【龔成問答信箱】（Q16581-Q16600）

Q16581：

龔sir 我想向你求助 我係2019 年股票班學生
首先 我想同你講聲對唔住 我無好好運用股份班既知識

講少少自己背景 我27歲 單身同屋企人住 搵40k 以前要還grant loan 同大洗 月光族 直到19 年我的起心肝儲錢 果年我大約儲左15 萬 同年我初初接觸股票 主要買正股 藍籌 加少少潛力股 印象中升到18 萬到

我個人比較急進 加上我身邊有朋友買牛熊 如是者 我又開始跟人玩 前排個市好chok 一開波 兩日已賺到唔少 以為好易贏錢

心雄 結果學人玩過夜 結果買錯邊 一開市得番幾萬 我唔鋸 想快d 追番 結果去買左d 0.01 幾 接近回收既牛熊 結果我輸晒所有錢

之後休息左幾日 見個市跌左好多 應該會反彈 因為未到出糧 我引唔住係信用卡透支左5 萬現金出黎再買 結果果日個市再插 我又輸晒 仲差銀行錢

哩2 個月 我無再借錢 因為自覺咁樣落去一定死緊 但為左快d 還晒d 卡數 我一出糧 就搵機會再買牛熊 雖然無輸晒 但都輸左20-30% 結果拖慢左還錢進度

我好迷惘 覺得自己好失敗 身邊有朋友好保守 佢地都勉強買到500 幾萬細細地既樓 而自己雖然事業好順利 有專業資格 黎緊會升到40k 但理財方面就差到極

我好想改變現況 唔想戶口永遠咁少錢 加上我自己都唔細 唔想再咁落去

請問我而家應該點做？

我打算先唔接觸任何投資先 盡快還清卡數 大約兩個月我會還晒 之後我打算cut 左個証劵行戶口 遲d 用番銀行買正股算 因為証劵行個app 實在太方便 太多資訊睇到 又好多槓桿產品可以玩 自問自己自制能力比較差 一睇又好想玩

之後我想取消左個串流報價佢 一來慳返幾舊水 二來有串流 成日咁貼市 又會手痕 還原基本部 價值投資 根本唔使串流報價

最後 想cut 咁d credit card 留番一張方便自動轉帳算

呀sir 你有咩建議比到我？ 我還晒卡數後 之後每月大約儲到28k 應該點運用好？

我希望老師可以救救我 謝謝

龔成老師：

唔少投資者，都會經歷短炒、玩衍生工具、賭博等心態，我20年前都試過，衍生工具、孖展等，我都有玩，當時當投資是賭博，想盡快賺錢，心急，心雄。

其實，好多年輕人都有這類心態，就會是上我股票班的學生，我都知總會有同學忍唔住做短炒，但好多野要自己試過，先會死心，我講，你地唔會聽的。

我叫人唔好短炒、玩衍生工具，係因為我20年前試過，明白咁樣無錢賺。其實好多散戶仍抱這樣心態，有人識醒，有人唔識醒。

你暫時停一停，唔好再投資先，呢段時間，你要睇10本有關巴菲特的書，明白點樣先最賺錢，之後先從新開始投資。

同埋，剪去所有的信用卡，之後唔好再借錢投資。

如果你抱有「我想好快賺翻所輸的」，就唔好投資。你要明白，投資是理財的其中一步，這是一個配置過程，你是將現金轉化為資產項，長線持有，到你好肯定自己明白這方法時，先再開始投資。

------------------------------------------------

Q16582：

老師，我記得你講過我地係要買入好股，唔係睇股價.. 我好矛盾，諗左好多日呢個問題

龔成老師：

首先，我地要建立一個「優質股」的組合，持有「真資產」，令自己的財富裡都是有質素的項目，這是大前題。

但這個組合，回報率如何，正正取決於我地的買入價，你如果在合理價買入優質股，有一定的回報，如果在便宜價買入優質股，就有好好的回報。

但要留意，優質是第一考慮，之後就考慮平貴度。

至於到買入後，影響你之後持貨與否，就是「優質度」，如果企業優質度下跌，變成劣質，就要賣出，太多因為買「當刻股價低過買入價而不想賣出」，但我地要從「優質度」分析。

------------------------------------------------

Q16583：

老師，我的理想便是不用上班，年少時成績好，但都不想讀書

我相信很難達到吧！

龔成老師：

你有兩個方法做到：

第一，「財務自由」，這是不少香港人都想的，但卻只有少數人會落實去做，你可以睇《財務自由行》，裡面會教你一步步做到的方法，當然，你不會好快做到，但就可以慢慢行這路。

第二，你只是「不用上班」，但你都可以從事一些有收入，而有自己有興趣的工作，你要認真想想，有無可能將興趣化成事業，你要從這方向去想，甚至發展。

例如你想開糖水店，這是你的興趣，你這刻就要先到糖水店打工，學運作，儲錢，之後一步步完成目標。

------------------------------------------------

Q16584：

請問老師點睇退稅年金？

龔成老師：

退稅年金有好有壞，好處是稅務上的優惠，但就要強行投資一個較低回報的項目，你的資金會因此而被鎖死。

當然，如果你本身都想買的話，絕對是無問題的，但如果只是為買而買，就要清楚翻對自己是否長遠有利。

------------------------------------------------

Q16585：

老師，想再問一下
我今年23歲 已有2800月供

打算再供823 領展 月供
可行嗎？

龔成老師：

可以，兩隻都是有質素，同時適合你年齡的股票，進行月供長線投資，已經可以開始。

但領展（0823）是個股，而盈富（2800）是組合，領展的月供金額，要比盈富較少，以平衡風險。

------------------------------------------------

Q16586：

想請問老師，中國平安2318和安踏體育2020質素如何，算是優質股嗎，大約平宜區在哪裡？

龔成老師：

都是優質股，是可以長線持有。

平安（2318）現價合理，長遠前景不差，可以分注投資。

安踏（2020）前景正面，長遠仍有一定的增長力，不過現價唔平，這刻買入的投資值博率不算高，如入，小注好了。

------------------------------------------------

Q16587：

龔sir你好，早兩星期終於的起心肝買你既書，想從中再學習得深入一點，實在獲益良多

最近已正式開始我的月供計劃，已選3隻股票進行月供，包括煤氣 (0003)，電能實業 (0006) 及 領展 (0823)，其中有興趣知道電能實業與港燈 (6823)，哪一間會相對優質及他們的分別 (除左護城河之外)

此外，我亦有留現金去購入個別股票，剛持有必瘦站 (1830)，根據佢業務狀況，應該可以長線持有 (我比較睇好佢既無創醫美同發展內地及澳門巿場的潛力)

我亦有再研究中國的用水情況 (因為內需及必需品)，有嘗試去比較中國水務 (0855)，粵海 (0270) 同埋北控 (0371)。

我知道粵海係東江水的營運者，的確比另外兩間優質，但我比較想投入資金到中國水務，佢同北控都有一個問題係負債偏高

但盈利能力方面，中國水務最近多年都有賺錢 (亦係增長趨勢)，而且不斷擴充 (省巿城鄉水務業務)，但似乎股價上走勢並不理想 (只徘徊在5-6蚊)

唔知有無地方係無留意到，希望可以指教一下 (我已經將佢放入我既觀察名單，希望作長線投資)

龔成老師：

煤氣（0003），電能實業（0006）及 領展（0823）都是有質素的，至於另一隻，你指港燈（2638）還是香港電訊（6823）？

不過，你上述已有較多公用股，這會出現行業集中情況，同時，港燈或香港電訊，都是增長力不高的股票。

如果要比較電能與香港電訊，後者會略好，穩定性較強。

至於水務相關股，你要留意企業的負債，部分負債較高，這會影響左企業的估值，所以你見部分的股價較一般。

粵海投資（0270）一定是首選。

如果之後要再選一隻，就會考慮北控水務（0371）。

------------------------------------------------

Q16588：

老師，我已過了50歲，以下股票，有些是一早持有，有些是看完你的書買入，請問我有什麼要修改，我幾年後退休。

1. 939 建設 3220 股
2. 2 中電 500 股
3. 6 電能 1500 股
4. 2638 港燈 12000 股
5 1398 工商 8000 股

6 66 MTR 500 股
7. 288 萬州 5500 股
8 9988 巴巴 200 股
9 1876 百威 1000 股
10 8 盈科10000 股

11 388 港交所 100 股
12 868 信義玻璃 2000 股
13 2018 瑞聲 500 股
14 3988 中国銀行 10000 股

請問我的portfolio 有沒有問題？

龔成老師：

以你的年齡情況，可以慢慢為退休做準備，你可以建立「收息股」+「平穩增長股」的組合。

上述的股票，都是有質素的，但你同時持有3隻內銀股，要留意同一行業不宜太多，這刻已經差不多，不建議再增持。

至於電盈（0008）負債較高，對你來說有風險，你可以考慮轉香港電訊（6823）。

至於其他，大致無問題。但要留意，你持股數目去到14隻，開始有點多，10-15隻適合，所以未必適合再增加股票隻數。

------------------------------------------------

Q16589：

龔SIR 你好
我媽之前聽人講就去買股票。所以想請教下是否應該賣出，留資金買優質股.

