【龔成問答信箱】（Q22021-Q22040）

Q22021：

上了你的初班，我已明白唔好追逐平貴，而是睇企業的質素。

但因我太過集中，特別是669，而上次大升時，無把握沽貨，到大跌市，我真有d驚，所以問問咩價位沽貨比較合適，我持有一定比例。

你教的內容真係好有質素，深入淺出，但至於我，我覺得透過實際操作比較易上心，或許這就是我需要活學活用，不停用同一方法去理一些事，然後才能進步。

就好似小孩寫字，一點一筆一畫，做線條練習先。

因為當時我仲未掌握到平貴的計算法，所以有此一問。

龔成老師︰

其實，我係地係決定買入一隻股時，會考慮到佢質素、當時平貴水平、是否適合自己和組合配置等因素，去下決定。

但當買入後，我地著眼點，就會只放係質素和組合平衡性上。

創科實業（0669）有質素，有品牌，有銷售網絡，長遠有發展，這股值得長線投資。

但由於佢已佔你組合不少，個別企業和行業，不要佔組合15%和30%以上，否則會有過度集中性風險。

因此，就算現時係任何價格，你都應該開始分段沽出部份持股，去平衡這個風險。

此股現價已略貴，你已可以分段沽出部份持股。但緊記係分段，調整唔好一次過做，以減低股價波動造成之影響。

------------------------------------------------

Q22022：

早晨老師 18年開始學你投資理財...現已進賬了少許需然離目標還有很遠 不過會用長線投資方法繼續

現在月供緊 2800（$4000）0066（$3000）0012（$2000）

以上組合須要更改嗎？

另持有︰
700 700股
0066 1000股

現金150萬 希望等大跌市入貨 不過等了很久。本人和先生月入約70k 供樓11k 扣除所有開支月儲30k

我現金放在戶口用按揭戶口有2厘 但係好似有啲浪費 我想問如何令資產增值會快些？

另外700越跌越低 我平均價$601.5 應該繼續溝貨定可繼續持有 可否比些意見呀

龔成老師︰

你月供組合都可以，但以你們每月可以儲$30000計，建議再加大多少少月供供款，至每月$15000。

而新加資金，可以投入一些潛力股，去加大你個組合的增長潛力。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

現時大市只係合理水平，現金佔比重大約3-5成。餘下資金，就等大跌市出現，才加大力度掃貨。

雖然放係度等，好似浪費左一些投資時間。但由我地唔知幾時會出現機會，故必需保留一些流動性高的資產，去把握這些時間。

現時騰訊（0700）在合理區，你本身持資佔近組合全部，比重過高。就算再跌，你都唔好再加注，因為只會增加你過度集中性風險。

記住，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

------------------------------------------------

Q22023：

Hello啊Sir，其實我報左你股票班，不過都想盡早比你睇下我現有既Profile同埋我既諗法正確與否？

1. 我應將中國鐵塔換至港交所嗎？因為我見啊Sir你極力推薦。而如果本身我未有費，第一注應幾錢左右入呢？

2. 5月見比亞迪回落了不少，在$142左右開始月供，但現在又回升了，那我應該停止月供嗎？

3. 我目標每年額外投放$100萬至組合，我的策略應該是如何？

4. 阿里巴巴雖然已佔組合約12%，但我見潛力股黎講佢既值博率幾高，我應再在那個價位入市。

5. 福壽園我只得少量貨(佔組合3.01%左右)，我應在那個價位再加注呢？

6. 最後，就是啊Sir你覺得現有組合對於年紀30歲左右的我可以嗎？

問題多，麻煩哂啊Sir你

現有股票組合

優質股:
1. 煤氣x3,000@$14.5
2. 銀娛x1,000@$52.25
3. 港鐵x3,204@$38.93
4. 領展x2,137@$62.83
5. 金沙x5,322@$28.78
6. 盈富x2,[email protected]

-潛力股
1. 鐵塔x90,[email protected]
2. 小米x5,400@$25.89
3. 舜宇x600@$135.9
4. 雅生活x3,250@$31.92
5. 中生製藥x12,[email protected]
6. 福壽園x6,000@$7.67, 4.96%
7. 阿里巴巴[email protected]
8. 3067x4,900@$18.78

龔成老師︰

1) 港交所(0388)有質素，你預回多1,2成才到合理區頂，才可分注。而中國鐵塔(0788)都質素，但增長力就弱左，長線持有價值依然係有，只係無以往增長咁快。

如果你想部份，換至港交所(0388)係可以。但建議都保留部份，畢竟此股都係有投資價值。

2) 比亞迪(1211)現價略貴，如果你已經儲到一定貨，你可以停一停。但若果你持貨只有好少，你暫時可以照供，但只可小注。

3) 以現價計，大市算係合理區，你可以先將50萬，分注買入「平穏增長股」 + 「潛力股」。餘下一半，就等大跌市機會。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於「潛力股」係一定波動性，以你30歲計，大約佔組合5成左右。若你經驗較淺，只宜投資約3成比重。

你現時持股，過半數係「潛力股」類。因此，新資金應優先投入「平穏增長股」，去平衡翻個組合。

4) 阿里(9988)有質素，你預每回10-15%，就可以加注。但你要留意，再優質股票，都不可以過量持有(個別企業﹐不可超過組合15%)。否則，會有過度集中性風險。

5) 福壽園(14488)現價合理，可以加多少少。之後都是，每回10-15%就再加注。

6) 現有組合過於進取，因為潛力股佔比重偏高。當然，你還年輕，想進取點係可以，但你要明白當中風險。

最理想，潛力股係維持3-5成左右，會較穏當。

股票班見!

