［金基德回顧展：慾海慈航/援交天使/Samaria］實趕客，但話知佢，自己想寫

1. TLDR：你地邊個冇罪嘅，就搵石頭掟佢吧！留意「石頭」係套戲嘅重點之一。今晚大館仲有一場7:30，仲有飛賣。去睇吧，雖然網上你都搵得到足本重溫嘅。順手講埋我一路嘅核心信念：戲係要成套咁睇的，正如書係要成本咁睇，否則你永遠都學唔到嗰種神髓，呢啲嘢全部要「浸」出嚟。你去睇Youtube睇都可以15分鐘知晒啲劇情有人解埋，但點解我要走出去睇多次？我唔識用Youtube？電影，同多嘢一樣，個神韻唔係懶人包，唔係fact，唔係橋段重點，而係你要用心感受。

2. Medium版就有埋相咁咯（https://lkdin.io/3VYo）

簡介劇情
簡評
詳細分析劇情—第一幕
詳細分析劇情—第二幕
詳細分析劇情—第三幕
套戲攞獎好合理
石頭 as a metaphor
最後講講金基德

3. 是咁的，我冇工返都仲好忙，況且而家好多時三四點先起身。但為咗重睇呢套戲（以前睇過一次），我都仲係星期六爬起身，極速在樓下用3分鐘食完碟海南雞飯，然後走出去灣仔睇呢套戲。可見金基德有相當大吸引力。

4. 留意呢套戲2004年，剛剛好係佢中期嘅作品，開始成熟，亦都係呢年佢在歐洲攞獎聲名大噪。金基德未必係好計算嘅導演（邊個話商業片先要計算？），但事後睇返，你睇到好啱啲評審口味，攞獎合理之極。

5. 呢套我相信亦係佢最出名嘅兩套戲之一，另一套當然後後來嘅《聖殤》，後期作品，隱居三年後復出嘅顛峰之作，亦係好啱評審口味，但我個人鍾意呢套《慾海慈航》多好多。

6. 兩套嘅共通點，都算係雅俗共賞，唔會好難明好古怪要好多演繹．兩套都畫到出晒腸，好適合文青用嚟示範咩叫「好電影」，有啲內容嘅電影（come on，唔係荷里活商業片嗰啲”message”．

簡介劇情

7. 順手一提，我覺得劇透係冇乜問題的，即使扭橋戲或推理劇都係。「好」嘅電影唔應該只係靠一條好橋，橋段人人有，但execution先難。好多戲知咗結局我都可以睇多次，即使係扭橋戲或推理劇，你都可以睇多次導演點佈局點誤導你點畀提示你。若果只係靠最尾一下扭橋，只係低手。

8. 講返，劇情不複雜，重要人物三個講晒。女一，女二，女一老豆。亦都係一個好典型嘅三幕劇（間場出埋title添，慌死你唔明，所以套戲唔難明）。

9. 第一幕：女一女二高中生，好友（兼戀人？），想儲錢去歐洲（我懷疑《過春天》就係抄佢，但當然爭好遠），於是女二下海，女一做中介人，女二全不覺得係苦差，但留意開場冇耐女二已經意外（？）跳樓死埋。

10. 第二幕：開始「金基德毀三觀」，女一明白女二苦心，繼承佢遺志，約返啲恩客出嚟，唔收錢仲畀返錢佢地！但然後畀老豆發現咗，老豆去搵返啲嫖客出嚟，打，鬧，殺。

第三幕：當年第一次睇覺得呢部份戲味爭啲，而家睇返發現呢部份先最重要！兩父女返鄉下，拜死鬼老母，最後都係冇開口講。老豆自首，完。

簡評

11. 之前睇過金基德早期啲嘅《收件人不明/打回頭的情書》，我有講話睇到仲係幾幼嫰，太多狗血（甚至有真狗血！），枝節多。去到呢套《慾海慈航》，就真係斬走晒啲無謂嘢，冇乜邊部份係多餘嘅。正如米開蘭基羅話頭，只係將唔屬於大衞像嘅嘢拎走，呢套《慾海慈航》真係做到去蕪存菁

12. 援交電影，我睇咗嘅都幾十套，拍埋你就睇到分野。金基德做到「不落俗套」。何謂俗套？正如啲人講，十分「TVB」嘅對白同情節，唔好笑，好多荷里活片港產片都係咁。金基德唔係獵奇，唔係賣弄色情（至少呢套唔係），甚至唔係探討社會問題（至少呢套冇乜），講嘅始終係佢最擅長嘅：人性，慾望，救贖，宗教，倫理，道德。