493 國美零售 5,000@$2.34
522 ASMPACIFIC 200@$125.5
603 中油燃氣 20,000@$0.81
799 IGG 2,000@$5.7
1357 美圖公司 5,500@$2.6
1951 錦欣生殖 2,000@$10.76
2282 美高梅 1,600@$24.5
2296 華記環球 192,000@$0.27
3328 交通銀行 2,500@$7.92
3339 中國龍工 2,000@$2.3
謝謝

龔成老師：

上述的組合，部分的優質度只是一般，長遠有需要作出調整。

國美零售（0493）優質度一般，如果有較大的反彈，轉其他更好。

ASMPACIFIC（0522）有質素，可持有。

中油燃氣（0603）質素一般，如果有較大的反彈，轉其他更好。

IGG（0799）質素不差，但業務是較大波動的類別，要睇翻是否適合佢。

美圖公司（1357）質素一般，風險較高，長遠宜投資其他股。

錦欣生殖（1951），質素不差，但業務是較大波動的類別，要睇翻是否適合佢。

美高梅（2282）質素雖不及金沙（1928）與銀娛（0027），但不是無質素，可以守。

華記環球集團（2296）不過不失，如不大注，可持有。

交通銀行（3328）有質素，可持有。

中國龍工（3339）都算有質素，可持有。

------------------------------------------------

Q16590：

阿sir,進階班第三堂講財務比率,分咗六大類,而喺附加筆記嗰度,第二頁果14個比率,係屬於6類中邊個呢?

因為我見到當中有啲涉及盈利能力,有啲又涉及財務槓桿,所以想問清楚，謝謝

龔成老師：

這一頁是之前果頁的延伸，你要兩頁一齊睇。

例如資產回報率、股本回報率、資本運用回報率，就是「盈利能力分析」。

------------------------------------------------

Q16591：

老師，我仲上緊你堂，試下計公司價值，隻長和，咁長圖每股帳面淨值120.398，咁係咪就係你所講既公司價值，麻到你唔好意思，謝謝

龔成老師：

每股帳面淨值，是一個會計上的價值，簡單來說，就是將佢的資產，減去佢所有負債，餘下的就是賬面值，你只要將這個價值除以發行股數，就是每一股的賬面價值。

這個價值是一個會計上的價值，投資者可以利用這價值進行分析，我遲少少會在課堂裡講述的。

這是一個衡量企業資產角度的價值，雖然當中有分析的意義，但我地要做一些調整，放心，上堂會講述的。

------------------------------------------------

Q16592：

你好 成哥 有幾個問題想請教你， 先講一下我背景啦， 今年25 岩岩畢業無耐，依家係賭場到做，工種比較得閒，對住電腦電話，因為肺炎依家無客所以依家我都係電話APP到睇電子書學野

早排睇左本關於投資S&P500 ETF就可以財富自由既書後就激起我想學投資既理念， 咁岩又係FB PAGE到見到你就即刻FOLLOW左你，想學野

你既書我都一次過買哂依家開始睇緊， 我知道時間對於投資好重要，我俾左個目標自己30歲要有100萬，35歲要有500萬

所以我當下就即刻月供緊盈富2800 7000$，即使我仲未好了解股票呢樣野，但我見到你一直都介紹人2800 我就信你

但就未來方向想請教你一下

1.我月入20K~26K(因獎金有浮動)， 暫時未有積蓄， 每月支出約1萬，(車位月租，油錢，雜費，生活費)等

淨返既除左月供7000盈富，想用黎草返舊緊急流動，有左舊流動後每月多出黎既就可以投資其他潛力股，你覺得咁樣好唔好 定係你認為加大D月供盈富會比較好?

除左呢項投資問題我仲有個人生方向問題請教你

2.我知道現時呢份工一定唔係我鍾意既工，但佢人工唔錯，雖然晉升空間不大，但2，3年內上到30K~35K應該都無問題， 而且因為成日有時間睇電子書(雖然睇唔到成哥你D書)

突然感覺上又唔錯，收錢返黎坐返黎睇書， 定係我應該放棄咁穩定，跳出去做下 地產果D 收入無上限， 收入高低靠自己既工種?

最後一個問題 如果女朋友都想學投資， 舊錢應該一齊投資定各自開戶口投資好? 感謝成哥解答

龔成老師：

你已行在正確的方向，之後保持進行就得，要完成30歲的目標，相信你可以做到，至於35歲的目標，就要好靠投資回報，如果你想完成，就要進一步增加投資知識，在選股及投資技巧上，大幅提高實力，利用高回報就可以完成目標。

1）可以，你的方向正確，保持月供盈富（2800），以及同時儲錢，等機會買潛力股。

2）你可以做這份工一般時間，例如2年，你要用盡這工作的優勢，但不會長做，你都要試下跳出去，可能會有更大的突破，現時先努力儲錢，以及不斷吸收知識先。

3）分開戶口，但方向是一同去設定的。

------------------------------------------------

Q16593：

你好，龔成，經常有看你嘅post, 今次第一次問你，想睇睇你對由中國及香港嘅歷史地位給予中銀香港優勢嘅睇法，想由自己角度睇完，由其他角度去思考會唔會有其他未知嘅野可以學習

1. 中國大陸資金進出管制

2. 香港作為國際金融中心地位，資金自由進出，短時間澳門，橫琴，上海，甚至上海或廣東自貿區難以取替香港優勢，即代表可以講係永久

3. 而香港又係大陸窗口，貿易自由港，如果有國際企業需要與中國做生意開拓大中華市場，或者中國企業走出去，香港可以成為踏腳點

4. 中銀香港作為香港唯一人民幣清算行，佢嘅作用係代表當地與中國嘅橋樑

5. 中銀香港又為一帶一路及東盟國家提供貸款及基礎設施提供融資又有母公司中國銀行做backup

問題:

1. 中銀香港由香港地區性銀行變成東南亞區域性銀行，風險變大咗同時潛力又大咗? 如果再出現97金融風暴，雖然金融體系比以完善咗，但本身銀行業自己嘅風險依然存在，但因為咁所以先增長比其他銀行如恆生銀行多

2. 咁如果人民幣國際化，要走出去，中銀香港嘅唯一香港人民幣清算行嘅優勢係咪好重要，亦係人民幣國際化嘅重要途徑?

3. 中銀香港呢個人民幣清算行嘅優勢會唔會有其他作用令佢釋放到更大更多賺錢能力?