------------------------------------------------

Q22024：

老師，想問下京東物流同攜程。 呢2隻股票分別前者系43.3 買入， 後者是303.6買入。 兩隻都只是買了一手。 請問現價是否繼續持有？

本身睇好呢2隻股票，但買完就系咁跌。

是否未跌出5%就放番止蝕？

龔成老師︰

記住，不要用自己的買入價作為何時沽出的指標，也不要以回本後沽貨作為策略，同時，更加不要抱著「賺了多少就沽貨」這心態去投資。

坊間經常用買入價作為何時沽出的標指，這是極度錯誤的。沽出是基於這股已偏貴，又或沒有前景，質素有問題，而絕非由買入價決定。

因此，若你分析該企業的前景一般，就可沽出。

京東物流（2618）都有質素的。

京東物流係中國領先的技術驅動的供應鏈解決方案及物流服務商。通過科技賦能提供全方位的覆蓋各個業務領域的供應鏈解決方案和優質物流服務，從倉儲到配送，從製造端到終端客戶，涵蓋普通和特殊物品。

根據一些調查報告，按總收入計，這企業係中國最大的一體化供應鏈物流服務商。

2018、2019 及 2020 年，京東物流營收分別為人民幣 379 億元、人民幣 498 億元和人民幣 734 億元。

京東物流於 2018、2019 及 2020 年產生的虧損淨額分別為人民幣 28 億元，人民幣 22 億元及人民幣 40 億元，不過，如果扣除一些非現金流的開支，又未算太差。

佢表示，上市集資所得，部分將用於升級和擴展該企業的物流網絡；部分將用於開發與供應鏈解決方案和物流服務相關的先進技術。

企業有優勢的，長遠發展正面，但中短期股價未必有好強的表現，這股都有投資價值，但現階段未必值得大額投資。

攜程集團（9961）有質素。

佢係全球領先的一站式旅行平台，可提供一套完整的旅行產品、服務及差異化的旅行內容。

用戶可以通過平台進行任何類型的旅行預訂，從目的地內活動、週末短假及短途旅行，到跨境旅遊及商務旅遊。

產品及服務組合涵蓋經濟、高端、定制化及精品產品。集團經營一系列品牌，包括攜程(Ctrip)、去哪兒(Qunar)、Trip.com及天巡(Skyscanner)。

根據報告，以商品交易總額（或 GMV）口徑統計，佢係過去10年內一直為中國最大的在線旅行平台，近年更為全球最大的在線旅行平台。

財務數據方面，收入都有不差的增長，但盈利就比較波動，有時會出現虧損，反映企業仍處於投資期。

這企業有獨特性，長遠有投資價值，但估值難，未能確定這刻的平貴度。只可以話，潛力度是有的，但預期股價都會波動，因此投資要控制注碼。這股宜長線，等企業成長。

由於這2隻股票，你都係得1手。我建議你超長線持有，咁就可以。同時間，你要明白這2隻股票，都係有一定不確定性，若你資金唔算充裕的話，暫時不要考慮加注。

------------------------------------------------

Q22025：

老師，我在分析3 號煤氣，我留意到公司在2020 年的收入及毛利都比2019年高，但盈利就大幅下跌。

查看損益表及附註發現，對比2019 年，2020年在 " 投資（虧損）／收益淨額 " 一項有數目變化，而該變化是來自 "上市證券" 的虧損。

我想問:

1. 從何得知這些虧損及盈利是否一次性?

2. 有考慮有代表盈利時，是否不需要計算此項?

3. 在那裡可以看到 " 國際金融中心投資物業之重估減值" 的數值?

龔成老師︰

1) 其實這部份，是一些集團持有的金融工具，其帳面價值的變化。

這部份基本上，每年都係會出現，唔算係一次性因素。但由於當中部份只係帳面值變化(有點似物業重估)，故這個項目，不用睇得太重。

2) 對，要調整。

因為佢主要受市場影響，令佢每年數字都好波動。只要你拿較長期數據作參考，就可以將這個部份，對分析盈利所造成的偏差淡化。

3) 你將年報中(P.6-7)，"集團稅後溢利（未計集團所佔國際金融中心投資物業之重估減值）為港幣64億8千4百萬元" ，

減去"計入該投資物業重估減值後，本年度集團股東應佔稅後溢利為港幣60億零7百萬元"，就會知道大約個重估數字是多少。

------------------------------------------------

Q22026：

龔sir，你好！我最近看了你那本《財務自由行》，明白持有越多資產越有利，借取越多現金越有利，本人最近思考如何實踐。

本人情況：租住朋友一間三房物業，月租$7000，有一層第一城物業放租。雖然本人是銀行職員，尚未使用員工優惠，享用低息高貸款額。現在面對以下兩選擇：

1. 繼續租住朋友屋及放租第一城，但儲了很多現金，又沒有名額買第二層資產，但細單位升值潛力高，又可以盡快財務自由。

2. 賣出第一城，用公司員工優惠，買入更大單位自住，可實踐借取越多現金越有利，但大單位升值潛力較細。

謝謝龔sir

龔成老師︰

我較建議用方法1，因為香港買賣物業成本，都比較高。一來一回，會唔見左好多錢。而且，你現時朋友屋租金好平。可以為你節省更多現金流，去進行投資增值。

除非你個單位質素好差，租金回報率好弱，否則你照放租，用"以租養樓"的模式。

再用現有資金，去投資優質股增值，集中以股票，作為財富增值的核心。之後，如果日後有人名，才再思考怎樣用你員工優惠，去加入第二個物業，咁會較好。

------------------------------------------------

Q22027：

老師，想問問你對於保單融資的意見

龔成老師︰

保單融資，其實就係透過借貸，去以槓桿形式放大回報。相比傳統儲蓄保險，佢增長潛力會相對較大，同時風險會相對較高。

而且，回報和利率都係不保證。因此，最終回報未必是預期中咁理想，你要明白這個風險。

其實比較建議，"保險"只用作防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

------------------------------------------------

Q22028：

老師，A股隻002352順豐.買唔買得過？

龔成老師︰

順豐控股 (002352.SZ)為內地快遞物流綜合服務的提供商，主要提供倉儲管理、銷售預測、大數據分析和結算管理等綜合物流服務。

此股有質素，集團在內地有領先規模。在電商近年高速發展下，集團長遠發展正面。

但此股現價不平，過往佢股票波動都比較大。此股有投資價值，但現時值博率唔算高，同時要控制注碼。

------------------------------------------------

Q22029：

龔SIR, 你好呀,又要請教你供股既問題喇, 因為我老公唔識股票, 所以佢係每月比5K我供股, 我就幫佢供緊3K 2800 + 2K 66, 黎緊佢可以再加多3K, 呢3K放響邊類股票好呢?