詳細分析劇情—第一幕

13. 角色同情節設定，都係相當精彩。固然你諗真啲，有啲劇情犯駁，唔合理，只係為咗推進故事，但瑕不掩瑜。

14. 先講女二，背景資料極少，屋企人或其他嘢完全冇提。套戲講到好白，一開頭女二已經講印度傳說有個妓女叫Vasumitra（亦係第一幕嘅名），男人同佢搞完就變虔誠佛教徒。女一話，咁都得？女二話，係呀，男人搞嘢時就好似嬰兒咁，渴望母親關愛，佢話由今日開始自己就係Vasumitra。講到明晒。

15. 留意兩個女仔都係新人（低成本嘛，況且演高中生），選角做得非常好，或者話導演指引得好。你見女二，就真係一個菩薩樣，慈祥咁笑住下海，普渡眾生，十分開心。雖然之前冇性經験，但對啲嫖客十分感恩，大家一齊分享人生，佢覺得自己做緊好嘅事，又有錢收可以實現去歐遊嘅夢想，做自己鍾意做嘅嘢，不知幾開心。

16. 呢度嘅對比，就係女一。女一家庭背景我地知道，喪母，老豆做警察，點睇都係慈父唔係獸父，日日車佢返學，冇虐待冇性侵，亦唔算過度管束，屋企環境亦唔差。對女一嚟講，性係污糟嘅（佢每次都要幫女二沖涼），啲男人係仆街嘅，只係佢實現去歐洲嘅手段，佢完全唔明女二做乜可以樂在其中，同啲嫖客分享人生，甚至叫埋一齊食飯，甚至鍾意埋個嫖客。但同時間，佢又只係坐享其成做中介人，從來唔會自己落場，只係自己好友女二去畀人搞，呢度你見到女一嘅虛偽。留意下女一嘅高傲，同女二一臉慈祥嘅對比。

17. 然後劇情發展落去，雖然劇情唔多合理，但你都知女二一定要死的，否則冇戲做。女二臨死前都想見返恩客，呀女一去搵恩客，恩客仲要叫女一畀佢上埋先制（初夜添喎）！真係十分之咁仆街抵死嘅橋段。呢套戲入面啲男人真係全部都面目可憎的。

18. 但當然，女二見唔到恩客就斷咗氣，去到呢度可以十分TVB。但呢套戲就安排女二絶對係含笑而終，菩薩聖母呀喂！女一完全唔明白。

詳細分析劇情—第二幕

19. 去到第二幕，更加離奇，但金基德並冇拍到獵奇（留意啲性交易嘅場面極少）。女一原本諗住燒咗本數薄，同埋啲錢，忘記過去。但佢諗返女二慈祥嘅遺容，忽然明白咗啲乜。呢度真係絶，但又唔令你覺得突兀。

20. 於是乎，女一就由一個原本覺得性交易好低賤嘅中產女仔，變成「菩薩二號」，約返晒啲舊客出嚟，同佢地做，甚至還返錢畀佢地！嫖客就固然係「仍難盡信我是這樣地無窮好運」，但亦都有拍到啲嫖客話終生都會幫佢地祈禱。於是乎女一就慢慢體會到女二嘅「使命」，繼承女二嘅遺志，嘩，生命影響生命呀，堅！不過我個人理解，與其話女一真係變成「菩薩二號」，我覺得佢係只係為咗故友/戀人。證據？佢原本應該係諗住約返晒數薄上面嘅人，就唔再做落去。

詳細分析劇情—第三幕

21. 你以為套戲拍性交易？唔係，去到呢度已經再冇性交易場面乜滯。然後就去到第三幕，冇錯係十分TVB的，差佬老豆嘢，在對面時鐘酒店望到自己個女（唔止，後來仲要 女一掉低數薄在草地畀佢執到，但成套戲拍得好你可以原諒呢啲嘢）。

22. 當然就係又迷惘又憤怒，「天呀我做錯乜點解你要咁對我由細到大我有乜冇比你？」（幸好都未咁TVB，冇呢啲對白，都話戲劇小說第一法則：show, don’t tell）．但佢始終十分愛個女，甚至冇當面踢爆（呢啲先符合東亞家庭倫理嘛），結果佢就將啲憤怒發泄在啲嫖客身上

