如果對80年代嘅香港樂壇有唔多唔少嘅認識，你對80年代嘅日本樂壇認識都一定唔會少。正如上個禮拜睡前講座講到日本80年代同埋香港80年代樂壇係息息相關！我最近就愛上左澤田研二(Sawada Kenjiさん/JULIE），澤田研二唔單止inspire左好多羅文嘅風格，梅姐、鄭少秋都模仿過佢。好多廣東歌都係改編自澤田研二嘅歌，林子祥甚至有一首歌叫做《澤田研二》！哥哥嘅H2O都係改編自佢嘅！✨ 1980年澤田研二第一次黎香港嘅伊館開演唱會（當時香港嘅當紅歌手有張德蘭、鄭少秋、羅文、許冠傑等），我喺網上面搵到相關嘅片段，點知裡面d片段超級超級珍貴，好想同大家分享下！😆 當年澤田研二黎香港真係超級大陣象，因為80年代開始日本嘅文化開始喺香港非常受歡迎，而且澤田研二當時已經係日本嘅殿堂級歌手。演唱會片段就由麗的電視獨家直播。呢個演唱會特輯裡面收錄左好多1980年香港嘅景象同埋訪問！ 第一段片：澤田研二出發之前喺日本聽甄妮改編自佢《勝手にしやがれ》嘅歌《心曲》，佢第一句竟然係問：「呢個女人黎架可？」😂😂😂😂跟住仲要扮甄妮唱歌。 第二段：澤田研二黎到香港啟德機場，有陳秀雯同埋張德蘭接機！ 第三段：許冠傑同許冠英（日本叫佢哋ホイ兄弟，許氏兄弟嘅意思）同澤田研二打招呼，當時《半斤八兩》喺日本好紅架！😍 第四段：澤田研二喺香港飲茶、行唱片舖、搭天星小輪！行唱片舖呢個情境真係好正！！！我好少睇到有咁耐之前嘅唱片舖嘅片！😭😭 第五、六段：香港歌迷接受日本電視台訪問，個個都勁開心。 第七段：特輯裡面嘅1980年香港景色，有維園、赤柱、九廣鐵路、新界、淺水灣等景色！新界真係鄉村地方🤣 第八段：澤田研二表演（日本音樂節目表演） 我睇呢段特輯睇得非常非常入迷，裡面有好多珍貴嘅片段，仲要係1980年！！分享比大家！香港真係好靚呀！！！大家如果有興趣睇曬成段，只要喺YouTube search 「澤田研二 香港」就搵到！🥰❤️ 影片來源： https://www.youtube.com/watch?v=89f0fTIZJUQ (アレシオネ) https://www.youtube.com/watch?v=be7vJx2SP-I （iroirod03c60）

【百變鼻祖-羅文（八問）】 1. 點解羅文咁執著自己嘅形象？ 答：同之前描述過嘅一樣，一就係因為佢細細個已經睇好多粵劇、芭蕾舞、電影等藝術，所以細細個已經培養左獨特嘅藝術/潮流嘅觸覺。另外一個原因就係因為佢去左日本發展。 2. 日本發展？ 答：根據劉培基喺無線節目《羅文·歌在人心》第二集就話羅文係去左日本之後先開始鍾意著釘珠片同膠片嘅衫，因為燈光打落去好靚。（文末有link重溫） 3. 有無例子佢有幾執著「靚」呢件事？ 答：根據劉培基喺無線節目《羅文·歌在人心》第二集就話，羅文曾經搵人幫佢做衫釘珠片上去，叫人送去劉培基屋企。點知羅文一見到之後覺得件衫好樣衰，一手由住喺二十幾樓嘅劉培基屋企掉左落街，十幾分鐘管理處就搵佢話「劉生，你有件衫跌左落街。」（文末有link重溫） 補充：歌迷憶述，有一次有一個宣傳活動淨係招待傳媒，經人介紹佢就有機會出席。原先佢唔想出席，因為佢知道放工之後無時間換衫，如果著便服去會比羅文鬧。但係佢最後都去左，之後比羅文黑面。之後一次羅文嘅生日會，歌迷就特登著西裝去，羅文見到即刻好開心話：「今日終於著得靚靚見我啦！」 4. 佢對衫又有咩執著？ 