我係用自己個中銀AC同佢一齊供既, 成個AC供緊既野如下,

2800 6K 我地一人一半
66 4K 我地一人一半
823 2K 我自己
1810 1.5K 我自己
1211 1.5K 我自己

佢果3K好唔好放去2隻科技股 , 每隻1.5呢? 你認為將佢放埋入1810 同1211好定再揀過2隻幫佢供會好D呢? THX

龔成老師︰

你現時計劃，已經係可以。

由於現大市只在合理區，你唔好每月全部儲蓄都動，要留有部份，等大跌市機會，才出手入平貨。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。

而盈富(2800)係不受此限，因為它是一個包含58間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

你現時組合，領展(0823)和港鐵(0066 - 算半隻地產股)都係地產相關行業，雖然都尚在合格水平，未有超過標準。

但未來有機會再加新股票，就要先避開地產相關行業，以免有過度集中性風險。

------------------------------------------------

Q22030：

龔成老師你好，我係你股票班舊生。小妹今年28歲，月入九萬可存6-6.5萬，有車，無家庭負擔。

3年前上完股票班開始投資，多數係月供股票以及少量低位買入。85萬成本賺左60萬左右，真係衷心多謝您。

有個問題想請教下。

較早前購入1750萬物業樓花（建期），套現左部分股票，支付左訂金，印花稅及律師樓雜費等，用左240萬。

樓花期2年，家人承諾會幫忙支付部分首期（還剩樓價40%）。我都希望在2年內盡量存錢，希望可以達到270-300萬，上會前分擔部分首期。

本身月供24k，分別係

12 @3000
27@3000
66@3000
788@2500

1177@2500
1810@2000
2388@3000
2800@5000

另外套現後宜家剩翻股票如下，大約63萬

66/691股 @42
590/1000股@16.7
788/15000股@1.17
1177/8500股@7.3
1211/2100股@41.5

美股15萬左右，現金35萬

想問下應該加大月供計畫金額，定係存現金好。

龔成老師︰

你現時持股和月供計劃，都係適合你的。

以你每月可儲6-6.5萬計，你應該再加大少少個月供金額，去到每月可儲資金一半。

假設投資回報有10%（連股息再投資），你每月投資$60000 + 現有資產(約115萬)，2年後大約會增值至280-290萬。

但問題是，2年係一個好短架時間。就算再優質的股票，中短期都會出現波動，影響你最終回報，你要明白這個風險。

因此，你加大的月供部份，我建議集中係收息股類。而餘下資金，除非大市有明顯回調，否則不要出手。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)

當然，如果你想再穏陣D，唔想2年後太多變數。這個新增月供部份，可以由收息股，更改為定期。同時間本身月供組合，都可以將部份股票轉為收息股。

但這樣，你個組合增長性，就會減弱左，你要從風險與回報間，取個平衡點。

------------------------------------------------

Q22031：

老師你好，自從認識到你的Facebook後，開始看你的書籍，了解自己的習慣，比較適合月供股票，目前31歲。

目前已經開始月供半年左右。在整個組合中，盈富4000 ，比亞迪3000 ，海螺3000 ，中電3000 ，騰訊3000 ，安踏2000。

1）個人希望以穩定為主，慢慢累積財富，少量投資增值股。目前組合需要調整嗎？符合我的年齡？

2）當中海螺水泥，目前虧損比較多，長遠水泥股發展老師的看法是如何？需要先暫停月供還是繼續？

謝謝老師指導。

龔成老師︰

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你31歲，應以增值為主。你現時月供組合，都係有質素的股票，大致都適合你年紀。

但有2點要留意，中電(0002)主要係收息，增長力唔高，唔係太適合你年紀。(當然，你想個組合穏陣少少，留佢係度都可以。)

比亞迪(1211)有質素，但現價略貴。暫時不宜月供太大注，最好暫時將供款，下調至$1500-2000，到佢回到$17X左右，才慢慢大加。

現時大市只在合理區，每月資金唔好盡用。最好留有部份，等大跌市出現時，可以用來掃貨。

2) 安徽海螺（0914）有質素，有增長力。

佢主要從事生產和銷售熟料和水泥製品，業務地區包括中國東部、南部、西部、中部及海外。而安徽海螺是水泥行業中，全球最大的單一品牌供應商。

水泥屬於基礎原材料行業，對建築行業有很高的依賴性，同時亦會與經濟增長速度有較高的相關性，特別與固定資產投資相關。即是說，當中國基建及房產市場不景，水泥行業會比一般行業處較大的不利狀態。

另外，水泥企業在生產過程中，燃料成本佔總生產成本中約佔了超過一半。若能源價格出現較大變動，就會對企業成本造成較大影響。因此，當能源價格出現較大上升時，將引致安徽海螺的成本增加，影響其中毛利。

綜合來講，佢擁有相當規模、生產能力，有一定的質素及賺錢能力，而水泥行業長期將因中國城鎮化以及一帶一路的建設，仍然會增長，但不會像過往般快速，而是進入較平穩的時期，在本質上此企業不差。

現價勉強合理的，但要留意盈利有潛在波動。

你要明白一個概念，我地持有一隻股票與否，關鍵位是企業質素、前景，不要被買入價(或者買入成本)影響。買入價只是一個心理因素，如果企業核心因素未被影響，我地係唔需要理，照持有就可以。

------------------------------------------------

Q22032：

龔成老師你好，本人剛結婚，現有有關買樓一事想請教。

我和老公三十頭，二人月入共十一萬、冇計劃要小朋友，打算過多十年移民外地。老公買左土瓜灣一手私樓自住(300呎)，打算日後過了禁售期再售出圖利。

我們現金約有一百萬，外幣一百萬(之前唔識投資，只會買外幣放銀行但冇息)。但其實賣出後我們還有自住需要，所以我在想以下那個方法比較好

1) 要否以我的名再買一層居屋/二手私樓自住，等待大約十年後移民外地前再賣出。如果買第二間，啟德跑道的一手樓花好定大圍二手居屋會易點升值呢?

2) 定係用買第二層樓的首期來投資股票會更好?但我們都不太懂買股

3) 定係現在用土瓜灣一手私樓換另一間大點的私樓會更有升值空間?

