專一測試器（下）
　　
上集：https://bit.ly/3aNgo2o
　　
為咗搵到阿輝嘅出軌電話，我不斷試探佢。

阿輝都感受到我嘅懷疑，鬧咗我幾次。

我嘅立場係，如果佢真係咁誠實，真係冇出軌，怕咩畀晒啲嘢我知？

呢件事搞到我哋成日嘈交，見面嘅時光都變得好冷淡。

有時出街食飯，因為唔想嘈交，我哋成餐飯都唔多講嘢。
　　

「啱啱見到你同你男朋友食飯，你哋各自玩手機，好似望都冇望過對方咁……」發訊息嘅，係我嘅男同事Johnny。

有人見到呢件事，我忍唔住大吐苦水，話阿輝點樣對我冷淡、點樣同我嘈交，連10%嘅專一機率都講埋出嚟。

從嗰日起，我就日日同Johnny傾計。
　　

初時，我哋傾計嘅內容主要係圍繞阿輝，但日子耐咗，剩係傾我嘅感情事，又好似好冇禮貌咁。

我哋開始分享大家嘅生活，Johnny對我生活上嘅每個細節都好有興趣。

喺我唔開心嗰陣，佢會耐心陪伴我，工作上又經常關懷我。
　　

終於，有一晚我哋出嚟飲嘢，我飲醉咗，同Johnny發生咗關係。

我好愧疚，Johnny又好溫柔咁安慰我。

有咗第一次，就有第二次。

Johnny漸漸變成我嘅地下情人，但佢從來都唔會逼我同阿輝分手，佢話：「我願意等你。」
　　

我對阿輝都有感情，而且阿輝嘅條件更好，同佢一齊會有更美好嘅將來……

但紙係包唔住火，我仲未嚟得切作出選擇，阿輝就發現咗我同Johnny嘅姦情。

「分手啦八婆。」阿輝難以置信：「你日日查我有冇出軌，結果你畀帽我戴？」

我無言以對。

阿輝又問：「你嗰個咩『專一測試器』，又話你對我專一嘅機率係90%？我得10%，我都未出軌喎。」
　　

「你真係冇出過軌？」我忍唔住問：「我同你都分手啦，你講個真相畀我知，同我一齊咁耐，你有冇出過軌？」

「冇。」阿輝斬釘截鐵咁答。

見我一臉難以置信，阿輝嘆一口氣：「我以前真係好花心，冇乜道德觀念，我覺得有多幾個女朋友，好正常又好刺激。」
　　

我問：「後來你改好咗？」

「唔係，我嘅觀念冇變過。」阿輝搖搖頭：「花心要用好多心機同時間，我轉咗新工之後好忙，放假都寧願休息吓，咪冇再出軌。」

阿輝加多句：「你唔好成日掛住嗰個『專一機率』啦，你有90%機會專一，咪一樣出咗軌。」
　　

我呆咗。

諗番轉頭，我本身係一個好有底線嘅人，以前拍拖都冇出過軌。

呢一次，係同男朋友長期冷淡，加埋長時間嘅爭執，再加埋Johnny嘅耐心溫柔……無數個因素加埋，先釀成咗出軌嘅結果。

阿輝出軌嘅機率好高，但佢冇出軌；
我出軌嘅機率好低，但我出咗軌。
　　

人總係迷信機率，覺得機率可以最簡單直接咁反映到未來。

但每一件事都係獨立嘅，如果嗰件事要發生，就算理論上嘅機率再低，佢都會發生。

有時，我哋努力迴避一個惡劣嘅結局，

只會造成另一個更惡劣嘅結局。
　　
—完—
　　　
將專頁設定為「搶先看」/ "See first"，最新故仔馬上睇！
　　
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
　　
#短故 #短篇 #小說 #陳美濤 #廣東話 #粵語 #tomatochan #專一測試器

