【龔成問答信箱】（Q21401-Q21420）

Q21401：

龔SIR你好!首先要感謝老師教懂我如何選擇一隻好的企業。

自從成為你學生後，我的成績確實有增長，雖然仍未到目標，但確實前進中。多謝老師既教導。

但近期估值課題上有一個疑問，就是「預測市盈率與自行計算市盈率之間的決擇?」

以創科實業為例。根據過往十年數據，利用堂上所學。
合理市盈率應是21.88-23.12,
平均最新5年EPS是2.41。

因為我發現它每年EPS都有增長，自己計算大約是11.5%至29.8%不等(平均數是17.7%)

所以，我打算利用2.41X1.177= 2.84 作為有代表EPS
所以，合理估值應是2.84X21.88- 2.84X23.12再+/-10%，即是55.9-72。

根據自己計算範圍55.9-72 明顯與現時大市有一大距離。此時，再發現中銀既預測市盈率是36。如果用 預測市盈率計算2.84X36=102.24，那麼合理區 再+/-10%，即是92-112.46。則比較接近大市。

因此，我想請教老師2個問題
1.遇到這個情況，應該如何決擇?還是我的計算出左問題?
2.預測市盈率是市場給予的，是否較自己計算的市盈率更重要呢?

知道老師忙碌，問題唔急的，感謝老師的指導。

龔成老師：

你在計算估值時，不能公式化，要「意義化」，你先要了解創科（0669），佢過往的業務情況，品牌、發展，為甚麼過往的營業額有這樣的增長，點解盈利會這樣，是市場不斷擴展，產品的類別增加，定加價，還是其他原因。

你要睇翻5年年報，有具體了解後才有答案。

然後，你要分析這企業之後面對的經營環境，如果市場環境對佢有利，這樣增長就可持續，而你推算EPS時，不能只用平均數，這是一個入門的方法，你要更正確推算，之後的盈利怎樣。

如果你用我第五堂教你參考機構評級的方法，你會見到大行預期盈利接下來幾年平均為0.6美元，即是港幣$4、$5，你就要小心分析，你用2.84 作為有代表EPS，是否保守左，大行點解估到$4，背後咩原因。

你要了解企業之後的情況，從而找出答案。

另外，你在衡量佢市盈率時，如果企業無一些核心的改變，你照用過往的較好，然後再加少少自行的調整。

------------------------------------------------

Q21402：

阿Sir，我自己計咗幾隻股合理價，可唔可以麻煩你幫我睇吓我嘅計法啱唔啱：

新地（16）
行業市盈率 ：6.26-10.5
過往五年平均每股盈利 : 14.8
新地市盈率 : 7-11
合理價: 103.6-162.8 (好似個range 好闊🤔）

雅生活（3319)
行業市盈率 ：27.5-41
過往五年平均每股盈利 : 1.042

雅生活只搵到近三年市盈率，有一些股票如352，1895甚至找不到市盈率資

領展 （823)
行業市盈率 ：5.5-13.18

過往五年平均每股盈利 : 11.63
新地市盈率 : 6-10
合理價: 69.78-116.3 (好似個range 好闊🤔）

龔成老師：

新鴻基地產（0016），要留意，佢這類地產企業，每年的盈利都有物業重估，因此盈利及過往市盈率數據，都要調整翻，所以，計算過程有點複雜的。

你預新地現價合理區中間。

雅生活（3319），當你進行行業比較時，盡量找一些營運模式、規模等接近的，同時，會參考佢自己過往的市盈率。而這股不會比到太高市盈率的，去到30已是太高，20倍會較有代表性，再以這為基礎這行調整。

至於盈利方向，由於佢盈利增長中，因此盈利數字不應只用平均數，要調整。所以，你預現價為合理區中上部。

至於領展（0823），由於每年的盈利都有物業重估，以及先年的市盈率都會因為物業重估因素令盈利變左，所以市盈率的參考價值都減左，因此，你要調整翻先能夠分析得到。你預現價合理區中間至中上。

------------------------------------------------

Q21403：

龔老師 你好 最近見你也對樓市有研究 ，真心想請教 唔想再走冤枉路

現時有一層 216 呎 長沙灣樓
樓齡 1年 （但已過3年 樓花期買）
出租（死約） 10500
按揭連管理費 16000每月
買入時 499 萬 想放570 萬

想要連租約放售 如理想價 570 還完按揭 有170 萬左右

想跟你 學習 股價 覺得已前投資 cash flow 唔靚 供得好辛苦

有家庭 BB 出世 支出更大 同太太 （她都有follow 你Facebook)商量後 現時 層樓 每月都是支出多 不如賣左層樓 所得錢 跟你腳踏實地 投資股票 3-5 再買過一層

不知龔老師可否比意見 ？
謝謝你 祝生活愉快 身體健康

龔成老師：

從宏觀的財富角度分析，你這個動作，就是賣出現有的收租樓，將資金轉成股票，利用股票增值，再在3-5年買買入另一收租樓。

這個動作的考慮點，就是利用股票的增長，高過利用現有物業的增長。

在理論上，這類面積較細的樓，投資價值的確不算強，因為以一個基本家庭來說，去到250呎以上會較合理，因此，長遠增長力不及一般物業。

加上現時股市的平貴度較樓市平，所以在理論上，資金投入股市增長，會好過原有物業。

不過，所有事情都無絕對的，無人能準確預測到樓市，如果樓市在這幾年的升幅比股市多，你的計劃就會出問題，這是風險所在。

另外，香港買賣物業的成本貴，你一賣，日後再買，這是有成本，你都要考慮這因素。

因此，從方向上，這計劃是可以（因為投資不同資產的值博率與回報等概念），但實際上，你會面對上述所講的風險，你自己衡量是否承受。因為始終投資股票，都會有價格波動風險，穩健度比樓市差。

------------------------------------------------

Q21404：

老師想問下，我現在快20歲，有19000元現金，1000股煤氣，500股盈富、500股嘉里同400股小米。

煤氣 大概10元多買入，盈富大概25元入,小米22.8入，嘉里24.48入

龔成老師：

上述的股票，都有質素，無問題可以長線持有。

現金19000，由於不算多，所以持有就得。

小米（1810）我都有貨，雖然股價波動，但正面的，只要你不是持貨過量就得。

盈富（2800）可長線。

嘉里物流（0636）這股不差的，順豐入股後長遠發展更正面。

佢本身由嘉里建設（0683）分拆上市，係亞洲的物流服務供應商，主要從事綜合物流及國際貨運業務，亞洲、澳洲、歐洲及南北美洲的35個國家及地區設有逾400個業務點。

業務以第三方物流服務供應商身份為世界各地的製造商、零售商及其他客戶提供綜合物流服務，包括主要在亞洲提供廣泛的物流服務，如倉儲及增值服務、陸運及配送、退貨管理及各種配套服務。

另外，亦有從事國際貨運：提供的國際貨運服務絕大部份位於亞洲區內以及亞歐大陸之間，涉及空運、海運及跨境陸運服務。

現時的經濟及疫情，對佢都有一定的影響，而市場對佢的估值都會因而減少。

其實現價處合理區頂，以長線投資的角度，有值博率的，可分注。

至於0003，有質素，但你19歲，未必最適合你。

其實煤氣（0003）仍是有質素的股票，但增長力弱左，而佢改為20送1，反映增長力可能減少左，但不算差。

香港業務不強，但中國部分不差，中短期雖然較一般，但見佢的長遠發展力仍在，但就要耐心點。

由於佢一向都穩定派「相同股息」，在這情況下，反映派息的增長會少左。但整體來說，這企業仍是有質素的。

我睇翻佢近年在中國的投資，仍是保持進行的，每年都有幾十億，這些投資不會好快就見到收成，但這企業就仍是發展中的。我對佢長遠發展仍是正面，只是增長力的問題。

------------------------------------------------

Q21405：

老師想問下你 我睇你本股票勝經

用入面既方法計出3838 PEG 和3838的初步分析財務指標5年數據

得出的PEG 由2016-2020 五年間都是0.0x 低過合理價1很多

是因為每股益利增長很大的原因嗎？而這股每股益利增長咁大的原因是因爲澱粉價格而非純盈利嗎？這些指標對於此股有代表性嗎？還是我計錯數了？
請指教

龔成老師：

要留意，PEG只是一個輔助的估值工具，並不能成為企業估值的核心。同時，PEG只適用於高增長類企業，而這股增長力不強，生意增長不高，以及盈利未見有明顯增長，因此，並不適用。

中國澱粉（3838）主要從事製造及銷售玉米澱粉、賴氨酸、澱粉糖、變性澱粉、玉米製副產品及玉米深加工產品。

近年的生意都有增長，不過盈利就唔算強，同時有少少波動，反映佢都受成本等因素影響，產品價格自主力唔強。

整體企業質素，唔算高，但未算劣質。

現價雖然合理，但投資值博率唔高。

------------------------------------------------

Q21406：

你好 , 老師, 想請教你一些投資意見？

1. 如想用$10000投資月供股票計劃, 現階段應如何分配？ 當中想要有潛力股，但1211 已好高價位, 應買嗎？

還是有其他股比較適合？ 應該集中買兩三隻 ，還是分散買好？

2. 目標滾存100萬, 應以5年為期？ 如果想3年為期,每同投資幾多及如何分配比較適合？
thanks

龔成老師︰

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和取態，去做決定。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