另外，我在$249買左1手9988, 你覺得現在@205可再買點嗎?謝謝老師

龔成老師︰

其實香港買賣物業成本唔細，加上你們之後都會移民(相信不會保留本地物業)。除非現有物業非常不適合你們需要，或者質素好差，長線計無乜升值能力，否則唔建議沽出換樓。

反而，你用現有資金，去買入一些優質股作增值，咁會較好。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你3X歲，應以增值為主，建議你用「平穏增長股」 + 「潛力股」作組合，去創造一個增值平台。

你可以用每月空閒資金，做月供股票。每月先用5成儲蓄做月供。其餘先儲起，用一邊月供一邊儲蓄的策略。

由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。

現時大市只是合理區，你現有萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

至於外幣，唔係一個好的增值渠道。貨幣係可以無限印制，長線只會一直貶值。除非你有明確用途，否則應換回港元，去做投資。

阿里巴巴(9988)適合你年紀，現價合理，加上和你上一注有一定距離，故現價加1注係可以。

------------------------------------------------

Q22033：

午安，龔成，經常有留意你頻道，所以入左小米和中生製藥，小米27時入了一萬股，中生製藥在8.6時入了三萬股，但一直唔明為什麼業績好，公司有潛力，

但股價一直下跌，這幾日還連續開八連陰，現在還有廿萬現金，應再補貨，後續應如何部署

龔成老師︰

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。

你唔好用股價升跌，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

你現時持有這2隻股票，都係有質素的潛力股。若你係年青至中年人士，這類潛力股，你照持有就可以。

但我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

未來時間，現分散投資多幾隻不同行業股票，去平衡風險。

現時大市只在合理區，未到好平，不宜盡用資金。餘下廿萬現金就先儲下，等大跌市動用。

------------------------------------------------

Q22034：

你好 龔成老師！由2018年開始幫家人（現時50歲）投資幾隻房產信托基金-主要收息 由於當時投資知識不足 所以組合比例分配的唔好

而且投資的幾隻現時都跌左好多 最近幾個月開始認真閲讀老師的幾本書同專頁 開始對股票組合有少少頭緒並作出調整 在此萬分感激老師！

有以下問題想請教老師︰

家人年紀約50 預計5-10年後退休，有醫療保險 強積金約50萬 ，現金30萬

現持有股票：

越秀房產信托基金 11000股 平均價$5.23
置富產業信托2000股 平均價$8.93
匯賢產業信托 23729股 平均價人民幣2.64
煤氣 1000股 $11.38
香港電訊 4000股 平均$10.82
粵海 4000股 平均$11.77

6月開始月供$3000盈富基金 $2000港鐵 $2000金沙

每月可儲現金$6000

1.請問以上組合比例適當嗎？有需要再調整嗎？

2.房產信托越秀同匯賢質素如何？ 應繼續持有或趁低增持嗎？ 因為87001 自疫情開始就跌近半 一直都上唔返去維持人民幣1.76左右 本來打算收息 但現時賺息蝕價

以往一直選擇以股代息增持 但現時擔心這股質素已改變 請問係暫時受大環境經濟影響定真係質素變差 唔會再上返去？

3.若果越秀上返買入價 應該賣出再增持置富嗎？

另外請問呢個年紀小注加入3067適合嗎？股價幾多係便宜至合理？

粵海 煤氣現價係合理區 到幾多先係便宜？
感激老師解答！

龔成老師︰

1) 以上月供組合和資金分配，都係可以。但這組合，不是用至退休。

由於你家人開始要為退休準備，你要慢慢將一些收息股，換入月供組合中。到退休時，收息股都應佔100%。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你現時房託和部份股票，都有超標情況。你要用新資金，慢慢將個比例拉翻平衡。

2) 匯賢產業信託（87001）雖然是不錯的房託，但這房託比其他房託有點特別，可長線持有收息的。

匯賢現時主要資產：包括於2011年收購的北京東方廣場之零售、寫字樓及服務式公寓業務；以及兩家酒店（北京東方君悅大酒店及瀋陽麗都索菲特酒店）。

加外有新增投資，於2015年才收購的重慶大都會東方廣場。

但要留意，根據北京市人民政府於2006年6月26日發出的國有土地使用證（京市東港澳臺國用（2006出）第10128號），該發展項目總土地面積為7萬7千平方米的土地使用權已授予北京東方廣場公司作綜合用途，到期日為2049年4月21日。

從整體及本質上，這房託是不錯的，適合長線投資。雖然有上述所講的潛在風險，但高股息率，可說能抵償當中風險，同時反映部分物業有「到期」因素。

簡單來說，就是佢的股價，會慢慢長期向下，因為有些資產會到期。不過，如果佢餘下的資產在這段時間增值，咁股價就不會向下。

簡單而言，越秀(0405)和匯賢(87001)都係可以持有。由於你目的係用來收息，你係唔洗太在意個股票變動。

3) 你可以將部份換碼，現價計置富(0778)值博率係高少少。同時間，你都可以將2隻股票比例，變得更平衡。

50歲以上，我唔建議買安碩恒生科技(3067)，因為波動性太大。若真係好想買，都係好小注好了。

粵海(0270)和煤氣(0003)現價合理，你預回多1,2成，才開始算係初步平宜區。

------------------------------------------------

Q22035：

老師您好:本人今年50, 因為做得唔開心, 所以打算辭職, 進入半退休。我持有:

1. 現金$400萬
2. 公積金$200萬
3. 股票$80萬, 包括:
a. 1398: 100000股
b. 808: 20000股
c. 435: 10000股
d. 0006: 2000股
e. 1038: 1000股

4. 自住物業: 未供完, 每月供5千。

除工行, 都係近排買入, 會再分注買入。

辭職後收入大減, 希望透過投資維持每月20-30K收入 (包括供樓支出)。

龔成老師︰

如果你希望8年後每月有2-3萬蚊現金流，以股息率6%計，你需要本金400-600萬。

以你現時資產規模，是可以做到你的目標。

現有持股，你長線持有就可以。你可以再將這$400萬現金，分成4部分。

第一部分投資收息股，你可以建立一個收息股組合，你可考慮港燈(2638)、香港電訊(6823)、工行(1398)、建行(0939)、置富(0778)、陽光(0435)等，大多有5%股息或以上(你可睇下我本《50穩健收息股》當中仲有好多)。

你可以用"分注"形式，慢慢儲貨。平均的投資這些股，除了可以得到穩健的收息收，同時可有效的分散風險。這部分可佔你財富$100萬-$200萬。這些股票唔洗理佢股價波動，只要一直持有收息就可以。

但由於工行(1398)已經佔你組合很大比重，暫時不要加注。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但要留意，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。另外，你亦可投資銀行低風險類的產品，你可自行到銀行了解下，總之是「低風險，持續現金流」的。

第四，持有現金，這可以為你的後盾，以備不時之選。同時可以等投資機會。

你可以將資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q22036：

龔sir 你好, 我今年31歲發覺自己儲錢好慢+投資初哥, 股票比例輸多 想請教你投資方法同&意見

我月入HKD20,000, 每月可儲HKD8,000左右

現持有以下資產

Cash :HKD85,000
股票 : 9988 (291.55買入) X 400 股
941 (48.5買入) X 500股
1928 (35.6買入) X 800股

Q1: 9988見你話佢潛力都大 但我好高位入左, 有需要止蝕/加注 由得佢擺住先 ?