答：歌迷憶述，羅文70年代嘅時候已經好注重唱片封套設計，每一首歌都有特定嘅形象或者舞步。每當佢出碟嘅時候佢就好鍾意著同一件衫出場唱歌，好多呢d衫都係特別訂製。而呢d歌衫佢曾經有過一個貨倉保存。有d歌衫佢仲有改裝之後再著，例如佢件好出名嘅孔雀毛斗篷，佢就改裝左三次。 （呢件衫用大約5000支孔雀羽毛整成，件衫佢著過幾次，一次係1981年演唱會，第二次係1981年金唱片，第三次就係1996年演唱會。） 補充：羅文似乎好鍾意改裝衫，歌迷補充有一次羅文同甄妮上歡樂今宵做特輯，著左一件金色皮西裝，完場之後羅文就問歌迷：「套衫得唔得？」歌迷就話好似有少少怪怪地，羅文就回應：「我見著一次，我攞塊料落廟街d 街邊檔造架！佢仲話塊皮車死佢！哈哈！」 5. 羅文係咪特別鍾意著名牌？ 答：唔係。歌迷憶述，佢見靚就買。不過西裝佢就特別偏好Giorgio Armani (同陳百強一樣）。羅文嘅名牌固然多，但係佢唔會話唔係名牌就唔著。 6. 話說羅文唱激光中嘅時候果副眼鏡好出名。 答：其實羅文唱激光中嘅時候有過幾副眼鏡，但係最出名就可能係93年歡樂滿東華果副，印象中mv裡面都有戴過。呢副眼鏡羅文好鍾意，佢2001年《名曲滿天星》都攞翻出黎介紹，佢話當年要接近$8000，我做過少少資料搜集之後發現原來呢副眼鏡喺法國人手製造，牌子係Alain Mikli，係眼鏡入面嘅名牌。（文末有link重溫） 7. 羅文不斷挑戰性別界限。 答：有人話羅文嘅影響係首澤田研二嘅影響，又喺日本見識左好多野之後就開始塑造佢嘅個人風格，佢自己都非常鍾意Elton John所以或許都有影響到佢嘅個人風格。其實1983年《激光中》嘅mv佢已經開始戴耳環，當年相信根本無咩人接受到，而且佢嘅風格又妖妖地，又公開全裸相片，再唱埋《波斯貓》其實當年唔係好多人接受到。但係羅文呢種突破，就正正不斷咁挑戰性別定型，呢種曖昧成就左佢獨一無二嘅風格。 8.就算佢開始老嘅時候仲係咁有style。 答：睇下2001年《名曲滿天星》第一集就知道，羅文雖然年紀開始大但係依然咁有style，每唱一首歌佢依然仲係會換一個精心設計嘅造型。件衫淨係扣一粒鈕，又著皮嬲，又戴耳環，仲戴住條Vivienne Westwood皮帶，潮！ 羅文做事認真，佢嘅造型個個都係精心設計，永不過時。 （文章太長，參考留言附上）

簡單介紹羅文之後，聽日就更深一步同大家介紹羅文，希望大家多多支持！ 【你不能不認識的羅文——十問（二）】 1. 當年香港吹緊日風，佢有無鍾意嘅日本歌手？ 答：有，佢好鍾意西城秀樹（同梅姐一樣哈哈哈哈），羅文嘅歌例如《讓我奔放》、《好歌獻給你》都係改編自西城秀樹嘅歌。亦有人話佢好鍾意澤田研二，但係就唔太肯定，不過的確有人攞佢同澤田研二嘅表演風格對比，話有d類似。 2. 咁佢有咩出名嘅歌呀？ 答：太多喇，《家變》、《幾許風雨》仲有家傳戶曉嘅《激光中》同埋《獅子山下》。70年代電視劇主題曲大行其道，而佢就係靠《家變》、《前程錦繡》、《小李飛刀》呢三隻電視劇主題曲而開始紅。 3. 咁佢幾時開第一場演唱會？ 答：《羅文演唱會》，1978年，喺利舞台。果陣紅館仲未開架！當時有汪明荃做嘉賓，一個鐘頭d飛就賣曬。半年之後再開一個真係自己一個，無嘉賓嘅演唱會。 4. 咁佢有無喺世界各地開過演唱會？ 答：有，美國、英國、加拿大都有！當年只係1979年。佢係 第一個 喺英國Royal Albert Hall表演嘅香港歌手。 