至於你所講比亞迪(1211)都係有質素，勉強小小注月供好了。

而我地創建一個財富組合，除了要有質素股票外，平衡性都係好重要。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

但盈富(2800)就不受此限，因為它是一個包含55間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

所以，如果你組合有盈富(2800)，再只加1,2隻都無問題(只要這1,2隻，不超過以上比重限制)。但若無，你最好係加多幾隻，令組合更平衡。

2) 不同年期，組合都唔會有太大不同。但若年期較長，部份高風險的股票，可能你就要慢慢減個比重，換成較穏定的優質股。

我假設投資回報有10%（連股息再投資），你要每月投資$14000，5年後才會較大機會增值至100萬。

如果年期縮短為3年，就要最少每月$25000。但由於3年唔算長時間，會有機會出現波動，令你最終回報的不確定性增加，你要知這個風險。

------------------------------------------------

Q21407：

老師：您好！我想問6993前景如何？我16.92買，而家跌到落11蚊，應該看長線還是止蝕？

另2883同問，我10.7買。
謝謝

龔成老師︰

藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，但你買入價係上市時較熱炒階段，現時回調只是回到較合理水平，不過現價依然唔平，只算是合理區頂。

若你持貨不多，你長線持係有可以。但較貨較多的話，只宜沽出部份，去平衡風險。

中海油田服務（2883）質素中等，未算強。

佢係中國近海市場最具規模的綜合型油田服務供應商。

佢的服務貫穿海上石油及天然氣勘探，開發及生產的各個階段。業務分為物探勘察服務、鑽井服務、油田技術服務及船舶服務。

雖然佢都有一定的規模，但卻不是最高質素的企業，這是由於佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由於質素中等，唔建議大注投資。若持貨不多，可以守。如持貨較多，則應該在反彈時，沽出一部份，去減低風險。

我見你2隻股票都有買貴貨情況，若你對點判斷平貴無乜概念。我建議你再投資時，改用月供，或者分注入貨模式，去平衡這個買貴貨風險。

同時間，努力學習投資，如何選優質股、定平貴等相關知識。對你長線投資發展，會有好正面的幫助。

------------------------------------------------

Q21408：

龔 sir ~ 小女子暫時手上得5萬港幣可買股票, 想高回報 ( 即是高風險啦 ), 是否跟著以下3067、9988、700、388、1810、2382、1177、1448, 便可以 ?

目前目標 ~ 每月儲 一萬港幣, 5年要有 100萬, 用來買私樓的首期。

請指教
暫時有 3067 有1000股 是蟹貨。

亞厘爸爸有700股, 其中200股是蟹貨。
1177 有 2000股, 亦是蟹貨。

是否再加貨 ?
還是買其他 ?
謝謝你

龔成老師︰

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

唔可以單單集中晒係「潛力股」身上，佢雖然有增長潛力，同時風險都較高。

但風險高，不等如回報一定高，這是一個錯誤想法。如果成功，回報當然可觀。但由於佢波動性大，失敗時，損失也會較慘重。

所以，「潛力股」不宜持有過多，要平衡。若你係偏年青，可以佔5成。但若你較年長或投資經驗較少，要下調少少至3成左右。

你現時組合中股票，都有質素。雖然股票上係虧損，但只是中短期問題，你可以守。

由於你阿里巴巴(9988)佔比好高，個別股票不要佔組合15%以上，所以，你暫時唔好再加注。

將來時間，除了潛力股，你都要加大翻平穏增長股部份，令組合更平衡。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

現時大市在合理區，每月先用$5000做月供，餘下$5000和5萬現金，就等大跌市才動用。

以大市過去年平均回報10%計（連股息再投資），你每月投資$10000再加上你現有20萬持股，5年後大約增值至100萬，能達成目標機會頗大。

------------------------------------------------

Q21409：

你好呀 龔老師，我啱啱先開始接觸投資，上年12月頭開左個富途牛牛戶口，然後聽朋友介紹下，我買嘅第一隻股票就係6618京東健康，果輪升得好勁然後就賺左d。

於是我喺高位就直接入多d貨，結果冇耐就一直跌，中間再溝過貨，依家已經蝕緊差唔多40%。

其實呢幾個月都有唔少朋友叫我走，我就係有d唔甘心所以一直擺，不過見到個虧蝕愈來愈多果陣都有啲擔心。

所以想問下老師你意見，我應唔應該del apps繼續擺落去？定係應該依家就止蝕離場？

龔成老師︰

京東健康（6618）係有質素，但問題是你投資知識不足，令到成個策略出左問題。

首先，京東健康雖然有質素，但由於新上市，估值難，不確定性大。本身就不應該持有太多。

另外，我地決定加注與否，要睇幾個因素，記住，並不是以「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

你明顯只是想盲目去「拉低平均價」，但完全無考慮成個組合配置和風險。

由於此股波動性風險大，你再入雖然真係會拉低左個平均價。但變相令佢佔你總資產比例又提升左，即係你同時拉高了自已的風險比重。

以你現時情況，若京東健康佔你組合比重較高，建議你沽出部份，先去平衡翻個風險。

此外，你在再投資前，建議你努力學好正確投資理念、資產配置、股票估計等知識，才開始會較好。

------------------------------------------------

Q21410：

老師，我今年應付完DSE會過嚟報讀你嘅課程學下估值，我係從我老竇推介先開始睇你嘅書（跟住就開始留意你平時facebook 同YouTube）

明白到金錢永遠貶值，銀行嘅體系對我哋有咩影響，同埋長線投資嘅威力。我今年年初開咗證券戶口，想你對我嘅投資組合俾啲意見： 我宜家手頭上有

兩手1810（24.35)
嚟緊小米造車可行性大嗎？
一手9666（63.25）

4月開始供1928（每月1000），每月會儲500現金，因為我阿爸都同我講可以學下你咁樣地獄式慳錢雖然我依家比起你嗰陣真係算儲得少

另外有18000現金係咪應該繼續儲等更好嘅機會？（考完試會再做兼職加大儲錢金額，想問吓到時應唔應該再月供其他？例如港交所？因為佢有壟斷優勢）

另外我想再問吓，舊年如果新經濟股炒得好犀利將好多企業嘅發展前景無限放大，估值過高，但係成日都係講話會回歸企業價值

咁老師你會點樣處理，如果面對估值過高係咪會減持，等佢回歸企業價值再買入？

最後，好多謝老師平時無私嘅分享，比起好多坊間嘅「專家」睇得出你嘅回應係好用心，好明白投資唔可以心急你嘅分享亦令到我踩少咗好多氹

例如唔會心急然後將啲錢去玩啲唔熟悉嘅衍生工具同埋做短炒。

龔成老師：

好，最重要是保持學習！

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價合理區頂位至略貴，小注分注可以，但唔好入得太急，預佢股價仍波動。回多10%更有投資值博率。

佢將會造車的，但成功與否就未知，但我相信佢正面的，不過股價就可能有點波動。

至於金科智慧（9666）有質素。

佢係中國西南第一的綜合智慧物業服務商，如果按佢綜合實力計，集團自2016年至2020年連續五年被中指研究院評為中國物業服務百強企業十強之一，自2015年至2020年，連續六年西南地區排名第一。

收益主要來源於四條業務線：物業管理服務；非業主增值服務；社區增值服務；及智慧科技服務。

包括各類住宅及非住宅物業，包括但不限於中高端住宅、商業樓宇、產業園、政府公建、高校醫院等其他物業。

生意與盈利都增長理想，暫時睇佢都有投資價值，但負債高會係一個扣分地方。此股投資係可以，只要唔好太大注，咁就無問題。相信長遠有發展的。

至於你月供股票，金沙（1928）可以，而你年輕，可以加入一些潛力企業去供，例如小米都得。港交所（0388）都可以。

至於現金$18000，由於金額唔算好多，因此暫時留現金先，等跌市先考慮動用。

至於企業價值，首先，新經濟股估值難，所以在投資會相對控制注碼，若果到貴的時候，有機會減持的。但如果好高質，就唔會賣晒，因為你唔知賣左後，能否買得翻。

在理論上，股價長遠會回歸合理價，但如果一間企業價值增長得好快，股價就算這刻貴，都未必跌。

加油！你年輕，只要能擁有投資知識，長遠財富會不差的。

------------------------------------------------

Q21411：

老師你好！
現在持有

6618京東健康 500股 $180
9633農夫山泉2000股 $55
305 五菱汽車20000股 $2.57
175吉利汽車1000股 $33
6993藍月亮1000股 $16.9

9666金科服務500股 $73.5
2013微盟集團2000股18.62
1833平安好醫生100股 $133
1772贛鋒鋰業200股 $101

我高追左以上股票、大部分坐緊艇。好彩小米$16.5仍然持有。

1.以上的股票會否升返上去？

2.以上的股票有冇要放棄？

3.組合可否俾意見？
多謝老師

龔成老師：

基本上，你持有的組合不是無質素，但我見到你投資的，大多是之前較熱炒或焦點股，又或是新經濟類股，這會令你的組合風險較高，要注意翻。

五菱汽車（0305）、金科服務（9666）、微盟集團（2013）、平安好醫生（1833）、贛鋒鋰業（1772）雖然都有質素，但股價上落略高，同時行業仍有變化，因此，唔建議持有過多，不過你如果計翻佔組合%不過量，其實無問題。