Q2. 941 同1928 值得長期持有/加注/ 咩位就要放呢?

Q3. 小米可以入手嗎?

Q4. 另外, 想請教我呢個年齡有咩投資方法/組合可以儲錢有效率啲. 我見你推介供股為主

多謝您的解答

龔成老師︰

1) 阿里巴巴(9988)係有質素的潛力股，你買入價係貴左，但此股有增長潛力。當企業盈利上升，佢股價再回向上，你照長線持有就可以。

但由於佢已經佔你組合，一個好高架比重。就算股價再回調，你都唔好再加注。

2) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你31歲，應以增值為主，建議你用「平穏增長股」 + 「潛力股」作組合，去創造一個增值平台。

阿里巴巴(9988)和金沙(1928)都適合你，但中移動(0941)只係收息股，增長力好一般，唔適合你。但你只係有1手，照持有都得，就唔好再加注。

3) 小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價合理區頂位至略貴，小注分注可以，但唔好入得太急，預佢股價仍波動。回多1-2成更有投資值博率。或者月供都得。

4) 你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

目標係一些「平穏增長股」 + 「潛力股」，現在你每月先用5成儲蓄，即$4000做月供。其餘先儲起，用一邊月供一邊儲蓄的策略。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

大市現處於合理水平，那8.5萬現金和每月儲蓄，就等大跌市機會出現，才大力度掃貨，並長線投資。

------------------------------------------------

Q22037：

龔成老師你好！本人34歲，月入20000，月儲2500，因過往實在缺乏規劃理財，零投資經驗，單純地以為買了份儲蓄保險就足夠（供25年,每月1200），

於是便成為月光族了，因最近結識女朋友，當開始為未來籌劃時，實在十分旁惶，驚覺一切已太遲！想向你請教一下，如果我想3年內儲20萬，我該如何做呢？萬分感激！！

龔成老師︰

其實34歲，未算遲，只要你用正確方法去做財富增值，一樣可以有唔錯效果。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

其實"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

現時份儲蓄保險，若已供了一定時間，我建議你保留會較好。但就最好不要再加大這方面投入，以免拖低財富增長力度。

你34歲，應以增值為主，建議你用「平穏增長股」 + 「潛力股」作組合，去創造一個增值平台。

由於你係初學者，對企業估值，點去定平貴未必太了解。我建議你先利用月供模式，去建立一個股票組合，以減低買貴貨風險。

現在你每月先用$1500做月供，其餘$1000先儲起，用一邊月供一邊儲蓄的策略。

餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

我假設投資回報有10%（連股息再投資），你每月投資$2500，3年後大約會增值至10萬。故要達成目標，你最少要加大供款1倍。

而且3年唔係一個長時間，最終回報有機會受股市波動所影響，你要明白這個風險。

------------------------------------------------

Q22038：

老師你好,本人現在收入不穩定, 有大概九萬幾現金, 市值十一萬港股加美股.另外有一小型saving account, 再加五萬六左右在基金投資.

現在有一創富難題:

想盡快儲首期買到一層650萬或以下的樓來投資

如果想創造穩定被動收入來供樓, 唔駛驚自己收入唔穩定供唔到樓.

老師你會有甚麼建議?正在閱讀"80後"中不過還是想麻煩老師你, 真不好意思

龔成老師︰

有兩個方向，第一，你將物業出租，利用租金去供樓，但如果你造高成數按揭，有機會租金少過供款，就會出現負現金流，因此，如果你想較有保障，就不能以高按揭成數去進行這動作。

當然，這就要求你有較多首期，因此，你要在這方面，自己取平衡。

第二，如果你想創造被動收入去供樓，你只要將投資一些收息股，用佢地去創造現金流，咁就可以。

假設你每月要有2萬蚊現金流，以股息率6%計，你需要本金400萬。因此，你現時重點，就係要去累積這400萬。

但一般我地會建議讀者，運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

若你係年青至中年人的話，你現時應把握時間優勢，先做財富增值部份。除非你預買樓時，你年紀都已較近退休之年，你才好考慮原先被動收入的計劃。

至於儲置業資金，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有9萬資金和每月所儲倒的資金，就等大市出現一定程度的下跌，才大力度掃貨，然後長線投資。

至於基金，你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年)。

如果整體係優於大市，你都可以投資。

------------------------------------------------

Q22039：

龔成，我想請教一下怎樣實現財務自由，夫婦二人打算明年帶小朋友移居英國。丈夫現已辭去工作，本人兼職收入約每月$8000，每月開資約兩萬。

打算用400萬元在英置業後，餘下資產應該投資甚麼可以製造每月30,000元的現金流呢？

資產：

香港有3個物業：

1.銀行估價480萬元，打算明年賣出用來購英國物業，現每月收租$13000)

2. 市場價約330萬，沒有按揭，現奶奶及老爺收租作生活費。

3. 市場價約330萬，有100萬按揭，收租可cover 供樓費用。

強積金：夫婦共100萬元（移居5年後獲取）

儲蓄保險：24萬本金

藝術品投資 : 現時價值大概 80萬

流動現金: $50萬

虛擬貨幣: $5萬

月供基金: 現價值約40萬，上月已提取其中20萬作為流動現金，並已申請延期供款，餘下20萬會滾存到20年後方可再次提取。

龔成老師︰

若你希望移居英國後，每月有3萬蚊現金流，以股息率6%計，你需要本金600萬。

你可以考慮將部份資產賣出，再轉換成收息股，去創造這筆現金流。例如部分原本無現金流類別的項目如藝術品投資，以及剩餘現金。

收息股︰你可考慮港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

但由於英國對股息，係會收取一定稅項，故實際回報會係低少少，你要自己了解翻。

英國稅制比香港複雜，你最好了解清楚。要沽出的資產，就盡早處理，以免受英國稅項影響，令你資產價值被打上折扣。

另外，你移居到一個新地方，生活不確定會大增。建議係投資同時，都留有一定現金，以備不時之需。

------------------------------------------------

Q22040：

龔SIR, 可不可以對我的股票 portfolio 比些意見? 以下大概總值三百多萬, 應該繼續持有, 還是套現買樓?

