都唔係辦法。我決定主動出擊---落街問人咩事。

踏出辦公室一刻，我最關心嘅係升降機有無正常運作，而事實証明我都未運滯得晒。不過，當我落到街之後，我立即收返頭先個諗法。

成條街竟然一個人都無！唔止行人路上無人，馬路上嘅車係空嘅，就連店舖內都無一個員工。嗰間「梗有一間响左近」嘅便利店，門係開著，但入面連人影都無。

我攞住一支檸檬茶，大叫一聲：「唔該！」期望有職員由後倉行出嚟。
但係反應令我好失望，因為根本無任何反應。

我下意識咁攞住個銀包想拍八達通，不過無職員响收銀機前面，即使有心比錢都無人收。

人生第一次犯法竟然為咗一支檸檬茶。

我行返出彌敦道，呢度真係尖沙咀！由細到大，小學跟父母出嚟；中學同朋友一齊過聖誕；返工由地鐵站迫上地面；即使我連自己係邊個都唔記得，但係尖沙咀多人嘅感覺就好似冬天會凍一樣咁理所當然。

感覺上，今日係我第一次漫步於彌敦道。

由The One 開始，一直向旺角方向行。雖然我好希望可以碰到一個人問下發生咩事，但係我又非常享受一個人嘅寧靜。

平常嘅我究竟係一個咩人呢？我望住玻璃櫥窗反映出嘅自己。一身整齊嘅黑色套裝。望住自己呢身裝扮，我有一種嘔心嘅束縛感。

「Gigi，返工唔係做fashion show。公司無dressing code，唔代表妳可以著到成個妹咁。」
「全港最top 嘅designer亦係最top 嘅sales! 小姐，妳著成咁，點帶妳去見客呀？」
「咩日系衣著！唔係上露，就係下露。咁唔係叫靚！唔比著！」
「嵐嵐，妳咪順下人地意囉！個個男人都係咁㗎啦！睇其他女人就永遠嫌布多，自己女友就最好包到好似中東女人咁。」

一連串莫名其妙嘅聲音轟炸我嘅大腦，令我非常頭痛。就响我想大叫一刻，我聽到另一把聲；一把屬於自己嘅聲音：「我知咩叫靚，我有我style!」

世界再一次寧靜落嚟，而我就從未如此放鬆過。

我走入一個無人嘅商場，向一間間店舖伸出魔手。無視價錢嘅高低，亦唔理當季嘅潮流，我隨心換上一件又一件嘅衣服，試著一對又一對嘅鞋。

返工，要正式；出街，要保守；女人，點解要咁顧慮；男人，點解會咁多要求？

最後，我換上一件黑色嘅貼身one-piece。領口係一般圓領，夠保守嗎？不過，下身係短裙款；
上身係英倫風正裝風格，有齊煲呔、恤衫、吊腰帶，夠端莊嗎？不過，全都只係「印」上去嘅圖案；
鞋亦統一為英式皮鞋，夠正式嗎？不過，係粉紅色，再加上一對條間襪。

整個人煥然一新之後，我重新上路。响馬路邊，有一樣嘢令我雙眼發光---一架Yamaha電單車。

我好似有少少印象，我曾經靜靜雞瞞住家人同男朋友考過電單車牌。當成功考牌之後，又好似有唔少阻力令我完全放棄坐上電單車之上。

我行近，見到一條令人心情興奮嘅車匙。唔理著住短裙有無走光嘅危險，我跨上座位後搵到電源，開著引擎。之後，就一直沿住彌敦道飛馳。尖沙咀、佐敦、油麻地、旺角、太子……每一個地方都好似有印象，但又好似只係因為相似嘅店鋪所產生嘅幻覺。一整條彌敦道既熟悉又陌生。

無戴頭盔、切線、衝燈……唔知觸犯咗幾多條交通法例。我一啲都無放上心，警察都唔會低調通緝我，呢一刻我相信世界只剩低我一個。

終於，我忍唔住逆風大叫一聲：「I am free now!」

就响我去到深水埗一刻，我停低引擎。有一道強大嘅引力要我走上其中一橦樓嘅天台。上到去，我放眼望向整個只有石屎嘅九龍，好奇怪人點解會選擇用一堆磚頭去困住自己。

我危坐於圍邊之上，開始感覺到肚餓。突然，我覺得應該有一個感覺親密嘅人，會拎住一袋食物上嚟搵我。

我記起一句說話：「總之，我而家好肚餓。唔係！係根本唔可以再用肚餓去形容。感覺就好似要吞咗整個宇宙一樣咁空洞。」（註）

到底係邊個講呢一句說話呢？係講緊我肚餓，還是呢個空虛嘅城市呢？

註：
1) 原句出自村上春樹先生的《襲擊麵包店》
2) 原文章收錄於《AM830 最後的四十人》
3) 相片已獲Model 授權使用