整體上，你持有整個組合，基本上都可以守，質素是有的，相信是你未能掌握平貴，在貴的價位買入。你要計下佔組合比例，如果單一股票佔比不過多，就守住先。

你應該在之後，加入一些較為穩健類的股票，平衡翻個組合。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q21412：

你好龔成老師，我係你的澳門粉絲，一直有Follow你Facebook，期待你黎澳門開班

我38歲，已婚，有一個3歲小朋友，我從事保險行業，收入還不是太穩定，暫不需要供樓。

以家有如下資產：

銀行及儲蓄：
20萬現金放銀行作現金流
40萬收緊3%利息的每月理財產品
50萬派息基金，收緊6.5%利息（本金會有浮動）

月供股票：（今年3月份才開始供）
盈富（2800）：月供2000
金沙（1928）：月供1000
比亞迪（1211）：月供1000
港交所（388）：月供1000
騰訊（00700）：月供1000

股票：
吉利（175）：1000股@28.8
領展（823）：100股@73.5
長江（1038）：500股@41.4
小米（1810）：200股@27.5
泰格醫藥（3347）：300股@165
美團（3690）：300股396
阿里（9988）：200股241.6

想可以做到最大化的財富增值，聽過老師話選擇優質股長線持有的概念，但因為以家手持的好多都係跌，心有擔心。希望龔成老師百忙之中幫我分析一下合理嗎？需要做些什麼調整較適合？會唔會持有太多種類？十分感激

還有一個問題想問
聽人講可以買銀行股來代替銀行定期收息，亦相對其他股票風險較低，你建議嗎？耐心等待老師回答

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

其實你現時持有的，基本上都是有質素的，只是你在貴的價位買入，如果你未有捕捉時機，以及企業估值分析的能力，就建議你用月供或慢慢分注的模式投資，會較適合你的。

現時你現金在保守類產品較多，股票就較少，可以慢慢提高股票比例，以你的年齡，財富仍有增長力，加大比例可以的，只要不要太集中在潛力股類別就得。

現時月供的股票，都可以。只要長期進行就得，比亞迪（1211）現價略貴，勉強可以供，但就不要再加大金額。

至於持股方面，都有質素的，泰格醫藥（3347）佢係中國的綜合生物製藥研發服務提供商，主要經營臨床試驗技術服務，例如提供臨床試驗運作服務，包括藥物及醫療器械臨床研究，業務發展都唔差，同時都有一定的規模。

生意與盈利都有理想增長，賺錢能力唔差，不過上市時間唔長，數據的參考價值會減。

質素都有，長遠發展正面的，不過股價潛在波動較大，加上上市時間唔算長，唔建議投資太多。唔建議你加注。

至於美團（3690）有質素，但股價略為波動，業務有變數，你現時持有比例已差不多，不要加注，原有貨就持有。

至於其他持股，基本上無問題的。

你現時的現金$20萬，暫時可持現金，等機會。

反而每月應加大投資股票，例如加大月供，可同時加入平穩增長股及潛力股去月供。平穩增長股如盈富（2800），潛力股如恆生科指ETF（3067）都得。

至於銀行股同銀行收息，是兩回事，銀行股的股息會較高，但就有風險，你要因應自己的風險承受程度，以及投資目標，去決定。

------------------------------------------------

Q21413：

老師 想問物業股哪一個增長力最強 值得投資？873、6666、6098、3319？

龔成老師：

碧桂園服務（6098）及恒大物業（6666）的增長力，算是較強，當然，風險度會高少少。

先講恒大物業，有質素，有長線投資價值。

佢係物業管理服務運營商，佢係中國物業服務百強企業中，以項目所覆蓋城市數目計，佢排名第二，如果以總收入、總毛利及總淨利潤計，排名第三。

類別為中高端住宅物業、寫字樓及商用物業，並已訂約管理其他物業類型如主題樂園、產業園、康養項目、特色小鎮及學校等。

佢絕大部分物業管理服務收入，來自集團控股股東恒大集（3333）所開發物業提供的服務。

不過，現價少少貴，如小注投資持有都可以的。

碧桂園服務（6098）由碧桂園（2007）分拆上市，主要於中國提供物業管理服務等服務。

例如包括保安、清潔、綠化等，物業管理組合涵蓋住宅物業、商業物業、寫字樓、多功能綜合樓、政府及其他公共設施、產業園、高速公路服務站、公園及學校。

佢無論在業務本質、規模、品牌、財務數據、前景，都是理想的，反映這企業有一定的質素。加上有一定的現金流，背景發展等，投資價值絕對有，相信這企業的前景不差，有長線投資的價值。

但要留意，行業有時會有較大的炒作，股價上落大，要注意風險，而整體是有長線投資價值的，這股不少時間都在合理區頂至略貴的水平，投資唔好太大注，要慢慢分注入。

------------------------------------------------

Q21414：

我想請教一下⋯ 我之前錯誤地購買了6123 平均價8.8 有6000
最近股價都在$5 徘徊⋯

我應該點做？
繼續持有還是沽貨止蝕好？

龔成老師：

圓通速遞（6123）本身係一家以香港作為總部的國際貨運代理服務供應商，業務已擴展至多個國家，並在亞洲、荷蘭及北美設立了幾十個辦事處。

佢主要經營以下四項業務：空運及海運貨運代理服務、總銷售代理、配套及合約物流服務。

早前阿里巴巴（9988）入股增持，令股價大上大落，這的確會令企業有更多發展，前景正面，不過，估值方面已難。

因為這刻根本無法計算佢，之能賺多少錢，企業發展情況如果，只可以話好多不確定性，但股價就反映大部分利好因素。

因此，這股雖然有發展，但同樣股價上是有風險，相信之後的股價仍會波動。只可以話，這類股小注持有不是不可，但要明白風險因素。

如果持貨較多，可以考慮減少少，餘下就守，這股不是無質素，但相信你買入時炒作較多。

------------------------------------------------

Q21415：

老師，想問問根據分段買入優質股的方法，咁什麼時間應沽出部份股票獲利呢？以前一直大都只懂買入股份後多年沒有理會以致錯過獲利機會（例如：滙控）

是否要密切留意市況，例如什麼時候會出現牛三而進行沽貨呢？

龔成老師：

首先，我地只買入優質股。

另外，要衡量現時的平貴，自己組合情況、現金，去設定適當的投資策略。

如果升到貴的水平，可考慮賣部分，但如果企業優質，我會建議點都有一定的貨在手，不要盡賣。

另外，當大市處狂熱期，例如牛三全民皆股時期，就同樣可考慮賣出。

你之前的投資經歷，如果忽視了兩點，第一，你無計平貴，可能錯過了貴賣出時機。第二，匯豐（0005）及其他銀行股，都有一個情況，就是賺錢能力，比過往年代弱左，我過往都在銀行工作的，好明白佢地的賺錢能力，已不及從前。

當見到一間企業的質素及增長力下跌時，投資者都有可能作出賣出的動作。

------------------------------------------------

Q21416：

你好成哥，首先感謝你一直熱心解答我地問題，咁多年來除左教識我投資的正確觀念之外，亦都令我培養到一個波瀾不驚既心理質素。

想問下譚仔準備上市，你點睇佢既投資價值？

本人由細食譚仔食到大，對呢間公司有情意結，而且覺得佢連鎖化之後係管理同marketing都有進步，手上亦無類似版塊的股票，想問下值唔值得投資？

龔成老師：

初步分析，譚仔有質素的。

佢有品牌，有規模，以及有穩定的顧客，現金流強，整體不差的。不過，香港飲食業競爭大，同時入行不難，對是對佢扣分的地方，加上香港人好貪新鮮，因此佢都不能一定話品牌永遠穩固。

睇翻佢資料，譚仔及三哥品牌擁有超過二十年歷史，合共經營148間餐廳，包括覆蓋港九新界18區的72間譚仔餐廳及72間三哥餐廳、中國內地深圳的1間譚仔餐廳及新加坡的3間三哥餐廳。

根據2019年的餐廳數目，調查機構歐睿將譚仔列為香港亞洲粉麵專門店的第1位。

假設顧客每光顧譚仔100元的生意，食材成本佔22.9元；有31.1元是員工；約23是租金及折舊，扣除其他開支後，譚仔的純利仍有19.7元，扣除所得稅開支後，亦有17.8元的淨利潤，以香港經營食店來說，是高利潤的（不過，數據都是上市前的數據，所以不排除會執靚盤數上市）。