思考個點係 中國想人民幣國際化呢個長遠嘅政策可以令中銀香港獲益到幾多，而人民幣要追趕美元同美元睇齊，咁中銀香港嘅戰略地位同作用係咪依然喺度?
謝謝

龔成老師：

你上述分析的5點，基本上都正確，講出了香港及中銀香港（2388）的定位。

1）對，佢風險會大左，但同時潛力度增長左，這銀行過往的運作都穩健的，就算在金融海嘯，佢都沒有核心的不利情況。

當然，不斷發展東南亞，有危有機，匯豐（0005）都是由於多年前過度國際化，令佢投資了一些存有風險的市場，出現今天的不利情況。

中銀香港，暫時仍是正面的，增長力有，但風險比過往略高，不過仍在可控制之內。

2）到時要睇情況先知，因為如果長遠人民幣全面國際化，佢作為一個類似中間人的角色，就會減弱左。

3）長遠有可能。但只可以話，香港是一個跳板的角色，中銀香港會有一定的獨特地位，長遠仍有可能出現各種模式的優勢比佢。

------------------------------------------------

Q16594：

龔sir 你好，我三十五歲，公務員，月入$53,000, 存款約八十萬（諗住做首期，一半做定期，一半浄放銀行），扣除開支

每月有$30000 左右鬆動錢。 之前一路都無投資，今個月開始月供盈富$4000，小米$2000， 港鐵$2000， 友邦$2000，浄番$20000 繼續儲嚟買樓。

我想問下，我咁樣做投資正確嗎？定係有其他更好嘅投資方案，回報更好，而不影響我買樓計劃。
唔該晒！

龔成老師：

如果你打算2年內買樓，就應該大部分持有現金，因為投資股票，要長遠先有回報，無問知中短期的市況，如果到你買樓時股市下跌，就會影響左你的計劃。

雖然這會影響左投資回報，但都無辦法。

如果你$80萬及每月儲蓄已足夠作為首期的話，就可以進行上述的月供計劃。而上述月供都是有質素的，可保持。

------------------------------------------------

Q16595：

龔sir你好 近期最接觸股票 我應該先專注一隻家係分開投注 諗緊9988同1810兩隻

龔成老師：

對初階者來說，將資金適當分散在多隻股票，會較好，因為可以減少風險，但要留意，每一隻都要優質股。

你上述的兩隻，都有質素，可以考慮，不過，兩隻都是潛力股，而你應該在平穩增長股，與潛力股之間，取平衡。

------------------------------------------------

Q16596：

龔成大師你好! 我已10幾年沒買股票了，本人剛50歲，因公司被收購派40萬，請指點如何投資才對?

請問如何選擇投資公司才對?多謝指導!

龔成老師：

第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。

另外，你可將$40萬的部分資金，去做月供股票，或自行分注投資股票，你可以建立「平穩增長股」+「收息股」的組合。

平穩增長股：盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。對初階投資者來說，月供股票是一個很好的累積財富方法，因為可避免你一次過在高位買入的風險。

收息股，例如：，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16597：

龔成老師你好，我今年三十一歲，現在做合約文員，月薪約14000，學歷中七畢業，存款約20萬，看了你的書後決心要改變自己，現已報了你的股票班。

有幾條問題如下：

1.我現在不斷看有關財務，做生意的知識，不過範疇大多不知如何入手，請問如何具體增加知識?

2.我現在的情況要增加收入有什麼辦法?

3.現在網上那些轉讓生意，有沒有問題

謝謝解答 祝你心想事成

龔成老師：

1）你可以學好投資，同時想想自己有無可能發展生意，你不用投資太多資金，總之，你細心想自己有那些興趣強項，有無可能將這些事情「市場化」，你喜歡那些產品，有無可以自己銷售相關的類別。

做生意好多時都是「試」出來，你先想想任何的可能性，同紙寫低先。

2）做任何模式的小生意，兼職。

3）我會建議你先學習自己建立生意，會比買入一盤生意為好。

股票班見！

------------------------------------------------

Q16598：

老師，你好！本人現24歲，每月可草$9000，另有現金15萬左右，現持股票：

941 1000股
17 2000股
3662 2000股

（1）現手持的股票可長期持有嗎？941算是平穩增長嗎？

（2）現打算留現金$60,000作不時之需，另運用$90,000 分注買入9988，1299，1928，這佈署合適嗎？咩價位可以開始買入？

（3）5月會開始進行月供$6000，2800及1211各$2000、66及388各 $1000， 作長線投資，這投資策略恰當嗎？

（4）想問月供的資金應佔每月儲蓄資金幾多成？現金與股票的比例幾多較為理想？

問題較多，謝謝老師耐心的解答。

祝 身體健康！

龔成老師：

1）這些都是有質素的股票，可以長線持有，中移動（0941）是平穩增長股。

2）可以。

這3股都是有質素的。阿里（9988）在$180以下較合理，友邦（1299）在合理區。金沙（1928）在合理區中下部，現價都有投資值博率。

3）可以，這都是有質素的，可以進行

但你要留意，你的持股隻數開始有點多，以你的財富組合情況5-10隻是適合的。

4）月供佔儲蓄可以佔50%。

至於現金比例，首先要留一定的備用現金，這部分每個人不同，餘下的就是「可投資」或「等待投資」的現金。

以現時大市的平貴情況，3成現金是可以的。

------------------------------------------------

Q16599：

你好，龔老師，因為我有屋企人試過因為股票而欠下一身債務，所以自少對股票有抗拒

但年紀隨時間增長，在巧合嘅情況之下讀過你的貼文，之後都買左兩本你嘅書拜讀，開始對股票放開左戒心，
還嘗試買左少少股票

我明白你所説的買優質股並長線擁有嘅概念，但會唔會只對年輕人有用呢？

我今年已經四十四歲喇，疫情下被人裁員，現在只揾到份二萬二嘅工作，而且工作以合約形式，好似無乜安全感

我有一層樓仲有二百萬需要供款，有放租，但還要補貼四千才平衡到供樓所需，有約四十萬流動資金儲備，
加近來才買嘅

1500股領展
5000股煤氣
2000股盈富

龔老師，請問我還有機會致富嗎？

想請教一下，我嘅投資組合有什麼要改善嘅地方？
煩請賜教！萬分感激！

龔成老師：

我地進行人生財富累積，會以「先增值，後現金流」作方法，你的年齡，仍可以進行財富增值，但已經不能進步，只適合投資平穩增長類的股票。

你過去的經歷，令你有點怕股票，但只要你堅守以下原則投資，就很穩健，第一，不要借錢買股，第二，只投資優質股，以平穩增長類為主，潛力股小小好了。第三要長線投資，不可以用賭博的心態進行，要用「建立財富組合」的心態進行。

第四，由於你工作的情況，建議你只用「閒錢」投資，要先考慮生活費用。

你現時月供的部分，可以增加盈富（2800）的金額，減少煤氣（0003）的金額，煤氣是單一股票，風險度分比盈富高。

如果你想累積更多財富，要加大儲蓄，適當投資，沒有快速致富的方法，但你可以一步步建立財富，你集中投資平穩增長股先（這3隻都是），到你有更多知識與經驗，投小部分投資潛力股。

------------------------------------------------

Q16600：

老師，請問我在7.16入了股票358,
有乜野策略與意見呢？

龔成老師：

江西銅業股份（0358），質素算是不差，但又未到好好，始終這只是商品企業，沒有一些太大的優勢。生意近5年只是上上落落，無乜增長力。

這是商品類企業，盈利會較為資源價格影響，股價較有週期性，你可以持有，現價合理，但預佢增長力不會太強。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q16021-Q16040）

Q16021：

Hello 龔成老師，之前大市向下，現開始留意一些股票會不會中期左右會反彈，求老師比一些意見，感謝

1）303偉易達，，想小注入

2）880澳搏。看看疫情過後，會否再上

3）52 大快活，看看疫情過後，會否再上

龔成老師︰

中短期走勢無人會預知得到，我地投資唔應該"估走勢"，而係睇翻隻股票平貴，去做資金配置。

1） 偉易達（0303），佢雖然本質都算不錯的，但增長力就唔叫好強。

佢過往派息比率高達9成，成立於70年代，業務是電子產品，這麼高的派息，反映管理層明白這公司已過了最高增長的年代，之後只會是平穩增長。現價算是合理區，無貨者小注無問題。

2） 澳博（0880）和其他博彩同業一樣，都受疫情拖累，盈利出現大倒退。疫情相信只係中短期因素，在過去一段時間，人們生活重回正軌時，會回復正常。

未來「上葡京」相信是佢的最大增長力，項目會令澳博的酒店客房接待能力增加約五倍，購物、餐飲、娛樂，以及活動設施，將提升澳博的地位（過往澳博較集中在賭場，較少發展這類大型渡假村項目）。