小說角色復仇記（下）
　　
上集：https://bit.ly/2QuFLuQ
　　
我就坐低慢慢思考，點樣幫佢哋每個人諗一個好結局。

點知諗咗兩日，嗰班主角再次出現，阿輝一拳打落我塊臉度，打到我成個跌低咗：「叫咗你寫，你就咩都唔寫，我嘅悲慘生活冇變過啊。」

我捂住流血嘅鼻，努力解釋：「我要慢慢思考，諗一個合邏輯嘅結局。」
　　

醜豪撇撇嘴：「邊個要你合邏輯啫，畀我哋開開心心咪得囉。」

「有事慢慢講，唔好打人。如果你寫唔到，我都唔會打你。」
祥仔扶起我，話鋒一轉：「不過，我親手殺咗我女朋友，將啲血塗到成屋都係，你知㗎，係你寫嘅。」

我忍唔住打咗個冷震。

然後，佢哋呢次嘅穿越夠鐘，再次消失咗。
　　

我撲到電腦前，馬上開始寫文。

每人一個好結局，實在太花時間，萬一我未寫完，佢哋又穿越過嚟，粒聲唔出就殺咗我，我咪好冤枉。

我把心一橫，乾脆寫一個故仔，話嗰班主角全部死晒，咁佢哋就冇得再嚟搵我啦。
　　

寫完之後，我惴惴不安，生怕嗰班人突然出現，將我打到變豬頭。

好彩，等咗一個月，佢哋都冇再出去。

我鬆一口氣，睇嚟我嘅計劃成功咗，佢哋落晒地獄，冇辦法再穿越過嚟。
　　

點知，一個月黑風高嘅晚上，我突然俾幾隻鬼嘈醒咗。

我睜開眼睛，確定佢哋真係冇腳嘅，我下意識大叫：「有鬼啊！」

帶頭嗰隻鬼問：「你都驚鬼㗎咩？你成日都寫鬼故。」

我呆一呆：「你哋都係我寫出嚟嘅？」
　　

佢哋七嘴八舌咁答：「我死咗之後，落咗地府穿膠花，做免費勞工。」

「我仲慘，我本來係死神嚟，後來俾機器取代咗，我失咗業，連條女都飛咗我。」

「最衰都係你，寫鬼故都寫到啲鬼咁不幸。」
　　

「呃，我……」我個腦急速運轉，正諗緊點答。

穿膠花鬼冷笑：「我知你諗緊乜，你想等我哋走咗，就寫番個故仔，寫死晒我哋丫嘛。」

「吓？」我有啲心虛。

穿膠花鬼話：「『受害主角聯盟』無啦啦落晒地獄，同我哋做咗朋友。我哋學識咗穿越嘅方法，仲知道你點樣對付佢哋。」

我啞口無言。
　　

「我已經聯絡咗幾個地府嘅朋友，一旦我哋任何一個遭遇厄運，或者突然消失。朋友就會永永遠遠纏住你，令你不得安寧。」
穿膠花鬼加多句：「我嘅朋友都唔係你筆下嘅角色，你冇辦法主宰佢哋嘅命運。」

唉，事到如今，我仲有咩辦法呢，我只想快啲擺脫佢哋。
　　

呢班鬼走咗之後，我馬上彈起身，開始寫小說。

呢篇小說好簡單，就係講我筆下嘅角色，無論係人定鬼，都收到一張天堂嘅邀請卡，佢哋同朋友道別後，開開心心咁上咗天堂。

至於天堂嘅生活係點呢，我都冇時間慢愎諗，我就寫「天堂嘅生活好幸福，係一種筆墨無法形容嘅幸福……」
　　

之後嘅日子，我更加不安。

到「受害主角聯盟」再出現喺我面前，我差啲嚇暈咗。

祥仔話：「唔駛驚，我哋係嚟多謝你㗎，我哋全部都上晒天堂啦。」

我問：「你哋喺天堂過得好幸福丫可？」

阿輝答：「幸福啊，天堂喎，梗係幸福啦。」

醜豪喃喃自語：「其實都係冇女人鍾意我……但天堂一定係好㗎嘛，肯定係我未領略到，果然係『筆墨無法形容嘅幸福』。」

祥仔就話：「唏，大家都幸福，你冇理由唔幸福嘅。」

結果，佢哋都講唔出，天堂有咩咁幸福，但佢哋都幾滿足。
　　

或者，有時我哋嘅「滿足」，未必係嗰件事真正滿足到自己嘅需要。

只不過，所有人都講，嗰件事應該令人滿足。

然後，我哋就開始說服自己，去覺得滿足。
　　
—完—
　　
將專頁設定為「搶先看」/ "See first"，最新故仔馬上睇！
　　
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
　　
#短故 #短篇 #小說 #陳美濤 #廣東話 #粵語 #tomatochan #小說角色復仇記