整體上，這企業都有質素，但不能定為最高質類，同時，增長力不能說是好強，這股如控制注碼，都可投資的。

------------------------------------------------

Q21417：

阿sir, 昨日我經過黃竹坑地鐵站，影左幾張樓盤上，立刻有兩個女門神企我左右隔離
有個仲追住塞咭片
黃竹坑地鐵上蓋

我覺得呢度最有投資價值
因為正頭喺地鐵隔離
而且除地鐵外其他交通都方便
附近都多野食

景我唔知望唔望到海
阿sir你有錢不如買下

我想買但冇錢
我喺黃竹坑做野睇住佢變
發展潛力好高

而且仲要喺南區
不過先睇埋佢開售呎價先

問左至少30000

龔成老師：

《5年買樓4部曲》都有講，黃竹坑係我其中一個睇好的地區，長遠一定有價值，不過，新樓的確好貴，唔會考慮，其實果度都有少量二受樓的，都可考慮。

我自己都是南區大，都見證當區發展，地鐵站，兩個站能金鐘，加上南區密度較低，工廈變商廈，價值一定有。

但我對新樓興趣不大，因為一般都有溢價。

------------------------------------------------

Q21418：

Ah sir，想再問下我現時持有3.43粒Bitcoin，現市值約160萬，計劃呢2-3個月內賣出一半或全部，套回現金後應該點樣部署投資？

我想5-8年內儲到1000萬移民，會唔會aim太高？

我30歲，現金大概10萬，有15萬喺投資收息保險基金(收每月約$900息)，約有20萬錢喺股票。

做零售生意已4-5年，銷售額穩定但唔算太高，每月七除八扣約賺2-3萬。

另外有份半職收入約15000(但計劃做到9月就會quit)，有個牌可隨時入返行。

但我負債較高，連公司借貸約仍有100萬未還清，每月大概還緊3-4萬。

我理財能力好弱，成日唔識點計好啲錢。

多謝你耐心回答

龔成老師︰

如果你要5-8年內，透過股票將資金翻幾倍，其實係好難。

假設投資回報有10%（連股息再投資），若你每月投資$10000 + 100萬本金，8年後大約會增值至350萬。這個回報程度，會相對合理。

在進行投資增值前，你要先審視負債部份。如果你負債利率係太高，我建議你先還清相關債務，才開始投資。因為高債息，係會好影響你長線回報。

收息保險基金，回報都有7%以上，勉強算係可以。但你要留意，這個回報率是否保證，將來係唔係一直維持到。

另外，Bitcoin本質來說，這是人為創造出來的，絕對不是「資產」，有沒有真正的價值。不過，佢可能有交易價值，但這個價值有多少，無人知。

所以結論就是，佢的波動會十分大，而你現時好集中在這項目，這會有好大風險，因此從整個財富的配置角度，宜減持。

將來贖回Bitcoin後，這些資金可以投資一些增長型股票。同時，你若每月有閒錢，都建議你用來月供優質股。

但潛力股波動性和風險會較高，若你係投資經驗較少，最多只可佔3成。到較大經驗，才升至5成左右。

現時大市在合理區，現金和股票比例，最好各一半。你每月閒置資金，可以先用一半做月供，其餘儲起。

將來有新資，如贖回Bitcoin後資金，都可按這個比例配置，去慢慢分注入貨，並長線持有。

但緊記，你做生意可能需要較多流動資金，作配置時，要先考慮生意部份。因為佢係你主要收入，必需排在其他投資項目之前，去優先處理。

------------------------------------------------

Q21419：

阿sir，近排開始了解債券，唔知阿sir有冇投資債券？

我見銀行可以買內房或其他公司的債券，自己研究左，想買雅居樂的內房債，出資和貸款5:5，利率大約有6-7%，你了解風險高嗎？

有些內房債(佳兆業)可以做到有11%，但有點怕所以唔考慮，怕佢違約。

之前睇左你的片，每月存1萬，5年可滾到100萬，真係好西利。

我計過下，要每年平均有10%回報先做到，請問當時你係投資咩？月供股票嗎？每年有10%回報都幾難

龔成老師︰

債券，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利(你可以睇睇《財務自由行》一書。

我從財富本質上，講述了當中原理)。同時，現時息口低，但未來有機會重回加息週期，債券未必是最好的投資工具。

而且內房負債偏高，係一直都存在的問題，所以投資這行業的債券，係有一定風險。你要睇翻每間公司，佢現時的財務情況，以及該債券的評級，違約的風險。如果評級A，都可考慮，去到B級，就要小心。

而我自己無買債券，主要透過有優質股，好似比亞迪(1211)、金沙(1928)、中生(1177)等等，在合理，甚至平宜區時儲貨，之後長線持有，才累積到的成果。

當然，我組合未必每年都有10%增長。但我地投資係長線，當你拉長用多年來計，就會得出這個回報。

------------------------------------------------

Q21420：

我見你話「同一行業不能高過3成、同一股票不能高過15% 」，點計？(股票投資總額)計算, 是嗎?

龔成老師：

在股票組合內的比例，同一個行業，不宜多過30%，而同一隻股票，佔比不能高過15%。

方法是以長期的平均股價計算，例如過往一年的平均股價，再乘以你持股的數目，以每一隻股票你擁有的市值計。

不過，你唔需要執著每一個%，大約數就得，不用一過少少%就立刻賣出，因為這只是一個指引的參考大方向。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20381-Q20400）

Q20381：

龔成老師，你好呀！我係新手，想做月供股票，依家有7款考慮中，你覺得每款供1000？

或者如果揀4款，每月供2000，你會覺得邊款好d？

2800
1177
0003
0405
1928
3067
1830

目標暫時係3年，麻煩到你，唔好意思！
謝謝

龔成老師︰

這個要視乎你年紀，如果你係中年，可以用平穏增長股盈富（2800）、煤氣（0003）、金沙（1928）作目標。

若你偏向年青，除了上述平穏增長股外，應加入一一些潛力股，如中生（1177）、小米（1810）、安碩恒生科技（3067）。

相反，你係較年長，就應加入一些收息股，如越秀房產（0405）、港燈（2638）、香港電訊（6823）、工行（1398）、恆生（0011）、置富（0778），令組合更平穏。

由於大市只在合理區，每月儲蓄唔好盡用去做月供。要留有部份，等大跌市出現時，可以用來掃貨。

另外，你要明白月供係一個長線計劃，月供最少維持3年，並持有這些股票5年以上，才會有較理想效果。

------------------------------------------------

Q20382：

老師，雖然我仲未有時間上到你班
但我睇咗一啲你嘅書（雖然我本身對金融同投資真係無興趣）

又睇咗你個page教人做月供同俾佢哋意見

我跟住試下試下，又月供又開源

我前幾日望返銀行月結單發現，我開始月供到今日，即兩年後資產偷偷突破咗一百萬啦（喺呢個經濟分圍下我本來以為無咁快，同埋應該唔係近日嘅事，因為係百幾萬）

好想多謝你，多謝你咁無私咁有耐性教導每一個人

當然，我係有朋友上咗你班佢都好無私咁答我問題我先有今日。多謝你！

龔成老師：

太好了！$100萬是一個很好的目標金額！之後會更快得到第2、3個$100萬！

我地最好要學「理財」，不是「炒賣」，只要我地有正確的理財知識，知識與財富一定成正比的。

見到你財富增長，反映你已行在正確的路，理財是長期戰，加油！

------------------------------------------------

Q20383：

老師，請問你點睇6885，是否有質素？有前景及現價$4.1值唔值得入埸？

我想長期持有的，另外我3.2持有少量必瘦站，現價是否值得再追入長期持有？

龔成老師：

金馬能源（6885）主要在中國從事生產焦炭及衍生性化學品、煤氣、液化天然氣及銷售相關產品。業務分類如下：
（１）焦炭：生產及銷售焦炭，

（２）衍生性化學品：將焦化副產品加工成一系列苯基及煤焦油基衍生性化學品，以及銷售該等副產品。

（３）能源產品：將焦爐荒煤氣加工成煤氣，並將煤氣提煉成液化天然氣，以及銷售煤氣及液化天然氣。

（４）貿易：買賣煤及有色金屬材料。

過往的業務不差的，生意有增長，有盈利，加上派息不差，本質不算差。但規模太細，業務有風險，是最大的不確定性。

這股投資都可以，收息不差，但由於有風險，因此，不建議投資太大注。

至於必瘦站（1830），你原本的貨可持有，至於現價，大約在合理區頂至略貴，如果加注，都可，但小小好了。

------------------------------------------------

Q20384：

呀sir 如果636，買入會否可以呢？

如現價為$24.9 買2手 則1000股,如受惠收息則派回$7.28*1000=$7280息??對嗎

龔成老師：

嘉里物流（0636）這股不差的，順豐入股後長遠發展更正面。

佢本身由嘉里建設（0683）分拆上市，係亞洲的物流服務供應商，主要從事綜合物流及國際貨運業務，亞洲、澳洲、歐洲及南北美洲的35個國家及地區設有逾400個業務點。

業務以第三方物流服務供應商身份為世界各地的製造商、零售商及其他客戶提供綜合物流服務，包括主要在亞洲提供廣泛的物流服務，如倉儲及增值服務、陸運及配送、退貨管理及各種配套服務。

另外，亦有從事國際貨運：提供的國際貨運服務絕大部份位於亞洲區內以及亞歐大陸之間，涉及空運、海運及跨境陸運服務。

現時的經濟及疫情，對佢都有一定的影響，而市場對佢的估值都會因而減少。

其實現價處合理區頂，以長線投資的角度，有值博率的，可分注。

至於你的計法，對，預期會收到$7.28一股的股息，但你要明白，佢會有「除淨」，即是當過了除淨日，股價會自然地減少了$7.28。這是由於企業將現金派走，因此企業價值減少，會自行調節。