股票#(買入價)
3988 (3.20)
6 (42.7)
8(4.22)
883 (8.2)
17 (36)

19 (40)
1113(41)
1044 (55.5)
308(1.23)
52(17.)
175(29)

THANKS!

龔成老師︰

你現時持股，質素上都可以，算係一個平穏增長組合。若你係較中年人士，算適合。

香港中旅（0308）、中海油(0883)質素較中等，不宜持有太多。

若你係較年青人士，我建議你加入一些潛力股，去增升組合的增長能力。

潛力股：安碩恒生科技(3067)、阿里（9988）、 騰訊（0700）、港交所（0388）、舜宇光學（2382）、小米（1810）、中生製藥（1177）、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

至於是否置業，要睇你本身有無實際需要。若係自住樓，你可以套現，但緊記要嚴守"供得起"這個大原則。另外，在置業同時，必須確定尚有一定股票，可以保持增值，以免成個財富組合，偏重晒係物業上。

若你置業目的係為左投資，我就唔太建議。因為現時租金回報率，唔算好高。相比股市，值博率係較低。故暫時將資金投資優質股，會較好。

當然，你此期間找到旬盤，租金回報率高，升值潛力又唔錯，你都可以入市。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13421-Q13440）

Q13421：

你好~我兒子今年11歲, 數學較強,
請問有甚麼建議/方法/哪些可以提升他對理財/會計/各方面能力？

龔成老師：

首先是理財，要有量入為出，以及投資的概念（即是今天儲蓄後，只要合理投資，就會變成更多錢）。例如你可以鼓勵佢儲蓄，如果將錢存入一個你同佢自設的「基金」，你自己給予每月5%的回報比佢，以作鼓勵。等佢明白儲蓄，投資，回報等的概念。

另外，你可以鼓勵一下去作小生意，從興趣及簡單的事做起就得，會學到好多野的。我小生低年級，已自己執BB彈賣，小學高年級，已炒閃卡。

另外，你可以同佢玩一大富翁、富爸爸這類紙版遊戲，都可以提升相關知識的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13422：

hi 老師，我想請教下你點睇498，我當時差唔多0.2 買入，宜家已經0.086了，我應該賣出定再等？謝謝

龔成老師：

我地繼續持有一隻股票與否，關鍵位不是買入價，而是企業的質素、前景。

保華集團（0498）業務規模細，盈利不穩，有時會出現虧損，對投資這類股，有保留。相信佢上翻去的機會不高，建議在有較大的反彈後賣出。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13423：

老師，睇左你把握黃金10年條片，好正 想問咩情況會做到10%回報，月供股票?

好似好難甘

龔成老師：

要保證有10%，當然不易，但如果我地睇翻股票這工具，在過往多年的回報，就發現原來都做到。

恆指過往50年，升幅連股息的回報，每年平均有14%，當然，近年有所減弱，但如果我地以長期計，預期有8%-10%都是有可能的。而你只需要投資盈富（2800）就得。

如果你有選股的技巧，投資比大市更高回報的股票，要去到12%-15%都是有可能的，但這一定要經過學習。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13424：

咁請問可以點樣去搵優質股？

我仲係好新，淨係知睇cash flow, 睇debt 同埋你之前講嘅睇5 年management report 去睇嗰管理層

龔成老師：

我會用一些「選股方法」，去從全港2000間上市公司中，找到有質素的股票，你上述所講的，都是一些指標，但這並不是唯一的指標。

在我的股票班中，會教5種選股方法，教你有系統去選優質股，教幾種選股方法的原因，是希望以不同的角度去找出有質素的股票。另外，課堂會派一個叫「企業評估表」，6頁紙，會助你一步步分析到一間企業的優質度。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13425：

龔成老師你好，學習了一陣子，月供組合得出以下投資組合，想看看是否合理可行：

1211比亞迪 500
1137香港電視 500
3690 美團 1000
2822南方a50 1000
823領展1000
66港鐵1000
12 恆基1000

美股etf voo 約3000hkd

25歲，月薪18000
月儲12000~13000 每月總共投資9000元 儲現金3-4000

在設置投資組合該如何作行業分配，和投資金額和現金比例應該是多少？

另外，恆指回落到24000是否就是現時最佳入貨增持時機？謝謝你

龔成老師：

你25歲，上述的組合不錯，可以進行，因為當中有平穩增長，以及有潛力，因此適合你，而金額分配都合適。

只要你每一隻的金額不多，因此，你要預供一段較長的時間，才能儲到一定的數量。如果你本身打算長供，就無問題。

至於投資與留現金的比例，我地其中一個因素會睇翻大市的平貴情況，以現時的恆指計，大約處合理水平，因此可以一半投資，一半留現金等機會。如果到了24000，初步會確認進入平宜區，到時就可動用之前留下來的現金掃貨。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13426：

龔成老師您好!本人32歲，丈夫33歲，平均月入5萬左右，BB剛出生，正租住1.1萬2百幾呎單位，抽左幾次居屋都抽不中，想2年內上到車。

手上有50萬定期存款，30萬現金，
50萬作投資用途，包括：

13000股659 平均價17.5買入
10000股1929 平均價 7.2買入
1100股1336 平均價 32.5買入

就這樣，不知道下一步應該怎麼做才可以儘快達到上車的目標？

龔成老師：

要提翻你，雖然你想盡快上車，但財不入急門，投資好講求你的理性，心急是好危險的投資心態。另外，我地投資股票就是買企業，而企業增長要時間，因此，我地一般都會用較長時間去期待財富增值。