犬與犬（上）
　　
細個嗰陣，有冇人問過你，大個想做咩？

你有冇試過，對未來好迷茫，唔知自己會有咩結局？
　　

我從來都冇迷茫過，我由出世開始，就好清楚自己嘅未來。

我會成為，一碟食物。

我曾經問過阿媽，點解我哋要俾人類食？

「人類養我哋，就係為咗食啊，唔係邊有人餐餐餵我哋？」
阿媽一路食肉，一路嘆氣：「我哋食肉，亦都被食，好公平。」
　　

養殖場裡面，有一部大電視。

電視來來去去都係播嗰幾條片，一隻牛喺草原上食草，然後佢變成牛排；
一隻羊快樂地奔跑，然後佢變成羊肉鍋；一隻豬呼呼大睡，然後變成肥膩嘅豬肉……

我估，呢部電視喺養殖場嘅主人，專門擺喺度教育我哋，可以稱為「教育電視」。

目的係話畀我哋聽，所有動物都會被食，無論食草定食肉，無論努力定懶散，都逃唔過盤中餐嘅命運。
　　

我亦問過阿媽，我叫咩名。

阿媽答：「肉狗。」

「咁你叫咩名？」我又問。

阿媽都係答：「肉狗。」

我好不滿：「咁呢個根本唔係名，呢個只係我哋嘅……種族總稱。」

「咁你想叫咩名？」阿媽反問：「你覺得，人類用筷子夾起我哋嘅肉嗰陣，會有興趣知道，呢隻狗叫咩名？」
　　

我曾經問過：「點解我哋唔逃跑？」

「人人都食狗肉，即使逃跑成功，咪又係俾其他人食，仲要白白捱苦。」阿媽答。

我無言以對。

所有狗都無言以對，成個養殖場彌漫住一種氣氛：認命。
　　

直到有一日，我會稱之為「命運逆轉日」。

嗰日，我攤喺地下，百無聊賴，照常望住重覆又重覆嘅教育電視。

突然間，電視嘅畫面一黑，可能係接收器出咗問題。

畫面變成一個女人，好嚴肅咁講緊嘢：「歡迎收睇今日新聞報導……」
　　

「係人啊，人類啊！」好多狗被吸引住，議論紛紛：「點解突然有人類睇？」「佢係咪會變成人肉叉燒包？」

女人講咗一大堆我哋唔明嘅嘢，然後佢講：「昨日，一個非法狗隻養殖場被查封。據講，裡面嘅狗隻係養嚟食用嘅。
再次提醒大家，食用狗隻係違法嘅，如果大家遇到類似嘅情況，請從速報案。」
　　

所有狗都呆咗，群情憤慨：「違法，違法係咩意思？唔係所有人都食狗肉？」

「應該話，大部份人都唔食狗肉，我哋唔應該被食！」

「咁我哋應該做咩？」

「唔好諗咩『狗生目標』住，出咗去先講。」

「係喎，人類好似話，只要大家知道呢件事，呢度會被查封，我哋會被救出去。」
　　

點樣先可以話畀人類知？首先就要逃出呢度。

但呢度圍牆好高，加上如果唔見咗好多隻狗，養殖場嘅人好快會發現，將我哋捉番嚟。

經過商議後，我哋決定派出三隻狗，先用疊羅漢嘅方式送出去，諗辦法向人類求救，救埋剩低嘅親人。

嗰三隻狗就係最聰明嘅我，跑得最快嘅飛毛，同最強壯嘅大舊。

名都係啱啱改嘅，畢竟我哋唔再係食物，應該有個名。
　　

我哋跑啊跑，直到離荒僻嘅養殖場好遠，開始見到人煙，我哋先鬆一口氣。

城市裡面嘅人都好友善，仲有人畀剩飯剩菜我哋食。

但我哋點樣話畀人類聽，遠處有一個非法養殖場？

試過有好心人餵我哋，我哋就咬住佢嘅褲腳，想帶佢去養殖場，但佢跟我哋行咗幾步，就掉轉頭走咗。
　　

迷茫之際，我哋見到一隻狗，一隻俾人類用繩牽住嘅黑白狗。

我靈機一觸，雖然我哋唔識講人話，但呢隻狗明顯同人類關係密切，可唔可以請佢幫幫手呢？

飛毛身手靈敏，輕易地跟蹤到黑白狗嘅地址，並搵到一個狗洞鑽入去。

趁佢主人出咗門，我哋就入去搵黑白狗。
　　
下集：https://bit.ly/3cfkCgE
　　
將專頁設定為「搶先看」/ "See first"，最新故仔馬上睇！
　　
拯救咗地球，之後呢？：https://goo.gl/EVhESA
宿世蚊緣：http://bit.do/eSbbZ
　　
#短故 #短篇 #小說 #陳美濤 #廣東話 #粵語 #tomatochan #犬與犬