「上葡京」將提供一座總樓面面積達521,435平方米的綜合建築物。超過90%的總面積將提供一系列的非博彩設施，包括具有「上葡京」、「Palazzo Versace」及「Karl Lagerfeld」標誌的酒店大樓，合共提供約2,000間房間。還有會議、購物、餐飲及娛樂休閒設施，以及一個娛樂場，總項目成本約$360億元。將是澳博的潛力所在。

以過往的發展布局來說，澳博的確只屬一般，市佔率近年由31%跌至16%，正是布局的問題所在，第一，太集中在澳門半島的發展，忽視了路（乙水）的發展力量，因此錯過了市場增長的份額。

第二，太過集中賭場，沒有發展大型娛樂設施，其他競爭者不斷發展「娛樂+博彩」模式取得成功，因此令澳博市場佔有率不斷減少。「上葡京」將會成為澳博重要的資產，之後的市佔率，收入及盈利，都將會出現明顯的改善。

3） 大快活（0052）是有質素的，我都很喜歡這股。比起一些潮流飲食，我會偏向選大快活。因為香港人變得好快，潮流飲食的不確定性高，業務可以很好，又可以好差。

反而最基本，民生的必需品，好似大快活咁會更有投資價值。近期由於社會不穏定、經濟不景氣、再加上武漢肺炎所影響，盈利出現倒退是正常的事。

但相信這些因素只會造成中短期影響，集團長遠質素不變。加上大快活定位偏向民生，較有抗跌力。現時股價處於合理區，有長線投資價值，但中短期依然會波動，最好分注入市。

------------------------------------------------

Q16022：

Hello龔老師, 想問1270和1881是否便宜和值得大手買入呢? 我見現在他們得股息率已經去到一個幾吸引嘅數字

而且現在酒店已經去到最差嘅情況, 疫情一旦過去, 理論上股價應該可以重回高位, 想問問龔老師的意見, 謝謝!

龔成老師：

我相信，疫情過去，佢股價會有一定的升幅，因為業務會去翻較正常的水平，始終這些只是中短期情況。

不過，經濟轉弱，所以市道未必會立刻回到之前的水平，因此股價不一定上得翻高位，但就會有相當的升幅。而之後就要睇翻實體的經濟情況。

------------------------------------------------

Q16023：

老師你好, 早幾年問過你問題, 之後我開始左月供股票, 今年45歳, 我月入18K 月供緊$2500 (2800) $1500 (66) $1500 (939)

請問下我應否停供939將資金加大另外2隻定考慮其他股? 先謝謝 因我不知939是否值得長期月供.

龔成老師：

上述都是有質素的股票，問題是你的投資目標。

你的年齡，可以投資平穩增長類的股票，因為我地進行人生財富累積，會運用「先增值，後現金流」。

而建行（0939）只是收息股，增長力不強，因此，月供與否好睇你這刻是否想有建行收息。

------------------------------------------------

Q16024：

老師 我係舊生 見近日咁波動 希望你可以指教一下

呢一波跌幅 我買左少量美股優質股 （迪士尼，fb)
港股方面亦都增持左
增持後
而家有1211 平均價39蚊
同埋027 平均價46蚊 就呢兩隻

股同現金比例就大概50/50
50萬現金,50萬貨

不得不承認 雖然已經上完你堂睇哂你所有書，但我情緒都有輕微恐慌，今次係我入埸以黎暫時跌幅最勁既一次！

而我而家既持倉現金比例，呀sir 你有無咩建議？我暫時自定 策略就大概係持有嘅股票每跌10%就增持一手，呀sir 有無更好既建議可以指教下？

龔成老師：

你有恐慌情況，這是正常的，而最重要就是，當分析到整個市場都有這類恐慌情緒時，就要運用課程所講（即第四堂）的要點，去視乎「恐慌程度」，而去買入股票。

買入股票是方向，但問題是如何買入。

以現時的平貴水平，可以每跌10%用一注資金，如果無進一步下跌，而大市又已經在平宜區，都可以每過一段時間分注入。以現時的市況，你留30%都足夠。

------------------------------------------------

Q16025：

龔Sir，我上緊你的股票班，新既初級班比2016版確實有唔少改變，第4堂計算部份印象中以前冇講過，等我得閒拎返以前D notes對下先

當年完成課程後覺得冇咩能力估值平貴，之後幾年都只係月供股票……唯一學識既就係無動於衷於大市升跌。

除左課程外，我覺得你既表達能力比2016年時好左好多，明顯見到進步。事隔幾年之後先敢同你講返。

聽你講嘢既語速會覺得你個人好性急，但你又會好有耐性去逐隻分析股票同面對D網友重複又重複既問題，點樣練出呢種功夫？

龔成老師：

基本上，現時的【投資倍升股課程】，比5年前的，內容增長左一倍，所以唔同晒。

哈哈，多謝你意見，其實，我本身並不是一個講野勁的人，最初講得唔好，但都逼自己講，所有野都只訓練出來，所以，總會進步的。

我本身是一個好急的人，所以20年前玩股票，我短炒，但輸左好多，之後明白要有耐性，要長線，就開始訓練，第一是平常心，第二是買入股票前，逼自己寫一份報告，要自己好確定該股是值得買入，才會出手。

當對左個市20年，就更明白要耐性，慢慢就訓練到出來。

------------------------------------------------

Q16026：

老師你好，我係你學生，我成日好冇心機睇年報，大致睇下Balance sheet同P/L已冇乜耐性，加上要配合經濟環境同留意政策方面消息，覺得個腦好混亂同埋好快就忘記左。所以我好認同你所講，一個組合裡面既股票唔可以太多隻，否則根本應付唔到。

但就係因為咁，令揀股時更加選擇困難，隻隻都覺得好，但又唔可以買晒，你平時要留意咁多股票，點樣會分配同抉擇呢？

我目前有大約30萬股票同35萬現金，以成本計持股比例如下：

0003 33%
0066 29%
0823 12%
1211 8%
1928 8.6%
2366 7%

由於一開始只有月供3同66，令其佔比較重，於是今年調整為：

3同66各$1000，其餘4隻各$2000
宜家現金準備入市，想加碼1928同2388外，又覺得好多隻都好，但已經手持6隻股票，應該點分配其他呢？心水包括：

405、709、778、1881、388、1177、1448、1810、1830、3918、9988

我覺得目前405、709、1881、1830、2388進入便宜區，但全部係收息股類，係埋應該留返現金等潛力股呢？講返小小背景，我應該同你同年，每月可儲大約20-22k。
謝謝！

龔成老師：

我會建議，你找出較為優質的，同時以盈富（2800）作配置。這樣就可以管理得比較簡單。

就算唔睇年報，都要睇財經網站，令到自己對該企業有基本的認識。

現時你的持股，大部分都無問題，但個別股票持股比例太高，要減翻，如果每一隻股最高去到15%會更加好。所以，你可以考慮加入盈富（2800），這就不怕管理問題。

星美文化旅遊（2366）核數師意見曾經出現「不表示意見」，這股要小心，不太建議持有。

至於你最新的調整，可以。

如果你是80後，其實在現時的方向，會偏向投資平穩增長股，加上部分潛力股。你上述的股票，其實可以考慮港交所（0388）、中銀（2388）、中生製（1177）、阿里（9988）。

------------------------------------------------

Q16027：

龔sir 我慢慢入左d盈富，金沙，港鐵，恆基 不過我有d都入早左 25000左右已經入緊貨

想請問一下同一隻股票既第2注 應該等佢跌幾多再入會安全d? 現階段應該保留幾多%可投資既現金？

再問一下 如果打算入100萬 每注入5萬可以嗎？
感謝你

龔成老師：

25000都是一個合理的水平，無得話太早，不過，呢個亦係我建議「分注投資」的原因。

因為大市的走勢根本無得估，所以只要分得好，基本上平均的買入價就唔會貴。

上述都是有質素的股票，一般來說，我地每跌10%可以入一次。但如果你將$100萬分成20注，每注$5萬，就可以入得密d，又或利用時間平均法，例如每星期入一次，見到價不太貴就入，這都是方法。