23. 打後，就係見到佢變身正義使者，自己去執法，羞辱甚至打啲嫖客，甚至殺埋人。但你以為變成復仇電影？又唔係喎。 （呢類「你以為乜乜乜，又唔係」係金基德電影嘅特色之一，你可以話佢善於玩弄啲觀眾，其實係嘲笑啲俗套橋段）

24. 睇到呢度其實係乜？就係孤星淚（都係差佬添）。一路落去，老豆越嚟越迷失，到底自己係in what position，去判斷個女做嘅嘢啱定錯？去判斷啲嫖客啱定錯？呢個社會嘅道德係乜？自己細由到大學嘅嘢係咪錯　—呢個先係套戲嘅主題！

25. 所以，就有咗最後返鄉下嘅一幕，先係全套戲同其他俗套戲唔同嘅地方。留意並唔係返到去大家BBQ（有蕃薯！）四四六六講晒，最後大家都冇講出口。但，十分巧妙地，老豆知道個女其實已經長大，自己唔應該再指指點點，錯嘅可能係自己嘅價值觀。最後自首，獲得心靈嘅救贖。嘩。咪就係孤星淚！

套戲攞獎好合理

26. 頭先提過，套戲計算相當準確。留意返套戲2004年，互聯網大盛（但未有Facebook），「韓流」亦都成型，明顯地外國人好有興趣知韓國社會嘅嘢，何況學生妹援交係全球現象。金基德聰明在加入埋啲宗教隱喻，最後孤星淚式嘅劇情，仲有「石頭」嘅比喻（下一段講），呢啲都係歐洲評審會睇得明嘅嘢。加上套戲拍韓國女仔，但又好聰明咁冇賣弄色情或胴體，啱晒啲歐洲假道學鹹濕阿叔（我話嘅）。

石頭 as a metaphor

27. 扮文青嘅話，就必要要講「石頭」。呢個「你地邊個冇罪嘅，就搵石頭掟佢吧！」嘅比喻太明顯。另外留意，真正嘅石頭，在套戲入面至少仲出現咗三次。

28. 首先，女一老豆去阻止啲嫖客車震，就真係在遠處掟石（都話慌死你唔明！）。另外，亦有一幕見到佢原本想用石頭打死個嫖客，最後亦有一個真係咁做。

29. 但更重重要係去到尾段，神來之筆。兩父女回鄉祭亡母，中途老豆架車畀石頭頂住，開唔到車，搞唔掂，索性瞓著（冇錯，唔多合理嘅情節）。點知個女自己落車去搞，移開咗啲石頭。老豆醒返，發現，得喎，開到車了。正係呢幕，就係交代「個女已經畀你想像中懂事，你唔好再阻住地球轉」

30. 然後去到最後，以車為喻，老豆教個女開車，亦都係用畫好嘅石頭（！）舖條路畀佢開。亦都慌死你唔明，一語雙關講到白：「之後嘅路就你自己走落去啦」，然後去咗自首。遠處嘅女一想開車過嚟，但又畀泥阻住，但大家知道，個喻意就係以後嘅落佢自己走落去。

最後講講金基德

31. 最後講一講金基德，因為我都唔打算再寫多篇《聖殤》。點講呢？正如我舊文寫，金基德亦係屬於好「型」嘅嗰種創作者，係一個「作者風格」好強嘅導演，或者話，有嗰種「以文章做為戰鬥武器」嘅精神。即係你可以好討厭佢，但你好難忽視佢在。

32. 金基德此人，就已經係一個傳奇。相信都唔少人知，首先佢冇乜點讀過書，甚至係初中都未讀完，亦係真正嘅窮人家庭出身。所以你見其實佢拍好多低下階層嘅嘢（但呢套冇），亦都拍工業，拍宗教，全部係佢成長嘅寫照（所以《聖殤》係佢代表作，三樣有齊）。我亦都肯定，佢影響咗無數後來嘅導演。

33. 金基德嘅電影，真係「作者風」，就係賣佢一個，探討人性。後期啲戲有啲有明星，但反而有明星嘅戲唔得。佢都係要玩育成，演員任佢舞先得。

34. 除咗主題，佢嘅戲仲有一個好大嘅特色：平，同埋快。度劇本可能耐，但拍係極快，早年試過一日（！）拍完。即使係拎獎無數嘅《聖殤》，都係十日搞掂，聽聞用咗七十萬港紙咋。留意拍《聖殤》時佢已經係國際名導，大把資源，但都係咁搞掂，你嗰啲日夜話冇資源冇時間冇錢嘅，真係應該慚愧。拍戲係可以好平嘅。

