* 2019/08/02 (週五) 12:00上午 後浪的主義 Ian 姜濤 不時聽到香港樂壇已死這句話，但在說出口前，你會願意花多少時間去了解新世代歌手的歌曲再作定奪？姜濤及Ian（陳卓賢）去年憑ViuTv的《全民造星》選秀比賽節目奪得冠軍及亞軍，並以Mirror組合形式出道，旋即瘋魔萬千少女！一年過後，二人不約而同各自推出第一首個人單曲《一號種籽》及《二期大樓》，唱盡不一樣的少男情懷，為一潭死水的樂壇帶來全新氣象。 撰文：Anthony Cam｜攝影：ChaseK 化妝：Cori Wong@Annie G Chan Makeup Centre 髮型：Stone Cheng @private I salon 服飾：Dunhill、Diesel Mirror共有12個不同的成員，每次出來表演或宣傳都是人強馬壯。為着要宣傳新歌，姜濤及Ian頻頻碰面孖住出現，二人表示由最初的緊張已逐漸適應。向來較沉默寡言的姜濤主動說：「平時好少會輪到我講嘢，依家要迫自己講多啲，因為冇得避，依家適應咗啦，你唔覺得我講嘢多咗咩？」至於Ian則說：「都係唔習慣，呢個感覺好強烈，之前開音樂會變咗自己一個，以前臨出場前綵排，啲兄弟都會拍下背脊，等個心定啲，不過佢哋都有嚟睇。」過往印象中，姜濤與Anson Lo經常一起出現，密友形象深入民心，對此他表示：「因為大家鍾意嘅音樂比較似，多啲偈傾，但Mirror本身個個都好好傾，係一面鏡，所以夾邊個都反射無限嘅可能，哈哈！」 為事業寧放棄愛情 無獨有偶，姜濤及Ian的兩首主打歌均有一和二這兩個數字，不難令人聯想到背後隱藏的意思是否代表比賽名次。姜濤笑說：「我都有問過監製，可能真係因為我拎咗第一名，但係首歌係講男仔去追逐第一名，講番我出道經歷嘅事。」《一號種籽》講述男主角只顧打籃球追求名次，魚與熊掌難以兼得，忽略女朋友感受，最終分手收場。不知現實中的姜濤會如何取捨及取得平衡？「現實我暫時未有女朋友呢個困擾，依家起步階段真係唔好諗啦，好難兼顧！以後有一定嘅年紀先再諗，但現實中因為好多事放棄咗身邊嘅嘢，屋企人同朋友相處嘅時間都少咗好多，私人嘅時間都冇乜，但係有得到就會有犧牲。」 在過往比賽當中，姜濤都是擅於演繹國語歌或節奏較快的跳唱歌曲，但這次卻跳出固有框架，挑戰R&B曲風。「比賽嗰時要因應環境嘅因素，當時唔可以揀啲太冇競爭性嘅歌，但呢隻歌嘅R&B曲風，我自己就好鍾意，所以用新嘅曲風去演繹。」他更大呻錄歌甚有難度，故選擇在半夜錄歌。「凌晨嗰時好啱唱R&B，每次Ian喺11點收工我就開工，因為真係要一種聽完好放鬆嘅感覺，錄咗4、5次監製先至收貨。依家出街嘅Version係前一、兩日嘅，改到去演唱會嗰日仲改緊，覺得仲有啲嘢要加，改到出歌前一晚先聽到最終嘅版本。」 自己成為「一期大樓」 至於擁有一把靚聲的Ian，他的《二期大樓》有別於一般情情塔塔的大路情歌，而是勉勵人心，燃點溫暖的正能量歌曲。「我就好鍾意『人潮輪流轉，即使困倦要當一位正選』呢句歌詞，大家係咩環境都係不停替換，當我哋做緊呢行都係咁，如果唔努力啲就有其他人取代，所以有時做嘢就算幾攰都同自己講要頂住！」 Ian更大爆歌曲Demo原名叫《螺旋丸》，乃《火影忍者》主角漩渦鳴人的必殺技。「呢個係佢努力咗好耐先得到嘅招式，唔係與生俱來，唔似另一個好受歡迎嘅佐助有好特別嘅技能，好符合我默默耕耘嘅性格。人哋一打開個Spotlight多數唔會照住我，好似比賽咁從最後企到最前。」在現實城市中，一期與二期大樓向來互相緊扣，他認為自己就是當中的一期大樓，至於二期大樓就是他所重視的人和事，以及奮鬥的目標。「歌詞有提到好多個『你』字，人哋會覺得係溝女，講另一半。但我自己理解就唔係，可以理解為音樂，又或者係我嘅粉絲。因為一期大樓永遠都係二期大樓前面㗎啦，會為咗想桿衛嘅嘢企喺前面挺身而出。」 * 全力應援💪🏻 * 照片來源：metrodaliy https://www.metrodaily.hk/metro_news/%E5%BE%8C%E6%B5%AA%E7%9A%84%E4%B8%BB%E7%BE%A9-ian-%E5%A7%9C%E6%BF%A4/ * @keung_show * #全民造星 #99號 #姜濤 #心心手 #viutv #香港偶像 #keungshow * #keungshowhkfanclub