你預現時持有3成的現金，基本上是合適的。

你上述股票現價合理，已經可以進行分注投資。

------------------------------------------------

Q16028：

老師，想問下汽車股和航空股，手持1316, 175,現價如果加貨如何？我有1055,大約在4.9買入, 現價跌到$3.7左右，應否再入？

内房如3333, 1918是否到了很吸引水平？

我在考慮20萬左右税貸用來買貨，如何建議？

我打算明年初買樓，如果有税貸會否影響按揭上會？

龔成老師：

耐世特（1316）本質不算差，但近年的業績有點弱，但又唔算好差。我相信佢中短期仍會面對不利的經營環境，見佢生意並無增長，盈利都是。

相信要過一段時間，先會慢慢進入正常少少的時期。這股都算有投資價值，股現價合理，但就未必值得投資太多，因為質素始終不強。

至於吉利（0175），有質素的，你可以分注投資，這企業長遠不差，但中短期會較一般。

航空股就不太建議，行業的賺錢能力不強，風險高。

至於內房，風險較高，上述兩隻都是有規模及品牌的，但由於風險高，因此不能大注，小注無問題的。

至於借貸投資，有利有弊，你要明白風險。如果你打算下年買樓，相信有資金需要，那就不建議借貸投資，若果到下年的股市仍下跌，你在買樓上會有問題。

另外，如果借貸年期較長，你到下年買樓時仍未還清，會影響你買樓借貸的。

------------------------------------------------

Q16029：

首先真心多謝龔成老師先，真係令我喜出望外！其實我本身唔期望得到你嘅回覆，知你有做片同回答其他人，比較忙，應該唔會理我，所以唔好介意

我本身有follow你兩三年，只不過一次都冇望過你所講嘅野，宜家最多只係識做你所講嘅(加)，並未做(乘)，呢兩個字係你第一本書我學返黎（人生第一本買黎讀嘅書）

我唔想停留想字入面（想咗好幾年），所以開咗股票戶口膽粗粗係入咗2手#5（$44.35），再諗住月供形式做長線投資，再上網不停睇有關股事知識。

因為老師你每一次機會都去捕捉，再一次激發我嘅行動，我已經報咗你股票班，希望到時見面，多謝老師！

祝你長揸長有，生意興隆

龔成老師：

其實我大部分的問答都會覆，但由於問的人實在太多，所以一般回覆都要成10日，無計。

匯豐（0005）仍算有質素，但增長力比過往年代弱左，如果目標只是收息，無問題，但就唔好對增長有太大期望。

所以，這股唔會持有太多，你要建立一個平衡的組合，這些技巧，你到股票班就會學到。股票班見！

------------------------------------------------

Q16030：

龔老師，本人持有28萬股857(平均價約4.5)，本想當收息股之用。但現在已跌了一半，是否值得持有？或是等反彈時全部/一半賣出？

此股佔我組合約一半，本人54歲，預60歲退休。是否應換馬至其他收息股好點？

另外，有沒有什麽穩健的收息股適合我這類將退休人仕？謝謝你

本人因工作關係，未能去上堂。但從你FB的內容，也獲益不少。常感到你要花時間及真摯回答各人問題，萬分感謝。

祝你身體健康平安。

龔成老師：

中石油（0857）不是無質素的股票，但就唔可以成為收息股的核心，最多只是輔助。

因為佢上游業務較多，原油的價格對佢的盈利有較大的影響，這就會影響佢的股價及派息，而收息股我地會追求穩健，因此，這股並不是最適合。

你可以等佢上翻去時，賣出3分之2，轉到其他收息股。

投資收息股，可以作為財富分配的一部分，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。

你可以建立一個收息股的組合，目標是6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

------------------------------------------------

Q16031：

老師 你好！

想問下隻秦港股份（3369）老師你點睇？

5年前佢上市無耐果陣入左，當時差不多5蚊，貪佢高息

頭2年的確幾高息，之後股價愈跌愈低，派息又愈來愈少，無眼睇，應該放嗎？

龔成老師：

秦港股份（3369）質素只是一般。

雖然都有生意，但你會見到佢有持續向下的，盈利有點不穩。由於業務有本質性轉弱，因此，你預佢好難上到當年的高位。

這股長遠建議你賣出，你可以等多一年先賣，因為近年的貿易問題，對佢都有影響，反而等貿易相關因素好翻D先賣，會較好。不過，都唔好對股價有太大期望。

------------------------------------------------

Q16032：

老師你好
我想在31歲之前儲到60萬
今年岩岩28歲

月入18000蚊左右
太貪靚供緊美容plan

供到2021年
計埋保險家用等等
支出大約11000左右

有陣時都未必儲到錢
儲存金額只係有6萬左右
我可以點做呢？

龔成老師：

這刻只有盡力儲，到你美容plan完左後，如果有較多的剩餘現金，就要做月供股票，逼自己儲更多的錢。

如果想3年內有$60萬，要睇下你有幾大決心，如果你好想的話，這刻要盡最大努力儲錢，每月起碼要儲到$7000，最好是$10000，否則，你根本無足夠的本金去增值。

另外，要賺翻你的風險承受能力，如果可以承受風險，就集中投資潛力股，這就有機會為你帶來較大的增值，當然，風險高，自己衡量。

例如潛力股：比亞迪（1211）、中生製藥（1177）、福壽園（1448）、小米（1810）等。

------------------------------------------------

Q16033：

龔成老師，想問問，9988, 1928 同0700咩價位入好？因為本金不多，有什麼可以推介的？

長期投資，平時可以收息的，昨天9988同0700都升返好多，回再回落ma?

另外0005 什麼價位入好？仲會跌ma?

龔成老師：

如果本金不多，你最好以盈富（2800）為核心，否則太多在某個別股票，會有集中風險出現。

另外，金沙（1928）、騰訊（0700）、阿里（9988）都是可投資的，有長線持有的價值。

其實我地好難足到短期股價的走勢。

至於匯豐（0005），收息股，唔好預期股價有太大的增長力。

其實整體股，上述的股票，股價都合理的，分注投資就得。

------------------------------------------------

Q16034：

老師你好
我現在27歲

月入2萬3
每月開支
幫屋企人供樓7千

另有1萬同女朋友儲錢只做定期（因為女友不想務風險投資）
洗費4千

每月淨2千加上本身有大約十萬本金諗住去投資
目標31歲希望能夠有一百萬去置業

小弟零投資經驗 見成哥推介2800亦了解左背後都穩健 諗住只揸一隻2800

以現在大市不穩定情況黎睇 應該等大市穩定落黎開始穩定回升上黎既時候先一手一手購入 定 作月供好呢？

如兩種方法都係長期持有 月供比一手買入連每月收費用會否變相支出多左

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

可能你地的風險承受程度較低，因此，可以考慮盈富（2800），這是平穩增長型，適合你的。

你無得分析大市之後的走勢、市況穩唔穩，這些無得分析的。

而月供股票的好處，就是平均入市法，所以，你已經可以開始進行，我相信月供盈富對你來說是最適合的。例如每月供$5000。

我相信，你保持月供，以及定期部分，要31歲置業可以的。

------------------------------------------------

Q16035：

你好 龔成老師
小弟 今年30歲 月入30k

扣除洗費 每月可儲20k
手上有20萬現金

匯豐 400股
阿里巴巴 100股
長實 500股

如何部署 買樓 用9成按揭上車
目標係400萬左右既樓

龔成老師：

就你的年齡與目標來說，收息股並不是最好的選擇，因此，匯豐（0005）這類股，持有一手已夠，不要加。如果股價上翻，賣出較好。

如果你打算買$400萬樓，其實1、2年已經可以進行，因此，建議你這刻持有較多現金，因為無人知你想買樓的一刻，股市法況如何。

你保持保現金，阿里（9988）及長實（1113）持有就得。

香港經濟轉弱，樓市有可能在1、2年下跌，不過在長遠計，仍會由於供不應求，而令樓市向上，所以要睇下有無機會。

------------------------------------------------

Q16036：

龔sir 你好 小弟留意左你好耐, 覺得你D股資心得好有用, 想請教下股票佈署及資產分配.