因此，我會建議你留有一定的現金，餘下部分才用作投資，加上你想增值的時間不算長，因此不能投資潛力股，只適合投資平穩增長類別。

再講翻你的投資組合，雖然都有質素，但你持貨太多，有集中風險出現，因此，不建議你再增持這些股，甚至在股價上升後，如某些股持貨太多就要減持。

建議你將現時的現金，部分投資平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。但一定要同時留有現金。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13427：

Hello, 成哥~
其實１年前我在信箱問您時只得３７萬資產，　但１４個月過後，努力儲錢終於有５７萬啦～先多謝你！

今次想繼續請教您，現時快30歲, 我每月可儲1萬蚊
股票數量:

中銀有4000股,買入平均價4.1
比亞迪股份有100股,買入平均價41.9250
比亞迪電子有500股, 買入平均價7.81
新天綠色能源1000股, 買入平均價2.06
港交所有200股, 買入平均價250
莎莎有4000股, 買入平均價2.5850
中國生物製藥有1000股, 買入平均價7.52
唐宫中國有4000股, 買入平均價1.37
騰訊有100股買入平均價398
以上總值約18萬，　以上的股票有什麼建議呢？

我想請教, 如果想在未來2年內可儲到100萬是應該什樣安排呢?

還有, 因為我是銀行員工, 看見樓市也微降了少許, 還是理用這員工優惠上車呢?
謝謝 您的回覆;）

龔成老師：

上述你持有的，都是有質素的股票，可以繼續持有。

你係銀行員工，你可利用這方面的優勢，因此，投資物業的確是一個方向。但我唔建議太心急，政席放寬按揭後，部分業主出現叫價過高的情況，樓市短期可能會升，但不建議心急投資。

因為最重要還要睇經濟基本面，如果中美貿戰同社會運動未解決，樓市終會向下，因此，你唔好心急進價，要見到跌先好買。

我相信樓市在長遠計，因供求關係，仍是向上多。

你這刻保持住股票增值，同時儲現金，之前的方向已行得正確，之後就睇樓市時機，同時評估下自己的置業能力與需要。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13428：

成哥
點睇最近示威而影響成個市既表現
再加上貿易戰

應唔應該放左部分既股票先
現時有3 同303 係手

龔成老師：

我地買股票就是買企業，香港的社會運動，對零售會有好大打擊，但如果該企業是有實力的，這些影響只是中短期，長遠仍是正面。

我地不會因這些情況而賣股票，反映會把握機會，若企業質素無變，而股價因中短期事件而有明顯下跌，這是好好的投資時機。

而你上述兩股，都有質素，你可以持有。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13429：

老師你好，睇到你提議後，我同先生已經開始月供股票（盈富+銀娛）另外，如果我地想將10萬現金再投資買優質股，應該點樣分配好呢？

因為我地都係初哥，未能完全掌握市況，所以想請老師幫忙

龔成老師：

由於你地是初哥，唔建議你地太心急投資，$10萬現金，宜大部分留現金，最多只動用$3萬，等你有較多投資經驗及知識時，才運用。

這$3萬你可考慮盈富（2800）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

總之，唔好心急，增加左知識，了解左股票先。我地買股票就是買企業，你要學懂了解上述的企業，然後先進行投資。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13430：

老師，請問你覺得早前個市為什麽會升好多，是否派貨，會不會昨日派銀行供股日還是大户出貨，個市見底未呢，我原本3号仔仲想等14元先買，現在又回升番，你覺得佢底位係幾多？

個市好似死頂，應跌唔跌，反而我驚佢中美講好數應升市時會開始大跌？

老師你覺得現時煤氣到底位未，現時又上又落，以試過跌穿15元以兩次？

龔成老師：

我唔建議你「分析市況」，中短期，股市的確由買賣供求因素而定，但這種供求以及背後的力量，我地好難分析，而強行分析亦不一定正確。

而長期的股價，一定會趨向企業價值，而我地只要集中投資優質股，長線進行就得。

至於煤氣（0003），有優質度的，但現時股價仍在合理區中上部，未到好平的水平，不過分注投資是可以的，而我地唔會估之後的走勢。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13431：

老師，我應該開美元定期戶口收息 可抵抗港元不穩?

823 置富 及中石化又如何 有息收
可投資作長期收息用?

現在26000 點可分注入 或月供?

龔成老師：

港幣有聯匯，根本唔需要擔心，所以持港幣無問題的。

領展（0823）股息率不並不算好高，但這股有增長能力。不過，如果你想集中收息，置富（0778）、中石化（0386）會較可取，現價都處於合理水平，你可以長線投資。

恆指26000，是一個合理水平，可以分注投資，不過，由於未到平宜區，因此投資不會太進取，要同時保留現金先得。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13432：

老師，本人現與家人同住，一直想買樓搬出去住，心儀將軍澳二房，約六百萬頭
之前政府推出新政府，八百萬以下可按九成

我想請教老師我以上情況應該何時入市買樓及借足九成嗎？

我與另一半月入近五萬，若買入 650 萬單位，月供約二萬三

如買入我擔心供款吃力及將來樓價跌變負資產
如不買我又擔心樓價繼續升將來買不到心儀單位

懇求老師賜教，謝謝！！

龔成老師：

我地所有野，都從需要與核心去分析。

首先，你長期是否有自住的需要？如果你本身自己無樓，長遠點都要搬出邱，又或日後有自己的家庭，有這需要的話，那即是「長遠點都要有地方住」，那麼，你就有自住的需要。

即是說，買樓自住是一個大方向，問題是買那些樓，幾時買，借多少。

另外就是負資產，如果你是自住的話，根本唔需要擔心，因為你買入後，樓價升跌與你的關係不是最核心。最重要是你「供得起」，只要你每月都準時供樓，還到，這根本就無問題。

因此，你的重點不是「之後的樓價升跌」，而是現價是否合理，你是否「供得起」。

我唔建議太強行去買樓，寧願你買細一點，日後有需要再換樓，都唔建議去得太盡。借9成不是問題，永遠都是分析「是否供得起」。

另外，之前政府放寬按揭後，有些業主開價進取，你唔好太高追貨，要合理價。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13433：