35. 最後，少不免講佢嘅私德。咁其實都死撚埋，你鍾意咪去拉脫維亞或者韓國堀佢出嚟鞭屍。不過在我嚟講呢個不值得討論，我認為作品成就同個人，係完全分開嘅。頂多你可以話佢完全侮辱咗「大師」呢兩個字，但不能影響你對佢作品嘅評價。照計好簡單嘅邏輯啫，你未知佢啲衰嘢時，明明就話啲戲好好睇。咁點可能到你知咗佢啲嘢，就變得唔好睇？

36. 有朋友仲講笑，話會唔會會場有一大班女權L示威。事實？我見到好多青春少艾睇，幾靚的說。

＝＝＝＝＝＝＝＝＝＝＝＝＝＝
一週年！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

［我自信有日如願　縱使天高地厚　仍被我逆轉］ 放心，未死，亦冇人死。雖然人總有一死。我同學W（呢篇佢會出場）紀念冊嘅志願，係寫「過傳奇嘅一生」。我呢？好似係寫「發明時光機」。不過嗰時冇諗返去平安夜，做低我阿爺。佢傳唔傳奇我唔知，我亦未發明時光機。但邊個知呢？本文全無公共性，想發達想知多啲嘅唔使睇。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
告個急先：Ivan已被炒，已成失業人士。未訂嘅記得訂Patreon，積小成多呀。訂咗嘅可以考慮加碼（https://bityl.co/4Y0h）。 一星期至少出返六篇文．月頭訂最抵！月費80
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

1. 到底意難平，原本上星期五寫，等到今日先寫。不過都仲未係《被炒記2.0》，你當係序或者楔子。未見過啲書好多個楔子？甚至可能玩到《等待果陀》咁，最後果陀都冇出現—不，甚至佢出唔出現已經不重要。果陀只係一個推進劇情嘅工具，一個MacGuffin。可能《被炒記2.0》都係。

2. 講返，上星期五，2021年3月12日（記住呢個日子，伏線嚟的），係我在康宏嘅last day（＊）．午餐，在呢度食，我揀嘅。（晚飯？之前貼過啦，阿Sir請食飯，馬會嘛）

3. 一般嚟講，如果同朋友食，而我堅持去一個地方食，多數係幾強烈嘅理由。而通常唔係因為嘢食。出街食飯唔止係為食飯嘛。

4. 有乜特別？因為2019年3月18日（記住呢個日子，伏線嚟的），我地一行四人，又係在呢度食嘢。嗰日正係我返呢份工（即係，「上一份工」）嘅第一日。有始有終，開工食呢度，散水又食呢度。我個人就係咁無聊，正如我同隔離台陳公食飯（唔tag了）都揀返廿年前同佢去過嘅藝術中心。正如上星期四晚我都揀國際咖喱館，又有原因，另文講。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
5. 想講嘅係，友情。呼，冇計，老人家係賣呢啲。年青人講熱血，我地梗係講老火湯細水長流（同屙尿一樣）。

6. 一行四人，鋼琴家W君相識最久。有幾久？係喬治奧威爾嘅1984年。係喎，小學一年級同學，讀到中七都同一班（當然中途唔係年年都同一班）。L君，我都唔知係邊一年，但都係小學雞年代，小三小四咁上下？而家我都唔係好知佢撈乜，你當佢兼職補習天王，正職渣鑊鏟啦。最後一個，T君，佢比較重視私隱，所以我講少啲，sort of我嘅行家，中二識佢，1992年。即係呢班朋友，至少都識咗差不多30年

7. 我地仲要係同一間中學嘅。咁我中學唔係咩名校（「地區名校」即係唔係名校。正如「affordable luxury唔係luxury」「副學士唔係學士」「PTGF唔係GF」），但好歹我地都全部讀大學，港大中大添。唔止，四條友，五個Degree 四個Master 兩個Doctor添（至少，希望冇數漏）。當然你可以話「唔代表乜」嘅。隨你。但，係咪真係阿豬阿狗都讀到港大中大（其實都……係嘅）

8. 三十年，真係好久好久，特別係咁多嘢變咗，由小學或青春期，去到中學，公開試，大學，做嘢，結婚（全部結晒），生仔（佢地有小朋友，我冇）。你睇住我，我睇住你，大家都變咗好多。但似乎都係向好嘅方向變。