------------------------------------------------

Q20385：

龔老師，想請問590六福，現價是否合理區？是否仍有投資價值？這股是收息股還是平穩增值股？因我的組合內無珠寶業的股票，所以想問問，謝謝賜教！

龔成老師：

六褔（0590）有質素的，現時的生意雖然不佳，但我地分析企業時，要從長期角度分析，自由行對六褔有很大影響，中短期一定好弱，不過從長期來看，自由行點都會慢慢好轉，這只是時間問題，這企業亦會因此而回勇。

當然，最重要是企業「捱得過」這關，而六福是無問題的。

現時投資，等到自由行好轉，長線。都有投資值博率。這股現價合理，你可以分注投資，長線持有。

------------------------------------------------

Q20386：

龔sir, 你好！以前唔識草錢，開始玩幾年股票，成日一賺就走蝕就坐到升返為止，有D一沉不起

輸埋都有20萬，而家人開始成熟，以前跟人買而家自己成日睇，最近開始睇你文章，覺得好啱我channel, 而家人大左唔想好似以前咁原地踏步

想好似你咁慢慢由0變一百萬，再將財富一直增值落去，但我唔係覺得自己做唔到，係未夠信心，同埋應該點開始，我有15萬做投資，現持有1801同9909

我見好多人話今年牛市，我想將15萬今年翻一倍唔知可以點做，求指教！

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

信達生物（1801）係一家中國生物製藥公司，開發了集研究、發現、開發、製造及商業化於一體的生物醫藥平台。

睇翻佢資料，佢亦係腫瘤、眼科、自身免疫和代謝疾病領域建立了一個包括單克隆抗體和其他生物藥物的產品管線。

由於仍處於燒銀紙的狀態，所以有危有機，潛力度是有的，但估值好難，現時市值都唔細，只能完全「估」佢將來的價值，不確定性好大。只可以話，這刻投資值博率中等，唔建議大注。

寶龍商業（9909）都算有質素的。

佢由寶龍地產（1238）分拆上市，並主要於中國提供有關物業管理服務。

寶龍商業業務都不差，現金流理想，有增長力，母公司都有規模，不過，不是最大型的規模類別，所以在長遠的增長力方向，未算好強。

整體都有投資價值，不過現價唔算平，合理區頂，如投資只能小注。

至於你話想一年賺一倍，建議你心態上，最好不要這樣想，因為投資要長期，不重短期回報，而一年一倍是一個高回報，如果你太著重這目標，擔心你面對過高風險。

------------------------------------------------

Q20387：

龔sir 唔好意思
我又打搞你

我因為有留意你既 page 先開始買股票
我其實因媽媽都有買股

變相有好多意見都因佢而影響 買入邊隻 沽出都係

但之前有買1810 ， 受到一直股價未升 中短期影響 同埋家人影響 導致兩個月沽出1810。

我都後悔冇繼續持有 我真係好後悔

我有冇咩計可以唔受家人影響 始終佢比我經驗豐富得多了

同埋我想問我宜家持股既組合合理嗎 ？ 可繼續持有嗎
股票有

2628 18.18 入 @1000
1297 1.53入 @ 10000
1898 2.12入 @10000
2238 7.82 入 @2000
3088 8.76 入 @2000
788 1.16 入 @10000
謝謝你一直無私教導

龔成老師︰

投資除了經驗，相關正確知識、投資策略，以至對投資企業/行業了解，都係好重要。

我地當持有一隻優質股，如果佢質素係無變，我地係唔應該因為佢股價問題，而去沽出。

若果你了解企業佢本身質素和潛力，好大機會你唔會受到家人影響，而做出這個決定。

中國擎天軟件（1297）本質不差的，但規模較細，以及行業存有風險，唔建議太過大注。

中煤能源（1898）主要從事煤炭開採及洗選、煤炭及煤化工產品的銷售、煤礦機械裝備的製造及銷售，以及金融服務。

煤炭部份為集團主要收入來源，而煤炭是商品類，產品沒有差異性，故只能賺取合理的利潤，不算是最高質的類別，投資價值中等，這類股都不宜持有太多。

------------------------------------------------

Q20388：

你好，我現在副業平均每個月有一萬收入,有時甚至更多，正職是跑數不太穩定，想辭職，因為兩邊兼顧太疲累，而且經濟環境不好，更覺得困難，請問有什麼建議

龔成老師：

如果你本身儲蓄不算好多，暫時兩邊並行是最穩陣的，雖然有點辛苦，但這是最穩健的做法。

當然，如果你有信心，可以全力發展副業。

或者你可以再儲多少少資金，等你資金有一定的數目，同時經濟穩定翻D，就跳出來全力發展副業，這都是方法。

------------------------------------------------

Q20389：

龔sir，如果我現時有資金及合理或平價時,其實應否買入現時我月供股票組合中的股票(金沙，香港電訊，港燈，盈富基金，長江基建，港鐵，中電控股）定係應該只係買入收息股比較理想呢？

另外想問如果退休時要將平穩增長股賣出轉為收息股,操作上是否分段賣出平穩增長股然後分段買入收息股比較好呢？

麻煩你,真係得到你的答案後心裏踏實左，沒有咁擔心啦⋯⋯多謝你

龔成老師：

如果你資金不多，就不用心急再加注。

除非大跌市出現。

至於到時買入那些股，則要睇那類股有較大的跌幅，以及到時你組合的情況。最簡單穩陣的方法是買入收息股。

至於你問「如果退休時要將平穩增長股賣出轉為收息股」，方法是分段賣出原有的平穩增長股，並同步分注買入收息股，可以按年齡，慢慢進行這動作。

------------------------------------------------

Q20390：

老師，想問982
有潛力嗎？

龔成老師：

華金國際資本（0982）主要係香港及中國內地提供財經印刷服務、金融服務及酒店顧問、酒店管理及展覽策劃服務。

睇翻佢財務數據，只是一般，業務不太穩定，盈利都不算好好。長期投資價值只是一般。

可能佢在某些地方有品牌，但我只是從整體分析，見佢過往的財務數據只是一般。

------------------------------------------------

Q20391：

老師，我本身諗住跟牛熊街貨圖會穩陣，點知熊小米蝕咗8萬蚊，而家手上資金只剩餘6萬，其他仲有9萬蚊50日9988 call,我應該暫定一下買賣還是放喺邊度可以回返今日蝕嘅錢，我覺得自己開始有小小失控，唉！

我跟牛熊街貨圖去買是錯的嗎？因為我覺得莊家無理由會放過咁大堆牛證唔食，所以有咗睇牛熊街貨圖去決定自己買升跌！

經過今日之後真係好氣餒，仲出現咗想借錢去追返今日無咗嗰啲錢！

龔成老師：

我20年前，都是短炒者，短炒、炒孖展，炒衍生工具，用左幾年，輸足幾年，之後長線投資，就開始不斷賺錢。

我當時不斷睇書、上堂學短炒衍生工具，但最後都是輸，好後悔。

之後做銀行同證券行，見大部分輸錢的客，就是短炒、玩衍生工具的！這是我10年見到的情況，這是行內的秘密，根本大家都知短炒者一定輸，但業界一定唔會講！

你一開始就行錯路！發行商食水好深，你長遠唔會贏到佢地，因為佢一開始就食左好多！

在一條錯的路上，你跑都不會到終點的。

------------------------------------------------

Q20392：

老師，你好，請問302， 1357如何？何時止賺？

龔成老師︰

我唔會定個止賺位，只要佢優質度不變，長線持有會係最有利。

中手游（0302）主要於中國從事手遊發行及遊戲開發業務。佢提供多種類型的手遊，包括ＣＣＧ（可收集卡牌遊戲）、ＲＰＧ（角色扮演遊戲）、ＭＭＯＲＰＧ（大型多人網絡角色扮演遊戲）、ＳＬＧ（模擬遊戲）等。

過往生意不差，有持續的生意與盈利增長，財務數據初步正面。

不過，上市年期不算長，這會令財務數據代表性較低，同時，行業業務波動，不確定性大，都令這股造成風險。這股如果你投資不過多，可持有。

美圖公司（1357）正面，佢過左最差時期，現時正向好。

佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

------------------------------------------------

Q20393：

龔sir, 想請問如果我儲一舊錢，夠目標單位的首期，然後計過數供樓可以負擔得起，想放租長遠作被動收入，咁我係買樓好？

定張呢舊首期嘅錢買收息股，然後大概每個月本應供樓嘅錢，投入到收息股，長線作被動收入好？50歲的話。

謝謝龔sir!!

龔成老師：

其實我地最重要是做好「財富組合配置」，如果你本身無物業，可以投資物業。但如果本身已有物業，你可以投資收息股。

收息股的股息率會較高，你會得到較多的現金流回報。

當然，物業的租金較穩定，你可以建立一個「股樓並行」的組合，如果你未有物業，可考慮物業，置業後，如果之後有資金，就慢慢增加收息股，財富組合就能更加平衡。

------------------------------------------------

Q20394：

你好!龔成老師,想請問1490,1.58入左2手,現在應該止蝕嗎？

另外1183,2013現價可以入手嗎?感謝老師!!!