28歲, 現時月入27K, 每年都會加薪大約5%, 股票投資有幾年經驗 (輸錢經驗), 上年開始月供股票(5K), 而家持有以下股票:

800股0005 (成本約$58)
7000股3988(成本約$3.4)
200股0388(成本約$235)
4000股0341(成本約$17)
25000股0008 (成本約$4.5)
45000股0097(成本約$0.6)
5000股0127(成本約$12)
18000股0525(成本約$4.7)
15000股2031(成本約$0.6)
20000股3893(成本約$0.2)

(1) 我個組合都唔少股輸緊錢, 想問下我係唔係應該將輸的股票全部都止蝕?

(2) 本人持有現金只有約1萬, 應該要點做先有得回本? 而家股票全部都好平, 借錢投資翻身風險會唔會好大?

龔成老師：

1）你在選股的方向行錯左。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，匯豐（0005）、中行（3988）、電訊盈科（0008）、恒基發展（0097）、廣深鐵路股份（0525），以你的年齡來說，並不適合。不過，這幾隻股不是全無質素，你可以等佢上翻D後，慢慢賣出，轉投資其他股票。

易緯集團（3893）無質素，不宜投資。

你之後應集中投資有質素，有基本增長力的股票，盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

2）唔好借貸投資，這是較高階投資者才可進用，同時要在好時機先會出手。

太心急去借貸投資，期望翻本，這只會否易行錯。累積財富要時間，不能急。

------------------------------------------------

Q16037：

你好，一直有看你的投資影片，最近跌市當中出現好多優質股買入機會。

想查詢，本人可以投資金額合共80-90萬，之前跌市開始當中已經開始獲利。所以現在手上並沒有持有任何股票。

想問關於，如果將六成金額投資在stock: 7200，預期投資時期6-9個月；然後其餘四成金額放在其他三隻股票上，分段吸納，騰訊（0700）、阿里巴巴（9988）、長和（0001）。

這樣可以嗎？
謝謝解答。

龔成老師：

上述3隻正股，都無問題，這些都是有質素，有長遠增長力的股票。現時都可以投資，分注，長線就得。

ＦＬ二南方恒指（7200）投資目標為追踪恒生指數每日表現兩倍（２ｘ）的投資業績。無人知市況能夠在9個月內好翻，這類槓杆式工具，有利有弊的，回報放大，虧損放大，你要自己衡量風險。同時，當中是有潛在成本的。

我唔建議將6成資金投資於這工具。

------------------------------------------------

Q16038：

龔成老師，股市動蕩，睇住持有果部份股價係咁碌落去，對初哥嚟講都有少少擔心前面既投資方向，見到老師既分析，個心都定番晒。

最初打算唔同類型都有啲，用來分散風險，不過而家睇番都真係多咗啲。

月供果度有1211同175，兩隻都係車股，如果停供175，轉過去27、388，然後日後加資金月供就再加2800可以嗎？

龔成老師：

其實，最緊要睇翻企業的質素，如果是有質素的，就不用擔心中短期股價下跌。

月供部分，你于睇翻長遠的組合持股比例，如果集中同一行業，就會改。

你轉到銀如（0027）、港交所（0388）是可以的。加上盈富（2800）當然更好。

------------------------------------------------

Q16039：

成哥，首先要多謝你一直無私分享你對股票既睇法，我follow左你成9個月，34歲，月入$20k

今年年初結完婚，手上現金有25萬，半年前聽你講開始月供股票2800，之前月供$2000，今個月開始月供$5000。

琴日買左人生第一次香港股票，0002中電一手，諗住優質股，穩定等派息，長期持有。

現與家人同住，如果抽到政府既居屋/白居易，可能兩三年內置業。

我手頭上仲有現金21k剩，你認為我可用買優質股/月供/留現金好？什麼投資方法較好呢？謝謝你的解答。

龔成老師：

由於你現時的現金唔算多，會建議你留現金。等到再有更大型的跌市，才考慮動用。

至於每月資金，就要睇下你能夠儲到幾多錢，你這年齡當然愈多愈好。你保持每月供$5000盈富（2800）無問題的，月供是長期策略，持續進行就得。

------------------------------------------------

Q16040：

老師你好，依家個市波動，趁跌市，我入左1098，諗住中長線收息，依家持有11000股，分別係$14.02，$13.1同$11.08，想問價位係咪唔理想？目標價幾多放好？呢隻股長揸ok嗎？定再分段吸納？

另外9988係$178入左2手，我覺得係優質股，應分段再吸納？

1299都係我心水，因為長遠睇好保險生意，價錢合理嗎？請指教

龔成老師：

路勁（1098）佢的業務，包括左發展地產、收費公路、投資管理等。近年，發展地產已經成為左佢的主要業務。

佢業務不差，增長快，基本上都有質素，但負債有點多，加上規模不算大，這就會成為風險。長遠的投資價值有，但就唔建議太大注。

你的買入價不算貴，但唔建議入得太密，要控制翻注碼。長線可以的。

至於阿里（9988）$180以下合理區，分注投資，長線持有，無問題。

友邦保險（1299）有質素，現價合理，分注投資可以，長遠正面的，但佢股價會較為波動，所以分注時唔好太急。

股市波動，買入要用分注模式，同時唔好用盡現金。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q15201-Q15220）

Q15201：

龔sir.睇左你幾本書..得著好多..諗通左好多..真系要多謝你..遺憾就系之前一路就吾岩時間去上你堂..！

想請教一下點樣可以容易啲判斷一隻股票既合理水平？

我跟住你教既方法..系過年前睇中左*1137*.. 4.3既時候入手..長遠點睇？

終於報左名上你堂..期待！

龔成老師：

要判斷一間企業的合理水平，就要為企業進行估值，但這不是一個容易的過程，因為就算在我的股票班，都要講約5小時，因此好難在這裡三言兩語講到。

簡單來說，就是為企業的業務價值與資產價值進行計算，有了合理的估值後，再比較現價，就可以知現價平貴。

至於香港電視（1137），這是有潛力的股票，業務增長快，行業有前景，不過，在財務數據上較弱，未有似樣的盈利，沒有估值的基破財務數據。因此，這企業估值會比較難，同時市場對佢的價值睇法不一，結果就是，股價會大幅波動。

如果你最初打算長線的話，就持有，股價波動會有心理壓力，但這是投資者要克服的。如果你本身有較多貨，可以在有一定升幅時賣出部分。

5月見！

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15202：

龔sir, 上年上完你股票班之後，一直儲錢等大跌市依個機會， 宜家想等到價格好吸引先分注入不同優質股， 想請教你的意見：

－ （9988） 阿里爸爸
－ （27）銀河娛樂
－ （388）港交所
－ （2388）中銀香港
－ （12） 恆基
－ （2318） 中國平安
－ （3）煤氣
－ （66）港鐵
－ （2800）盈富

上年我用左2成資金：買入煤氣，港鐵，盈富 & 中銀，所以今次大跌市主要想用8成資金買入：9988，27，388， 12 & 2318，當中9988，27 &388會重點會多d股數。

買多d 9988係因為覺得佢有大潛力增長， 有長線持有的價值；買27係因為覺得賭業股波幅大，可以待幾年後升得好高的時候就買出 （e.g. 2018試過上到$70 高峰）；而買388又係等熱炒時期賣出。而餘下股票就長線持有。

我選擇依個組合係因為當中擁有不同行業既股，而當中既股都係行業中最有實力／潛力的企業。請問以我24歲年紀， 以上組合會否過份進取？非常感謝！

龔成老師：

你的方向正確，之前大市一直唔算平，最多只是合理區，我地入市的力度不強，之前應該儲落一定的現金，現時大市開始有吸引力，雖然我地唔知中短期走勢，但在長期角度，是買入優質股長線持有的機會。

但由於大市十分波動，買入時要分注，慢慢運用，同時買入後仍要有現金剩，無人知會跌到幾多。

你的策略正確，選股無問題，你可以運用之前的現金，好好把握這次的機會，分注買入。上述都是優質股，適合你的，你已經可以開始進行，唔算進取。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15203：