9. 特別係我。二三十年前，四個入面，最想自殺嘅應該係我，唔係我第一都第二。但而家我變咗好熱愛生命。當中經過好多嘢，但，並冇你想像中咁咩超然，唔係悟道，唔係因為埃汾太（都有部份係嘅），唔係因為宗教，或者小朋友。主要都係吃喝玩樂酒色財氣咁。咁多好嘢未食，咁多地方未去，邊捨得死？（OK，如果我話咁多好文未寫，好多好書未睇，咁多好戲未得閒睇，係咪即時有文化好多？其實又只係narrative，根本同一回事）

10. 我地並冇好似女仔咩四朵金花咁，甚至亦都冇成為梅菊蘭竹 粥飯麵飯。可能我記錯，但雖然同一間中學，我印象中，中學年代冇乜一齊活動。反而係做嘢返嚟後先多

11. 你話係咪好熟嘅朋友？就tricky．睇你用咩標準。必定係好重要嘅朋友，但，往往都係一年先見一兩次。甚至佢地三個結婚，都係得一個有請我—我呢？我酒都冇擺。

12. 但你懂的，男人嘅情義，就唔係呢種的。我估女仔會覺得好緊要，好姐妹四朵金花，轉流嫁（廢話，唔通一齊咩。我諗起經典嘅娛樂標題「李心潔下嫁彭氏兄弟」），點會缺席。但男人真係唔同。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
13. 對我嚟講，應該係最老土嘅，無友不如己者，幾個朋友都令我學曉好多嘢。鋼琴家W先生同我最早相識，小學雞年代同佢玩泥沙。我到而家都講，車，當年我同佢一齊學琴，我都唔使練琴都同佢咁上下—事實我當年從不練琴，全部都天才波 pseudo sight reading，應係有啲「天份」。但之後呢？天份is overrated，特別係我嗰啲都冇乜咁特別嘅天份。正如學校嘅數學成績，一般我都高過佢。但我係工匠，佢係藝術家。唔係講咩貼中題目識考試咁低層次（我似咁低層次？），但行家一出手咪知。拳王未必係最好打嗰個，但會係有紀律嗰個。其實我當年都冇乜，但比佢有。佢係考完試會早走嘅人，我係坐到尾將份卷用唔同方法做幾次做到最後一分鐘嘅人。比較遺憾，係後來佢在俄羅斯彈琴，咁啱我在英國讀緊Master，佢嚟咗，但我都冇好好招呼佢 —因為我係一個死線前趕論文嘅騎士。最後亦都冇去到莫斯科作客— 結果咁多年我都冇去過俄羅斯。佢？就當然俄文都識講。不過後來，佢在三亞（冇錯係海南島）開演奏會，我就真係有去聽啦。海天盛筵？咪玩啦，潮汕牛打邊爐咋。

14. 同學L嘅，我都唔知佢幾時由一個夾住本《地球的奧秘》（主要係為咗上我屋企睇鹹帶），同我講Linus Pauling 嘅科學家，變咗炒期指著Armani 嘅才俊。當然兩樣嘢冇乜矛盾，佢而家都仲同學生講Linus Pauling 的。不過我最記得，應該都係同佢在另一同學（不在此文中）屋企踢波。「屋企大到可以踢波？」，才不，居屋，四五百尺？但短橋窄馬，小球有小球玩法。咁細個廳我地（其實係我）仲可以斬角球，由佢插水式頭槌飛頂，打爛人地屋企嘢。仲有？仲有記得，小學雞乜乜數學比賽。喂好撚大件事，知唔知我地去邊度呀？去德望呀。喂！德望呀！（＊＊）你諗下個反差幾撚咁大！對於我地呢啲新界牛屎仔，好震憾架。仲要由屯門搞一大輪去到石峽尾再入去。比賽成績？我都唔記得，應該冇拎獎。而反正我只係做後備，居然有啲咁無聊嘅嘢。同學L，教曉我好多很無聊但真係要有人講我先著燈嘅嘢，例如「如何加價」之類。

15. 同學T嘅，佢最著緊私隱。所以不講太多。但，W君小學中學影響我最深，T君在我做嘢後影響我最深。對我嚟講佢係最有威嚴嘅角色，甚至你可以佛洛伊德地話我將青春期屋企冇老豆 冇阿哥嘅感情投射在佢身上（老豆冇死，離咗婚走咗啫）。佢就係嗰種Mentor嘅角色。對我嘅批評相當辛辣，但總會去到咁上下位又逗返住我，等我唔好反枱，或者意志消沉。呢度只係講幾句，但當中點拿掐個分寸，就係人情世故學問了。