龔成老師︰

CHESHI（1490）是中國的線上汽車廣告服務供應商，此股上市不久，現有數據參考價值唔高。

這些新股，好多時都要1,2年先見真章。初步睇佢業務上都有質素，但由於新股，不宜太大注。

如你持貨不多，可以守住再觀察。

微盟集團（2013）和平安好醫生（1833）一樣都有潛力，但不確定性同樣好大。此刻估值唔平，投資的話，只宜小注。

------------------------------------------------

Q20395：

老師，可以再問你關於9989這個股票，你有甚麼看法嗎？我18元買左4000股

龔成老師︰

海普瑞（9989）係為一家全球製藥公司，業務範圍涵蓋藥品生產及銷售、創新藥開發以及ＣＤＭＯ服務。

ＣＤＭＯ是指合同開發和生產組織，為一個除提供全面的藥物製造服務外，亦提供與其製造服務相關的流程開發和其他藥物開發服務的ＣＭＯ。

睇翻佢的資料，佢係藥物生產同銷售業務方面，主要專注於抗凝血及抗血栓藥物製劑，包括依諾肝素鈉注射液（主要以「Ｉｎｈｉｘａ」及「Ｎｅｏｐａｒｉｎ」品牌於歐盟及英國銷售

亦係中國國家藥監局批准的首例依諾肝素鈉注射液仿製藥，並以「Ｐｒｏｌｏｎｇｉｎ」品牌在中國銷售）、肝素鈉注射液（其為液體注射的肝素鈉無菌溶液），以及其相關產品。

業務發展都不差的，但風險同樣不少。此股都有潛力，但就不能大注投資，始終往後發展好難分析，加上上市年期短，數據可能會執靚過，要慢慢先見真章。若你持股佔組合不重，可以守住先，再觀察。

------------------------------------------------

Q20396：

龔sir藥明生物現在合理價嗎？
長遠發展如何？謝謝你
麻煩晒

龔成老師：

藥明生物（2269），主要提供有關生物製劑藥物發現、開發與生產服務。

佢涵蓋生物製劑發展過程的所有五個階段，即藥物發現、臨床前開發、早期臨床開發、後期臨床開發及商業化生產。

潛力是有的，因為過往的財務數據的確理想，但現時的估值唔平，這刻投資值博率一般。

不過，這類股好難話現價一定貴，因為佢有好高的增長，只可以話現價唔平，但如果之後有高增長，那就未算太貴。只可以話，如果你真的想投資，小注好了，你要明白業務有不確定性，同時股價會好波動。

------------------------------------------------

Q20397：

請問龔sir 2333 長城
3888 金山
708恆大汽車
我只能買1隻 請問邊隻長線爆升機會大D？

龔成老師︰

長城汽車（2333）有質素的，但過往的增長力不算好強，長遠業務發展雖然正面，未必是潛力型。

金山軟件（3888）主要從事遊戲研發及提供網絡遊戲、手機遊戲及休閒遊戲服務；提供雲存儲及雲計算服務；設計、研發及銷售推廣辦公軟件產品及服務。

業務有質素，長遠發展力不差，不過擔心股價較為大上大落，現價合理區頂位，唔建議大注投資。這股前景正面的。

恒大汽車（0708）雖然可能有潛力，但風險高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

潛力上，金山和恆大汽車會較高，但風險同樣都高，你要自己衡量，同時要控制注碼。

------------------------------------------------

Q20398：

龔成老師，想請教你幾個問題，謝謝老師耐心解答

1）福祿控股前景如何，值得長線投資嗎？10.2入了福祿該長期持有嗎？

2）光大環境（257） 4.2買入了，此股值得長期持有嗎

3）海螺水泥（914） 最近股價下跌了，此股算是平穩增長股嗎？現價可買入嗎？

4）復星國際（656） 買入價13，持有了快十年，是否該繼續持有？

龔成老師︰

1） 福祿控股（2101）是中國的第三方虛擬商品及服務平台運營商。

此股上市不久，有睇開我FB朋友都知，其實我唔係咁推薦新股。因為可參考數據唔多，很難估值。而且要時間，才會見真章。

以佢2019年盈利8000萬計，你買入價點都係有點貴。你可長線持有，但佔組合不能太多。

2） 光大環境（0257）主要在中國從事環保能源項目建造及運營，例如建造及運營垃圾發電廠、沼氣發電廠、污泥處理處置項目及餐廚垃圾處理項目。以及環保水務項目建造及運營等。

業務本質不差的，不過負債不斷增加，令風險度提高左。其實有長期投資價值計，只要唔係太過大注就無問題。

3） 安徽海螺（0914）有質素，有增長力。佢主要從事生產和銷售熟料和水泥製品，業務地區包括中國東部、南部、西部、中部及海外。而安徽海螺是水泥行業中，全球最大的單一品牌供應商。

水泥屬於基礎原材料行業，對建築行業有很高的依賴性，同時亦會與經濟增長速度有較高的相關性，特別與固定資產投資相關。即是說，當中國基建及房產市場不景，水泥行業會比一般行業處較大的不利狀態。

另外，水泥企業在生產過程中，燃料成本佔總生產成本中約佔了超過一半。若能源價格出現較大變動，就會對企業成本造成較大影響。因此，當能源價格出現較大上升時，將引致安徽海螺的成本增加，影響其中毛利。

綜合來講，佢擁有相當規模、生產能力，有一定的質素及賺錢能力，而水泥行業長期將因中國城鎮化以及一帶一路的建設，仍然會增長，但不會像過往般快速，而是進入較平穩的時期，在本質上此企業不差。

現價合理的，但要留意盈利有潛在波動。

4） 復星國際（0656）的本質不差，可惜業務範疇多，分析不易。當中業務如醫藥、健康產品，會有較大的業務波動，同時在中國經濟轉弱下，中短期會有影響。

此股有長線投資的價值，但股價你預會較波動，同樣不宜太大注。

------------------------------------------------

Q20399：

龔成老師你好，一直以來都有留意一些投資資訊，發現你的講解是最為中肯，亦獲益良多

若能早點看你的專頁，在買股票時便不會損手爛腳。在幾年前我用10多萬以分別高位33.5買了中銀香港

13.5左右買了大新銀行，那時以為能收息就可以，現在這兩隻股票都跌了超過一半，持有多年

實在不知放不放好，若溝貨又怕是無底洞，適逢上年買了樓，現在流動現金20萬，

想借小投資增加現金流，想請教一下，我應否把那些股票忍痛放掉，還是繼續留下收息？

那些流動現金如何分配作投資？感謝回答

龔成老師︰

這裡包含幾個問題要考慮，首先收息係唔係適合你。如果你近退休之年或者係好保守架投資者，收息股係可以。

相反，你只係年青至中年人士，就應以增值為主，目標應是一些"平穏增長股"和"潛力股"。用佢地去累積到一定金額，才換股收息。

另外，是否持有，要睇翻個企業質素。中銀香港（2388）本質唔錯，你可以用佢增值+收息。

大新銀行（2356）賺錢能力有轉弱的情況，不過從整體質素分析，又不是好差，投資價值是有的，但你就預佢無乜增長能力，以收息為主。

以下是一些不同類股票，供你作參考。

平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（0823）、希慎（0014）、太古地產（1972）

潛力股︰中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）、舜宇光學（2382）、小米（1810）

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548）

由於現時大市只在合理區，你20萬可以先用一半，以"分注"形式，慢慢入貨。你資金可以先投入一半。餘下一半待大市出現一定程度的下跌，才大力度掃貨。然後長線投資。

------------------------------------------------

Q20400：

Sir,我今年40歲，睇你Facebook 都有2 年幾，投資到唔小有價值嘅公司，資產正向增長中，
但有問題唔明。

1。我成日見你推介依隻3067 基金股，但係我見依隻基金股股價比其他貴，點解我要投資依隻但不投資另一隻？佢有咩優勢？

2。如果我買左隻股升緊？我想長期持有，我應該點計算幾時再增股數？

希望你能解答，謝謝

龔成老師︰

1） 市面有不少相關ETF，以每年費用率和追蹤誤差值作比較，你會發現安碩恒生科技（3067）相對較低，同時手續費較平。

由於佢係100股一手，其他幾隻係200股一手，所以入場費計埋，其實係差唔多。

但你要留意，由於幾隻恒生科技ETF都係初上市，追蹤誤差只能作參考。實際誤差未必一樣，你要知道這個風險。

2） 最重要睇「長期的企業質素」，睇下是否值得增持。

另外，係升緊架情況，就要睇下你現時價格水平。如果係合理區中間，而你只係入左少少，咁你就應該係而個時候，再加注。

相反，你已入一注，但佢已經升過左合理區，咁我地就最好等一等，或者改用月供去儲貨。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q16401-Q16420）