龔成老師：你好，我是投資初哥，29歲，月入約四萬，每月可投資的金額約兩萬元，平常都有投資盈富、長建及中銀，有留意到很多人投資美股，或者一些美股ETF，如你都有提及的 3140。

我也有翻查資料看看，發現3140息低，股價不會大幅升跌，成交量低（為何香港人不太買ETF除了2800？），如買左之後會否難沽出？

除此之外，既然我平常已定期買開香港的股票（如上述提到的），那是否仍然需要買3140? 如建議投資，原因是甚麼？

想分散投資，等股票不需太集中係中國市場？ 感謝！

龔成老師：

領航標普五百（3140）的股息的確不高，但投資這基金，著重的是增長力。相信佢長遠仍有平穩增長力，因為佢就是追蹤最強類別的美股。

成交低的確有少少影響，這會令你買賣差價可能有時有點闊，不過，只要你長線投資，影響就會相對較少。

香港人太愛短炒，而ETF是不適合炒的，因此，這些基金不太受香港人歡迎。

你可以投資3140，作為分散風險的作用，因為可以令你的組合，更為全球化。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15204：

龔Sir，想問下，現時9成按揭去到最高800萬，如要買800萬的樓，首期要80萬，那麼雜費預40萬會足夠嗎？即total$120萬（不計裝修傢私）
謝謝喔！

龔成老師：

$800樓印花稅為3.75%，即是$30萬，經紀佣金一般為1%，即是$8萬，連用其他雜費，你預大約雜費要$40萬。

因此，你預$120萬是基本的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15205：

老師你好想問下你意見，本人岩岩畢業出黎做野冇耐，月入18k，想以增值為主
打算每月月供$5000係以下股票 :

823@1000 2800@1500 12@1000 2@1500
想知呢個組合會唔會太保守?定係將資金集中供某d股會比較好?

另外本人有約40k資金打算黎跌市時買入長遠較有實力既股票，有冇值得留意既股?
唔該老師!

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

就上述的選股來講，都是有質素，平穩增長型的股，基本上無問題。其實已經可以進行。

現金$4萬方面，暫時可持有現金，等機會，唔好心急，因為大市只是合理區，未算平宜區。你可以留意太古地產（1972）、希慎興業（0014）。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15206：

阿Sir，有個關於月供0388港交所、0700騰訊嘅問題想請教：

觀察近日成交價，0388市價已經去到昂貴區（假設$190-$240合理區），0700市價亦距離合理/昂貴分隔線好近（假設$305-$385合理區）。

喺呢個環境下，需要減少月供金額、或者暫停月供呢兩隻股票嗎？

而且，留意到近期並冇對0388、0700利好嘅消息，顯得呢啲市價升高得唔合理，同時恆指升破28000亦都算高，所以我有諗有冇需要暫時賣出呢啲股票。

而家市況去到應該賣出持有股票嘅熱度嗎？
謝謝。

龔成老師：

港交所（0388）的確過了合理區，但現時只是略略貴的水平。在這水平，唔會大手入，但如果是優質股，以月供的模式進行，其實仍是可以的，除非你每月供的金額好多，就要減少少。

至於騰訊（0700）都有類似的情況。

不過，如果一隻股票有質素，有增長力，其實在月供的角度，就算持續都無問題，除非到了明顯貴的水平。

現時恆指，只是合理區中上部，未貴。市未熱。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15207：

老師，想問你清唔清楚現時支付業務的獲利模式係點？
像支付寶等。

龔成老師：

支付寶提供的支付，對消費者來說是免費的，除非通過信用卡等信用產品付款，如果在呢種種情況下，支付寶基於銀行向其收取的相關費用向商家收費。

另外，商家可以從第三方合作網站獲取站外流量，淘寶商家還可以購買高級店舖軟件幫助升級、裝飾和管理其網上店舖，成為往後的盈利。

簡單來說，就是利用一些延伸的模式去賺錢，通過同銀行及商家等分作，運用巨大的客戶基礎。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15208：

龔成老師,你好!想請教

現時按揭成數放寬, $800-1000萬的物業可造8成按揭，連首期,印花稅,裝修等的前置金額約$250萬, 我收入能過壓測可以上會的.

但每月供款達$30,000. 租住同樣單位$20,000 – 25,000 就可以了.

在現金流的角度, 租看來比較化算?

若之後我把這$250萬作5成首期用來買港島細價樓($450萬)收租, 租金約$10,000. 租金收入是大過供款的, 現在按揭利率2.5%. 租金回報4.8% (10,000 X 12 / 2,500,000). 淨回報2.3% (4.8 – 2.5%). 這樣的話我地唔洗將$250萬鎖死作”消費”, 而令資金成為”資產”帶來租金收入. 我們就會有2個物業收租, 自己就租大三房單位自住.

想請教:

1)以上操作是否可行? 有什麼事項和風險要注意嗎?

2)比較以上操作, 8成按揭買800-1000萬的物業來自住方案有什麼可取之處嗎?

謝謝!

龔成老師：

理論上，你擁有兩個細單位再租一個大單位，比起你單買一個大單位自住為好，但好的程度並不算好多。

先講點解好，細單位的租金回報率較高，例如4%，而大單住租金回報率較低，如3%，你以收4%去支付3%，加上現時按揭的利率不高，你的確有利的。

不過，在現實的情況，你要比好多費用，例如放租稅務，雜費等，同時現時細單位的租金回報率，大多不足3.5%，因此，你實際賺到的數目，並不多。而你要處理的雜項管理，會增加左，因此，數目上有少少著數，但並不多。

如果你填寫「個人資產負債表」（你可睇《財務自由行》），你就更清楚。雖然你地有兩個細單位，資產多左，但同時由於租住大單位，負債多左，因此，整體上無你想象般咁有利。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15209：

老師，其實本人打算8-10年後退休。之前只係埋頭在工作上，收入算好，是管理層，但不太懂投資。之前有買吓股票，但不算成功。有幸在FB接觸到龔sir。

覺得時間無多，要好好利用餘下幾年舖排一下投資計劃，整理手上有嘅資金/產。

日日有follow你FB同睇你嘅書，獲益良多！好欣賞你對你嘅工作咁有passion! 排除萬難，一定要achieve到定下嘅目標！

如果我早十年睇到你FB就更好！不過希望依家都唔遲！你要加油呀！幫多啲後生仔早早開始計劃佢哋嘅將來。我好認同你之前講過，為何香港教育沒有教大家投資理財的概念和重要性？這是十分重要的一科！

龔成老師：

對，香港的學校，完全無教學生重要的事，只教學生如何做好打工仔！

好多更加切身的知識都唔教，呢D反而是更重要的知識，理財就是其中之一。所以，見到唔少香港人唔識真正的買樓方法，唔懂得投資。

我出書都係希望可以幫到更多人，認識真正的理財知識。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15210：

Hi, 本人想15年後財務自由, 本身打算投資100萬(分4年350K, 150K,250K,250K), 未有買股票經驗,有上堂, 目標每月有3萬現金,大約7.2M 5里

心目中有股票 : 地鐵(005), 中銀(2388),大快活(0052). 想問用15年時間儲存到7.2M是否可行?可行的話

每年有10 - 15複利應該點樣選擇股票? 每年點樣評估是否合乎目標? 中間是否要加註金額?祝生活愉快.