16. 朋友之中，我最崇敬最拜服嘅，就係嗰啲一早行一條路，一早有一個想法，然後我最初唔信，最後自己都行埋嗰條路。呢啲朋友我就最崇敬。T同學正係呢種。仲有陳公，以及賴叔，其實都係（雖然兩個都後生過我，但學無前後）。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
17. 重點？真係冇乜重點。但嗰日食飯，唔知點解講開爬corporate ladder嘅遊戲，我話我玩咗咁多年，都係失敗嘅，好大可能呢餐飯，就預示住我離開中環（＊＊＊），告別十五至二十年嘅寫字樓生涯（睇你計唔計教書或做蕉行嗰時），冇得再做salaryman 個個月尾等paycheck到。T先生話，都唔算太差啦，休得過謙。的確係。

18. 我地講返，2019年3月嗰餐飯，我第一日返工。食完飯唔知做乜興起，咁啱之後幾日W先生在大會堂有個演奏會（而我係冇去嘅）。唔知邊個講起，佢話去試下個琴，我地就順便一齊去，仲等佢即席彈返兩首歌。

19. 對，成件事有啲輕描淡寫。但，首先你要有個開演奏會漑朋友。另外你幾條友仲要係可以食完飯都唔返公司走去大會堂聽人彈琴。仲要係即興，幻想即興曲（放心，佢當然唔係彈蕭邦），如果一早約實就冇晒個意思。就係即興，大家可以去咁樣，聽返兩首，洗滌下心靈，之後先再返司，而唔使望住14:00返公司打卡。

最後呢個小故事作結：

20. 我記得細個睇蘋果日報左丁山寫《GG細語》，專欄名點嚟？係佢飲咖啡嘅餐廳。但佢篇文有講，呢啲就只適用於啲可以辦公時間鼠出去飲咖啡嘅人。嗰時覺得有啲串，又幾型。事隔多年，不經不覺我都變成可以鼠出去飲咖啡嘅人，但結果我有次係鼠咗去新城做節目，然後我就當面同左丁山講返呢個故事！後來仲在佢專欄出現過。正如細個我睇鬼報，見到有Appointment一版，見到啲鬼頭轉工會見報，覺得巧有型。後來？我見工都轉咗報。「其實唔難」「最緊要你同記者friend，嗰日又冇乜新聞」。嗰時都覺得係quite something

21. 而家？我就真係幾點起身 幾點食飯都冇人理了，恨到啦。不過：

最美一幕　還未閉幕　最闊的路在塵世遠方

22. 我記得伍晃榮本書有講，當年電視台有個鬼頭過左身，但佢生前一早安排咗，畀低咗舊錢。佢嘅遺願就係大家送走佢後大家去返平時去開間酒樓，照樣食飯打牌就得了。

23. 我諗，我都係咁安排。我死咗你地就去打邊爐啦。（放心，冇事，但及早諗定都好）

（＊）嚴格嚟講3月13日先係，但星期六。當然康宏作為一間企業管治咁出色嘅企業，係有計埋最後一日糧畀我嘅。真係多撚謝。搵篇文再講

（＊＊）後來嘅「50萬空姐」，全名「50萬開琴行空姐」，正係讀德望嘅。Another Story．但，誰不愛空姐呢？

（＊＊＊）「中環」as a metaphor，上環都可以係中環，灣仔都可以係中環。MK見工都可以係中環。

＝＝＝＝＝＝＝＝＝＝＝＝＝＝
2021比別人知得多。subscribe now。Ivan Patreon，港美市場評點，專題號外，每日一圖，好文推介。每星期6篇，月費80，半年已1400人訂！（https://bityl.co/4Y0h）。 年費仲有85折