Q16401：

龔成你好，幾年前係股票市場蝕過錢，因為聽人講買號碼自己對投資一點都不識，亦無了解該股票既背景，最後隻股都停埋牌，血本無歸，同時亦買入8109，由2萬得返百幾蚊！

唯有擺係度同佢斗長命！8109 無放到，因為覺得放尼都無用，同埋放係度提醒自己曾投資失策過，以後要謹慎投資。

之後就一直無買過股票，疫情期間，股價回落，亦覺得自己要有啲被動收入，要學會投資就開始研究及學習股票，想買藍籌股穩定嘅股票自己上網做資料搜集。

咁就認識咗龔成你，覺得你講嘅股票知識好好，亦有去買你嘅書《股票勝經》。

我覺得你講得好啱！我哋應該係投資一個企業，了解企業嘅發展前景，同埋唔好短炒。謝謝你

我想問你對1119 創夢天地的看法，建議入貨嗎？ 另外幾錢先為便宜區？

0778 置富 1手 （7.06）
9988 阿里巴巴 2手 （172.5）
1928 金沙 （1手）

剛開始月供盈富基金$2000 一個月
謝謝！

龔成老師：

每個人都會犯錯，你只要之後行翻正確的方向，咁就得。

麒麟集團控股（8109）年年虧損，基本上無得守。

現時你持有的，都是有質素的股票，你可以長線持有，至於月供盈富（2800）這是很好的做法，如果可以的話，加大少少個月供金額。

至於創夢天地（1119）業務不差的，但業務存有不確定，始終行業的風險較大，投資不是不可，但就唔能夠太大注。

我地要建立一個「財富組合」，平衡風險，同時合理地爭取回報。

------------------------------------------------

Q16402：

Ah sir

Total debt 同 Total liabilities
有乜分別？

龔成老師：

其實當中有一些會計原則等問題，我試下以簡單方法解釋。Liability，你可以理解是法律上的責任，在資產負債表，就是總負債的意思。無論是怎樣得來，例如銀行債貸、應收賬，就是欠了人錢，就是Liability。

Debt，一般可以指向外部借入金額，從而產生的債務，往往都要比利息的，例如銀行借貸。而應收賬就不是Liability。

------------------------------------------------

Q16403：

龔老師你好，我今年25歲，平均月入3萬至4萬左右（因為做生意關係每月收入大起大跌，所以按往年每月收入取個中位數3萬5，今年目標年賺600k，目前on track的，如果目標達到可再撥多點資金作投資)

因之前好大洗關係，目前手持現金只有約28萬，投資經驗可說是零，都很後悔自己那麼遲才開始學理財。

至從上年開始留意你的專頁，和看了你寫的《50優質潛力股》，我今年開始下定決心好好把自己的資金分配一下，現時每月固定開支（包括保險家用雜費）約$8000左右。

目標想2年後成功儲到$150萬現金再投資本地/海外物業，再樓換樓，所以希望你可以給我少少意見

1. 月供 $5000 盈富基金，$3000金沙中國（因為做生意有風險，保守起見我以目前手持現金除以兩年去計算月供金額，假如收入和手持現金穩定上升，便會增加供款額）另外都想請教下，你建議如果要達到呢個目標，最理想每月供款額應該幾多比較好？）

2. 呢段時間都有了解儲蓄保險，guarantee return 大概 2-4% P.A.，但考慮到供款年期長，回報通常達退休年齡才比較好，在比較靈活性和回報的情況下，會否把錢投放在月供2800/0003會較好？

3. 我諗住每月月供股票之外，每月扣除開支剩低嘅錢會儲起來，等心頭股票達平宜價位再入市。我目標係想尋找每年有10%-15%回報和股息平穩且較高的，請問可以推介幾隻股票給我嗎？

4. 同埋如何去計算該股票每年有幾多%回報呢？
謝謝你

龔成老師：

1）你可以開始進行月供盈富（2800）$5000、金沙（1928）$3000。你先開始這動作先，之後，就是分析你有多少現金，然後決定怎樣增加金額。

如果你想2年有$150萬，儲蓄的金額要有一定的數量，同時預算將其中一半的資金投資股票。但由於2年時間，財富增長不算明顯，所以你只能預期平穩增長的回報，同時只建議投資較穩健的股，唔建議太過進取。

2）保險是防守性產品，在理財中都有一定的作用，不過，「足夠」就得，不建議投放太多資金。因為增長力有限，應該將資金集中在股票或其他更有增長力的項目。

3）你可以考慮盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

4）你預股市，一般的回報是10%-15%，視乎你的選股，以及捕捉平貴的能力。

我會建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16404：

龔sir：想請教525，其實我買得好少，2.11買左3手，但佢就近期恆指升都冇跟貼，但每次一跌就會跌。

請問該股我應該繼續持有嗎？再下跌的話應加注？如加注，額注又該如何控制？我總投資額為30萬左右。

另外想問1038的前景如何，歐美疫情嚴重，並有對未來經濟有大影響嘅現象，$54.5有一手。

同問，再下跌應否加注，還是以資金投資其他優質股。感激。

龔成老師：

廣深鐵路股份（0525）中短期仍會弱，但長遠會好翻D。不過，這股的質素未算最高之列，近年的增長力不強，賺錢能力有減少情況，加上ROE處很低的水平，都反映這股質素只屬中等。

你持有可以，都有得守，但不建議再加注。

至於長建（1038），有質素的，中短期一定弱，但長遠不差，有收息，以及平穩增長的能力。這股可以投資。

你應該好好運用手上資金，先設計好一個財富組合，不能集中1、2隻股，要平衡，當中有不同類別的股票，同時都要是有質素的，如不懂還選股就盈富（2800），然後就分注投資。

另外，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16405：

師父, 想問問現時3737可否入市?

還是買入阿里健康或平安好醫生?

龔成老師：

中智藥業（3737）主要於中國從事開發、製造及出售中成藥及飲片，及於廣東省中山營運連鎖藥店。

佢的產品以核心品牌「中智」、「六棉牌」及「草晶華」出售。

整體的質素，算是不過不失類別，但增長力不強，同時賺錢能力不高。而現價唔貴是較吸引的地方。投資值博率是有的，但由於質素不算好高，因此唔建議太過大注。

至於阿里健康（0241）、平安好醫生（1833）都是有質素的，我會較看好平安好醫生。不過，近期有少少熱的情況，要注意翻，如投資，這刻一定不能大注。

------------------------------------------------

Q16406：

龔成老師。我想問，2382，我可唔可以拎佢個5年average每股盈利2.4去推佢個市盈率？ 現價/2.4
同埋而家係米算貴？

定係叫合理？

你本書話25倍以下先叫合理價

同埋0005 我有一手係度，諗緊好唔好止蝕左佢 放落第2度買。

（其實我已報左你的course，但等唔切，想問左先）

龔成老師：

利用平均數去計算市盈率，是其中一個方法。

我地在考慮一間企業價值時，要分析過往的數據，例如5年數據，當你利用平均數去計算時，要同時分析當時的大環境情況，要考慮當刻的環境產生當時的數據，而之後的環境怎樣？是否可以參考過去數據，你要以這個方向去思考。

這股現時處合理區，這是考慮到佢之後盈利會有增長，預測市盈產去到25倍以下水平。現時都可投資，但就未值得太注。

至於匯豐（0005），只是收息股，增長力有限，你可以等佢上翻D，然後轉到其他股票。

股票班見！

------------------------------------------------

Q16407：

老師你好，希望你有時間可以解答以下問題。

本人現時29歲，月入大概100k，希望45歲前可以達至財務自由。

現時手持一個物業自住，於2008 年600萬買入。每月供款約$19000。

每月保險費用約$10000。
每月固定支出約$40000。（家庭需要不能減少）

最後每月月供股票：
盈富基金：$3000
媒氣：$2000
港鐵：$1000
友邦：$1000
共$7000。

請問月供股票組合有需要更改或加大銀碼嗎？
而且現時完全沒有被動收入，應該從何方面入手？
感謝老師

龔成老師：

以你的情況，應該可以累積更巨大的財富，你要在這年齡，加大你的儲蓄，以及盡力投資。

你現時每月應該可以儲到$30000，你現時月供金額，可以加大。

你可以月供盈富（2800）$9000、煤氣（0003）、港鐵（0066）、友邦（1299），各供$3000，比亞迪（1211）供$2000。

餘下的$10000就儲現金，當見到優質股下跌時，就把握機會買平貨。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

------------------------------------------------

Q16408：

投資新手要學咩先
本金都無

你覺得可以點做?
銀行借貸?