老師，我除左之前既月供（盈富$2500，地鐵$2000，比亞迪$1500），我暫時有四萬可以投資。

長遠黎講邊隻股會比較適合我單親而將來可以作為小朋友既教育基金咁

或者你會建議如果將來我有多餘錢應該投資邊隻股票，同埋可唔可以話埋我知個合理股價係幾多，萬分感激

因為我miss左$36既恆基

龔成老師：

我地進行理財，是一個長期的過程，你唔需要太過心急。

現時你月供的股票，已經是一個不錯的組合，你只需要長期月供就得，現時持有的$4萬，就作「等待投資的作用」，唔好心急入貨，真的跌先入，錯過機會都無所謂的。

如果要為小朋友作基金，我會建議投資ETF，例如盈富（2800）、領航標普五百（3140），因為當中有一定的分散風險能力，點都會較好，有長線投資價值

盈富現時處合理區，領航標普處合理區中上部，都可以分注投資的。另外恆基（0012）都是可投資的股票，現價仍是合理價，分注投資無問題。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13434：

龔成老師，假設層樓480萬，如果做6成或5成按揭，分別要月供多少？我成日都唔識計

龔成老師：

如果要計算每月還款，你可以上一些銀行網，尋找「每月供款額」，你就可以自動計算得到。

如果$480萬，借5成，即是借$240萬，假設3%，30年。每月就要還$10100。

如果改為借6成，休$288萬，每月就要還$12100。

如果你首期有$200萬以上，可選擇的物業是多的，因為政府放寬左，但你最重要都是計翻自己「預算的樓價」，以及自己「可付擔的供款額」。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13435：

老師，想請教下
而家買樓收租仲有投資價值嗎？
如有，你較睇好邊區？
單棟樓定大屋苑呀？

同埋，你覺得租金回報幾多先叫合理呀？

龔成老師：

現時的物業投資價值，唔算好高，我會寧願將資金投放到股票市場，回報會更高，不過，若樓價下跌就不同。

不過，現時的物業，仍有自住的價值，因為香港樓長遠仍然供應不足。

我會睇好供應少的地區，例如港島南區、中西區。

如果你較有投資實力，可投資單棟樓，因為只要你有技巧，可以買到平野，而大型屋苑則價格會較為市價。一般來說，除非單棟樓可以買到較平的貨，否則，投資大型屋苑較穩陣。

現時的租金回報率，起碼要去到3%先叫合理翻D。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13436：

龔sir 你好！恒生0011 及 中銀香港2388皆為優質銀行股, 都有平穩增長的能力。

但如果以長期月供收息為主, 你建議選邊一隻較好?為什麼?謝謝!

龔成老師：

如果要講本地銀行股，上述兩隻算是質素最好的。

如果要集中收息，恆生（0011）會比較好的，因為佢無論在業務上，以及派息上，都有相當的穩定性，因此投資這股作收息會比較好。

至於中銀（2388），長遠增長力會較強，因為始終是發鈔銀行，同時有背景，如果中港有人民幣相關野推比香港，佢會有獨特地位而受惠。

不過，中銀面對香港的社會運動，中短期股價會比較弱但長遠的投資價值仍在。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13437：

老師想問下 點睇8473 佢計劃將於主板上市 介時股價應該會上漲 依家入手值博率高？

龔成老師：

彌明生活百貨（8473）業務不差，發展能力仍在，但就不是高增長的類別，佢轉去主版的所謂利好因素，其實已經在股價反映左，因此，佢唔會因正式到時轉版，而有特別的驚喜。

以佢現時的經營情況，算是合理價，投資可以，但這股始終規模不大，存有風險，因此不建議太大注。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13438：

老師，有興趣買長建（1038），但見佢跌左好多，是否有什麼不利因素？現在還是優質股嗎？

龔成老師

長建（1038）近年受歐洲經濟、英國脫歐等事件影響，唔少業務都比較弱，我相信佢中短期仍會較一般。不過，你見長和系近期仍在歐洲買資產，反映在長遠來說，這是一個不錯的投資期。

長建本質仍不差的，只是中短期較弱，仍有長線投資的價值。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13439：

老師你好，788之前出業績，盈利多賺了一倍，我想問市盈率要幾多先算合理，或者現時咩價錢先算合理？幾時先會出現高回報？

1573我後悔買左，點算？

龔成老師：

中國鐵塔（0788）有質素的，只是近期有少少炒概念，此刻唔能夠太進取。

這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。佢現時的收入正不斷增長，盈利都保持向上，但股本回報率不高，是這股較弱的地方。

這股最近是市場焦點，同時近期問答信箱好多人都問，我就知這刻有少少熱炒的情況，若分析佢市盈率，會見到現時仍然處好高水平，反映現時估值略貴。

南方能源（1573）是規模較小的公司，這類公司賬目有問題的機會的確較大，所以，當中不是無風險的，股價大跌後並無升翻，反映市場明白這股的風險，同時這股的確有點問題，令市場認為現時的股價較合理。

這類股你要小心，如果等多一段時間都無升翻，代表內裡可能有點問題，如果佔組合比例太多，要賣出部分先。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13440：

你好，1881重上2.4，是否要等一年半載？現時股價是否值得再買入？

另外，一個問題，想問下如何減低風險，將現有既投資組合重組，從而得到理想既2-5年回報（30-50%）？？

唔該哂
我想買啲會增長既股票，留意過中生製藥和日清食品，（仲有李寧、安踏、美團點評、碧桂園、雅生活、奧園健康、滔博和百威、360魯大師）佢地係咪算優質股？？

龔成老師︰

富豪產業信託（1881）有質素的，是不錯的收息股。但佢比其他房託，會波動少少，因為佢主要持有酒店物業。酒店業務會比較受外圍經濟及旅遊業影響，令價格較為波動。因此對比其他房託，當中的風險會高少少。

當外圍環境轉好，香港社會氣氛回復正常，股價會慢慢回升。現時此股有8%股息率以上，有投資價值的，現價合理，可分注入貨後長線持有。

至於你的組合我簡單咁講，你所選的股票之中中生（1177）、安踏體育（2020）、李寧（2331）和雅生活服務（3319）較有長線投資價值。而你投資目標，定為5年回報50%會較合理，除了這4隻也可以考慮我以下的股票組合。

留恴番現時股市只在合理區，入貨必需要分注。

平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（823）、港交所（388）

潛力股︰比亞迪（1211）或福壽園（1448）

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。