食過好幾次 Sun Thai Restaurant 新泰東南亞餐廳 , 原來灣仔店係更加正!!
#新泰東南亞餐廳 菜式選擇多, 一般普遍泰菜都有, 私心推介幾款比大家~~~
.
【無骨鳳爪沙律】HK$68
冷盤無骨鳳爪連軟筋很爽脆, 整個沙律酸味味, 令人愈食愈開胃。✨
.
【鴨肉生菜包】HK$78
🦆鴨肉碎keep到肉汁食落唔會太乾身, 跟泰式香料炒起, 辣辣地又香口, 新鮮生菜片包住食, 不但中和辣度, 更增添清新感。
.
【海南雞半隻】HK$128
🐔無骨海南雞肉質超嫩滑, 點上兩款醬汁, 味道更提升更帶出鮮雞味, 推介!✨✨👍🏻👍🏻👍🏻
.
【日本南瓜焗海鮮飯】HK$118
南瓜盅內放入了海鮮飯, 海鮮包括有爽口蝦球、魷魚、青口, 炒飯底, 飯粒粒粒分明,
南瓜汁加入左些少芝士, 個汁撈起後, 飯質變得濕潤, 配上口感好林嘅粒粒南瓜肉, 每啖都食到南瓜嘅清甜。 😋
.
【原個椰青大菜糕】HK$68
以椰青汁做大菜糕, 味道清甜, 同時又食到片片嘅爽脆椰青肉, 呢個甜品能體現出椰青嘅精髓, 正!😍😍
.
📍新泰東南亞餐廳
灣仔大王東街21-23號興旺閣地下至2樓
星期一至日: 12:00 - 23:00
.
#hkfood #hkfoods #hkfoodie #foodie #hk #hongkong #hkblogger #香港 #香港人 #香港食評 #食評家 #香港美食 #美食推介 #美食分享 #疫下香港

疫情之下,有人搬大鋪,有人頂硬上
月有陰晴圓缺,店關店關亦常見
今次同大家介紹既係一間用心做美食既小店
唔洗上淘寶,唔洗去深水步 而家搬左去觀塘啦!
設有有幾個座位,亦設有外賣!
佢地本身係灣仔都做左一段長時間
係灣仔已經相當有名氣,可稱為隱世小店類別
投資要分散嘛!唔一定要食最出名既!
新店提供漢堡,意粉,招牌海南雞飯
仲有幾款唔同既小食,包括雞翼,椒鹽雞軟骨等
咁我地一於先黎介紹佢既皇牌芝士漢堡
漢堡扒比較上用上較多既肉位
食起上黎肉質唔會咁鬆散之餘
肉味亦非常突出,咬落去係肉汁,唔係油脂
加上沙律菜,番茄片,芝士,麵包底層都有煎香過
食既時候相當Juicy肉味足
可以稱得上係,本地漢堡界既頭3位!
芝士牛肉漢堡 $50,香草雞扒漢堡$43
和牛漢堡 $70
除了漢堡,意粉選擇亦相當多款式!
包括有卡邦尼,黑松露汁蝦仁,蒜香蜆肉
黑色既墨汁墨魚肉意粉,肉醬意粉等等
卡邦尼我諗應該係意粉最常食到既款式
人見人愛~汁唔會太多,剛好掛係每條意粉上
食落一樣香濃味美,仲有大量煙肉,份量岩岩好

呢度仲有老闆拿手既去骨海南雞飯
一客只要$33!!! 想加料都係半隻$70
佢同平時泰式個種完全唔同
唔係白切雞,係用秘製既湯底去浸過
本身已經浸到非常入味,就咁食已經非常好吃
份量仲比得多,無骨之餘,啖啖肉,好嫩滑
雞油飯香而不膩,無雪味,仲配埋豉油酸辣汁
33蚊超水準!!

每星期仲有唔同既餐湯選擇!
店面走簡約風格,門外左邊係等侯外賣區
推門可進堂食
簡約風格,不花巧,同老闆煮食態度一樣 用心去做食物!
餐牌 有六款漢堡 六款意粉
https://www.facebook.com/Spanglewith/
宜安街1-7號&恆安街4-10號
財利大廈地下F2鋪
電話 9127 6287
#意堡 #觀塘美食 #新餐廳 #小店 #和牛漢堡 #手工漢堡 #芝士牛肉漢堡
#意粉 #海南雞飯 #美食推介 #Spanglewith #宜安街
#hkblog #hkblogger #hkfood #hkfoodblog #hkblogger
#hkigfood #hkigfoodblog

海南雞飯一向很受香港人歡迎。五星級酒店的海南雞飯，用料高級，製作嚴謹，不用說也知有多好吃。不過，二三百元一客海南雞飯，卻不是人人吃得起。
其實近年坊間愈來愈多選擇，有本地薑又有過江龍，水準不錯，最重要是性價比高，任何時候只要想吃便吃。

海南雞公主
地址：上環摩利臣街10號宏基商業大廈地下8A號鋪
電話：3618 7818
營業時間：11:30am-8pm
詳情： http://bit.ly/2vk3VOu