龔成老師：

新手當然唔可以借錢投資，你應該做好基本功先！

你先要儲蓄，好好利用收入，減少支出，累積現金先。同時，要學習基本的投資知識，你可以睇《股票勝經》。

------------------------------------------------

Q16409：

老師你好，想問下宏利金融（0945）

保險股中好像較少人討論，它有增長潛力嗎？
以它作為收息可以嗎？

龔成老師：

宏利金融（0945）不差的，這企業都有質素，有長線投資的價值。

收息都可以，但由於股價有少少波動，要自己注制翻個注碼，佢唔係最穩健收息股的類別。

佢有一定的品牌，長遠仍有發展，但由於業務中有投資成份，佢業務會受投資市場令盈利有影響，從而令股價有上落。

------------------------------------------------

Q16410：

老師您好，我依家盈富，媒氣，匯豐同其他平價收息股各有一手。雖然想入手潛力股，但基於資金有限同風險一直都無做到。

依家諗住月供潛力股，當我每月可儲$5000，將$2000現金保留，另外$1500供1211比亞迪，$1500供2382舜宇光學科技，這樣好嗎？

定話月供組合都應該加返平穩增長股？
謝謝老師

龔成老師：

如果資金有限，做月供是較好的，因為可以平均左買入價，減少一次過用盡資金在高位買入的風險。

你上述兩股都是有質素的潛力股，你保持月供$1500，可以。

但要留意一點，當你供了一段時間後，要計算翻這兩股佔你組合的比例會否過多，單一股票佔比最好在15%以下，潛力股就應該更低，只要你根這方向行就得。

------------------------------------------------

Q16411：

你好，我剛大學畢業，上班不夠一年，從事跑數行業，儲蓄約十萬多，但其實不太喜歡這份工作

長期感到疲倦，又覺得樓價太高，根本無力改善環境，請問應該辭職，還是繼續嘗試？

龔成老師：

你年輕，當然可以嘗試，年輕人初踏入社會，未必知自己最喜歡及最強項在那裡，當中要「試」出來，當你去到某一個位，感到不能長期這樣，就可以跳去。

可以嘗試一些同原本好唔同的野，甚至做生意都可以，你先想想自己適合那些方向，然後找到新工作先辭工，這會比較好。始終經濟未必咁好，你最好找左工先辭舊工作。

------------------------------------------------

Q16412：

中國移動在將來5g會有大增長潛力嗎 值得長渣投資嗎

龔成老師：

5G的發展對佢有正面影響，中移動（0941）會因此而受惠。

不過，中國政府一直行「提速降費」政策，即是唔想佢地收費太高，這會影響左佢的盈利，以及長期的賺錢增長能力。

所以，佢整體只會平穩增長。

------------------------------------------------

Q16413：

老師，你好！我係投資初哥，打算每月用$5000-7000買股票，有諗過買d收息股，匯豐或盈富，宜家係好時機嗎？

龔成老師：

如果月供，現時已經可以開始，月供是一個長期的投資計劃，好處是將買入價平均。現時大市處合理區中下部，當然可以進行。

盈富（2800）無問題，匯豐（0005）你預無乜增長力，只是收息股，唔建議供太大注。

------------------------------------------------

Q16414：

龔sir你好
問題：1881 富豪產業信托，2019年年報，Page 5

五間初步酒店於年度內產生之物業收入淨額總額由二零一八年之港幣875,700,000元減少30.7%至港幣606,900,000元。

由於物業收入淨額總額較本年度基本租金總額港幣776,000,000元為低，故此並無賺取浮動租金。*根據已於二零一九年 十一月完成之市場租金檢討，五間初步酒店於二零二零年之年度基本租金總額已釐定為港幣710,000,000元*

較二零一九 年之基本租金總額減少港幣66,000,000元，而浮動租金將繼續按分佔初步酒店之物業收入淨額總額超出基本租金總額之 50%計算。

問題：1881 富豪REIT 2019年11月已經與78富豪國際，定好2020年的酒店租金。及將於2020年11月再檢討2021年的租金。是否1881今年的盈利沒有太大的影響？

假設到2020年11月檢討時，疫情已好轉，自由行回歸，再定2021年租金時，也不會下調太多。所以20及21年業績的業積也不會相差太遠？

現在$1.33，派息有9厘多，因業積預期不太走樣，假設派息以正常REIT 派息6厘左右，2年目標價$2，5成回報，簡簡單單，是否大注之機會(～5M資金）？謝謝回覆

龔成老師：

雖然已經定好了租金，但這個租金由兩部分組成，一部分是基本，即是固定的，另一部分是浮動，即是仍會因為浮動的部分而對佢有影響。

同時，在計算之後的租金時，會因為現時的情況，而調整了之後的基本租金計算。

假設到2020年11月檢討時，疫情已好轉，自由行回歸，再定2021年租金時，可能不會下調太多，但要睇到時的情況，所有野都是睇到時的發展。同時，佢都會考慮潛在風險，而因為發生了一次疫情，而調減租金的。

要留意一點，就算在正常的投資環境，佢的股息回報率都比其他房託為高，一般有7%，這是於酒店的風險較其他物業的風險大，所以市場的要求回報率會較高。

因此，你在考慮風險與回報時，要留意這點。這刻的確有值博率的，但建基於你假設一年內疫情過去，自由行回到正常的狀態。

------------------------------------------------

Q16415：

你好，想問09938之前高開2.5，洗倉嗰日0.5入咗7萬股，之後繼續跌，呢隻股可以返到家鄉嗎？

定幾錢止蝕好，感謝

龔成老師：

這類新上市的細公司，風險高，好難玩。

華和控股（9938）集團是香港一家專注於窗戶的外牆工程承判商，涵蓋的樓宇類型包括住宅公寓、商業樓宇、零售店、大學、住宅及酒店。

業務獨特性不強，每年盈利只有幾千萬，以這類企業分析，估值通常只有幾億，不會太多。

就算你$0.5，都有少少貴，之前的價位只是炒價。現時才算合理價。

這股風險高，要上翻高位較難，你見股價上翻D，要賣出部分先，最好等機會全部賣出。

------------------------------------------------

Q16416：

龔sir, 你都提醒我們唔好作短期買賣，不要為賺差價。要儲資產。我仍有一個地方不明白。

如果我見某隻優質股票價格是比較浮動。買入$20，之後股票升到$30，賣出。

待回價跌時再買回。這樣做可以幫加快儲到本金。這樣做較一直長線持有有較大回報。為何你不建議這操作？

龔成老師：

好多人都有你這樣的想法，當中的關鍵位，就是「待回價跌時再買回」。

好多人都以為做到，但根據我過往做銀行及證券行10年的經驗，我見到以這模式運作的散戶，都無法賺到大錢。

我見到好多散戶在$15買入港交所（0388），佢地有95%在$20之前已賣出，點解，就是賣出等跌！

結果點？無跌，仲升到上$200！

你睇翻全球真正賺大錢的投資者及基金經基，點解佢地點用「買買賣賣」的方法，你仔細想想就會明白。

------------------------------------------------

Q16417：

Sir,請教下，你總說1177在10元先合理，但買的當然希望佢升，咁個個都是等10或低點，那怎升到大家可以賺錢？

我11.04買，我其實應該昨日可放，但我就是像你說一樣，長遠的！那當升到一個位又跌返，那怎賺錢？因為佢不是收息股！

龔成老師：

我所計算的是「企業價值」，這是根據企業的業務、資產、生意、盈利、現金流等，計算出來。而你所講的，是一種市場概念，並不是我所說的。

同時，企業價值只是一個概念，不同分析師計出的數，可以略有不同。

你仍然未明白長線投資的概念。

買入企業後，等企業成長，這要3年以上，成長自然會帶動價值向上。而長線投資，並不是考慮短線的賺差價，並不理會中短期股價。

你可以當自己，買入股票後永遠不賣出，這就是買入企業長線的概念。

------------------------------------------------

Q16418：

成哥，近期石油股跌得咁勁，點睇（632）同(857)呢？現價屬於合理價值得入手嗎？謝謝

龔成老師：

中港石油（0632）質素不佳，佢做石油及天然氣相關的銷售及貿易過往多年都出現虧損，即是無論油價升跌，都處於虧損狀態。這企業當然無投資價值。

至於中石油（0857）都可算是有質素，但這始終是商品企業，產品沒有差異性，只能賺取合理的利潤，不算是最高質的類別。

佢會比較受油價影響，自主能力不強，油價長期仍會向上，而中短期可以較波動。長遠增長力只屬中等，現價合理，小注投資可以。

------------------------------------------------

Q16419：

龔Sir你好，有個難題想問一下。我有個阿姨人在國外做生意，她過左一百萬比我叫我幫佢投資買股票，佢完全唔識叫我幫佢揸主意，我感到壓力頗大。

其實我自己有跟開你既投資建議，自己有買開一些平穩增值+收息+潛力股，當然自己錢沒有壓力，但阿姨D錢我真係好驚

請問如果一百萬投資二，三年左右，可以買什麼股票，可否賺到一倍的錢？麻煩你賜教一下，謝謝你

龔成老師：

首先，你應該同佢講清楚，投資有風險，以及你的能力，你表明自己都不是強項，唔好強行做這事。

一般來講，你可以分配得平衡少少，以及較為低風險，所以唔建議投資潛力股。只能投資平穩增長股+收息股。

另外，2年、3年預期有一倍回報，這是好高的回報！根本好難做到，要承受較高風險！所以，你要清楚同佢講，正確的投資概念。

如果你想揸主意，就投資指數基金，你可以選盈富（2800）、南方Ａ５０（2822）、領航標普五百（3140），這是追蹤香港、中國、美國的指數，你這樣會最穩健。

另外，你可以考慮一些收息股的指數基金，例如ＧＸ恒生高股息率（3110），同樣是可以投資的。

------------------------------------------------

Q16420：

老師你點睇2606呢隻股票

龔成老師：

藍光嘉寶（2606）本質不差，現金流強，生意穩定，不過上市年期不算長，風險略高，業務真實面要慢慢先見到，現價合理區中上部，考慮到風險問題，這股不宜大注。

現時股價算是合理，初步睇，投資價值不是沒有，只是要睇耐D佢真正的業務情況。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。