5. 聽講佢有用組合嘅形式過台？ 答：無錯，而佢嘅拍檔就係沈殿霞——肥姐。 1971年佢哋組成「情侶合唱團」，不過要等肥姐無戲拍先有得登台，其他時間就無咩嘢做。佢哋仲出左一隻碟叫做《沈殿霞 羅文 No.1》！至於點解叫「情侶合唱團」？肥姐就話係當年有個姓關嘅記者幫佢哋改嘅。「情侶合唱團」主要都係唱國語歌，其中一首佢地經常合唱叫做《一條橋》，特輯《肥肥繽紛三十年》同埋肥姐2001年嘅演唱會演唱此曲嘅片段大家仲可以上網重溫。肥姐演唱會佢哋合唱完呢首歌之後羅文更加忍唔住感觸落淚。肥姐安慰佢：「錫曬，錫曬！唔好喊啦！」。（文末有link可以睇翻） 肥姐話羅文出去登台嘅時候食唔慣當地嘅嘢食，淨係食肯食木瓜，翻到香港個人皮膚變左黃黃地色，笑死。 6. 其實佢真係做左好多「第一」！ 答：無錯，除左係第一個喺英國Royal Albert Hall表演嘅香港歌手，佢仲係： -第一個喺利舞台開個人演唱會嘅香港男歌手 -第一個係美國Lincoln Centre表演嘅香港歌手 -第一個公開全裸寫真嘅香港男藝人 -創作左第一套粵語音樂劇《白蛇傳》 -第一個喺大陸公開獻唱嘅香港男歌手 -第一個喺香港文化中心開演唱會嘅歌手 -第一個非日本歌手攞日本電視台《全日本歌謠選手比賽》冠軍 （其實仲有好多） 7. 佢有無好似梅姐哥哥佢哋咁樣告別樂壇？ 答：有，1996年開完《羅文的光輝舞台》演唱會之後。 8. 咁佢有無收徒弟？ 答：有，包括容祖兒同埋鄭伊健。 羅文仲有做容祖兒第一場演唱會《容祖兒美麗在望慈善演唱會》嘅嘉賓，一齊唱《問誰領風騷》同《激光中》（文末有link）。容祖兒嘅《最後一課》都係為左紀念羅文。 9. 羅文嘅最後一場演唱會係？ 答：1999年《羅文俄羅斯創世紀音樂會》，同佛羅內斯交響樂團合作(The Voronezh state Philharmonic Orchestra) 。佢一直好想同管弦樂團合作，入左英皇之後同佛羅內斯交響樂團合作左《情繫佛羅內斯》呢隻唱片，聽聞當年係有一個香港人去左佛羅內斯做指揮，所以特別有意義。做完唱片之後就請佛羅內斯交響樂團黎開show。 10. 佢離世嘅原因係？ 答：肝癌，離世嘅時候57歲。 如果羅文仍然在生嘅話，佢已經75歲。 第一頁相片：羅文《我的挑選》唱片封面 第二、三頁相片來源/版權：文化博物館 第二頁相片連結（左上角）：https://www.hkmemory.hk/collections/Roman_Tam/All_Items/images/201710/t20171010_86842_cht.html 第二頁相片連結（右下角）：shorturl.at/cqFHP 第三頁相片連結（左上角）：shorturl.at/jsyQ9 第三頁相片（Joey演唱會）連結（右下角）：https://www.youtube.com/watch?v=3IpmQju_Djg 【截圖】 參考網站：https://www.hkmemory.hk/collections/Roman_Tam/about/index_cht.htmlh 羅文、肥姐《一條船》表演： 《肥肥繽紛三十年 》：https://www.youtube.com/watch?v=ZDoxNFZ9yIo 肥姐2002年演唱會：https://www.youtube.com/watch?v=6GMtUiz08qQ #羅文 #百變羅文的二三事