龔成老師：

先講你現金的部分，如果你未有投資經驗，建議只動用部分，例如$30萬，餘下的暫時持有現金，唔好心急動用。加上現時大市只處合理區，你可以一邊投資，同時留下一定的現金，作等機會之用。

至於每月的$3萬，你可以做月供股票，上述的都可以，仇最好加上盈富（2800），以及考慮多一兩隻平穩增值股，如金沙（1928）、長建（1038）、中銀（2388）、港鐵（0066）、恆基（0012）、港交所（0388）。建立一個更全面的組合，唔好太過集中。

如果你每月投資$3萬，假設回報為10%（要將股息再投資），預期你可以滾存到$1140萬。因此，你的目標是「如何尋找每年有10%回報的股票」，上述的股票，都是企業有質素，有平穩增長力的，你向這方面去選就得。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15211：

龔成老師你好！請問一下由上年香港發生的社會運動到最近政府對武漢肺炎的處理手法，相信或多或少會影響香港和外國投資者對香港政府的管治能力和香港經濟前景的信心，所以我想問老師怎樣看香港股票的核心質素和未來營商環境？

另外我想問下關於投資策略的問題。本人現時20歲，持有的股票都是香港股票，分別是中國生物製藥和福壽園，我明白價值投資的重要性，所以打算作長線投資。

但是由於本人認為香港股票質素可能已經略減和已經持有不少香港股票，所以想同時投資美國股票，我想問在比例上分別大約佔多少會比較適合？

謝謝你

龔成老師：

的確，香港會因這些事件，令我地的優勢減弱，但未至於核心性，信心會慢慢因時間回復的，所以又不用太過擔心。

中生製（1177）及褔壽園（1448）都是有質素的股票，你可以持有，這兩股都是潛力股。不過，你唔能力太集中在潛力股，應該建立一個更平衡的組合。

另外，香港股票仍有質素的，我地一定要從長遠的角度分析，唔需要太比中短期的不利情況影響到。

不過，你建立一個更環球的配置，是可以的，因為有平衡風險的作用。你可以美國、香港、中國，各3分1，已經是一個平衡的組合。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15212：

龔 sir 好啊～我是你的股票班舊生，聽完書一直想投資金沙或者銀娛。

但最近澳門關閉賭場，市場亦都會有一段時間既低沈，咁而家仲入唔入市好呢？

如果入，應該大概咩價位呢？我係一手手買既，亦唔打算買太多，所以想搵個好既價位先買。謝謝～

龔成老師：

澳門關閉賭場、肺炎情況，當然會對佢地有影響，但只是中短期，因此，我地最多只需要在估值上有調整，例如先計算子正常時間的企業價值，然後減去佢中短期損失的部分。

上述兩間企業的優質度，並不因而改變，因此，我地只要考慮平貴因素，就能分析到是否投資。這兩股現時處合理區，有長線投資價值，但如果你唔打算入太多，只打算入一注資金，就最好等回落8%以上才考慮。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15213：

龔sir 你好，我35歲月入扣完mpf 27k，剛購入居屋每月供13k。另有60萬現金，以及hsbc/中人壽股票共8萬。

想問我可點運用60萬現金增長資產分擔供樓壓力。因現在市況令收入有可能變得不穩定。感謝！

龔成老師：

你已有物業，在財富分配上，應該增持翻多D股票資產，令組合更為平衡。

35歲，仍是財富增長的年齡，你可以集中投資平穩增長股。但如你本身比較保守，想較偏重於現金流，則可以投資「平穩增長股+收息股」。

你這刻可以動用$30萬，分注投資優質股，餘下則暫時持有現金，等機會投資。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15214：

龔成你好 請問岩岩開始學月供股投資，應該先買你邊一本書好呢?謝謝

龔成老師：

對初階投資者來說，月供是很好的做法，記得要長期進行，唔好被中短期的股價上落影響到。

你可以睇《80後百萬富翁》《股票勝經》。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15215：

你好龔成，我有問題想問你意見，我負債20萬，仲有8個月就還哂，每個月扣哂所有開支，只有8,000可以投資，而且我今年想買樓，係咪唔好做月供股票？

龔成老師：

對，你唔應該月供股票。

因為我地投資股票，原理就是買入企業，等企業成長，8個月只是一個短期操作，企業不夠時間成長，只能睇到時的市況而影響你有無賺蝕，這一定會為你帶來風險的。

所以，你應該集中儲現金，如果本身有需要賣出股票套現，就要在這幾個月，在合適時機賣出。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15216：

龔成老師你好！我是你的小粉絲，小弟在讀過80後百萬富翁後十分欣賞你的致富頭腦和知識

小弟今年29歲，我的目標是2021-2022年買入第二層物業收租，奈何上年有財演話維他奶的合理價為$48，故用了部分錢在$41買了兩手維他奶，雖然它是一間穩定增長的好公司，但半年間已由$41下跌至$30水平。

以FY18-19為例子，因為純利的增速不及預期，導致維他奶的合理估值下跌，加上實際盈利下跌，致使股價於公怖業績當日大跌並開始了漫長的跌浪。

以我所知FY19-20年度，人民幣下跌並國內經濟轉差，國內對香港人乃至香港的產品仇視，應該會影響維他奶在2020年6月公怖的盈利。問題如下：

1)維他奶雖然是自由現金流按年增長，但DCF模型包含很多不同的假設，請問龔成老師是否建議我們使用DCF作估值呢？

2)如果20年6月業績公怖，股價再次重覆上年的模式，請問我應否在業績公怖和股價大跌(這是假設，我不想這個發生)重新用公怖的EPS重新計算合理價

如果仍是高估便於第二天沽出手上的所有維他奶，並於將來股價在新的合理價以下有一定安全邊際才買回？

3)你認為維他奶現價合理嗎？合理價大約在那裏？

4)你認為當東莞的新廠房正式投產，產能提升1倍，以維他奶在國內供不應求的情況下，股價有機會升4倍至破$100以上的水平嗎？

問題比較長，希望收到龔成老師的回覆，祝老師桃李滿門，能讀到老師寫的書實在是香港讀者之福！

龔成老師：

1）如果你有睇幾年前出的《50優質潛力股》，你會見到我當時分析的維他奶（0345）當時的合理價是$20以下，而當刻的股價只是$15。

這企業有質素，但增長力減左，$25以上仍是略貴。

我在估值時，會同時用幾種估值方法，無一種方法是完美的，有較多方法作配合，分析會更為立體。

2）你唔到分析「股價重覆上年的模式」，這是「預測股價」，是錯誤的投資方法。

反而，我地只會因應現時的平貴度，作投資策略的調整。

3）這刻$25以下會較合理，最多$28。

不過，如果企業的質素增加，以及增長力理想，企業價值會有所調高的。

4）比較難，產能增加當然利好企業。但企業的產品銷售情況，才是核心，如果市場的增長動力不強，就無作用。

這股有質素的，但要耐心D先守到，現時好睇佢之後的市場發展如何，這將決定了這股的增長力。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15217：

老師 你好
我想問下 如果公司出左花紅一萬

我想全部用黎買股票
我應該投資落邊隻股票比較好
因為本金有限

龔成老師：

如果你想有基本的增長力，可以考慮盈富（2800）（本金約$15000），另外，亦可考慮，領航標普五百（3140），這都是最穩健，能平衡風險的投資。

如果你想收息，可考慮置富（0778）。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15218：

老師，本人現持有渣打多年，一直在月供股票的名單中，平均價約100元左近，但一直未見起色，你對他前景有什麼看法，有需要換馬嗎

龔成老師：

渣打在多隻銀行股中，算是質素比較弱的一隻，你可以睇睇佢的財務報表。近5年中，有2年出現虧損，另外有2年的盈利不太好。

企業質素只是一般，持有的價值不算高，但又未到劣質。這類股，不應佔組合的比例太高，你預佢之後的股價，都只是平穩，最多有少少增值，要上翻去$100不易。

如果持有較多貨，可以考慮賣出部分，餘下再守。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15219：

你好 請問你點睇九毛九(09922)? 而家入貨定趁再低d先入？

龔成老師：

九毛九（9922）這類半新股，分析比較難，因為財務數據少，好難做到準確的估值。

佢係內地中式快時尚餐飲品牌管理及運營者，佢係內地所有中式快時尚餐飲餐廳收入中排名第三，於華南地區則排名第一。

可見，在業務上、品牌上、市佔率上都不差。現時運營269間餐廳，以及管理41間加盟餐廳，而「九毛九」及「太二」為佢的兩個主力品牌。

睇翻佢的財務數據，唔差的，雖然中短期因肺炎會轉弱，但長期仍不差。不過整體上，現價仍少少貴，雖然這股都有長線投資的價值，有貨就持有，無貨，就唔太建議大注投資。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15220：

老師，請問會否計畫再來澳門開班？會否在澳門開授進階班？

龔成老師：

預計今年會在第三季，開基礎班，至於進階班，相信要遲多1、2年，先會在澳門開。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。