由招牌到裝潢都叫人眼前一亮，擺明走年輕人路線，做外賣為主。老闆娘是港泰混血兒，樣子漂亮，說得一口流利廣東話。海南雞飯的包裝像便當，分量足夠。雞肉滑溜，伴麵豉醬汁吃，加倍開胃。


水門橋
地址：灣仔灣仔道148號地下
電話：從缺
營業時間：11:30am-7:30pm
詳情： http://bit.ly/2Q7owhp


由胡慧沖做代言人，專做泰式水門雞飯。只做外賣，不收現金。師傅在泰國學師，醬汁跟足當地做法，味比較辣，飯又挺身一些。可惜雞肉不夠滑，幸而醬汁加分。值得一讚上餐快，由買票到取餐只需一分鐘，趕時間不作他選。


天天海南雞飯
地址：銅鑼灣Fashion Walk京士頓街9號H2鋪
電話：3108 2180
營業時間：11:30am-10pm
詳情： http://bit.ly/2RdEYgl

新加坡過江龍，海南雞飯賣到街知巷聞。香港分店的環境有格調，坐得比新加坡的熟食市場舒適。由總店派師傅來港坐鎮，做法正宗，賣相吸引，餐具都靚過人。味道有保證，油飯香噴噴，貴一些都值得。

泰潮
地址：中環嘉咸街7號地鋪
電話：2488 4444
營業時間：11am-9pm
詳情： http://bit.ly/2QnClbg


連續八年都有米芝蓮推介，分店多，最近在中環插旗，不過位置較隱蔽，繁忙時間walk in都有位。主打雞飯，由泰籍師傅主理。飯有咬口，但不夠油香，幸而醬汁香濃搭夠。

海南雞專門店
地址：西灣河筲箕灣道57-87號太安樓地下A32B號鋪
電話：6124 4718
營業時間：11am-11pm
詳情： http://bit.ly/2F13H6a

這間小店的海南雞出名便宜，廿八蚊有交易，難怪日賣800碗，等閒排45分鐘。不過只設外賣。難得平唔等於無質素，跟足新加坡做法，由浸雞、煮飯到醬汁都很認真，值得捧場。由於生意太好，四年間已經擴充至三間店。

採訪：黎詠詩
攝影：《飲食男女》攝影組

===================================
立即Subscribe我哋YouTube頻道：http://bit.ly/2Mc1aZA (飲食男女)

新店食評，名家食譜，一App睇晒！
立即免費下載飲食男女App： http://onelink.to/etwapp

《飲食男女》Facebook：http://www.facebook.com/eatandtravel

飲食男女網站：http://etw.hk

Follow我哋Instagram，睇更多靚片靚相：http://bit.ly/2J4wWlC (@eat_travel_weekly)

呢間野我地2年前去食過佢既蟹黃飯，今次佢地推呢個優惠就梗係益我地食玩訓既大家?真係$68！痴線價！！$68一碗雖然唔係好大碗，但佢既海膽既真係鋪滿哂，足一板半?
另外佢個蟹黃鍋都真心推介☺蟹膏+咸蛋黃原來係咁夾～仲有串燒呀等等等，大家自己去試下啦～
*最好打左電話去book位先，因為佢座位唔算好多
**記住睇埋下面條款先去食呀
＝＝＝＝＝＝＝＝??餐廳資訊??‍♂＝＝＝＝＝＝＝＝
魂燒 (太子)
太子太子道西106號地下D舖
37021663

燒魂$68海膽丼
優惠細則：
1. 訂座時請提出預留$68海膽丼。
2. 2-3位可點算一客海膽丼；4-6位可點選兩客；7-9位可點選三客，如此類推。
3. 貴客需要點選多一款食品方可享用爆膽丼優惠
4. 燒魂保留一切最終決議權
＝＝＝＝＝＝??食玩訓資訊??‍♂＝＝＝＝＝＝
【#祖琪撐小店】西九龍食店大哂冷? 必試海南雞+喇沙
https://www.youtube.com/watch?v=ZxbHq9dVOWA
【#祖琪試食】試江若琳新店 正宗上海生煎皇后麵館??
https://www.youtube.com/watch?v=4_M7ulSOtbI
【＃祖琪撐小店】灣仔用心粥麵店 必試豬潤粥＋豬手麵?
https://www.youtube.com/watch?v=WNhASWXb5OE